"ᖁᕕᐊᒋᐃᓐᓇᐅᔭᖅᑕᕋ ᐃᑲᔪᕐᓂᖅ ᐃᓄᖕᓂᒃ. ᑕᒪᓐᓇ ᐱᓕᕆᐊᕆᔪᒪᒐᒃᑯ," ᐄᑕᓐ ᔭᐅᑦᓗ. ᔭᐃᑦᓗ ᔭᓗᓇᐃᒥ ᓄᓇᖃᖅᑐᖅ, ᓄᓇᑦᓯᐊᕐᒥ ᐊᒻᒪᓗ ᐅᐸᓗᖓᐃᔭᖅᐸᓪᓕᐊᓪᓗᓂ ᓯᓚᑦᑐᓴᕐᕕᔾᔪᐊᖓᓄᑦ ᓂᐅ ᐳᕋᓐᔅᐅᐃᒃᒥ ᐃᖅᑲᓇᐃᔮᖃᕋᓱᐊᖅᑎᓪᓗᒍ ᐋᓐᓂᐊᓯᐅᖅᑎᐅᓂᕐᒧᑦ. ᐱᔪᒪᓛᖑᔪᖅ ᐋᓐᓂᐊᕕᖕᒥ ᑐᐊᕕᕐᓇᖅᑐᒃᑰᕆᐊᖃᕐᓂᕐᒥᒃ ᐃᓗᐊᖅᓴᐃᔨᓂᒃ ᐊᑐᕈᒪᓪᓗᓂᓗ ᑐᐊᕕᕐᓇᖅᑐᒃᑯᑦ ᐊᐅᓪᓚᖅᑎᑦᑎᓂᕐᓂ ᐃᖅᑲᓇᐃᔮᖏᓐᓂ, ᐃᓱᒪᓪᓗᓂ ᖁᕕᐊᓇᕐᓂᐊᕐᓂᖓᓂᒃ ᐃᓚᐅᖃᑕᐅᓗᓂᓗ ᐃᑲᔪᕐᓗᖏᑦ ᐊᓯᑎᑦ.

ᖃᑕᙳᑎᖏᑦ ᕿᑭᖅᑖᓗᖕᒥᙶᖅᑐᑦ ᓄᓇᕗᒻᒥ, ᐊᐅᔭᒃᑯᑦ ᓄᑕᕋᐅᔪᒪᑦᑎᐊᓚᐅᖅᑐᖅ. ᓇᑭᑐᐃᓐᓈᓚᐅᖅᑐᖅ ᑲᓇᑕᒥ ᓱᕈᓯᐅᓂᕐᒥᓂ ᐱᔾᔪᑎᒋᓪᓗᒍ ᐊᑖᑕᖓ ᐸᓖᓯᐅᒐᒥ, ᑭᓯᐊᓂᓕ ᐊᒥᓱᐊᖅᑎᖅᑐᓂ ᔨᐊᓗᓇᐃᒦᓚᐅᖅᑐᖅ. ᑕᕝᕘᓇ ᐊᖏᕐᕋᕆᓇᓱᑦᑕᖓ, ᐃᓅᖃᑎᒥᓄᑦ ᑲᓲᒪᖃᑎᖃᖅᑐᒻᒪᕆᐅᓪᓗᓂ ᐃᓄᓐᓂᒃ ᐱᐅᔪᐊᓘᓱᒋᓪᓗᓂᐅᒃ.

ᐊᒥᓲᕗᑦ ᐋᓐᓂᐊᓯᐅᖅᑏᑦ ᐃᓚᒥᓐᓂ ᓇᓪᓕᒋᔭᓖᑦ ᖃᓄᐃᓕᐅᖃᑦᑕᕐᓂᕐᒥᓂᒃ ᐊᒻᒪᓗ ᐃᑲᔪᕈᒪᓪᓚᕆᑉᐸᑦᑐᓂ ᐃᓄᓐᓂᒃ ᐃᖅᑲᓇᐃᔮᖏᓐᓂ. ᐱᓇᓱᐊᖅᑕᖓ ᐱᒡᒐᓇᖅᑐᒻᒪᕆᐅᓚᐅᖅᐳᖅ ᐱᓪᓗᒍ ᐊᑭᑦᑐᕋᐅᑎᔪᒻᒪᕆᐅᒻᒪᑦ, ᐊᔅᓱᕈᖅᑐᓂ ᐃᖅᑲᓇᐃᔭᕆᐊᖃᓚᐅᖅᐳᖅ ᖁᑦᑎᓂᖅᓴᓄᑦ ᐃᓕᓐᓂᐊᖅᑎᓄᑦ, ᐊᒥᓱᐊᖅᑎᖅᑐᓂ ᐃᓕᓐᓂᐊᖅᑐᓂ ᐃᓕᓐᓂᐊᕆᐊᕈᓐᓇᖅᓯᖁᓪᓗᒍ. ᑕᐃᒪᓕ ᐊᖏᖅᑕᐅᓯᒪᓕᕐᒪᑦ ᓯᓐᓇᑦᑑᒪᒋᔭᒥᓄᑦ, ᐃᓱᒪᑦᑎᐊᓕᓚᐅᕐᒪᑦ ᐊᒃᓱᕈᕐᓂᓕᒫᒥᓂᒃ.

ᐊᖓᔪᖅᑲᐅᑎᐅᓂᖅᓴᓅᖅᑐᓂ, ᖃᐅᔨᒪᓚᐅᙱᒻᒪᑦ ᑭᓲᔪᒪᒻᒪᖔᖅ, ᑭᓯᐊᓂ ᖃᐅᔨᒪᓚᐅᖅᑐᖅ. ᐅᖃᖃᑎᖃᓚᐅᖅᑐᖅ ᐃᓕᓴᐃᔨᒥᓂᒃ ᐃᑲᔪᖅᑐᐃᑦᑎᐊᓚᐅᖅᑐᓂᒃ ᐊᒻᒪᓗ ᐃᑲᔪᕈᒪᓪᓗᓂ ᐱᔭᕆᐊᖃᕈᓂ ᐃᓕᓐᓂᐊᕐᓇᐅᒍᓐᓃᑎᓪᓗᒍ. ᑕᒪᓐᓇ ᐃᑲᔪᖅᑐᖅᑕᐅᒃᑲᓐᓂᕐᓂᐅᔪᖅ ᖁᕝᕙᐹᓪᓕᕈᑕᐅᓚᐅᖅᑐᖅ ᐱᓇᓱᐊᑦᑎᐊᕐᓂᐊᕐᓗᓂ ᒍᕆᑦ 12-ᓂᒃ. "ᐃᓕᓴᐃᔩᑦ ᐊᑐᐃᓐᓇᐅᖏᓐᓇᐅᔭᖅᑐᑦ ᐃᓕᖕᓂᒃ ᐃᑲᔪᕐᓂᐊᕐᓗᑎᒃ," ᖁᖓᖦᖢᓂ. ᓯᓚᑖᓂ ᐃᓕᓐᓂᐊᕐᓇᐅᑉ, ᐃᓕᓴᐃᔨ ᑎᓕᐅᕆᓚᐅᖅᑐᖅ ᔭᐃᑦᓗᒥᒃ ᐆᑦᑐᖁᔨᓪᓗᓂ ᑲᓇᑕᒥ ᐱᙳᐊᕕᔾᔪᐊᕐᓂᕐᒧᑦ ᑕᐃᒪᓕ ᐃᓱᒪᓕᐅᓕᓚᐅᖅᑐᖅ ᖃᐅᔨᒋᐊᕐᓗᓂ ᖃᓄᐃᓕᐅᓚᐅᕐᒪᖔᖅ. ᓴᓇᓚᐅᖅᑐᖅ ᐊᒻᒪᓗ ᐱᔪᓐᓇᑎᐊᖅᑐᓂ ᐊᑭᑦᑐᕋᐅᑎᖃᑕᐅᓂᐊᖅᑐᖅ ᓂᒐᕋᒥ.

ᐃᓕᓴᐃᔨᖏᑦ ᑖᒃᑯᑑᓚᐅᙱᑦᑐᑦ ᐃᑲᔪᓚᐅᖅᑐᑦ ᑕᐅᕗᙵᖅᐸᓪᓕᐊᓪᓗᑎᒃ, ᐃᓄᑑᔭᕆᐊᖃᙱᖦᖢᓂᓗ. "ᐊᕙᓗᔭᐅᓯᒪᕗᖓ ᑖᒃᑯᓄᖓ ᐃᓄᖕᓄᑦ ᒪᒃᑯᒃᑑᓪᓗᑎᒃ ᐊᒻᒪ ᐃᓱᒪᒃᓴᖅᓯᐅᕈᓐᓇᑦᑎᐊᖅᑐᑦ, ᓲᕐᓗ ᐊᖓᔪᒐᑎᑐᑦ, ᐊᔾᔪᒥᓇᕆᑦᑎᐊᖅᑕᕋ ᑖᒃᑯᓄᖓ ᐃᓕᓐᓂᐊᖅᑕᐅᔪᒃᓴᓄᑦ. ᐃᓕᕝᕕᒋᓚᐅᖅᑕᕋ ᖃᓄᖅ ᐊᒃᓱᕈᕆᐊᔅᓴᖅ, ᐅᐱᓐᓇᕋᓂ ᑕᐃᒪᐃᑦᑐᓴᐃᓐᓇᐸᓗᒻᒥᒃ ᐊᑐᓚᐅᕐᒪᑦ. ᐱᐅᕗᖅ ᐃᑲᔪᖅᑐᖅᑕᐅᓪᓗᓂ ᐃᓚᒌᓄᑦ," ᑕᐃᒪᓐᓇ ᐅᖃᖅᖢᓂ. ᓇᔭᖓ ᑎᒥᒥᙶᖅᑐᓂᒃ ᖃᐅᔨᓴᖅᑐᓕᕆᓂᒃᑯᑦ. ᕿᑐᕐᖓᖓ ᖃᑕᙳᑎᖏᑕ, ᔭᐃᑦᓗ ᒪᕐᕉᖕᓂᒃ ᐊᖓᔪᓕᒃ ᐊᖓᔪᖓᓗ. ᐃᓚᖓᑦ ᓇᔭᖓᑕ ᐃᓕᓐᓂᐊᕆᐊᓚᐅᖅᑐᖅ ᐋᓐᓂᐊᓯᐅᖅᑎᕈᕋᓱᐊᖅᑐᓂ ᑭᓯᐊᓂ ᓇᓂᓯᓕᓚᐅᖅᑐᖅ ᐊᕙᑎᓕᕆᓂᕐᒧᑦ ᖃᐅᔨᓴᖅᑐᓕᕆᓂᕐᒥᒃ.

ᐅᖃᐅᔾᔪᐃᓂᖓ ᑭᓇᒧᒃᑭᐊᖅ ᐃᓱᒪᓚᐅᖅᑐᒧᑦ ᐊᐅᓪᓚᕆᐊᒃᓴᖅ ᓄᓇᒥᓂᒃ ᓯᕗᓪᓕᖅᐹᑦᑎᐊᒥᒃ ᐃᓕᓐᓂᐊᕐᓂᕐᒥᒡᓘᓐᓃᑦ ᑲᓇᑕᐅᑉ ᓯᓚᑖᓂ ᐱᔪᒃᓯᑎᑦᑎᕗᖅ. "ᐊᒃᓱᕈᕐᓇᕈᓐᓇᖅᑐᖅ ᐊᓂᓗᓂ, ᕿᒪᒃᓗᒋᑦ ᖃᑕᙳᑎᑎᑦ ᐊᓯᖏᓪᓗ, ᑭᓯᐊᓂ ᐃᓱᐊᓂ, ᐊᑑᑎᖃᕐᓂᐊᖅᑐᖅ, ᓲᖃᐃᒻᒪ ᐱᒋᐊᕆᐊᖃᕐᒥᒐᕕᑦᑕᐅᖅ ᐃᓅᓯᕐᓂᒃ ᓯᓚᒥ. ᐃᕝᕕᑦ ᐱᔭᕆᐊᖃᖅᑐᑎᑦ ᐊᒻᒪᓗ ᐅᑎᕈᓐᓇᐃᓐᓇᕐᓗᑎᑦ ᓄᓇᓕᓐᓄᑦ ᖃᐅᔨᓴᕇᕈᕕᑦ. ᑭᓯᐊᓂ ᐱᒻᒪᕆᐅᓱᒋᕙᕋ ᐊᓂᒋᐊᖓ ᐊᒻᒪ ᖃᐅᔾᔨᑎᑖᕆᐊᖓ ᓯᓚᕐᔪᐊᕐᒥᑦ. ᐊᔪᕐᓇᕋᓗᐊᖅᑎᓪᓗᒍ ᐱᒋᐊᕐᓂᖓᓂ, ᓱᓕ ᐃᓕᑦᑐᓐᓇᖅᐸᐃᑦ. ᐊᒥᓲᕗᑦ ᑕᖅᑳᓂ. ᐃᓗᐊᕆᔭᕐᓃᑦᑕᕆᐊᖃᖅᑐᑎᑦ ᖃᐅᔨᕝᕕᒋᓇᓱᒡᓗᒋᑦ ᑭᓱᑯᑦᑎᐊᑦ," ᐅᖃᖅᖢᓂ.

ᔭᐃᑦᓗ ᓇᓖᕌᕋᔅᓴᖃᓚᐅᖅᑐᖅ ᖃᓄᖅ ᐃᖅᑲᓇᐃᔮᖅᑖᕆᔪᒪᔭᒥᓂᒃ ᐱᓇᓱᐊᕐᓗᓂ, ᑭᓯᐊᓂ ᐊᖏᕐᕋᕈᒪᓕᓚᐅᖅᑐᖅ.  "ᖃᑕᙳᑎᒃᑲᑦᑕᐅᖅ ᖃᓂᒋᑦᑎᐊᕐᒥᔭᒃᑲ. ᐱᒡᒐᓇᖅᑐᒻᒪᕆᐅᓚᐅᖅᐳᖅ ᐃᓱᒪᓕᐅᕆᐊᖓ ᐊᐅᓪᓚᕆᐊᖓ ᑕᒫᓃᒍᓐᓇᖅᑎᓪᓗᖓ ᑕᐃᒫᔅᓴᐃᓐᓇᖅ ᐱᓕᕆᐊᖃᕐᓗᖓ. ᑭᓯᐊᓂᓕ ᓇᒻᒥᓂᖅ ᐅᖃᕆᐊᖃᓕᓚᐅᕋᒪ, ᑕᒪᓐᓇ ᐱᒻᒪᕆᐅᓱᒋᕙᕋ. ᐊᒥᓱᓪᓗ ᐃᓄᐃᑦ ᐅᕙᓐᓄᑦ ᐅᖃᖃᑦᑕᖅᓯᒪᕗᑦ ᖃᓄᖅ ᐱᒻᒪᕆᐅᑎᒋᖕᒪᖔᑦ ᐊᓂᓂᐊᕐᓗᓂ," ᑕᐃᒪᓐᓇ ᐅᖃᖅᖢᓂ.

ᐃᓱᒪᔪᖅ ᐃᒻᒥᒃᑰᕈᓐᓇᕐᓂᕐᒥᓂᒃ ᐃᓕᓐᓂᐊᕆᐊᕐᓗᓂ ᐃᑲᔪᕐᓂᐊᕐᒪᑦ 20-ᓂᒃ ᐊᒻᒪᓗ ᐅᖓᑖᓄᑦ ᖃᐅᔨᒪᓂᕆᔭᖓᓂᒃ ᓇᒻᒥᓂᖅ ᐊᒻᒪᓗ ᐃᒻᒥᓂᒃ ᐱᔪᓐᓇᕐᓂᕐᒥᓂᒃ ᖃᐅᔨᓂᐊᖅᑐᖅ. ᔭᐃᑦᓗ ᖃᐅᔨᒪᖕᒥᔪᖅ ᐊᑐᒐᒃᓴᖅᑕᖃᕐᓂᖓᓂᒃ ᐱᔭᕆᐊᖃᕈᓂᒋᑦ.

ᐅᖃᐅᓯᖅᑕᖃᖅᑐᖅ ᑎᓕᐅᕆᓂᕐᒥᒃ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᓄᑦ ᓂᕆᐅᒋᔭᖏᓐᓂ ᐃᖢᕐᕆᓕᕐᓗᑎᒃ ᓂᕆᐅᖕᓂᖃᕐᓗᑎᒃᓗ. "ᐊᖓᔪᒃᖡᑦ ᐃᓕᓐᓂᐊᕐᕕᖕᒥ, ᖃᐅᔨᒪᔪᖓ ᐊᒃᓱᕈᕐᓇᖅᓯᓲᖑᓂᖓᓂᒃ ᓇᓗᓇᐃᒃᑯᑕᕐᓄᑦ ᐊᓯᓕᒫᖏᓐᓄᓪᓗ ᑭᓱᓕᒫᑦᑎᐊᓄᑦ ᐱᐅᑎᓐᓇᓱᒃᖢᒋᑦ, ᑭᓯᐊᓂ ᐃᓄᑑᙱᖦᖢᑎᑦ ᑕᐃᒪᐃᓕᐅᖅᑎᓪᓗᑎᑦ. ᐃᑲᔪᖅᑎᖃᐃᓐᓇᐅᔭᖅᑐᑎᑦ ᐃᓕᓴᐃᔨᓂᑦ ᖃᑕᙳᑎᖏᓐᓂᒃᓗ. ᐃᓄᑑᖅᑰᔨᒍᕕᑦ, ᐃᑲᔪᖅᑕᐅᔪᒪᔪᓐᓇᐃᓐᓇᐅᔭᖅᑐᑎᑦ ᐃᑲᔪᖅᑕᐅᔪᒪᓗᑎᓪᓗ ᓯᕗᒻᒧᐊᒍᑎᒃᓴᕐᓂᒃ ᐃᓅᓯᕐᓂ ᐃᓕᓐᓂᐊᖅᑕᕐᓂᒃᓗ," ᐃᓅᓯᓕᕆᔨ.

ᐃᑲᔪᖅᑕᐅᓚᐅᕐᓂᖓᓄᑦ, ᐄᑕᓐ ᔭᐅᑦᓗ ᖁᕕᐊᒋᔭᖃᖅᑐᖅ ᐃᑲᔪᕆᐊᒃᓴᖅ ᐃᓄᖕᓂᑦ ᐃᖢᐊᖅᓴᐃᔨᐅᓂᕐᒧᑦ, ᐊᒻᒪᓗ ᕿᑎᒃᑎᖏᑦ ᓴᙱᓂᖏᑦ ᐱᓕᕆᔪᓄᑦ. ᑭᒡᒐᖅᑐᐃᓪᓗᓂ ᓄᓇᓕᒥᓂᒃ ᑲᓇᑕᒥ ᐱᓐᖑᐊᕕᔾᔪᐊᖅᑐᓂ, ᐊᒻᒪᓗ ᑭᒡᒐᖅᑐᐃᓪᓗᓂ ᐃᓚᒥᓂᒃ ᐋᓐᓂᐊᓯᐅᖅᑎᐅᓂᕐᒧᑦ ᑕᑯᓯᒪᔭᖓᑦ ᐊᔪᓐᖏᑦᑎᐊᕐᓂᖓᓄᑦ, ᐊᐅᓪᓚᐸᓪᓕᐊᔪᖅ ᓇᒻᒥᓂᖅ ᐊᒻᒪᓗ ᐃᒻᒥᓂᒃ ᐱᔪᓐᓇᕐᓂᕐᒥᓂᒃ. ᓇᒻᒥᓂᖅ ᐊᐅᓪᓚᑐᐃᓐᓇᕆᐊᖃᖅᑐᓂ, ᑭᓯᐊᓂ ᖃᐅᔨᒪᔪᖅ ᐊᑐᕋᔅᓴᓂᒃ ᐊᑐᐃᓐᓇᐅᔪᓂᒃ ᐃᓕᓐᓂᐊᕈᑎᒥᓂᒃ, ᐃᓄᑑᔾᔨᒋᐊᖃᙱᑦᑐᖅ. "ᐃᑲᔪᖅᑕᐅᖏᓐᓇᐅᔭᖅᑐᖅ ᐃᓕᖕᓄᑦ ᕿᓂᕈᕕᐅᒃ," ᐅᖃᖅᑐᖅ, ᐃᓗᐊᖅᓴᐃᔨᐅᓂᕐᒧᑦ ᐃᓕᓐᓂᐊᕌᓂᒍᓯᐊᖃᕐᓗᓂ, ᐃᑲᔪᕋᔭᖅᑐᖅ ᐊᓯᖕᓄᑦ ᓯᕗᓂᑦᑎᓐᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.

ᕕᕗᐊᕆ 2023−ᒥ ᓄᑖᙳᕆᐊᖅᓯᒪᔪᑦ: ᐄᑕᓐ ᓅᓯᒪᓕᖅᑐᖅ ᑳᓪᒐᕆ ᓯᓚᑦᑐᖅᓴᕐᕕᒡᔪᐊᖓᓄᑦ.