"ᐃᖅᑲᐅᒪᓚᐅᖅᓯᒪᙱᓪᓗᑎᑦ ᓇᑭᙶᕐᒪᖔᖅᐱᑦ. ᓄᓇᓕᐸᐅᔭᕐᒨᑐᐃᓐᓇᕆᐊᖃᖅᑐᑎᑦ ᐃᓕᓐᓂᐊᕆᐊᕐᓗᑎᓪᓗ, ᑭᓯᐊᓂ ᓱᓕ ᐃᓯᒐᖃᕋᕕᑦ ᓄᓇᑦᓯᓐᓂ. ᐊᔪᙱᒃᑯᕕᑦ, ᐃᑲᔪᕐᓗᒋᑦ ᑕᐃᒃᑯᐊ ᓄᓇᓕᔅᓯᓐᓂ ᐊᒃᓱᕉᑎᖃᖅᑐᑦᑕᐅᖅ ᐃᓕᓐᓂᐊᖅᓯᒪᓂᓐᓂ, ᑕᑯᑎᓪᓗᒋᓪᓗ ᐊᓂᒍᐃᔪᓐᓇᕐᓂᖏᓐᓂ." ᑖᒃᑯᐊ ᐅᖃᐅᓰᑦ ᐃᓐᓇᑐᖃᕐᒧᑦ ᑎᒃ-ᒧᑦ ᓄᓇᖃᖅᑐᖅ ᐃᓐᖏᐅᓯᕐᒥᒃ ᐃᓅᓯᓕᒫᐸᓗᒻᒥᓂᒃ ᑭᓯᐊᓂ ᐊᒥᓲᙱᑦᑐᓄᑦ ᐊᕐᕌᒍᓄᑦ ᕚᓐᑰᕗᒥ ᐃᓕᓐᓂᐊᕆᐊᖅᓯᒪᓚᐅᖅᑐᖅ. ᑭᓱᓕᒫᓂᒃ ᐱᓕᕆᓯᒪᔪᖅ ᐃᓅᓯᓕᒫᒥᓂ, ᖃᓗᕋᖅᑐᓂ, ᕙᓯᓂᒃ, ᐃᖃᓪᓕᐊᖅᑐᓂ, ᐊᒻᒪᓗ ᐊᖑᓇᓱᑦᑐᓂ, ᐃᓅᓪᓗᓂ ᐊᒻᒪᓗ ᐃᖅᑲᓇᐃᔭᖅᑐᓂ. ᓄᖅᑲᓚᐅᖅᑐᖅ ᐃᓕᓴᐃᓪᓗᓂ ᐅᑭᐅᖃᖅᖢᓂ 60-ᓂᒃ ᑭᓯᐊᓂ ᓱᓕ ᐃᓕᓐᓂᐊᓚᐅᑲᒃᐸᒃᖢᓂ, ᐅᖃᓪᓚᑲᑕᒃᖢᓂ ᐊᒻᒪ ᓄᓇᕘᒥ ᑐᙵᓱᒃᑎᑦᑎᓪᓗᓂ ᕕᒃᑑᕆᐊᒥ.

ᓯᕗᓪᓕᕐᓄᑦ ᖁᑦᑎᓐᓂᓕᓐᓄᑦ ᓇᒻᒥᓂᖅ ᐃᓕᓐᓂᐊᕐᕕᒻᒦᖃᑦᑕᓚᐅᖅᓯᒪᔪᓄᑦ, ᐅᓪᓗᒃᑯᑦ ᐃᓕᓐᓂᐊᖅᐸᓚᐅᖅᐳᑦ ᖁᑦᑎᓐᓂᓕᓐᓄᑦ 6-ᒧᑦ, ᐃᒃᓯᕋᕐᔪᐊᓄᑦ ᐃᓕᓐᓂᐊᕐᕕᐅᓪᓗᓂ ᖁᑦᑎᓐᓂᓕᓐᓄᑦ 7-ᒥ ᐊᒻᒪ ᐃᓕᓐᓂᐊᕐᕕᒻᒨᖅᑐᓂ. ᐃᓕᓐᓂᐊᓕᓵᖅᑎᓪᓗᒋᑦ ᐃᓕᓐᓂᐊᓕᓵᖅᑎᓪᓗᒋᑦ ᑐᕌᒐᖃᓗᐊᓚᐅᙱᑦᑐᖅ, ᐅᒃᐱᕐᓂᓕᕆᓂᖅᓴᐅᓚᐅᖅᐳᑦ ᐊᒻᒪ ᐊᒥᓱᑦ ᐃᓕᓐᓂᐊᖃᑎᖏᑦ ᐊᓂᒍᐃᑦᑎᐊᙱᖦᖢᑎᒃ. ᓯᕗᓪᓕᖅᐸᐅᖃᑕᐅᓚᐅᖅᐳᖅ ᐃᓕᓐᓂᐊᖅᑎᓂ ᖁᕝᕙᐸᓪᓕᐊᔪᓂᑦ ᑭᓯᐊᓂ ᐱᔭᕇᕐᒪᑦ, ᓱᓕ ᐃᖅᑲᓇᐃᔮᖃᒃᑲᓐᓂᓚᐅᖅᐳᖅ ᐃᓕᓐᓂᐊᕐᕕᕐᔪᐊᕐᒥᑦ ᐱᔭᕇᖅᓯᓂᕐᒧᑦ.

ᐃᓱᐊᓂᑦ, ᑎᒃ ᐃᓕᓐᓂᐊᕇᓚᐅᖅᑐᖅ 21−ᓂᑦ ᐅᑭᐅᖃᖅᖢᓂ ᕚᓐᑰᕙᒥᑦ ᑭᓯᐊᓂᓕ ᐊᒃᓱᕈᐃᓐᓇᖅᖢᓂ ᓇᐃᓴᐅᓯᕆᓂᖕᒥᑦ, ᑭᖑᓂᐊᒍᑦ ᓄᖅᑲᖓᔾᔪᑕᐅᓇᔭᓚᐅᖅᑐᖅ ᐃᖅᑲᓇᐃᔭᖕᓂᖕᒧᑦ ᓄᓇᕐᔪᐊᒥᑦ. ᕚᓐᑰᕗᒥ ᐃᓕᓐᓂᐊᕆᐊᖅᓯᒪᓚᐅᖅᑐᖅ ᓴᓇᓐᖑᐊᕐᓂᕐᒧᑦ. ᓴᓇᙳᐊᕐᓂᕐᒥᒃ ᖁᕕᐊᒋᔭᖃᓚᐅᖅᑐᖅ ᐊᒻᒪᓗ ᐃᓕᓐᓂᐊᖅᖢᓂ ᑭᓯᐊᓂ ᖃᐅᔨᓚᐅᖅᑐᖅ ᐃᓕᑦᑎᔪᒪᙱᖦᖢᓂ ᑭᓱᓂᒃ ᐱᔪᒪᖕᒪᖔᕐᒥᓂᒃ ᐃᖅᑭᓖᑦ ᓴᓇᐅᒐᖏᓐᓂᒃ ᐅᕝᕙᓘᓐᓃᑦ ᐃᓕᓐᓂᐊᖅᑕᖏᓐᓂᒃ. 1960-ᒋᔭᐅᓚᐅᖅᐳᑦ ᐃᓕᓐᓂᐊᖃᑎᖏᓪᓗ ᑎᑎᖅᑐᒐᓕᐅᖅᑐᑎᒃ ᐊᕙᓗᒥᐅᑕᓂᒃ.

ᐃᓱᒪᒋᓪᓗᒍ ᐊᑐᕐᓂᑯᖓ ᓅᓪᓗᓂ ᐃᓕᓐᓂᐊᕆᐊᕐᓗᓂ ᓄᓇᓕᕋᓛᖑᓂᖅᓴᒥ, ᑎᒃ ᖃᐅᔨᑎᑦᑎᔪᖅ ᖃᓄᑎᒋ ᐅᓚᕕᓴᕐᓂᖅᓴᐅᓂᖅ ᓄᓇᓕᐸᐅᔭᐅᑉ ᐃᓅᓯᖓᓂᒃ ᐊᔾᔨᒋᑎᖦᖢᓂᐅᒃ ᒥᑭᑦᑐᒧᑦ ᓄᓇᓕᒡᔪᐊᒧᑦ. ᐊᖏᕐᕋᖃᕐᓂᖅ ᐊᖏᕐᕋᖃᕐᓂᖅ ᐱᐅᓗᐊᖖᒋᑦᑐᖅ ᐊᒻᒪᓗ ᑭᒡᒐᖅᑐᐃᖏᓐᓇᕐᓂᖅ ᖃᕆᑕᐅᔭᓕᕆᔾᔪᑎᓂᒃ ᓴᖅᑭᑎᑦᑎᔪᓐᓇᖅᑐᖅ ᐅᐃᕆᓯᒪᔾᔪᑕᐅᑲᓴᒃᑐᒥᒃ ᖃᕋᓴᐅᔭᒃᑯᑦ. ᐋᖅᑭᒋᐊᖅᓯᓂᖅ ᓇᓂᑭᐊᖅ ᓄᑖᓂᒃ ᐊᒃᓱᕈᕐᓇᖅᑐᓐᓇᕈᓐᓇᖅᑐᖅ ᐃᖅᑲᐅᒪᒐᓗᐊᖅᑎᓪᓗᒍ ᖃᓄᖅ ᐃᓕᓐᓂᐊᖅᑎᑦ ᐊᐅᓪᓚᖅᑎᑕᐅᒐᔪᖕᒪᖔᑕ ᐊᖏᓂᖅᓴᓄᑦ ᓄᓇᓕᐸᐅᔭᕐᓄᑦ ᐅᓚᕕᓴᖅᑕᐅᔭᖅᑐᕐᖢᑎᒃ ᓄᓇᓕᖏᓐᓂ ᐊᕙᑎᖏᓐᓄᑦ ᑕᐅᑐᑦᑎᐊᕈᓐᓇᙱᓐᓂᖅᓴᓄᑦ. ᐃᓕᓐᓂᐊᕆᐊᖅᓯᒪᑎᓪᓗᒍ ᐅᐊᔭᓅᖅᑐᖃᓚᐅᙱᑦᑐᖅ, ᑭᓯᐊᓂ ᓄᓇᓕᐸᐅᔭᖅ ᓇᒻᒥᓂᖅ ᐱᓇᓱᐊᕐᓂᖃᓚᐅᖅᑐᖅ.

"ᐃᓱᒪᒋᔭᕋᓕ ᐃᓕᓐᓂᐊᖅᑎᑦ ᐅᓪᓗᒥ, ᐊᑲᕐᕉᑎᖃᖃᑦᑕᕆᐊᖃᕐᓂᖏᓐᓂᒃ ᐃᓕᓐᓂᐊᕐᓂᑦᑎᓐᓂᒃ ᑮᓇᐅᔭᖃᖅᑎᑕᐅᔪᓂᒃ ᐊᒻᒪ ᒥᓂᑦᑕᒫᑦ ᓈᓴᐃᕙᒡᓗᑎᒃ. ᐅᓪᓗᒥᐅᓕᖅᑐᖅ ᐱᔭᕇᕐᓂᕐᒧᑦ ᐸᐃᑉᐹᖃᑐᐃᓐᓇᖏᑐᑎᑦ, ᑭᓯᐊᓂᓕ ᐅᖓᑖᓄᑦ, ᐃᓅᓇᓱᐊᕐᓗᓂ, ᐃᖅᑲᓇᐃᔮᖅᑖᑐᐃᓐᓇᔾᔮᖏᓐᓇᕕᑦ ᐊᒻᒪᓗ ᐃᖅᑲᓇᐃᔮᖅᑖᕈᒪᓪᓚᕆᑦᑐᑎᑦ," ᑎᒃ ᐅᖃᐅᔾᔨᒋᐊᖅᑐᖅ, ᐃᓱᒪᓪᓗᓂ ᖃᓄᖅ ᐃᓕᓐᓂᐊᕐᓂᖅ ᐃᖅᑭᓖᑦ ᒪᑐᐃᖅᓯᕙᒻᒪᖔᖅ ᐃᖅᑲᓇᐃᔮᑐᐃᓐᓇᐅᖏᑦᑐᓂᒃ ᑭᓯᐊᓂ ᐊᖏᑐᐃᓐᓇᖏᓪᓗᓂ ᐊᒻᒪᓗ ᐱᖁᑎᒥᓂᒃ. ᑕᑯᓂᖅᓴᐅᔪᖅ ᓄᓇᖃᖅᑳᖅᓯᒪᔪᓂᑦ ᐃᓕᓐᓂᐊᕐᕕᐅᔪᓂᑦ ᓲᕐᓗ ᓯᓚᑦᑐᖅᓴᕐᕕᔾᔪᐊᖅ ᕕᒃᑐᐊᕆᐊ, ᑲᒨᓐ ᓯᓚᑦᑐᖅᓴᕐᕕᒃ ᐊᒻᒪᓗ ᕈᐃᐅᓪ ᐊᖅᑯᑎᖏᑦ.

ᐃᕐᖑᑕᖃᐅᖅᑐᓂ ᐊᒻᒪᓗ ᐃᓗᓕᖅᑖᖅᑐᓂ ᓇᒻᒥᓂᖅ, ᑎᒃ ᐊᒻᒪᓗ ᓄᓕᐊᖓ ᑎᓕᐅᕆᓪᓗᓂ ᐃᓕᓐᓂᐊᑲᓐᓂᖁᔨᓪᓗᑎᒃ ᐊᒻᒪᓗ ᖁᕕᐊᑦᑐᒻᒪᕆᐅᓪᓗᓂ ᑕᑯᓪᓗᓂ ᐊᒥᓱᓂᒃ ᐱᔭᕇᖅᑐᓂᒃ. ᐅᖃᐅᑎᕙᖏᑦ ᐊᒃᓱᕈᖁᓪᓗᒋᑦ ᐃᓕᓐᓂᐊᕐᓂᖏᑦ ᐱᔾᔪᑎᒋᓪᓗᒋᑦ ᐊᒻᒪᓗ ᐊᐳᖅᑕᕈᑕᐅᔪᓂᒃ ᑲᒪᖁᓪᓗᒋᑦ ᐅᕝᕙᓘᓐᓃᑦ ᐃᑲᔪᖅᑕᐅᔪᓐᓇᖁᓪᓗᒋᑦ ᐊᓂᒍᐃᓇᓱᐊᖅᑎᓪᓗᒋᑦ. ᑕᑯᔪᖅ ᓴᙱᔪᒥᑦ ᐃᖅᑲᓇᐃᔭᑦᑎᐊᕐᓂᕐᒥᑦ ᐊᓂᒍᐃᓂᕐᒧᑦ ᑐᓗᖅᑕᕈᑎᓂᑦ ᐊᒻᒪᓗ ᓇᖕᒥᓂᖅ ᐊᒃᓱᕈᓕᕋᒥ ᓈᓴᐅᓯᕆᓂᕐᒧᑦ, ᐃᑲᔪᓚᐅᖅᑐᖅ ᐱᖃᓐᓇᕆᔭᒥᑦ ᐊᓂᒍᐃᑎᖦᖢᒍ.

ᐃᑲᔪᖅᓱᖅᑕᐅᑦᑎᐊᓚᐅᕐᖢᓂ, ᑭᓯᐊᓂ ᑎᒃ ᐊᒃᓱᕈᕐᖢᓂ ᐃᖅᑲᐅᒪᔭᕆᐊᒃᓴᖅ ᐃᓕᓐᓂᐊᖅᑎᑕᓕᒫᖏᓐᓂᒃ. ᐃᑲᔪᖅᑕᐅᔪᒪᑦᑎᐊᖁᔨᕗᖅ ᑕᑯᕙᒃᑕᒥᓂᒃ ᒪᒃᑯᒃᑐᓄᑦ ᒫᓐᓇ, ᐃᖅᑲᐅᒪᓗᓂ ᖃᓄᖅ ᐃᓚᒥᓂᒃ ᑕᑎᖃᕆᐊᖃᖃᑦᑕᓚᐅᕐᒪᖔᑦ ᐃᓛᓐᓂᒃᑯᑦ ᐃᑲᔪᖅᑕᐅᔪᒪᓪᓗᓂ ᐃᓕᓐᓂᐊᕐᕕᖕᒥᓂ ᐱᓕᕆᑎᓪᓗᒍ. ᒫᓐᓇ ᖃᑕᙳᑎᖃᕐᖢᓂ, ᑕᐃᑲᓃᓐᓇᓱᖃᑦᑕᕐᖢᓂ ᑭᒃᑯᓕᒫᓄᑦ ᓲᕐᓗ ᖃᑕᙳᑎᖏᓐᓄᑦ, ᑭᓯᐊᓂ ᐃᖅᑲᐅᒪᔭᕆᐊᖃᕐᒥᔪᖅ ᑕᐃᑲᓃᙱᓐᓂᖓᓂᒃ ᐋᖅᑭᒃᓯᓇᓱᒃᓗᓂ ᑭᓱᓕᒫᓂᒃ ᐊᐅᓚᑦᑐᓐᓇᙱᖦᖢᓂᒋᓪᓗ ᑭᓱᓕᒫᑦ. ᐃᓕᑦᑎᓯᒪᔪᖅ ᓄᖅᑲᖅᑎᑦᑐᓐᓇᙱᑕᒥᓂᒃ ᐃᓱᒪᖓ ᖃᓄᐃᙱᑦᑎᐊᖏᓐᓇᖁᓪᓗᒍ.

ᐃᓕᑦᑎᔾᔪᑎᐅᔪᖅ ᓂᕆᐅᒃᑐᖅ ᒪᒃᑯᒃᑐᑦ ᐃᓕᑦᑎᓗᑎᒃ ᑕᐅᑐᒃᓗᓂ ᐅᑎᖅᑎᓪᓗᒋᑦ ᐊᖏᕐᕋᒧᑦ ᐃᓕᓐᓂᐊᕌᓂᒃᑎᓪᓗᒋᑦ ᐋᖅᑭᒃᓯᔪᒪᑦᑎᐊᓕᕐᓗᑎᒃ ᐊᑲᐅᙱᓕᐅᕈᑎᓕᒫᓂᒃ ᓄᓇᕐᔪᐊᒥ. ᐊᑕᐅᑦᑎᒃᑯᑦᑕᐅᖅ, ᑎᓕᐅᕆᔪᒪᕗᖅ ᒪᒃᑯᒃᑐᓂᑦ ᐃᓱᒪᖁᓪᓗᒋᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᑦ, ᑲᒪᑦᑎᐊᖕᓂᖕᓂᑦ ᓄᓇᕐᔪᐊᒥᑦ, ᐅᔾᔨᕈᓱᖁᓪᓗᓂᔾᔪᒡᓗ ᓄᓇᕐᔪᐊᒥᑦ ᖃᓄᐃᓕᐅᖕᓂᐅᔪᓂᑦ. "ᑭᓱᓕᒫᓂᒃ ᐋᖅᑭᒃᓯᔪᓐᓇᙱᓐᓇᑦᑕ, ᑭᓯᐊᓂ ᐅᕙᑦᑎᓐᓂᒃ ᐅᔾᔨᕈᓱᓕᖅᑎᑦᑎᔪᓐᓇᖅᐳᒍᑦ ᖃᓄᖅ ᑕᒪᒃᑯᐊ ᐱᓕᕆᐊᖑᓚᐅᕐᒪᖔᑕ ᐊᓯᖏᓐᓂ ᓄᓇᓕᖕᓂ," ᑕᐃᒪᓐᓇ ᑕᑯᒃᓴᐅᑎᑦᑎᕗᖅ.

ᐊᕐᕌᒍᑦ ᑕᓪᓕᒪᑦ ᐊᓂᒍᖅᓯᒪᓕᖅᑐᑦ, ᑎᒃ ᑕᑯᓚᐅᖅᐳᖅ ᓄᓇᕘᒥ ᑐᙵᓱᒃᑎᑕᐅᔪᑦ ᑲᑎᙵᓂᖅᓴᐅᖃᑦᑕᓕᕐᓂᖏᓐᓂᒃ ᐃᓕᓐᓂᐊᓯᒋᐊᓚᐅᙱᓐᓂᖏᓐᓂᒃ, ᑲᑎᒪᑎᑦᑎᓚᐅᙱᑎᓪᓗᒋᑦ, ᑲᑎᒪᕐᔪᐊᖅᑎᑦᑎᓚᐅᙱᑎᓪᓗᒋᑦ, ᐊᒻᒪ ᑲᑎᙵᑎᑕᐅᓚᐅᙱᑎᓪᓗᒋᑦ. "ᑕᒪᓐᓇ ᐱᐅᕗᖅ ᑲᓇᑕᓕᒫᒥ ᑕᒪᒃᑯᐊ ᐃᓄᐃᑦ ᐃᓕᓴᖅᓯᓪᓗᑎᒃ ᐃᓕᖅᑯᓯᑐᖃᒃᑯᑦ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᕙᒃᑐᓂᒃ ᓄᓇᖃᖅᑳᖅᑐᓄᑦ." ᕿᓚᐅᑎᒥᓂᒃ ᓇᒃᓴᖅᖢᓂ ᐃᙱᖅᖢᓂᓗ ᐸᑎᐅᔭᕐᒥᒃ ᑐᙵᓱᒃᑎᑦᑎᓪᓗᓂ ᐃᙱᐅᑎᒥᒃ Cowichan Nation−ᑯᓐᓂᙶᖅᑐᒥᒃ ᐊᐱᕆᓪᓗᓂ ᓯᕗᕚᕗᑦ ᖃᐃᖁᓪᓗᓂᒋᑦ ᓴᓂᑦᑎᐊᔅᓯᓐᓂ ᓇᖏᕆᐊᖅᑐᕐᓗᑎᒃ ᖃᐅᔨᒪᒋᐊᕐᓗᑎᓪᓗ ᖃᓄᐃᓕᐅᕋᓗᐊᕐᒪᖔᖅᐱᑦ ᐅᖃᑦᑎᐊᕐᓗᑎᓪᓗ.

ᐱᔪᒃᓯᑎᑦᑎᔭᕆᐊᖃᓕᕌᖓᑦ ᖃᐅᑕᒫᑦ ᑎᒃ ᓄᓕᐊᒥᓂᒃ ᐊᔪᕆᖅᓲᔾᔭᐅᔪᒪᓕᓲᖑᕗᖅ. ᒫᓐᓇ ᑲᐃᓪᓗᐊᕈᑎᒥᒃ ᐊᑐᖅᐸᒃᑐᖅ ᐲᖅᑕᐅᓚᐅᖅᑎᓪᓗᒍ, ᐃᓕᑦᑎᓯᒪᔪᖅ ᑭᓱᑐᐃᓐᓇᓂᒃ ᐊᑐᑦᑎᐊᕐᓂᕐᒥᒃ ᓄᑖᓂᒃ ᐊᑐᒐᒃᓴᓂᒃ. ᐃᓅᓪᓗᓂ ᐃᓱᒪᑐᔫᓪᓗᓂ, ᖁᔭᓕᔾᔪᑎᒋᔭᖓ, ᐃᒻᒥᓂᒃ ᒪᒥᐊᓚᐅᖅᑐᖅ ᑭᓯᐊᓂ ᐊᖑᑎᒥᒃ ᑕᑯᒐᒥ ᐃᒻᒥᓂᒃ ᒪᑭᑕᔪᓐᓇᖅᑐᒥᒃ ᐊᒻᒪᓗ ᓇᒻᒥᓂᖅ ᓂᐅᕕᖅᑐᓂ. ᐃᓕᑦᑎᓚᐅᖅᑐᖅ ᐊᑐᖅᓯᒪᔭᒥᓂᒃ ᐊᒻᒪᓗ ᓴᙱᓂᖅᑖᖅᖢᓂ. ᓴᓇᐅᒐᖏᑦᑕᐅᖅ ᐱᔪᒃᓯᔾᔪᑕᐅᒃᑲᓐᓂᖅᐳᑦ ᐊᒻᒪ ᕿᒫᕝᕕᐅᔪᓐᓇᖅᖢᑎᒃ. ᓴᓇᙳᐊᕐᓂᕐᒧᑦ ᐃᓕᓐᓂᐊᖃᑦᑕᖅᓯᒪᓂᖓᑕ ᐅᖓᑖᓄᑦ, ᑎᒃ ᐃᓕᓐᓂᐊᖅᑎᑕᐅᓚᐅᖅᑐᖅ ᑑᓂ ᕼᐊᓐᑦᒧᑦ, ᐊᖓᔪᖅᑳᕆᔭᐅᓚᐅᖅᑐᖅ ᕚᓐᑰᕗᒥ, ᑲᒨᓴᓐ ᓯᓚᑦᑐᓴᕐᕕᖓᓂ, ᐃᓕᓐᓂᐊᖅᑎᑦᑎᓚᐅᖅᑐᖅ ᐃᖅᑭᓖᑦ ᓴᓇᒻᒪᖏᓐᓂᒃ. ᒫᓐᓇ, ᓴᓇᖃᑦᑕᖅᑐᖅ ᓇᓗᓇᐃᒃᑯᑕᓂᒃ, ᓴᓇᐅᒐᕐᓂᒃ ᐃᓕᓯᓪᓗᓂ ᐊᒻᒪᓗ ᐃᑲᔪᒻᒪᕆᓚᐅᖅᑐᖅ ᓴᓇᓂᕐᒥᒃ ᕕᒃᑑᕆᐊᒥ ᐸᓖᓯᒃᑯᑦ ᐱᓕᕆᕕᖓᓂᒃ ᐱᐅᖏᓂᖅᓴᒥᒃ.

ᐊᒃᓱᕈᕐᓇᕋᓗᐊᖅᑎᓪᓗᒍ, ᐸᑦᔅ ᑎᒃ ᐃᓐᓇᐅᔪᖅ ᐳᐃᒍᖅᓯᒪᙱᑦᑐᖅ ᓇᑭᙶᕐᒪᖔᑦ ᐃᓯᒐᒥᓂᒡᓗ ᐱᓯᒪᓪᓗᓂ ᓄᓇᒥᓂ. ᐱᓕᕆᐊᒃᓴᖃᐃᓐᓇᖅᖢᓂ ᐃᓐᓇᐅᓕᕐᓂᕐᒧᑦ ᓄᖅᑲᕐᓂᕐᒧᑦ, ᓯᕗᕚᖏᓐᓄᑦ ᐅᖄᓚᕗᖅ ᐃᙱᖅᖢᓂ ᐊᒻᒪ ᓄᓇᕗᑦ ᓇᒡᓕᒋᓂᕋᖅᖢᓂᐅᒃ ᑲᑎᑉᐸᒃᑐᓕᒫᓄᑦ. ᐊᓯᒥᓂᒃ ᐃᑲᔪᖅᐸᒃᖢᓂ ᓯᓚᑐᓂᕐᒥᓂᒃ ᑐᓴᖅᑎᑦᑎᕙᒃᖢᓂ, ᐆᒃᑑᑎᑦᑎᐊᕙᐅᕗᖅ ᑭᖑᕚᒃᓴᑦᑎᓐᓄᑦ ᖃᑕᙳᑎᖏᓐᓄᑦ ᐊᒻᒪ ᓄᓇᖅᑲᑎᒥᓄᑦ ᓴᓇᙳᐊᖅᑎᓪᓗᒍ ᐊᒻᒪ ᐃᓅᓯᑦᑎᐊᕙᖕᒥᒃ ᐃᓅᓯᖃᖅᑎᓪᓗᒍ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.