"ᐅᒃᐱᕈᓱᐃᓐᓇᐅᔭᖅᑐᖓ Creator−ᒥᒃ ᑎᒍᒥᐊᕐᓂᖓᓂᒃ ᓇᒧᙵᐅᓂᕆᔭᓐᓂᒃ ᖃᓄᐃᓕᐅᕐᒪᖔᕐᒪᓗ. ᐊᔪᙱᓐᓂᓕᒫᓐᓄᑦ ᐱᓕᕆᓲᖑᔪᖓ," ᐅᖃᖅᑐᖅ ᔭᓂᕗ ᒪᓂᑑᐱ. ᐱᕈᖅᓴᓚᐅᖅᑐᖅ ᑕᓐᑐ ᐸᐃᒥ ᑭᓯᐊᓂ ᒫᓐᓇ ᓄᓇᖃᓕᖅᑐᖅ ᐅᐃᕖᑎᑐᑦ ᓂᐊᖁᖓᓂ ᓛᒃ ᓯᑑᓪ ᓄᓇᖃᖅᑳᖅᓯᒪᔪᓂ. ᐃᓕᓴᐃᔨ ᐃᓕᓐᓂᐊᖅᓯᒪᔪᖅ Lakehead ᓯᓚᑦᑐᖅᓴᕐᕕᒡᔪᐊᕐᒥ, ᐃᓕᓴᐃᓯᒪᔪᖅ ᓄᓇᓕᖕᓂ ᐊᒻᒪ ᑎᑎᕋᕐᕕᓕᕆᓂᕐᒥᒃ ᐱᓕᕆᓪᓗᓂ. ᐅᑭᐅᖅᑕᖅᑐᒧᑦ ᐊᒃᑐᐊᔪᑦ ᐊᖅᑯᑎᒋᔭᐅᓪᓗᑎᒃ, ᒪᓂᑑᐸᐱ ᐃᓕᓐᓂᐊᖅᑎᑦᑎᓲᖑᕗᑦ ᐊᓐᓄᕌᖅᓯᒪᓂᕐᒥᒃ ᐊᒻᒪ ᓄᓇᓕᖕᓂ ᓯᕗᓕᖅᑎᐅᓪᓗᑎᒃ ᐱᓕᕆᐊᒧᑦ.

ᐊᓐᓄᕌᓕᐅᕆᐅᖅᓴᑎᓪᓗᒋᑦ, ᐃᓕᓐᓂᐊᖅᑏᑦ ᐃᓕᑦᑎᓲᖑᕗᑦ ᐃᓕᓴᐃᓂᕐᒥᒃ ᖃᐅᔨᓴᐅᑎᒃᑯᑦ ᒧᒥᖅᑏᑦ ᒥᒃᓵᓄᑦ, ᖃᓄᖅ ᑎᑕᒃᑎᑦ ᑐᓐᓂᖅᑯᑎᖃᓚᐅᕐᒪᖔᑦ ᐅᕙᑦᑎᓐᓄᑦ ᐊᒻᒪ 365-ᓂᒃ ᐊᓐᓄᕋᔾᔨᐅᕈᓯᕐᓂᒃ ᐊᓐᓄᕋᔾᔨᐅᕈᓯᑐᖃᒃᑯᑦ. ᐊᑦᑕᕐᓇᙱᑦᑐᒥ ᐃᓂᒥ ᐱᓕᕆᖃᑎᒌᖕᓂᕐᓂ, ᐃᓕᓐᓂᐊᖅᑏᑦ ᐃᓛᓐᓂᒃᑯᑦ ᐊᒥᖅᑳᕈᑎᖃᖅᐳᒃ ᐊᓐᓄᕌᓂᒃ ᓇᖕᒥᓂᖅ ᖃᑕᙳᑎᖏᓐᓂ ᐃᓕᓴᐃᔾᔪᑎᖏᓐᓂᒡᓗ.

ᓄᑲᖅᑎᖅᐹᖓ ᐃᕐᓂᖓ, ᓄᑕᕋᑯᓗᒃ, ᐃᓚᐅᖃᑕᐅᒐᔪᒃᑐᖅ ᐃᓕᓐᓂᐊᕐᓇᓂ, ᐱᑲᐅᖅᑐᕐᖢᓂ ᕿᓚᐅᑎᒥᒃ ᐅᖃᓗᒃᑳᖓᒥ. ᐊᖏᔪᑦᑎᖅᐹᖅ ᐃᕐᓂᖓ ᐃᖅᑲᓇᐃᔭᖃᑦᑕᖅᑐᖅ ᑐᐊᕕᕐᓇᖅᑐᓕᕆᔨᒃᑯᓐᓄᑦ ᐊᒻᒪᓗ ᐸᓂᖓ ᐃᓕᓐᓂᐊᖅᑐᓂ ᓂᐱᓯᖕ ᓯᓚᑦᑐᓴᕐᕕᕐᔪᐊᖓᓂ. ᓄᑲᖅᑎᖅᐹᒥᓂᒃ ᐱᕈᖅᓴᐃᓚᐅᖅᑐᖅ ᐃᓄᑑᓪᓗᓂ ᐊᖓᔪᖅᑳᖑᓪᓗᓂ.

ᐃᓅᓂᑯ 1960−ᖏᓐᓂ ᓯᑰᑉ, ᒪᓂᑑᐱ ᓇᖕᒥᓂᖅ ᐊᓈᓇᖓᑕ ᑲᒪᒋᙱᖦᖢᓂᐅᒃ ᑭᓯᐊᓂ ᒪᕐᕉᓕᕐᖢᓂ. ᒪᒃᑯᓛᖑᓪᓗᓂ ᖃᑕᙳᑎᖏᓐᓂ, ᐱᕈᖅᓴᓚᐅᖅᑐᖅ ᑐᓵᓪᓗᓂ ᐅᖃᐅᓯᖅᑕᖏᓐᓂ ᐅᖃᓪᓚᖕᓂᖏᓐᓂ ᐃᓕᑦᑎᓪᓗᓂᓗ ᐃᓕᖅᑯᓯᖏᓐᓂ, ᓴᐸᖓᓕᕆᓂᕐᓂ, ᐊᒻᒪ ᒥᖅᓱᕐᓂᕐᒥᒃ ᒪᑦᓗᒃᓂᒃ, ᒥᑎᕐᓂᒃ ᐊᒻᒪ ᒥᖅᑯᓕᖕᓂᒃ ᓇᓴᕐᓂᒃ. ᐅᕕᓂᓕᕆᔪᓐᓇᖅᓯᓚᐅᕐᒥᔪᖅ ᐊᒻᒪ ᒥᑎᕐᒥᑦ ᓴᓗᒻᒪᖅᓴᐃᔪᓐᓇᖅᓯᓪᓗᓂ ᐊᒻᒪ ᖁᕕᐊᓱᓕᕐᓇᖅᖢᓂ ᕿᑐᕐᖓᖏᑦ ᑕᑯᔪᓐᓇᖅᓯᓪᓗᓂᒋᑦ ᐊᔪᕈᓐᓃᖅᓴᖅᑎᓪᓗᒋᑦ, ᐊᓗᐱᕈᓱᒃᑎᑉᐸᒃᖢᒋᑦ ᐊᒻᒪ ᖃᑕᙳᑎᖏᑦ ᐊᖏᕐᕋᐅᑎᓪᓗᓂᒋᑦ.

ᐃᓕᓐᓂᐊᓪᓚᕆᓕᕋᒥ, ᒪᓂᑑᐱᐅᑉ ᐊᓈᓇᖓ ᑎᓕᐅᕆᓪᓗᓂ ᑲᔪᓯᖁᓪᓗᒍ ᐃᓕᓐᓂᐊᕐᓂᖓᓂᒃ ᖁᑦᑎᒃᑐᒃᑯᑦ. ᐊᓈᓇᖓᑕ ᐱᔪᒪᔭᖓ ᒪᓕᒃᖢᒍ, ᐱᓇᔪᒃᐳᖅ PhD−ᒥᒃ ᖃᐅᔨᓴᖅᖢᓂᓗ ᖃᕆᑕᐅᔭᒃᑯᑦ ᐃᓕᑦᑎᕙᓪᓕᐊᓂᕐᒥᒃ, ᐱᕙᒌᔭᖅᖢᓂ ᐊᐱᖅᓱᕈᒪᓪᓗᓂ ᖃᐅᔨᒪᓂᕆᔭᐅᔪᓂᒃ ᐱᓯᒪᕙᒃᑐᓂᒃ ᖃᓄᖅ ᐃᓱᒪᒋᔭᖃᕐᒪᖔᑕ ᐃᓕᑦᑎᕙᓪᓕᐊᓂᕆᔭᐅᔪᒥ ᑲᔪᓯᑎᑕᐅᔪᓐᓇᖅᑐᒥ ᐅᑯᑎᒎᓇᖅ, ᐊᑕᖃᑦᑕᐅᑎᓂᒃᑯᑦ ᐅᑭᐅᖅᑕᖅᑐᒥ. ᐃᓕᓐᓂᐊᕐᕕᒃ ᑎᑭᐅᑎᓴᕋᐃᓐᓇᓚᐅᙱᑦᑐᖅ.

ᐊᖓᔪᒃᖡᑦ ᐃᓕᓐᓂᐊᕐᕕᖕᒥ, ᒪᓂᑑᐸ ᑭᒡᒐᖅᑐᖅᑕᐅᓚᐅᖅᐳᖅ ᓄᓇᖃᖅᑳᖅᓯᒪᔪᑦ ᐱᐅᓯᕆᔭᐅᕙᓚᐅᖅᑐᑦ ᐃᓕᓐᓂᐊᖅᑕᐅᔪᓄᑦ, ᐅᖃᐱᓘᑎᖃᓚᐅᖅᐳᑦ ᑕᒻᒪᖅᓯᒪᙱᑦᑐᓂᒃ ᐃᓕᓐᓂᐊᖅᑎᑦᑎᔾᔪᑕᐅᓚᐅᖅᑐᓂᒃ ᐱᐅᓯᕆᔭᐅᕙᓚᐅᖅᑐᓂᒃ. ᑭᒡᒐᖅᑐᐃᓚᐅᕐᒥᔪᖅ ᓄᓇᖃᖅᑳᖅᓯᒪᔪᑦ ᐅᖃᐅᓯᖓᓂ ᐃᓕᓐᓂᐊᖅᑎᑦᑎᓂᕐᒥᑦ ᐃᓕᓐᓂᐊᕐᕕᖕᒥ, ᐊᐃᕙᔾᔪᑎᖃᖅᖢᓂ ᓈᒻᒪᓚᐅᙱᒻᒪᑦ ᐅᐃᕖᑎᑑᕆᐊᖃᕋᓗᐊᖅᖢᑎᒃ ᐃᓕᓐᓂᐊᕈᓐᓇᖅᑎᓪᓗᒋᑦ.

ᐃᓕᓐᓂᐊᕌᓂᓵᖅᖢᓂ, ᐃᓕᓴᐃᔨᓄᑦ ᐃᑲᔪᖅᑎᐅᓂᕐᒧᑦ ᐃᓕᓐᓂᐊᓚᐅᖅᐳᖅ, ᖃᐅᔨᓴᖅᑕᐅᒃᑲᓐᓂᖅᐸᒃᖢᓂ ᐃᓕᓐᓂᐊᖃᑕᐅᑎᓪᓗᒍ ᐃᓕᓐᓂᐊᕐᕕᐊᕈᓯᓕᒫᓂᒃ. ᑕᐃᑲᓃᑎᓪᓗᒍ, ᐃᓕᓐᓂᐊᖃᑕᐅᓚᐅᖅᑐᖅ ᓄᓇᖃᖅᑳᖅᓯᒪᔪᑦ ᒪᓕᒐᖏᓐᓂᒃ ᐊᒻᒪ ᑭᒡᒐᖅᑐᐃᓂᕐᒥᒃ ᑕᐃᑲᓂᓗ ᐃᓕᑦᑎᓚᐅᖅᓯᒪᓪᓗᓂ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓂᒃ ᐊᒻᒪ 60-ᖏᓐᓂ ᓯᑰᑉ ᒥᒃᓵᓄᑦ. ᑖᓐᓇ ᐃᓕᓐᓂᐊᖅᑕᖓ ᐅᖃᓚᐅᖅᓯᒪᔪᖅ ᐃᖅᑲᓇᐃᔭᕐᓂᕋᖅᖢᓂ ᐱᖓᓲᓕᖓᔪᓂᑦ ᑲᑎᒪᔨᐅᔪᓂᑦ ᐊᒻᒪᓗ ᐊᑐᕐᓗᓂᐅᒃ ᐱᔪᓐᓇᕐᓂᓂ ᐱᐅᔪᒧᑦ ᐊᒻᒪᓗ ᑕᐃᒪᐃᑐᐃᓐᓇᓚᐅᖅᑐᖅ ᐃᓕᓐᓂᐊᕆᐊᕋᓱᐊᕐᓂᖓᓂ.

ᓯᕗᓪᓕᖅᐹᒥ ᐊᕐᕌᒍᒥ ᐃᓕᓴᐃᔨᓄᑦ ᐃᑲᔪᖅᑎᐅᓂᕐᒧᑦ ᐱᓕᒻᒪᒃᓴᖅᑎᓪᓗᒍ Confederation College−ᑯᓐᓂ ᑕᓐᑐ ᐸᐃᒥ, ᐊᖓᔪᖅᑳᕆᓚᐅᖅᑕᖓ ᑎᓕᐅᕆᓚᐅᖅᐳᖅ ᐃᓕᓴᐃᔨᙳᐃᓐᓇᖁᓪᓗᒍ. ᐱᓇᓱᐊᓚᐅᖅᑐᖅ ᓯᓚᑦᑐᓴᕐᕕᔾᔪᐊᒧᑦ ᐃᓯᖅᑐᓂᓗ. ᑐᓂᔭᐅᓪᓗᓂ ᐃᓕᓐᓂᐊᕆᐊᖅᑎᑕᐅᓂᕐᒧᑦ ᓄᓇᖃᖅᑳᖅᓯᒪᔪᑦ ᐃᓕᓴᐃᔨᕈᖅᓴᓂᕐᒧᑦ ᐱᓕᕆᐊᒧᑦ, ᐊᐱᕆᔭᐅᓚᐅᖅᑐᖅ ᐃᓕᔭᐅᓂᕐᒧᑦ ᐱᒋᐊᙵᐅᑎᓪᓗᐊᑕᖓᓄᑦ ᐱᓕᕆᐊᒧᑦ ᐊᖏᖅᑕᐅᓪᓗᓂᓗ.

ᐃᓕᓴᐃᔨᐅᓂᕐᒥᓂ, ᒪᕐᕉᖕᓂᒃ ᓄᑕᕋᖃᓚᐅᖅᑐᖅ ᑲᒪᔭᕆᐊᖃᖅᑐᓂᒃ ᑲᒪᒋᔭᖃᑦᑎᐊᕐᖢᓂᓗ ᐊᓈᓇᒥᓂᒃ. ᐊᓈᓇᖓ ᐃᓅᔪᓐᓃᕐᒪᑦ ᐃᒃᐱᓐᓇᐃᑦᑐᓕᓂᖃᕐᓂᕐᒧᑦ, ᐊᐱᕆᓪᓗᓂ ᐱᓪᓗᓂᓗ ᐊᕐᕌᒍᒥᒃ ᓄᖅᑲᖓᑎᖦᖢᒍ ᐱᓕᕆᐊᒃᓴᖓᓂ ᑕᐅᑐᓪᓗᐊᑕᕐᓗᓂ ᕿᑐᕐᖓᖏᓐᓂᒃ ᑲᒪᒋᓗᒍᓗ ᕿᒃᓵᖕᓂᖓ. "ᓴᙱᓇᓱᒍᓐᓇᓚᐅᕋᓗᐊᖅᑐᖓ ᐊᒻᒪ ᓄᓱᒃᓯᑲᑕᐃᓐᓇᕐᓗᖓ, ᕿᒃᓵᖕᓂᕋ ᐋᒃᑳᕐᓗᒍ ᐊᒻᒪ ᐃᑲᔪᖅᓱᖅᑕᐅᔪᒪᙱᖦᖢᖓ. ᐅᖃᕆᐊᖃᓚᐅᖅᑐᖓ, ᐃᑲᔪᖅᑐᖅᑕᐅᔭᕆᐊᖃᓚᐅᖅᑐᖓ. ᐱᕕᖃᕆᐊᖃᓚᐅᖅᑐᖓ. ᐃᓂᖃᕆᐊᖃᓚᐅᖅᑐᖓ ᐃᒃᐱᒋᔭᕆᐊᖃᕐᖢᒍᓗ," ᐃᖅᑲᐅᒪᔪᖅ. ᓇᖕᒥᓂᖅ ᐊᖅᑯᑎᒋᓂᐊᖅᑕᒥᓂᒃ ᓇᓂᓯᓚᐅᖅᑐᖅ ᕿᓄᐃᓵᕋᓱᒃᓗᓂ ᐊᒃᓱᕈᕐᓇᖅᑐᒃᑰᖅᑎᓪᓗᒍ, ᓇᓂᓯᒐᒥ ᓇᖕᒥᓂᖅ ᐊᖅᑯᑎᒋᓂᐊᖅᑕᖓᓂᒃ ᑲᔪᓯᑦᑎᐊᕐᓂᕐᒧᑦ, ᓇᖕᒥᓂᕆᒐᓗᐊᕈᓂᐅᒃ ᖃᑕᙳᑎᖏᓪᓘᓐᓃᑦ.

ᐃᓛᓐᓂᒃᑯᑦ ᓄᓇᒋᙱᑕᒥᓂᒃ ᐊᐅᓪᓚᕈᑕᐅᖃᑦᑕᓚᐅᖅᐳᖅ, ᓴᑦᐳᕆᒧᑦ ᐊᒻᒪ ᒥᓂᓲᑕᒧᑦ ᐸᓂᖓ ᕼᐋᑭᕆᐊᖅᑐᖅᖢᓂ. ᐃᖅᑲᓇᐃᔮᔅᓴᖅᓯᐅᕆᐊᖃᓚᐅᖅᐳᖅ ᓄᑖᒥ ᑲᓇᑕᒥ ᐊᒻᒪ ᐱᓇᓱᐊᖅᑐᓂ ᒪᕐᕉᓐᓂᒃ ᓄᓇᖃᖃᑕᐅᓂᕐᒧᑦ. ᐊᑲᐅᓚᐅᙱᑦᑐᖅ ᑲᒪᒋᓪᓗᒍ ᑭᒡᓕᒋᔭᖓᑦ ᖃᐅᔨᓴᕐᓗᓂ ᐸᓂᖓᑕ ᓯᓐᓇᒃᑑᒪᓂᖓ ᓱᓕᓕᖁᓪᓗᒍ ᑭᓯᐊᓂ ᖃᐅᔨᓪᓗᓂ. ᑎᓕᐅᕆᔪᖅ ᐃᓄᓐᓂᒃ ᖃᐅᔨᒋᐊᖁᔨᓪᓗᓂ ᖃᓄᖅ ᐱᕙᓪᓕᐊᔾᔪᓯᖃᕐᒪᖔᖅ ᑎᑭᐅᑎᒐᓱᐊᕐᓗᑎᒃ ᓯᓐᓇᑦᑑᒪᒋᔭᒥᓐᓂᒃ ᐊᒻᒪᓗ ᒪᓕᖁᓪᓗᒋᑦ ᐆᒻᒪᑎᒥᓂᒃ. "ᑎᓕᐅᕆᕗᖓ ᐃᓕᓐᓂᒃ, ᐱᕕᒃᓴᖅᑕᖃᖅᐸᑦ ᐃᓕᖕᓂᒃ ᕿᒪᕉᑎᓯᒪᓚᐅᑲᒡᓗᑎᑦ, ᑕᒪᓐᓇ ᐱᕕᒃᓴᖅ ᖃᐅᔨᓇᓱᒡᓗᒍ. ᐃᓛᒃ, ᑕᐃᒪᐃᒐᓱᐊᖅᐸᑦ, ᖃᓄᐃᑦᑐᖃᕐᓂᐊᕐᒪᖔᖅ, ᑕᒻᒪᖏᑦᑐᖅ?" ᖁᖓᑦᑐᖅ.

ᐅᑉᐱᕈᓱᐃᓐᓇᐅᔭᖅᑐᖅ ᑯᕇᑐᒥᒃ ᑎᒍᒥᐊᕐᒪᑦ ᓇᒧᙵᐅᓂᐊᕐᓂᕐᒥᓂᒃ ᐊᒻᒪᓗ ᖃᓄᐃᓕᐅᕐᒪᖔᖅ. ᐱᔪᓐᓇᕐᓂᓕᒫᒥᓂᒃ ᐱᓕᕆᖃᑦᑕᖅᑐᖅ ᐊᒻᒪᓗ ᐅᑉᐱᕈᓱᒍᓐᓇᑎᐊᖅᑐᓂ ᐊᒻᒪᓗ ᐊᒃᓱᕈᖅᑐᓂ ᐱᓕᕆᓯᒪᔪᖅ ᓇᒥᓕᒫᖅ. ᐊᐃᑉᐸᖃᙱᑦᑐᖅ ᐊᓈᓇᐅᔪᖅ, ᕿᑐᕐᖓᒥᓂᒃ ᐱᕈᖅᓴᐃᔪᖅ ᐊᒻᒪ ᓇᖕᒥᓂᖅ ᓂᕆᐅᒋᔭᒥᓂᒃ ᑭᓱᑦ ᐊᔪᕐᓇᙱᒻᒪᖔᑕ, ᐃᓕᓐᓂᐊᕋᓱᒃᖢᓂ ᐃᓕᓴᐃᔨᙳᖅᖢᓂᓗ. ᔭᓇᕗᕐ ᒪᓂᑑᐱ ᑎᓕᐅᕆᕗᖅ ᐃᓄᖕᓂᒃ ᐊᓂᖁᓪᓗᒋᑦ ᐊᑲᐅᒋᔭᒥᓂ ᐱᓇᔪᖁᓪᓗᒋᑦ ᑭᓱᓂᒃ ᐱᔾᔪᑎᖃᕐᒪᖔᑕ, ᐃᒪᐃᓐᓂᖓᓄᑦ, ᑕᐃᒪᐃᓕᐅᓚᐅᕐᒪᑦ ᑕᒪᒃᑯᐊ ᐱᔪᒪᔭᖏᑦ ᓱᓕᓕᖅᑎᑦᑐᒪᓪᓗᒋᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.