ᐃᓕᓐᓂᐊᕈᑎᓕᐅᕐᓂᖅ ᐊᒻᒪ ᓴᓇᙳᐊᕐᓂᖅ, ᐊᒃᑐᐃᓂᖃᕈᓐᓇᖅᐳᖅ ᖃᓄᕈᓘᔮᓗᒃ. ᔭᐃᒥᓯ ᔅᐅᐊᓐ ᓄᓇᖃᖅᑳᖅᑐᒥᐅᑕᖅ ᐊᒻᒪᓗ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᓴᓇᐅᒐᓕᕆᓂᕐᒧᑦ ᐊᒻᒪᓗ ᐃᓕᓐᓂᐊᕌᓂᒍᓯᐊᖅ ᐃᓕᓐᓂᐊᕐᓂᕐᒧᑦ, ᐱᕙᒌᔭᕐᖢᓂ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ ᐃᓕᓴᐃᔨᐅᓂᐊᕐᓗᓂ. ᐃᓇᖐᓯᒪᓂᕐᒧᑦ ᐃᓕᓴᐃᔨᐅᓪᓗᓂ, ᐊᑯᓪᓕᕐᒥ ᐃᓕᓐᓂᐊᕐᕕᓕᐊᓕᓚᐅᖅᑐᖅ ᐃᓕᓴᐃᔭᖅᑐᖅᖢᓂ ᖃᐅᔨᓪᓗᓂᓗ ᓇᒡᓕᒋᔭᒥᓂᒃ. ᐃᑉᐱᒍᓱᓚᐅᖅᑐᖅ ᐊᖏᕐᕋᒥ ᐃᓕᓐᓂᐊᑎᑦᓯᑦᓱᓂ ᐊᑯᓐᓈᕿᔪᓂᒃ ᐃᓕᓐᓂᐊᖅᑎᓂᒃ ᐃᓕᓐᓂᐊᑎᑦᓯᖃᑦᑕᓕᕋᒥ ᖁᕝᕙᓯᓐᓂᓕᓐᓂᒃ 8-ᒥᒃ.

 ᐃᓕᓐᓂᐊᕌᓂᒃᑎᓪᓗᒋᑦ, ᔅᐅᐊᓐ ᓴᓇᐅᒐᓕᐅᓲᑦ ᓴᓂᕌᒍᑦ ᐃᓚᐅᓪᓗᑎᒃ ᑎᑎᕋᐅᔭᒐᑦ, ᐊᒥᐊᕆᓃᑦ, ᐊᒻᒪᓗ ᑎᑎᖅᑐᒐᐅᔭᑦ. ᓇᐸᔪᓕᐅᖃᑦᑕᖅᓯᒪᔪᖅ ᒥᓐᖑᐃᓯᕐᕕᓕᕆᔨᒃᑯᓐᓄᑦ ᑲᓇᑕᒥ ᐊᒻᒪᓗ ᕿᓪᓕᖅᑕᒥᒃ ᓴᓇᕙᓪᓕᐊᓕᖅᑐᓂ. ᓄᓕᐊᖓ ᓯᕗᓪᓕᖅᐸᐅᔪᓂᒃ ᑎᑎᖅᑐᒐᖃᑦᑕᖅᑐᓂ ᐊᒻᒪᓗ ᓂᕕᖓᓪᓗᑎᒃ ᐊᑭᓐᓇᒥᓐᓂ. ᔅᐅᐊᓐ ᓂᐅᕐᕈᑎᖃᓲᖑᕗᖅ ᐱᓕᕆᐊᒥᓂᒃ ᖃᕋᓴᐅᔭᒃᑯᑦ Facebook−ᑯᑦ ᐊᒻᒪ ᐃᓚᖏᓐᓂᒃ ᓄᓇᓕᖕᓂ ᓴᓇᕝᕕᖕᓂ. 

ᖃᕋᓴᐅᔭᒃᑯᑦ ᑐᑭᓯᒋᐊᕐᕕᖃᙱᒻᒪᑦ, ᔅᐅᐊᓐ ᓴᓇᔪᒪᑐᐃᓐᓇᖅᑕᖓ ᓴᖅᑭᑎᑉᐸᒃᖢᓂᐅᒃ ᐃᓄᖕᓄᑦ ᑐᓴᐅᒪᔾᔪᑎᒃᑯᑦ. ᐃᓄᐃᑦ ᓂᐅᕕᖃᑦᑕᕐᒪᑕ ᓴᖅᑭᑕᒥᓂᒃ ᐊᒻᒪᓗ ᐊᖑᒻᒪᑎᔪᓐᓇᖅᑐᑎᒃ ᐱᔪᒪᔭᒥᓂᒃ ᑐᐊᕕᓗᐊᕋᓂ ᐊᒻᒪᓗ ᓴᓇᔭᕆᐊᖃᕋᓂ ᐱᔪᒪᔭᒥᓂᒃ.  ᐃᖅᑲᓇᐃᔭᙱᒃᑳᖓᒥ ᑐᒃᑲᕆᐊᓕᖕᒥᓂ ᐃᖏᕐᕋᔪᒪᖃᑦᑕᖅᐳᖅ, ᐃᖃᓪᓕᐊᖅᖢᓂ ᐊᒻᒪ ᐊᐅᓪᓛᖅᓯᒪᓪᓗᓂ.  ᐃᖏᕐᕋᔪᒪᖃᑦᑕᕐᒥᔪᖅ ᒨᑐᓴᐃᑯᒥᓂᒃ, ᐅᒥᐊᒥ ᐱᓕᕆᓪᓗᓂ ᐅᕝᕙᓘᓐᓃᑦ ᓯᓚᒥ ᐃᒃᓯᕚᖅᖢᓂ ᑏᑐᖅᖢᓂ. ᐃᓕᓴᐃᔨᐅᓪᓗᓂ, ᐅᐱᕐᖔᒃᑯᑦ ᐊᒻᒪ ᖁᕕᐊᓱᒡᕕᖕᒥ ᕿᑲᓚᐅᑲᖕᓇᒥ ᐊᓕᐊᓇᐃᒋᔭᖃᓲᖑᕗᖅ ᐊᒻᒪ ᐊᐅᔭᒃᑯᑦ ᓄᖅᑲᖓᓐᓇᖅᖢᓂ. 

ᐃᓕᓐᓂᐊᖅᑎᐅᓪᓗᓂ, ᐃᓕᓐᓂᐊᓚᐅᖅᓯᒪᔪᖅ ᑭᒃᑯᑐᐃᓐᓇᕐᓄᑦ ᓄᑲᖅᖡᑦ ᐅᐃᕖᓪᓗ ᐃᓕᓐᓂᐊᕐᕕᖓᓄᑦ ᐅᑎᓚᐅᕋᓂ ᓄᓇᒥᓄᑦ ᐊᒻᒪ ᐃᖅᑭᓖᑦ ᐅᓪᓗᖁᑎᖓᓄᑦ ᐃᓕᓐᓂᐊᕆᐊᓚᐅᖅᓯᒪᓪᓗᓂ. ᑭᖑᓂᐊᒍᑦ ᐃᓕᓐᓂᐊᕆᐊᖅᑎᑕᐅᕙᓕᓚᐅᖅᑐᖅ ᐃᓕᓴᐃᔨᙳᕈᒪᓕᓚᐅᖅᓯᒪᓪᓗᓂ. ᐃᓕᓴᐃᔨᖓ ᐃᓕᓴᐃᓚᐅᖅᐳᖅ ᐊᓐᓄᕋᔾᔨᐅᕐᓂᕐᒥᒃ ᐊᒻᒪ ᑐᙵᓇᖅᑑᓪᓗᓂ, ᐃᓕᓐᓂᐊᖅᑎᑦ ᓴᓇᙳᐊᕐᕕᖕᒥ ᐃᓂᖃᖅᑎᖦᖢᒋᑦ. ᐊᑖᑕᖓ ᐊᑖᑕᑦᑎᐊᖓᓗ ᓴᓇᙳᐊᖅᑎᐅᓚᐅᖅᐴᒃ ᐊᒻᒪ ᐱᔪᒃᓯᑎᖦᖢᓂᒋᑦ ᐱᓕᕆᐊᒥᓂᒃ. 

ᒪᓚᓴᐱᓇ ᓯᓚᑦᑐᓴᕐᕕᖓᓅᓚᐅᖅᑐᖅ ᑭᓯᐊᓂ ᐃᓕᓐᓂᐊᕆᐊᕈᓐᓇᖅᓯᓚᐅᖏᑦᑐᖅ ᓱᓕ. ᔅᐅᐊᓐ ᐅᖃᐅᓯᖃᖅᑐᖅ ᖃᓄᖅ ᓂᑲᒍᓱᙱᖦᖢᓂ ᐃᖕᒥᓂᒃᓗ ᐊᑲᐅᙱᓕᐅᕈᑎᖃᓕᕐᖢᓂ. ᑭᖑᓂᐊᒍᑦ ᐅᓇᑕᖅᑐᒃᓴᓄᑦ ᐃᓚᒋᔭᐅᓕᓚᐅᖅᓯᒪᕗᖅ, ᐃᓐᓇᕈᖅᓯᒪᑎᓪᓗᒍ ᐃᑲᔪᓚᐅᖅᑐᖅ. ᐃᓚᖏᑦ ᐅᓇᓕᒃᓴᐅᔪᓄᑦ ᐃᓕᓐᓂᐊᕐᓂᖏᑦ ᐊᑐᖅᑕᐅᓕᖃᑦᑕᕐᒪᑕ ᐃᓕᓐᓂᐊᕐᕕᐅᔪᓂᒃ ᐊᒻᒪᓗ ᐊᒃᓱᐊᓗᒃ ᐃᑲᔪᖅᐸᒃᑭᓪᓗᓂ. ᐃᓕᑕᕆᔭᐅᔾᔪᑎᑖᓚᐅᖅᑐᖅ ᓯᓚᑦᑐᓴᕐᕕᕐᔪᐊᕐᒥᑦ ᕕᒃᑐᐊᕆᐊᒥ.

ᐊᖏᕐᕋᖅᓯᒪᓪᓗᓂ ᓯᓚᑦᑐᖅᓴᕐᕕᒡᔪᐊᒥ ᐊᒃᓱᕈᕐᓇᓚᐅᖅᑐᖅ ᔅᐅᐊᓐᒧᑦ, ᑭᓯᐊᓂ ᐃᓕᓐᓂᐊᕐᕕᖕᒥᓂ ᑐᙵᓱᒃᑎᑦᑎᓚᐅᖅᑐᖅ ᑕᓖᒃᑭᒃ ᒪᑐᐃᖓᓪᓗᑎᒃ ᐊᒻᒪ ᐃᓱᒪᑦᑎᐊᕐᓇᖅᖢᓂ. ᐱᖃᓐᓇᕆᔭᖅᑖᕐᖢᓂ ᐃᓅᓯᓕᒫᒧᑦ ᖁᕕᐊᒋᓪᓗᓂᐅᒡᓗ ᐃᓚᒋᔭᐅᔭᕆᐊᒃᓴᖅ ᓄᓇᓕᖕᓄᑦ ᐃᓱᒪᒃᓴᖅᓯᐅᑦᑎᐊᕐᖢᓂ, ᐃᒪᓐᓈᖅᑐᕈᑎᓂᒃ, ᐊᐱᖅᑯᑎᓂᑦ ᑭᒡᒍᑎᓂᒃᓗ. ᐱᖃᑎᖏᑦ ᐱᐅᔪᐊᓘᓚᐅᖅᑐᑦ ᐊᒻᒪᓗ ᒫᓐᓇ ᕕᒃᑑᕆᐊᒥ. ᐃᓅᓯᖓᓂ, ᐊᐅᓪᓚᕈᓐᓇᓚᐅᕐᒥᔪᖅ ᐱᐅᓪᔨᐊᒻᒧᑦ, ᐃᖕᓚᓐᒧᑦ, ᕗᕌᓐᓯᒧᑦ ᐊᒻᒪᓗ ᒪᒃᓯᑯᒧᑦ ᐊᒻᒪᓗ ᒥᐊᓕᒐᐃᑦ ᓄᓇᖓᓐᓄᑦ. 

ᑲᔪᖏᖅᓴᐃᔭᕆᐊᖃᖅᑎᓪᓗᒍ, ᖁᕕᐊᒋᔭᖃᖅᑐᖅ ᐊᒃᓱᕈᕐᓇᕐᓂᖓᓂᒃ ᐱᐅᓂᖅᓴᒥᒃ ᐊᒻᒪᓗ ᓄᑖᓂᒃ ᐱᓇᓱᐊᖅᖢᓂ. ᓴᓇᓯᒪᕗᖅ ᑲᑭᖅᑯᐊᓂᒃ ᓂᐅᕕᖅᑐᒧᑦ, ᓯᐅᕋᕐᒥᒃ ᖄᖅᑎᑦᑎᓯᒪᔪᖅ ᐃᓕᓐᓂᐊᕐᕕᐅᑉ ᑲᑎᒪᔨᖏᓐᓄᑦ, ᐊᒻᒪᓗ ᓄᓇᕋᙳᐊᓂᒃ. ᐊᒥᐊᕆᖃᑦᑕᖅᓯᒪᒻᒥᔪᖅ ᖃᑦᑕᐅᔭᓂᒃ ᐊᒻᒪᓗ ᓴᓇᓪᓗᓂ. ᓴᓇᙳᐊᖅᑎᐅᓪᓗᓂ, ᐊᓕᐊᓇᐃᒋᑦᑎᐊᖅᑕᖓ ᓂᕈᐊᕆᐊᒃᓴᖅ ᖃᖓ ᑭᓱᓂᒡᓗ ᐱᓕᕆᖕᒪᖔᑦ ᐋᒃᑳᖅᖢᓂᓗ ᑐᑭᖃᙱᒃᑳᖓᑦ. 

ᐊᓯᖕᓂᒃ ᑲᔪᖏᖅᓴᐃᔪᒪᒍᕕᑦ, ᔅᐅᐊᓐ ᐅᖃᖅᐳᖅ, "ᐅᑕᖅᑭᑦᑕᐃᓕᒋᑦ ᓯᓐᓇᒃᑑᒪᔭᑎᑦ ᐱᐊᓂᒐᓱᒡᓗᒋᑦ... ᐊᒻᒪᓗ ᓯᓐᓇᑦᑑᒪᒋᔭᑎᑦ ᓴᐱᓕᖅᑕᐃᓕᓗᒋᑦ. ᒫᓐᓇ ᑖᒃᑯᓄᖓ ᑲᒪᒋᖔᕐᓗᒋᑦ. ᐅᑕᖅᑭᑦᑕᐃᓕᒋᑦ ᑭᓯᐊᓂ ᐃᓐᓇᐅᓕᕈᕕᑦ. ᐊᑲᐅᔪᖅ ᖃᐅᔨᒪᓪᓗᓂ ᐃᓄᑦᑕᖃᕐᒪᑦ ᑕᖅᑳᓂ ᐅᑉᐱᕈᓱᓐᓂᐊᖅᑐᓂᒃ ᐃᓕᓐᓂᒃ, ᐅᑉᐱᕆᔭᕐᓂᒃ. ᐃᒻᒥᓂᒃ ᐅᒃᐱᕆᖅᑳᕆᐊᖃᖅᑐᑎᑦ ᐊᒻᒪᓗ ᑲᔪᓯᓗᑎᑦ ᖃᓄᐃᓕᐅᕈᒪᔭᕐᓂᑦ ᐃᓅᓯᕐᓂᑦ."

"ᑎᓕᐅᕆᓪᓚᕆᒃᐳᖓ ᐃᓄᖕᓂᒃ ᐃᓕᓴᐃᔨᙳᖁᓪᓗᒋᑦ, ᐃᒪᐃᓐᓂᖓᓄᑦ, ᐱᑕᖃᙱᓗᐊᕋᑦᑕ, ᐱᓗᐊᙳᐊᖅᖢᓂ ᐊᖏᓂᖅᓴᒥ ᕕᒃᑐᐊᕆᐊᒥ. ᐱᑕᖃᙱᓗᐊᕐᒪᑦ ᐃᖅᑭᓖᑦ ᐃᓕᓴᐃᔨᖏᓐᓂᒃ ᐊᒻᒪᓗ ᐃᓄᓐᓂᒃ ᐃᖅᑲᓇᐃᔭᖅᑐᓂᒃ ᓇᒥᑐᐃᓐᓇᖅ, ᐅᑕᖅᑭᒐᓗᐊᕈᑎᒃ. ᑕᐅᕗᙵᕆᐊᖃᖅᐳᒍᑦ ᑮᓇᕗᓪᓗ ᑕᑯᑎᓪᓗᒋᑦ," ᑲᔪᓰᓐᓇᖅᐳᖅ. 

ᐃᓕᓐᓂᐊᕈᑎᓕᐅᕐᓂᖅ ᐊᒻᒪ ᓴᓇᙳᐊᕐᓂᖅ, ᔭᐃᒥᓯ ᔅᐅᐊᓐ ᐊᒃᑐᐃᓂᖃᖅᐳᖅ ᖃᓄᕈᓘᔮᓗᒃ. ᖁᕕᐊᒋᔭᖃᒻᒪᕆᓚᐅᖅᑐᖅ ᓴᓇᓂᕐᒥᒃ ᓴᓇᐅᒐᕐᓂᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓄᑦ ᐊᒻᒪᓗ ᒫᓐᓇ ᐃᓕᓴᐃᕙᓕᖅᑐᖅ ᓄᓇᓕᓐᓂ ᐊᑯᓐᓈᕿᔪᓄᑦ ᐃᓕᓐᓂᐊᕐᕕᒻᒥ. ᐃᓕᓐᓂᐊᖅᑎᐅᓪᓗᓂ ᐊᖏᕐᕋᒥᓂᒃ ᐅᖓᓯᒃᑑᓪᓗᓂ, ᐃᓂᖃᖅᑐᖅ ᒪᒃᑯᒃᑐᑦ ᓄᓇᖃᖅᑰᔨᓪᓗᑎᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.

ᔪᓚᐃ 2024−ᒥ ᓄᑖᙳᕆᐊᖅᓯᒪᔪᑦ: ᔭᐃᒥᓯ ᐱᒋᐊᓛᖅᑐᖅ 5−ᒋᓕᖅᑕᖓᓂᒃ ᐊᕐᕌᒍᒥ ᕕᒃᑑᕆᐊ ᐃᓕᓐᓂᐊᕐᕕᓕᕆᔨᖏᓐᓂᒃ ᓯᑎᐱᕆᒥ. ᐱᔭᕇᖅᓯᕙᓪᓕᐊᖕᒥᔪᖅ ᒪᕐᕉᖕᓂᒃ ᓇᑉᐸᖅᑯᑎᓂᒃ ᒥᕐᙳᐃᖅᓯᕕᖕᓄᑦ ᑲᓇᑕᒥ ᐊᐅᔭᒃᑯᑦ.