ᕚᔅᑭᑦᐹᓪᑎᒻᒪᕆᐅᓚᐅᖅᐳᖅ ᑭᓯᐊᓂ ᖁᑦᑎᖕᓂᖅᓴᒥ ᐅᖃᐅᓯᕆᓚᐅᖅᑕᖓ ᐃᓕᓐᓂᐊᕐᕕᐊᓗᖕᒥ ᐃᒪᓐᓇᐅᓚᐅᖅᐳᖅ, "ᐃᖅᑲᐅᒪᔭᐅᑐᐃᓐᓇᕈᒪ ᐱᙳᐊᖅᑎᑦᑎᐊᕙᐅᓂᓐᓄᑦ, ᐃᓅᓯᕋ ᖃᓄᐃᓕᐅᕈᑎᒋᓯᒪᙱᑦᑎᐊᖅᑕᕋ." ᑖᒪᓐ ᐱᐊᓪ ᐱᕈᖅᓴᓚᐅᖅᑐᖅ ᕼᐃᑕᐴᒡ, ᐊᓛᔅᑲᒥ, ᐊᖑᓇᓱᒃᐸᒃᖢᓂ, ᐃᖃᓪᓕᐊᖅᐸᒃᖢᓂ ᐊᒻᒪ ᐊᓈᓇᒥᓂᒃ ᑕᐅᑐᒃᐸᒃᖢᓂ ᐃᓕᖅᑯᓯᕐᒥᓂᒃ ᐆᒻᒪᖅᑎᑦᑎᒃᑲᓐᓂᕋᓱᒃᖢᓂ ᐃᓅᓯᓕᒫᖓᓂ. ᒫᓐᓇ ᓄᓇᖃᓕᖅᑐᖅ ᐅᒃᓚᕼᐋᒪᒥ. ᐃᓕᓐᓂᐊᓚᐅᖅᓯᒪᕗᖅ Oral Roberts ᓯᓚᑦᑐᖅᓴᕐᕕᒡᔪᐊᕐᒥ ᑕᐃᑲᓂ ᐱᙳᐊᖃᑕᐅᓚᐅᖅᓯᒪᓪᓗᓂ Division 1-ᒥ ᐹᔅᑭᑦᐹᓪᒧᑦ ᐃᓕᓐᓂᐊᕆᐊᒃᑲᓐᓂᕈᑎᑖᖅᖢᓂ. 

ᓯᕗᓪᓕᖅᐹᖓᓂ ᐊᕐᕌᒍᖓᓂ, ᑲᔪᓯᑎᑦᑎᓚᐅᖅᐳᖅ ᓯᕗᓪᓕᖅᐹᖓᓂ ᐹᔅᑭᑦᐹᓪᒥ ᑲᑎᙵᓂᐅᔪᒥ ᐊᖏᒡᓕᒋᐊᖅᑎᑦᑎᔪᒪᓪᓗᓂ ᓄᓇᖃᖅᑳᖅᑐᓂᒃ ᑭᒡᒐᖅᑐᐃᓂᕐᒥᒃ. ᒪᕐᕉᖕᓂ ᐊᐅᔭᐅᓚᐅᖅᑐᓂ ᐊᐅᓚᑦᑎᓪᓗᓂ ᓄᓇᓕᕋᓛᓂ, ᑐᑭᓯᓚᐅᖅᐳᖅ ᓱᓕᔪᒥᒃ. "ᖃᐅᔨᓕᓚᐅᖅᐳᖓ ᑕᒪᓐᓇ ᐱᓪᓚᑦᑖᖑᙱᓐᓂᖓᓂᒃ ᑭᓯᐊᓂ ᐱᓕᕆᐊᕆᔪᓐᓇᓚᐅᕋᑦᑎᒍᑦ ᐅᓄᖅᑐᑦ ᖁᐊᖅᓵᖅᓯᒪᓂᕗᑦ," ᐃᖅᑲᐅᒪᔪᖅ. ᐅᔾᔨᕈᓱᓕᓚᐅᕆᕗᖅ ᐱᙳᐊᖅᑎᓂᒃ ᐱᕙᒌᔭᕈᒪᓪᓗᓂ ᕚᔅᑭᑦᐹᓪ ᐃᖏᕐᕋᑦᑎᐊᙱᒃᑯᓂ. 

2016-ᒥ, ᐱᐊᓪ ᐱᙳᐊᖅᑎᐅᖃᑦᑕᕈᓐᓃᓚᐅᖅᐳᖅ ᐊᒻᒪ ᑲᔪᖏᖅᓴᐃᓂᕐᒧᑦ ᐅᖃᓪᓚᒃᑎᐅᔪᒪᔪᓐᓃᖅᖢᓂ, ᑕᐃᒪᐃᓐᓂᖓᓄᑦ ᓴᖅᑭᑎᑦᑎᓚᐅᖅᐳᖅ ᐃᓕᓐᓂᐊᖅᓯᓐᓈᑦ ᑲᑎᒪᓯᓐᓈᑦ ᑐᙵᕕᖃᖅᖢᓂ ᐱᑕᖃᙱᓐᓂᐅᔪᓂᒃ ᐃᓕᓐᓂᐊᕐᕕᐊᕈᓯᕐᓂ. ᐋᖅᑭᒃᓱᐃᓚᐅᕆᕗᖅ ᐃᓕᓴᐃᔨᓄᑦ ᐱᕚᓪᓕᕈᑎᒃᓴᓄᑦ ᐅᓪᓗᕆᔭᐅᔪᓂᒃ ᐃᓕᓴᐃᔨᓄᑦ. 2018-ᒥᑦ 2020−ᒧᑦ ᐃᖅᑲᓇᐃᔭᓚᐅᖅᓯᒪᕗᖅ ᑯᐊᐳᕇᓴᒋᔭᐅᔪᒧᑦ ᐊᓛᔅᑲᒥ ᑐᑭᒧᐊᖅᑎᑦᑎᔨᒋᔭᐅᓪᓗᓂ ᒪᒃᑯᒃᑐᓄᑦ ᓄᓇᓕᖕᓂᓗ ᐱᕙᓪᓕᐊᑎᑦᑎᓂᕐᒧᑦ, ᐊᖏᕐᕋᓚᐅᖅᖢᓂᓗ ᓄᓇᓕᒋᔭᒥᓄᑦ ᐃᓕᓐᓂᐊᕐᕕᐊᕈᓯᕐᓂᓗ ᐱᓕᕆᕙᒃᖢᓂ ᐃᑲᔪᖅᐸᒃᖢᓂ ᓄᑕᖅᑲᓂᒃ ᐃᓕᑦᑎᕙᓪᓕᐊᓂᕐᒥᒃ ᑭᖑᕚᕇᓄᑦ ᖁᐊᖅᓵᖅᓯᒪᓂᕆᔭᐅᕙᒃᑐᓂᒃ ᐊᓯᖏᓐᓂᒡᓗ ᐃᓱᒪᒋᔭᒃᓴᓂᒃ. ᐊᕐᕌᒎᒃ ᒪᕐᕉᒃ ᐊᓂᒍᖅᑎᓪᓗᒋᒃ ᐅᒃᓚᕼᐊᕼᐋᒻᒨᓚᐅᖅᓯᒪᕗᖅ ᐃᕐᓂᕐᒥᓂᒃ ᓯᕗᓪᓕᐅᔾᔨᕙᒃᖢᓂ.  

ᐊᕐᕌᒎᒃ ᒪᕐᕉᒃ ᐊᓂᒍᖅᓯᒪᓕᖅᑑᒃ ᐱᐊᓪ ᐱᓕᕆᖃᑎᖃᖃᑦᑕᖅᓯᒪᔪᖅ ᒪᕐᕉᓐᓂᒃ ᓄᓇᓕᓐᓂᒃ ᐊᓛᔅᑲᒥ. ᐅᖃᖃᑎᖃᖃᑦᑕᖅᓯᒪᖕᒥᔪᖅ ᑮᓇᐅᔭᓕᐅᕋᓱᒃᑎᐅᙱᑦᑐᓂᒃ ᓄᓇᓕᖓᓂ ᑮᓇᐅᔭᑦ ᐊᑐᖅᑐᒃᓴᑦ ᓇᑲᑎᖅᑕᐅᑎᓪᓗᒋᑦ ᐊᓛᔅᑲᒥ. "ᖁᕕᐊᒋᑦᑎᐊᖅᑕᕋ ᒫᓐᓇ ᐱᓕᕆᐊᒃᓴᓂᒃ ᐱᕙᓪᓕᐊᑎᑦᑎᓂᕐᒥᒃ ᐊᒻᒪ ᐃᑲᔪᕈᓐᓇᕐᓂᕐᒥᒃ ᓄᓇᖃᖅᑳᖅᑐᓂᒃ ᐊᒻᒪ ᑲᑐᔾᔨᖃᑎᒌᓂᒃ ᓴᖅᑭᑎᑦᑎᓗᑎᒃ ᑲᔪᓰᓐᓇᕈᓐᓇᖅᑐᓂᒃ ᐱᓕᕆᐊᒃᓴᓂᒃ ᐊᒻᒪ ᐱᔪᓐᓇᕐᓂᖅᑖᖅᐸᓪᓕᐊᓗᑎᒃ ᓄᓇᓕᖕᓂ ᐊᒻᒪ ᐱᓕᕆᓗᑎᒃ ᖃᓄᑐᐃᓐᓇᑦᑎᐊᖅ ᖁᐊᖅᓵᖅᓯᒪᓂᕐᒧᑦ ᑐᓴᐅᒪᑎᑕᐅᓂᒃᑯᑦ, ᐃᓅᖃᑎᒌᖕᓂᒃᑯᑦ, ᐃᒃᐱᒋᔭᒃᑯᑦ ᐊᒻᒪ ᐅᖃᐅᓯᖅᑎᒍᑦ ᐊᒻᒪ ᐃᓕᖅᑯᓯᒃᑯᑦ ᐆᒻᒪᕆᐊᖅᑎᑦᑎᓂᕐᒥᒃ," ᐅᖃᖅᑐᖅ. 

ᐊᐅᓪᓛᖅᑎᑦᑎᑐᐃᓐᓇᕈᒪᓚᐅᙱᓚᖅ ᓄᑕᖅᑲᓂᒡᓗ ᓱᐴᖅᑐᒐᕐᓂᒃ ᓴᖅᑭᑎᑦᑎᔪᓐᓇᖅᑎᓪᓗᒍ ᐊᔪᙱᓐᓂᕆᔭᐅᔪᓂᒃ ᑲᔪᓯᐊᖏᓐᓇᕈᓐᓇᖅᑐᓂᒡᓗ ᐱᓕᕆᐊᒃᓴᓂᒃ. ᐃᖅᑲᓇᐃᔮᒥᓂᒃ ᐱᓕᕆᓂᐊᕐᓗᓂ, ᐱᐊᓪ ᑲᑎᖃᑎᖃᖅᐸᒃᐳᖅ ᓄᓇᖃᖅᑳᖅᑐᑦ ᑲᑎᒪᔨᖏᓐᓂᒃ, ᐊᖓᔪᖅᑳᒥᒃ, ᐊᖓᔪᖅᑳᒻᒪᕆᖕᒥᒃ, ᐃᓕᓐᓂᐊᕐᕕᖕᒥ ᐊᖓᔪᖅᑳᒥᒃ, ᐊᒻᒪ ᒪᒃᑯᒃᑐᓕᕆᔨᓂᒃ ᓇᓗᓇᐃᖅᓯᓇᓱᒃᖢᑎᒃ ᑭᒃᑯᓕᒫᑦ ᓯᕗᓪᓕᐅᑎᔪᒪᔭᖏᓐᓂᒃ. ᑐᕌᒐᕆᔭᖓ ᒪᒃᑯᒃᑐᑦ ᐅᖃᓪᓚᒍᓐᓇᖁᓪᓗᒋᑦ ᖁᐊᖅᓵᖅᓯᒪᔾᔪᑎᒋᔭᒥᓄᑦ ᐱᓕᕆᕙᓪᓕᐊᓕᕐᓗᑎᒡᓗ ᒪᒃᑯᖕᓂᖅᓴᐅᓗᑎᒃ, ᐱᕕᒃᓴᖃᕈᓐᓇᕐᓗᑎᒃ ᐃᖅᑲᓇᐃᔮᕆᔪᒪᔭᒥᓂᒡᓗ ᖃᐅᔨᒪᓕᕐᓗᑎᒡᓗ ᑭᒃᑰᖕᒪᖔᑕ. 

ᖃᓄᕈᓘᔭᖅ ᐱᓕᕆᐊᖃᖅᐸᒃᖢᓂ, ᐱᐊᓪ ᐱᓕᕆᐊᓕᒫᖏᓐᓂᒃ ᐋᖅᑭᒃᓱᐃᕙᒃᐳᖅ ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒥᒃ, ᖁᐊᖅᓵᖅᓯᒪᔪᓂᒃ ᑐᓴᐅᒪᑎᑉᐸᒡᓗᒋᑦ ᑲᒪᒋᔭᖃᕐᓂᕐᒥᒃ, ᐃᓅᖃᑎᒌᒃᐸᖕᓂᕐᒧᑦ ᐃᒃᐱᒋᔭᖃᖅᐸᖕᓂᕐᒧᑦ ᐃᓕᑦᑎᕙᓪᓕᐊᓂᕐᒥᒃ ᐱᑎᑦᑎᕙᒃᖢᓂᓗ ᐃᓄᖕᓂᒃ ᐊᑐᖅᑕᐅᔪᓐᓇᖅᑐᓂᒃ ᐅᖃᐅᓯᕐᓂᒡᓗ ᐃᒻᒥᓂᒃ ᐃᑲᔪᕈᓐᓇᕐᓂᐊᕋᒥᒃ ᐱᓕᕆᐊᖃᕐᓗᓂ ᐱᓕᕆᖃᑎᒌᖕᓂᒃᑯᑦ ᐊᔪᕈᓐᓃᖅᓴᖅᑎᑦᑎᔨᐅᓗᓂ. ᑲᔪᖏᖅᓴᐃᔾᔪᑎᒋᔭᖓ ᑕᒪᑐᒨᓇ ᖃᐅᔨᔪᒪᓂᖓ, ᖁᕕᐊᒋᔭᖃᕐᓂᖓ ᐃᓕᑦᑎᕙᓪᓕᐊᓂᕐᒥᒃ, ᐃᑲᔪᕈᒪᓂᕐᓗ.

ᐊᕝᕕᐊᕈᑎᑕᖃᓕᕌᖓᑦ, ᐱᐊᓪ ᐊᒃᓱᕈᕈᑎᖃᓚᐅᖅᐳᖅ ᕿᓄᐃᓵᕈᓐᓇᕐᓂᕐᒥᒃ. ᐱᒋᐊᓕᓵᖅᖢᓂ ᐃᓕᓐᓂᐊᖅᑎᑦᑎᖃᑦᑕᓕᕋᒥ ᖃᐃᒐᓛᖃᑦᑕᓚᐅᖅᑐᖅ ᐃᓚᐅᔪᓄᑦ ᑭᓯᐊᓂ ᖃᐅᔨᒐᒥ ᐊᒃᑐᐃᓂᐅᔪᓂᒃ ᖁᐊᖅᓵᖅᓯᒪᓂᕐᒧᑦ ᐊᒻᒪ ᑭᖑᕚᕇᓄᑦ ᖁᐊᖅᓵᖅᓯᒪᓂᕐᒧᑦ ᐊᒻᒪ ᐃᓱᒪᒋᓪᓗᓂᐅᒃ ᓇᖕᒥᓂᖅ ᐊᑐᖅᓯᒪᔭᒥᓂᒃ ᑲᒪᔨᐅᓂᕐᒧᑦ, ᐅᔾᔨᕈᓱᓕᓚᐅᖅᐳᖅ ᑲᔪᓯᑎᑦᑐᒪᙱᖦᖢᓂᐅᒃ ᓇᓂᓯᔭᕆᐊᖃᕐᓂᕐᒥᓂᒃ ᐃᓂᖅᑎᕆᓂᕐᒥᒃ ᐊᒻᒪ ᓵᑕᐅᔪᓐᓇᕐᓂᕐᒥᒃ ᑭᓯᐊᓂ ᓇᒡᓕᖕᓂᕐᒥᒃ, ᐃᒃᐱᒍᓱᑦᑎᐊᕐᓂᕐᒥᒃ ᐊᒻᒪ ᑐᑭᓯᐅᒪᓂᕐᒥᒃ. 

ᐱᐊᓪ ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᐱᒋᐊᖅᓵᓕᓂᖅᓴᐅᓇᔭᖅᐳᖅ, ᐃᓱᒪᒋᔪᓐᓇᐃᕐᓗᒋᑦ ᐊᖓᔪᖅᑳᖏᑦ ᐊᒻᒪ ᐃᓄᐃᑦ ᐋᓐᓂᖅᓯᓚᐅᖅᑐᓕᒫᑦ. ᖃᐅᔨᒪᔪᖅ ᐅᓪᓚᖕᓂᐅᓂᖓᓂᒃ ᐊᒻᒪ ᒪᒥᓴᖅᐸᓪᓕᐊᓂᖓ ᐃᓱᓕᔾᔮᙱᖦᖢᓂ ᑭᓯᐊᓂ ᐃᒻᒥᓂᒃ ᑕᒻᒪᖅᑎᑦᑎᓗᓂ ᐱᒋᐊᖅᓵᓕᓗᓂ ᐃᑲᔫᑎᖃᕋᔭᓚᐅᖅᐳᖅ. ᑕᕝᕙᓂᑦᑕᐃᓐᓇᖅ, ᐅᖃᓚᐅᖅᐳᖅ, "ᐱᐅᓂᖅᐹᕆᓚᐅᖅᑕᕋ ᐃᒃᓯᕚᑐᐃᓐᓇᖅᖢᖓ ᓈᓚᒃᖢᖓᓗ ᐊᖓᔪᖅᑳᒪ ᐅᓂᒃᑳᖏᓐᓂᒃ."

ᐊᒃᓱᕈᕐᓇᖅᑐᒃᑰᖅᑎᓪᓗᒋᑦ, ᐱᐊᓪ ᐊᔪᕈᓐᓃᖅᓴᖅᐸᒃᐳᖅ ᔫᒐᒥᒃ, ᐊᓂᖅᓵᖅᑐᕐᓂᕐᒥᒃ, ᐊᒻᒪ ᑎᒥᒃᑯᑦ ᒧᒥᕆᐅᖅᓴᓂᕐᒥᒃ. ᐅᖃᖃᑎᖃᖅᐸᒃᐳᖅ ᒪᒥᐊᑉᐸᒃᖢᓂᓗ ᑕᐃᒪᐃᑦᑕᕆᐊᖃᕌᖓᒥ ᐃᕐᓂᕐᒥᓄᑦ. ᓂᔾᔭᐅᓯᔭᕐᓂᕐᒧᑦ ᖁᕕᐊᓱᖃᑎᒌᒃᑐᓄᑦ ᐅᐸᒍᑎᕙᒃᐳᖅ ᒪᒥᓴᕐᓂᕐᒧᑦ ᐃᓚᒋᔭᐅᓪᓗᓂ. ᖁᕕᐊᒋᔭᖃᖅᐳᖅ ᓄᓇᖃᖅᑳᖅᑐᓕᒫᓂᒃ ᐹᔅᑭᑦᐹᓪᑎᓂᒃ ᐱᙳᐊᕐᓂᐅᔪᓂ ᐳᕆᓐᔅ ᕉᐳᑦᒥ. ᐃᒻᒥᓂᒃ ᑲᒪᒋᑦᑎᐊᖅᐸᒃᐳᖅ ᓂᕆᕙᒃᖢᓂ ᐃᖃᐃᓕᓴᖅᐸᒃᖢᓂᓗ. ᒪᒥᓴᕆᐊᒐᔪᒃᐳᖅ ᓇᖕᒥᓂᕐᓗ ᑲᒪᒋᑦᑎᐊᕐᓂᕐᒧᑦ ᐱᕙᒌᔭᖅᓯᒪᓪᓗᓂ ᐊᔪᕐᓇᖅᑐᖅᓯᐅᓕᕌᖓᒥ. 

ᐅᖃᐅᔾᔨᒋᐊᕈᑎᒋᔭᖓ ᑭᓇᑐᐃᓐᓇᕐᒧᑦ ᐃᓚᐅᔪᒪᔪᒧᑦ ᐹᔅᑭᑦᐹᓪᒧᑦ ᐃᒃᐱᒋᑦᑎᐊᕐᓗᒍ ᐱᕙᓪᓕᐊᓂᖓ ᐊᒻᒪ ᐃᒃᐱᒍᓱᑦᑎᐊᙱᓪᓗᓂ ᐱᙳᐊᕐᓂᐅᔪᒥᒃ. ᐱᐊᓪ ᐅᖃᕋᔭᖅᐳᖅ ᑭᖑᕙᖃᑦᑕᙱᓪᓗᓂ ᐊᒻᒪ ᓇᓂᓯᓗᓂ ᑲᔪᖏᖅᓴᐃᔨᓂᒃ ᐃᒃᐱᒍᓱᑦᑎᐊᖅᑐᓂᒃ ᐱᙳᐊᕐᓂᑐᐃᓐᓇᐅᙱᑦᑐᓂᒃ. ᑲᔪᖏᖅᓴᐃᔨᖃᓚᐅᖅᐳᖅ ᐃᑲᕐᕋᒐᓵᓗᖕᓂ ᐃᓅᓯᖓᓂ ᑭᓯᐊᓂ ᐊᓯᐅᓚᐅᖅᐳᖅ ᐱᙳᐊᕈᓐᓃᕋᒥ ᐃᒃᓯᓐᓇᖅᑕᐅᖅᑰᔨᓕᖅᖢᓂᓗ. 

ᐱᐊᓪ ᐊᓯᖏᓐᓂᒃ ᐱᓕᕆᐊᒃᓴᓂᒃ ᐆᒃᑐᖁᔨᕗᖅ ᐊᒻᒪ ᐊᔾᔨᒌᙱᑦᑐᓂᒃ ᐱᓕᕆᖃᑎᒌᒃᑐᓂᒃ ᐃᓚᐅᖃᑦᑕᖁᔨᓪᓗᓂ. ᐅᖃᕆᓪᓗᓂ ᐊᖏᔪᐊᓗᖕᒥ ᐃᓄᖕᓂ ᐱᙳᐊᖅᑎᑐᐃᓐᓇᐅᙱᑦᑐᓂ ᐊᒻᒪ ᐅᖃᖅᖢᓂ "ᖃᐅᔨᒪᒋᐊᖅᐸᒡᓗᑎᑦ ᖃᓂᒋᔭᖃᕋᓗᐊᕐᒪᖔᖅᐱᑦ ᓈᒻᒪᒃᑐᓂᒃ ᐃᓄᖕᓂᒃ, ᓲᖃᐃᒻᒪ ᐱᙳᐊᕐᓂᖅ ᑲᔪᓯᔪᓐᓇᙱᒃᑯᓂ, ᐱᕙᒌᔭᖅᓯᒪᔭᕆᐊᖃᕋᕕᑦ ᐊᒻᒪ ᐱᑐᐃᓐᓇᕆᐊᖃᓕᕐᓗᑎᑦ ᓅᑉᐸᓪᓕᐊᓂᕐᒧᑦ ᖃᐅᑕᒫᑦ ᐃᓅᓯᕆᔭᐅᔪᒧᑦ, ᑕᒪᓐᓇᓗ ᐊᒃᓱᕈᕐᓇᒻᒪᕆᖕᓂᐊᖅᖢᓂ." 

ᐱᐊᓪ ᑕᑯᓯᒪᕗᖅ ᖃᓄᖅ ᕚᔅᑭᑦᐹᓪ ᑭᓇᐅᓂᕐᒥᓂᒃ ᑭᓇᐅᓂᕐᒥᓂᒃ ᑭᓇᐅᓂᕐᒥᓂᒃ ᐊᒻᒪᓗ ᑕᒪᓐᓇ ᑲᔪᓯᔪᓐᓇᙱᒃᑳᖓᑦ, ᐃᓱᒪᓕᖅᐸᒃᐳᑦ ᑭᓇᐅᓂᕐᒥᓂᒃ ᐊᒻᒪᓗ ᖃᓄᖅ ᐱᒻᒪᕆᐅᑎᒋᖕᒪᖔᑕ ᓄᓇᓕᖏᓐᓄᑦ. ᐅᖃᐅᓯᕐᒥᓂᒃ ᐅᖃᓪᓚᒍᓐᓇᕐᓂᖓᓄᑦ ᐃᓕᓐᓂᐊᖅᑎᑦᑎᔪᓐᓇᓚᐅᖅᑐᖅ ᐱᔪᒪᒍᓂ. 

"ᕚᔅᑭᑦᐹᓪ ᑲᔪᓯᓇᔭᓚᐅᙱᓚᖅ ᖃᐅᔨᒪᓚᐅᖏᒃᑯᒪ ᑭᓇᐅᖕᒪᖔᕐᒪ, ᖃᐅᔨᒪᓚᐅᖏᒃᑯᒪ ᓯᕗᓕᕆᓚᐅᖅᑕᒃᑲ ᐅᕙᓐᓂᒃ ᓴᐳᔾᔨᓯᒪᓚᐅᕐᓂᖏᓐᓂᒃ, ᐊᒻᒪ ᖃᐅᔨᒪᓚᐅᖏᒃᑯᒪ ᑭᒃᑯᓕᒫᓂᒃ ᐅᕙᓐᓂᒃ ᓯᕗᓕᐅᓚᐅᖅᑐᓂᒃ ᐊᒻᒪ ᐅᐱᒋᑦᑎᐊᕋᓱᓚᐅᖅᑕᒃᑲ ᐱᓕᕆᕙᓪᓕᐊᑎᓪᓗᒋᑦ," ᐱᐊᓪ ᐅᖃᓚᐅᖅᐳᖅ.

ᐱᐊᓪ ᑕᐅᑐᒃᐳᖅ ᓴᓇᙳᐊᖅᑎᒻᒪᕆᖕᓂᒃ ᐱᕈᖅᓴᓪᓗᓂ ᑕᐅᑐᒃᐸᒃᖢᓂᒋᑦ, ᕌᐳᑦ ᑕᐃᕕᑦᓴᓐ ᐊᒻᒪ ᔫ ᔭᖕ. ᐱᕈᖅᓴᓪᓗᓂ ᒧᒥᖅᑎᓂᒃ ᐃᓚᐅᖃᑦᑕᓚᐅᖅᐳᖅ ᐊᓈᓇᖓᑕ ᖃᑕᙳᑎᖏᓪᓗ 12-ᓂᒃ ᐅᑭᐅᖃᖅᑎᓪᓗᒍ, ᑐᓐᓂᖅᓴᐃᕙᒃᖢᓂ $38000-ᓂᒃ ᑐᓐᓂᖅᑯᓯᐊᓂᒃ ᐊᒻᒪᓗ ᓇᑖᕐᓇᕐᓂᒃ, ᑭᖑᒃᐸᖕᓂᒃ ᐊᒻᒪ ᓵᒪᓂᒃ ᐊᕐᕌᒍᓂᒃ ᑎᓴᒪᓂᒃ ᐱᕙᒌᔭᖅᑕᐅᓚᐅᖅᑎᓪᓗᒍ. 

ᐱᒃᑯᒥᒍᓱᑦᑎᐊᖅᑐᖅ ᐃᓄᖕᓂᑦ ᓯᕗᕚᕆᓚᐅᖅᓯᒪᔭᖏᓐᓂᑦ ᑕᐃᒃᑯᓂᖓᓗ ᐆᒻᒪᕆᖕᓂᖃᓚᐅᖅᑐᓂᑦ ᐱᕕᒃᓴᖃᖅᑎᖦᖢᒍᓗ. 

"ᐃᓚᖓᑦ ᐊᖏᓛᖑᖃᑕᐅᔪᖅ ᐅᕙᓐᓂᒃ ᐱᔪᒃᓯᑎᑦᑎᕙᒃᐳᖅ ᑕᒪᓐᓇ ᓇᒧᙵᐅᕙᓪᓕᐊᓂᕆᔭᐅᔪᖅ ᐊᑯᓂᐊᓗᒃ ᓇᒧᙵᐅᕙᓪᓕᐊᓂᐅᕗᖅ. ᐊᒥᓱᐊᓗᖕᓂᒃ ᐱᕕᒃᓴᖃᕋᑦᑕ ᐋᖅᑭᒋᐊᖅᓯᔪᓐᓇᕐᓗᑕ ᐃᓅᓯᕆᓚᐅᖅᑕᑦᑎᓐᓂᒃ ᐊᒻᒪᓗ ᒪᒥᑎᑦᑎᔪᓐᓇᕐᓗᑕ ᓱᕈᓯᐅᑎᓪᓗᑕ ᐋᓐᓂᕈᑎᒋᓚᐅᖅᓯᒪᔭᑦᑎᓐᓂᒃ ᐊᓯᖏᓐᓂᒡᓗ. ᐱᓕᕆᔾᔪᓯᕋ ᖃᐅᔨᓇᓱᐃᓐᓇᐅᔭᖅᐳᖓ, ᖃᓄᖅ ᐱᕈᖅᐸᓪᓕᐊᔪᓐᓇᖅᐳᖓ? ᖃᓄᖅ ᐱᐅᓯᕚᓪᓕᕈᓐᓇᖅᐳᖓ?" ᐱᐊᓪ ᐅᓂᒃᑳᖅᐳᖅ, ᐃᓱᒪᓪᓗᓂ ᐃᕐᓂᒥᓄᑦ ᐆᒃᑑᑎᑦᑎᐊᕙᐅᓇᓱᐃᓐᓇᐅᔭᕐᓂᕐᒥᓂᒃ ᑭᓯᐊᓂᑦᑕᐅᖅ ᐃᕐᓂᕐᒥᓄᑦ ᖃᐅᔨᒪᑎᖦᖢᓂᐅᒃ ᐱᐅᑦᑎᐊᙱᓐᓂᖓᓂᒃ. ᐱᒃᑯᒥᒍᓱᑦᑎᐊᕐᒥᔪᖅ ᑭᒡᒐᖅᑐᐃᔪᓐᓇᕐᓂᕐᒥᓂᒃ ᓄᓇᕐᔪᐊᒥᖕᓂᒃ, ᐃᕐᓂᕐᒥᓂᒃ, ᐃᓕᖅᑯᓯᕐᒥᓂᒃ, ᐊᒻᒪ ᑭᖑᕚᕆᓂᐊᖅᑕᒥᓄᑦ. 

ᐃᓱᓕᑉᐸᓪᓕᐊᓕᕐᓗᖓ, ᐱᐊᓪ ᐅᖃᐅᓯᖃᖅᐳᖅ ᐃᓕᖕᓂᒃ ᕿᓄᐃᓵᕈᓐᓇᕐᓂᕐᒥᒃ, ᐃᓱᒪᒋᔪᓐᓇᐃᕐᕕᒋᕙᒡᓗᒋᑦ ᐃᓚᑎᑦ ᐊᔪᕈᓐᓃᖅᓴᖅᐸᒡᓗᒋᓪᓗ ᐃᒻᒥᓂᒃ ᐃᓱᒪᒋᔪᓐᓇᐃᖅᓯᔪᓐᓇᕐᓂᕐᒥᒃ ᐃᒻᒥᓂᒡᓗ ᐃᒃᐱᒋᑦᑎᐊᕐᓂᕐᒥᒃ. "ᑐᑭᓯᐅᒪᓗᒍ ᐃᓅᓯᖅ ᐊᑯᓂᐊᓗᒃ ᐃᖏᕐᕋᓂᐅᖕᒪᑦ, ᑕᒻᒪᑲᑕᖕᓂᐊᖅᐳᑎᑦ, ᑲᑕᖕᓂᐊᖅᐳᑎᑦ... ᐱᐅᓛᖑᓇᔭᖅᑐᖅ ᐃᓕᖕᓂᒃ ᓇᖏᖅᓯᓗᑎᑦ, ᐳᔪᕐᓗᐃᔭᕐᓗᑎᑦ ᐊᒻᒪ ᖃᐅᔨᓇᓱᒡᓗᑎᑦ ᖃᓄᐃᓕᐅᕆᐊᖃᓕᕐᒪᖔᖅᐱᑦ."

ᐃᖅᑲᐅᒪᔭᐅᔪᒪᓚᐅᙱᑦᑐᖅ ᐱᙳᐊᖅᑎᐅᓂᑐᐃᓐᓇᖓᓄᑦ, ᒫᓐᓇᓕ ᑖᒪᓐ ᐱᐊᓪ ᐱᓕᕆᖃᑎᖃᓕᖅᐳᖅ ᓄᓇᓕᖕᓂ ᓴᖅᑭᑎᑦᑎᔪᒪᓪᓗᓂ ᑲᔪᓰᓐᓇᕈᓐᓇᖅᑐᓂᒃ ᐱᓕᕆᐊᒃᓴᓂᒃ ᐊᓯᔾᔨᖅᓯᔪᒪᓪᓗᑎᒃ ᒪᒃᑯᒃᑐᑦ ᐃᓅᓯᖏᓐᓂᒃ. ᕚᔅᑭᑦᐹᓪᑎᒻᒪᕆᐅᓚᐅᖅᐳᖅ ᑭᓯᐊᓂ ᑖᓐᓇᑐᐊᖑᙱᖦᖢᓂ, ᐅᐱᒋᔭᒃᓴᖃᒃᑲᓐᓂᖅᐳᖅ ᐊᑖᑕᒋᔭᐅᓪᓗᓂ, ᐊᐅᓚᑦᑎᔨᐅᓪᓗᓂ ᐊᒻᒪ ᕼᐊᐃᑕ ᐊᖑᑕᐅᓪᓗᓂ. ᕚᔅᑭᑦᕚᓪ ᐊᓂᒍᖅᓯᒪᓕᖅᑎᓪᓗᒍ, ᐃᑲᔪᕈᑎᒃᓴᖃᕐᔪᐊᖅᐳᖅ ᓄᓇᓕᖕᓄᑦ, ᒪᒃᑯᒃᑐᓄᑦ ᐃᕐᓂᖓᓄᓪᓗ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᕿᖅᑯᐊᑦ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ ᑎᑎᕋᖅᓯᒪᔪᒥᒃ.