ᐃᓅᓯᖓ ᐊᒃᑐᖅᑕᐅᓯᒪᕗᖅ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓄᑦ ᑎᑎᕋᖅᑕᐅᓪᓗᑎᒡᓗ ᐊᒻᒪ ᑐᓴᖅᑎᑦᑎᓪᓗᑎᒃ ᐱᐅᓯᕆᔭᐅᕙᓚᐅᖅᑐᓂᒃ ᐃᓅᓯᕆᓚᐅᖅᑕᖓᓂ. ᑲᐃᓚ ᔮᓐᔅᑕᓐ ᑭᖑᕚᕇᓄᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓄᑦ ᐃᓚᒋᔭᐅᓪᓗᓂᓗ Ochapowace First Nation−ᑯᓐᓄᑦ. ᐊᓈᓇᖓ, ᐊᓈᓇᑦᑎᐊᒃᑯᖏᑦ,ᐊᑖᑕᑦᑎᐊᒃᑯᖏᑦ, ᐊᓈᓇᑦᑎᐊᖏᑦ, ᐊᒻᒪ ᖃᑕᙳᑎᖏᑦ ᐃᓕᓐᓂᐊᕐᕕᓕᐊᖃᑦᑕᓚᐅᖅᐳᑦ ᓴᔅᑳᑦᓱᐋᓐᒥ ᐊᒻᒪ ᐋᓪᐴᑕᒥ. ᔮᓐᓯᑕᓐ ᐱᕈᖅᓴᓚᐅᖅᓯᒪᕗᖅ ᐅᐃᓂᐹᒡᒥ ᐊᒻᒪ ᐱᓕᕆᕙᒃᖢᓂ ᑲᓇᑕᒥ ᑐᑦᑕᕐᕕᖕᒥ ᓱᓕᔪᒥᒃ ᐃᓱᒪᒋᔪᓐᓇᐃᖃᑎᒌᖕᓂᕐᒧᓪᓗ ᓯᓚᑦᑐᖅᓴᕐᕕᒡᔪᐊᖓᓂ ᒫᓂᑑᐸᒥ ᐃᓕᓐᓂᐊᕐᓂᓕᕆᓂᕐᒧᑦ ᑐᑭᒧᐊᒃᑎᑦᑎᔨᐅᓪᓗᓂ.

ᐃᓕᓐᓂᐊᖅᑎᐅᓪᓗᓂ ᓯᓚᑦᑐᖅᓴᕐᕕᒡᔪᐊᖓᓂ ᐅᐃᓂᐹᒡᒥ ᐱᒋᐊᓵᖅᑎᓪᓗᒍ ᓱᓕᔪᒥᒃ ᐃᓱᒪᒋᔪᓐᓇᐃᖃᑎᒌᖕᓂᕐᒧᓪᓗ ᑭᒡᓕᓯᓂᐊᖅᑏᑦ, ᓯᕗᓪᓕᖅᐸᐅᖃᑕᐅᓚᐅᖅᑐᖅ 25-ᓂᒃ ᐃᓄᖕᓂᒃ ᐱᓕᒻᒪᒃᓴᖃᑕᐅᓪᓗᓂ ᐅᖃᓪᓚᒍᓐᓇᕐᓂᕐᒧᑦ. ᑲᑎᖅᓱᐃᓚᐅᖅᑐᖅ ᐅᖃᐅᓯᒃᓴᓂᒃ ᑲᓇᑕᒥ ᐊᒻᒪ ᐊᕕᒃᑐᖅᓯᒪᔪᓂ ᖃᓄᐃᓕᐅᕐᓇᓂ ᑕᐃᒪᙵᓪᓗ ᐊᐅᓚᑦᑎᔨᐅᖃᑦᑕᖅᓯᒪᓪᓗᓂ ᐅᖃᐅᓯᒃᓴᓂᒃ ᑲᑎᖅᓱᐃᓂᕐᒧᑦ, ᐱᓕᕆᓪᓗᓂ ᓄᓇᓕᖕᓂ ᐃᓚᐅᑎᑦᑎᓂᕐᒧᑦ ᖃᐅᔨᓴᕐᓂᕐᒧᓪᓗ ᓇᓂᓯᓚᐅᙱᑎᓪᓗᒍ ᐃᓂᒃᓴᖓᓂᒃ ᐃᓕᓐᓂᐊᕐᓂᓕᕆᔨᒃᑯᑦ ᐃᖅᑲᓇᐃᔭᕐᕕᖓᓂ. 

ᒫᓐᓇ ᐱᓕᕆᐊᕆᔭᖓᓂ, ᔮᓐᓯᑕᓐ ᐃᑲᔪᖅᓱᐃᓲᖑᕗᖅ ᐃᓕᓴᐃᔨᓂᒃ ᐊᒻᒪ ᐃᓕᓐᓂᐊᖅᑎᓂᒃ ᐱᕙᓪᓕᐊᑎᑦᑎᑎᓪᓗᒋᑦ ᐃᑲᔫᑎᒃᓴᓂᒃ, ᑐᓴᐅᒪᑎᑦᑎᓂᕐᒧᑦ ᐱᓕᕆᐊᖑᕙᓪᓕᐊᔪᒪᔪᓂᒃ ᐊᒻᒪ ᐃᓄᖕᓂᒃ ᐃᓚᐅᑎᑦᑎᓂᕐᒥᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓄᑦ ᐊᓯᖏᓐᓄᓪᓗ ᖃᓪᓗᓈᖑᖃᑎᒌᙱᑦᑐᓄᑦ ᐱᓕᕆᔾᔪᓯᕐᓄᑦ. ᑲᒪᒋᔭᖃᕐᓂᕐᒥᑦ ᐅᖃᐅᓯᕐᓂᑦ ᓄᐊᑦᓯᓂᕐᒥᑦ ᐃᑲᔪᕐᓂᕐᒥᓪᓗ ᓄᓇᓕᓐᓂᑦ ᑎᑎᕋᕐᓂᕐᒥᑦ ᑐᖅᑯᖅᓯᓂᕐᒥᓪᓗ ᐅᓂᒃᑳᖏᓐᓂᑦ ᐃᓕᓐᓂᐊᕆᐊᖅᐸᓯᒪᔪᓄᑦ ᐅᓪᓗᒃᑯᓪᓗ ᐃᓕᓐᓂᐊᕐᕕᓐᓄᑦ ᐊᑦᑐᐊᓂᖃᖅᑐᓂᓪᓗ ᐱᐅᓯᕆᔭᐅᕙᖅᓯᒪᔪᓂᑦ ᐊᓯᖏᓐᓂᑦ ᑲᒪᒋᒋᐊᓕᖏᓐᓂᑦ. 

ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᓚᐅᖅᑎᓪᓗᒋᑦ, ᔮᓐᓯᑕᓐ ᓯᓚᑦᑐᖅᓴᕐᕕᒡᔪᐊᖓᓄᐊᓚᐅᖅᐳᖅ ᐅᐃᓂᐹᒡᒥ ᐊᒻᒪ BA−ᒥ ᐅᐱᒋᔭᐅᓪᓗᓂ ᐱᕋᔭᒃᐸᒃᑐᓄᑦ ᒪᓕᒐᓕᕆᓂᕐᒥᒃ, ᐸᓖᓯᓕᕆᔪᒪᒐᓗᐊᖅᖢᓂ ᐅᕝᕙᓘᓐᓃᑦ ᑎᒍᔭᐅᓯᒪᕝᕕᓕᕆᔪᒪᓪᓗᓂ. ᐃᓚᖓᑦ ᐅᖃᐅᔾᔪᐃᔨᖓᑕ ᐊᑕᓕᖅᑎᖦᖢᓂᐅᒃ ᓱᓕᔪᒥᒃ ᐃᓱᒪᒋᔪᓐᓇᐃᖃᑎᒌᖕᓂᕐᒧᓪᓗ ᑭᒡᓕᓯᓂᐊᖅᑎᒃᑯᓐᓄᑦ ᑲᓇᑕᒥ ᐃᖅᑲᓇᐃᔭᖅᑎᓪᓗᒍᓗ ᐱᓇᔪᒍᒪᓕᕐᖢᓂ ᖁᑦᑎᖕᓂᖅᐹᒥ ᐃᓕᓐᓂᐊᕌᓂᒍᓯᐊᕐᒥᒃ. ᐱᔭᕇᖅᓯᓚᐅᖅᑐᖅ ᐱᔭᕇᖅᓯᔾᔪᓯᐊᕐᒥᑦ ᖃᐅᔨᓴᕐᓂᕐᒧᑦ ᓄᓇᕐᔪᐊᓕᒫᒥᑦ ᐱᕋᔭᓐᓂᕐᒧᑦ ᐱᕋᔭᓐᓂᕐᒧᓪᓗ ᖃᐅᔨᓴᕐᓂᕐᒧᑦ Vrije ᓯᓚᑦᑐᓴᕐᕕᕐᔪᐊᕐᒥᑦ, Amsterdam.

ᔮᓐᓯᑕᓐ ᓇᒡᓕᒋᔭᐅᓚᐅᖅᐳᖅ ᐋᒻᔅᑕᑕᑕᒻ−ᒧᑦ ᓂᕈᐊᖅᖢᓂᓗ ᑕᒪᑐᒥᖓ ᐱᓕᕆᐊᒃᓴᒥᒃ ᑕᐃᒪᐃᔾᔪᑎᖃᖅᖢᓂ ᓄᓇᕐᔪᐊᓕᒫᒥ ᐱᕋᔭᒃᐸᒃᑐᓄᑦ ᐃᖅᑲᖅᑐᐃᕕᒋᔭᐅᔪᒥᒃ ᐅᕙᓂ, Hague. ᐊᐅᓪᓚᓚᐅᕐᒥᔪᖅ ᕈᐋᓐᑕᒧᑦ ᐊᒻᒪ, ᐃᓕᓐᓂᐊᓚᐅᖅᑐᖅ ᐊᓯᔾᔨᖅᐸᓪᓕᐊᓂᕐᒧᑦ ᒪᓕᒐᓕᕆᓂᕐᒧᑦ ᑲᓇᑕᒥ ᐊᒻᒪ ᕈᐋᓐᑕᒧᑦ, ᖃᐅᔨᓴᖅᖢᓂ ᐊᔾᔨᐸᓗᖏᓐᓂᒃ ᐊᒻᒪ ᐊᔾᔨᒌᙱᓐᓂᖏᓐᓂᒃ ᑕᑯᓪᓗᒍ ᓱᓕᔪᒥᒃ ᐃᓱᒪᒋᔪᓐᓇᐃᖃᑎᒌᖕᓂᕐᒧᓪᓗ ᑭᒡᓕᓯᓂᐊᖅᑎᑦ.

ᐊᖏᕐᕋᒥᓂᒃ ᐅᖓᓯᒃᖢᓂ, ᐃᓕᖅᑯᓯᕐᒥᓂ ᐊᓯᔾᔨᕐᓂᖃᓚᐅᖅᐳᖅ ᐃᓕᓐᓂᐊᕆᐊᖃᓚᐅᖅᖢᓂᓗ ᐊᒃᑐᐊᓂᖃᐃᓐᓇᕐᓂᕐᒥᒃ ᐃᓕᖅᑯᓯᑐᖃᕐᒥᓄᑦ ᐊᑐᖅᑕᐅᕙᒃᑐᑐᖃᕐᓄᓪᓗ. ᑕᕆᐅᑉ ᐊᑭᐊᓂᙶᖅᑐᓂᒃ ᓄᒃᑕᖅᖢᓂ ᑐᒃᑲᕆᐊᓕᒃᑯᓪᓗ ᐊᔪᕐᓇᓚᐅᙱᑦᑐᖅ ᑭᓯᐊᓂ ᓱᓕ ᐋᖅᑭᒋᐊᖅᑕᐅᓚᐅᖅᐳᖅ. ᓯᕗᓪᓕᖅᐹᒥ ᑮᓇᐅᔭᖅᑖᓚᐅᕋᓂ, ᑮᓇᐅᔭᒃᑯᕕᒻᒥᒃ ᐊᑐᖅᑐᐊᕆᐊᖃᓚᐅᖅᑐᖅ, ᑭᓯᐊᓂ ᑎᑕᒃᑎᖏᑦ ᑮᓇᐅᔭᖅᑖᖏᑦ ᑲᔪᓯᓚᐅᖅᑐᑦ. ᑖᒃᑯᐊ ᑮᓇᐅᔭᐃᑦ ᐊᓯᔾᔨᖅᑎᓪᓗᒋᑦ ᐊᒻᒪᓗ ᑕᐃᒃᑯᐊ ᐱᓕᕆᐊᕆᓚᐅᖅᑕᖏᑦ, ᐅᖃᐅᔾᔨᒋᐊᕈᑎᖏᑦ ᐅᕕᒃᑲᕐᓄᑦ ᐃᓱᒪᓪᓗᑎᒃ ᐊᐅᓪᓚᕈᒪᓗᑎᒃ ᑲᓇᑕᐅᑉ ᓯᓚᑖᓄᑦ, "ᖃᐅᔨᓴᕆᐊᖅᑐᕐᓗᑎᒃ, ᖃᐅᔨᒋᐊᕐᓗᑎᒃ ᐊᒻᒪᓗ ᖃᐅᔨᓇᓱᐊᕐᓗᑎᒃ ᓱᓇᐅᒻᒪᖔᑕ ᐊᓯᖏᑦ ᓇᓖᕌᕋᔅᓴᐃᑦ ᑕᖅᑳᓂ ᐊᒻᒪᓗ ᖃᐅᔨᒪᑐᐃᓐᓇᖅᑐᑎᒃ ᑭᓱᑐᐃᓐᓇᐃᑦ ᐊᓯᔾᔨᑐᐃᓐᓇᕆᐊᖃᕐᓂᖏᓐᓂᒃ. ᖃᐅᔨᒪᓚᐅᖅᓯᒪᙱᑦᑐᒍᑦ ᑭᓱᑦ ᐋᖅᑭᒃᓯᒪᓪᓚᑦᑖᕐᒪᖔᑕ ᓯᕗᓂᒃᓴᑦᑎᓐᓂ." 

ᐊᔾᔨᐅᖏᑦᑐᒥᒃ ᐃᓕᓐᓂᐊᕐᓂᖃᖅᓱᑎᒃ, ᔮᓐᓯᑕᓐ ᐳᓚᓐᓕᐊᓚᐅᖅᑐᖅ ᐋᔅᐅᐃᑦᔅ ᓄᓇᓕᕋᓛᖓᓄᑦ ᐊᒻᒪᓗ ᐅᖃᖃᑎᖃᖅᓱᑎᒃ ᐱᕋᔭᑦᑕᐅᓯᒪᔪᓂᒃ, ᐊᓐᓄᕋᔾᔨᐅᖅᑎᓂᒃ, ᐊᒻᒪᓗ ᒐᕙᒪᒃᑯᑦ ᐊᖓᔪᖅᑲᐅᑎᖏᓐᓂᒃ. ᐊᒻᒪᓗ ᓄᓇᕐᔪᐊᕐᒥ ᐱᕋᔭᑉᐸᑦᑐᓄᑦ ᐃᖅᑲᖅᑐᐃᕕᒻᒨᓚᐅᕐᒥᔪᖅ. "ᐊᐱᖅᑯᑎᒋᑐᐃᓐᓇᕆᐊᖃᖅᑕᐃᑦ, ᐊᑑᑎᖃᖅᑲᐅᕙ? ᐊᑯᓂᐊᓘᖅᑎᓪᓗᒍ ᐊᒻᒪᓗ ᐊᑭᖏᑦ ᐊᒻᒪᓗ ᑭᓱᓕᒫᑦ ᐊᖏᔪᕐᔪᐊᒻᒪᕆᐊᓗᒻᒥᒃ ᐱᖃᑦᑕᕐᒪᑕ ᖁᑦᑎᓂᖅᐹᒥᒃ ᐃᓕᓐᓂᐊᖅᑐᑎᒃ, ᐅᕝᕙᓘᓐᓃᑦ ᑕᕆᐅᑉ ᐊᑭᐊᓄᑦ? ᑕᒪᒃᑯᐊᓕᒫᑦ ᐃᑲᔪᖅᓯᒪᔪᑦ ᖃᐅᔨᒪᓂᖅᓴᐅᓂᕐᒧᑦ ᑐᑭᓯᐅᒪᓂᕐᒧᓪᓗ ᖃᓄᖅ ᓄᓇᕐᔪᐊᖅ ᐊᐅᓚᓂᖃᕐᒪᖔᖅ, ᖃᓄᖅ ᐱᓕᕆᖃᑎᖃᕐᓂᕐᒥᑦ ᐃᓄᓐᓂᑦ, ᖃᓄᕐᓗ ᖃᐅᔨᒋᐊᕐᕕᒋᔪᓐᓇᕐᒪᖔᑦᑎᒍᑦ ᖃᓄᐃᓕᐅᕐᓂᐅᔪᓄᑦ ᑕᒫᓂ ᑲᓇᑕᒥ ᓱᓕᔪᒥᑦ ᐋᕿᒋᐊᕈᑎᖃᕐᓂᕐᒥᓪᓗ," ᐅᖃᖅᑐᖅ.

ᐊᐳᖅᑕᕈᑕᐅᓕᕌᖓᑕ, ᐊᕐᓇᐅᓪᓗᓂ ᐊᔾᔨᒌᙱᑦᑐᓂᒃ ᐱᐅᓯᑐᖃᕐᓂᒃ, ᔮᓐᓯᑕᓐ ᖃᐅᔨᒐᔪᖕᒪᑦ ᐃᓄᖕᓂᒃ ᐅᖃᐅᓯᖃᖅᑐᓂᒃ ᐅᕕᓂᖃᑎᒌᙱᑦᑐᓂᒃ ᐃᓱᒪᒋᔭᐅᔪᓂᒃ ᐅᔾᔨᕈᓱᙱᖦᖢᓂ ᓄᓇᖃᖅᑳᖅᓯᒪᓂᖓᓂᒃ ᐋᖅᑭᒃᓯᔭᕆᐊᖃᖅᖢᓂᓗ ᐅᖃᓪᓚᒋᐊᖃᕐᒪᖔᑦ ᐃᓕᓐᓂᐊᖅᑎᑦᑎᔭᕆᐊᖃᕐᒪᖔᓪᓗ ᐊᓯᒥᓂᒃ. ᑮᓇᐅᔭᑎᒍᑦ ᑐᓗᖅᑕᕈᑎᖃᖃᑦᑕᓚᐅᕐᒥᔪᖅ ᐃᓕᓐᓂᐊᕋᓱᒃᑎᓪᓗᒍ, ᐃᑲᔪᖅᑕᐅᓇᓱᒃᖢᓂ, ᐃᓕᓐᓂᐊᕆᐊᒃᑲᓐᓂᕈᓯᐊᖅᑖᕋᓱᒃᖢᓂ ᐊᒻᒪ ᑮᓇᐅᔭᖅᑖᕋᓱᒍᓐᓇᖅᖢᓂ. ᐊᓯᐊᒍᑦ, ᔮᓐᓯᑕᓐ ᖃᑕᙳᑎᖏᑦ ᓄᓇᓕᖏᓪᓗ ᐊᒃᑐᖅᑕᐅᓯᒪᔪᑦ ᓄᓇᑐᖃᕆᙱᑕᒥᓄᑦ ᓄᓇᑖᖃᑕᐅᓯᒪᙱᑦᑐᓄᓪᓗ ᕿᓂᕐᖢᓂᓗ ᖃᓄᖅ ᐅᑎᖅᑎᑦᑎᔪᓐᓇᕐᒪᖔᑦ ᐊᔪᙱᒃᑳᖓᑦ. 

ᒪᒃᑯᖕᓂᖅᓴᓂᒃ ᐅᖃᐅᔾᔨᔪᓐᓇᕈᓂ ᐅᖃᕋᔭᖅᑐᖅ ᓂᕈᐊᕈᓐᓇᕐᓂᕋᕐᓗᓂ ᐊᒻᒪᓗ ᓇᖕᒥᓂᖅ ᐊᖅᑯᑎᓕᐅᕐᓗᓂ ᑐᙵᕕᖃᕐᓗᓂ ᐱᔪᒪᔭᖏᓐᓂᒃ ᐆᒻᒪᑎᖓᑕ, ᒪᓕᒋᐊᖃᙱᑦᑐᖅ ᖃᓄᑐᐃᓐᓇᖅ ᐊᑐᖁᔭᐅᓯᒪᔪᓂᒃ ᐊᖅᑯᑎᓂᒃ. ᑎᓕᐅᕆᒐᔭᕐᒥᔪᖅ ᓇᒻᒥᓂᖅ ᐃᓱᒪᑦᓴᖅᓯᐅᖁᔨᑦᓱᓂ ᐃᑲᔪᖅᑐᖅᑕᐅᓂᕐᒥᓂᒃ, ᐃᓄᐃᑦ ᐃᑲᔪᖅᓯᖅᑐᑦ ᐊᒻᒪᓗ ᐃᑲᔪᕈᒪᔪᓂᒃ. ᑭᖑᓪᓕᖅᐹᒥ, ᒪᒃᑯᖕᓂᖅᓴᖅ ᐃᖕᒥᓂᒃ ᖁᓱᔪᓐᓃᖁᓇᔭᖅᑕᖓ. 

"ᓴᙱᔫᔪᖓ, ᓴᐱᓕᖅᓴᕋᐃᙱᖦᖢᖓ ᓄᓇᖃᖅᑳᖅᓯᒪᔪᓂᒃ ᐊᕐᓇᐅᔪᖓ."

ᐃᓱᒪᖓ ᖃᐅᔨᒋᐊᖃᑦᑕᕐᓗᒍ, ᔮᓐᔅᑕᓐ ᑏᕖᒃᑯᑦ, ᑕᕐᕆᔭᐅᓯᐅᕐᓂᒃᑯᑦ, ᑐᓴᕐᓈᕐᓂᒃᑯᑦ ᐊᒻᒪ podcasts−ᒧᑦ, ᑎᔅᓯᓈᕿᓐᓇᖅᑐᓂᒃ ᕿᓂᖅᖢᓂ ᐊᒻᒪ ᓂᐸᓱᒃᖢᓂ ᐊᓂᓇᓱᒃᖢᓂ ᐅᓪᓗᒥ ᐅᖁᒪᐃᒃᓴᓗᐊᒧᑦ. ᖃᐅᑕᒫᖅᓯᐅᑎᓂᒃ ᑎᑎᕋᖃᑦᑕᖁᔨᖃᑦᑕᕆᕗᖅ, ᐅᖃᖃᑎᖃᖅᐸᒡᓗᓂ ᐱᖃᓐᓇᕆᔭᒥᓂᒃ, ᖃᑕᙳᑎᒌᓂᒃ, ᐃᓅᓯᓕᕆᔨᓂᒃ ᐅᕝᕙᓘᓐᓃᑦ ᐃᓐᓇᕐᓂᒃ, ᐃᖃᐃᓕᓴᖅᑐᓂᒃ, ᐊᒻᒪ ᓇᖕᒥᓂᖅ ᑲᒪᒋᑦᑎᐊᕐᓂᕐᒥᒃ ᐅᕕᓂᖕᓂᐊᕐᕕᖕᒥ ᐅᕝᕙᓘᓐᓃᑦ ᐅᕕᓂᖕᓂᐊᕐᕕᖕᒥ. ᑕᑯᓪᓗᓂ ᐊᖕᒪᓗᖅᓯᓯᒪᔪᒥᒃ ᖃᓄᐃᙱᑦᑎᐊᕐᓂᕐᒥᒃ, ᐅᖃᕐᖢᓂ ᓇᓕᒧᒌᒃᑎᑦᑎᓂᕐᒥᒃ ᐃᓱᒪᒃᑯᑦ, ᑎᒥᒃᑯᑦ, ᐃᒃᐱᖕᓂᐊᓂᒃᑯᑦ ᐅᒃᐱᕐᓂᒃᑯᓪᓗ, ᐃᓱᒪᑦᑎᐊᕐᓂᒃᑯᑦ ᐱᕕᖃᕐᓂᒃᑯᓪᓘᓐᓃᑦ.   

ᑲᔪᖏᖅᓴᐃᓂᕐᒧᑦ, ᔮᓐᓯᑕᓐ ᒪᒃᑯᒃᑐᓂᒃ ᑕᐅᑐᒃᑐᖅ. "ᐅᓪᓗᒥ ᖃᐅᔨᕗᖓ, ᒪᒃᑯᒃᑐᑦ ᐃᓕᓐᓂᐊᖅᓯᒪᓂᖅᓴᐅᓕᕐᓂᖏᓐᓂᒃ, ᑐᑭᓯᐅᒪᓂᖅᓴᐅᓂᖏᓐᓂᒃ ᑐᑭᓯᐅᒪᓪᓗᑎᒡᓗ ᐊᓂᒍᖅᑎᓐᓇᓱᒋᐊᖃᖅᐸᒃᑐᓂᒃ ᐅᓪᓗᒥ ᑕᒪᒃᑯᐊᓗ ᐱᔾᔪᑕᐅᓕᖅᐸᒃᑐᑦ ᐊᓂᒍᖅᑎᓐᓇᓱᒋᐊᖃᖅᐸᒃᑐᓄᑦ, ᐊᒻᒪᐃᓛᒃ ᐅᖃᐅᓯᖃᕈᓐᓇᖅᓯᓪᓗᑕ ᒪᑐᐃᙶᖅᑐᒃᑯᑦ, ᖃᓄᐃᓕᐅᕈᓐᓇᖅᐱᑕ? ᖃᓄᖅ ᑲᒪᒋᔪᓐᓇᖅᐱᑎᒍ?" ᒫᕝᔅ. 

"ᐱᓕᕆᐊᒃᓴᕆᔭᐅᔪᖅ ᐊᓂᒍᖅᑎᑦᑎᓂᐊᕐᓗᓂ ᑕᒪᐃᓐᓂᒃ 94−ᓂᒃ ᐱᓕᕆᐊᖑᖁᔭᐅᔪᓂᒃ, ᐅᕝᕙᓘᓐᓃᑦ ᒪᓕᒐᓕᕆᔨᒃᑯᓐᓄᑦ, ᐅᕝᕙᓘᓐᓃᑦ ᐱᔪᓐᓇᐅᑎᒋᔭᐅᔪᓄᑦ ᓱᓕᓂᕋᕈᑎᒧᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ ᐱᔪᓐᓇᐅᑎᖏᓐᓄᑦ, ᑭᓇᑐᐃᓐᓇᑦᑎᐊᒧᑦ ᐃᓄᖕᒧᑦ ᑐᐃᖓᓅᙱᑦᑐᖅ. ᐱᐅᓛᖅ ᐅᖃᐅᔾᔭᐅᔾᔪᑎᒋᓚᐅᖅᑕᕋ ᓇᓂᓯᔪᒪᓂᐅᕗᖅ ᑕᒪᑐᒥᖓ ᐃᓱᒪᒋᔭᐅᔪᒥᒃ, ᓇᓂ ᐱᔪᒃᓯᓂᕆᔭᐃᑦ ᐃᒃᓯᕚᕐᕕᒋᖃᑦᑕᖅᐱᐅᒃ? ᓇᐅᒃᑯᑦ ᓴᙱᓂᑎᑦ, ᑭᒃᑯᑦ ᖃᕆᑕᐅᔭᕐᓃᑦᑐᑦ, ᐊᑐᕈᓐᓇᕐᓗᒋᓪᓗ ᑕᐃᒃᑯᐊ ᐊᔾᔨᒌᖏᑦᑐᑦ ᐊᕙᑎᖏᑦ ᓯᕗᒻᒧᐊᒃᑎᓐᓇᓱᒃᓗᒋᑦ ᐱᕙᓪᓕᐊᓗᑎᒃᓗ. ᑕᑯᕗᖓ ᐊᒥᓱᓂ ᒪᒃᑯᒃᑐᓂ ᐅᓪᓗᒥ," ᑲᔪᓯᓪᓗᓂ, ᐃᓱᒪᒋᔭᖃᖅᖢᓂ ᐱᕙᓪᓕᐊᓂᐅᔪᓂ ᐋᕿᒋᐊᕈᑎᖃᕐᓂᕐᒧᑦ ᐊᐅᓚᑕᐅᓪᓗᓂ ᒪᒃᑯᒃᑐᓄᑦ ᑕᑯᕙᒃᑕᖏᓐᓂ ᓄᓇᓕᖕᓂ.  

"ᐱᓕᕆᐊᒃᓴᕆᔭᐅᔪᖅ ᐊᓂᒍᖅᑎᑦᑎᓂᐊᕐᓗᓂ ᑕᒪᐃᓐᓂᒃ 94−ᓂᒃ ᐱᓕᕆᐊᖑᖁᔭᐅᔪᓂᒃ, ᐅᕝᕙᓘᓐᓃᑦ ᒪᓕᒐᓕᕆᔨᒃᑯᓐᓄᑦ, ᐅᕝᕙᓘᓐᓃᑦ ᐱᔪᓐᓇᐅᑎᒋᔭᐅᔪᓂᒃ ᓱᓕᓂᕋᕈᑎᒧᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ, ᑭᓇᑐᐃᓐᓇᑦᑎᐊᒧᑦ ᐃᓄᖕᒧᑦ ᐊᑕᐅᓯᕐᒧᑦ ᑐᐃᖓᓅᙱᑦᑐᖅ."

ᓄᖅᑲᐅᓯᕐᓗᖓ, ᔮᓐᓯᑕᓐ ᐅᖃᐅᓯᖃᓚᐅᕐᒪᑦ ᒪᓕᒐᓕᐅᖅᑎ ᒧᕋᐃ ᓯᖕᑭᓕᐅᒥᑦ, "ᐃᓕᓐᓂᐊᕐᓂᖅ ᐱᓚᐅᖅᑕᕗᑦ ᑕᕝᕙᓂ, ᐊᒻᒪᓗ ᐃᓕᓐᓂᐊᓂᐅᔪᖅ ᐅᕙᑦᑎᓐᓃᙶᕐᓂᐊᖅᑐᖅ." ᐅᖃᐅᓯᖃᖅᑎᓪᓗᒍ ᐃᓕᓐᓂᐊᖅᑎᑦᑎᓂᕐᒥᒃ ᐃᓄᓐᓂᒃ, ᐅᑉᐱᕈᓱᒃᑭᕗᖅ ᐅᖓᑖᓅᕆᐊᖓᓂᒃ. "ᐃᓕᓐᓂᐊᖅᑎᑦᑎᓂᐅᑉ ᒥᒃᓵᓄᑦ ᐅᔾᔨᕈᓱᖕᓂᐅᓪᓗ ᓄᓇᑦᑎᓐᓂ, ᐃᓕᓴᖅᓯᓂᕐᓗ ᐅᔾᔨᕈᓱᖕᓂᕐᓗ ᐊᒃᓱᕈᕐᓇᖅᑐᖃᕐᓂᖓᓂᒃ ᑐᓗᖅᑕᕈᑎᑕᖃᕐᓂᖓᓂᒃᓗ, ᑭᓯᐊᓂ ᑖᒃᑯᐊ ᐅᕙᑦᑎᓐᓄᑦ ᓇᖏᕆᐊᖃᙱᒻᒪᑕ. ᓯᕗᒧᐊᒍᓐᓇᓂᖅᓴᐅᒍᑦᑕ ᐃᓚᖏᓐᓄᑦ ᑐᕌᒐᑦᑎᓐᓄᑦ ᐅᕝᕙᓘᓐᓃᑦ ᐱᔪᒪᔭᑦᑎᓐᓄᑦ, ᐊᔭᐅᖅᑐᐃᒃᑲᓐᓂᕈᓐᓇᖅᑐᒍᑦ ᐃᓚᖏᓐᓂᒃ ᑕᒪᒃᑯᓂᖓ ᐅᕝᕙᓘᓐᓃᑦ ᖃᐅᔨᒪᔪᒻᒪᕆᐅᓕᕐᓗᑕ ᖃᓄᖅᑑᕈᑎᓂᒃ ᓴᖅᑮᓗᑕ ᑕᒪᒃᑯᓄᖓ ᐊᒃᓱᕈᕈᑕᐅᕙᑦᑐᓄᑦ," ᓯᓐᓇᑦᑑᒪᔪᖅ ᓂᐱᖃᕐᓗᓂ. 

ᐃᓅᓯᖓ ᐊᒃᑐᖅᑕᐅᓯᒪᔪᖅ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓄᑦ ᑎᑎᕋᖅᑕᐅᓪᓗᓂᓗ ᐊᒻᒪ ᑐᓴᖅᑎᑦᑎᓪᓗᓂ ᑕᐃᔅᓱᒪᓂᓂᓴᕐᓂᑦ ᑲᐃᓚ ᔮᓐᓯᑕᓐ ᐃᓅᓯᖓᓂ. ᑲᑎᖦᖢᒋᑦ ᐅᖃᐅᓯᐅᔪᑦ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓐᓂᐊᖅᑎᐅᓪᓗᓂ ᑲᓇᑕᒥ ᑐᑦᑕᕐᕕᙳᖅᖢᓂ ᓱᓕᓂᕐᒧᑦ ᓴᐃᒻᒪᖃᑎᒌᖕᓂᕐᒧᓪᓗ ᑐᑭᒧᐊᒃᑎᑦᑎᔨᐅᓂᕐᒧᑦ, ᓇᓂᓯᓚᐅᖅᑐᖅ ᖃᓄᖅ ᓂᐱᓕᐅᕆᓂᕐᒥᒃ ᑖᒃᑯᓂᖓ ᐱᒻᒪᕆᐅᔪᓂᒃ ᐅᓂᒃᑳᓂᒃ. ᐃᖏᕐᕋᓂᕆᔭᖓ ᐋᔅᐅᐃᑦᔅᒧᑦ, ᕈᐋᓐᑕᒧᑦ, Hague ᐊᒻᒪ ᐊᖏᕐᕋᒧᑦ ᓱᓕ ᓇᖕᒥᓂᖅ ᐊᑭᖃᖅᖢᓂ, ᑭᓯᐊᓂ ᐃᓱᐊᓂ, ᖃᐅᔨᒪᔪᖅ ᐊᑑᑎᖃᕐᓂᖓᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.