"ᐳᐃᒍᖅᑕᐃᓕᒋᑦ ᓯᓐᓇᒃᑑᒪᓂᕐᒥᒃ. ᑭᒃᑯᓕᒫᑦ ᑕᐅᑐᙳᐊᕆᐊᖃᖅᐳᑦ, ᐊᒻᒪ ᓴᙱᓂᖃᕐᔪᐊᖅᐳᖅ ᑕᒪᑐᒥᙵ," ᑕᐃᒥᐊᓐ ᐴᓱ ᐅᖃᓚᐅᖅᐳᖅ. ᑕᐅᑐᙳᐊᖅᑕᖓ ᐅᑎᖅᑎᑦᑎᔪᒪᓪᓗᓂ ᓇᓕᒧᒌᒃᑎᑦᑎᓂᕐᒥᒃ ᓄᓇᕐᔪᐊᒥ. ᐃᐊᑦᒪᓐᑕᓐᒥ ᐃᓅᓚᐅᖅᓯᒪᔪᖅ ᑭᓯᐊᓂ ᐋᑐᕚᒥ ᐱᕈᖅᓴᓚᐅᖅᓯᒪᔪᖅ. ᐊᓈᓇᖓ ᕗᐊᑦ ᓯᒥᑦ, ᓄᓇᑦᑎᐊᕐᒥ, ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᓪᓗᓂ ᐊᒻᒪ 1960-ᒥ ᐊᓂᒍᐃᓚᐅᖅᓯᒪᓪᓗᓂ. ᐴᓱ ᐃᖅᑲᓇᐃᔭᖃᑦᑕᖅᓯᒪᕗᖅ ᐃᒡᓗᓕᐅᖅᑎᐅᓪᓗᓂ, ᐃᒡᓘᑉ ᖄᖓᓂ, ᐊᕙᓗᓕᐅᕆᓂᕐᒥ ᐊᒻᒪ ᕿᔪᓕᕆᓂᕐᒥ ᐊᕐᕌᒍᓂ 14−ᓂ ᐊᓂᒍᖅᑐᓂ ᐊᒻᒪ ᐃᓱᒪᓕᓚᐅᖅᐳᖅ ᐃᖅᑲᓇᐃᔮᒥ ᐊᓯᔾᔨᕈᒪᓪᓗᓂ ᖃᔅᓯᐊᕐᔪᖕᓂ ᐊᕐᕌᒍᓂ ᖄᖏᖅᓯᒪᓕᖅᑐᓂ ᐃᓱᒪᓕᕆᔨᙳᕈᒪᓪᓗᓂ, ᐃᓱᒪᓪᓗᓂ ᐃᑲᔫᑎᒃᓴᖅᑕᖃᙱᓗᐊᕐᓂᖓᓂ ᑕᐃᒃᑯᓄᖓ ᐱᔪᓐᓇᖅᑎᑕᐅᙱᑦᑐᓄᑦ ᐊᒃᓱᕈᕐᓇᖅᑐᒃᑰᕈᑎᒋᔭᖏᓐᓄᑦ.

ᐃᓚᖏᑦ ᐃᓱᒪᒥᒍᑦ ᐊᔪᕈᑎᒋᓚᐅᖅᑕᖏᑦ ᐊᓯᐅᔨᓪᓗᓂ ᐃᖕᒥᓃᕐᓂᕐᒧᑦ ᓄᑕᕋᐅᑎᓪᓗᒍ ᐱᖃᓐᓇᕆᔭᒥᓂᒃ, ᓇᖕᒥᓂᖅ ᕿᒪᐃᓯᒪᓂᕐᒧᑦ ᐱᔾᔪᑎᓂᒃ ᐊᓈᓇᖓ ᐊᐅᓪᓚᖅᑎᓪᓗᒍ 9-ᓂᒃ ᐅᑭᐅᖃᖅᑎᓪᓗᒍ, ᐊᒻᒪᓗ ᖃᐅᔨᓪᓗᓂ ᑳᕈᓪ ᔪᖕ ᐃᓗᒃᑯᑦ ᓄᑕᕋᐅᑎᓪᓗᒍ ᐱᓕᕆᐊᖓᓂᒃ ᑲᑎᖦᖢᒋᑦ ᐃᓱᒪᒥᐅᑕᖃᑦᑎᐊᕐᓂᕐᒥᒃ ᐃᓱᒪᒃᓴᖅᓯᐅᕐᓂᕐᒥᒃ ᐊᒻᒪᓗ ᓴᖅᑭᑎᑦᑎᕙᓪᓕᐊᓂᕐᒧᑦ ᐅᓂᒃᑳᒥᒃ ᐅᒃᐱᕐᓂᒃᑯᑦ ᒪᒥᓴᕐᓂᕐᒧᑦ ᐃᖏᕐᕋᓂᖓᓂᒃ, ᐃᓕᓴᐃᔾᔪᑎᒋᓚᐅᖅᑕᖓ ᐊᓈᓇᖓᑕ ᑐᓂᓚᐅᖅᑕᖓ.

ᐊᑭᓕᖅᓱᖅᑕᐅᙱᖦᖢᓂ ᑲᑐᔾᔨᖃᑎᒌᓄᑦ ᐃᑲᔪᖅᑐᐃᕙᒃᑐᓄᑦ ᐃᓐᓇᕐᓂᒃ ᐊᓂᒍᐃᓯᒪᔪᓂᒃ ᓄᑕᕋᐅᑎᓪᓗᒋᑦ ᖁᓄᔪᕐᓂᐊᖅᑕᐅᓂᑯᓂᒃ, ᐴᓱ ᐃᑲᔪᖃᑦᑕᓚᐅᖅᐳᖅ ᐃᓱᒪᒥᐅᑕᖃᑦᑎᐊᕐᓂᕐᒥᒃ ᐃᓱᒪᒃᓴᖅᓯᐅᕐᓂᕐᒥᒃ ᐊᒻᒪ ᐃᓗᒃᑯᑦ ᓄᑕᖅᑲᓂᒃ ᐱᓕᕆᐊᖃᕐᓂᕐᒥᒃ ᐃᑲᔪᕈᒪᓪᓗᒋᑦ ᐊᓯᖏᑦ ᐊᓂᒍᐃᓯᒪᔪᑦ ᐊᒃᓱᕈᕐᓇᖅᑐᒃᑰᖅᑎᓪᓗᒋᑦ. ᑕᒪᓐᓇ ᐱᓕᕆᐊᕆᓯᒪᓕᖅᑕᖓ ᐊᕐᕌᒍᓂᒃ 8-ᓂᒃ ᓇᓂᓯᓚᐅᙱᓐᓂᕐᒥᓂ ᑲᑐᔾᔨᖃᑎᒌᖑᔪᒥᒃ. ᐊᓯᒥᓂᒃ ᐃᑲᔪᕐᓂᖅ ᐊᓕᐊᓇᐃᒋᑦᑎᐊᓚᐅᖅᑕᖓ ᐊᓯᒥᓂᒃ ᐃᑲᔪᐃᓐᓇᕈᒪᓕᖅᖢᓂ ᐊᒻᒪ ᐃᓕᓐᓂᐊᒃᑲᓐᓂᕈᒪᓕᖅᖢᓂ ᐱᓕᕆᔨᒻᒪᕆᙳᕈᒪᓕᖅᖢᓂᓗ.

ᒫᓐᓇᓕ ᐴᓱ ᐃᓕᓐᓂᐊᖅᑐᖅ ᐃᓄᓕᕆᔨᐅᓂᕐᒧᑦ ᑳᕈᑕᓐ ᓯᓚᑦᑐᖅᓴᕐᕕᒡᔪᐊᕐᒥ. ᓯᕗᓪᓕᕐᒥ ᐱᒋᐊᓚᐅᖅᓯᒪᕗᖅ ᓄᓇᖃᖅᑳᖅᑐᓄᑦ ᐱᐅᓯᒋᐊᖅᓯᒪᔪᓄᑦ ᐃᑲᔪᖅᑐᐃᓂᕐᒧᑦ ᐱᓕᕆᐊᖑᕙᒃᑐᒥ (IESP) ᑕᐃᑲᓂᓗ ᐃᓚᐅᕙᒃᖢᓂ ᐱᓕᕆᖃᑎᒌᖕᓂᕐᓂᒃ ᒪᕐᕉᖕᓂᒡᓗ ᓯᓚᑦᑐᖅᓴᕐᕕᒡᔪᐊᒥ ᐊᔪᕈᓐᓃᖅᓴᒐᒃᓴᓂᒃ. ᑖᒃᑯᐊ ᐊᓂᒍᖅᑎᓚᐅᖅᖢᓂᒋᑦ, ᑎᑎᖅᑲᐅᓯᐊᓚᐅᖅᐳᖅ ᐊᑐᓕᖁᔨᔾᔪᑎᒥᒃ ᐃᓕᓐᓂᐊᖃᑕᐅᔪᒪᓪᓗᓂ ᐃᓕᓐᓂᐊᕈᒪᔭᒥᓂᒃ. ᐃᓚᒋᔭᐅᓪᓗᓂ ᐃᓄᖕᓂᒃ ᐃᖅᑲᓇᐃᔭᖅᑎᑦᑎᓂᕐᒧᑦ ᐱᕙᒌᔭᐅᑦ ᐱᕕᒃᓴᖃᓚᐅᖅᐳᖅ ᐱᓕᕆᖃᑎᖃᕈᓐᓇᕐᓂᕐᒥᒃ ᐃᓚᐅᔪᓐᓇᕐᓂᕐᒥᒡᓗ ᐃᓕᖅᑯᓯᑐᖃᕐᓄᑦ ᐱᓕᕆᐊᖑᕙᒃᑐᓄᑦ. ᐊᒥᓱᐊᓗᖕᓂᒃ ᐃᑲᔪᖅᑐᐃᓂᖅᑕᖃᕆᕗᖅ ᑕᒪᑐᒧᖓ ᐱᓕᕆᐊᖑᔪᒧᑦ, ᓲᕐᓗ ᐃᖃᐃᓕᓴᖅᑎᑦᑎᔨᓄᑦ, ᐆᒃᑑᑎᒋᓗᒍ.

ᐱᒋᐊᓚᐅᖅᓯᒪᕗᖅ ᐃᓱᒪᓕᕆᔨᐅᓂᕐᒧᑦ, ᐃᓱᒪᓕᕆᔨᙳᕈᒪᓪᓗᓂ ᑭᓯᐊᓂ ᐊᒃᓱᕉᑎᖃᓚᐅᖅᐳᖅ ᑕᒻᒪᖅᓯᒪᔪᓂᒃ DSM-V ᖃᐅᔨᓴᖅᓯᓂᕐᒧᑦ ᒪᒃᐱᖅᑐᒐᕆᔭᐅᔪᒥ. ᖃᐅᔨᓚᐅᖅᐳᖅ ᐃᓄᓕᕆᓂᖅ ᒪᑐᐃᙶᕐᓂᖅᓴᐅᓪᓗᓂ ᐊᔾᔨᒌᙱᑦᑐᓄᑦ ᐃᓕᖅᑯᓯᕆᔭᐅᔪᓄᑦ ᐃᓱᒪᒋᔭᐅᔪᓄᑦ ᐊᒻᒪ ᓄᓇᖃᖅᑳᖅᓯᒪᔪᑦ ᑕᐅᑐᒃᑕᖏᓐᓄᑦ. ᒪᑐᐃᙶᕐᓂᖅᓴᐅᓚᐅᕆᕗᖅ ᑕᐅᑐᒃᖢᓂ ᐃᓄᖕᒥᒃ ᐊᑕᖏᕐᓗᒍ ᐊᔾᔨᒌᙱᓐᓂᖏᓐᓂᒃ DSM-V ᐊᑐᖅᑕᐅᕙᒃᑐᓄᑦ. ᓈᒻᒪᖕᓂᖅᓴᐅᓚᐅᕆᕗᖅ ᐅᖃᓪᓚᐅᓯᕐᓄᑦ ᐃᓱᒪᒋᔭᐅᔪᓄᑦ ᐊᒻᒪ ᐱᕐᔪᐊᖑᓪᓗᑎᒃ ᐅᕕᓂᖃᑎᒌᙱᓐᓂᕐᒧᑦ ᐃᓱᒪᒋᔭᐅᔪᓄᑦ ᐃᓕᑉᐸᓪᓕᐊᔭᖏᓐᓄᑦ ᐊᒻᒪ ᐃᓅᓕᓴᐅᑎᓄᑦ ᐊᒃᓴᓗᐊᓄᑦ ᐃᓕᓐᓂᐊᖅᑎᑦᑎᔾᔪᑕᐅᕙᒃᑐᓄᑦ ᐃᓕᓐᓂᐊᖅᑎᑕᐅᓯᒪᔪᓄᑦ. ᒫᓐᓇ ᐱᖓᔪᒋᓕᖅᑕᖓᓂ ᐊᕐᕌᒍᖓᓃᓕᖅᐳᖅ ᐊᒻᒪ ᐃᓂᑖᖅᐸᓪᓕᐊᓂᐊᖅᖢᓂ ᐅᑭᐊᒃᓵᖅ. ᓂᕆᐅᒃᐳᖅ ᓄᓇᓕᖕᓂ ᐱᓕᕆᐊᖑᔪᒧᑦ ᐊᑐᖅᐸᒃᑐᓄᑦ CBT−ᒧᑦ ᐊᒻᒪ ᐃᓱᒪᒃᓴᖅᓯᐅᕐᓂᕐᒧᑦ ᐱᓕᕆᐊᒥᓄᑦ.

ᐅᖃᐅᔾᔨᒋᐊᕈᑎᒋᔭᖓ ᐃᓕᓐᓂᐊᖅᑎᒧᑦ ᑖᔅᓱᒥᖓᔅᓴᐃᓐᓇᖅ ᐊᑐᖅᑕᒥᓂᒃ ᐊᑐᕐᓗᓂ ᐃᒻᒥᓂᒃ ᑲᒪᒋᑦᑎᐊᕐᓂᕐᒥᒃ ᓲᖃᐃᒻᒪ ᐊᕐᕌᓂ ᑕᐃᒪᐃᓚᐅᙱᒻᒪᑦ ᐃᖅᑲᓇᐃᔭᖅᑎᑕᐅᑎᓪᓗᒍ ᑲᔪᖏᖅᓴᐃᔨᐅᓪᓗᓂ ᐊᒻᒪ ᐱᓕᕆᐊᖃᓕᓚᐅᖅᑐᓂ ᐅᖓᑖᓄᑦ ᑲᒪᒋᔪᓐᓇᖅᑕᒥᓂᒃ. ᑕᖅᑭᑦ ᖃᔅᓯᐊᕐᔪᐃᑦ ᐊᓂᒍᖅᑎᓪᓗᒋᑦ, ᐊᒃᓱᕈᕐᓇᖅᓯᓚᐅᖅᐳᖅ ᑲᑕᓕᖅᖢᓂᓗ. ᓄᖅᑲᓕᓚᐅᖅᐳᖅ ᑲᔪᖏᖅᓴᐃᔨᐅᓂᕐᒧᑦ ᐃᖅᑲᓇᐃᔮᒥᓂᒃ ᐊᒻᒪ ᐃᒻᒥᓂᒃ−ᐃᓱᒪᒃᓴᖅᓯᐅᕈᑎᖃᓚᐅᖅᖢᓂ, ᐅᔾᔨᕈᓱᓕᓚᐅᖅᐳᖅ ᐃᒻᒥᓂᒃ ᑲᒪᒋᑦᑎᐊᕆᐊᖃᕐᓂᕐᒥᓂᒃ ᐸᓯᔭᒃᓴᙳᖅᑎᑦᑎᙱᖔᕐᓗᓂ ᖃᓄᐃᓐᓂᕆᔭᒥᓄᑦ. ᑭᖑᒧᑦ ᑕᑯᓪᓗᓂ, ᐃᓕᓐᓂᐊᖅᑎᑕᐅᒃᑲᓐᓂᕈᒪᓚᐅᖅᐳᖅ ᒪᒃᑯᒃᑑᑎᓪᓗᒍ ᓇᖕᒥᓂᖅ ᑲᒪᒋᑦᑎᐊᕐᓂᕐᒥᒃ ᑭᒡᓕᒋᑎᑕᐅᔪᓂᒡᓗ. ᓇᖕᒥᓂᖅ ᑲᒪᒋᑦᑎᐊᕐᓂᖅᓴᐅᔪᒪᒐᓗᐊᖅᐳᖅ ᐱᕈᖅᓴᓪᓗᓂ.

ᐊᓯᔾᔨᖅᓯᔪᒪᓪᓗᓂ ᐃᓅᓯᕐᒥᓂᒃ, ᐃᒥᐊᓗᖃᑦᑕᕈᓐᓃᓚᐅᖅᐳᖅ ᓱᐴᖅᑐᖃᑦᑕᕈᓐᓃᖅᖢᓂᓗ ᐊᖑᑎᓄᓪᓗ ᑲᑎᙵᖃᑎᖃᖃᑦᑕᓕᖅᖢᓂ ᐱᖃᓐᓇᕆᔭᖃᕐᕕᖕᒧᑦ ᖃᓂᒋᔭᒥᓂ. ᐅᐸᒃᐸᒃᑐᖅ ᐅᕕᓂᕈᕐᒧᑦ ᐊᒻᒪᓗ ᐃᓕᑦᑎᕙᓪᓕᐊᓪᓗᓂ ᐊᒻᒪᓗ ᐃᓐᓇᐃᑦ ᐃᓕᓴᐃᔾᔪᑎᖏᓐᓂᒃ.

ᐃᓱᒪᒥᒍᑦ ᖃᓄᐃᖏᑦᑎᐊᕋᓱᒃᖢᓂ, ᐴᓱ ᓄᑖᒥ ᖁᕕᐊᒋᔭᖃᓕᖅᐳᖅ: ᑎᖕᒥᐊᖅᓯᐅᕐᓂᖅ. ᖁᙱᐊᓲᖅ, ᑎᑎᕋᖅᐸᓪᓕᐊᕙᒃᖢᓂ ᖃᐅᔨᓴᖅᐸᒃᖢᓂᓗ ᑎᖕᒥᐊᓂᒃ. ᑕᒪᓐᓇ ᐱᓕᕆᓂᐅᔪᖅ ᓯᓚᒥ ᐊᓂᑎᑦᑎᕙᒃᐳᖅ ᐃᓱᒪᒥᓂᒡᓗ ᐊᓂᑎᑦᑎᕙᒃᖢᓂ, ᓈᓚᒃᐸᒃᖢᓂ ᑎᖕᒥᐊᓂᒃ ᓯᓚᒥᓗ ᓂᐱᓂᒃ ᓄᓇᑐᐃᓐᓇᕐᒥ Rideau River-ᒥ, ᕿᓚᒥᑯᓗᒃ ᐊᖏᕐᕋᖓᑕ ᖃᓂᒋᔭᖓᓂ. ᑭᒡᒐᕕᐊᕐᔪᒃ ᐱᑕᖃᕋᔪᙱᓛᖑᕗᖅ ᑎᖕᒥᐊᓂᒃ ᒫᓐᓇᒧᑦ ᑎᑭᖦᖢᒍ.

ᑲᔪᖏᖅᓴᐃᔾᔪᑎᒋᕙᒃᑕᖓ ᑲᔪᓰᓐᓇᕈᒪᓪᓗᓂ ᓱᕈᓰᑦ ᕿᒪᒃᑕᐅᓯᒪᙱᖦᖢᑎᒃ, ᐱᕈᖅᓴᖁᙱᖦᖢᓂᒋᓪᓗ ᐃᑲᔫᑎᒃᓴᖃᙱᖦᖢᑎᒃ ᑕᐃᒪᐃᓚᐅᖅᓯᒪᒐᒥᑎᑐᑦ. ᑐᙵᕕᓕᐅᕋᓱᒃᐳᖅ ᖃᓄᐃᙱᑦᑎᐊᖅᑐᒥ ᐃᑲᔪᖅᓱᐃᓂᐅᔪᒥ ᐊᒻᒪ ᐱᓕᕆᔾᔪᓯᑦᑎᐊᕙᖕᒥ ᐊᑐᕈᓐᓇᖅᑕᖏᓐᓂ ᑲᑎᙵᒃᑲᓐᓂᓕᕈᑎᒃ.

ᑕᐅᑐᙳᐊᖅᖢᓂ ᓇᓕᒧᒌᓕᖅᑎᑦᑎᔪᒪᓪᓗᓂ ᓄᓇᕐᔪᐊᒥ, ᑕᐃᒥᐊᓐ ᐴᓱ ᐃᓕᓐᓂᐊᖅᐳᖅ ᐃᓄᓕᕆᔨᙳᕈᒪᓪᓗᓂ ᑕᐃᒃᑯᐊ ᐱᔪᓐᓇᕐᓂᖃᙱᑦᑐᑦ ᐊᒃᓱᕈᕐᓇᖅᑐᒃᑰᕈᓐᓇᕐᓂᐊᕐᒪᑕ. ᖃᐅᔨᒪᓪᓗᓂ ᖃᓄᖅ ᐃᕐᖑᓯᕐᒥᓂᒃ ᑕᑕᓲᖑᖕᒪᖔᑦ ᐊᓯᒥᓂᒃ ᐃᑲᔪᕈᒪᓪᓗᓂ, ᐊᒃᓱᕈᖅᖢᓂ ᐱᓕᕆᕗᖅ ᐱᓕᕆᔨᒻᒪᕆᙳᕋᓱᒃᖢᓂ ᐃᖅᑲᐅᒪᓪᓗᓂᓗ ᐃᒻᒥᓂᒃ ᑲᒪᒋᑦᑎᐊᕆᐊᒃᓴᖅ. ᐱᒋᐊᓚᐅᖅᓯᒪᓪᓗᓂ ᐃᓱᒪᓕᕆᔨᐅᓂᕐᒥᒃ ᑭᓯᐊᓂ ᐃᓄᓕᕆᔨᙳᖅᐸᓪᓕᐊᓕᖅᖢᓂ, ᓇᓂᓯᓯᒪᓕᖅᐳᖅ ᐃᓚᓕᐅᔾᔨᔪᓐᓇᕐᓂᕐᒥᒃ ᓄᓇᖃᖅᑳᖅᓯᒪᔪᑦ ᐃᓱᒪᒋᔭᖏᓐᓂᒃ ᐊᓯᒥᓂᒃ ᑲᒪᑦᑎᐊᕈᒪᓂᕐᒥᓄᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.