ᐋᔅᓕ ᖁᒪᖔᐱᒃ ᕉᔅ ᑲᒥᖕᔅ 18-ᓂᒃ ᒪᒃᑯᒃᑐᓂᒃ ᐃᒃᓯᕚᖃᑕᐅᕗᖅ ᑲᓇᑕᐅᑉ ᐊᖓᔪᖅᑳᕐᔪᐊᖓᓂ ᑲᓇᑕᒥ ᒪᒃᑯᒃᑐᑦ ᑲᑎᒪᔨᖏᓐᓄᑦ, ᐅᖃᐅᔾᔪᐃᕙᒃᖢᓂ ᑲᓇᑕᐅᑉ ᐊᖓᔪᖅᑳᕐᔪᐊᖓᓄᑦ ᐱᔾᔪᑕᐅᓲᓂᒃ ᒪᒃᑯᒃᑐᓂᒃ ᐊᒃᑐᐃᕙᒃᑐᓂᒃ. ᐸᓐᓂᖅᑑᒥ ᐃᓅᓂᑯ, ᓄᓇᕗᑦ, ᐋᔅᓕ ᑲᓇᑕᓕᒫᒥᓕᒫᖅ ᐃᓅᓚᐅᖅᓯᒪᕗᖅ, ᓅᕙ ᓯᑰᓴᒥ ᓄᓇᖃᖅᖢᓂ, ᑯᐸᐃᖕᒥ, ᓂᐅ ᐳᕋᓐᔅᕕᒃᒥ ᐊᒻᒪ ᒫᓐᓇ ᔫᑳᓐᒥ ᓄᓇᖃᓕᖅᑐᖅ. ᑲᖏᖅᖢᔅᓱᐊᕐᒧᑦ ᐊᐅᓪᓚᖃᑦᑕᖅᓯᒪᖕᒥᔪᖅ, GL−ᒥᑦ ᓅᒻᒧᑦ, AK−ᑯᑦ ᑕᓪᓗᕈᑎᐅᑉ ᐃᒪᖓᒍᑦ. ᐊᐅᓪᓚᖃᑦᑕᕐᐸᖕᒪᑦ ᐋᔅᓕᒥᑦ ᑎᒍᓯᔭᖅᑐᖅᖢᓂ ᐱᕕᒃᓴᓂᑦ ᑎᑭᑦᑕᕌᖓᒥᒃ.

"ᐃᓱᒪᒋᔭᕋ ᒪᑐᐃᖓᑦᑎᐊᕐᖢᓂ ᐃᓄᒃ," ᐅᖃᙳᐊᖅᑐᖅ. "ᖁᕕᐊᒋᖃᑦᑕᖅᑕᒃᑲ ᑖᒃᑯᐊ ᐊᔾᔨᒌᙱᑦᑐᑦ ᐱᕕᒃᓴᐃᑦ ᓴᖅᑭᑦᑕᕌᖓᑕ. ᐃᓛᓐᓂᒃᑯᑦ ᑲᑉᐱᐊᓇᒐᓚᒃᑲᓗᐊᖅᐸᑦ."

ᐊᒻᒪᓗᑦᑕᐅᖅ ᓇᓂᕐᒥᐅᑕᐅᓪᓗᓂ, ᐋᔅᓕ ᑲᑉᐱᐊᓱᓚᐅᖅᓯᒪᙱᖦᖢᓂ ᐊᒡᒐᒥᓂᒃ ᐆᒃᑐᕆᐊᒃᓴᖅ ᐊᔾᔨᒌᙱᑦᑐᓂ ᐃᖅᑲᓇᐃᔭᕐᓂᕐᒥ ᐊᑐᖃᑦᑕᖅᓯᒪᔭᖏᓐᓂ. ᒫᓐᓇ ᐃᖅᑲᓇᐃᔭᖅᑐᖅ ᐅᑭᐅᖅᑕᖅᑐᒥ ᐱᓕᕆᕝᕕᖕᒥ ᓄᓇᓕᖕᓂ−ᑐᙵᕕᓕᖕᒥᒃ ᖃᐅᔨᓴᕐᓂᕐᒧᑦ ᓄᓇᖃᖅᑳᖅᑐᓄᑦ ᖃᐅᔨᓴᕐᓂᕐᒧᑦ ᐃᑲᔪᖅᑎᐅᓪᓗᓂ. ᐃᓄᓕᕆᔨᐅᓂᖓ ᐃᑲᔪᖅᓯᒪᔪᖅ ᐃᓕᓐᓂᐊᖅᑎᓂᑦ ᐋᖅᑭᒋᐊᕆᓂᕐᒥᑦ ᓯᓚᑦᑐᖅᓴᕐᕕᔾᔪᐊᕐᒥᑦ ᐃᓅᓯᖃᕐᓂᕐᒥᑦ Mount Allison-ᒥ, ᐃᓄᐃᓪᓗ ᐱᕙᓪᓕᐊᓂᕐᒧᑦ ᑎᒥᒥᒍᑦ ᐊᔪᕈᑎᓕᓐᓂᑦ ᐱᓯᒪᔭᐅᔪᓄᑦ ᐊᖏᕐᕋᕐᒥᑦ; ᐊᒻᒪᓗ, ᐃᓕᓐᓂᐊᖅᑎᑦᑎᖃᑦᑕᓚᐅᕆᓪᓗᓂ ᐃᓄᖕᓂᒃ ᐊᒻᒪ ᐃᓄᔅᓂ ᑎᒍᔭᐅᓯᒪᔪᓂᒃ ᑐᐊᔅᑐ ᐱᓂᑎᐅᒥ ᓂᐅ ᐳᕋᓐᔅᐅᐃᒃᒥ, ᐅᖃᐅᓯᕐᒧᑦ, ᕿᓚᐅᔾᔭᕐᓂᕐᒧᑦ, ᒧᒥᕐᓂᕐᒧᑦ, ᒥᖅᓱᕐᓂᕐᒧᑦ, ᐊᒻᒪ ᐃᙱᕐᓂᕐᒧᑦ ᐃᓕᖅᑯᓯᑐᖃᕐᒥᓂᒃ. ᐊᓪᓛᑦ ᐃᖅᑲᓇᐃᔭᖃᑦᑕᖅᓯᒪᒻᒥᔪᖅ ᐳᓚᕋᑦᑐᓂ ᑕᓪᓗᕈᑎᐅᑉ ᐃᒪᖓᒍᑦ. "ᖁᕕᐊᓇᑦᑎᐊᓚᐅᖅᑐᖅ ᑕᑯᑎᓪᓗᒋᑦ ᐃᓄᐃᑦ ᓇᑭᙶᕈᓘᔭᖅᑐᑦ ᓄᓇᕐᔪᐊᕐᒥ ᐊᔾᔨᒌᖏᑦᑐᓂᒃ ᐃᓂᓂᒃ ᐃᓱᒪᒋᔭᓐᓂᒃ ᐊᖏᕐᕋᓐᓂ."

ᐊᔾᔨᒌᙱᕈᓘᔭᕋᓗᐊᖅᑎᓪᓗᒋᑦ ᐊᑐᖃᑦᑕᕐᓂᑯᖏᑦ, ᓇᓗᓇᙱᑦᑐᒥᒃ ᐱᔾᔪᑕᐅᔪᖃᖅᑐᖅ ᓄᓇᓕᖕᒥ − ᐱᓗᐊᖅᑐᒥᒃ ᓄᓇᖃᖅᑳᖅᓯᒪᔪᑦ ᓄᓇᓕᖏᑦ − ᐃᖏᕐᕋᓪᓗᓂ ᐃᖅᑲᓇᐃᔮᖓᒍᑦ. ᑖᓐᓇ ᐱᒋᐊᖅᑐᒃᓴᐅᔪᖅ ᐋᔅᓕᐅᑉ ᓴᙱᔪᒃᑯᑦ ᐊᒃᑐᐊᓂᖃᕐᓂᖓᓂᒃ ᑕᒪᒃᑮᓄᑦ ᖃᑕᙳᑎᖏᓐᓄᑦ. "ᐊᑖᑕᒐ ᓅᕙ ᓯᑰᓴᒥᐅᑕᖅ, ᐊᓈᓇᒪ ᓄᓇᕗᒻᒥᐅᑕᖅ. ᖁᔭᓕᔪᒻᒪᕆᐅᕗᖓ ᐊᑦᑐᐊᓂᕆᓯᒪᔭᓐᓄᑦ ᓅᑦᑕᕋᓗᐊᖅᑎᓪᓗᖓ. ᐃᓚᓕᒫᒃᑲ ᐃᑲᔪᖅᓱᖅᑎᐊᖅᑐᒻᒪᕆᐅᕗᑦ ᐊᒻᒪ ᐃᑲᔪᖅᓱᖅᑎᐊᖅᑐᑎᒃ. ᐱᕈᖅᓴᓚᐅᖅᓯᒪᒐᒪ ᐃᕐᖑᑕᓐᓂᒃ ᐸᓐᓂᑑᕐᒥᐅᑕᐅᑎᓪᓗᖓ, ᐊᒻᒪᓗ ᓯᓚᒥ ᐱᓐᖑᐊᖃᑦᑕᖅᑐᖓ ᐊᒻᒪᓗ ᐅᐱᕐᖏᔭᖅᑐᕈᒪᐃᓐᓇᖅᑐᑕ ᐊᒻᒪᓗ ᐃᖃᓪᓕᐊᕈᒪᖃᑦᑕᖅᑐᑕ. ᐊᑯᓂᑲᓪᓚᕈᓗᒃ ᐊᐅᓪᓚᖅᓯᒪᖃᑦᑕᓚᐅᕐᒪᑦ ᐊᒻᒪᓗ ᐊᓯᖏᓐᓄᑦ ᐃᓚᒋᔭᖏᓐᓄᑦ. ᐊᒻᒪᓗ ᓅᕙ ᓯᑰᓴᒥ, ᐊᑦᔨᐸᓗᒋᓚᐅᕐᒪᒍ ᐊᒥᓱᓄᑦ ᐃᓚᒌᓄᑦ, ᐃᓕᓐᓂᐊᕐᕕᒃᑯᓐᓄᓪᓗ ᑐᕌᖓᔪᓂᒃ ᐃᑉᐱᒍᓱᓐᓂᖅᓴᐅᓪᓗᓂ. ᐊᒻᒪᓗ ᐃᑦᑐᕋ ᑕᐃᑲᓃᖃᑎᒋᖃᑦᑕᓚᐅᕐᒥᔭᕋ ᐊᒻᒪᓗ ᐊᑦᑕᒃᑲ ᐊᒃᑲᒃᑲᓗ. ᑕᐃᒪᐃᒻᒪᑦ ᖁᔭᓕᔪᒻᒪᕆᐅᕗᖓ ᐊᒥᓱᑦ ᐃᓐᓇᑐᖃᐃᑦ ᐃᓅᓯᓐᓂ ᐃᑲᔪᖃᑦᑕᖅᓯᒪᔪᒻᒪᕆᐅᒻᒪᑕ ᐅᕙᓐᓂᒃ ᐱᕈᖅᐸᓪᓕᐊᑎᓪᓗᖓ."

ᑕᐃᒃᑯᐊ ᐃᓚᒥᓄᑦ ᐊᑕᔪᑦ, ᐊᒻᒪ "ᐃᓕᓐᓂᐊᖅᑎᑦᑎᓪᓚᑦᑖᕐᓂᖅ" ᐱᓚᐅᖅᑕᖓᑦ, ᐃᑲᔪᓚᐅᖅᐳᖅ ᐋᔅᓕᒥᑦ ᐊᔪᕐᓇᖅᑐᓂᒃ ᐃᓱᒪᓕᐅᕆᓪᓗᓂ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓐᓂᐊᖅᑕᒥᓂᒃ ᐊᓂᒍᐃᓚᐅᙱᑎᓪᓗᒍ. "ᐊᕐᕌᒎᒃ ᒪᕐᕉᒃ ᓇᑉᐸᕐᓗ ᐊᓂᒍᖅᑎᓪᓗᒋᑦ, ᒫᓐᓇ ᐱᓕᕆᐊᕆᔪᒪᔪᓐᓃᓚᐅᖅᑕᕋ...[ᑲᔪᓯᔪᒪᓚᐅᖅᑐᖓ ᓄᓇᖃᖅᑳᖅᓯᒪᔪᑦ, ᐃᓅᑉ ᖃᐅᔨᒪᔭᖓ, ᐅᕝᕙᓘᓐᓃᑦ ᑲᑎᒪᖃᑕᐅᒃᑲᓐᓂᕈᒪᓕᖅᖢᖓ ᑲᓇᑕᐅᑉ ᐊᖓᔪᖅᑳᕐᔪᐊᖓᑕ ᒪᒃᑯᒃᑐᓕᕆᔨᑦ ᑲᑎᒪᔨᖏᓐᓂᒃ." ᐋᔅᓕ ᐅᒃᐱᕈᓱᒃᐳᖅ ᐅᑎᕐᓂᐊᕐᓂᖓᓂᒃ ᓯᓚᑦᑐᖅᓴᕐᕕᒡᔪᐊᒧᑦ ᓈᒻᒪᒃᓯᒃᐸᑦ, ᑭᓯᐊᓂ ᒫᓐᓇ ᑐᕌᒐᖃᕈᒪᔪᖅ "ᐃᓕᓴᐃᓂᕐᒥᒃ ᐱᓕᕆᓪᓚᑦᑖᕐᓗᓂ, ᐅᖃᓕᒫᒐᕐᒦᙱᖔᖅᑐᖅ."

ᐋᔅᓕ ᖃᐅᔨᒪᔪᖅ ᐊᒥᓱᑦ ᐃᓄᐃᑦ ᓅᒐᔪᓗᐊᙱᒻᒪᑕ, ᑭᓯᐊᓂ ᑎᓕᐅᕆᖃᑦᑕᖅᑐᖅ ᓄᓇᖃᖅᑳᖅᓯᒪᔪᓂᑦ ᒪᒃᑯᑦᑐᓂᑦ ᐱᓗᐊᖅᑐᒥᑦ ᖃᐅᔨᓇᓱᐊᕐᓂᕐᒥᑦ ᓄᓇᕐᔪᐊᕐᒧᑦ ᓄᓇᓕᖓᑕ ᐅᖓᑖᓄᑦ, ᐊᑯᓂᐅᖏᑦᑐᑯᓗᒃ. "ᖁᕕᐊᓇᑦᑎᐊᖅᑐᖅ ᐃᓕᑦᑎᕙᓪᓕᐊᓕᕋᕕᑦ ᐊᓯᖏᓐᓂᒃ ᐃᓕᖅᑯᓯᕐᓂᒃ, ᐱᓕᕆᖃᑎᖃᓕᓲᖑᒐᔅᓯ ᐊᓯᖏᓐᓂᒃ ᓄᓇᖃᖅᑳᖅᓯᒪᔪᓂᒃ... ᖃᓂᒋᓛᒃᑲ ᐱᖃᓐᓇᕆᔭᒃᑲ [ᓯᓚᑦᑐᖅᓴᕐᕕᒡᔪᐊᒥ] ᓇᑭᙶᕈᓘᔭᓚᐅᖅᑐᑦ ᓄᓇᕐᔪᐊᕐᒥ, ᐊᒻᒪ ᓄᓇᖃᖅᑳᖅᓯᒪᔪᓂᒃ ᐃᓕᓐᓂᐊᖅᑎᓄᑦ ᐃᑲᔪᖅᑎᑕᖃᓚᐅᖅᖢᖓ ᐅᐸᓚᐅᖅᑕᓐᓂᒃ. ᐃᓕᒍᓐᓇᖅᓯᓚᐅᖅᑐᖓ ᐃᓄᖏᓐᓂᒃ ᒥ'ᑭᒻᒪᖅ, ᒪᓕᓯᑦ, ᐊᒻᒪᓗ ᐅᔨᐳ. ᑲᒪᓇᓚᐅᖅᑐᖅ ᑕᑯᓪᓗᓂ ᐊᔾᔨᒌᖏᓐᓂᖏᓐᓂᑦ, ᑭᓯᐊᓂ ᐊᔾᔨᐸᓗᖓ ᐃᓕᓐᓂᐊᑎᑦᓯᓂᑦᑎᓐᓂᑦ ᐃᓚᖏᓐᓂᓪᓘᓐᓃᑦ ᐅᓂᒃᑳᑦᑎᓐᓂᑦ."

ᐋᔅᓕᒧᑦ, ᑎᒍᓯᓂᖅ ᑎᒍᓯᓂᕐᓗ ᐱᕕᒃᓴᓂᑦ ᐊᔪᕐᓇᖅᑐᖅ ᑭᓯᐊᓂ ᐱᕚᓪᓕᕈᑎᑦ ᐊᔾᔨᐅᙱᑦᑐᑦ. "ᐱᕈᖅᐸᓪᓕᐊᔪᒻᒪᕆᐅᕗᖓ ᐊᒻᒪ ᐊᔪᕈᓐᓃᖅᐸᓪᓕᐊᑦᑎᐊᖅᖢᖓ ᐃᓅᓯᓐᓂ ᐊᑲᐅᒃᓴᕈᓐᓃᖅᖢᖓ... [ᐊᖏᕐᕋᖅ ᐃᓄᑑᔪᓐᓇᖅᑐᖅ] ᐃᓛᓐᓂᒃᑯᑦ, ᑭᓯᐊᓂ ᐱᕈᖅᐸᓪᓕᐊᓂᕆᔭᕋ ᐊᖏᓂᖅᓴᐅᖕᒪᑦ ᐊᒃᓱᕈᕐᓇᕐᓂᖓᓂᒃ."

ᖃᓄᕐᓕ ᐱᕕᒃᓴᖅᓯᐅᖃᑦᑕᖅᐱᑦ? ᐋᔅᓕᒧᑦ, ᑭᒡᒍᓯᐅᔪᖅ ᐊᑲᕐᕉᑎᖃᕋᓱᒃᐳᖅ ᑭᓱᑦ ᓵᖕᓃᑦᑐᑦ ᐅᒃᑯᐃᖓᓪᓗᑎᒡᓗ. ᐃᓐᖏᖅᑏᑦ ᐃᓚᒋᔭᐅᒐᓗᐊᖅᐸᑕ ᐃᓄᒃᓱᒃ ᐃᓕᓐᓂᐊᕐᕕᐊᓗᐊᓂ, ᖃᓪᓗᓈᑦ ᓄᓇᖓᓐᓄᑦ ᐃᓐᖏᕆᐊᖅᑐᕐᓗᓂ, ᐅᕝᕙᓘᓐᓃᑦ ᐅᖃᖃᑎᖃᕆᐊᖅᑐᑐᐃᓐᓇᕐᓗᓂ ᖃᖓᑕᓲᒃᑯᕕᒻᒥ:

"ᐅᑭᐅᖅᑕᖅᑐᓕᐊᓕᖅᑎᓪᓗᖓ ᑲᔪᖏᖅᓴᐃᓂᕐᒧᑦ ᓵᓚᒃᓴᐅᓯᐊᕐᒥᒃ ᐋᑐᕚᒥ....ᐊᑐᓚᐅᖅᑐᖓ ᕿᓯᕋᔭᖕᒥᒃ ᓂᐊᖁᐊᕐᒥᒃ ᐊᖑᑎᒥᒃ ᖃᐃᓪᓗᓂ ᐅᖃᖅᖢᓂ, 'ᕼᐄ, ᓇᑦᑎᐅᑉ ᓇᑦᑎᖓ, ᑕᒻᒪᙱᖦᖢᓂ?' ᐅᖃᕐᕋᒪ, 'ᐄ, ᐃᒪᐃᑉᐳᖅ.' ᐊᒻᒪᓗ ᐅᖃᖃᑎᒌᑉᐸᓪᓕᐊᓕᓚᐅᖅᑐᒍᑦ. ᐅᖃᐅᑎᓚᐅᖅᑕᕋ ᓄᓇᕗᒻᒦᙶᖅᓯᒪᓂᕋᖅᑐᖓ ᐊᒻᒪᓗ ᐅᖃᐅᑎᓪᓗᓂᖓ ᐃᖅᑲᓇᐃᔭᕐᓂᕋᑦᑐᓂ ᐅᒥᐊᕐᔪᐊᒃᑯᑦ ᐳᓚᕋᑦᑎᓄᑦ ᑲᒻᐸᓂᐅᔪᒧᑦ, ᐊᒻᒪᓗ ᐅᖃᕇᖅᑎᓪᓗᒍ, 'ᐃᖅᑲᓇᐃᔭᕈᒪᕖᑦ ᐅᕙᑦᑎᓐᓄᑦ?' ᓴᐅᓂᓕᕆᔨᐅᓚᐅᖅᑐᖅ ᐃᖅᑲᓇᐃᔭᖅᖢᓂ ᕼᐅᑎᖑᑕᓐᒧᑦ [Norwegian ᐅᒥᐊᕐᔪᐊᒃᑯᑦ]. ᐃᒪᓐᓇᐅᖅᑰᔨᓚᐅᖅᑐᖅ, 'ᐆᑮ, ᑭᓱᑐᐃᓐᓇᑦ ᑐᑭᓕᐊᖏᓐᓇᐅᔭᙱᑦᑐᑦ!'"

ᐋᔅᓕ ᖃᐅᔨᒪᔪᖅ ᑕᒪᒃᑯᐊᕈᓘᔭᐃᑦ ᐱᓕᕆᐊᖑᖃᑦᑕᕆᐊᖃᕐᓂᖏᓐᓂᒃ ᐅᔾᔨᖅᓱᑦᑎᐊᕐᓗᑎᒃ ᑐᙵᑦᑎᐊᕐᓂᒃᑯᑦ ᐅᔾᔨᕈᓱᓕᕈᒪᓂᕐᒧᓪᓗ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒥᒃ ᖃᓄᐃᙱᑦᑎᐊᕐᓂᕐᒥᒡᓗ. "ᐅᖃᖃᑎᖃᐃᓐᓇᐅᔭᖅᑐᖓ ᐃᓅᓯᓕᕆᔨᓄᑦ ᓄᑕᖅᑲᓄᓪᓗ ᐃᑲᔪᖅᑕᐅᕕᖕᒧᑦ ᐅᖃᓘᑏᑦ ᐃᓚᒋᔭᐅᕐᔪᐊᓚᐅᖅᑐᖅᑕᐅᖅ, ᐱᓗᐊᖅᑐᒥᒃ ᓄᓇᕗᒻᒥᐅᑕᐅᑎᓪᓗᖓ ᐊᑐᕈᓐᓇᙱᖦᖢᖓᓗ ᐃᓱᒪᓕᕆᔨᓂᑦ. ᐱᒻᒪᕆᐊᓘᔪᖅ ᑕᒪᒃᑯᐊ ᓱᕈᓯᐅᔪᑦ ᐅᖃᖃᑎᖃᖃᑦᑕᖁᕙᒃᑲ ᖃᐅᔨᒪᔪᓂᒃ, ᐃᓛᓐᓂᒃᑯᑦ ᑲᑉᐱᐊᓇᕋᓗᐊᖅᑎᓪᓗᒍ... ᑭᓯᐊᓂ ᐱᕚᓪᓕᕐᓂᖅ ᐊᑑᑎᖃᓪᓚᕆᑦᑐᖅ."

ᐃᖅᑲᐅᒪᓗᑎᓪᓗ, "ᐊᒡᒐᐃᑦ ᑕᐅᕗᖓᓕᒫᕈᓐᓇᙱᒻᒪᑕ. ᑭᓱᑐᐃᓐᓇᐃᑦ ᐱᐅᓯᑎᑕᐅᒃᑲᓐᓂᕈᓐᓇᖅᐳᑦ, ᐱᓗᐊᙳᐊᖅᖢᓂ ᐃᓕᖕᓂᒃ ᑐᙵᓇᖅᑎᓪᓗᑎᑦ, ᐃᓕᖕᓂᒃ ᑐᑦᑎᐊᖅᑎᓪᓗᑎᑦ, ᖃᓂᒋᔭᖃᖅᖢᑎᓪᓗ ᐱᐅᔪᓂᒃ, ᐃᓄᑦᑎᐊᕙᐅᔪᓂᒃ."

ᖁᔭᓐᓇᒦᑦᑎᐊᕐᒥᔭᕋ ᔭᓯᑲ ᑎ ᕼᐊᒻᕗᕆᔅ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ