ᑐᕙᐃᓐ ᑐᕉᓱᕐ ᓄᓇᖃᖅᑳᖅᓯᒪᔪᑦ ᐅᖃᐅᓯᓕᕆᓂᕐᒧᑦ ᐃᓕᓴᐃᔨᐅᔪᖅ ᐃᓅᕕᖕᒥᑦ, ᓄᓇᑦᑎᐊᕐᒥᑦ, ᓄᓕᐊᒥᓂᒃ ᐃᒡᓗᒥᐅᖃᑎᖃᖅᖢᓂ ᐊᒻᒪ ᒪᕐᕉᒃ (ᐱᖓᓲᓪᓗᑎᒃ) ᕿᑐᕐᖓᖏᑦ. ᐃᓄᕕᐊᓗᐃᑦ ᐊᒻᒪᓗ ᐃᓕᓐᓂᐊᖅᑎᑦᑎᕙᒃᑭᓪᓗᓂ ᐃᓄᕕᐊᓗᑦᑐᓐ ᐃᓕᓐᓂᐊᕐᕕᕋᓛᖓᓂ ᐃᓅᕕᒻᒥ.

ᑐᕙᐃᓐ ᐱᔭᕇᖅᓯᓚᐅᖅᑐᖅ ITEP−ᒥᒃ (Indian Teacher Education Program) ᓯᓚᑦᑐᖅᓴᕐᕕᒡᔪᐊᒥ ᓵᔅᑳᑦᓱᐊᓐᒥ − ᐊᑯᓂᐊᓗᒃ ᐊᖏᕐᕋᕆᔭᐅᓪᓗᓂ ᐃᓄᖕᒧᑦ ᒪᑲᓐᔨ ᑎᐅᓪᑕᒥ. ᑭᓯᐊᓂ ᑐᕙᐃᓐ ᐅᖃᐅᓯᓕᕆᔪᓐᓇᑦᑎᐊᓚᐅᖅᑐᖅ, ᐃᓕᓴᐃᔨᐅᓪᓗᓂ, ᖃᑕᙳᑎᒥᓂᒡᓗ ᐊᑐᖃᑦᑕᖅᓯᒪᓪᓗᓂ ITEP−ᑯᓐᓂ ᓵᔅᑲᑑᓐᒥ − ᐊᑖᑕᖓ ᑖᔅᓱᒥᖓᑦᑕᐃᓐᓇᖅ ᐃᓕᓐᓂᐊᓚᐅᖅᓯᒪᒋᓪᓗᓂ 1990−ᖏᓐᓂ.

"ᐅᖃᓕᒫᒐᖃᕐᕕᖕᒥ ᐃᖅᑲᓇᐃᔭᓚᐅᖅᓯᒪᕗᖓ ᐊᒻᒪ ᓯᓚᑦᑐᖅᓴᕐᕕᖕᒥ ᐃᓕᓴᐃᔨᒧᑦ ᐅᖃᐅᔾᔭᐅᓚᐅᖅᖢᖓ, ᕿᒻᒥᕋ ᑕᐃᑲᓃᓚᐅᕐᓂᖓᓄᑦ, ᐊᒻᒪ ᐃᓄᕕᐊᓗᒃᑐᓐ ᐅᖃᓪᓚᑐᐃᓐᓇᓚᐅᖅᑐᖓ ᕿᒻᒥᒧᑦ. ᐱᓕᕆᖃᑎᖃᓚᐅᖅᑐᖅ ᐃᓐᓇᕐᓂᑦ, ᐱᓕᕆᐊᖃᖅᑐᓂ ᓯᕗᓪᓕᖅᐹᒥᒃ ᖃᐅᔨᓴᕐᓂᐅᔪᒥᒃ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᓕᕆᓂᕐᒧᑦ ᐃᓕᓐᓂᐊᑎᑦᑎᔨᐅᓂᕐᒧᑦ ᐃᓕᓐᓂᐊᕐᓂᕐᒥᒃ ᓯᓚᑦᑐᕐᓴᖅᕕᒻᒥ. ᐃᓕᓴᐃᔨᑐᖃᕋ ᐊᑎᓐᓂᒃ ᓇᒃᓴᓚᐅᕐᒪᑦ, ᑕᐃᑲᓂᓗ ᐃᖅᑲᐅᒪᕗᖓ ᐊᖓᔪᖅᑳᒃᑲ ᐅᖃᖃᑎᒋᓪᓗᒋᑦ ᐅᖃᐅᑎᓪᓗᓂᖓᓗ ᐅᖃᐅᓯᕋ ᐱᐅᖏᓐᓇᐅᔭᕐᓂᖓᓂᒃ ᐊᒻᒪ ᐅᖃᐅᓯᖃᑎᒌᙱᑦᑐᓂᒃ."

"ᑕᐃᑲᙶᕈᓘᔭᖅᑐᖓ. ᐊᑖᑕᒐ ᐅᖃᐃᓐᓇᐅᔭᖅᑐᖅ, 'ᐃᓕᓴᐃᔨᑦᑎᐊᕙᐅᔪᑎᑦ. ᐃᓕᓐᓂᐊᖅᑎᑦᑎᓯᒪᓕᕇᖅᑐᓯ ᐃᓄᓐᓂᒃ ᓯᐊᕐᕆᔮᕐᓂᕐᒥᒃ, ᖃᓄᖅ ᐊᕿᓂᕐᒥᒃ ᐊᒻᒪᓗ ᐊᓯᖏᓐᓂᒃ.' ᑕᒪᓐᓇ ᐅᕙᓐᓄᑦ ᑕᐃᒪᐃᑐᐃᓐᓇᖅᑐᔭᕐᒪᑦ... ᑕᐃᒪᓕ ᓯᓚᑦᑐᖅᓴᕐᕕᔾᔪᐊᕐᒨᕈᒪᓕᓚᐅᖅᑐᖓ ᐊᒻᒪᓗ ᐸᐃᑉᐹᑖᕐᓗᖓ."

ᐃᓅᓂᑰᓪᓗᓂ ᕗᐊᑦ ᓯᒥᑦᒥ ᐃᓅᓪᓗᓂᓗ ᐃᓅᕕᖕᒥ, ᑐᕙᐃᓐ ᖃᐅᔨᒪᑦᑎᐊᖅᑐᖅ ᐊᒃᓱᕈᕐᓇᕐᓂᖓᓂᒃ ᐃᓕᓐᓂᐊᕋᓱᒃᖢᓂ ᐅᑭᐅᖅᑕᖅᑐᒥ. "ᖃᐅᔨᒪᔪᖓ ᐊᒥᓱᓄᑦ ᐃᓚᒌᓄᑦ ᐃᓄᖕᓄᓪᓗ, ᐃᓛᓐᓂᒃᑯᑦ ᐊᐅᓪᓚᕐᓂᖅ ᐊᓯᐊᒎᕐᕕᖃᖅᐸᙱᓚᖅ. ᑕᕝᕘᓇᓗ ᕿᒥᕐᕈᔪᒪᒍᔅᓯ ᓲᕐᓗ ᖃᕋᓴᐅᔭᒃᑯᑦ ᐃᓕᓐᓂᐊᒐᒃᓴᓂᒃ, ᒫᓐᓇᓗ ᑭᒃᑯᓕᒫᑦ ᐃᓕᑦᑎᕙᓪᓕᐊᓪᓗᑎᒃ ᖃᕋᓴᐅᔭᒃᑯᑦ. ᑭᒃᑯᓕᒫᑦ ᖃᐅᔨᕙᓪᓕᐊᒻᒪᑕ, ᐊᒻᒪᓗ ᐅᓪᓗᒥᐅᓕᖅᑐᖅ ᑕᒪᓐᓇ ᐊᑐᖅᑕᐅᒍᓐᓇᖅᑐᖅ ᐃᓄᓐᓄᑦ. ᑭᓯᐊᓂ ᐅᕙᓐᓄᑦ ᑐᕌᖓᓚᐅᙱᑦᑐᖅ ᒪᒃᑯᓐᓂᖅᓴᐅᑎᓪᓗᖓ. ᖃᕋᓴᐅᔭᒃᑯᑦ ᐱᖃᑦᑕᖅᑐᒍᑦ, ᑭᓯᐊᓂ ᐱᑐᐃᓐᓇᓲᖑᒐᑦᑕ ᒋᒐᐸᐃᑦᔅᓂᒃ ᑕᖅᑭᑕᒫᑦ. ᐊᒻᒪᓗ ᒫᓐᓇ ᓱᓕ ᑕᒪᓐᓇ ᐃᓱᒪᒋᔭᒃᓴᐅᓕᖅᐳᖅ."

ᑭᓯᐊᓂ ᐊᒥᓱᓄᑦ ᓄᓇᖃᖅᑳᖅᓯᒪᔪᓄᑦ ᒪᒃᑯᑦᑐᓄᑦ ᐅᑭᐅᖅᑕᖅᑐᒥᑦ, ᓅᑉᐸᓪᓕᐊᓂᖅ ᐊᖏᕐᕋᕐᒥᑦ ᐃᓕᓐᓂᐊᕐᓂᕐᒧᑦ ᐱᕕᖃᕐᓂᐅᔪᓂᑦ ᓱᓕᓪᓚᕆᑦᑐᖅ, ᐊᒥᓱᑦ, ᐃᓚᒋᔭᐅᑦᓱᓂ ᑐᕙᐃᓐ, ᐊᑦᓱᕈᓐᓇᖅᓯᒪᔪᖅ. "ᐅᕙᓐᓄᑦ, ᐱᕕᖃᓚᐅᖅᑐᖓ (ᐊᐅᓪᓚᕐᓗᖓ) ᐱᕈᖅᐸᓪᓕᐊᓪᓗᖓ. ᐊᔾᔨᒌᓐᖏᑦᑐᓂᒃ ᐱᓐᖑᐊᖃᑕᐅᖃᑦᑕᓚᐅᕋᒪ, ᖃᓄᐃᑦᓴᖏᑦᑐᖓ ᐊᐅᓪᓚᕋᓗᐊᕈᒪ, ᑭᓯᐊᓂ ᐊᖓᔪᖅᑳᒃᑲ ᐊᐅᓪᓚᕆᐅᕐᒪᑕ. ᐃᓅᓱᒃᑑᓪᓗᖓ, ᐊᒻᒪᓗ ᐋᕼᐊᓘᓇ ᐊᑲᐅᙱᓕᐅᕈᑎᖃᓕᓚᐅᕋᒪ ᐃᒥᐊᓗᒻᒧᑦ ᐊᒻᒪᓗ ᐋᖓᔮᓐᓇᖅᑐᓄᑦ. ᓱᓕᑦᑎᐊᕈᒪᔪᖓ. ᐊᒻᒪᓗ ᐅᕙᓐᓄᑦ ᐊᑑᑎᖃᓗᐊᓚᐅᙱᑦᑐᖅ ᓯᕗᓪᓕᖅᐹᒥ ᐊᕐᕌᒍᒥ ᐃᓕᓐᓂᐊᕐᕕᔾᔪᐊᒥ. ᐃᓕᓐᓂᐊᕈᓐᓃᓚᐅᕋᒪ, ᐊᒻᒪᓗ ᐊᓂᑕᐅᓪᓗᖓ ᖃᐅᔨᓴᖅᑕᐅᓪᓗᖓ ᐊᕐᕌᒍᒧᑦ. ᑕᐃᑲᓂᓗ ᐊᖏᕐᕋᒥᓂ ᐃᖅᑲᓇᐃᔭᓚᐅᖅᓯᒪᓪᓗᖓ. ᐊᖓᔪᖅᑳᒪ ᐃᒡᓗᖓᑕ ᐊᑖᓃᓚᐅᕋᒪ ᐊᒻᒪ ᒥᖦᖢᓂ. ᑕᐃᔅᓱᒪᓂ ᐅᖃᓕᒫᒐᖃᕐᕕᖕᒥ ᐃᖅᑲᓇᐃᔭᖅᑎᓪᓗᖓ ᐊᒻᒪ ᐃᒥᕋᓚᒃᑎᑦᑎᔨᐅᓚᐅᖅᓯᒪᓪᓗᖓ ᐊᒻᒪ ᐅᖃᕈᓘᔭᖅᑎᐅᓪᓗᖓ."

"ᐱᓇᓱᐊᑦᑎᐊᓚᐅᖅᑐᖓ ᐊᖓᔪᖅᑳᒪ ᐃᒡᓗᖓᓂ ᐊᓂᓇᓱᒃᖢᖓ. ᐅᖃᐅᓯᓕᕆᓂᕐᒧᑦ ᐃᓕᓐᓂᐊᕈᓐᓇᖅᓯᒐᒪ, ᓇᒻᒥᓂᖅ ᐊᑭᕋᖅᑐᓕᓚᐅᕋᒪ ᑕᒻᒪᕐᓂᕋᒪ. ᐊᒻᒪᓗ ᓂᕈᐊᑦᑕᐅᑎᒋᓚᐅᖅᑐᖓ ᐊᒻᒪᓗ, ᐃᖅᑲᓇᐃᔮᖅᑖᕐᓂᐊᕐᓂᕈᒪ, ᓄᖅᑲᕐᓂᐊᕐᓂᕋᒪ ᑕᒪᒃᑯᓂᖓ ᐊᒻᒪᓗ ᑲᖐᓱᑐᐃᓐᓇᔾᔮᖏᓐᓇᒪ."

"ᐊᕐᕌᒍᑦ 8−ᖑᓕᖅᑐᑦ ᓱᓐᓂᐅᒪᓕᖅᑐᖓ ᑭᓱᖃᙱᖦᖢᖓᓗ ᑭᓯᐊᓂ ᐱᐅᔪᑦ ᓴᖅᑭᓚᐅᖅᓯᒪᔭᒃᑲ ᑕᐃᒪᙵᓂᑦ. ᓂᑲᒍᓱᑦᑎᐊᖅᑰᔨᔪᖓ ᑕᒪᒃᑯᓂᖓ ᓴᖅᑭᓚᐅᖅᑐᓂᒃ ᐊᒻᒪ ᓇᖕᒥᓂᖅ ᑭᓇᐅᓂᓐᓂᒃ ᓇᓂᓯᓪᓗᖓ."

"ᐅᖃᖏᑦᑐᖓ ᐆᑦᑐᕋᖃᑦᑕᖏᓪᓗᓯ ᐅᕕᒃᑲᐅᒍᕕᑦ, ᓯᕗᓪᓕᖅᐹᑦᑎᐊᕐᒥ ᐃᓕᓐᓂᐊᕐᕕᔾᔪᐊᕐᒨᕆᐅᕐᓗᑎᑦ ᐊᒻᒪᓗ ᐃᓕᓐᓂᐊᕐᓗᑎᑦ ᐊᒻᒪᓗ ᓇᒻᒥᓂᖅ ᐃᓅᓗᑎᑦ, ᑭᓯᐊᓂ ᖃᐅᔨᒪᑦᑎᐊᕋᓱᐊᕐᓗᑎᑦ ᑲᒪᑦᑎᐊᕋᓗᐊᕐᒪᖔᖅᐱᑦ ᐊᒻᒪᓗ ᓯᓚᑐᔫᓗᑎᑦ."

ᐊᔪᕐᓇᖅᑐᖅᓯᐅᕈᑕᐅᒃᑲᓐᓂᓚᐅᕐᒥᔪᖅ ᐊᖏᕐᕋᒧᑦ ᐊᐅᓪᓚᕋᓱᒋᐊᒃᓴᖅ, ᑭᓯᐊᓂ ᑐᕙᐃᓐ ᐃᑲᔪᖅᑕᐅᔪᓐᓇᖅᓯᓚᐅᖅᐳᖅ ᓇᒡᓕᒋᔭᒥᓄᑦ. "ᓯᓚᑦᑐᖅᓴᕐᕕᒡᔪᐊᓕᐊᖅᑎᓪᓗᖓ, ᐃᓚᓐᓂᒃ ᕿᒪᒃᓯᓚᐅᖅᓯᒪᒐᒪ ᐃᖅᑲᐅᒪᓪᓗᖓᓗ ᑕᐃᔅᓱᒪᓂ ᑕᐃᒪᐃᑦᑐᓂᒃ ᐱᓕᕆᔾᔪᑎᖃᓪᓚᑦᑖᓚᐅᙱᓐᓇᑦᑕ, ᐅᕝᕙᓘᓐᓃᑦ ᐋᒃᑲᐅᒐᓗᐊᖅ. ᐊᖓᔪᖅᑳᒃᑲ ᐅᑕᖅᑭᑎᑕᐅᖏᓐᓇᖅᐸᓚᐅᕋᒪ ᐅᖄᓚᐅᑎᒃᑯᑦ. ᑭᓯᐊᓂ ᐃᖅᑲᐅᒪᔪᖓ ᐃᓄᑑᓪᓗᓂ ᐃᒃᐱᒍᓱᖕᓇᓚᐅᕐᒪᑦ, ᑭᓱᓪᓗ ᐃᑲᔪᓚᐅᕐᒪᖔᑕ ᐅᕙᓐᓂᒃ ᐊᓂᒍᐃᑎᓐᓇᓱᒃᖢᒋᓪᓗ ᐊᖓᔪᖅᑳᒃᑲ, ᐃᑲᔪᖅᓱᐃᑦᑎᐊᓚᐅᖅᑐᑦ. ᑕᐃᒃᓱᒪᓂ, ᐱᖃᓐᓇᕆᔭᓕᒫᒃᑲ, ᐅᖓᓯᑦᑐᒥ, ᓱᓕ ᐃᑲᔪᖅᑐᐃᓚᐅᕐᒥᔪᑦ ᖃᕋᓴᐅᔭᒃᑯᑦ. ᐊᐅᓚᔨᔪᖓ ᐱᙳᐊᕐᕕᓕᐊᕆᐊᒥ ᐊᒻᒪ ᐃᑲᔪᓪᓚᕆᓚᐅᕐᓱᓂ. ᖁᕕᐊᓇᖅ. ᖃᐅᔨᓕᓚᐅᖅᑐᖓ ᐃᓅᓯᕐᒪ ᓇᒡᓕᒋᓂᖓᓂᒃ ᓯᓚᑦᑐᖅᓴᕐᕕᒡᔪᐊᒦᑎᓪᓗᖓ. ᐊᒻᒪᓗ ᐊᐅᓪᓚᕋᒪ ᓯᓚᑦᑐᕐᓴᖅᕕᒻᒧᑦ, ᐊᑯᓂᒃ ᐱᓕᕆᖃᑎᒌᓚᐅᖅᑐᒍᑦ. ᐃᑲᔪᖅᑐᐃᑦᑎᐊᓚᐅᖅᑐᖅ ᐅᕙᓐᓂᒃ ᐃᑲᔪᑦᑎᐊᖅᖢᓂᓗ."

ᑐᕙᐃᓐ ᖃᐅᔨᒪᑦᑎᐊᓚᐅᕐᒥᔪᖅ ᖃᐅᔨᒪᑦᑎᐊᕋᓗᐊᕐᒪᖔᑦ ᑮᓇᐅᔭᒥᓂᒃ, ᐱᕕᖃᕐᓂᖓᓂᒡᓗ. "ᐃᖅᑲᐅᒪᔪᖓ ᑮᓇᐅᔭᖅᑖᒃᑲᓐᓂᕆᐊᒃᓴᖅ ᓲᖃᐃᒻᒪ ᑮᓇᐅᔭᖅ ᐊᔪᕐᓇᙱᓐᓂᖅᓴᐅᑎᑦᑎᖕᒪᑦ. ᑕᐃᒪᐃᑉᐳᖅ. ᐄ, ᑕᐃᒪ ᐱᕕᖃᒃᑲᓐᓂᑐᐃᓐᓇᕆᐊᖃᖅᑐᓯ ᑖᒃᑯᐊ ᑮᓇᐅᔭᐃᑦ ᐱᓇᓱᓪᓗᒋᑦ ᑭᓯᐊᓂ ᓯᓚᑐᔫᒍᕕᑦ... ᐃᖅᑲᐅᒪᔪᖓ ᓯᕗᓂᐊᒍᑦ ᖃᐅᔨᓴᓚᐅᖅᓯᒪᓪᓗᖓ ᖃᐅᔨᓴᖅᑕᐅᓚᐅᖏᓂᓐᓂ. ᑕᒪᓐᓇ ᐱᐃᓐᓇᓲᕆᒐᒃᑯ ᐱᓇᓱᐊᕈᓯᐅᓚᐅᖅᑐᒥᒃ ᖃᐅᔨᓴᓚᐅᖅᑎᓐᓇᖓ ᐊᒻᒪᓗ ᓴᐃᓕᑐᐃᓐᓇᕋᔭᖅᑐᖓ ᐊᒻᒪᓗ ᐱᔭᕆᐊᑭᑦᑐᑯᓘᓪᓗᖓ. ᐃᓄᐃᑦ ᐃᓱᒪᓚᐅᕐᒪᑕ ᖃᖅᑯᐊᒐᐅᓂᕋᖅᑐᑎᒃ ᐅᐱᓐᓇᕋᓂ ᖃᐅᔨᓴᓚᐅᙱᓐᓇᒪ ᐅᓐᓄᖓᓂ. ᑖᒃᑯᐊ ᑲᑎᒪᔾᔪᑎᒋᓚᐅᖅᑕᒃᑲ ᐱᔭᕇᓚᐅᕋᒃᑭᒃ ᐱᓇᓱᐊᕈᓯᐅᑉ ᐃᓗᐊᓂ, ᑖᒃᑯᐊ ᐋᖅᑭᒋᐊᖅᑕᐅᒋᐊᖃᓕᓚᐅᖅᓯᒪᒻᒪᑕ. ᐃᖅᑲᐅᒪᔪᖓ ᐃᓚᖓᑦ ᐃᓕᓴᐃᔨᒪ ᐅᖃᐅᑎᓚᐅᖅᓯᒪᒻᒫᖓ ᑎᑎᕋᑕᒫᑦ ᐋᖅᑭᒃᓱᐃᓕᕌᖓᕕᑦ, ᐃᓱᒪᒋᖃᑦᑕᖅᓯᐅᒃ. 5%-ᑲᓐᓂᐅᔮᖅᑐᖅ. ᑕᒪᓐᓇ ᐃᓱᒪᒌᓐᓇᓲᕆᒐᒃᑯ ᐊᒻᒪᓗ ᐱᔪᓐᓇᕐᓂᓕᒫᒃᑯᑦ ᐱᓇᓱᐊᖏᓐᓇᖅᑐᖓ. ᐊᑖᑕᒪ ᐅᖃᐅᑎᖃᑦᑕᖅᐹᖓ ᓯᕗᒻᒧᐊᒃᑎᑦᑎᖁᔨᓪᓗᓂ."

ᐊᒃᑐᐊᓂᕆᔭᐅᔪᖅ ᐅᑭᐅᖅᑕᖅᑐᒥ ᓯᕗᓂᒃᓴᒧᑦ ᐊᖅᑯᑎᓄᑦ ᐱᓕᕆᐊᒃᓴᖅ ᐃᓕᖕᓄᑦ ᑐᓂᔭᐅᕗᖅ TakingITGlobal−ᑯᓐᓄᑦ ᐃᑲᔪᖅᑐᖅᑕᐅᓪᓗᓂ ᕈᐃᐅᓪ ᐹᓐᒃ ᑐᙵᕕᖓᓂ. ᖁᔭᓐᓇᒦᑦᑎᐊᒻᒪᕆᒃ
ᑮᑦ ᑳᓕᐅᕐ ᐊᖏᖅᑎᑦᑎᓂᖓᓄᑦ ᑖᔅᓱᒥᖓ ᑎᑎᖅᑲᕐᒥᑦ.

‍