ᑕᐃᔮᓐ ᕉᓯᓐ ᐅᖃᖅᐳᖅ ᓯᕗᒻᒧᐊᒃᐸᓪᓕᐊᖏᓐᓇᕐᓂᕋᖅᖢᓂ ᓲᖃᐃᒻᒪ ᓇᓃᑦᑕᕆᐊᖃᕐᒪᖔᖅᐱᑦ ᑎᑭᐅᑎᓛᕋᕕᑦ. 

ᑕᐃᔮᓐ ᕉᓯᓐ ᐃᖅᑲᐅᒪᔪᖅ ᐃᓂᖃᑦᑎᐊᖅᑰᔨᙱᖦᖢᓂ. ᐅᐃᓂᐹᒡᒧᑦ ᓅᓚᐅᖅᓯᒪᔪᖅ ᓯᓚᑦᑐᖅᓴᕐᕕᒡᔪᐊᒧᑦ ᑭᓯᐊᓂ ᖃᐅᔨᒪᓚᐅᙱᒻᒪᓪᓘᓐᓃᑦ ᑭᓱ ᐱᒻᒪᕆᐅᖕᒪᖔᑦ. ᐊᓂᓰᓇᐱ ᐊᕐᓇᐅᓪᓗᓂ ᐃᓅᖃᑎᒥᓃᖦᖢᓂ ᐃᒃᐱᒍᓱᙱᓐᓂᖅᓴᐅᓚᐅᖅᑐᖅ ᖃᓂᒋᔭᖏᓐᓃᑦᑐᓂ. ᑭᓯᐊᓂ ᓯᕗᒻᒧᐊᒃᑎᑦᑎᓚᐅᖅᑐᖅ ᐊᒻᒪ ᒪᕐᕉᒃ ᐱᔭᕇᖅᑎᓪᓗᒋᑦ ᖃᐅᔨᒪᓂᖃᑦᑎᐊᓕᕐᖢᓂᓗ ᐊᓯᖏᓐᓂᒃ ᓄᓇᖃᖅᑳᖅᓯᒪᔪᓂᒃ ᐊᕐᓇᓂᒃ ᐱᓕᕆᐊᒃᓴᒧᑦ ᑐᑭᒧᐊᒃᑎᑦᑎᔨᐅᓪᓗᓂ ᐅᐃᓂᐹᒡᒥ ᕘᑦᔅᒥ ᐱᓕᕆᐊᒃᓴᒥ.

ᐊᒻᒪᓗ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᓯᕗᒻᒧᐊᒃᑎᑦᑏᓐᓇᖁᓪᓗᓂᒋᑦ.

"ᖃᐅᔨᓂᐊᖅᑐᑎᑦ ᑭᓱᑦ ᐃᓕᖕᓄᑦ ᓈᒻᒪᖕᒪᖔᑕ. ᖃᐅᔨᓂᐊᖅᑐᑎᑦ ᓇᓃᑦᑕᕆᐊᖃᕐᒪᖔᖅᐱᑦ. ᑲᔪᓯᑐᐃᓐᓇᕆᑦ. ᑭᓯᐊᓂ ᖃᐅᔨᒪᔭᐃᓐᓇᕆᔭᕆᐊᖃᙱᑕᑎᑦ ᓯᕗᓂᐊᒍᑦ ᑭᓇᑐᐃᓐᓇᕐᓗ ᐃᓕᖕᓄᑦ ᐅᖃᐅᓯᐅᔪᓐᓇᙱᖦᖢᓂ," ᐅᖃᖅᑐᖅ ᕉᓯᓐ.

ᖃᐅᔨᒪᔪᖅ ᐊᖏᕐᕋᒦᙶᕈᕕᑦ ᐃᓚᒌᓂᑦ ᐋᓐᓂᖅᑎᕆᓂᕐᒥᑦ ᐃᒥᐊᓗᓗᐊᕐᓂᕐᒥᓪᓘᓐᓃᑦ ᓇᒻᒥᓂᖅ ᐊᐱᖅᓱᕈᓐᓇᖅᑐᖅ ᓱᒻᒪᑦ ᑕᐃᑲᓃᒻᒪᖔᑕ ᐃᑉᐱᒍᓱᓐᓂᕐᒥᓪᓘᓐᓃᑦ ᐊᐃᑉᐸᖏᓐᓂᑦ ᐃᓕᓐᓂᐊᖃᑎᖏᓐᓂᑦ. ᑭᓯᐊᓂ ᕋᓯᓐ ᐅᖃᖅᑐᖅ ᑐᑭᖃᕐᓂᖅᓴᐅᒋᐊᖓ ᖃᐅᔨᔪᖃᕋᐃᒻᒪᑦ ᖃᓪᓗᓈᖑᖃᑎᒌᙱᑦᑐᓂᒃ ᐊᒻᒪᓗ ᐊᒥᓱᑦ ᐱᐅᑦᓯᐊᖏᑦᑐᑦ ᐃᓄᐃᑦ ᓄᓇᓕᖁᑎᖏᑦ.

ᐅᓪᓗᒥᒧᑦ ᑎᑭᖦᖢᒍ ᓱᓕ ᓂᙵᒃᓯᒪᔪᖅ ᑭᓯᐊᓂ ᐅᐱᒋᕙᖏᑦ ᐊᔪᙱᑦᑐᖁᑎᖏᑦ ᐊᓯᖏᓪᓗ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᐃᑲᔪᕐᓂᖏᓐᓄᑦ ᐊᒃᑐᖅᑕᐅᓴᕋᐃᑦᑑᓂᖓᓄᑦ ᐃᑲᔪᖅᓱᐃᓪᓗᓂᓗ.

"ᓇᒡᓕᒋᕙᒋᑦ ᐃᕿᖦᖢᒋᓪᓗ ᐸᓂᖅᓯᕐᓗᒋᓪᓗ ᕿᐊᖃᑦᑕᖅᑕᑎᑦ ᐊᕙᓗᓯᒪᑐᐃᓐᓇᕐᓗᒋᓪᓗ ᐃᒃᐱᒍᓱᑦᑎᐊᖅᑐᑦ ᓇᒡᓕᒍᓱᖕᓂᑎᓪᓗ. ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᐅᕙᓐᓄᑦ ᐱᓕᕆᕐᔪᐊᓲᑦ. ᑕᐃᒪᓐᓇᐅᕗᖓ, ᑕᐃᒪᓐᓇᓗ ᐊᒃᓱᕈᕐᓇᖅᑐᒃᑰᖃᑦᑕᖅᑐᖓ," ᐅᖃᖅᑐᕕᓂᖅ ᕉᓯᓐ.

ᐅᖃᐅᔾᔪᖅᑕᐅᓂᒃᑯᑦ ᐱᖓᓱᓂᑦ ᐅᖃᐅᔾᔪᐃᒋᐊᕈᑎᖃᖅᐳᖅ; 1) ᐃᑲᔪᖅᓱᐃᔾᔪᑎᒌᓐᓇᕐᓗᒍ. 2) ᐋᖅᑭᒡᓗᒍ ᑕᕝᕚᑭ, ᐃᖅᑲᐅᒪᒋᑦ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᑦ ᐱᒻᒪᕆᐅᔪᖅ ᐊᒻᒪ 3) ᖃᑕᙳᑎᒌᓐᓇᕐᓗᒋᑦ, ᐊᔪᕐᓇᑐᐃᓐᓇᕆᐊᓖᑦ ᑭᓯᐊᓂ ᑕᐃᒃᑯᐊ ᓄᓇᕐᔪᐊᒥ ᐊᒃᓱᕈᕐᓇᖅᑐᒃᑰᕐᓂᖅᓴᐅᔪᑦ.

ᕋᓯᓐ ᐅᖃᖅᑐᖅ ᐃᓄᓕᕆᔨᐅᓂᕐᒥᑦ ᐃᑲᔪᕈᒪᐃᓐᓇᖃᑦᑕᕋᒥ ᐃᓄᓐᓂᑦ ᐊᒻᒪᓗ ᐃᓕᓐᓂᐊᕇᕋᒥ ᖃᐅᔨᒪᓚᐅᖅᑐᖅ ᐃᑲᔪᕈᒪᓂᕐᒥᑦ ᐃᓚᓕᐅᔾᔨᓂᕐᒥᑦ ᓄᓇᖃᖅᑳᖅᓯᒪᔪᓂᑦ ᖃᐅᔨᒪᓂᕐᒥᑦ ᐃᑉᐱᒍᓱᑦᓯᐊᕐᓂᕐᒥᓪᓗ.

"ᐃᒃᐱᒋᑦᑎᐊᕋᒃᑯ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᕆᔭᖏᑦ ᖃᐅᔨᒪᑦᑎᐊᖅᑐᑦ ᖃᓄᖅ ᑲᒪᒋᔭᖃᕆᐊᒃᓴᖅ ᖃᓄᐃᓕᐅᖅᑕᓕᒫᖏᓐᓂᒃ ᒫᓐᓇ ᖃᐅᔨᒪᑦᑎᐊᖅᖢᑎᒡᓗ ᖃᓄᖅ ᐊᒃᓱᕈᕐᓇᖅᑐᒃᑰᕈᓐᓇᕐᒪᖔᑦ," ᐅᖃᖅᑐᖅ ᕉᓯᓐ.

ᖁᔭᓐᓇᒦᒃ ᐋᔅᑳᕐ ᖃᒪᓂ'ᑐᐊᕐᒧᑦ III−ᒧᑦ ᑎᑎᕋᓚᐅᕐᓂᖏᓐᓄᑦ ᑖᔅᓱᒥᖓ ᓂᐱᙵᑕᕐᒥᒃ.