"ᐅᒃᐱᕈᓱᒃᐳᖓ ᐱᐅᔪᒻᒪᕆᐊᓗᖕᒥᒃ ᑕᓯᐅᖅᓯᓂᕐᒥᒃ ᐊᓯᒥᓂᒃ ᓇᖕᒥᓂᖅ ᖃᐅᒪᓂᕐᒥᓂᒃ ᓇᓂᓯᖁᓪᓗᒋᑦ," ᐅᖃᖅᑐᖅ ᐊᑭᓴ ᕼᐋᕐᑎᔅᑎ-ᓄᐊᕖᔭᓐ. ᔩᓐ ᒪᕆ ᕆᕗᒥᐅᑕᖅ ᑭᓯᐊᓂ ᐱᕈᖅᓴᓚᐅᖅᑐᖅ ᔭᓗᓇᐃᒥ ᐊᓈᓇᖓ ᐃᓕᓐᓂᐊᖅᑎᓪᓗᒍ Bachelor of Science ᐋᓐᓂᐊᓯᐅᖅᑎᐅᓂᕐᒧᑦ ᐊᕈᐊᕋ ᓯᓚᑦᑐᓴᕐᕕᒻᒥ. ᑭᖑᓂᐊᒍᑦ, ᓄᒃᑎᓚᐅᖅᓯᒪᔫᒃ ᕗᐊᑦ ᓯᒻᓴᓐᒧᑦ ᖃᑕᙳᑎᖏᓐᓄᑦ ᖃᓂᒃᓴᕐᓂᖅᓴᐅᔪᒪᓪᓗᑎᒃ.  ᒫᓐᓇᐅᓕᖅᑐᕐᓕ, ᑭᖑᓪᓕᖅᐹᕆᓕᖅᑕᖓ ᐊᕐᕌᒍᖓᓂ ᓇᖕᒥᓂᖅ ᐃᓕᓐᓂᐊᖅᑕᒥᓂᒃ ᓯᓚᑦᑐᖅᓴᕐᕕᒡᔪᐊᒥ ᐋᓪᐴᑕᒥ, ᐱᔭᕇᖅᓯᓪᓗᓂ Bachelor of Education-ᒥᒃ. ᑭᖑᓪᓕᖅᐹᒥᒃ ᐃᓕᓐᓂᐊᖅᑕᒥᓂᒃ ᐃᓱᓕᑦᑎᓵᓚᐅᖅᑐᖅ ᒍᕋᐃᑦ 1-ᒥ ᐃᓕᓐᓂᐊᖅᑐᓂ, ᐱᕚᓪᓕᖅᖢᓂ ᐃᓕᓴᐃᔨᙳᕈᓂ. 

ᐃᓕᓐᓂᐊᖅᑕᒥᓂᒃ ᐊᓂᒍᐃᕌᓂᒃᑯᓂ, ᕼᐋᑎᔅᑎ−ᓄᐊᕖᔭᓐ ᓂᕆᐅᒃᐳᖅ ᐊᐅᓪᓚᓛᕈᒪᓪᓗᓂ ᐃᓕᓴᐃᔨᐅᓗᓂᓗ ᐃᓚᒋᔭᐅᓗᓂ ᐃᓕᓐᓂᐊᖅᑎᑦᑎᓂᕐᒧᑦ ᑭᒡᓕᒋᔭᐅᔪᓄᑦ ᐱᓕᕆᐊᖑᕙᒃᑐᒧᑦ. ᐱᕕᒃᓴᑦᑎᐊᕙᐅᕗᖅ ᐃᓕᓴᐃᔪᓐᓇᕐᓂᕐᒥᒃ ᓇᒧᙵᐅᑲᑕᒡᓗᓂ ᓄᓇᕐᔪᐊᓕᒫᒥ. ᐱᔪᒃᓯᓕᓚᐅᖅᐳᖅ ᑖᔅᓱᒥᖓ ᐃᖅᑲᓇᐃᔮᕆᔪᒪᔭᒥᓂᒃ ᓇᖕᒥᓂᖅ ᖁᕕᐊᒋᔭᖃᕐᓂᖓᓄᑦ ᐃᓕᑦᑎᕙᓪᓕᐊᓂᕐᒥᒃ ᐊᒥᖅᑳᖃᑎᖃᕈᒪᓪᓗᓂᓗ ᐃᓕᑕᒥᓂᒃ ᐊᓯᒥᓄᑦ. ᐃᑦᑐᒃᑯᒋᓚᐅᖅᑕᖏᑦ ᐅᓂᒃᑳᖅᑐᐊᖃᖅᐸᓚᐅᖅᑐᑦ ᐃᓕᓴᐃᕙᒃᖢᓂᒋᓪᓗ ᒪᒃᑯᒃᑑᑎᓪᓗᒍ ᖁᕕᐊᒋᔭᖃᓪᓚᕆᓕᖅᖢᓂᓗ.  ᓇᖕᒥᓂᖅ ᐊᑐᖅᓯᒪᔭᖏᑦ ᐃᓕᓐᓂᐊᕐᓂᓕᕆᓂᕐᒥᒃ ᐱᔪᒃᓯᑎᑦᑎᓚᐅᕆᕗᑦ ᐃᓕᓴᐃᔨᐅᓂᕐᒥᒃ. ᐊᔪᙱᑦᑐᒻᒪᕆᐊᓗᐃᑦ ᐃᓕᓴᐃᔩᑦ, ᐱᙳᐊᖅᑎᓄᑦ ᑲᒪᔨᑦ ᐊᒻᒪ ᑲᔪᖏᖅᓴᐃᔨᖏᑦ ᓇᖕᒥᓂᖅ ᑕᐃᒪᐃᑦᑐᒥᒃ ᐃᓕᓴᐃᔨᐅᔪᒪᓕᓚᐅᖅᐳᖅ ᓯᕗᓂᒃᓴᒥ ᐃᓕᓐᓂᐊᖅᑎᓄᑦ. ᓂᕆᐅᒃᐳᖅ ᐃᑲᔪᕈᒪᓪᓗᓂ ᐃᓕᓐᓂᐊᖅᑎᓂᒃ ᓇᖕᒥᓂᖅ ᖁᕕᐊᒋᔭᖏᓐᓂᒃ. 

ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐊᐅᓪᓚᕆᐊᖃᖅᑐᓄᑦ ᓄᓇᓕᖏᓐᓂ ᐃᓕᓐᓂᐊᒃᑲᓐᓂᕆᐊᖅᑐᕐᓗᑎᒃ ᐃᒪᓐᓇᐅᕗᖅ, "ᑕᐃᒪᐃᓕᐅᑐᐃᓐᓇᕆᑦ. ᐊᒥᓱᐊᓗᖕᓂᒃ ᐱᕚᓪᓕᕈᑕᐅᔪᓐᓇᖅᑐᓂᒃ ᐱᕕᒃᓴᖅᑕᖃᖅᐳᖅ ᓄᑖᓂᒡᓗ ᐊᑐᖅᓯᓂᕐᓂᒃ ᐱᕚᓪᓕᖅᑎᑦᑎᓪᓚᕆᒃᐸᒃᑐᓂᒃ ᖃᐅᔨᒪᓂᕆᔭᕐᓂᒃ ᑕᐅᑐᖅᑰᖅᑕᕐᓂᒡᓗ ᓄᓇᔅᓯᓐᓂ ᕿᒪᕉᑎᒍᕕᑦ. ᓇᓗᒍᕕᑦ ᖃᐅᔨᒪᙱᒃᑲᓗᐊᕈᕕᓪᓘᓐᓃᑦ ᑭᓱᒥᒃ ᐃᓕᓐᓂᐊᕆᐊᒃᓴᖅ, ᐃᒪᓐᓇᐅᖁᔨᓇᔭᖅᐳᖓ, ᒪᑐᐃᙶᖅᑐᒥᒃ ᐃᓕᓐᓂᐊᕐᓂᕐᒥᒃ ᓯᓚᑦᑐᖅᓴᕐᕕᒡᔪᐊᒥ, ᐅᕙᓐᓄᓪᓕ, ᓯᓚᑦᑐᖅᓴᕐᕕᒡᔪᐊᖅ ᐊᖏᒡᓕᒋᐊᖅᑎᑦᑎᓯᒪᕗᖅ ᑐᑭᓯᐅᒪᓂᕆᔭᓐᓂᒃ ᖃᔅᓯᓂᒃ ᐃᖅᑲᓇᐃᔮᕆᓛᕈᒪᔭᕐᓂᒃ ᐊᑐᖅᑕᐅᔪᓐᓇᖅᑐᓂᒃ ᑭᒃᑯᑐᐃᓐᓇᓄᑦ, ᐃᖅᑲᐅᒪᐃᓐᓇᐅᔭᕐᓗᖓᓗ ᐊᖏᕐᕋᕆᔭᖅ ᐊᖏᕐᕋᕆᔭᐅᖏᓐᓇᐅᔭᕐᓂᖓᓂᒃ. ᓄᓇᓕᓯ ᑐᙵᓱᒃᑎᑦᑎᖏᓐᓇᐅᔭᕐᓂᐊᖅᑐᑦ ᐃᓕᖕᓂᒃ ᑐᙵᓱᒃᑎᑦᑎᑦᑎᐊᕐᓗᑎᒃ ᓇᒧᙵᐅᕙᓪᓕᐊᔾᔮᙱᖦᖢᑎᒡᓗ."

ᑐᓗᖅᑕᕈᑎᐅᕙᒃᑐᓂ ᓵᙵᔭᖏᓐᓂ, ᐊᓯᔾᔨᕐᓂᐅᔪᖅ ᐃᖏᕐᕋᓂᐅᔪᒥ ᓯᕗᓪᓕᕐᒥ ᐊᕐᕌᒍᒥ ᐊᒻᒪ ᐱᕕᒃᓴᒥ ᐊᐅᓚᑦᑎᔭᕆᐊᖃᕐᓂᐅᔪᒥ ᐱᕕᒃᓴᖃᖅᑎᑦᑎᓂᕐᒧᑦ ᓄᑖᓂ ᐱᓕᕆᐊᒃᓴᓂ ᐊᖏᔪᒻᒪᕆᐅᓚᐅᖅᐳᑦ. ᑕᐃᒪᐃᓕᓚᐅᖅᑎᓪᓗᒍ, ᕼᐋᑎᔅᑎ−ᓄᐊᕖᔭᓐ ᑕᑯᓚᐅᖅᐳᖅ ᐊᒥᓱᓂ ᐱᖃᓐᓇᕆᔭᖏᓐᓂ ᐊᔾᔨᖏᓐᓂ ᐊᒃᓱᕈᕐᓂᐅᔪᓂ ᐊᒻᒪ ᑕᒪᓐᓇ ᓈᒻᒪᒃᓯᓕᓚᐅᖅᐳᖅ ᐊᑐᖅᑕᖓᓂ. ᐅᑎᕆᐊᓚᐅᑲᒃᖢᓂ ᐊᒻᒪ ᖃᓄᐃᓕᖓᓂᕆᔭᖓ ᐋᖅᑭᑦᑎᐊᒃᑲᓐᓂᖅᖢᒍ, ᐅᔾᔨᕈᓱᓕᖅᖢᓂ ᑕᒪᓐᓇ ᓂᕆᐅᒋᔭᐅᔭᕆᐊᖃᕐᓂᖓᓂᒃ, ᐃᑲᔪᓚᐅᖅᐳᖅ. ᑎᑎᕋᕐᕕᖕᒧᐊᖅᐸᒃᖢᓂ ᐃᓕᓴᐃᔨᖏᑦ ᐱᖃᑎᒋᓪᓗᒋᑦ ᐃᑲᔪᓚᐅᕆᕗᖅᑕᐅᖅ. 

ᐱᑕᖃᙱᓗᐊᕐᓂᖓ ᓄᓇᖃᖅᑳᖅᑐᓂᒃ ᐃᓕᓐᓂᐊᖃᑎᖏᓐᓂᒃ ᐃᓕᓐᓂᐊᕐᕕᐊᕈᓯᕐᒥᓂ ᐊᒃᓱᕉᑕᐅᒃᑲᓐᓂᓚᐅᖅᐳᖅ ᕼᐋᑎᔅᑎ−ᓄᐊᕖᔭᓐ, ᐃᓚᒋᔭᐅᓪᓗᓂ ᐃᒻᒪᖄ ᒪᕐᕉᖕᓄᑦ ᓄᓇᖃᖅᑳᖅᑐᓄᑦ ᐃᓕᓐᓂᐊᖅᑎᐅᔪᓄᑦ 200−ᓂ ᐃᓕᓐᓂᐊᖅᑎᓂ. "ᒥᑭᑦᑐᑯᓘᖅᑰᔨᓚᐅᖅᐳᖓ ᐊᒻᒪ ᓈᒻᒪᒋᙱᖦᖢᒍ," ᐃᖅᑲᐅᒪᔪᖅ.  ᓴᙱᔪᒥᒃ ᐃᑲᔪᖅᑎᖃᕐᓂᖅ ᐃᑲᔪᓚᐅᖅᐳᖅ ᐊᓂᒍᐃᔪᓐᓇᕐᓂᖓᓂ ᐊᔪᕐᓇᖅᑐᖅᓯᐅᕐᓂᐅᔪᒥ. ᐊᑐᖅᖢᓂ ᐊᑐᖅᑕᐅᔪᓐᓇᖅᑐᓂᒃ ᓄᓇᖃᖅᑳᖅᑐᓄᑦ ᐃᓕᓐᓂᐊᖅᑎᓄᑦ ᓯᓚᑦᑐᖅᓴᕐᕕᒡᔪᐊᖓᓂ ᐊᑐᕐᓂᖃᓚᐅᕆᕗᖅᑕᐅᖅ. ᓅᑉᐸᓪᓕᐊᓕᖅᖢᓂ ᐊᖏᕐᕋᕆᔭᒥᓂᑦ ᐃᓅᓯᕐᒧᑦ ᐃᓄᑑᓪᓗᓂ ᐃᓐᓇᕈᖅᐸᓪᓕᐊᓕᖅᖢᓂ, ᐃᖅᑲᐅᒪᓪᓗᓂ ᐅᖃᐅᓯᕆᓚᐅᖅᑕᖓᓂᒃ ᐃᓕᓴᐃᔨᖓᑕ ᐃᓚᖓᑕ, "ᐱᕈᖅᐸᓪᓕᐊᓂᖅ ᑕᐃᒪᐃᓲᖑᙱᓚᖅ ᐃᓗᐊᕆᔭᕐᓂ ᐃᓂᒋᔭᕐᓂ" ᐃᑲᔪᓚᐅᖅᐳᖅ ᐊᑲᐅᙱᓪᓕᐅᕈᑕᐅᕙᒃᑐᒥᒃ. ᐅᓪᓗᒥᒧᑦ ᑎᑭᖦᖢᒍ ᐃᑲᔪᖅᐸᒃᐳᖅ. 

ᐃᓱᒪᒥᒍᑦ ᖃᓄᐃᖏᑦᑎᐊᕈᒪᓪᓗᓂ, ᕼᐋᑎᔅᑎ−ᓄᐊᕖᔭᓐ ᐆᒻᒪᕆᒃᑐᒥᒃ ᐃᓅᓯᖃᐃᓐᓇᓲᖅ, ᐱᙳᐊᖃᑕᐅᕙᒃᖢᓂ ᐊᕐᕌᒍᓕᒫᖅ. ᐊᕿᖃᑕᐅᓲᖅ, ᐃᖃᐃᓕᓴᕐᕕᓕᐊᖅᐸᒃᖢᓂ ᐱᓱᒃᐸᒃᖢᓂᓗ ᓯᕿᓐᓂᕆᐊᖅᑐᖅᖢᓂ. ᐱᖃᓐᓇᕆᔭᒥᓃᖃᑎᖃᖅᐸᒃᐳᖅ ᐊᖓᔪᖅᑳᒥᓄᓪᓗ ᐅᖄᓚᕙᒃᖢᓂ ᖃᐅᑕᒫᑦ ᐅᕝᕙᓘᓐᓃᑦ ᐅᓪᓘᒃ ᒪᕐᕉᒃ ᐊᓂᒍᕌᖓᑕ ᐅᖃᓪᓚᖃᑎᖃᕈᒪᑐᐃᓐᓇᖅᖢᓂ, ᐊᐱᕆᑐᐃᓐᓇᙱᖦᖢᓂ.  

"ᐃᓱᒪᔪᖓᓕ ᐱᒻᒪᕆᐅᓂᖓᓂᒃ ᐃᓕᓐᓂᐊᖅᑎᓄᑦ ᐅᔾᔨᕈᓱᒋᐊᖃᕐᓂᖏᓐᓂᒃ ᐃᓕᓐᓂᐊᕐᕕᖕᒥ ᐱᓕᕆᐃᓐᓇᕆᐊᖃᙱᓐᓂᕐᓂᒃ. ᐃᓱᓕᕝᕕᒃᓴᖅᑕᖃᐅᕐᒪᑦ ᐊᒻᒪ ᐱᓕᕆᐊᒃᓴᖅᑕᖃᐅᖅᖢᓂ, ᑭᓯᐊᓂᓗᑦᑕᐅᖅ, ᓱᓕ ᐃᓅᕗᑎᑦ, ᓱᓕ ᐃᓅᕗᑎᑦ, ᐃᓱᒪᒃᑯᑦ ᖃᓄᐃᙱᑦᑎᐊᕐᓂᖅ ᓱᓕ ᐊᑑᑎᖃᖅᐳᖅ," ᕼᐋᑎᔅᑎ−ᓄᐊᕖᔭᓐ ᐅᖃᓚᐅᖅᐳᖅ. 

ᐱᔪᒃᓯᑎᑦᑎᓇᓱᓕᕌᖓᒥ, ᕼᐋᑎᔅᑎ−ᓄᐊᕖᔭᓐ ᐱᔪᒃᓯᑎᑕᐅᕗᖅ ᐊᓈᓇᒥᓄᑦ, ᓴᙱᓛᖑᖃᑕᐅᔪᖅ ᐊᕐᓇᖅ ᖃᐅᔨᒪᔭᖓ. ᐱᒃᑯᒋᔭᖃᖅᐳᖅ ᐊᓂᒍᖅᑎᓯᒪᔭᖏᓐᓂᒃ ᐃᖅᑲᓇᐃᔮᒥᒍᑦ ᓇᖕᒥᓂᕐᓗ, ᐱᓇᔪᖕᓂᖓ, ᓴᐱᓕᖅᓴᕋᐃᙱᓐᓂᖓ, ᐱᓕᕆᑦᑎᐊᕈᓐᓇᕐᓂᖓ, ᐱᐅᔪᒥᒃ ᐃᓱᒪᖃᖅᐸᖕᓂᖓ, ᖁᕕᐊᒋᔭᖃᖅᐸᒃᐳᖅ ᓯᓚᑐᓂᕐᒥᓂᒃ ᐊᒥᖅᑳᖃᑎᖃᖅᐸᖕᓂᕐᒥᓂᒃ ᐃᔾᔪᐊᒐᒃᓴᑦᑎᐊᕙᐅᓪᓗᓂᓗ ᑭᓇᐅᓂᕐᒥᓂᒃ ᐋᖅᑭᒃᓱᐃᓯᒪᓪᓗᓂ. 

ᐃᓱᓕᑉᐸᓪᓕᐊᓕᖅᑎᓪᓗᒍ, ᕼᐋᑎᔅᑎ−ᓄᐊᕖᔭᓐ ᐅᖃᓚᐅᖅᐳᖅ, "ᐃᓱᒪᕗᖓ ᐱᒻᒪᕆᐊᓘᓂᖓᓂᒃ ᑲᔪᖏᖅᓴᐃᓂᕐᒥᒃ ᓄᓇᖃᖅᑳᖅᑐᖁᑎᑦᑎᓐᓂᒃ ᖃᐅᔨᒪᓗᑕᓗ ᑕᒫᓃᖏᓐᓇᐅᔭᕐᓂᑦᑎᓐᓂᒃ ᐃᑲᔪᖅᑐᐃᔪᒪᓪᓗᑕ ᐃᑲᔪᕈᒪᓪᓗᒋᓪᓗ ᐱᔭᕆᐊᖃᕌᖓᑕ, ᑕᐃᒪᑐᖅ ᐅᓄᕐᓂᖅᓴᐃᑦ ᓄᓇᖃᖅᑳᖅᑐᑦ ᐃᓕᓐᓂᐊᕆᐊᖃᑦᑕᖁᕙᒃᑲ ᖃᓄᐃᓕᐅᕈᒪᔭᒥᓂᒡᓗ ᐱᓕᕆᕙᒡᓗᑎᒃ, ᓲᖃᐃᒻᒪ ᑕᐃᒪᐃᑦᑕᕆᐊᖃᕐᒥᒐᑦᑕᑦᑕᐅᖅ."

ᐱᕙᒌᔭᖅᐸᓪᓕᐊᓪᓗᓂ ᑕᓯᐅᖅᓯᔪᒪᓪᓗᓂ ᐃᓕᓐᓂᐊᖅᑎᓂᒃ ᓇᖕᒥᓂᖅ ᖃᐅᒪᓂᕆᔭᒥᓂᒃ ᓇᓂᓯᖁᓪᓗᒋᑦ, ᐊᑭᓴ ᕼᐋᑎᔅᑎ−ᓄᐊᕖᔭᓐ ᐱᓇᔪᒃᐳᖅ ᑕᐅᑐᙳᐊᖅᑕᒥᓂᒃ ᐃᓕᓴᐃᔨᙳᕈᒪᓂᕐᒥᓂᒃ. ᐱᔪᒃᓯᑎᑕᐅᓪᓗᓂ ᐃᓕᓴᐃᔨᓄᑦ ᐃᑲᔪᓚᐅᖅᑐᓄᑦ ᓇᖕᒥᓂᖅ ᖃᐅᒪᔾᔪᑎᒋᓂᐊᖅᑕᒥᓂᒃ, ᓇᒧᙵᐅᑲᑕᖕᓂᐊᖅᑐᖅ ᓄᓇᕐᔪᐊᓕᒫᒧᑦ ᑕᑯᔭᖅᑐᕐᓗᓂ ᑭᓱᒥᒃ ᑕᑯᖕᒪᖔᕐᒥᓂᒃ. ᐃᓕᑦᑎᔪᒪᑦᑎᐊᖅᖢᓂ, ᐊᒥᓱᐊᓗᖕᓂᒃ ᐱᕕᒃᓴᖃᖅᓯᒪᕗᖅ ᐊᖏᒡᓕᒋᐊᖅᑎᑦᑎᓂᕐᒥᒃ ᖃᐅᔨᒪᓂᕆᔭᒥᓂᒃ ᐊᒻᒪᓗ ᓇᖕᒥᓂᖅ ᐃᓕᓐᓂᐊᕐᕕᐊᕈᓯᖅᑖᕈᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᕿᖅᑯᐊᑦ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ ᑎᑎᕋᖅᓯᒪᔪᒥᒃ.