ᐅᔭᖅᑲᓂᒃ ᐊᕝᕗᖅᖢᓂ ᖃᑕᙳᑎᖏᑕ ᓄᓇᖓᓂ, ᐳᕉᔅ ᒪᒃᕘᕐ ᖃᐅᔨᓕᓚᐅᖅᐳᖅ ᓇᓂᓯᔭᕆᐊᖃᕐᓂᕐᒥᓂᒃ ᐃᓅᓯᓕᒫᖓᓂ ᐅᔭᖅᑲᓂᒃ ᐊᕝᕗᖃᑦᑕᔾᔮᙱᓐᓇᒥ ᐃᑦᑐᒃᑯᖏᑎᑐᑦ. ᐊᒥᓱᑎᑐᑦ ᓄᓇᖃᖅᑳᖅᓯᒪᔪᑎᑐᑦ, ᓅᑕᐅᓚᐅᖅᐳᑦ ᐱᔪᒥᓇᙱᓐᓂᖅᓴᒧᑦ ᓄᓇᒥ ᐱᕈᖅᓰᕕᖕᒧᑦ. ᒪᓕᒐᓕᕆᔨᙳᓕᓚᐅᖅᐳᖅ ᐊᒃᓱᕈᕐᓇᖅᑐᒻᒪᕆᐅᓚᐅᖅᑎᓪᓗᒍ ᐃᓅᓯᖓᓂ. ᕚᓐᑰᕙᒥᐅᑕᖅ ᑭᓯᐊᓂ ᐱᕈᖅᓴᓚᐅᖅᑐᖅ ᐅᐃᓂᐸᐃᒡ ᐅᐊᖕᓇᖓᓂ ᐱᕈᖅᓰᕕᖕᒥ ᐱᒍᐃᔅ ᓄᓇᖃᖅᑳᖅᑐᑦ ᓄᓇᖃᕐᕕᖓᑕ ᖃᓂᒋᔮᓂ. ᐃᓅᓂᑰᓪᓗᑎᒃ ᐊᓪᓚᖓᔪᓄᑦ ᐃᓚᒌᓄᑦ ᓄᓇᒥᓂᒃ ᕿᒪᐃᑎᑕᐅᓪᓗᑎᒃ ᓴᐃᓐᑦ ᐲᑕᒥ ᕋᑦ ᕆᕗᒥ, ᓄᒃᑎᓚᐅᖅᓯᒪᕗᑦ ᐱᒍᐃᔅ ᐃᓄᖏᓐᓄᑦ ᖃᓂᒋᔭᖏᓐᓄᑦ ᓄᓇᑖᕆᐊᖃᓕᓚᐅᕆᓪᓗᑎᒃ. 

ᑕᓪᓕᒪᓂᒃ ᐅᑭᐅᖃᓕᖅᑎᓪᓗᒍ, ᒪᒃᕘᕐ ᐊᑖᑕᖓ ᐃᓅᔪᓐᓃᓚᐅᖅᓯᒪᕗᖅ, ᐊᓈᓇᒥᓂᒃ ᕿᒪᐃᓪᓗᓂ 8-ᓂᒃ ᕿᑐᕐᖓᒥᓂᒃ ᐃᓄᑑᓪᓗᓂ. ᓂᐅᕐᕈᑎᒋᓪᓗᓂᒋᑦ ᐃᒻᒧᒃᓯᐅᒐᐃᑦ ᐊᒻᒪᓗ ᓂᐅᕕᖅᖢᓂ ᕿᒪᒃᑕᐅᓯᒪᔪᒥᒃ ᐃᓕᓐᓂᐊᕐᕕᖕᒧᑦ ᐃᒡᓗᒥᒃ ᐊᒻᒪᓗ ᐃᓚᒌᑦ ᐱᕈᖅᓰᕙᒃᖢᑎᒃ, ᒥᑭᒋᐊᕐᓂᐊᕈᑎᓂᒃ, ᓇᐹᖅᑐᕕᓂᕐᓂᒃ ᓇᑲᑎᕆᓪᓗᑎᒃ, ᓇᐹᖅᑐᓂᒃ ᓇᑲᑎᕆᓪᓗᑎᒃ ᖁᕕᐊᓱᒡᕕᖕᒥ ᐊᒻᒪᓗ ᖃᓄᑐᐃᓐᓇᑦᑎᐊᖅ ᐃᓅᓇᓱᐊᖅᖢᑎᒃ. ᖃᐅᔨᒪᓚᐅᙱᑦᑐᖅ ᐱᓕᕆᔨᒻᒪᕆᖕᓂᒃ ᑭᓯᐊᓂ ᐱᓕᕆᒃᑲᐅᓚᐅᖅᑐᖅ, ᓇᖕᒥᓂᖅᓱᕈᓐᓇᑦᑎᐊᖅᖢᓂ, ᓇᓗᖅᑯᑎᙱᖦᖢᓂ ᐊᒻᒪ ᐃᒻᒥᓂᒃ ᐃᒃᐱᒋᑦᑎᐊᖅᖢᓂ. 

7-ᒋᔭᐅᓪᓗᓂ 9-ᖑᔪᓄᑦ ᓄᑕᖅᑲᓄᑦ, ᒪᒃᕘᕐ ᑐᒡᓕᕆᔭᐅᓚᐅᖅᐳᖅ ᐃᓕᓐᓂᐊᕐᕕᐊᓗᖕᒥ ᐊᓂᒍᐃᓪᓗᓂ ᐊᒻᒪ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᑕᕆᔭᐅᔾᔪᑎᑖᖅᑐᑐᐊᖑᓪᓗᓂ. ᑎᓴᒪᓂᒃ ᐃᓕᑕᕆᔭᐅᔾᔪᑎᑖᓚᐅᖅᑐᖅ ᑲᑎᖦᖢᒋᑦ. ᓴᖑᓇᓱᒃᖢᓂ ᓄᓇᓕᒡᔪᐊᒥ ᐱᓕᕆᔨᒻᒪᕆᐅᓂᕐᒧᑦ ᐊᒃᓱᕈᕐᓇᓚᐅᖅᐳᖅ ᐃᓱᒪᒋᓪᓗᒍ ᓇᑭᙶᖅᓯᒪᖕᒪᖔᑦ ᐊᓯᖏᓪᓗ ᒪᓕᒐᓕᕆᔨᑦ ᐃᓕᕋᓵᕆᓇᓱᓚᐅᖅᓯᒪᔭᖏᑦ ᐱᒋᐊᓕᓵᖅᑎᓪᓗᒍ. ᖁᓱᙱᓐᓂᕆᓚᐅᖅᑕᖓ ᕼᐋᑭᖃᑕᐅᓪᓗᓂ ᐊᒻᒪ ᐅᓇᑕᖃᑕᐅᓪᓗᓂ ᐃᓅᓯᓕᒫᒥᓂ ᐃᑲᔪᓚᐅᖅᐳᖅ ᐊᒃᓱᕈᕐᓇᖅᑐᒃᑰᕋᓗᐊᖅᑎᓪᓗᒍ, ᐊᒻᒪ ᓴᐱᓕᖅᓴᕋᐃᙱᓐᓂᖓ ᐊᒃᓱᕈᕐᓇᖅᑐᒃᑰᓚᐅᖅᑎᓪᓗᒍ. 

ᒪᒃᕗᐊᒧᑦ, ᐃᖅᑲᓇᐃᔮᒥᓄᑦ ᐃᓚᐅᙱᖦᖢᓂ ᐱᔪᓐᓇᖅᑎᑕᐅᓇᓱᒋᓪᓗᓂ ᐃᑲᔪᖅᓯᒪᑦᑎᐊᖅᐳᖅ ᐱᓕᕆᖃᑎᖃᖅᖢᓂ ᓄᓇᖃᖅᑳᖅᓯᒪᔪᓂᒃ ᑲᓇᑕᓕᒫᒥ. "ᐅᖃᐅᔾᔨᖏᓐᓇᐅᔭᖅᐳᖓ ᐃᓄᖕᓂᒃ, ᐃᓱᒪᒋᔭᒃᑯᓪᓕ, ᐃᓚᖓᑦ ᐱᒻᒪᕆᐅᓛᖑᔪᖅ ᐃᓕᖅᑯᓯᕆᔭᐅᕙᒃᑐᖅ ᒪᓕᒐᓕᕆᔨᐅᓂᐊᕐᓗᓂ ᓴᐳᓐᓂᐊᖅᑎᐅᓗᓂ ᒥᑭᓪᓕᑎᖅᓯᒪᓂᖅ," ᐅᖃᖅᑐᖅ. ᐃᑲᔪᖅᑐᖅᑕᐅᓪᓗᓂ ᐊᓈᓇᒥᓄᑦ ᖃᑕᙳᑎᖏᓐᓄᓪᓗ, ᑲᔪᓯᓂᖃᑦᑎᐊᖅᑐᒥᒃ ᐃᖅᑲᓇᐃᔮᖃᕈᓐᓇᖅᓯᓚᐅᖅᐳᖅ. 

ᐱᕈᖅᓴᓪᓗᓂ ᐅᖃᓪᓚᒍᓐᓇᑦᑎᐊᙱᖦᖢᓂ, ᐃᓕᓴᐃᔨᖏᑦ ᐃᓱᒪᓕᓚᐅᖅᓯᒪᕗᑦ ᓯᓚᑐᓗᐊᕋᓱᒋᙱᖦᖢᓂᐅᒃ ᐊᒻᒪ ᓴᖑᑎᑕᐅᓪᓗᓂ ᐃᖅᑲᓇᐃᔮᒧᑦ ᐃᓕᓐᓂᐊᕐᓂᕐᒥᒃ ᐊᓈᓇᖓᑕ ᐊᔭᐅᖅᑐᖅᑕᐅᓚᐅᙱᓐᓂᖓᓂ ᐊᓯᐊᓄᐊᖅᑕᐅᖁᓪᓗᓂᐅᒃ. ᒪᒃᕘᕐ ᐃᓕᓐᓂᐊᕐᕕᐊᓗᖕᒥ ᐊᓂᒍᐃᑦᑎᐊᓵᖅᖢᓂ ᐳᕌᓐᑕᓐ ᓯᓚᑦᑐᖅᓴᕐᕕᒡᔪᐊᕐᒧᐊᓕᖅᖢᓂ. ᓯᕗᓪᓕᕐᐹᒥ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓐᓂᐊᓚᐅᕐᓯᒪᔪᖅ ᐱᒍᐃᔅ ᓄᓇᖓᓂ ᐊᔾᔨᐅᙱᑦᑐᒃᑯᑦ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓐᓂᐊᕈᓐᓇᕐᓯᓚᐅᙱᓐᓂᖓᓂ ᐅᐃᓂᐸᐃᒡᒥ ᑭᖑᓪᓕᕐᒥ ᐃᓕᓐᓂᐊᕐᓇᐅᓕᕐᒥᒃᐸᑦ. ᓯᓚᑦᑐᖅᓴᕐᕕᒡᔪᐊᕐᒥ ᐃᓕᑕᕆᔭᐅᔾᔪᑎᑖᕋᓱᒃᖢᓂ, ᐱᐅᓯᕆᔭᐅᕙᓚᐅᖅᑐᓂᒃ ᐃᓕᓐᓂᐊᓚᐅᖅᓯᒪᔪᖅ, ᑭᖑᓂᐊᒍᓪᓗ Master's ᐊᒻᒪ PhD-ᑖᖅᖢᓂ ᐱᐅᓯᕆᔭᐅᕙᓚᐅᖅᑐᓂᒃ ᓴᐃᒪᓐ ᕗᕋᐃᓱ ᓯᓚᑦᑐᖅᓴᕐᕕᒡᔪᐊᕐᒥ. ᖃᐅᔨᓴᖃᑦᑕᓚᐅᖅᑐᖅ ᓄᓇᖃᖅᑳᖅᑐᓄᑦ ᒪᓕᒐᓕᕆᔨᓄᑦ ᐃᓕᓐᓂᐊᖅᑎᐅᓪᓗᓂ ᐊᒻᒪᓗ ᒪᓕᒐᓕᕆᓂᕐᒧᑦ ᐱᔭᕇᕈᓯᐊᖅᑖᖅᖢᓂ UBC−ᒥ. 

"ᐱᒃᑯᒍᓱᑦᑎᐊᖅᐳᖓ ᐱᓕᕆᔪᓐᓇᕋᒪ. ᐊᓕᐊᓇᐃᒋᑦᑎᐊᖅᑕᕋ ᒪᓕᒐᓕᕆᔨᐅᓂᕐᒥᒃ. ᐱᐅᓛᖑᔪᖅ ᐱᔨᑦᑎᕋᖅᑕᒃᑲ. ᐱᔨᑦᑎᖅᑕᖃᕋᒪ ᓯᒡᔭᒥᑦ ᓯᒡᔭᒧᑦ ᐊᒻᒪ ᐱᐅᔪᒻᒪᕆᐊᓗᖕᓂᒃ ᐱᔨᑦᑎᕋᖅᑕᖃᖅᖢᖓ. ᖁᔭᓕᑐᐃᓐᓇᖅᐳᖓ ᖃᐅᑕᒫᑦ ᖃᐃᖁᔨᖃᑦᑕᕐᒪᑕ ᐅᕙᓐᓂᒃ ᐅᖃᐅᓯᖃᖁᔨᓪᓗᑎᒃ ᐊᑐᖅᓯᒪᔭᒥᓂᒃ, ᐃᓚᒋᔭᐅᔪᒪᓪᓗᑎᒃ ᐱᒻᒪᕆᐊᓗᖕᒧᑦ ᐱᓕᕆᐊᖏᓐᓄᑦ ᓴᐳᔾᔨᓇᓱᒃᖢᑎᒃ ᐊᒻᒪ ᓯᕗᒻᒧᐊᒃᑎᑦᑎᓇᓱᒃᖢᑎᒃ ᐱᔪᓐᓇᐅᑎᖏᓐᓂᒃ, ᐃᖕᒥᓄᓗᐊᙱᑦᑐᖅ, ᑭᓯᐊᓂ ᕿᑐᕐᖓᖏᓐᓄᑦ ᐊᒻᒪ ᓯᕗᓂᒃᓴᑦᑎᓐᓄᑦ, ᑭᖑᕚᒃᓴᑦᑎᓐᓄᑦ," ᐅᖃᕆᓪᓗᓂ.

ᐅᖃᐅᔾᔨᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᐃᒪᓐᓇᐅᓇᔭᖅᐳᖅ, "ᑭᓇᑐᐃᓐᓇᕐᒧᑦ ᐅᖃᐅᔾᔭᐅᑦᑕᐃᓕᓗᖓ ᖃᓄᐃᓕᐅᕈᓐᓇᙱᓐᓂᕋᕐᓗᖓ." ᐅᖃᓪᓚᒍᓐᓇᑦᑎᐊᙱᓐᓂᖓᓄᑦ, ᑭᓇᑭᐊᖅ ᐅᖃᓚᐅᖅᐳᖅ ᒪᒃᕘᕐ ᐃᓕᓴᐃᔨᐅᔪᓐᓇᙱᓐᓂᕋᖅᖢᓂᐅᒃ ᒫᓐᓇᓗ ᐊᐃᕙᖃᑎᖃᓕᖅᖢᓂ ᐃᖅᑲᖅᑐᐃᕕᒡᔪᐊᕐᒥ ᐊᒻᒪ ᐃᓄᓕᒫᓄᑦ ᐅᖃᓪᓚᐃᓐᓇᐅᔭᖅᖢᓂ. ᐱᔪᒪᓂᖃᑦᑎᐊᓚᐅᖅᐳᖅ ᐱᔪᒪᔭᒥᓂᑦ ᑭᓯᐊᓂ ᐱᓕᕆᔭᕆᐊᖃᓚᐅᖅᐳᖅ ᐃᓄᖕᒥ ᐊᐱᖅᓱᖅᑐᒥ ᐱᔪᓐᓇᕐᓂᖓᓂ ᐱᔪᒪᔭᒥᓂᑦ. 

ᐃᓚᖓᑦ ᑕᐅᑐᙳᐊᖅᑕᖓ ᓇᖕᒥᓂᖅ ᒪᓕᒐᓕᕆᔨᑖᕈᒪᓪᓗᓂ, ᕿᒪᐃᓪᓗᓂ ᐃᖅᑲᓇᐃᔭᕐᕕᒋᕙᓚᐅᖅᑕᒥᓂᒃ, ᓲᖃᐃᒻᒪ ᐊᔾᔨᒋᙱᑕᖓᓂᒃ ᐱᓕᕆᐊᖃᕈᒪᒐᒥ. ᐊᔪᕈᓐᓃᖅᓴᕐᓂᖅ ᐱᐅᔪᒻᒪᕆᖕᓂᒃ ᒪᓕᒐᓕᕆᓂᕐᒥᒃ ᐱᒻᒪᕆᐅᕗᖅ ᑖᔅᓱᒧᖓ, ᑭᓯᐊᓂᓗᑦᑕᐅᖅ ᐃᑲᔪᖅᐸᒃᖢᓂ ᐅᓄᕐᓂᖅᓴᓂᒃ ᑭᒃᑯᑐᐃᓐᓇᓂᒃ ᐅᖃᐅᓯᖃᕐᓂᕐᒥᒃ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ. ᑕᒪᓐᓇ ᑮᓇᐅᔭᓕᐅᕈᑕᐅᔪᓐᓇᙱᓚᖅ, ᑭᓯᐊᓂᓕ ᒪᒃᕗᕐ ᐃᓱᒪᒋᓪᓗᓂᐅᒃ ᑲᒪᒋᔭᕆᐊᖃᖅᑕᖓ. ᑲᑎᑎᑦᑎᓕᓚᐅᖅᐳᖅ ᒪᓕᒐᓕᕆᔨᖁᑎᒥᓂᒃ ᐊᓯᐊᓄᑦ ᐱᓕᕆᕝᕕᒋᔭᐅᔪᒧᑦ ᑐᑭᓯᐅᒪᓪᓗᓂ ᑕᐃᒪᓐᓇ ᐊᐅᓚᔪᒪᓂᕐᒥᓂᒃ ᐊᒻᒪᓗ ᐱᓕᕆᖃᑎᒋᓕᓵᖅᑕᖏᑦ ᐃᑲᔪᖅᑐᐃᑦᑎᐊᓚᐅᖅᐳᑦ. 

ᒪᒃᕘᕐ ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᐃᒪᓐᓇᐅᕗᖅ, "ᓴᖅᑭᑎᑦᑎᔭᕆᐊᖃᖅᐳᑎᑦ ᐱᕕᒃᓴᓂᒃ ᐃᓕᖕᓄᑦ, ᐊᒻᒪ ᐃᓚᖓᑦ ᑕᐃᒪᐃᓕᐅᕈᓐᓇᖅᐳᑎᑦ ᑲᑎᙵᖃᑎᖃᖅᐸᒡᓗᑎᑦ. ᖃᐅᔨᒋᐊᕐᕕᒃᓴᐃᑦ ᐊᒥᓱᐊᓘᕗᑦ. ᓱᖁᑕᐅᖏᑦᑐᖅ ᖃᓄᐃᓕᐅᕈᒪᒍᕕᑦ ᐃᓅᓯᕐᓂᑦ, ᑕᒪᒃᑯᓂᖓ ᑲᑎᙵᖃᑎᖃᕐᓂᖅ, ᐊᒻᒪᓗ ᐊᒥᓱᑦ ᓄᓇᖃᖅᑳᖅᓯᒪᙱᑦᑐᑦ ᐃᓄᐃᑦ ᐊᑲᕐᕉᑎᖃᕈᓐᓇᕐᒪᑕ ᐃᓚᖃᐅᕐᒪᑕ ᑕᒪᒃᑯᓂᖓ ᑲᑎᙵᓂᐅᔪᓂᒃ, ᐄᓛᒃ? ᐱᓕᕆᔨᓪᓚᕆᖕᓂᒃ ᐃᓚᖃᐅᖅᑐᑦ. ᖃᐅᔨᒋᐊᕐᕕᒃᓴᖃᐃᓐᓇᐅᔭᖅᑐᑦ ᐊᒻᒪᓗ ᐊᑲᕐᕉᑎᖃᖅᐸᒃᖢᑎᒃ. ᐊᒥᓱᑦ ᓄᓇᖃᖅᑳᖅᑐᑦ ᓇᑭᙶᖅᓯᒪᖕᒪᑕ ᑕᐃᒪᐃᑦᑐᓂᒃ ᑲᑎᙵᖃᑎᖃᖅᐸᙱᖦᖢᑎᒃ... ᑲᙳᓱᙱᓪᓗᑎᑦ ᑐᓴᕋᓱᒋᐊᒃᓴᖅ, ᐱᓗᐊᖅᑐᒥ ᐊᓯᖏᓐᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ. ᖃᐅᔨᒋᐊᕐᕕᒋᓗᒋᑦ... ᖃᐅᔨᒪᑐᐃᓐᓇᖅᐳᖓ ᐃᖅᑲᓇᐃᔭᖃᑎᓕᒫᒃᑲ ᐃᑲᔪᕈᒪᑦᑎᐊᕐᒪᑕ, ᐃᑲᔪᕈᒪᑦᑎᐊᖅᖢᑎᒃ ᓴᖅᑭᑦᑎᔪᒪᓪᓗᑎᒃ ᐱᕕᒃᓴᓂᒃ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᐃᑲᔪᕈᒪᔪᐃᓐᓇᐅᖕᒪᑕ ᐃᓕᖕᓂᒃ ᓇᓂᓯᓇᓱᒡᓗᑎᒃ ᐃᓂᒃᓴᒥᒃ, ᐱᓇᔪᑐᐃᓐᓇᕆᑦ. ᑲᙳᓱᙱᓪᓗᑎᑦ. ᐊᓂᓗᑎᑦ ᐊᒻᒪ ᐃᓄᖕᓂ ᖃᐅᔨᒋᐊᕐᓗᑎᑦ. ᑕᐸᐃᒻᒪᕆᖕᓂᐊᖅᐳᑎᑦ ᐱᐅᔪᒥᒃ ᑭᐅᔭᐅᒍᔅᓯ."

ᐅᔭᖅᑲᓂᒃ ᐊᕝᕗᖃᑦᑕᕈᒪᓚᐅᙱᑦᑐᖅ ᑕᐅᕗᖓᓕᒫᖅ; ᐃᒻᒥᓄᑦ ᐱᒃᑲᓐᓂᕈᒪᓕᓚᐅᖅᐳᖅ. ᐃᓕᓐᓂᐊᕌᓪᓚᓚᐅᖅᖢᓂ ᖃᓄᐃᓕᐅᖅᑕᐅᕙᓚᐅᖅᑐᓂᒃ, ᐳᕉᔅ ᒪᒃᕗᕐ ᐃᑲᔪᖅᐳᖅ ᓯᕗᓂᒃᓴᖃᑦᑎᐊᖅᑎᑦᑎᓂᕐᒥᒃ ᓴᐳᔾᔨᓯᒪᓪᓗᓂ ᐱᔪᓐᓇᐅᑎᒋᔭᐅᔪᓂᒃ ᓄᓇᖃᖅᑳᖅᑐᑦ ᓄᓇᓕᖏᓐᓂᒃ ᒪᓕᒐᓕᕆᓂᕐᒥᒃ ᐊᓂᒍᐃᔾᔪᑎᑖᖅᓯᒪᓪᓗᓂ. ᓴᐱᓕᖅᓴᕋᐃᙱᖦᖢᓂ ᐊᒃᓱᕈᕐᓇᕋᓗᐊᖅᑎᓪᓗᒍᓗ ᓇᑭᙶᖅᓯᒪᓂᕐᒥᓂ, ᐱᔨᑦᑎᕋᖅᐸᒃᐳᖅ ᐃᑲᔪᖅᑕᒥᓂᒃ ᒥᑭᓪᓕᑎᖅᓯᒪᓪᓗᓂ ᖁᕕᐊᒋᔭᖃᑦᑎᐊᖅᖢᓂᓗ ᐃᖅᑲᓇᐃᔮᒥᓂᒃ ᖃᐅᑕᒫᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.