ᓴᓇᐅᒐᓕᐅᕐᓂᖅ ᐊᒻᒪ ᓄᓇᓕᒃ: ᐳᕆᐋᓇ ᔅᐱᐅᑉ ᐃᖏᕐᕋᓂᕆᔭᖓᑦ ᐊᖏᖃᑎᒌᒍᑎ 2-ᒥᑦ ᐃᕝᔭᒍᒧᑦ

"ᐅᔾᔨᕈᓱᒃᓗᒋᑦ ᐃᓄᐃᑦ ᖃᓂᒋᔭᕐᓃᑦᑐᑦ ᐃᓕᒍᑎᓪᓗ ᐃᓕᖕᓄᑦ, ᓲᖃᐃᒻᒪ ᐃᓕᑦᑎᔾᔪᑎᑕᖃᕐᔪᐊᕐᒪᑦ ᖃᓄᐃᓕᐅᕈᓐᓇᖅᑕᕐᓂᒃ ᐃᓄᖕᓂᑦ ᖃᓂᒋᔭᕐᓃᑦᑐᓂᒃ." ᑖᓐᓇ ᐅᖃᐅᔾᔨᒋᐊᕈᑎᑦᑎᐊᕙᐅᔪᖅ ᐳᕋᐃᔭᓐᓇ ᐅᐋᔅᐱᒥᙶᖅᑐᖅ, ᐃᓕᓴᐃᔨ ᐊᒻᒪ ᐃᓄᒃ ᐱᕈᓚᐅᖅᑐᖅ ᐊᖏᖃᑎᒌᒍᑎ 2-ᒥ ᓄᓇᕗᒻᒥ (ᖃᑕᙳᑎᖏᑦ ᐅᑯᐊᖑᔪᑦ, ᒥᑎᔅ, ᐊᒻᒪ ᔮᒪᓂ, ᖃᓪᓗᓈᑎᑐᑦ ᐊᒻᒪ ᐊᐃᕆᔅ ᓄᓇᑖᖃᑕᐅᓯᒪᔪᑦ).

ᐳᕆᐋᓇ ᐃᓚᒥᑎᒍᑦ ᓴᖅᑭᑦᑎᔪᒪᑦᑎᐊᕐᓂᖓᓄᑦ, ᐅᓂᒃᑳᖅᖢᓂ, "ᐊᑖᑕᒐ ᕿᔾᔮᖅᓯᓇᖅᑑᕗᖅ ᐊᒻᒪ ᐊᒃᑕᑰᓯᕝᕕᑦᑎᐊᕙᐅᖅᑰᔨᓪᓗᓂ. ᐃᓕᑦᑐᓐᓇᖅᓯᓪᓗᓂ ᐃᓅᓯᓐᓂᙶᖅᑐᒥᒃ ᐃᓚᒋᔭᐅᕐᔪᐊᖅᓯᒪᔪᖅ."

"ᐃᒡᓗᓐᓂ ᐅᖓᓯᒃᑐᓕᐊᕈᓐᓇᙱᑦᑐᑎᑦ ᑕᑯᓚᐅᙱᓪᓗᖓ ᓴᓇᓯᒪᔭᓐᓂᒃ. ᐃᓕᑦᑎᕙᓪᓕᐊᖏᓐᓇᐅᔭᖅᑐᖓ ᓄᑖᓂᒃ ᐊᑐᒐᒃᓴᓂᑦ ᐊᔪᙱᓐᓂᕐᓂᒃᓗ ᐱᕈᖅᐸᓪᓕᐊᑎᑦᑎᓂᕐᓗ ᐊᕙᑎᓐᓃᑦᑐᓂᒃ."

ᐃᖅᑲᓇᐃᔮᖓ ᐋᖅᑭᒃᐸᓪᓕᐊᑎᓪᓗᒍ. ᑕᕐᕆᔭᐅᓯᐅᖅᑎᓪᓗᒋᑦ, ᐱᓕᕆᐊᒃᓴᓄᑦ ᐊᐅᓚᑦᑎᔨᐅᓚᐅᖅᑐᖅ N'we Jinan Integrative Arts Program−ᒧᑦ, ᐃᑲᔪᖅᓱᐃᓪᓗᓂ ᐃᓕᓐᓂᐊᖅᑎᑦᑎᕙᒃᖢᓂ ᓴᓇᙳᐊᖅᑎᓂᒃ ᐱᓕᕆᑎᑦᑎᑎᓪᓗᒋᑦ ᐃᓱᒪᒋᔭᐅᑦᑎᐊᖅᓯᒪᔪᓂᒃ ᐃᓕᓐᓂᐊᖅᑕᐅᔪᒃᓴᓂᒃ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᓄᑦ.

ᐅᖓᑖᓂ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᓴᓇᐅᒐᓕᕆᓂᕐᒧᑦ ᐃᓕᓐᓂᐊᕐᓂᕐᒧᑦ Concordia ᓯᓚᑦᑐᖅᓴᕐᕕᒡᔪᐊᕐᒥ, ᓇᓗᓇᐃᒃᑯᑕᖃᖅᑐᖅ ᐃᓕᓴᐃᔪᓐᓇᕐᓂᕐᒥᒃ ᓴᓇᙳᐊᕐᓂᕐᒥᒃ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ ᑭᖑᓂᐊᒍᓪᓗ Hᐋᕐᕗᑦ ᓯᓚᑦᑐᖅᓴᕐᕕᒡᔪᐊᖓᓄᐊᖅᖢᓂ ᐃᓕᑕᕆᔭᐅᔾᔪᑎᑖᖅᖢᓂ ᐃᓕᓐᓂᐊᕐᓂᓕᕆᓂᕐᒧᑦ ᕼᐋᕐᕗᑦ ᐃᓕᓐᓂᐊᕐᕕᖕᒥ ᐊᓂᒍᐃᓂᕐᒧᑦ ᐃᓕᓐᓂᐊᕐᕕᖕᒥ.

ᓯᕗᓪᓕᐅᔾᔨᖃᑦᑕᕐᒥᔪᖅ ᐃᓕᓐᓂᐊᓂᕐᒥᑦ, ᐅᖃᖅᓱᓂ, "ᐊᒥᓱᓂᑦ ᐃᓕᓐᓂᐊᕐᓂᕐᒥᑦ ᓯᓚᑖᓂᑦ ᐃᓕᓐᓂᐊᕐᕕᐅᑉ. ᐊᒻᒪᓗ ᐃᓕᒍᒪᒍᕕᑦ ᐱᓇᓱᐊᒐᓚᓪᓗᑎᑦ ᐊᒻᒪᓗ ᐊᐱᕆᓗᑎᑦ ᓇᓂᓯᒍᓐᓇᖅᑐᑎᑦ ᐊᑐᖅᑕᐅᒍᓐᓇᖅᑐᓂᒃ. ᑲᙳᓱᒃᑕᐃᓕᒋᑦ ᐊᐱᕆᔭᕆᐊᒃᓴᖅ ᐃᓄᖕᓂᒃ ᐃᑲᔪᖅᑕᐅᔪᒪᓗᑎᒃ ᓇᓂᓯᓇᓱᒃᓗᑎᒃ ᑭᓱᒐᓚᓂᒃ ᓲᖃᐃᒻᒪ ᐊᑐᐃᓐᓇᐅᖕᒪᑦ."

"ᓄᑖᓂᒃ ᐃᓕᑦᑎᕙᓪᓕᐊᓂᖅ ᐊᒻᒪ ᓴᓇᓂᖅ ᐅᕙᓐᓄᑦ ᐃᓱᒪᖅᓲᑕᐅᖏᓐᓇᐅᔭᖅᐳᖅ. ᐃᓕᑦᑎᒍᕕᑦ ᖃᓄᖅ ᓴᓇᔭᕆᐊᒃᓴᖅ, ᖃᓄᑐᐃᓐᓇᖅ ᐃᓱᒪᒋᔭᕐᓂᒃ ᐃᓱᒪᑖᕈᓐᓇᖅᑐᑎᑦ ᐱᓪᓚᑦᑖᖑᓕᕐᓗᓂ. ᑕᐃᒪᐃᓐᓂᖓᓄᑦ ᓴᓇᙳᐊᕐᓂᕐᒧᑦ ᐃᓕᓐᓂᐊᕐᓂᖅ ᐅᕙᓐᓄᑦ ᐱᒻᒪᕆᐅᓚᐅᖅᐳᖅ."

ᐃᓕᓐᓂᐊᕐᕕᖕᒥ ᓴᓇᖃᑦᑕᓚᐅᖅᐳᖅ ᐱᐅᓴᐅᑎᓂᒃ, ᑳᐱᑐᕐᕕᖕᒥ ᐱᓕᕆᓪᓗᓂ, ᐸᐃᕆᕝᕕᖕᓂ, ᓯᓂᒋᐊᖅᑐᖅᑐᓂᒃ, ᐊᒻᒪ ᑐᔪᕐᒥᕕᖕᓂ ᒥᑎᑲᑕᒃᖢᓂ. ᑭᖑᓂᐊᒍᑦ, ᓂᐅ ᔪᐊᒃᒥ, ᐃᖅᑲᓇᐃᔭᓚᐅᖅᑐᖅ ᓯᕗᓕᖅᑎᐅᓂᕐᒧᑦ ᐱᓕᕆᐊᒧᑦ ᑲᒪᒋᔭᖃᓚᐅᖅᑐᖅ ᐃᓱᒪᑐᔪᓂᒃ ᐱᓕᕆᐊᒃᓴᓂᒃ ᒪᒃᑯᒃᑐᓄᑦ ᐃᓕᓐᓂᐊᕌᓂᒃᑎᓪᓗᒋᑦ ᐱᓕᕆᐊᒃᓴᓂᑦ.

"ᐅᒃᐱᕈᓱᑦᑎᐊᕐᓂᖅ ᐊᔪᙱᓐᓂᖃᕐᓂᕐᓂᒃ ᓴᖅᑭᑎᑦᑎᔪᓐᓇᕐᓂᕐᒥᒃ ᐱᔭᕆᐊᖃᖅᑕᕐᓂᒃ ᐊᕙᑎᖕᓂ ᐊᖏᔪᑲᓪᓚᖕᒥᒃ ᐊᒃᑐᖅᓯᓯᒪᕗᖅ ᐅᕙᓐᓄᑦ. ᐊᒡᒐᑎᑦ ᐱᓕᕆᓗᒋᑦ ᒪᒥᓐᓇᑦᑎᐊᕈᓐᓇᖅᑐᑦ."

ᐃᓕᓐᓂᐊᖅᑎᑦᑎᓚᐅᖅᑐᖅ ᐊᒥᐊᕆᓂᕐᒥᑦ, ᒥᖒᑎᓂᑦ, ᐱᐅᓴᐅᑎᓕᐅᓂᕐᒥᑦ, ᐱᖑᓕᐅᓂᕐᒥᑦ, ᐋᓐᓂᖅᑎᕆᑦᑕᐃᓕᒪᓂᕐᒥᑦ ᐊᒻᒪ ᐅᑎᖅᑎᑦᑎᓂᕐᒥᑦ ᒪᓕᒐᓕᕆᓂᕐᒧᑦ ᐱᓕᕆᐊᓂᑦ. ᐃᖅᑲᓇᐃᔭᖅᖢᓂ ᐃᓕᓐᓂᐊᕐᕕᖕᓂ ᓂᐅ ᔪᐊᒃᒥ, ᐊᑲᐅᒃᓴᕈᓐᓃᓚᐅᖅᑐᖅ ᐃᓕᓐᓂᐊᕐᓂᓕᕆᓂᕐᒥ, ᑕᐅᑐᒃᖢᒋᑦ ᓄᑕᖅᑲᑦ ᐊᔪᕐᓇᖅᑐᖅᓯᐅᖅᑐᑦ ᐃᓕᓐᓂᐊᕐᕕᖕᒥ ᓄᖅᑲᖅᑎᑕᐅᓪᓗᑎᒃ, ᐊᓂᑕᐅᓪᓗᑎᒃ ᐊᔭᐅᖅᑕᐅᓪᓗᑎᒃᓗ ᐃᓕᓐᓂᐊᕐᓂᓕᕆᓂᕐᒥ ᐊᑐᖃᑦᑕᖅᑐᓂ ᑕᐃᑲᓂ.

"ᑐᑭᓯᔪᓐᓇᓚᐅᙱᑦᑐᖓ ᖃᓄᐃᒻᒪᑦ ᐃᓕᓴᐃᔩᑦ ᑕᑯᓚᐅᙱᒻᒪᖔᑕ ᓄᑕᖅᑲᑦ ᐃᑲᔪᖅᑕᐅᒃᑲᓐᓂᕆᐊᖃᕐᓂᖏᓐᓂᒃ ᐊᒻᒪ ᐊᓂᕝᕕᖃᕆᐊᖃᕐᓂᖏᓐᓂᒃ ᐃᓚᖏᓐᓂᒃ ᐊᒃᓱᕈᕐᓇᖅᑐᓂᒃ ᓵᑦᑎᐊᕐᒥᐅᑕᖏᓐᓂᒃ."

ᑕᒪᓐᓇ ᐊᑲᐅᒃᓴᕈᓐᓃᕐᓂᖅ ᓴᖅᑭᑎᑦᑎᓚᐅᖅᐳᖅ ᐊᓂᒍᐃᓂᕐᒧᑦ ᐊᔪᕈᓐᓃᖅᓴᕐᓂᕆᔭᒥᓂᒃ, ᑕᐃᑲᓂᓗ ᑕᐅᑐᒐᖃᓪᓗᐊᑕᖅᖢᓂ ᐋᖅᑭᒃᓱᐃᕙᓪᓕᐊᓂᕐᒥᒃ ᐊᔪᕈᓐᓃᖅᓴᒐᒃᓴᓂᒃ ᐃᓕᓴᐃᔨᓄᑦ ᐱᕕᒃᓴᖃᖅᑎᑦᑐᒪᓪᓗᒋᑦ ᑐᑭᓯᐅᒪᓂᕐᒥᒃ ᓄᑕᖅᑲᑦ ᐃᓕᖅᑯᓯᕆᕙᒃᑕᖏᓐᓂᒃ ᖃᓄᕐᓗ ᓄᑕᖅᑲᑦ ᐊᒃᑐᖅᑕᐅᕙᖕᒪᖔᑕ ᐊᒃᓱᕈᕐᓇᖅᑐᓄᑦ ᐊᒃᓱᕈᕐᓇᖅᑐᓄᓪᓗ ᐃᓅᓯᕐᒥ ᐊᑐᖃᑦᑕᖅᓯᒪᔭᖏᓐᓄᑦ. ᓴᓇᙳᐊᕐᓂᕐᒧᑦ ᐃᓕᓐᓂᐊᕐᓂᖏᑦ ᑐᑭᒧᐊᒍᑎᖃᓚᐅᖅᑐᑦ ᐃᓕᓐᓂᐊᕐᓂᖏᓐᓄᑦ ᐊᒻᒪ ᐱᕙᓪᓕᐊᓂᖏᓐᓄᑦ.

"ᐃᓛᓐᓂᒃᑯᑦ ᐃᖅᑲᓇᐃᔭᖅᑎᓪᓗᖓ ᐃᓕᓐᓂᐊᖅᑐᓕᕆᓂᕐᒥᑦ ᐊᒻᒪ ᓴᓇᙳᐊᕐᓂᕐᒧᑦ ᐊᒃᑐᐊᓂᖃᓪᓚᕆᙱᖦᖢᖓ, ᐃᓱᒪᑐᔫᓪᓗᖓ ᐃᓕᓐᓂᐊᖃᑦᑕᓚᐅᖅᑐᖓ ᑕᑯᓚᐅᖅᑐᖓᓗ ᐃᖏᕐᕋᔾᔪᑎᑦᑎᐊᕙᐅᓂᖓᓂᒃ ᐃᑲᔪᕋᓱᒃᓗᓂ ᐃᓄᖕᓂᒃ ᐊᒃᓱᕈᕐᓇᖅᑐᒃᑰᖅᑎᓪᓗᒋᑦ."

ᐅᖓᑎᓗᐊᖓᓄᑦ ᓇᖕᒥᓂᖅ ᐊᒃᓱᕈᕐᓂᖓ ᓯᕘᕋᓂᕐᒧᑦ ᓂᑲᓪᓗᖓᓂᕐᒧᓪᓗ ᐃᑲᔪᕐᖢᓂ ᐊᑑᑎᖃᑦᑎᐊᕐᓂᖓᓂᒃ ᐃᖅᑲᓇᐃᔮᖓᓂ. ᐅᖃᐅᓯᖃᖅᑐᖅ ᖃᓄᖅ ᓴᓇᙳᐊᕐᓂᕐᒧᑦ ᐃᓕᓐᓂᐊᕐᓂᖅ ᑐᑭᒧᐊᑦᑎᑕᐅᓯᒪᒻᒪᖔᖅ ᖃᓄᐃᒍᓐᓃᐸᓪᓕᐊᓂᖓᓄᑦ.

"ᐃᓱᒪᓕᐅᕋᒪ ᖃᓄᐃᙱᑦᑎᐊᕆᐊᖃᓕᖅᖢᖓ ᑲᒪᒋᑦᑎᐊᕐᓗᖓᓗ, ᐊᑯᓂᐊᓗᒃ ᐃᓕᑦᑎᖃᑦᑕᓚᐅᖅᑐᖓ ᐅᐃᕆᓯᒪᓂᕐᒥᒃ ᓯᕘᕋᓂᕐᒥᒡᓗ ᐊᒻᒪ ᓂᑲᓪᓗᖓᓂᕐᒥᒃ ᐊᒻᒪ ᐊᔾᔨᒌᙱᑦᑐᓂᒃ ᐊᑐᕈᓐᓇᖅᑕᓐᓂᒃ ᖃᓄᐃᙱᑦᑎᐊᕐᓇᖅᑐᒃᑯᑦ. ᓴᖅᑭᑦᑎᓂᖅ ᓴᓇᓂᕐᓗ ᐱᒻᒪᕆᐅᖏᓐᓇᐅᔭᖅᑐᑦ ᐱᓕᕆᐊᕆᖃᑦᑕᓚᐅᖅᑕᓐᓂ."

ᐳᕆᐋᓇ ᐊᑯᓂᒻᒪᕆᒃ ᑎᑭᓯᒪᔪᖅ ᐊᒻᒪᓗ ᐱᕈᖅᓯᒪᑦᑎᐊᖅᑐᓂ ᐃᖅᑲᓇᐃᔮᖓᓄᑦ. ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐊᔾᔨᑦᑎᐊᖓᓂᒃ ᕿᓂᖅᐳᖅ, "ᐃᓕᖕᓂᒃ ᓂᐅᕐᕈᑎᖃᖅᑕᐃᓕᒋᑦ ᓇᐃᑦᑐᒥᒃ. ᐱᕕᒃᓴᐃᑦ ᑎᑭᐅᑎᔪᓐᓇᖅᑰᔨᙱᑦᑐᑦ ᑕᐃᒪᐃᙱᑐᐃᓐᓇᕆᐊᓖᑦ. ᑭᓇᑐᐃᓐᓇᖅ ᒥᑭᔪᑯᓗᒻᒦᙶᖅᓯᒪᔪᖅ ᐊᒻᒪᓗ [Hᐋᕐᕗᑦ], ᐃᓱᒪᓚᐅᖅᓯᒪᖏᑦᑐᖓ ᐅᕙᓐᓂᒃ 1 ᒥᓕᐊᓐ-ᓂᒃ ᐊᕐᕌᒍᓂᒃ. ᓇᓗᓇᕈᓐᓃᓚᐅᖅᑐᖅ ᐅᕙᓐᓄᑦ ᑐᓂᔭᕆᐊᖃᓚᐅᖅᑕᕋ ᓄᓇᓕᖕᓄᑦ ᐊᔾᔨᐅᙱᑦᑑᓂᖓᓂᒃ."

ᑕᐃᒪᓕ ᐊᐅᓪᓚᕐᓂᐊᕐᓗᓂ ᓄᓇᓕᖕᓂᑦ ᐊᒻᒪᓗ ᐱᓱᑲᑕᒋᐊᕐᓗᓂ ᓲᕐᓗ, ᑲᑎᙵᖃᑎᖃᖁᔨᕗᖅ ᓄᓇᓕᖕᓄᑦ ᐊᒻᒪᓗ ᓇᓂᓯᓗᓂ ᓄᓇᓕᖕᓂ ᓇᓃᓕᕐᒪᖔᖅᐱᑦ. ᑭᖑᒧᑦ ᑕᑯᓪᓗᓂ, ᐊᔾᔨᐅᙱᑦᑐᒥᒃ ᐅᖃᐅᓯᒃᓴᓕᒃ ᒪᒃᑯᖕᓂᖅᓴᒧᑦ.

"ᖃᓄᐃᙱᑦᑐᑎᑦ. ᑭᓇᐅᔭᕆᐊᖃᓪᓚᕆᒃᑲᕕᑦ. ᐱᐅᙱᑦᑐᒥᒃ ᐱᓕᕆᓯᒪᒍᕕᑦ ᐱᐅᙱᑦᑐᒥᒡᓘᓐᓃᑦ, ᑕᒪᒃᑯᐊ ᐱᒻᒪᕆᐊᓘᕗᑦ ᑭᓇᐅᓂᕆᔭᕕᑦ. ᐃᓕᑦᑎᕚᓪᓕᕐᓇᖅᑐᒻᒪᕆᐅᕗᖅ ᑕᐃᒃᑯᓇᙵᑦ ᐊᑐᖅᓯᒪᔭᕐᓂᑦ ᐃᑲᔪᓪᓚᕆᒃᐸᒃᐳᑦ ᐃᓕᖕᓂᒃ ᓴᐱᓕᖅᓴᕋᐃᙱᓐᓂᖅᓴᐅᓕᕐᓂᕐᒥᒃ ᑲᒪᒋᔭᖃᕈᓐᓇᕐᓂᖅᓴᐅᓂᕐᒥᒡᓗ ᖃᓄᐃᓕᖓᓂᕆᔭᐅᔪᓂᒃ ᐃᓅᓯᕐᓂ ᐃᓕᖕᓄᑦ ᐃᓕᖕᓄᑦ ᐊᑐᖅᑕᐅᓕᑐᐃᓐᓇᕆᐊᓕᖕᓂᒃ. ᑲᙳᓲᑎᒋᑦᑕᐃᓕᒃᑭᑦ, ᐃᕿᓪᓗᒋᑦ ᐅᐱᒋᓗᒋᓪᓗ ᓇᓃᓚᐅᕐᒪᖔᖅᐱᑦ."

ᓴᓇᐅᒐᓕᐅᖅᑎᐅᓪᓗᓂ ᐊᒻᒪ ᓄᓇᓕᖕᓂ, ᐅᖓᑎᓗᐊᖓᓄᑦ ᐱᔪᒃᓯᓕᖅᑎᑕᐅᓲᖑᕗᖅ ᐊᕙᑎᒥᓄᑦ. "ᖁᕕᐊᓱᑦᑎᐊᖅᑐᖓ ᐃᓚᒃᓴᓂᑦ. ᐱᐅᒋᔭᕋ ᑕᑯᔭᕆᐊᒃᓴᖅ ᐱᔪᓐᓇᑐᐃᓐᓇᕆᐊᖃᖅᑐᓂᒃ ᐊᕙᑎᓐᓃᑦᑐᓂᒃ. ᐃᓱᒪᑐᔫᓪᓗᖓ ᐃᓄᓐᓄᑦ ᐃᑭᑎᑕᐅᖏᓐᓇᓲᖑᒐᒪ ᓲᕐᓗ ᓄᑖᓂᒃ ᐃᓱᒪᑖᖅᓯᒪᓪᓗᖓ ᐊᒻᒪᓗ ᓄᑖᓂᒃ ᐱᓕᕆᐊᒃᓴᓂᒃ. ᖁᔭᓕᔪᒻᒪᕆᐅᕗᖓ ᑕᑯᐃᓐᓇᖃᑦᑕᕋᒃᑯ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᓂᒡᓚᖅᓯᓇᖅᑐᓂᒃ."

ᐳᕆᐋᓇ ᐅᐋᔅᐱ ᓴᓇᓯᒪᔪᖅ, ᐃᙱᖅᑎᐅᔪᖅ, ᐃᓕᓐᓂᐊᖅᑎᐅᔪᖅ ᐊᒻᒪᓗ ᓄᓇᓕᖕᓂ ᓯᕗᓕᖅᑎᐅᓪᓗᓂ. ᓴᖅᑭᑦᑎᕙᒃᐳᖅ ᐋᖅᑭᒃᐸᓪᓕᐊᕙᒃᖢᓂᓗ, ᐊᓯᔾᔩᕙᒃᖢᓂ ᓅᑉᐸᒃᖢᓂᓗ ᐱᔪᒃᓯᑎᑦᑎᓪᓗᓂ. ᒥᑭᑦᑐᒥᙶᓚᐅᖅᑐᖅ ᓄᓇᓕᖕᓂ ᐊᖏᖃᑎᒌᒍᑎ 2-ᒥ ᐊᒻᒪ ᐊᖏᕐᕋᖅᓯᒪᐃᓐᓇᖅᖢᓂ, ᓇᖕᒥᓂᖅ ᐊᖏᕐᕋᓕᐅᖅᓯᒪᔪᖅ ᐊᓯᒥᓂᒡᓗ ᓴᓇᙳᐊᕐᓂᕐᒧᑦ ᓄᓇᓕᖕᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᑦᓵᑦ ᑎᑎᕋᓚᐅᕐᒪᑦ ᑕᒪᑐᒥᖓ.

ᒫᑦᓯ 2023-ᒥ ᓄᑖᙳᕆᐊᖅᓯᒪᔪᑦ: ᐳᕆᐋᓇ ᐊᖏᕐᕋᐅᓕᖅᑐᖅ ᒫᓂᑑᐸᒥ. ᒫᓐᓇᐅᔪᖅ, ᐃᖅᑲᓇᐃᔭᖃᑦᑕᖅᑐᖅ ᐃᓕᓐᓂᐊᕐᓂᓕᕆᓂᕐᒧᑦ ᖃᐅᔨᒪᔨᑕᐅᓪᓗᓂ ᐃᑲᔪᖅᑐᓂᕐᒥᑦ ᐱᓕᒻᒪᑦᓴᕐᓂᕐᒥᑦ ᒪᒃᑯᑦᑐᓄᑦ ᓴᖅᑭᐸᓪᓕᐊᔪᓄᑦ ᓴᓇᙳᐊᖅᑎᓄᑦ ᐊᓯᖏᓐᓄᓪᓗ ᐃᓕᓐᓂᐊᕐᓂᓕᕆᓂᕐᒧᑦ ᐱᓕᕆᐊᓂᑦ.