"ᓂᕆᐅᒃᐳᖓ ᐊᓯᔾᔨᖅᓱᐃᔪᓐᓇᕐᓂᐊᕋᒪ ᐱᐅᓯᕚᓪᓕᖅᓯᒪᓂᖅᓴᓂᒃ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕋᓱᖕᓂᕐᒥᒃ ᐊᒻᒪ ᐅᖃᐅᓯᓕᕆᓂᕐᒥᒃ ᐱᔨᑦᑎᕋᕐᓂᕐᒥᒃ. ᑕᐃᒪᖓᓕᒫᖅ ᐃᓕᓐᓂᐊᕈᓐᓇᕋᓗᐊᖅᑐᒍᑦ ᐅᖃᐅᓯᕐᒥᒃ, ᑭᓯᐊᓂ ᑐᓴᓐᖏᒃᑯᑦᑎᒍ ᐱᔨᑦᑎᕋᖅᑎᑦᑎᓐᓂ, ᑕᒪᓐᓇ ᐊᑲᐅᓐᖏᓕᐅᕈᑎᐅᓕᖃᑦᑕᕐᒪᑦ. ᑕᐃᒪᓐᓇ ᓂᕆᐅᒍᒪᒐᓗᐊᖅᑐᖓ ᑕᑯᕙᓪᓕᐊᓂᐊᕆᐊᒃᓴᖅ ᓂᕈᐊᖅᑕᐅᓯᒪᓂᓐᓂ," ᐳᕆᓐᑕ ᒎᑎᐊᐃ, ᐅᖃᐅᓯᓕᕆᓂᕐᒧᑦ ᑲᒥᓴᓇ ᓄᓇᑦᓯᐊᕐᒥ.

ᕗᐊᑦ ᓯᒥᑦᒥᐅᑕᒃᓴᔭᐅᓪᓗᓂ ᕗᐊᑦ ᕙᓐᔅᒥᑦ. ᑲᑎᑎᑕᐅᓚᐅᖅᑎᓐᓇᒍ, ᖃᐅᔨᒪᔭᐅᓚᐅᖅᑐᖅ ᐳᕆᓐᑕ ᒪᒃᓚᐅᑦ. ᐊᓂᒍᐃᓯᒪᔪᖅ ᒪᕐᕉᖕᓂᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔫᖕᓂᒃ, ᓄᓇᑦᓯᐊᕐᒥᐅᑕᐅᖏᓐᓇᐅᔭᖅᑐᖅ ᐃᓚᒋᔭᐅᓪᓗᓂᓗ ᑎ ᒐᐃᑦ ᒎᑎ'ᖦᖤ-ᒧᑦ ᓄᓇᖃᖅᑳᖅᑐᓄᑦ. ᒐᕙᒪᒃᑯᓐᓄᑦ ᐃᖅᑲᓇᐃᔭᖅᓯᒪᓕᖅᑐᖅ ᐅᑭᐅᑦ 30 ᐅᖓᑖᓄᑦ ᐊᔾᔨᒌᙱᑦᑐᓂᒃ ᐃᖅᑲᓇᐃᔮᖃᐅᖅᖢᓂ.

ᐃᖅᑲᓇᐃᔮᖓ ᐱᒋᐊᓚᐅᖅᓯᒪᔪᖅ ᓄᓇᓕᖕᓂ ᐃᓄᓕᕆᔨᐅᑎᓪᓗᒍ ᕗᐊᑦ ᕗᐊᑦᔅᒥᑦ. ᑭᖑᓪᓕᕐᒥ, ᐃᓕᓐᓂᐊᖅᑎᓄᑦ ᐃᓅᓯᓕᕆᔨᐅᓚᐅᖅᑐᖅ ᐊᕈᐊᕋ ᓯᓚᑦᑐᖅᓴᕐᕕᖕᒥ ᑭᖑᓂᐊᒍᓪᓗ ᓇᐅᑦᑎᖅᓱᖅᑕᐅᓂᕐᒧᑦ ᐅᕝᕙᓘᓐᓃᑦ ᐊᓄᓪᓚᒃᓰᕕᖕᒥ ᐊᓂᓵᓕᔪᓕᕆᔨᒥᒃ, ᐊᒻᒪᐃᓛᒃ ᓄᓇᕗᒻᒥ ᐊᕐᓇᐃᑦ ᐃᑲᔪᖅᑕᐅᕕᖓᓂ ᐃᑲᔪᖅᑕᐅᕕᖕᒥ. ᑖᓐᓇ ᐃᓂᒋᔭᐅᔪᖅ ᑲᑎᓚᐅᖅᐳᖅ ᕗᐊᑦ ᓯᒥᑦ−ᒧᑦ ᑎᒍᔭᐅᓯᒪᕝᕕᖕᒧᑦ ᓯᕗᓕᖅᑎᒋᔭᐅᓪᓗᓂ ᐊᑕᐅᓯᕐᒧᑦ ᐃᑲᔪᖅᑕᐅᕕᐅᑉ ᐊᖓᔪᖅᑳᖓᓄᑦ. ᓅᓚᐅᖅᑐᖅ ᔭᓗᓇᐃᒧᑦ ᐃᖅᑲᓇᐃᔭᖅᖢᓂ ᑐᑭᒧᐊᒃᑎᑦᑎᔨᐅᓪᓗᓂ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ.

ᑕᐃᑲᙵᑦ, ᒐᕙᒪᐅᖃᑎᒌᑦᑐᓕᕆᔨᖏᓐᓄᑦ ᖃᐅᔨᓴᖅᑎᙳᓚᐅᖅᑐᖅ, ᐅᖃᐅᔾᔨᒋᐊᖅᑎᐅᓪᓗᓂᓗ ᒥᓂᔅᑕᒧᑦ ᑲᒪᒋᔭᓕᖕᒧᑦ ᐊᕐᓇᐃᑦ ᑲᑎᒪᔨᖏᓐᓄᑦ ᑭᖑᓂᐊᒍᓪᓗ ᐊᐅᓚᑦᑎᔨᒻᒪᕆᐅᓕᖅᖢᓂ ᕗᐊᑦ ᓯᒥᑦᒧᑦ ᓄᓇᑦᓯᐊᕐᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓄᓕᕆᔨᒃᑯᓪᓗ ᐱᔪᓐᓇᐅᑎᓕᖕᓄᑦ. ᑕᐅᑐᒐᖃᒻᒪᕆᖕᒪᑦ ᓄᑖᒧᑦ ᐱᓕᕆᐊᖓᓄᑦ ᐅᖃᐅᓯᕐᓄᑦ ᑲᒥᓯᓇᐅᑉ ᐊᒡᓚᒡᕕᐊᓂᑦ. ᐱᓕᕆᐊᕆᔪᒪᓚᐅᖏᑕᖓ, ᑭᓯᐊᓂ ᑎᓕᐅᕆᓚᐅᖅᑐᖅ ᐅᐃᒥᓂᒃ ᐱᖃᓐᓇᕆᔭᒥᓂᓪᓗ. "ᖁᕕᐊᒋᑦᑎᐊᖅᑕᕋ, ᐃᖅᑲᓇᐃᔮᑦᑎᐊᕙᐅᔪᖅ," ᐃᓚᓯᕗᖅ.

ᐊᓯᔾᔩᓂᖅ ᐊᔪᕐᓇᐃᓐᓇᕈᓐᓇᓚᐅᙱᑦᑐᖅ. "ᐃᖅᑲᓇᐃᔭᕐᓂᓐᓂ ᐅᓄᕐᓂᖅᓴᑦ ᑎᒍᔭᐅᓯᒪᔪᓕᕆᔨᒃᑯᓐᓂ ᐃᖅᑲᓇᐃᔭᖅᑎᐅᓚᐅᖅᑐᖓ. ᖃᖓᒃᑯᒃᑭᐊᖅ, ᐊᔾᔨᒋᙱᑕᖓᓂᒃ ᐱᓕᕆᔭᕆᐊᖃᖅᑐᑎᑦ. ᐃᖅᑲᓇᐃᔭᖅᑎᓪᓗᑎᑦ ᐊᑕᐅᓯᕐᒥ ᐃᖅᑲᓇᐃᔮᖃᖅᑎᓪᓗᑎᑦ ᐊᑯᓂᐅᓂᓕᒫᒃᑯᑦ... ᐃᓛᓐᓂᒃᑯᑦ ᐊᔪᕐᓇᓲᖅ ᐊᓯᐊᓄᐊᕋᓱᒋᐊᒃᓴᖅ," ᐅᖃᐅᓯᕆᕙᐅᒃ. ᐱᓇᔪᓚᐅᖅᑎᓪᓗᒍ ᑲᔪᓯᓂᖃᑦᑎᐊᙱᖦᖢᓂ ᐊᒥᓱᓄᑦ ᐃᖅᑲᓇᐃᔮᓄᑦ, ᐃᓱᒪᔮᓕᓚᐅᖅᑐᖅ ᑕᐃᒪᐃᖁᔨᙱᖦᖢᓂ. ᓂᕆᐅᓇᙱᑦᑐᒃᑯᑦ ᐅᖃᓗᒃᑐᖃᓚᐅᖅᑐᖅ ᑭᓇᒥᑭᐊᖅ ᐃᑲᔪᖅᓱᐃᔪᒥᒃ ᓄᑖᙳᕆᐊᖅᓯᒪᔪᒥᒃ ᒎᑎᐊᐃ ᖁᓱᙱᖦᖢᓂ ᐃᑲᔪᕐᖢᓂᓗ ᕿᒥᕐᕈᓂᕐᒥᒃ ᖃᓄᑐᐃᓐᓇᖅ ᑕᐅᑐᒃᑕᒃᑯᑦ ᓄᑖᒃᑯᓪᓗ ᐱᔪᒪᓕᕈᑎᑖᕐᖢᓂ.

ᐱᔪᒃᓯᑎᑦᑎᓂᖅ ᐱᑕᖃᑦᑎᐊᓚᐅᙱᑦᑐᖅ ᐃᓕᓐᓂᐊᖅᑎᐅᓕᓵᖅᑎᓪᓗᒍ ᐃᓕᓐᓂᐊᕐᕕᖕᒥ. ᐊᓂᒍᐃᓚᐅᖅᑐᖅ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐊᒻᒪ ᐱᔪᒃᓯᔪᓐᓃᖅᖢᓂ ᐱᓕᕆᒃᑲᓐᓂᕆᐊᒃᓴᖅ. ᐃᖅᑲᓇᐃᔮᔅᓴᖅᑕᖃᑦᑎᐊᖏᓐᓂᖓᓄᑦ ᐊᖏᕐᕋᖓᓂ, ᐃᓕᓐᓂᐊᕆᐊᒃᑲᓐᓂᓚᐅᖅᑐᖅ ᓱᔅᓴᔅᓴᖅᑕᖃᙱᓐᓂᖓᓄᑦ. ᐸᐃᑉᐹᖃᓚᐅᖅᑐᖅ ᐃᓄᓕᕆᔨᐅᓂᕐᒧᑦ, ᐊᒻᒪᓗ ᐊᑕᐅᓯᖅ ᐊᐅᓚᑦᑎᔨᐅᓂᕐᒧᑦ ᐃᓕᓐᓂᐊᖅᑐᓂ, ᐊᒻᒪᓗ ᓄᖅᑲᑐᐃᓐᓇᕈᓐᓃᖅᑐᓂ, ᐅᑎᒃᑲᓐᓂᓕᓚᐅᖅᑐᖅ.

ᒎᑎᐊᐃ ᐱᔭᕇᖅᓯᔾᔪᓯᐊᖅᑖᓚᐅᖅᑐᖅ ᐃᓄᓕᕆᔨᐅᓂᕐᒧᑦ ᖃᕋᓴᐅᔭᒃᑯᑦ ᐃᖅᑲᓇᐃᔭᖅᑎᓪᓗᒍ ᐅᓪᓗᒃᑯᑦ. ᐅᐃᖓ ᖃᐅᔨᒪᓚᐅᖅᑐᖅ ᐃᓱᒋᙱᒻᒪᒍ, ᑕᐃᒫᒃ ᐅᖃᕋᓗᐊᕐᖓᑦ. ᓂᐅᕕᓚᐅᖅᑐᖅ ᖃᕆᑕᐅᔭᕋᓛᒥᒃ ᖁᕕᐊᓱᒡᕕᖕᒧᑦ ᓲᖃᐃᒻᒪ ᑲᔪᓯᓇᔭᕐᓂᖓᓂᒃ ᖁᑦᑎᖕᓂᖅᐹᒧᑦ ᓇᓗᓇᐃᒃᑯᑕᕐᒧᑦ (ᑕᐃᒪᐃᓚᐅᖅᑐᖅ!). ᐅᓪᓗᒥᒧᑦ ᑎᑭᖦᖢᒍ, ᓱᓕ ᕿᓂᖅᐳᖅ ᐃᓕᑦᑎᕙᓪᓕᐊᓂᕐᒧᑦ ᐱᕕᒃᓴᐅᔪᓐᓇᖅᑐᓂᒃ, ᐃᓅᓯᓕᒫᒧᑦ ᐃᓕᑦᑎᕙᓪᓕᐊᔪᒧᑦ ᐃᓱᒪᒋᔭᐅᙱᖦᖢᓂ.

ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᐊᖏᕐᕋᒥᓂᒃ ᕿᒪᐃᔪᒪᓪᓗᓂ ᐃᓕᓐᓂᐊᕆᐊᕈᒪᓗᓂ ᑕᐅᑐᓪᓗᐊᑕᕐᓗᓂ ᖃᓄᖅ ᓇᐃᑦᑐᑯᓘᖕᒪᖔᑦ ᐃᓕᓐᓂᐊᕐᓇᐅᑉ ᐊᕐᕌᒍᖓ, ᑕᖅᑭᓄᑦ 8−ᖏᓐᓇᕐᓄᑦ ᐊᓂᒍᐃᔪᓐᓇᕐᓗᓂ. ᑭᖑᒧᑦ ᑕᑯᒋᐊᕐᓗᖓ ᓯᕗᓪᓕᕐᒧᑦ ᐊᕐᕌᒍᒧᑦ, ᖃᖓᑕᓇᖅᑐᒻᒪᕆᐅᕙᒻᒪᑦ ᐊᒻᒪ ᐊᑐᓗᐊᕐᓇᓂ ᓂᕆᐅᒋᔭᐅᓚᐅᖅᑐᑎᑐᑦ. ᑎᓕᐅᕆᔪᖅ ᒪᒃᑯᑦᑐᓂᑦ ᖁᑦᓯᓂᖅᐹᒦᖏᓐᓇᖁᔨᓂᕐᒥᑦ ᐃᓕᓐᓂᐊᕐᓂᖏᓐᓂᑦ ᐱᔾᔪᑎᒋᑦᓱᒍ ᐊᖑᒻᒪᑦᑎᓂᖅ ᐱᔭᕆᐊᑐᒍᓐᓇᕐᒪᑦ ᐃᓅᖃᑎᖃᕐᓂᕐᒥᓪᓗ ᐊᖏᕐᕋᕐᒥᑦ ᐱᔭᕇᖅᐸᑕ.

ᐊᓯᐊᑦᑕᐅᖅ ᒎᑎᐊᐃ ᐅᖃᖅᐳᖅ ᐊᖏᕐᕋᖅᓯᒪᐃᓐᓇᖃᑦᑕᕐᓂᖓᓂᒃ ᐱᓕᕆᔾᔪᑎᑎᒍᑦ ᐃᖅᑲᐅᒪᓂᕐᓗ ᓄᓇᕐᔪᐊᖅ ᒥᑭᑦᑐᑯᓘᓂᖓᓂᒃ. ᕿᒪᕉᑎᓯᒪᓂᖅ ᓴᖅᑭᑎᑦᑎᕙᒃᐳᖅ ᓄᑖᓂᒃ ᐱᕕᒃᓴᓂᒃ ᐱᖃᓐᓇᕆᔭᖅᑖᕐᓂᐊᕐᓗᓂ ᐃᓕᑦᑎᕙᓪᓕᐊᓗᓂᓗ ᓄᑖᓂᒃ ᐱᖁᑎᓂᒃ. ᖃᐅᔨᒋᐊᕐᕕᖃᕐᓂᖅ ᐃᖅᑲᓇᐃᔭᖅᑎᒋᔭᐅᔪᓂᒃ ᐃᑲᔪᖅᑐᖅᑕᐅᔪᒪᓗᓂ ᐊᓯᐊᑦᑕᐅᖅ ᖃᓄᐃᓕᐅᖁᓯᒪᖕᒥᔭᖓ. ᑲᔪᓯᑦᑎᐊᖁᔨᖕᒪᑕ, ᓇᓗᓇᐃᕐᓯᔪᖅ. ᑭᖑᓪᓕᖅᐹᒥ, ᐃᓕᖕᓂᒃ ᐊᕙᓗᓯᒪᖁᔨᕗᖅ ᐃᓄᖕᓂᒃ ᑭᓱᑐᐃᓐᓇᓂᒡᓗ ᐃᓕᖕᓂᒃ ᖁᕕᐊᓱᒃᑎᑦᑎᔪᓂᒃ.

ᐃᓱᒪᒋᓪᓗᒋᑦ ᑐᓗᖅᑕᕈᑏᑦ ᐊᓂᒍᖅᑎᓯᒪᔭᖏᑦ ᐃᓅᓯᖓᓂ ᑎᑭᐅᑎᓇᓱᒃᓗᓂ ᓇᓃᕝᕕᒋᔭᖓᓄᑦ, ᒎᑎᐊᐃ ᐅᖃᕐᖢᓂ ᐊᔾᔨᐅᙱᑦᑐᒃᑯᑦ ᐱᔭᕆᐊᓕᖕᓄᑦ ᐃᓕᓐᓂᐊᖅᑎᐅᓂᖓᓂᒃ ᐱᔭᕆᐊᖃᖅᑐᒥᒃ ᐃᑲᔪᖅᑕᐅᓂᕐᒥᒃ ᓄᑕᕋᐅᓪᓗᓂ. ᐊᒃᓱᕈᕐᓂᖓ ᑐᑭᓯᐊᑦᑎᐊᙱᖦᖢᓂ ᐅᑎᓚᐅᖅᑐᖅ ᓯᕗᓪᓕᕐᒥ ᐱᔪᒃᓯᑦᑎᐊᕐᖢᓂ ᐱᓇᓱᖕᓂᕐᒧᑦ ᖁᑦᑎᖕᓂᖅᓴᒥᒃ ᐃᓕᓐᓂᐊᕐᓂᕐᒥᒃ. "ᐅᔾᔨᕈᓱᓚᐅᖅᑐᖓ ᒪᒃᑯᒃᑎᓪᓗᖓ ᐃᓕᑦᑎᓚᐅᙱᓐᓇᒪ ᑕᐃᒪᓐᓇᑦᑕᐃᓐᓇᖅ ᑭᒃᑯᓕᒫᑦ ᐃᓕᑦᑎᓪᓗᑎᒃ. ᓇᓂᓯᒋᐊᖃᓚᐅᖅᑐᖓ ᖃᓄᖅ ᑕᒪᓐᓇ ᐅᕙᓐᓄᑦ ᐊᐅᓚᓂᖃᕐᒪᖔᖅ. ᖃᐅᔨᒪᓚᐅᖅᑐᖓ ᐱᕕᖃᒃᑲᓐᓂᕆᐊᖃᕐᓂᓐᓂᒃ ᐅᖃᓕᒫᕆᐊᒃᓴᖅ ᑐᑭᓯᓗᒋᓪᓗ," ᐃᖅᑲᐅᒪᔪᖅ. ᐃᖅᑲᐅᒪᔭᒥᒍᑦ ᑐᕚᕆᔭᖃᕐᖢᓂ, ᐃᓕᓐᓂᐊᑦᑎᐊᕐᖢᓂ. ᐃᓐᓇᕈᖅᐸᓪᓕᐊᓪᓗᓂ, ᐃᑲᔪᖅᓯᖅᑕᐅᒃᑲᓐᓂᕈᓐᓃᓚᐅᖅᑐᖅ, ᐊᔪᕐᓇᕐᓂᖅᓴᐅᓪᓗᓂ, ᑭᓯᐊᓂ ᖃᐅᔨᓚᐅᖅᑐᖅ ᑎᑭᐅᑎᔪᓐᓇᕐᓂᕐᒥᓂᒃ ᐅᖃᐅᓯᕐᓄᑦ ᑲᒥᓯᓇᐅᑉ ᐊᒡᓚᒡᕕᐊᓄᑦ.

ᐊᑯᓂᐊᓗᒃ ᑕᑯᓯᒪᔪᖅ ᐊᓯᔾᔨᖅᑐᓂᒃ ᐅᖃᐅᓯᓕᕆᓂᕐᒧᑦ ᑲᒥᓯᓇᐅᓪᓗᓂ ᓄᓇᑦᓯᐊᕐᒥ ᐊᒻᒪᓗ ᐱᓕᕆᓇᓱᐊᖅᑐᓂ ᖃᓄᐃᓕᐅᕋᓱᐊᖅᑐᓂ. ᐳᕆᓐᑕ ᒎᑎᐊᐃ ᖃᐅᔨᒪᔪᖅ ᐃᓕᓐᓂᐊᖏᓐᓇᕈᓐᓇᕋᑦᑕ ᐅᖃᐅᓯᕐᒥᒃ, ᑭᓯᐊᓂ ᑐᓴᙱᒃᑯᑦᑎᒍ ᐱᔨᑦᑎᕋᖅᑎᑦᑎᓐᓂ, ᑕᒪᓐᓇ ᐊᑲᐅᙱᓕᐅᕈᑕᐅᓕᖃᑦᑕᕐᒪᑦ. ᐊᕐᕌᒍᓄᑦ 30-ᓄᑦ ᒐᕙᒪᒃᑯᑦ ᐊᑐᖅᓯᒪᔭᖏᓐᓂᒃ ᐱᓕᕆᓪᓗᓂ, ᑭᖑᓪᓕᕐᒥ ᐱᓕᕆᒃᑲᓐᓂᖅᐳᖅ ᐃᖅᑲᐅᒪᓇᖅᑐᒥᒃ ᐃᖅᑲᓇᐃᔮᖃᓕᖅᖢᓂ ᓂᕆᐅᒃᖢᓂ ᐅᖃᐅᓯᖅᑕᑦ ᐳᐃᒍᖅᑕᐅᔾᔮᙱᓐᓂᖏᓐᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.