"ᓄᓇᖃᖅᑳᖅᓯᒪᔪᓂᒃ ᐃᓕᓴᐃᔨᖃᕆᐊᖃᖅᑐᒍᑦ ᓲᖃᐃᒻᒪ ᖃᐅᔨᒪᖕᒪᑕ ᐃᓚᖏᑦ ᑖᒃᑯᐊ ᓄᑕᖅᑲᑦ ᐱᓕᕆᖕᒪᑕ 10−ᖏᖅᓱᖅᖢᑎᒃ ᐊᔪᕐᓇᕐᓂᖅᓴᐅᓪᓗᑎᒃ ᐃᒡᓕᖃᕈᓐᓃᕋᓱᒋᐊᒃᓴᖅ ᐊᓯᖏᓐᓂᒃ ᓄᑕᖅᑲᓂᒃ ᐱᐊᓂᒃᓯᑐᐃᓐᓇᓲᑦ ᐱᓕᕆᐊᒥᓂᒃ ᐃᓕᓐᓂᐊᕐᕕᖕᒥ," ᐅᖃᓚᐅᖅᐳᖅ ᐃᐅᕆᒃ ᑖᓐ, ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓴᐃᔨᖓ ᕚᓐᑰᕙᒥ ᓄᓇᖃᖅᑐᖅ ᑭᓯᐊᓂ ᐱᕈᖅᓴᓚᐅᖅᑐᖅ ᕕᒃᑐᐊᕆᐊ ᐳᕆᑎᔅ ᑲᓚᒻᐱᐊᒥ. ᑖᓐ ᐃᖅᑲᓇᐃᔭᖅᑐᖅ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᓂᓕᕆᓂᕐᒥ ᐃᖅᑲᓇᐃᔭᕐᕕᖕᒥ ᕚᓐᑰᕙ ᐃᓕᓐᓂᐊᕐᕕᖕᒥ ᑲᑎᒪᔨᖏᓐᓂ. 

ᐊᓈᓇᖓᑕ ᖃᑕᙳᑎᖏᑦ ᒧᕼᐊᒃ 6-ᓂᑦ ᓄᓇᓕᕐᔪᐊᓂᑦ ᐊᒻᒪᓗ ᐊᑖᑕᖓᑕ ᖃᑕᙳᑎᖏᑦ ᓅᓚᐅᖅᑐᑦ ᐃᖕᓚᓐᒥᑦ. ᑖᓐ ᐊᓈᓇᖓ ᓅᓚᐅᖅᑐᖅ ᐳᕆᑎᔅ ᑲᓚᒻᐱᐊᒧᑦ ᐃᓄᓕᕆᔨᙳᖅᖢᓂ ᐅᑭᐅᖃᕐᖢᓂ 18−ᓂᒃ, ᓄᖅᑲᖓᔪᒪᓪᓗᓂ ᐊᒃᓱᕈᕐᓇᖅᑐᓂᑦ ᓴᓂᕐᕙᒃᓯᒪᔭᖓᓂ ᓂᕆᐅᒃᖢᓂᓗ ᐊᓯᔾᔨᕐᓂᐊᕐᓂᕐᒥᒃ. ᐱᕈᖅᓴᓪᓗᓂ, ᐊᓈᓇᖓ ᐃᓕᓴᐃᓚᐅᖅᑐᖅ ᐱᒻᒪᕆᐅᒋᔭᒥᓂᒃ ᑭᓯᐊᓂ ᒫᓐᓇ ᐃᓕᑦᑎᕙᓪᓕᐊᓕᖅᑐᖅ ᐃᓕᖅᑯᓯᕐᒥᓂᒃ. ᐊᑯᓂᒻᒪᕆᒃ ᐱᖓᓐᓇᖅᐸᓯᐊᓃᓚᐅᖅᓱᓂ, ᐃᓕᑉᐹᓕᔪᔪᖅ ᓄᓇᓕᓐᓂ ᐃᖅᑭᓖᑦ ᐱᐅᓯᖏᓐᓂᒃ ᐊᒻᒪᓗ ᕿᓂᖅᓱᓂ ᐊᖏᓪᓕᒋᐊᕆᒍᒪᑦᓱᓂ ᖃᐅᔨᒪᓂᕐᒥᓂᒃ ᐊᒻᒪᓗ ᖃᐅᔨᒃᑲᓐᓂᕈᒪᑦᓱᓂ ᒧᐊᕼᐊᒃ ᐱᒋᐊᕐᕕᒥᓂᖏᓐᓂᒃ. 

ᓯᕗᓪᓕᕐᒥ, ᐃᓱᒪᓚᐅᖅᑐᖅ ᐃᓕᓐᓂᐊᕐᓂᐊᖅᑐᒋᓪᓗᓂ ᑐᓴᐅᒪᖃᑦᑕᐅᑎᓕᕆᓂᕐᒥᒃ ᐊᒻᒪᓗ ᐱᒋᐊᓪᓚᕆᓚᐅᕋᓂ ᐃᓕᓐᓂᐊᕕᔾᔪᐊᒥ ᐸᐃᑉᐹᒥᒃ ᑭᓯᐊᓂ 30-ᖏᓐᓂ. ᐱᓕᕆᖃᑎᖃᓚᐅᖅᑎᓪᓗᒍ ᓱᕈᓯᕐᓂᒃ ᑎᒍᐊᙳᐊᖑᕙᑦᑐᓂᒃ ᐊᒻᒪᓗ ᐱᕈᖅᓴᖃᑎᖃᖅᑐᓂ ᐃᓕᓴᐃᔨᒥᒃ ᐊᑖᑕᒥᓄᑦ, ᐃᓕᓴᐃᔨᕈᕈᒪᓕᓚᐅᖅᑐᖅᑕᐅᖅ. ᐃᓕᓴᐃᔨᐅᓂᕐᒧᑦ ᐃᓕᓴᕆᔭᐅᔾᔪᑎᑖᓚᐅᖅᑐᖅ ᑕᐅᑐᖑᐊᕐᓂᕐᒧᑦ, ᖁᕕᐊᒋᑦᑎᐊᖅᑕᖓ ᐃᓕᓴᐃᔨᐅᓂᕐᒧᑦ ᐃᓕᑕᕆᔭᐅᔾᔪᑎᑖᕈᓐᓇᕋᓱᒋᓪᓗᓂᐅᒃ. 

ᑖᓐ ᒪᒃᑯᒃᑐᓂᒃ ᐱᖃᑎᖃᕈᒪᓚᐅᖅᑐᖅ, ᐃᓐᓇᕐᓂᒃ ᓂᐸᓱᒃᑎᑦᑎᔪᒪᓪᓗᓂ. ᒫᓐᓇᓕ ᖁᔭᓕᓂᖅᓴᐅᓕᖅᑐᖅ ᐃᓐᓇᕐᓂᒃ ᑭᓯᐊᓂ ᐅᓪᓗᖏᑦ ᑐᐊᕕᖅᓴᕋᐃᑉᐸᒻᒪᑕ ᐊᒻᒪᓗ ᓂᑲᒍᓱᑉᐸᒐᑎᒃ ᐃᖅᑲᓇᐃᔭᖅᑎᓪᓗᒍ ᑎᑦᑎᓇᖅᑐᓂᒃ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᖅᑎᓂᒃ. ᐱᓕᕆᔪᖅ ᓯᓐᓇᑦᑑᒪᒋᔭᒥᓂᒃ ᐱᓕᕆᓪᓗᓂ ᖁᕕᐊᓇᖅᑐᒥᒃ, ᐃᓕᓴᐃᖃᑦᑕᖅᓯᒪᓪᓗᓂ ᐊᓯᖏᓐᓂᒃ ᐃᓕᓐᓂᐊᕐᕕᖕᓂᒃ ᓇᓂᓯᓚᐅᙱᓐᓂᕐᒥᓂ ᐱᓕᕆᐊᒃᓴᒥᒃ ᓄᓇᖃᖅᑳᖅᑐᑦ ᐃᓕᓐᓂᐊᖅᑎᑕᐅᓂᖏᓐᓂᒃ. 

ᓇᑉᐸᑲᓴᑦᑎᐊᖏᑦ ᐃᓕᓐᓂᐊᖅᑏᑦ ᒫᓐᓇ ᐃᓕᓐᓂᐊᕐᕕᖕᒥ ᓄᓇᖃᖅᑳᖅᓯᒪᕗᑦ ᐊᐅᓚᑦᑎᔩᓪᓗ ᒪᑐᐃᙶᖅᖢᑎᒃ ᐊᓯᔾᔨᖅᓯᔪᓐᓇᖅᖢᑎᒃ ᐃᓱᒪᒋᔭᐅᔪᓂᒡᓗ. ᐃᓗᐊᓂ ᓄᓇᓕᐸᐅᔭᐅᑉ ᐃᓕᓐᓂᐊᕐᕕᖓ ᐊᑦᓱᕈᓐᓇᖅᑐᖅᓯᐅᖃᑦᑕᖅᑐᖅ ᐊᒥᓱᓪᓗ ᐃᓕᓐᓂᐊᖅᑎᖏᑦ ᐊᑦᑐᖅᑕᐅᓯᒪᔪᑦ ᐃᓄᐊᖅᑕᐅᓯᒪᔪᓄᑦ ᐊᓯᐅᓯᒪᔪᓄᓪᓗ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᓂᕕᐊᖅᓯᐊᓄᓪᓗ ᐊᐃᑦᑐᐃᓂᕐᒧᑦ. ᐊᓯᔾᔨᕐᔪᐊᕐᓂᖃᖅᐳᖅ ᐃᓕᓐᓂᐊᕐᕕᖕᒥ ᓄᓇᓕᖕᓂ ᓄᓇᓖᑦ ᖃᓂᒋᔮᓃᖦᖢᓂ ᑲᓇᖕᓇᖅᐸᓯᐊᓂ, ᐱᔭᕆᐊᖃᕐᔪᐊᖅᑐᖅ. 

ᐃᓱᒪᓪᓗᓂ ᓇᖕᒥᓂᖅ ᐊᑐᖅᓯᒪᔭᒥᓄᑦ, ᑖᓐ ᐃᓕᓴᐃᔨᖃᑦᑎᐊᓚᐅᖅᑐᖅ ᓄᑲᖅᖡᑦ ᐃᓕᓐᓂᐊᕐᕕᖕᒥ. ᐊᒥᓱᑦ ᐃᓕᓴᐃᔩᑦ ᐱᐅᑦᑎᐊᓚᐅᖅᑐᑦ ᑭᓯᐊᓂ ᐊᓯᖏᑦ ᐃᓱᒪᐃᓐᓇᓚᐅᖅᑐᑦ. ᐃᓕᓐᓂᐊᕐᕕᐊᓗᒻᒥ, ᖁᕕᐊᓱᒍᓐᓃᓚᐅᖅᑐᖅ. ᐃᓕᓐᓂᐊᕌᓂᙱᖦᖢᓂ ᐃᓕᓐᓂᐊᖃᑦᑕᕐᓂᖓ ᐱᐅᓂᖅᓴᐅᓚᐅᖅᑐᖅ. 

ᐃᓕᓐᓂᐊᖃᑕᐅᓚᐅᖅᑐᖅ ᐃᓕᓴᐃᔨᙳᕆᐅᖅᓴᔪᓂᒃ ᕕᒃᑑᕆᐊ ᓯᓚᑦᑐᖅᓴᕐᕕᒡᔪᐊᖓᓂ ᐱᐅᔪᓐᓃᖅᑎᑦᑎᓚᐅᖅᐳᖅ ᐊᒻᒪ ᑖᓐ ᑕᑯᓚᐅᖅᐳᖅ ᐱᑕᖃᙱᓐᓂᐅᔪᓂᒃ ᐅᖃᐅᓯᕐᓂᒃ ᐊᒻᒪ ᐅᑎᑐᐃᓐᓇᖅᑐᓂᒃ ᐱᓕᕆᔪᓂᒃ, ᐅᕕᓂᖃᑎᒋᙱᑕᒥᓂᒃ ᐊᑭᕋᖅᑐᖅᑐᓂᒃ ᐊᒻᒪ ᑐᓗᖅᑕᕈᑎᓂᒃ ᓇᓂᓯᓪᓗᑎᒃ. ᓴᐱᓕᕈᒪᓚᐅᕐᒪ ᑭᓯᐊᓂ ᓯᕗᒧᐊᒋᐊᓚᐅᖅᑐᖅ ᓇᒻᒥᓂᖅ ᐱᓂᕐᓗᑦᑐᖃᕋᓗᐊᖅᑎᓪᓗᒍ. ᐃᓕᓴᐃᔨᕈᕈᓐᓇᖅᓯᓚᐅᖅᑐᖅ.

ᓇᖕᒥᓂᖅ ᐃᓕᓴᐃᔾᔪᓯᕆᕙᒃᑕᒥᓂᒃ, ᑖᓐ ᐃᓕᑦᑎᔾᔪᑎᒥᓂᒃ ᑐᓴᕈᒥᓇᖅᑎᑦᑎᔪᒪᕗᖅ ᐊᒃᑐᐊᓂᖃᑦᑎᐊᖅᖢᓂᓗ ᐃᓕᓐᓂᐊᖅᑎᓄᑦ, ᐃᓱᒪᓪᓗᓂ ᓯᓚᑖᓂ ᑭᑉᐹᕆᒃᑐᒥ. ᖃᐅᔨᒪᔪᖅ ᐃᓱᒪᒋᔭᖓ ᐱᒻᒪᕆᐅᒋᐊᖓᓂᑦ ᐃᓕᓐᓂᐊᕐᕕᒻᒥᑦ. "ᐃᓚᖏᑦ ᑖᒃᑯᐊ ᓄᑕᖅᑲᑦ ᐃᓕᓐᓂᐊᕆᐊᑐᐃᓐᓇᓲᑦ ᑲᒪᓇᖅᑐᒻᒪᕆᐅᕗᖅ ᑐᑭᓯᐅᒪᓪᓗᓂᓗ ᖃᓄᖅ ᖁᐊᖅᓵᖅᓯᒪᓂᖅ ᐅᕝᕙᓘᓐᓃᑦ ᖃᓪᓗᓈᖑᖃᑎᒌᙱᑦᑐᑦ ᐅᕝᕙᓘᓐᓃᑦ ᑐᑭᓯᐅᒪᖕᒪᖔᑕ ᖃᓄᖅ ᑕᐅᑐᖕᒪᖔᑕ ᓄᓇᕐᔪᐊᕐᒥ ᓄᓇᖃᖅᑳᖅᓯᒪᔪᑦ ᓱᕈᓯᖏᓐᓂᒃ, ᐃᑲᔪᓲᕆᖃᑦᑕᖅᑕᒃᑲ. ᐃᓅᓯᓐᓂ ᐊᑐᖅᓯᒪᔭᓕᒫᒃᑲ, ᖁᐊᖅᓵᖓᓇᖅᑐᒃᑰᕈᑎᒋᖃᑦᑕᖅᓯᒪᔭᒃᑲ, ᑐᑭᖃᖅᑐᐃᓐᓇᐅᒻᒪᑕ, ᐱᓪᓗᒍ ᐱᓱᒍᓐᓇᓕᕋᒪ, ᐅᖃᓕᒪᑐᐃᓐᓇᖏᑦᑐᖓ," ᑖᓐ ᑲᔪᓯᓪᓗᓂ.  

ᑲᒪᒋᑦᑎᐊᕐᓗᒍ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᖓ, ᑖᓐ ᐃᖃᐃᓕᓴᕐᓂᖓ ᐊᒻᒪ ᐅᒃᐱᕐᓂᓕᕆᒐᔪᒃᖢᓂ, ᐃᒻᒥᓂᒃ ᐃᓱᒪᒋᔪᓐᓇᑦᑎᐊᕐᖢᓂᐅᒃ, ᐅᒃᐱᕐᓂᓕᕆᙱᖔᕐᖢᓂ. ᑕᒪᓐᓇ ᑕᐅᑐᒐᕆᓪᓗᐊᑕᖅᑕᖓ ᐃᓕᓐᓂᐊᕐᕕᐅᑉ ᐃᓪᓗᕈᓯᖓᓐᓅᕋᓱᐊᖅᐸᒃᑭᓪᓗᓂ. "ᐃᓕᓐᓂᐊᖅᑎᖃᑦᑕᖅᑕᕗᑦ ᓄᑕᖅᑲᑦ ᖃᓄᖅ calculus-ᒥᒃ ᐃᓕᓐᓂᐊᖅᑎᑦᑎᓲᖑᖕᒪᖔᑦᑕ, ᐃᓕᓐᓂᐊᖅᑎᑉᐸᒃᑕᕗᑦ ᖃᐅᔨᓴᖅᑐᓕᕆᓂᕐᒥᒃ, ᐃᓕᓐᓂᐊᖅᑎᑉᐸᒃᑕᕗᑦ PE, ᖃᓄᑭᐊᖅ, ᑭᓯᐊᓂ ᐃᓕᓐᓂᐊᖅᑎᑉᐸᙱᖦᖢᑎᒍᑦ ᖃᓄᖅ ᐃᒻᒥᓂᒃ ᖃᐅᔨᒪᔪᓐᓇᕐᒪᖔᑕ ᑕᒪᓐᓇᓗ ᐃᓕᓐᓂᐊᖅᑎᑦᑎᔾᔪᑕᐅᖏᓐᓇᐅᔭᙱᖦᖢᓂ ᐊᖏᕐᕋᒥ... ᐃᓕᓐᓂᐊᖅᑎᓐᓇᓱᑐᐃᓐᓇᖅᑕᒃᑲ ᓄᑕᖅᑲᑦ ᑭᓱᓂᒃ ᖃᓄᐃᙱᑦᑎᐊᖅᑎᑦᑎᕙᖕᒪᖔᕐᒪ ᓄᓇᖃᖅᑳᖅᓯᒪᑎᓪᓗᖓ," ᐊᒃᑐᐊᓂᖃᖅᑐᖅ. ᐊᒃᓱᕈᖅᑎᓪᓗᒋᑦ ᐃᓕᓐᓂᐊᖅᑎᖏᑦ ᖃᑕᙳᑎᖏᑦ ᐃᓅᓇᓱᑐᐃᓐᓇᖅᑎᓪᓗᒋᑦ ᐅᕝᕙᓘᓐᓃᑦ ᐸᖅᑭᔨᐅᔪᑦ ᐃᓕᑦᑎᓯᒪᙱᑐᐃᓐᓇᕆᐊᖃᖅᑎᓪᓗᒋᑦ ᓇᖕᒥᓂᖅ, ᓇᖕᒥᓂᖅ ᐊᑐᖁᒐᓗᐊᖅᐸᖏᑦ ᐊᑐᖅᓯᒪᔭᒥᓂᒃ ᑐᓴᖅᑎᑦᑎᓗᓂ. 

ᐃᓕᓴᐃᔨᐅᓪᓗᓂ ᑲᔪᖏᖅᓴᐃᓂᖓ ᓱᕈᓯᐅᓪᓗᓂ ᐊᒻᒪ ᓄᓇᖅᑲᑎᖓ ᓴᓇᓯᒪᕗᖅ ᐃᒡᓗᕈᓯᖓᓂ ᓱᕈᓰᑦ ᑕᒧᓗᒐᒃᓴᖃᕈᓐᓇᖅᖢᑎᒃ, ᐊᑦᑕᕐᓇᙱᑦᑐᒥᑦ, ᖁᕕᐊᓇᖅᑐᒥᑦ ᐅᖃᓪᓚᒡᕕᒋᔪᓐᓇᖅᑕᒥᓂᑦ ᐃᓱᒪᒥᓂᒡᓗ ᐊᒻᒪ ᓱᓕ ᑭᒡᓕᓕᐅᖅᓯᒪᓗᑎᑦ. ᓴᖅᑮᓯᒪᕗᑦ ᐃᓂᒃᓴᒥᒃ ᒪᓕᒐᖃᖅᑐᑎᒃ ᑐᑭᖃᖅᑐᓂᒃ ᑕᐃᒃᑯᐊᖑᙱᖔᖅᑐᑦ ᐋᖅᑭᑦᑕᐅᓯᒪᔪᑦ ᐊᑯᓂᒻᒪᕆᒃ ᓈᒻᒪᒐᓱᒋᕙᙱᑕᖏᓐᓄᑦ. ᐊᐅᓚᑦᑎᔪᖅ ᐊᓯᔾᔨᖅᑐᓄᑦ ᑕᐅᑐᒃᑎᖏᓐᓄᑦ ᐊᒻᒪ ᐃᓄᖕᓄᑦ ᐱᓕᕆᔪᓄᑦ ᐊᒃᓱᕈᕐᓇᖅᑐᒃᑯᑦ, ᐃᑲᔪᖃᑦᑕᐅᑎᓂᒃᑯᑦ ᐊᒃᓱᕈᕐᓇᖅᑐᒃᑯᑦ. ᑕᒪᒃᑯᐊ ᓱᕈᓯᐅᔪᑦ ᐅᖃᖃᑦᑕᕐᒪᑕ ᐃᓱᒪᒥᓂᒃ ᐊᖏᕐᕋᕋᐃᒻᒪᑦ ᐊᒻᒪᓗ ᐅᖅᓱᐊᓗᒻᒥ ᐱᑎᑦᑐᓂᐅᒃ.  

ᒪᒃᑯᖕᓂᖅᓴᒥᒃ ᑐᓴᖅᑎᑦᑎᔪᓐᓇᕈᓂ "ᐃᓱᒫᓗᒋᙱᓪᓗᒍ," ᐊᓈᓇᖓᑕ ᑐᓴᖅᑎᑦᑎᔾᔪᑎᖓ ᓯᓐᓇᒃᑑᒪᑎᓚᐅᖅᑕᖓ ᒫᓐᓇᓵᒃᑯᑦ. ᒪᒃᑯᖕᓂᖅᓴᖅ ᖃᐅᔨᒪᖁᓇᔭᖅᑕᖓ ᐃᓱᒫᓗᖕᓂᖅ ᐊᒃᓱᕈᕐᓇᑐᒃᑰᕈᑎᒋᔾᔮᙱᓐᓇᕕᐅᒃ, ᖃᓄᐃᙱᖦᖢᓂᓗ ᐅᔾᔨᕈᓱᒋᐊᒃᓴᖅ ᐊᒃᓱᕈᕐᓇᖅᑐᓂᒃ ᐃᓱᒫᓘᑎᖃᕐᓗᓂᓗ ᑭᓯᐊᓂ ᐅᔾᔨᖅᓱᖁᔨᕗᖅ ᐊᓯᐅᔨᖁᔨᙱᖦᖢᓂ ᐃᓱᒫᓗᖕᓂᕐᒥᒃ ᓂᕆᐅᙱᖦᖢᓂ ᖁᕕᐊᓱᙱᖦᖢᓂ. 

ᒪᒃᑯᒃᑐᑦ ᑲᔪᖏᖅᓴᕈᒪᓪᓗᒋᑦ, ᐅᖃᕈᒪᖕᒪᑦ, "ᓇᒡᓕᒋᔭᑎᑦ ᐱᓕᕆᐊᕆᓗᒋᑦ. ᓇᓪᓕᒋᔭᖃᕈᕕᑦ, ᐱᓕᕆᔪᓐᓇᖏᒃᑲᓗᐊᕈᕕᑦ, ᐱᓕᕆᐊᕆᑐᐃᓐᓇᕐᓗᒍ. ᐱᓕᕆᐊᕆᐊᓂᒃᑳᖓᕕᐅᒃ, ᐱᓕᕆᐊᕆᖅᑳᕐᓗᒍ ᐅᕝᕙᓘᓐᓃᑦ ᓇᓂᓯᓗᑎᑦ ᖃᓄᖅ ᑕᒪᓐᓇ ᐱᓕᕆᐊᕆᔪᓐᓇᕐᒪᖔᑦ. ᖃᐅᒃᐸᑦ ᑕᐃᒪᐃᓕᐅᖅᑕᐃᓕᒋᑦ, ᓲᖃᐃᒻᒪ ᖃᐅᔨᒪᙱᓐᓇᕕᑦ ᖃᓄᐃᓐᓂᐊᕐᒪᖔᑦ." 

ᑐᓴᖅᑎᑦᑎᔪᒪᖕᒥᔪᖅ ᑕᐅᓄᙵᕈᓂ, ᐃᓱᒪᓪᓗᓂ ᕌᐱᓐ ᐅᐃᓕᐊᒻᔅ ᐅᖃᖅᖢᓂ "ᐃᓅᓯᖅ ᐊᓯᒥᒎᖓᖕᒪᑦ." ᑖᓐᓇ ᐆᒻᒪᕆᖕᓂᐅᔪᖅ ᐃᓱᒪᓪᓗᓂᓗ ᖃᓄᐃᓕᐅᕈᓐᓇᕐᒪᖔᑦ ᐊᓯᒥᓄᑦ. ᐱᔨᑦᑎᕋᕐᓂᒃᑯᑦ ᐃᑲᔪᖃᑦᑕᖅᑐᖅ ᐊᒃᑕᑰᓯᕝᕕᖕᒦᑎᖦᖢᒍ ᓂᑲᓪᓗᖓᑎᖦᖢᒍᓗ. 

ᓄᓇᖃᖅᑳᖅᓯᒪᔪᓄᑦ ᐃᓕᓴᐃᔨᐅᓪᓗᓂ ᓄᓇᓕᐸᐅᔭᐅᑉ ᐃᓕᓐᓂᐊᕐᕕᖓᓂ, ᐃᐅᕆᒃ ᑖᓐ ᖃᐅᔨᒪᔪᖅ ᓂᐱᖓᓂᒃ ᑕᐅᑐᒃᑕᖏᓐᓂᒃᓗ ᐱᔭᕆᐊᓕᒃ. ᖃᐅᔨᒪᓪᓗᓂ ᐊᕝᕕᐊᕈᑎᐅᔪᓂᒃ ᐃᓕᓐᓂᐊᖅᑎᖁᑎᖏᑕ ᓵᖓᔭᖏᓐᓂ ᐃᑲᔪᖃᑦᑕᖅᑐᖅ ᐃᓕᓴᐃᔨᑦᑎᐊᕙᐅᓂᕐᒥᒃ ᐱᕈᖅᐸᓪᓕᐊᔭᕆᐊᖃᖅᑕᒥᓂᒃ. ᐃᓱᒪᓪᓗᓂ ᓯᓚᑖᓂ ᑭᑉᐹᕆᒃᑐᖅ ᐃᓗᐊᓂ ᓄᓇᓕᐸᐅᔭᐅᑉ ᐃᓕᓐᓂᐊᕐᕕᖓᓂ ᓇᑉᐸᐃᓐᓇᖓᓂᒃ ᑕᑕᖦᖢᓂ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᖏᓐᓂᒃ, ᐃᖅᑲᓇᐃᔮᕆᔪᒪᔭᒥᓂᒃ ᕿᒪᐃᖃᑦᑕᖅᑐᖅ ᖃᐅᑕᒫᑦ ᐆᒻᒪᑎᓕᒫᖓᒍᑦ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.