ᑭᓱᑐᐃᓐᓇᖅ ᑖᓂ ᓛᓇᑦ ᐱᔪᒃᓯᑎᑕᐅᕗᖅ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᖏᓐᓄᑦ, ᐃᓚᖓᓗ ᓇᖕᒥᓂᖅ ᐊᑐᖅᓯᒪᔭᖓ. ᓛᓇᑦ ᐊᓪᒑᓐᑯᐃᓐ ᐊᒻᒪ ᐅᔨᐳᐃ, ᐃᓅᓚᐅᖅᓯᒪᓪᓗᓂᓗ ᐋᑐᕚᒥ, ᐋᓐᑎᐅᕆᐅᒥ, ᑕᐃᑲᓂ ᓄᓇᖃᖅᖢᓂ. ᓇᓗᓇᐃᖅᓯᓚᐅᕐᒥᔪᖅ ᒪᕐᕉᖕᓂᒃ−ᑕᕐᕆᔭᐅᓂᖓᓂᒃ ᐊᕐᓇᐅᓪᓗᓂ.

ᐃᖅᑲᓇᐃᔭᖃᑦᑕᖅᑐᖅ 4Rs−ᓄᑦ ᒪᒃᑯᒃᑐᓄᑦ ᓅᑉᐸᒃᑐᓂᑦ ᐊᔾᔨᐅᙱᑦᑐᓄᑦ ᐱᓕᕆᐊᒃᓴᓄᑦ ᐃᑲᔪᖅᑎᐅᓪᓗᓂ, ᐱᓕᕆᐊᖃᖅᖢᓂ ᓲᕐᓗ ᑐᓴᐅᒪᔪᓕᕆᓂᖕᓂᑦ, ᑮᓇᐅᔭᓕᕆᓂᖕᓂᑦ, ᐃᑲᔪᖅᐸᒃᖢᓂᓗ ᐱᔭᕆᐊᖃᓕᕌᖓᑦ. ᐅᖃᖅᑐᓂ ᐊᒥᓱᑎᒍᑦ ᐱᖃᓯᐅᔾᔨᒻᒪᑦ ᓄᓇᓕᓐᓅᖃᑦᑕᓂᕐᒥᒃ ᓄᓇᕐᔪᐊᕐᒧᑦ ᐃᓕᓐᓂᐊᖅᑐᓄᑦ ᐊᒻᒪᓗ ᑕᐱᖏᓐᓄᑦ.

ᐊᐱᕆᔭᐅᒐᒥ ᑭᓱᒥᒃ ᐱᔪᒃᓯᓂᖃᕐᒪᖔᑦ ᑖᔅᓱᒧᖓ ᐃᖅᑲᓇᐃᔮᕆᓛᕈᒪᔭᖃᕐᓂᕐᒧᑦ, ᓛᓇᑦ ᐅᖃᖅᖢᓂ ᒥᑕᐅᑎᖃᕈᒪᓂᕋᖅᖢᓂ ᓂᑲᒍᓱᙱᖦᖢᓂ.

"ᐊᖓᔪᒃᖡᑦ ᐃᓕᓐᓂᐊᕐᕕᖓᓃᑎᓪᓗᖓ, ᐃᓅᓯᓕᕆᔨᒧᑦ ᐅᖃᐅᔾᔭᐅᓚᐅᖅᐳᖓ ᓯᓚᑦᑐᖅᓴᕐᕕᒡᔪᐊᒥᙶᙱᖦᖢᖓ. ᐊᓱᐃᓛᒃ ᐱᕕᖃᖅᑎᖦᖢᓂᖓ ᐃᓕᓐᓂᐊᓚᐅᑲᒍᒪᔭᓐᓄᑦ, ᓯᓚᑦᑐᖅᓴᕐᕕᒡᔪᐊᓕᐊᕐᓗᓂ," ᐅᖃᖅᑐᖅ ᓛᓇᑦ.

"ᐱᓕᕆᐊᖃᒻᒪᕆᓚᐅᖅᑐᖓ ᐅᕕᓂᖃᑎᒋᙱᑕᓐᓂᒃ ᐊᒻᒪ ᐅᓄᖅᑐᓂᒃ ᓇᓗᓈᕿᔪᓂᒃ ᐅᕙᓐᓄᑦ ᐃᓕᔭᐅᔪᓂᒃ ᐅᑭᐅᖃᓕᖅᑎᓪᓗᖓ. ᑕᐃᒪᐃᒻᒪᓐ ᐱᓕᕆᓲᖑᔪᖓ ᓲᖃᐃᒻᒪ ᐅᓄᙱᓗᐊᖅᑐᓂᒃ ᐃᓄᖕᓂᒃ ᕿᓂᕈᓐᓇᓚᐅᕋᒪ ᐱᕈᖅᐸᓪᓕᐊᑎᓪᓗᖓ."

ᐅᖃᕐᖢᓂ ᐊᑕᐅᓯᕐᒥᒃ ᒪᒃᑯᒃᑐᓄᑦ ᐱᓕᕆᐊᒃᓴᒥᒃ ᐱᐅᑦᑎᐊᕐᖢᓂ, ᑭᓯᐊᓂ ᐃᓱᒪᓪᓗᓂ ᐅᑭᐅᖃᓕᕐᓂᕐᒥᓂᒃ 18−ᖑᓚᐅᖅᑎᓪᓗᒍ.

ᑕᐃᒪᐃᒻᒪᑦ ᐃᓂᖃᑦᑎᐊᖁᓪᓗᒋᑦ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᐊᑐᐃᓐᓇᐅᔪᑦ ᐃᓚᓕᐅᔾᔨᓯᒪᔪᓪᓗ ᐱᒻᒪᕆᐅᔪᑦ ᑖᔅᓱᒧᖓ, ᐱᓗᐊᖅᑐᒥᑦ ᐅᑭᐅᖏᓐᓄᑦ ᐊᑐᐊᒐᖃᙱᑦᑐᓄᑦ.

"18-ᖑᕈᕕᑦ, ᐃᓛᓐᓂᒃᑯᑦ ᒪᒃᑯᒃᑐᖑᔪᓐᓃᓲᖑᒐᕕᑦ, ᐅᕙᓐᓄᑦ ᓈᒻᒪᙱᒻᒪᑦ. ᐅᓪᓗᖅ 18-ᕈᓚᐅᖅᑎᓐᓇᒍ ᐊᒻᒪᓗ ᐅᓪᓗᖅ ᐊᓂᒍᖅᑎᓪᓗᒍ ᓱᓕ ᑖᓐᓇᓴᐃᓐᓇᐅᒐᕕᑦ. ᑕᐃᒪᓐᓇᓗ ᐱᔭᕆᐊᖃᖅᑐᑎᑦ ᑖᒃᑯᓂᖓᑦᑕᐃᓐᓇᖅ ᐱᔾᔪᑎᒃᓴᓂᒃ," ᐅᖃᖅᑐᖅ ᓛᓇᑦ.

ᑕᕝᕙᓂᔅᓴᐃᓐᓈᖅᓯᒪᒐᓗᐊᖅᑎᓪᓗᒍ ᓄᓇᓕᐸᐅᔭᕐᒥ, ᓛᓇᑦ ᐅᖃᖅᑐᓂ ᐃᓕᓐᓂᐊᖅᑏᑦ ᐊᐅᓪᓚᖃᑦᑕᖅᑐᑦ ᓄᓇᓕᒻᒥᓂᒃ ᐃᓕᓐᓂᐊᕆᐊᖅᑐᑎᒃ ᐊᒻᒪ ᐃᖅᑲᓇᐃᔮᖃᖅᑐᑎᒃ ᐱᒻᒪᕆᐅᕗᖅ ᑕᑯᒋᐊᖏᓐᓇᕆᐊᖃᕐᒪᑕ ᐊᑐᕋᔅᓴᓂᒃ ᐊᑐᐃᓐᓇᐅᔪᓂᒃ.

ᐃᓕᓐᓂᐊᖅᑎᐅᑎᓪᓗᒍ ᐊᓪᒑᓐᑯᐃᓐ ᓯᓚᑦᑐᓴᕐᕕᖓᓂ, ᐃᖅᑲᓇᐃᔭᓚᐅᖅᓯᒪᔪᖅ ᓄᓇᖃᖅᑳᖅᓯᒪᔪᒃᑯᕕᒻᒥ ᑕᐃᑲᓂᓗ ᐃᖅᑲᓇᐃᔮᖓᑕ ᐃᓚᖓ ᖃᐅᔨᒪᓇᓱᐊᖅᑐᓂ ᓄᓇᓕᓐᓂ ᓱᓇᒃᑯᑖᓕᕆᓂᕐᒧᑦ ᑲᑎᒪᔩᑦ ᐅᓪᓗᒥᒧᑦ ᐊᖑᒻᒪᑎᒐᓗᐊᕐᒪᖔᑕ.

"ᑕᑯᓇᐃᓐᓇᕐᓗᒋᑦ ᐱᑕᖃᖅᑐᑦ ᐊᑐᐃᓐᓇᐅᔪᑦ ᐃᓕᖕᓄᑦ. ᑲᑉᐱᐊᓱᙱᓪᓗᑎᓪᓗ ᐃᓂᒃᓴᖅᑖᕆᐊᒃᓴᖅ, ᓲᖃᐃᒻᒪ ᓅᑐᐃᓐᓇᕋᓗᐊᕈᕕᑦ, ᓄᓇᓕᓯ, ᐱᔪᓐᓇᐅᑎᖃᑦᑎᐊᖅᐳᑎᑦ ᐃᓯᕆᐊᒃᓴᖅ ᑕᐃᑲᓂ," ᐅᖃᖅᑐᖅ ᓛᓇᑦ.

ᐱᔭᕇᖅᓯᒪᒐᓗᐊᖅᑐᓂ ᐃᖅᑲᓇᐃᔮᒥᓂᒃ, ᓛᓇᐃᑦ ᐱᓕᕆᐊᖃᕆᐊᖃᖅᓯᒪᒻᒥᔪᖅ ᓇᒻᒥᓂᖅ ᐊᐳᖅᑕᕈᑎᒥᓂᒃ ᐃᖏᕐᕋᑎᓪᓗᒍ.

ᐅᕕᓂᖃᑎᒋᙱᑕᒥᒃ ᐊᑭᕋᖅᑐᕐᓂᖅ ᐊᒻᒪ ᑲᖐᓱᓐᓂᖅ ᐱᓕᕆᐊᕆᖃᑦᑕᓚᐅᖅᑕᖓ, ᐊᒻᒪᓗ ᐅᖃᖅᑐᓂ ᐱᖅᑯᓯᖃᖃᑎᒌᖏᑦᑐᓄᑦ ᐃᓕᓐᓂᐊᕐᕕᒻᒨᕋᓗᐊᖅᑐᓂ ᖃᐅᔨᒪᙱᑦᑐᒻᒪᕆᐅᓚᐅᕐᒪᑦ ᐊᒻᒪ ᑐᑭᓯᓂᕐᓗᓐᓂᖅᑕᖃᖅᑐᓂ ᓱᓕ, ᐱᔭᕇᖅᓯᓪᓗᓂ ᐃᓕᓐᓂᐊᕐᕕᕐᔪᐊᕐᒥᑦ ᐊᔅᓱᕈᕈᑕᐅᓪᓗᓂ.

ᑭᓯᐊᓂ ᑕᐃᒪᐃᓚᐅᖅᑐᖅ, ᐊᒻᒪᓗ ᐊᕐᕌᒍᒥᒃ ᐱᑕᖃᙱᓐᓂᖃᓚᐅᖅᑐᖅ ᐃᓕᓐᓂᐊᖅᑕᖓ ᓄᖅᑲᖅᑎᑕᐅᓚᐅᖅᑎᓪᓗᒍ ᐅᓄᙱᓗᐊᕐᓂᖏᓐᓄᑦ ᐃᓕᓐᓂᐊᕆᐊᖅᑐᑦ. ᐅᖃᖅᑐᓂ ᓯᓚᑦᑐᓴᕐᕕᒻᒨᕋᒥ, ᓄᑖᖑᓚᐅᕐᒪᑦ ᐊᒻᒪᓗ ᐅᐸᓗᖓᐃᖅᓯᒪᒐᓂ.

"ᐱᑦᑎᐊᓕᓚᐅᖅᑐᖓ ᐊᕐᕌᒎᒃ ᒪᕐᕉᒃ ᓈᑎᓪᓗᒋᒃ ᐋᓪᒑᓐᑯᐃᓐᒥ. ᑭᓯᐊᓂ ᖃᓄᐃᑦᑐᖃᖃᑦᑕᓚᐅᖅᐳᖅ ᐊᒃᓱᕈᕐᓇᖅᑐᒃᑰᕈᑕᐅᕐᔪᐊᖅᖢᓂ," ᓛᓇᑦ ᐅᖃᖅᑐᖅ.

ᐃᑲᔪᕋᓱᒃᓗᒍ ᐃᓕᓴᐃᔨᖓ, ᐃᑲᔪᓚᐅᖅᑐᖅ ᓛᓇᑦᒥᑦ ᐃᑲᔪᑦᑎᐊᖅᖢᓂᓗ ᐊᔪᙱᓐᓂᓕᒫᒥᓂᒃ.

ᓛᓇᑦ ᓄᖅᑲᕆᐊᖃᓚᐅᕐᒥᔪᖅ ᓯᓚᑦᑐᖅᓴᕐᕕᔾᔪᐊᕐᒥ ᐸᒡᕕᓵᖅᑕᐅᓚᐅᖅᑎᓪᓗᒍ ᐊᓯᐊᓄᑦ ᐃᓕᓐᓂᐊᖅᑎᒧᑦ ᐊᒻᒪᓗ ᖃᓄᐃᓕᐅᓗᐊᖏᖦᖢᓂ ᐊᑦᑕᕐᓇᖅᑐᒦᖁᓇᒍ.

"ᐊᒃᓱᕈᕐᓇᓛᖑᖅᑰᓚᐅᖅᑐᖅ ᒫᓐᓇᒧᑦ ᑎᑭᖦᖢᒍ ᐃᓱᒪᓕᐅᕋᓱᒃᖢᖓ ᓄᖅᑲᕈᒪᓕᖅᖢᖓ ᐃᓱᒪᒐᓗ ᓯᕗᓪᓕᐅᑎᓪᓗᒍ," ᐅᖃᓚᐅᖅᐳᖅ ᓛᓇᑦ.

"ᐃᓱᒪᒋᔭᕋ ᐃᓚᓐᓄᑦ ᐃᑲᔪᖅᑕᐅᔪᒪᑐᐃᓐᓇᖅᖢᖓ ᖃᐅᔨᒪᓪᓗᖓᓗ ᐅᕙᓐᓂᒃ ᐃᑲᔪᕈᓐᓇᖅᑐᓂᒃ, ᑭᓯᐊᓂ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐱᔨᑦᑎᕋᖅᑕᐅᔪᓐᓇᓚᐅᕋᒪ ᐃᑲᔫᑎᖃᑦᑎᐊᓚᐅᖅᑐᖅ ᐱᔭᕆᐊᖃᒻᒪᕆᒃᖢᒋᓪᓗ."

ᐊᒻᒪᓗ ᐅᖃᐅᔾᔨᒋᐊᕈᑎᑕᖃᕐᓂᖅᐸᑦ ᒪᒃᑯᓐᓂᖅᓴᒧᑦ, ᐃᓱᒫᓗᓗᐊᕋᔭᙱᑦᑐᖅ.

"ᐱᕙᒌᔭᖅᓯᒪᓗᑎᑦ ᐃᓱᒪᑐᔪᒃᑯᑦ, ᑭᓯᐊᓂ ᐃᓱᒫᓗᓗᐊᙱᓪᓗᑎᑦ. ᑭᓱᑐᐃᓐᓇᐃᑦ ᐱᓕᕆᔪᓐᓇᖅᐳᑦ ᐱᔭᕆᐊᖃᖅᑕᒥᓂᒃ, ᐱᑕᖃᐃᓐᓇᐅᔭᕐᓂᐊᖅᖢᓂᓗ ᐋᖅᑭᒃᓯᒪᓕᕈᑎᒃᓴᓂᒃ ᑕᐃᒪᐃᑦᑕᕆᐊᖃᕈᕕᑦ."

ᖁᔭᓐᓇᒦᑦᑎᐊᕐᒥᔭᕋ ᔮᔅᒥᓐ ᑲᐸᑕᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ ᑎᑎᕋᖅᓯᒪᔪᒥᒃ.