"ᐆᒥᖓ ᑕᐅᑐᙳᐊᓚᐅᖅᐳᖓ, ᓄᑕᕋᑐᐊᖑᓪᓗᖓ ᐃᓄᑑᓪᓗᖓ ᐊᖓᔪᖅᑳᒧᑦ, ᑕᒪᓐᓇ ᐊᖅᑯᑎᒋᔭᐅᔾᔮᙱᓐᓂᖓᓂᒃ ᓇᖕᒥᓂᖅ ᕿᑐᕐᖓᓐᓄᑦ, ᑭᓯᐊᓂ ᖃᐅᔨᒪᙱᓐᓇᕕᑦ ᐃᓅᓯᖅ ᖃᓄᐃᓕᖓᓂᐊᕐᒪᖔᑦ," ᐅᖃᓚᐅᖅᐳᖅ ᕼᐃᓗ ᑕᒍᕐᓈᖅ. ᖃᒪᓂᖅᑐᐊᕐᒥᐅᑕᐅᔪᖅ ᓄᓇᕗᒻᒥ, ᑲᓇᑕᐅᑉ ᕿᑎᐊᓂ. ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᕇᕋᒥ, ᓄᓇᑦᑎᐊᑉ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᓕᑲᐅᑎᒋᓚᐅᖅᓯᒪᔪᖅ. ᐃᖅᑲᓇᐃᔭᓕᓵᖅᖢᓂ ᐃᓄᓕᕆᔨᒃᑯᓐᓄᑦ ᐊᕐᕌᒎᖕᓄᑦ ᒪᕐᕉᖕᓄᑦ, ᑭᖑᓂᐊᒍᓪᓗ ᐃᖅᑲᓇᐃᔮᕆᔭᐅᔪᒪᔪᓕᕆᔨᐅᓪᓗᓂ ᐱᓕᒻᒪᒃᓴᖅᑎᑦᑎᕙᒃᖢᓂ, ᐃᖅᑲᓇᐃᔭᖅᑎᑦᑎᕙᒃᖢᓂ ᐊᒻᒪ ᐃᓕᓐᓂᐊᕐᓂᕐᒥᒃ ᐃᖅᑲᓇᐃᔮᒃᓴᒧᑦ ᓴᓇᔨᐅᓂᕐᒧᓪᓘᓐᓃᑦ. ᐊᑯᓂᐊᓗᒃ ᐃᖅᑲᓇᐃᔭᓚᐅᖅᑐᖅ ᑭᓯᐊᓂ ᓄᖅᑲᖓᓚᐅᑲᖃᑦᑕᓚᐅᖅᑐᖅ ᐊᓯᖏᓐᓂᒃ ᐆᒃᑐᕋᓱᒃᖢᓂ ᓲᕐᓗ ᐃᓕᓐᓂᐊᖅᑎᑦᑎᓪᓗᓂ ᐃᓐᓇᕐᓂᒃ ᐃᓕᓐᓂᐊᖅᑎᑦᑎᓂᕐᒥᒃ, ᐃᖅᑲᓇᐃᔭᖅᑐᓕᕆᓂᕐᒥᒃ ᒫᓐᓇᓗ ᐃᒪᕐᒥᐅᑕᓂᒃ ᐱᐅᖅᓱᐊᕐᓂᕐᒥᒃ ᐃᖅᑲᓇᐃᔭᓕᖅᖢᓂ.

ᑕᒑᕐᓈᖅ ᑕᕆᐅᕐᒥ ᐱᐅᖅᓱᐊᕐᓂᕐᒧᑦ ᐱᓕᕆᓕᓚᐅᖅᐳᖅ ᐊᕐᕌᒍᓂ ᐊᕙᑎᓂᒃ ᐊᕙᑎᓕᕆᓂᕐᒥᒃ ᑭᒡᒐᖅᑐᐃᓪᓗᓂ ᓴᓂᕌᒍᑦ. ᓄᓇᖃᖅᖢᓂ ᓴᓇᕝᕕᐊᓗᖕᒥ ᐱᓕᕆᔪᖃᕐᔪᐊᖅᑐᒥ, ᐃᒃᐱᒍᓱᓚᐅᖅᑐᖅ ᐃᖅᑭᓕᖕᒥᐅᑕᐅᓪᓗᑎᒃ, ᐃᓄᐃᑦ ᐊᒻᒪ ᓄᓇᖃᖅᑳᖅᓯᒪᔪᑦ ᐃᓄᐃᑦ, ᐱᒻᒪᕆᐅᔪᒥᒃ ᐱᓕᕆᐊᒃᓴᖃᕐᓂᖏᓐᓂᒃ ᐃᓱᒪᓪᓗᑎᒃ ᖃᓄᖅ ᓄᓇ, ᐃᒪᖅ ᐊᒻᒪ ᐆᒪᔪᑦ ᐊᒃᑐᖅᑕᐅᓇᔭᕐᒪᖔᑕ. ᑕᐃᒪᐃᓐᓂᖓᓄᑦ ᐃᓚᒋᔭᐅᓚᐅᖅᐳᖅ ᓄᓇᓕᖕᓂ ᐊᐅᓚᑕᐅᔪᓂᒃ ᑭᒡᒐᖅᑐᐃᓂᕐᒥᒃ, ᐊᒃᑐᖅᓯᓂᕐᒧᑦ ᖃᐅᔨᓴᖅᓯᓂᕐᒥᒃ ᐱᓕᕆᐊᖃᖅᐸᒃᖢᓂᓗ ᐅᓚᕕᓴᐃᔨᐅᓂᕐᒥᒃ. ᑲᑎᒪᔨᐅᖃᑕᐅᓚᐅᖅᑐᖅ Oceans North-ᑯᓐᓄᑦ, Mining Watch Canada-ᑯᓐᓄᑦ ᐊᓯᖏᓐᓄᓪᓗ ᑲᑎᒪᔨᓄᑦ. "ᓄᓇᓕᖕᓂ ᐱᓕᕆᓂᕆᕙᒃᑕᕗᑦ ᐊᑭᓕᖅᓱᖅᑕᐅᙱᖦᖢᑕ ᐃᓛᓐᓂᒃᑯᑦ ᓴᖅᑭᑎᑦᑎᓕᕈᓐᓇᖅᐳᖅ ᐃᓱᒪᓚᐅᖅᓯᒪᙱᑕᕐᓂᒃ. ᐊᒻᒪ ᐅᓪᓗᒥ ᑕᐃᒪᐃᓕᖓᕗᖓ," ᖁᖓᑦᑐᖅ. 

ᑕᒍᕐᓈᖅ ᖁᕕᐊᒋᑦᑎᐊᖅᑕᖓ ᐱᓕᕆᐊᒥᓂᒃ ᓲᖃᐃᒻᒪ ᐅᖃᖃᑎᖃᕈᓐᓇᕋᒥ ᐊᖑᓇᓱᒃᑎᓂᒃ ᐃᓐᓇᕐᓂᓪᓗ ᑐᓴᖅᐸᒃᖢᓂᓗ ᖃᓄᖅ ᐅᖃᕐᒪᖔᑕ ᖃᓄᐃᒻᒪᑦ ᐊᔾᔨᒌᙱᑦᑐᑦ ᓄᓇᐃᑦ ᐃᒪᕐᓗ ᐱᒻᒪᕆᐅᖕᒪᖔᑕ. "ᐱᕚᓪᓕᕐᓇᖅᑐᒻᒪᕆᐅᓚᐅᖅᐳᖅ ᐊᑐᖅᖢᒍ," ᐅᓂᒃᑳᖅᐳᖅ, ᐃᓱᒪᓪᓗᓂ ᐱᓕᕆᓂᐅᔪᒥ ᐃᓱᒪᓕᐅᕆᓂᐅᔪᒥ ᖃᓄᐃᓐᓂᐊᕐᓂᖓᓂ, ᓇᓂ ᐊᒻᒪ ᖃᖓ.

ᐃᓕᓐᓂᐊᖅᑕᒥᓄᑦ, ᑕᒍᕐᓈᖅ ᐃᓕᓐᓂᐊᕐᕕᑐᐃᓐᓇᕐᒨᓚᐅᖅᓯᒪᕗᖅ ᐊᒻᒪ ᐃᖅᑲᓇᐃᔭᕆᐊᑲᐅᑎᒋᓪᓗᓂ, ᓱᓕ ᓯᓚᑦᑐᖅᓴᕐᕕᒡᔪᐊᕐᒧᐊᕈᒪᓚᐅᖅᐳᖅ. ᐸᐃᑉᐹᖅᑖᕈᓐᓇᖅᓯᓚᐅᖅᑐᖅ ᐃᖅᑲᓇᐃᔭᓕᒻᒪᒃᓴᓂᕐᒧᑦ, ᐊᒻᒪᓗ ᐃᓚᐅᖃᑕᐅᓪᓗᓂ ᑭᓯᐊᓂ ᐱᔭᕇᓚᐅᖏᑦᑐᖅ ᐃᕐᓂᓱᒃᓰᓂᕐᒧᑦ ᐃᓕᓐᓂᐊᕐᓂᕐᒥᒃ ᓄᓇᕗᒻᒥ ᓯᓚᑦᑐᕐᓴᖅᕕᒃᑯᑦ. ᐃᕐᓂᓱᒃᓰᔨᐅᓂᕐᒧᑦ ᐸᐃᑉᐹᖅᑖᓚᐅᖅᑐᖅ ᑲᖏᖅᖠᓂᕐᒥ. ᐋᑐᕚᒧᑦ ᓯᓚᑦᑐᖅᓴᕐᕕᔾᔪᐊᕐᒨᓕᓚᐅᖅᓯᒪᕗᖅ ᑭᖑᓂᐊᒍᓪᓗ ᐃᓕᑕᕆᔭᐅᔾᔪᑎᑖᖅᑐᓂ. 

ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᑐᓄᑦ ᐃᓕᓐᓂᐊᖅᑎᓄᑦ ᐊᐅᓪᓚᕆᐊᖃᖅᐸᒃᑐᓄᑦ ᓄᓇᓕᖏᓐᓂ ᐃᓕᓐᓂᐊᕆᐊᕐᓂᐊᕐᓗᑎᒃ ᐃᒪᓐᓇᐅᕗᖅ, "ᐄᑦᑎᐊᖅ, ᑭᓯᐊᓂ ᐱᕙᒌᔭᖅᓯᒪᓗᓯ... ᑐᒃᓯᕋᖃᑦᑕᕐᓗᓯ ᑮᓇᐅᔭᓂᒃ ᐊᑐᐃᓐᓇᐅᔪᓕᒫᓂᒃ... ᖃᐅᔨᓴᕐᓗᒋᑦ ᐃᓚᖏᑦ ᐃᓕᓐᓂᐊᕐᕖᑦ ᕿᒥᕐᕈᔭᑎᑦ, ᖃᐅᔨᓴᕐᓗᒋᑦ ᓄᓇᓕᐸᐅᔭᐃᑦ, ᖃᐅᔨᓴᕐᓗᒋᑦ ᓄᓇᓖᑦ ᐅᐸᒍᒪᔭᑎᑦ, ᓇᓂᓯᓗᑎᑦ ᐃᓂᒥᒃ ᑲᑎᙵᓂᖃᖅᑰᔨᓗᑎᑦ." ᑕᒍᕐᓈᒧᑦ, ᑖᓐᓇ ᓄᓇᖃᖅᑳᖅᑐᓄᑦ ᐃᓂᒋᔭᐅᓚᐅᖅᑐᖅ ᓯᓚᑦᑐᖅᓴᕐᕕᖓᓂ. ᐅᖃᖅᑐᖅ ᐊᓯᖏᓐᓂᒃ ᖃᓄᐃᓕᐅᕈᑎᖃᖃᑦᑕᖁᔨᓪᓗᓂ, ᑐᓴᕐᓈᕐᓂᐅᓚᐅᕐᒪᑦ, ᐊᓃᑲᑕᒡᓗᓂᓗ. ᒥᕐᖑᐃᕐᓯᕐᕕᓕᐊᕐᐸᓚᐅᕐᑐᖅ ᐊᓂᖅᓵᕐᑐᕆᐊᕐᑐᓱᓂ. 

ᐊᔪᕐᓇᖅᑐᖅᓯᐅᕈᑕᐅᕙᒃᑐᓄᑦ, ᑕᒍᕐᓈᑉ ᐅᐃᖓ ᐃᓅᔪᓐᓃᓚᐅᖅᐳᖅ ᑳᓐᓱᒧᑦ ᒪᒃᑯᒃᑑᑎᓪᓗᒍ, ᕿᒪᒃᖢᓂᐅᒃ ᐱᕈᖅᓴᓪᓗᓂᒋᑦ ᐃᓄᑑᓪᓗᓂ ᐊᖓᔪᖅᑳᕆᔭᐅᓪᓗᓂ. ᓴᙱᔪᒥᒃ ᐃᑲᔪᖅᑎᖃᓚᐅᖅᑐᖅ ᕿᑐᕐᖓᖏᓪᓗ ᐱᕈᖅᓴᓪᓗᑎᒃ ᐱᑦᑎᐊᖅᑐᒻᒪᕆᐅᓪᓗᑎᒡᓗ ᑭᓯᐊᓂ ᑕᐃᒪᓐᓇ ᐸᕐᓇᒃᓯᒪᓚᐅᙱᓚᖅ ᐃᒻᒥᓄᑦ. 

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ, ᐃᒪᓐᓇᐅᓇᔭᖅᐳᖅ, ᓇᓂᓯᓗᓂ ᓇᓗᖅᑯᑎᙱᑦᑎᐊᕐᓂᕐᒥᒃ, ᖃᓄᐃᙱᑦᑎᐊᕐᓂᖅᓴᒥᒃ ᐃᖕᒥᓂᒃ ᐊᒻᒪᓗ ᖃᐅᔨᓗᓂ ᑭᓇᐅᖕᒪᖔᕐᒥᓂᒃ ᓯᕗᓂᐊᒍᑦ. ᐊᕙᓗᒥᐅᑕᖃᖅᖢᓂ ᐃᓄᖕᓂ ᐱᔪᒃᓯᑎᑦᑎᕙᒃᑐᓂᒃ ᐊᖏᓛᖑᓚᐅᖅᐳᖅ ᑕᐃᒪᐃᓐᓂᖓᓄᓪᓗ ᐃᒻᒥᓂᒃ ᑲᔪᖏᖅᓴᐃᕙᒃᖢᓂ ᑕᐃᒪᐃᓕᐅᖃᑦᑕᕈᒪᓪᓗᓂ ᐱᒋᐊᓕᓵᖅᑎᓪᓗᒍ, ᐃᓕᑦᑎᕙᓪᓕᐊᕙᒃᖢᓂ ᐊᓯᒥᓂᒃ ᖃᓄᐃᙱᑦᑎᐊᕐᓇᖅᑐᓂᒃ ᐃᓕᖅᑯᓯᖃᖅᐸᒃᑐᓂᒃ,

ᓇᓕᒧᒌᒃᑎᑦᑎᓇᓱᒃᖢᓂ ᐃᓱᒪᒥᒍᑦ ᖃᓄᐃᙱᑦᑎᐊᕈᓐᓇᕐᓂᕐᒥᓂᒃ, ᑕᒍᕐᓈᖅ ᖁᕕᐊᒋᔭᖃᓚᐅᖅᐳᖅ ᓲᕐᓗ ᒥᖅᓱᕐᓂᕐᒥᒃ, ᐊᒃᓱᕈᖅᑎᖦᖢᓂᐅᒃ ᐊᒻᒪ ᓴᓇᙳᐊᕈᓐᓇᕐᓂᖓ ᓴᖅᑭᑎᖦᖢᒍ. ᑎᒥᖓ ᐊᐅᓚᑎᓪᓗᒍ ᕚᔅᑭᑦᕚᓪ ᐃᑲᔪᖅᐸᒃᑭᕗᖅᑕᐅᖅ, ᐱᓱᔪᒃᐸᒃᖢᓂ, ᒧᒥᑲᑕᒃᖢᓂ ᐅᕝᕙᓘᓐᓃᑦ ᒧᒥᑲᑕᒃᖢᓂ. "ᐊᐅᓚᓂᖅ ᐅᕙᓐᓄᑦ ᐃᓅᓯᕐᒥᒃ ᐱᐅᓕᑎᑦᑎᔪᓐᓇᖅᐳᖅ," ᐅᓂᒃᑳᖅᑐᖅ. ᓇᓂᓯᓂᖅ ᑲᑎᙵᔪᓂᒃ ᐱᐅᔪᓂᒃ, ᐃᑲᔪᖅᑐᐃᑦᑎᐊᖅᑐᓂᒃ ᐃᓄᖕᓂᒃ ᐃᑲᔫᑎᖃᕆᕗᖅ ᐱᕙᒌᔭᖅᓯᒪᓗᓂᓗ ᐊᐅᓪᓚᕐᓂᐊᕐᓂᕆᔭᕐᓂᒃ ᓂᕆᐅᒋᑦᑎᐊᕐᓗᒍ ᐱᐅᒋᕗᖅᑕᐅᖅ. ᐊᓃᑲᑕᒡᓗᓂ ᐊᔪᕐᓇᙱᓐᓂᓕᒫᖓᓂ ᐃᒪᓐᓇᐅᖁᔨᕗᖅ. 

ᐱᔪᒃᓯᑎᑦᑎᓇᓱᓕᕌᖓᒥ, ᑕᒍᕐᓈ ᑕᐅᑐᒃᐸᒃᐳᖅ ᐊᓈᓇᑦᑎᐊᒥᓄᑦ ᓯᓚᑐᔪᐊᓘᓚᐅᖅᑐᒧᑦ, ᐃᓱᒪᑦᑎᐊᖅᖢᓂ ᓴᙱᔫᓪᓗᓂᓗ. ᑕᐅᑐᙳᐊᖅᐸᒃᖢᓂᐅᒃ ᐊᒃᓱᕈᕐᓇᖅᑐᒃᑰᖅᑎᓪᓗᒍ ᐃᖅᑲᐅᒪᓪᓗᓂᓗ ᖃᑕᙳᑎᒥᓂᒃ ᐱᕈᖅᓴᐃᔪᓐᓇᕈᓂ ᐊᒃᓱᕈᕐᓇᖅᑐᒃᑰᖅᑎᓪᓗᒍ ᖃᓄᐃᒃᑲᔭᙱᖦᖢᓂ. ᐊᓈᓇᑦᑎᐊᒥᓂᒃ ᑕᐅᑐᑦᑎᐊᖅᑐᖅ ᑐᙵᕕᒋᓪᓗᓂᐅᒃ.  

ᕼᐃᓗ ᑕᒍᕐᓈᖅ ᓂᕆᐅᓚᐅᙱᑦᑐᖅ ᐊᓈᓇᐅᓛᕆᐊᒃᓴᖅ ᐅᐃᖃᕈᓐᓃᓚᐅᖅᑎᓪᓗᒍ ᑳᓐᓱᒧᑦ, ᑭᓯᐊᓂ ᓴᙱᔪᒥᒃ ᐃᑲᔪᖅᑎᖃᓚᐅᖅᑐᖅ ᐃᑲᔪᖅᑐᐃᓪᓗᓂ. ᐃᖅᑲᓇᐃᔮᖃᓕᓚᐅᖅᐳᖅ ᖁᕕᐊᒋᔭᒥᓂᒃ ᐱᓕᕆᔪᓐᓇᖅᓯᓪᓗᓂ ᐊᕐᕌᒍᓄᑦ ᐊᕙᑎᓄᑦ − ᓴᐳᔾᔨᓯᒪᓪᓗᓂ ᓄᓇᕐᔪᐊᒥᒃ ᓈᓚᒃᐸᒃᖢᓂᓗ ᐃᓄᖁᑎᖏᑕ ᓯᓚᑐᓂᕆᔭᖏᓐᓂᒃ. ᕿᑐᕐᙵᒥᓂᒃ ᐱᕈᖅᓴᐃᑦᑎᐊᓚᐅᖅᐳᖅ ᐊᓂᒍᐃᔾᔪᑎᑖᖅᖢᓂᓗ, ᑕᐅᑐᙳᐊᖅᑕᒥᓂᒃ ᒪᓕᒃᖢᓂ ᓇᖕᒥᓂᖅ ᐱᕕᒃᓴᕆᔭᒥᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.