"ᓴᓇᙳᐊᖃᑦᑕᖅᓯᒪᔪᖓ ᐃᓅᓯᓕᒫᓐᓂᒃ ᑕᐃᒪᙵᓂᒃ ᒥᑭᔪᒻᒪᕆᑯᓘᓚᐅᖅᓯᒪᒐᒪ. ᑕᒪᓐᓇ ᐱᓕᕆᐊᕆᔪᒪᐃᓐᓇᐅᔭᖅᑕᕋ," ᑲᐃᐅᓪ ᓴᐳᑦ ᐅᓂᒃᑳᖅᑐᖅ. ᓄᓇᖃᕐᒪᑕ ᐊᒻᒪᓗ ᓴᓇᓪᓗᑎᒃ ᓴᓇᐅᒐᕐᓂᒃ ᐅᐊᓂᐸᐃᒡᒥ, ᒪᓂᑐᑉᐸᒥ, ᑕᐃᑲᓂᓗ ᓄᖅᑲᖓᑲᐃᓐᓇᖅᑐᑎᒃ. ᓄᓇᓕᖓᑦ ᐴᔅᕕᐅᓪ, ᓛᐸᑐᐊᒥ ᐱᕈᖅᓯᒪᓪᓗᑎᓪᓗ ᓄᓇᓕᕋᓛᖑᓂᖅᓴᒥ ᒫᓂᑑᕙᐅᑉ ᓂᒋᐊᓂ. ᒫᓐᓇ ᐅᓪᓗᓕᒫᖅ ᑎᑎᖅᑐᒐᖅᑎᐅᓕᖅᑐᖅ, ᓴᐳᑦ ᐃᖅᑲᓇᐃᔭᖃᑦᑕᖅᑐᖅ ᑎᑎᖅᑐᒐᐅᔭᕐᓂᒃᑯᑦ ᐊᒻᒪ ᖃᕋᓴᐅᔭᒃᑯᑦ ᑎᑎᖅᑐᒐᕐᓂᒃᑯᑦ, ᐊᒻᒪ ᕿᓂᖅᑐᓂ ᓴᐅᓂᕐᓂᑦ ᐊᒻᒪ ᓴᓇᙳᐊᕐᓂᕐᒥᑦ.  

"ᐱᕕᖃᖅᑎᑕᐅᓚᐅᕋᒪ ᐅᐃᓂᐹᒡᒥ ᓴᓈᓄᑦ ᑕᑯᔭᒐᖃᕐᕕᖕᒥ ᓴᖅᑭᑦᑎᔪᓐᓇᖅᑎᑕᐅᓪᓗᖓ ᓯᕗᓪᓕᖅᐹᑦᑎᐊᕐᒥᒃ ᓴᓇᙳᐊᒐᕐᒥᒃ ᓴᓇᙳᐊᖅᑕᐅᒃᑲᓐᓂᓕᓚᐅᖅᓯᒪᕗᖅ ᑕᐃᑲᙵᓪᓗᑭᐊᖅ ᐱᒋᐊᓪᓚᓚᐅᖅᖢᖓ ᐃᖅᑲᓇᐃᔮᓐᓂᒃ. ᐃᖅᑲᓇᐃᔭᓚᐅᖅᓯᒪᕗᖓ ᑎᑎᖅᑐᒐᐅᔭᖅᓯᒪᓪᓗᖓ ᐊᒻᒪ ᐃᖅᑲᓇᐃᔮᖅᑖᓕᓚᐅᖅᑐᖓ ᖃᕋᓴᐅᔭᒃᑯᑦ ᑎᑎᖅᑐᒐᕐᓂᕐᒥᑦ. ᐱᕕᒃᓴᖃᕐᓂᖅᓴᐅᓕᖅᑐᖓ ᐃᖅᑲᓇᐃᔮᓐᓂ ᓯᕗᒻᒧᐊᒃᓯᒪᓕᖅᖢᖓ ᐊᒻᒪ ᐊᓕᐊᓇᐃᑦᑐᒻᒪᕆᐅᓪᓗᓂ," ᖁᖓᖦᖢᑎᒃ. ᐃᓕᓐᓂᐊᖃᑦᑕᖅᓯᒪᒻᒥᔪᑦ ᓴᓇᙳᐊᕐᓂᕐᒥᒃ ᓄᓇᓕᓐᓂ ᓴᓇᓐᖑᐊᖅᑎᒥᒃ ᐊᑕᖃᑎᖃᖅᑐᒥᒃ ᑲᑎᑦᑕᕐᕕᒃᑯᑦ. 

ᐱᒃᑯᒋᔭᖃᖅᐳᑦ ᐃᖅᑲᓇᐃᔭᕆᐅᖅᓴᓂᕐᒧᑦ ᐃᓕᓐᓂᐊᕐᕕᖕᒥ ᐃᓚᐅᓚᐅᕐᓂᕐᒥᓂᒃ ᐱᕈᖅᐸᓪᓕᐊᓕᓵᖅᑎᓪᓗᒋᑦ ᓴᓇᙳᐊᖅᑎᐅᓪᓗᑎᒃ, ᑖᓐᓇᓗ ᐱᕕᒃᓴᖃᖅᑎᑦᑎᓪᓗᓂ ᐱᓕᕆᖃᑎᖃᕈᓐᓇᕐᓂᕐᒥᒃ ᐊᒥᓱᓂᒃ ᐊᔾᔨᒌᙱᑦᑐᓂᒃ ᐱᖁᑎᓂᒃ, ᐊᑦᑕᑎᖅᑎᑦᑎᓪᓗᓂ ᓯᐊᐳᑦ ᐱᔪᒪᓂᕆᔭᖓᓂᒃ ᖃᔅᓯᑲᓪᓚᖕᓂᒃ−ᐅᖃᐅᔾᔪᐃᓂᕐᒧᑦ ᓴᓇᙳᐊᕐᓂᕐᒧᑦ ᐊᑐᖅᑕᐅᕙᒃᑐᓂᒃ. ᖃᓄᑐᐃᓐᓇᖅ ᒪᓂᒪᔪᓂᒃ ᓴᓇᙳᐊᕐᓂᕐᒧᑦ ᐊᔪᕈᓐᓃᖅᓴᓚᐅᖅᐳᑦ, ᑕᑯᒥᓴᐅᑎᓕᐅᕆᐅᖅᓴᓂᕐᒥᒃ, ᓄᔭᓕᕆᓂᕐᒥᒃ, ᐃᓕᓐᓂᐊᕐᕕᖕᒥᒃ ᐊᒪᐅᓕᒪᓪᓗᑎᒃ ᐊᒻᒪᓗ ᐊᒥᓱᑦ ᐊᑭᖃᙱᑦᑐᑦ ᐱᓕᕆᐊᒃᓴᑦ ᐃᓕᓐᓂᐊᕌᓂᒃᑳᖓᑕ. ᑎᑎᕋᐅᖅᑲᖅᑕᐅᑎᓪᓗᒋᑦ, ᐊᑭᖃᓐᖏᑦᑐᒃᑯᑦ ᐃᓕᓐᓂᐊᕐᓂᒃᑯᑦ ᐊᒻᒪᓗ ᖃᐅᔨᓴᖅᑐᑎᒃ ᖃᕋᓴᐅᔭᒃᑯᑦ, ᓯᐊᐳᑦ ᐃᑎᓪᓕᒋᐊᖅᑎᑦᑎᓚᐅᖅᑐᖅ ᐱᓕᕆᓂᕆᕙᑦᑕᒥᓂᒃ ᑕᐃᒃᓱᒪᓂ ᐃᓕᓐᓂᐊᕈᑎᖏᑦ ᐊᒻᒪᓗ ᐃᓕᓐᓂᐊᕆᐊᖅᑐᑎᒃ ᑮᓇᐅᔭᓃᓚᐅᖏᑦᑐᑦ. 

ᐱᕈᖅᐸᓪᓕᐊᓪᓗᓂ ᐊᑦᑎᖕᓂᖅᓴᒥ ᕿᑎᐊᓃᑦᑐᒥ ᐊᖏᕐᕋᕐᒥ, ᓴᐳᑦ ᖃᐅᔨᒪᔪᖅ ᑮᓇᐅᔭᑎᒍᑦ ᐊᒃᓱᕈᕐᓂᕐᒥᒃ.  "ᖃᖓᑲᓪᓚᒃ ᐃᓅᔾᔪᑎᖃᖃᑦᑕᖅᓯᒪᕗᖓ ᐊᑭᓕᖅᑕᐅᓂᕐᒧᑦ ᖃᔅᓯᕌᕋᔭᕐᒪᖔᕐᒪ ᐊᖑᒻᒪᑎᔪᓐᓇᙱᖦᖢᖓᓗ ᐊᑭᓕᒐᒃᓴᖁᑎᓐᓂᒃ ᑕᐃᒪᐃᓐᓂᖓᓄᓪᓗ ᑮᓇᐅᔭᖁᑎᖃᙱᖦᖢᖓ ᓴᓇᙳᐊᕐᓂᕐᒧᑦ ᐱᖁᑎᓂᒃ, ᑕᐃᒪᐃᑦᑐᕈᔪᖕᓂᒡᓘᓐᓃᑦ. ᑭᓯᐊᓂ ᑕᐃᒪᐃᑦᑐᒦᓕᕌᖓᒪ, ᓄᖅᑲᖅᑎᓚᐅᖅᓯᒪᙱᑕᕋ," ᐅᖃᖃᑦᑕᖅᐳᑦ. ᓴᐳᑦ ᑕᑎᖃᖅᓯᒪᔪᖅ ᐱᓕᕆᐊᒃᓴᓂᑦ ᐊᑭᖃᙱᑦᑐᓂᑦ ᓴᓇᐅᒐᕐᓂᑦ ᓄᓇᓕᐸᐅᔭᒥᑦ, ᓂᐅᕕᖕᓂᖕᓂᓪᓘᓐᓃᑦ ᓂᐅᕕᕐᕕᖕᓂᑦ ᑮᓇᐅᔭᓂᒡᓗ ᓂᐅᕕᕐᕕᖕᓂᑦ ᓴᖅᑭᑦᑎᖏᓐᓇᖁᓪᓗᒋᑦ. 

"ᓇᓂᓯᖏᓐᓇᐅᔭᖅᑐᖓ ᐊᑐᒐᒃᓴᓂᒃ ᐱᓕᕆᐊᕆᓗᒍ ᓄᖅᑲᕆᐊᖃᙱᖦᖢᖓ ᖁᕕᐊᒋᔭᓐᓂᒃ."

ᓴᐳᑦ ᓲᖑᓵᖅᑕᐅᖃᑦᑕᓚᐅᕐᒥᔪᖅ ᓄᑕᕋᐅᑎᓪᓗᒋᑦ, ᖃᑕᙳᑎᖏᑦ ᓅᒐᔪᓚᐅᖅᑐᑦ ᐊᒻᒪ ᓴᐳᑦ ᐊᒃᓱᕉᑎᖃᓚᐅᕐᒥᔪᑦ ᐃᓱᒪᒥᒍᑦ ᖃᓄᐃᙱᑦᑎᐊᕐᓂᕐᒥᒃ, ᐱᔭᕇᖅᓯᓪᓗᑎᒃ ᑎᓕᔭᐅᓯᒪᔪᓂᒃ ᐊᒻᒪ ᐃᓱᓕᕝᕕᒃᓴᐅᑎᖏᓐᓂᒃ ᐊᔪᕐᓇᖅᑎᑦᑎᓪᓗᑎᒃ. ᐃᑲᔪᖅᑎᖃᑦᑎᐊᕐᓂᖅ ᐊᒻᒪᓗ ᓇᖕᒥᓂᖅ−ᐃᒃᐱᒍᓱᑦᑎᐊᕐᓂᖅ ᐱᒻᒪᕆᐅᓯᒪᕗᖅ.  ᖃᖓᙳᖅᐸᓪᓕᐊᓂᖓᓄᑦ, ᖃᐅᔨᖃᑦᑕᖅᓯᒪᕗᑦ ᐱᑕᖃᑦᑎᐊᙱᓐᓂᖓᓂᒃ ᐋᖅᑭᒃᓯᒪᔪᒥᒃ ᓴᓇᙳᐊᖅᑎᐅᑉ ᐃᓅᓯᖓᓂ ᓴᐃᒻᒪᖅᑎᑦᑎᓂᐅᔪᓐᓇᖅᐳᖅ ᐊᒃᓱᕈᕐᓇᖅᓯᓗᓂᓗ. 

"9-ᓂᑦ 5-ᓄᑦ ᐃᖅᑲᓇᐃᔮᑎᑐᑦ, ᐋᖅᑭᑦᓯᓯᒪᔪᖃᖏᑦᑐᖅ ᓇᓗᓇᐃᒃᑯᑕᕐᓂᑦ ᐃᓕᓐᓄᑦ ᑕᒻᒪᖏᑦᑐᓂᑦ ᐱᓕᕆᓂᕐᓄᑦ. ᐊᑭᖃᙱᑦᑐᖅ ᐃᖏᕐᕋᔪᖅ, ᓇᖕᒥᓂᖅᓗ ᐃᓂᒃᓴᓕᐅᕐᓗᑎᑦ, ᐊᑐᒐᔪᒃᑕᕐᓂᒃ ᒪᓕᒋᐊᓕᖕᓂᒃᓗ ᐃᓕᖕᓄᑦ. ᐊᔪᕐᓇᙱᑦᑐᑯᓘᕗᖅ ᓂᐊᖁᒃᑯᑦ ᐊᖑᔭᕆᐊᒃᓴᖅ ᑕᒪᑐᒧᖓ," ᓴᐳᑦ ᒪᓂᒪᑎᖦᖢᓂᐅᒃ. 

ᐅᖃᐅᔾᔨᒋᐊᕈᓐᓇᖅᐸᑕ ᒪᒃᑯᓐᓂᖅᓴᓄᑦ ᓇᒻᒥᓂᖅ ᐊᑐᕐᓂᖅᓴᐅᒐᔭᖅᐳᑦ ᐱᕕᔅᓴᖃᖅᑎᑕᐅᒃᑲᓐᓂᖅᐸᑕ. "ᖃᔅᓯᑲᓪᓚᖕᓄᑦ ᐃᓕᓐᓂᐊᕐᕕᐊᕈᓯᕐᓄᑦ ᐊᒻᒪ ᖃᓄᐃᓕᐅᖃᑦᑕᓚᐅᖅᑕᓐᓄᑦ, 10−ᖑᖅᑰᖅᑐᑦ ᐊᓯᖏᑦ ᐱᓕᕆᐊᕆᓚᐅᙱᑕᒃᑲ ᐃᑲᔫᑎᖃᕋᔭᓚᐅᖅᑐᑦ," ᐃᖅᑲᐅᒪᔪᑦ. ᑐᓂᔭᐅᔪᓐᓇᓚᐅᖅᑐᑦ ᐱᐅᓴᐅᑎᓂᒃ ᓴᕕᕋᔭᓂᒃ ᐊᑭᖃᓐᖏᑦᑐᒃᑯᑦ ᐃᓕᓐᓂᐊᖅᑐᑎᒃ ᐊᑐᐃᓐᓇᐅᑎᑕᐅᔪᓂᒃ ᐃᖅᑲᓇᐃᔭᕆᐅᔅᓴᓂᕐᒧᑦ ᐃᓕᓐᓂᐊᕐᕕᒻᒥ ᐊᒻᒪᓗ ᐅᒡᒍᐊᖅᑐᑎᒃ ᑕᐃᒪᐃᖃᑦᑕᖏᓐᓂᖏᓐᓄᑦ. 

‍

ᐊᓯᐊᒍᓪᓕ, ᓴᓇᙳᐊᖅᑎᐅᓪᓗᓂ, ᐃᖅᑲᓇᐃᔮᓕᒫᒥᓂᒃ ᐱᓚᐅᖅᑐᑦ ᐊᒻᒪᓗ ᖃᐅᔨᓪᓗᑎᒃ ᑕᖃᕙᓪᓕᐊᓂᖏᓐᓂᒃ. "ᑕᐃᒪᓕ ᓱᕐᕌᓗᐊᖅᑰᔨᙱᖦᖢᖓ ᐊᒻᒪ ᖁᓱᙱᖦᖢᖓ ᐃᖅᑲᓇᐃᔮᒃᓴᑦ ᒥᑭᓐᓂᖅᓴᐅᓕᖅᑎᖦᖢᒋᑦ," ᐅᓂᒃᑳᒃᑲᓐᓂᖅᐳᑦ, ᓇᓗᓇᐃᖅᓯᒃᑲᓐᓂᖅᖢᑎᒃ ᖃᓄᖅ ᐱᓕᕆᐊᒃᓴᖏᑦ ᒥᒃᖠᒋᐊᖅᓯᒪᖕᒪᖔᑕ ᖃᐅᔨᒪᓪᓗᑎᒃ ᐊᒻᒪ ᐃᒃᐱᒋᑦᑎᐊᕐᓗᒋᑦ ᑭᒡᓕᒋᔭᖏᑦ.  

"ᐊᒃᓱᕈᖅᓯᒪᑦᑎᐊᖅᑐᖓ ᑭᒡᓕᒋᔭᓐᓄᑦ ᐊᒻᒪ ᐅᕙᓐᓄᑦ ᑐᙵᓇᕐᓂᖅᓴᐅᔭᕆᐊᖃᖅᖢᖓ." 

ᒫᓐᓇ ᓄᖅᑲᖓᑲᐃᓐᓇᖃᑦᑕᖅᑐᑦ ᐊᒻᒪᓗ ᐅᖓᕙᕆᐊᖁᔨᑦᓱᑎᒃ, ᐃᓱᒪᒥᒍᑦ ᐊᔪᕈᑎᖃᕈᒪᒍᓐᓃᖅᓱᑎᒃ ᐃᓱᓕᕝᕕᑦᓴᖃᖅᓱᑎᒃ ᐊᒻᒪᓗ ᐊᑦᓱᕈᕋᓱᐊᕋᑎᒃ ᓇᒻᒥᓂᖅ ᑕᐃᒪᐃᒐᓱᐊᖅᓱᑎᒃ, ᖃᐅᔨᒪᑦᓱᑎᒃ ᐃᓄᓐᓂᒃ ᐱᓕᕆᖃᑎᖃᕈᒪᔪᓂᒃ ᑐᑭᓯᓂᐊᖅᑐᑦ ᐊᑑᑎᖃᕐᓂᖓᓂᒃ ᐅᑕᖅᑭᒋᐊᖃᕐᓂᕐᒥᒃ. ᐋᖅᑭᒃᓯᓪᓗᑎᒃ ᐱᕕᖃᕐᓂᕐᒥᒃ ᓇᖕᒥᓂᖅ ᐅᖓᕙᕆᐊᕐᓗᒍ ᓄᖅᑲᖓᓚᐅᑲᖕᓂᖅ ᓴᐃᓕᓂᕐᒧᑦ ᐋᖅᑭᒃᓯᒃᑲᓐᓂᕐᓂᕐᒧᓪᓗ. 

ᑕᒪᓐᓇ ᐱᒻᒪᕆᐅᕗᖅ ᐱᓪᓗᒍ ᐊᔅᓱᕈᕐᓂᖓ ᓴᖅᑭᐊᖏᓐᓇᖃᑦᑕᕐᒪᑦ ᐊᒻᒪ ᓄᑖᓂᒃ ᓴᖅᑮᕙᑦᑐᓂ ᖃᕋᓴᐅᔭᒃᑯᑦ ᑎᑎᖅᑲᓂᒃ ᑐᔪᐃᔾᔪᑎᒃᑯᑦ ᑕᖃᓇᖅᑐᒻᒪᕆᐅᒻᒪᑦ. "ᖃᓄᖅ ᐃᓱᒪᑐᔫᓂᖓ ᐃᖏᕐᕋᓲᖑᙱᓚᖅ. ᑕᒪᓐᓇ ᐅᖃᐅᓯᕆᓪᓗᒍ ᐊᒻᒪᓗ ᑎᑎᕋᐅᔭᕐᓂᖅ ᐅᕙᓐᓄᑦ ᐊᓯᓐᓄᑦ ᐃᓄᓐᓄᑦ ᐃᑲᔪᕐᔪᐊᖅᓯᒪᔪᖅ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒥᒃ, ᓇᓂᓯᑐᐃᓐᓇᕐᓂᖅ ᓇᓕᒧᒌᒃᑎᑦᑎᓂᕐᒥᒃ ᐅᕙᓐᓄᑦ ᐊᑑᑎᖃᖅᑐᒥᒃ, ᓲᖃᐃᒻᒪ ᐊᔾᔨᒋᙱᓐᓂᐊᕐᒪᒍ ᑭᒃᑯᓕᒫᓄᑦ," ᓴᐳᑦ ᓂᑲᒍᓱᒃᑎᑦ. 

ᑲᔪᖏᖅᓴᐃᑦᑎᐊᙱᒃᑳᖓᒥ, ᓴᐳᑦ ᓯᓚᒦᖅᑰᔨᓕᓲᖅ. "ᖃᐅᔨᐃᓐᓇᐅᔭᖅᑐᖓ ᐱᔪᒃᓯᓐᓇᖅᑐᓂᒃ ᓯᓚᒥ. ᓯᓚᒦᙶᖅᑐᓂᒃ ᐱᐅᒋᔭᒻᒪᕆᐊᓗᒐᖃᐃ. ᐊᓃᒐᔪᒃᐸᒃᐳᖓ ᐊᒻᒪ ᓄᓇᒥᙶᖅᑐᑦ ᐋᖅᑭᒃᓯᒪᓂᕆᔭᖏᑦ ᑭᓱᓕᒫᑦ ᐱᐅᔪᐊᓘᓪᓗᑎᒃ," ᐊᒥᖅᑳᖃᑎᒌᒃᖢᑎᒃ. ᓴᓇᖑᐊᑦᑎᐊᖅᓯᒪᔪᑦ ᑲᓱᑦᑕᐅᑎᙳᐊᑦ ᓯᐊᐳᑦ ᓇᖕᒥᓂᖅ ᐃᓱᒪᒥᐅᑕᖏᑦ, ᒥᑏᑦ ᐊᒻᒪ ᓄᓇᕐᔪᐊᕐᒥ ᐃᒡᓗᕐᔪᐊᖅ.

ᓴᓇᐅᒐᓕᐅᕐᓂᖅ ᒪᒥᓴᕈᑕᐅᓯᒪᖕᒥᔪᖅ. "ᐱᒻᒪᕆᐅᓚᐅᖅᑐᖅ ᒪᒃᑯᒃᑎᓪᓗᖓ, ᑎᑎᕋᐅᔭᑐᐃᓐᓇᖅᖢᖓ ᐃᒃᐱᒋᔭᓐᓂᒃ ᐃᓗᐊᓃᑎᙱᖔᕐᓗᒍ. ᐃᒃᓯᕚᑐᐃᓐᓇᕋᓗᐊᕈᓂ ᑎᑎᕋᑐᐃᓐᓇᕋᓗᐊᕈᓂᓗ ᒪᒃᐱᖅᑐᒐᕐᒥ ᑭᓯᐊᓂ ᐊᑲᐅᓯᕚᓪᓕᕋᓱᓕᕈᒪ," ᓴᐳᑦ ᐃᖅᑲᐅᒪᔪᖅ. 

"ᖃᖓᑦᑎᐊᖅ, ᐊᑐᓵᖅᑕᕋ ᐃᓄᐃᑦ ᐃᓕᖅᑯᓯᖓᓐᓄᑦ ᑲᑎᙵᖃᑎᒋᒃᑲᓐᓂᖅᖢᒍ ᓲᖃᐃᒻᒪ ᐱᕈᓚᐅᖅᓯᒪᙱᓐᓇᒪ ᓄᓇᑦᑎᓐᓂ. ᐱᕈᓚᐅᕋᒪ ᒫᓂᑑᕙᐅᑉ ᓂᒋᐊᓂ ᑐᓴᖅᑐᖃᓚᐅᖅᓯᒪᙱᒻᒪᕆᑦᑎᓪᓗᒍ ᐃᓄᓐᓂᒃ. ᓄᑦᑎᕋᒪ ᓄᓇᓕᐸᐅᔭᕐᒧᑦ, ᓱᓕ ᑐᓴᓚᐅᙱᑕᕋ. ᐃᓕᑦᑎᒃᑲᓐᓂᕈᒪᓚᐅᖅᑐᖓ ᓇᑭᙶᕐᒪᖔᕐᒪ. ᖃᐅᔨᓚᐅᖅᑐᖓ ᓴᓇᐅᒐᐃᑦ ᐊᖏᔪᒻᒪᕆᐊᓘᓂᖓᓂᒃ ᐃᓄᐃᑦ ᐃᓕᖅᑯᓯᖏᓐᓄᑦ," ᓴᐳᑦ ᖁᖓᖦᖢᓂ, ᐅᓂᒃᑳᖅᖢᓂ ᖃᓄᖅ ᐊᒃᑐᐊᖃᑦᑕᐅᑎᒃᑲᓐᓂᖅᐸᖕᒪᖔᑦ ᐃᓕᖅᑯᓯᒧᑦ ᐋᖅᑭᒃᓯᒪᓕᖅᑎᑦᑎᓯᒪᖕᒪᖔᑦ ᐊᓯᔾᔨᖅᐸᓪᓕᐊᖏᓐᓇᖅᑐᒥᒃ ᐃᓕᖅᑯᓯᕆᕙᒃᑕᒥᓂᒃ.

ᐅᖃᐅᔾᔨᒋᐊᕐᓂᖏᑦ ᒪᒃᑯᑦᑐᓄᑦ ᐊᒻᒪ ᓴᓇᙳᐊᖅᑎᕈᕈᒪᔪᓄᑦ, ᐅᖃᕐᓗᑎᒃ, "ᐱᓕᕆᓂᖅᓴᐅᖃᑦᑕᕐᓗᓯ, ᐱᐅᓂᖅᓴᐅᕗᖅ ᒎᓇᒧᑦ." ᐊᓪᓛᑦ ᓇᒻᒥᓂᖅ, ᐊᔪᕈᓐᓃᖅᓴᖏᒃᑲᓗᐊᖅᑎᓪᓗᒋᑦ ᐅᕝᕙᓘᓐᓃᑦ ᐊᔭᐅᖅᓯᒐᓱᐊᙱᒐᐃᒻᒪᑕ, ᓴᓇᐅᒐᖏᑦ ᐱᐅᓯᕙᓐᖏᒻᒪᑕ. ᐃᓕᑦᑎᓯᒪᖕᒥᔪᑦ ᖃᓄᖅ ᐃᑲᔫᑎᖃᕈᓐᓇᖕᒪᖔᖏᑦ ᑐᓴᕆᐊᕐᕕᐅᔪᓐᓇᖅᑐᑦ, ᐊᔾᔨᙳᐊᓂᑦ ᑎᒡᓕᒃᑐᖃᙱᓪᓗᓂ ᐊᓯᑦᑕ ᐱᓕᕆᐊᖏᓐᓂᑦ. "ᐃᖃᐃᓕᓴᕈᑎᑦᑎᐊᕙᐅᔪᖅ ᐃᑲᔪᑦᑎᐊᕐᓂᐊᖅᑐᖅ ᐊᔪᙱᓐᓂᕐᓂ ᐱᕈᖅᐸᓪᓕᐊᑎᑦᑎᓂᕐᓂ," ᓇᓗᓇᐃᖅᓯᓪᓗᑎᒃ. 

ᑎᑎᕋᐅᔭᓚᐅᖅᑎᓪᓗᒋᑦ ᐅᓄᖅᑐᓂᒃ ᖃᑦᑎᕆᔾᔪᑎᓂᒃ Instagram−ᒧᑦ, ᑲᐃᐅᓪ ᓴᐳᑦ ᖁᕕᐊᓱᒃᑐᖅ ᐃᓄᑑᖃᑕᐅᔭᕆᐊᒃᓴᖅ. ᓴᓇᐅᒐᓕᐅᕐᓂᖅ ᐱᓕᕆᐊᕆᔪᒪᐃᓐᓇᐅᔭᖅᑕᖓ, ᐊᒻᒪᓗ ᐃᓅᓯᓕᒫᕐᒥᓂ ᐱᓕᕆᓯᒪᔭᖏᑦ ᑕᐃᒪᙵᓂᒃ ᒥᑭᑦᑐᑯᓘᓚᐅᕐᒪᑕ. ᑕᐃᒪᖓᓕᒫᖅ ᐊᒻᒪ ᐊᔪᕈᓐᓃᖅᓴᓚᐅᖅᑎᓪᓗᒍ, ᓴᓇᙳᐊᖅᑎᕋᓛᖅ ᑲᐃᐅᓪ ᓴᐳᑦ ᐱᕈᖅᓯᒪᓕᖅᑎᓪᓗᒍ ᐊᔪᙱᕐᔪᐊᓕᖅᖢᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.