ᐃᓅᓯᖓᓂ ᐊᒥᓱᓂᒃ ᐊᒃᓱᕈᕐᓇᖅᑐᓂᒃ ᓵᙵᔭᖃᓚᐅᖅᐳᖅ, ᐊᓂᒍᖅᑎᓐᓇᓱᐊᖅᖢᓂᒋᓪᓗ, ᑲᔪᓰᓐᓇᓚᐅᖅᐳᖅ ᐊᒃᓱᕈᐃᓐᓇᖅᖢᓂᓗ, ᐊᒃᓱᕈᑦᑎᐊᖅᖢᓂ ᐱᓕᕆᑦᑎᐊᕈᒪᓪᓗᓂ ᐃᓚᒥᓄᑦ. ᐱᒋᐊᓕᓵᖅᑎᓪᓗᒍ, ᐋᒡᓂᔅ ᕗᕌᓐᓯᔅ ᐱᕈᖅᓴᓚᐅᖅᓯᒪᔪᖅ ᕗᐊᑦ ᒪᒃᕘᓴᓐ ᐊᒻᒪ ᑦᓯᐃᒡᕼᐃᒃᔅ ᐊᑯᓐᓂᖓᓂ, ᐊᖓᔪᖅᑳᖏᑕ ᓄᓇᖏᓐᓂ. ᐊᓈᓇᖓ ᐃᓅᔪᓐᓃᓚᐅᖅᓯᒪᖕᒪᑦ ᑎᓴᒪᓂᒃ ᐅᑭᐅᖃᖅᖢᓂ ᑭᓯᐊᓂ ᓱᓕ ᓄᓇᖓᓂ ᓄᓇᖃᓚᐅᖅᓯᒪᖕᒪᑕ ᐊᑖᑕᖓ ᒥᑭᒋᐊᕐᓂᐊᕈᓐᓇᖁᓪᓗᒍ. 

ᐱᓕᕆᔨᒻᒪᕆᐅᓂᕐᒥᒍᑦ, ᕗᕌᓐᓯᔅ ᐱᒋᐊᓚᐅᖅᓯᒪᕗᖅ ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᑎᑎᕋᖅᑎᐅᓪᓗᓂ ᑎᓰᒡᕼᐃᒃᒥ ᑕᐃᑲᓂᓗ ᐃᖅᑲᓇᐃᔭᓚᐅᖅᓯᒪᓪᓗᓂ ᐊᕐᕌᒍᓄᑦ ᐱᖓᓱᓄᑦ. ᓯᖓᐃᓂᕐᒧᑦ ᓄᖅᑲᖓᓚᐅᑲᒃᖢᓂ ᐃᓕᓐᓂᐊᒃᑲᓐᓂᓕᖅᖢᓂᓗ ᐱᓇᔪᒃᖢᓂᓗ ᐊᖏᕐᕋᒥ ᐃᑲᔪᖅᑎᐅᓂᕐᒧᑦ/ᓇᖕᒥᓂᖅ ᐊᖏᕐᕋᒥ ᐸᖅᑭᔨᐅᓂᕐᒧᑦ ᐱᓕᕆᐊᒧᑦ ᐃᓕᓐᓂᐊᕐᓂᕐᒧᑦ ᓄᖅᑲᖓᑎᓪᓗᒍ ᐃᖅᑲᓇᐃᔮᒥᒍᑦ. ᐃᖅᑲᓇᐃᔮᖅᑖᕈᓐᓇᓚᐅᖅᑐᖅ ᐃᓕᓐᓂᐊᕈᒪᒍᓂ ᐊᒻᒪᓗ ᓚᐃᓴᓐᓯᖃᕈᒪᓪᓗᓂ ᐋᓐᓂᐊᓯᐅᖅᑎᕈᕈᒪᓪᓗᓂ. ᐱᔭᕇᕋᒥ ᐃᓕᓐᓂᐊᖅᑕᒥᓂᒃ ᐃᓱᒪᓕᐅᕆᐊᖃᓚᐅᕐᒪᑦ ᑲᔪᓯᓂᐊᕐᒪᖔᕐᒥ ᑎᑎᕋᖅᑎᐅᓂᕐᒥᒃ ᐅᕝᕙᓘᓐᓃᑦ ᑲᔪᓯᓂᐊᕐᒪᖔᖅ ᐃᓕᓐᓂᐊᕐᓂᕐᒥᓂᒃ ᐊᒻᒪᓗ ᓅᑦᑐᒪᓕᓚᐅᖅᑐᖅ ᐃᓅᕕᒻᒧᑦ ᐊᒻᒪᓗ ᑲᔪᓯᓗᓂ ᐃᓕᓐᓂᐊᕐᓂᕐᒥᓂᒃ. 

ᕗᕌᓐᓯᔅ ᐃᓚᐅᓚᐅᖅᐳᖅ ᐃᓗᐊᖅᓴᐃᔨᙳᕆᐅᖅᓴᓂᕐᒧᑦ ᐃᓕᓐᓂᐊᒐᒃᓴᒥ, ᐊᕐᕌᒎᖕᓄᑦ ᒪᕐᕉᖕᓄᑦ ᐃᓕᓐᓂᐊᕐᓂᕐᒧᑦ ᓄᖅᑲᖓᓪᓗᓂ, ᐃᓕᓐᓂᐊᖃᑕᐅᑎᓪᓗᒍᓗ ᑐᓴᓚᐅᖅᐳᖅ ᓄᓇᖃᖅᑳᖅᓯᒪᔪᑦ ᖃᓄᐃᙱᑦᑎᐊᕐᓂᕐᒧᑦ ᐅᐃᕆᓯᒪᓂᕐᒧᑦ ᓄᖅᑲᖅᑎᑦᑎᓇᓱᖕᓂᕐᒧᑦ ᐱᓕᕆᐊᒃᓴᒥ, ᐱᓕᕆᐊᒃᓴᖅ ᓄᑖᖑᓪᓗᓂ ᐅᑭᐅᖅᑕᖅᑐᒧᑦ. ᑕᒪᓐᓇ ᐱᓕᕆᐊᖑᔪᖅ ᐅᖃᐅᓯᖃᓚᐅᖅᐳᖅ ᐃᑲᔪᕈᒪᓂᕐᒥᓂᒃ ᐃᓄᓐᓂᒃ ᐊᒻᒪᓗ ᐃᓕᓐᓂᐊᕈᒪᓕᓚᐅᖅᑐᓂ ᔭᓗᓇᐃᕝᒨᖅᑐᓂ ᐃᓕᓐᓂᐊᕆᐊᖅᑐᖅᑐᓂ. ᐃᖅᑲᓇᐃᔮᖅᑖᖅᑎᑕᐅᓚᐅᖅᐳᖅ ᐋᕿᒃᓱᐃᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᑲᔪᖅᑎᐅᓂᕐᒥᒃ ᐊᒻᒪᓗ ᐊᖏᖅᖢᓂ ᐱᐊᓂᒃᓯᙱᖔᖅᖢᓂ ᐊᐃᑉᐸᖓᓂ ᐊᕐᕌᒍᖓᓂ ᐃᓕᓐᓂᐊᖅᑕᒥᓂᒃ. ᑕᐃᑲᓃᓚᐅᖅᑐᖅ ᐊᕐᕌᒍᓕᒫᒥ ᑭᓯᐊᓂ ᐊᖏᕐᕋᐅᔭᕆᐊᖃᓕᕋᒥ ᓄᓇᒃᑰᕈᑎᖓ ᓱᕋᓚᐅᕐᒪᑦ ᐳᓛᕆᐊᖅᓯᒪᓪᓗᓂ. 

ᐃᖅᑲᓇᐃᔭᙱᓚᐅᑲᒃᐸᒃᖢᓂ ᐊᕐᕌᒍᓕᒫᒧᑦ, ᐃᖅᑲᓇᐃᔭᓚᐅᑲᒃᐸᒃᖢᓂ ᑭᓯᐊᓂ ᐃᖅᑲᓇᐃᔭᓚᐅᑲᑐᐃᓐᓇᓕᖅᖢᓂ ᒐᕙᒪᒃᑯᓐᓄᑦ ᐃᑲᔪᖅᑐᐃᓪᓗᓂ ᐃᓕᓐᓂᐊᖅᑎᓂᒃ ᐃᓕᓐᓂᐊᕐᕕᖕᒥ, ᐊᒻᒪᐃᓛᒃ ᐊᖏᕐᕋᕆᔭᐅᔪᓄᑦ ᐳᓛᕆᐊᖅᐸᒃᑐᓄᑦ ᐃᖅᑲᓇᐃᔮᕆᔭᐅᓕᖅᖢᓂ ᖃᓄᐃᙱᑦᑎᐊᖅᑐᓄᑦ ᐃᓚᒌᓄᑦ ᐱᓕᕆᐊᖑᔪᒧᑦ 2012-ᒥ. ᕗᕌᓐᓯᔅ ᐊᖏᕐᕋᕆᔭᐅᔪᓄᑦ ᐳᓛᕆᐊᖃᑦᑕᓚᐅᖅᐳᖅ ᐊᕐᕌᒎᖕᓄᑦ ᒪᕐᕉᖕᓄᑦ ᐊᖓᔪᖅᑳᙳᖅᑎᑕᐅᓚᐅᙱᓐᓂᖓᓂ, ᒫᓐᓇ ᐃᖅᑲᓇᐃᔮᕆᓕᖅᑕᖓ. ᑲᔪᖏᖅᓴᖅᑕᐅᓚᐅᖅᐳᖅ ᐊᖏᕐᕋᕆᔭᐅᔪᓄᑦ ᐳᓛᕆᐊᖅᑎᐅᓂᕐᒧᑦ ᐃᖅᑲᓇᐃᔮᒥᒃ ᓲᖃᐃᒻᒪ ᐃᑲᔪᕈᓐᓇᕋᒥ ᐊᖓᔪᖅᑳᓂᒃ ᓄᓇᓕᖓᓂ, ᐱᓕᕆᐊᒃᓴᓂᒃ ᐊᒻᒪ ᐱᓕᕆᐊᒃᓴᓂᒃ ᐱᓕᕆᖃᑎᒋᕙᒃᖢᓂᒋᑦ ᐊᒻᒪ ᓇᖕᒥᓂᖅ ᐊᑐᖅᓯᒪᔭᒥᓂᒃ ᐊᒻᒪ ᐊᔪᙱᑕᒥᓂᒃ ᐃᑲᔪᖅᐸᒃᖢᓂ ᐊᓯᒥᓂᒃ. ᕗᕌᓐᓯᔅ ᐅᒃᐱᕈᓱᒃᐳᖅ ᐱᒻᒪᕆᐅᓂᖓᓂᒃ ᐱᐅᔪᒃᑯᑦ ᐃᔾᔪᐊᒐᒃᓴᑦᑎᐊᕙᐅᓗᓂ ᕿᑐᕐᖓᒥᓄᑦ ᐊᒻᒪ ᐆᒃᑑᑎᑦᑎᐊᕙᐅᓗᓂ ᑖᒃᑯᓄᖓ.

ᐃᓱᒪᒋᓪᓗᒋᑦ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᑦ ᐊᐅᓪᓚᕆᐊᖃᖅᑐᑦ ᓄᓇᓕᖏᓐᓂ ᐃᓕᓐᓂᐊᒃᑲᓐᓂᕐᓗᑎᒃ, ᕗᕌᓐᓯᔅ ᐅᖃᐅᔾᔨᒋᐊᕈᑎᖓ ᐃᒪᓐᓇᐅᓇᔭᖅᐳᖅ, "ᑕᐃᒪᐃᓕᐅᑐᐃᓐᓇᕆᑦ." ᐊᐅᓪᓚᕋᒥ ᐃᓕᓐᓂᐊᕆᐊᖅᑐᓂ, ᑲᑉᐱᐊᓱᓚᐅᖅᑐᖅ ᕿᑐᕐᖓᖃᕋᒥ 7-ᓂᒃ ᐊᒻᒪᓗ ᐃᓱᒫᓗᑦᑐᓂ ᓅᓐᓂᐊᕆᐊᔅᓴᖅ ᐊᖏᕐᕋᒥᓂᒃ ᐊᒻᒪᓗ ᖃᓄᐃᒃᑲᔭᕐᒪᖔᖅ ᑲᔪᓯᑦᑎᐊᖏᑉᐸᑦ. ᐅᖃᓪᓚᖃᑎᖃᓚᐅᖅᐳᖅ ᐃᓐᓇᕐᒧᑦ ᐃᖅᑲᐃᑎᑦᑎᓪᓗᓂ ᐊᖏᕐᕋᑐᐃᓐᓇᕈᓐᓇᕐᓂᕐᒥᓂᒃ ᑲᑉᐱᐊᓱᖕᓂᕐᒥᓂᒃ ᓵᙵᓕᓚᐅᖅᐳᖅ ᐊᓂᓪᓗᓂᓗ. "ᑕᒪᓐᓇ ᐱᐅᓛᖑᓇᓱᒋᓚᐅᖅᑕᕋ ᐃᓱᒪᓕᐅᕈᑎᒋᓚᐅᖅᑕᕋ ᕿᒪᕉᑎᓪᓗᖓ ᑲᑉᐱᐊᓱᖕᓂᕋᓗ ᓵᙵᓪᓗᒍ. ᐅᖃᐅᑎᐃᓐᓇᓲᕆᕙᒃᑲ ᐃᓄᐃᑦ, ᑲᑉᐱᐊᓱᖕᓂᓯ ᓵᙵᓗᒋᑦ... ᑕᐃᒪᐃᓕᐅᑐᐃᓐᓇᕆᑦ... ᐱᕚᓪᓕᕐᓇᒻᒪᕆᖕᓂᐊᖅᑐᖅ ᐃᓱᐊᓂ." ᓇᓗᓇᐃᖅᓯᕗᖅ ᐊᒃᓱᕈᕐᓇᕐᓂᖓᓂ ᕿᒪᐃᓪᓗᓂ ᐃᓚᒥᓂᒃ, ᐊᖓᔪᖅᑳᒥᓂᒃ, ᐃᑦᑐᕆᔭᐅᔪᓂᒃ, ᐊᖏᕐᕋᒥᓂᒃ ᕿᒪᐃᓪᓗᓂ ᐊᓯᐊᓄᐊᕐᓗᓂ ᓲᕐᓗ ᓄᓇᓕᐸᐅᔭᐅᓂᖅᓴᒧᑦ. 

ᐃᓕᓐᓂᐊᕆᐊᕐᓂᖅ ᑐᓗᖅᑕᕈᑎᑐᐊᖑᙱᓚᖅ ᕗᕌᓐᓯᔅᒧᑦ. ᐱᕈᖅᓴᓪᓗᓂ, ᐊᒃᑐᖅᑕᐅᓯᒪᕗᖅ ᐃᒥᐊᓗᖕᒧᑦ ᑐᖁᔪᓄᓪᓗ ᓄᓇᓕᖓᓂ. ᐊᓈᓇᖓ ᐃᓅᔪᓐᓃᕐᒪᑦ, ᖃᑕᙳᑎᖏᓪᓗ ᐃᓛᓐᓂᒃᑯᑦ ᐊᕕᑎᑕᐅᕙᓚᐅᖅᐳᑦ ᐱᕈᖅᓴᔭᐅᓪᓗᑎᒡᓗ ᐊᒃᑲᖏᓐᓄᑦ. ᑕᒪᒃᑯᐊ ᐊᕝᕕᐊᕈᑕᐅᕙᒃᑐᑦ ᐊᓂᒍᖅᑎᑦᑐᒪᓪᓗᒋᑦ, ᕗᕌᓐᓯᔅ ᐅᖃᓚᐅᖅᐳᖅ, "ᑲᔪᓯᑐᐃᓐᓇᓚᐅᖅᐳᖓ. ᓴᐱᓕᓚᐅᙱᑦᑐᖓ. ᐊᒥᓱᐊᖅᑎᖅᖢᖓ ᓴᐱᓕᕈᒪᕙᓚᐅᖅᐳᖓ, ᑭᓯᐊᓂ ᕿᑐᕐᙵᖅᑖᖅᐸᓪᓕᐊᓕᓚᐅᖅᐳᖓ ᒪᒃᑯᓗᐊᖅᖢᖓ, ᕿᑐᕐᙵᒃᑲᓗ ᐅᕙᓐᓂᒃ ᑲᔪᖏᖅᓴᐃᓪᓚᕆᓚᐅᖅᐳᑦ ᐱᓇᔪᐃᓐᓇᖁᔨᓪᓗᑎᒃ ᓯᕗᒻᒧᐊᖏᓐᓇᖁᔨᓪᓗᑎᒡᓗ ᐱᔪᓐᓇᕐᓂᓕᒫᓐᓂᓪᓗ ᐱᓕᕆᔪᒪᓪᓗᖓ."

ᐅᐃᕆᓯᒪᓂᖅ ᐊᒃᓱᕉᑕᐅᓚᐅᖅᐳᖅ ᕗᕌᓐᓯᔅᒧᑦ, ᑭᓯᐊᓂ ᐱᔪᒪᓂᖃᑦᑎᐊᓚᐅᖅᐳᖅ ᓄᖅᑲᖅᑎᑦᑎᔪᒪᓪᓗᓂ ᑕᒪᑐᒥᖓ ᐊᑐᖅᑕᐅᖏᓐᓇᖅᐸᒃᑐᒥᒃ ᐱᕈᖅᓴᓚᐅᖅᑎᓪᓗᒍ ᑕᐃᒪᐃᑦᑐᒃᑰᖅᓯᒪᓪᓗᓂ ᓇᖕᒥᓂᖅ. ᐅᐃᕆᓯᒪᓗᐊᖅᐸᙱᖦᖢᓂ ᐱᓕᕆᕙᒃᖢᓂ ᑭᐱᙳᐃᔭᐅᑎᓂᒃ ᓲᕐᓗ ᒥᖅᓱᕐᓂᕐᒥᒃ, ᐅᖃᐅᔾᔪᖅᑕᐅᕙᒃᖢᓂ ᓴᑭᒥᓄᑦ ᓄᓇᒦᑉᐸᒃᖢᓂᓗ. ᒪᒃᑯᖕᓂᖅᓴᐅᑎᓪᓗᒍ, ᓇᖕᒥᓂᖅ ᕿᒧᒃᓯᖃᓚᐅᖅᓯᒪᖕᒪᑦ ᐃᓱᒪᖅᓱᑦᑎᐊᖅᑰᔨᕙᒃᖢᓂᓗ ᓴᐃᓕᑦᑎᐊᖅᖢᓂᓗ ᓄᓇᒦᖃᑦᑕᖅᖢᓂ ᐊᔪᓕᕈᑎᖃᖅᓯᒪᓪᓗᓂ ᐃᖅᑲᐃᔾᔪᑎᒋᕙᒃᖢᓂᐅᒃ ᑕᐃᔅᓱᒪᓂᐅᓚᐅᖅᓯᒪᔪᒥᒃ. 

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ, ᕗᕌᓐᓯᔅ ᐅᖃᕋᔭᖅᑐᖅ, "ᑲᑉᐱᐊᓱᙱᓪᓗᑎᑦ ᐊᒃᓱᕈᕐᓇᖅᑐᓂᒃ ᐱᓕᕆᐊᖃᕆᐊᒃᓴᖅ. ᑲᑉᐱᐊᓱᙱᓪᓗᑎᑦ ᑎᑭᐅᑎᔭᕆᐊᒃᓴᖅ ᑐᕌᒐᕆᔭᕐᓄᑦ ᐊᒻᒪ ᐃᓕᓐᓂᐊᕐᕕᖕᒧᑦ ᐅᑎᕆᐊᒃᓴᖅ, ᐃᖅᑲᓇᐃᔮᒃᓴᒧᑦ ᐱᓇᔪᒋᐊᒃᓴᖅ." ᖃᖓᑐᐃᓐᓇᒃᑯᑦ, ᐃᓕᓐᓂᐊᕐᕕᖕᒧᑦ ᐅᑎᓚᐅᙱᓐᓂᕐᒥᓂ, ᑲᑉᐱᐊᓱᓚᐅᖅᐳᖅ ᐃᖅᑲᓇᐃᔮᖅᑖᕋᓱᒋᐊᒃᓴᖅ ᓯᓚᑐᓗᐊᕋᓱᒋᙱᖦᖢᓂ, ᐱᐅᙱᓗᐊᕋᓱᒋᓪᓗᓂ ᐅᕝᕙᓘᓐᓃᑦ ᐱᔪᓐᓇᑦᑎᐊᖅᑰᔨᙱᖦᖢᓂ. ᐃᓐᓇᕐᒧᑦ ᐊᐱᕆᔭᐅᓪᓗᓂ, "ᖃᓄᕐᓕ ᖃᐅᔨᒪᓂᐊᖅᐱᑦ ᐃᖅᑲᓇᐃᔮᖅᑖᕐᓂᐊᕐᒪᖔᖅᐱᑦ ᐋᒃᑲᓘᓐᓃᑦ ᐃᖅᑲᓇᐃᔮᖅᑖᙱᒃᑯᕕᑦ?" ᐱᓇᔪᓕᓚᐅᖅᐳᖅ ᐃᖅᑲᓇᐃᔮᖅᑖᖅᖢᓂᓗ. 

ᑲᔪᖏᖅᓴᐃᓕᕌᖓᒥ, ᕗᕌᓐᓯᔅ ᑲᔪᖏᖅᓴᖅᑕᐅᕙᒃᐳᖅ ᕿᑐᕐᙵᒥᓄᑦ. ᐱᕈᖅᓴᐃᓂᖅ 7−ᓂᒃ ᓄᑕᖅᑲᓂᒃ ᐊᒃᓱᕈᕐᓇᖃᑦᑕᖅᓯᒪᕗᖅ, ᑭᓯᐊᓂ ᒫᓐᓇ ᑕᒪᕐᒥᑲᓴᒃ ᐃᓐᓇᐅᓕᖅᐳᑦ 15−ᓂᒡᓗ ᐃᕐᖑᑕᖃᖅᖢᓂ. ᐅᐱᒍᓱᑦᑎᐊᖅᐳᖅ ᐃᓕᖅᑯᓯᑐᖃᐅᓂᖏᓐᓂᒃ ᐃᓄᖕᓄᓪᓗ ᐅᖃᐅᔾᔭᐅᕙᒃᖢᓂ ᐃᒃᐱᒋᔭᐅᑦᑎᐊᕐᓂᖏᓐᓂᒃ, ᐃᓅᖃᑎᒥᓂᒃ ᐱᑦᑎᐊᖅᐸᖕᓂᖏᓐᓂᒃ, ᐃᓄᑦᑎᐊᕙᐅᓂᖏᓐᓂᒃ ᐊᒥᖅᑳᖃᑎᖃᖅᐸᒃᖢᑎᒡᓗ ᐊᖑᓇᓱᓕᕌᖓᒥᒃ. ᐊᒃᓱᕉᑎᖃᓚᐅᖅᐳᖅ ᐊᒥᖅᑳᖃᑎᖃᕈᒪᓪᓗᓂ ᐃᓕᖅᑯᓯᑐᖃᒃᑯᑦ ᐃᓕᓴᐃᔾᔪᑕᐅᕙᒃᑐᓂᒃ ᐊᓈᓇᑦᑎᐊᒥᓄᑦ ᓴᑭᒥᓄᓪᓗ ᑕᒪᒃᑯᐊ ᐃᓕᓴᐃᓂᕆᕙᒃᑕᖏᑦ ᐃᓕᖅᑯᓯᑐᖃᖏᓪᓗ ᐆᒪᑎᑦᑐᒪᓪᓗᒋᑦ. ᑐᓂᓯᓂᖅ ᐃᓕᖅᑯᓯᑐᖃᒃᑯᑦ ᐃᓕᖅᑯᓯᑐᖃᕆᔭᐅᔪᓂᒃ ᑲᔪᖏᖅᓴᐃᕙᒃᑭᕗᖅᑕᐅᖅ ᕗᕌᓐᓯᔅᒥᑦᑕᐅᖅ. 

ᓵᙵᔭᖃᖅᐸᒃᖢᓂ ᐊᒥᓱᓂᒃ ᐊᒃᓱᕈᕐᓇᖅᑐᓂᒃ ᐃᓅᓯᕐᒥᓂ, ᐋᒡᓂᔅ ᕗᕌᓐᓯᔅ ᑲᔪᓰᓐᓇᓚᐅᖅᐳᖅ, ᐱᔪᓐᓇᕐᓂᓕᒫᒥᓂᒃ ᐱᓕᕆᕙᒃᖢᓂ ᕿᑐᕐᙵᒥᓄᑦ ᐃᑲᔪᖅᐸᒃᖢᓂᓗ ᐊᓯᒥᓂᒃ ᐊᖏᕐᕋᕆᔭᐅᔪᓄᑦ ᐳᓛᕆᐊᖅᐸᒃᖢᓂ ᑭᖑᓂᐊᒍᓪᓗ ᑲᒪᔨᒋᔭᐅᓕᖅᖢᓂ. ᐅᐃᕆᓯᒪᓂᕐᒥᓂᒃ ᐊᓂᒍᐃᓪᓗᓂ ᐊᓈᓇᖃᕈᓐᓃᖅᖢᓂᓗ ᒪᒃᑯᒃᑑᓪᓗᓂ, ᓇᓂᓯᓚᐅᖅᐳᖅ ᓄᓇᒥᓄᑦ ᐅᑎᖅᑎᑦᑎᔪᓐᓇᕐᓂᕐᒥᒃ ᓇᖕᒥᓂᕐᓗ ᖃᑕᙳᑎᒥᓂᒃ ᐱᕈᖅᓴᐃᓪᓗᓂ ᐃᒻᒥᓂᒃ ᐃᓕᓐᓂᐊᖅᐸᓪᓕᐊᓪᓗᓂ. ᐊᓯᔾᔨᖅᐸᓪᓕᐊᓪᓗᓂ ᐊᒻᒪ ᓄᑖᒥ ᐱᓕᕆᓂᐅᔪᒥ, ᓇᓂᓯᓚᐅᖅᐳᖅ ᐊᖅᑯᑎᒃᓴᒥ ᐃᖅᑲᓇᐃᔮᒧᑦ ᖁᕕᐊᒋᔭᒥᓂᑦ ᐊᒥᖅᑳᖃᑎᖃᕐᓂᕐᒥᓂ ᐃᓕᖅᑯᓯᖓᓂ ᑲᔪᓰᓐᓇᕐᓂᐊᕐᓂᖓᓂ ᑭᖑᕚᕆᓂᐊᖅᑕᑦᑎᓐᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.