ᐊᖏᕐᕋᖓᑕ ᐅᖓᓯᒋᓪᓗᓂᐅᒃ, ᐃᓕᑦᑎᕙᓪᓕᐊᕗᖅ ᐱᕈᖅᐸᓪᓕᐊᓪᓗᓂᓗ ᐃᓅᖃᑎᒥᓂᒃ ᑖᔅᓱᑐᓇᖅ. ᐊᒡᒋᐅ ᑎᒥᑐᕈᒃ ᐃᖃᓗᒃᑑᑦᑎᐊᕐᒥᐅᑕᒃᓴᔭᐅᔪᖅ, ᓄᓇᕗᒻᒥ ᑭᓯᐊᓂ ᒫᓐᓇ ᐃᓕᓐᓂᐊᖅᑐᖅ ᐋᑐᕚᒥ ᓄᓇᕗᑦ ᓯᕗᓂᒃᓴᕗᒻᒥ. ᐊᕐᕌᒎᖕᓄᑦ ᒪᕐᕉᖕᓄᑦ ᐃᓕᓐᓂᐊᖅᓯᒪᓕᖅᑐᖅ ᐃᓄᐃᑦ ᐃᓕᖅᑯᓯᖏᓐᓂᒃ ᐃᓕᓐᓂᐊᖃᑕᐅᓕᖅᖢᓂ Algonquin College-ᒥ. ᑖᓐᓇ ᐱᓕᕆᐊᖑᔪᖅ ᐅᖃᐅᓯᖃᖅᐸᒃᐳᖅ ᐅᖃᐅᓯᕐᒥᒃ, ᐃᓕᖅᑯᓯᕆᔭᐅᔪᒥᒃ, ᖃᓄᐃᓕᐅᖅᑕᐅᕙᓚᐅᖅᑐᓂᒃ, ᒫᓐᓇᓕᓴᕐᓂᒃ ᐃᓱᒪᒋᔭᒃᓴᓂᒃ ᐃᓚᖃᖅᖢᓂᓗ ᖁᙱᐊᖅᑕᐅᓂᕐᒥᒃ. ᐊᓕᐊᓇᐃᒋᓂᖅᐹᕆᖃᑦᑕᖅᓯᒪᔭᖏᑦ ᒫᓐᓇᒧᑦ ᑎᑭᖦᖢᒍ ᖁᙱᐊᖅᑕᐅᕙᒃᖢᓂ ᑲᑎᖃᑎᖃᖅᐸᒃᖢᓂᓗ ᐃᓱᒪᖃᖃᑎᒌᒃᐸᒃᑐᓂᒃ ᐃᓄᖕᓂᒃ ᐊᒥᖅᑳᖃᑎᖃᖅᑐᓂᒃ ᑐᕌᕆᔭᒥᓂᒃ. ᐃᓕᑦᑎᕙᓪᓕᐊᓪᓗᓂ ᐅᖃᐅᓯᕐᒥᓂᒃ ᖁᕕᐊᓇᓚᐅᕆᕗᖅ. 

ᓯᕗᓪᓕᖅᐹᖓᓂ ᐊᕐᕌᒍᒥ ᐋᑐᕚᒥ, ᓇᒻᒥᓂᖃᕐᓂᕐᒧᑦ ᐃᓕᓐᓂᐊᓚᐅᖅᑐᖅ ᑖᓐᓇ ᓯᕗᓪᓕᖅᐹᕆᓕᖅᑕᖓ ᐊᕐᕌᒍ ᐃᓕᖅᑯᓯᓕᕆᓂᕐᒧᑦ. ᐃᓕᓐᓂᐊᕐᕕᐊᕈᓯᖅ ᑕᐃᔭᐅᔪᖅ ᐃᓕᓐᓂᐊᑦᑎᐊᕐᓂᕐᒧᑦ ᑲᔪᓯᑦᑎᐊᕐᓂᖅ ᐊᒻᒪ ᐃᓚᐅᖃᑕᐅᓂᖅ ᐃᓅᓯᓕᕆᔭᐅᓂᕐᒧᑦ ᐃᑲᔪᓚᐅᖅᐳᖅ ᐊᓂᒍᐃᔪᓐᓇᕐᓂᖓᓂ ᐅᖁᒪᐃᑦᑐᒥ ᐃᓕᓐᓂᐊᕈᑎᒋᔭᖓᓂ ᐊᕐᕌᒎᓚᐅᖅᑐᒥ. ᖃᑕᙳᑎᒌᑦ ᐃᑲᔪᖅᑕᐅᓂᖏᑦ ᐃᑲᔪᓚᐅᕆᕗᑦ. ᑕᐃᒪᓐᖓᑦ ᒪᒃᑯᑦᑑᒐᒥ ᑎᒥᑐᕈᒃ ᐱᓐᖑᐊᖃᑕᐅᖃᑦᑕᖅᓯᒪᔪᖅ. ᐊᕿᖃᑕᐅᓲᖅ, ᕼᐋᑭᖅᑐᖅ, ᐹᔅᑭᑦᐹᓪ, ᐊᒻᒪ ᕚᓕᐹᓪ. ᐋᑐᕚᒥ ᕼᐋᑭᖅᑎᓂᒃ ᐃᓚᐅᖃᑦᑕᖅᓯᒪᔪᖅ, ᐱᙳᐊᖃᑕᐅᖃᑦᑕᖅᓯᒪᓪᓗᓂ ᓯᓚᒥ ᕼᐋᑭᕐᕕᖕᓂ. 

ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐃᓱᒪᔪᓄᑦ ᐊᐅᓪᓚᕈᒪᓂᕐᒥᒃ ᓄᓇᒋᔭᒥᓂᑦ ᐃᒪᓐᓇᐅᓇᔭᖅᐳᖅ, "ᐃᓱᒪᔪᖓᓕ ᑲᑉᐱᐊᓇᖅᑐᒻᒪᕆᐅᔪᓐᓇᕐᓂᖓᓂᒃ ᐃᓱᒪᓪᓗᓂ ᐊᖏᕐᕋᕆᔭᒥᓂᒃ ᐊᐅᓪᓚᕐᓂᐊᕐᓗᓂ ᐊᖏᔪᒧᑦ ᓄᓇᕐᔪᐊᒧᑦ, ᑭᓯᐊᓂᓗᑦᑕᐅᖅ ᐃᑲᔪᖅᑐᖅᑕᐅᑦᑎᐊᖅᐳᒍᑦ ᐃᓅᓪᓗᑕ, ᑕᒪᓐᓇᓗ ᐊᑐᕆᐊᖃᓪᓚᕆᒃᐸᕗᑦ ᒪᒃᑯᖕᓂᑦᑎᓐᓂ, ᐱᓗᐊᙳᐊᖅᖢᓂ ᐊᖏᕐᕋᒧᑦ ᐅᑎᕈᓐᓇᐃᓐᓇᐅᔭᕋᑦᑕ.... ᐱᔪᒪᓂᖃᑦᑎᐊᖅᖢᓂ ᒪᒃᑯᒃᑑᓪᓗᓂ, ᐃᓱᒪᕗᖓ ᐊᓃᕆᐊᒃᓴᖅ ᐊᒻᒪ ᐊᑐᑐᐃᓐᓇᕐᓗᒋᑦ ᐃᑲᔪᖅᓱᐃᓂᐅᔪᑦ ᐊᑐᐃᓐᓇᐅᔪᑦ ᐅᕙᑦᑎᓐᓄᑦ." 

ᐊᒥᓱᐊᓗᖕᓂ ᐱᓕᕆᐊᒃᓴᖅᑕᖃᖅᑎᓪᓗᒍ ᑲᑎᙵᔪᓂᒡᓗ ᑲᑎᙵᖃᑎᖃᕈᓐᓇᖅᖢᑎᒃ ᐊᓯᖏᓐᓂᒃ ᐃᓄᖕᓂᒃ, ᐃᓱᒪᔪᖅ ᐋᑐᕚ ᐃᓕᓐᓂᐊᕐᕕᓕᐊᕐᕕᑦᑎᐊᕙᐅᓇᓱᒋᓪᓗᓂᐅᒃ. ᓂᕿᑖᕐᕕᒃᑕᖃᖅᐳᖅ ᐃᓕᓐᓂᐊᖅᑎᓄᑦ ᓂᕿᓪᓚᑦᑖᓂᒃ ᓂᕿᑖᕈᒪᔪᓄᑦ ᐅᓂᒃᑳᕆᓪᓗᓂᓗ ᖃᓄᐃᓕᐅᕈᓘᔭᖅᑐᖃᒐᔪᖕᓂᖓᓂᒃ. ᐃᓄᐃᑦ ᑕᐱᕇᑦ ᑲᓇᑕᒥ ᑲᑐᔾᔨᖃᑎᒌᖑᒻᒥᒻᒪᑕ ᖃᓄᐃᓕᐅᕈᓘᔭᖅᑎᑦᑎᕙᑦᑐᑎᒃ ᐊᒻᒪᓗ ᐃᓕᓴᐃᔨᖏᑦ ᐊᑦᑐᐊᓂᖃᖅᑐᑎᒃ ᐊᓯᖏᓐᓄᑦ ᐃᓄᓐᓄᑦ ᐋᑐᕚᒥ ᐊᒻᒪᓗ ᑕᑯᕋᓐᓈᕆᐊᖅᑐᕈᓐᓇᖅᑐᑎᒃ ᐅᕝᕙᓘᓐᓃᑦ ᓴᓇᙳᐊᕈᓐᓇᖅᑐᑎᒃ. 

ᒪᒃᑯᖕᓂᖅᓴᒧᑦ ᐃᒻᒥᓄᑦ ᐅᖃᐅᔾᔨᔪᓐᓇᕈᓂ ᐃᒪᓐᓇᐅᓇᔭᖅᐳᖅ, "ᖃᐅᔨᒪᕙᒌᕆᐊᖃᙱᑦᑐᑎᑦ, ᐊᒻᒪ ᐱᕕᒃᓴᖃᑦᑎᐊᖅᐳᖅ ᐆᒃᑐᕐᓂᕐᒧᑦ ᑕᒻᒪᕐᓂᕐᒧᓪᓗ ᖃᓄᐃᓕᐅᕈᒪᖕᒪᖔᖅᐱᑦ. ᐊᒥᓱᐊᓗᖕᓂᒃ ᐊᔾᔨᒌᙱᑦᑐᓂᒃ ᐆᒃᑐᕈᓐᓇᖅᐳᑎᑦ, ᐊᒻᒪ ᐃᑲᔪᖅᓱᖅᑕᐅᑦᑎᐊᖅᐳᒍᑦ ᑕᐃᒪᐃᓕᐅᕈᓐᓇᖁᓪᓗᑕ, ᐊᔾᔨᒌᙱᑦᑐᓂᒃ ᐱᓕᕆᐊᒃᓴᓂᒃ ᐆᒃᑐᕈᓐᓇᕐᓗᑕ ᐊᒻᒪ ᖃᐅᔨᓗᑕ ᑭᓱᒥᒃ ᐱᐅᒃᓴᕐᒪᖔᑦᑕ. ᒪᑐᐃᙶᑐᐃᓐᓇᖅᐸᒡᓗᑎᑦ ᐱᕕᒃᓴᓄᑦ ᐊᔪᕐᓇᖅᑰᔨᔪᓄᑦ ᑕᐃᑲᓂ. ᐊᒥᓱᐊᓗᖕᓂᒃ ᐃᑲᔫᑎᒃᓴᖅᑕᖃᖅᐳᖅ ᐅᕙᑦᑎᓐᓂᒃ ᐃᑲᔪᕈᓐᓇᖅᑐᓂᒃ ᑕᐅᑐᙳᐊᖅᑕᕗᑦ ᐱᓪᓚᕆᙳᖅᑎᑦᑐᒪᓪᓗᒋᑦ. ᓂᕆᐅᖕᓂᖃᑦᑎᐊᖅᐳᖅ." ᐊᒃᓱᕉᓴᓗᐊᓕᓚᐅᖅᐳᖅ ᖃᐅᔨᒪᔪᒪᓪᓗᓂ ᖃᓄᐃᓕᐅᕈᒪᖕᒪᖔᕐᒥᓂᒃ ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᕇᕋᒥ ᑕᐃᒪᐃᓚᐅᙱᓚᖅ. 

ᑲᔪᖏᖅᓴᐃᓂᕐᒧᑦ, ᑎᒥᑐᕈᒃ ᑕᑯᓐᓇᖅᑐᖅ ᓄᓇᕗᒻᒥ ᐃᔾᔪᐊᕈᒥᓇᖅᑐᓂᒃ ᓲᕐᓗ ᔪᐊᑕᓐ ᑐᑐ ᐊᒻᒪᓗ ᐊᓯᖏᑦ ᖃᐅᔨᒪᔭᐅᑦᑎᐊᖅᑐᑦ ᐃᓄᐃᑦ ᓇᓂᓯᓯᒪᔪᑦ ᑲᔪᓯᑦᑎᐊᖅᓯᒪᔪᓂᒃ. ᑕᐅᑐᖕᒥᔪᖅ ᐃᓕᓐᓂᐊᖅᑕᒥᓂᒃ ᐊᓂᒍᐃᓂᑯᓂᒃ ᐃᓕᓐᓂᐊᖃᑕᐅᓚᐅᖅᑐᓂᒃ ᐊᔾᔨᖓᓂᒃ ᐃᓕᖅᑯᓯᓕᕆᓂᕐᒥᒃ ᐃᓕᓐᓂᐊᖅᑕᒥᓂᒃ, ᓲᕐᓗ ᓄᓇᕘᑉ ᓯᕗᓕᖅᑎᖓᑎᑐᑦ. ᐱᖃᓐᓇᕆᔭᖓᑕ ᐃᓚᖓᑦ ᐊᐃᑉᐸᖓᓂ ᐊᕐᕌᒍᒦᑦᑐᖅ ᑲᔪᖏᖅᓴᖅᑕᐅᑦᑎᐊᓚᐅᕆᕗᖅ. ᑲᔪᖏᖅᓴᖅᑕᐅᓚᐅᕆᕗᖅ ᐱᓕᕆᖃᑎᖃᕈᒪᓪᓗᓂ ᐃᓄᐃᑦ ᑕᐱᕇᑦ ᑲᓇᑕᒥ ᓯᓚᑦᑐᖅᓴᕐᕕᒡᔪᐊᕐᒥ ᖃᖓᑭᐊᖅ.  

ᐱᓕᕆᖃᑎᖃᖃᑦᑕᖅᖢᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᐅᔭᐅᑎᓪᓗᒍ ᐃᑲᔪᖅᓯᒪᕗᖅ ᑎᒥᑐᕈᒃ ᖃᐅᔨᕚᓪᓕᖅᖢᓂ ᓄᓇᕐᔪᐊᒥ. ᐆᑦᑐᕈᓐᓇᖅᓯᓚᐅᖅᑯ ᐃᖅᑲᓇᐃᔭᖅᑐᓕᕆᔨᒃᑯᓐᓂᑦ ᐊᒻᒪᓗ ᐊᕙᓗᒥᐅᑕᖃᖅᑐᓂ ᐃᑲᔪᖅᑐᐃᑦᑎᐊᖅᑐᓂᑦ ᓄᓇᓕᐅᔪᓂᑦ ᐃᓄᓐᓂᑦ. ᐅᑭᐅᖅᑕᖅᑐᒥ ᓱᕈᓯᕐᓄᑦ ᒪᒃᑯᒃᑐᓄᓪᓗ ᑐᙵᕕᒃᑯᓐᓂ ᐃᖅᑲᓇᐃᔭᓚᐅᖅᓯᒪᕗᖅ ᒫᓐᓇᓵᖑᓚᐅᖅᑐᖅ ᐃᓕᑦᑎᕚᓪᓕᓚᐅᖅᖢᓂᓗ ᐃᓅᖃᑎᒌᖕᓂᕐᒧᑦ ᐃᓱᒪᒋᔭᒃᓴᓂᒃ ᐊᑐᖅᑕᐅᔪᓐᓇᖅᑐᓂᒡᓗ ᒪᓂᒪᔪᓂᒃ ᖃᐅᔨᒪᓚᐅᙱᑕᒥᓂᒃ. ᐱᓕᕆᐊᖃᕐᓂᖅ ᐊᔾᔨᒌᙱᑦᑐᓂ ᐃᖅᑲᓇᐃᔮᓂ ᐃᓕᑦᑎᔾᔪᑕᐅᔪᓐᓇᖅᐳᖅ ᐊᑐᐃᓐᓇᐅᔪᓂᒃ ᐃᑲᔫᑎᒃᓴᓂᒃ ᐊᒻᒪ ᐊᔾᔨᒌᙱᑦᑐᓂᒃ ᐃᓱᒪᒋᔭᒃᓴᓂᒃ, ᑎᒥᑐᕈᒃ ᖃᐅᔨᓚᐅᖅᐳᖅ. 

ᐊᖏᕐᕋᖓᑕ ᐅᖓᓯᒃᑐᐊᓘᒐᓗᐊᖅ, ᑭᓯᐊᓂ ᐃᓕᑉᐸᓪᓕᐊᔭᖓ ᐆᒻᒪᑎᒥᓄᑦ ᖃᓂᒋᔭᖃᖅᐳᖅ. ᐊᒡᒋᐅ ᑎᒥᑐᕈᒃ ᐃᓕᑦᑎᕙᓪᓕᐊᕗᖅ ᐅᖃᐅᓯᕐᒥᓂᒃ, ᐃᓕᖅᑯᓯᕐᒥᓂᒃ, ᐱᐅᓯᕆᔭᐅᕙᓚᐅᖅᑐᓂᒃ ᐊᓯᒃᑲᓐᓂᖏᓐᓂᒡᓗ ᑲᑎᖃᑎᖃᖅᐸᒃᖢᓂ ᐊᓯᖏᓐᓂᒃ ᐃᓄᖕᓂᒃ ᓄᓇᕗᑦ ᓯᕗᓂᒃᓴᕗᒻᒥ. ᓇᖕᒥᓂᖅᑖᖅᐸᓪᓕᐊᓕᓚᐅᖅᓯᒪᕗᖅ ᑭᓯᐊᓂ ᐃᓕᖅᑯᓯᓕᕆᓕᓚᐅᖅᐳᖅ ᐱᔪᒃᓯᑎᑦᑎᕐᔪᐊᖅᓯᒪᓪᓗᓂᓗ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᕿᖅᑯᐊᑦ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ ᑎᑎᕋᖅᓯᒪᔪᒥᒃ.