"ᐃᓱᒪᔪᖓ ᖁᕕᐊᒋᔭᖃᐃᓐᓇᐅᔭᕋᒪ ᑲᑎᙵᑎᑦᑎᓂᕐᒥᒃ ᐱᖅᑯᓯᑦᑎᓐᓂᒃ, ᐃᓕᖅᑯᓯᑦᑎᓐᓂᒃ, ᓴᓇᙳᐊᖅᐸᒃᑕᑦᑎᓐᓂᒃ, ᐅᓂᒃᑳᖅᑐᐊᑦᑎᓐᓂᒃ, ᐊᓯᖏᓐᓄᑦ ᐃᓕᖅᑯᓯᕆᔭᐅᔪᓄᑦ, ᐊᓯᑦᑎᓐᓄᑦ ᐃᓄᖕᓄᑦ ᐃᓕᑦᑎᒃᑲᓐᓂᖁᓪᓗᒋᑦ ᐅᕙᑦᑎᓐᓂᒃ. ᑲᑎᑎᑦᑎᓂᖅ ᐊᒻᒪ ᑲᑎᙵᑎᑦᑎᓂᖅ ᒪᕐᕉᖕᓂᒃ ᐊᓕᐊᓇᐃᒋᐃᓐᓇᐅᔭᓚᐅᖅᐸᕋ," ᐅᖃᓚᐅᖅᐳᖅ ᑲᐃᑎ ᔮᓐᓴᓐ. ᐱᒃᑯᒍᓱᒃᖢᓂ ᓄᓇᖃᖃᑕᐅᕗᖅ ᑭᓘᐊᓐ ᓄᓇᖃᖅᑳᖅᓯᒪᔪᓄᑦ ᐊᒻᒪ ᐊᒪᕈᐃᑦ ᐃᓚᒌᓄᑦ. ᔫᑳᓐᒥ ᓄᓇᖃᖅᓯᒪᕗᖅ ᐱᕈᖅᓴᓯᒪᓪᓗᓂᓗ.

ᓯᓚᑦᑐᖅᓴᕐᕕᒡᔪᐊᕐᒥᙶᖅᖢᓂ ᐅᑎᕋᒥ, ᐅᔾᔨᕈᓱᓕᓚᐅᖅᐳᖅ ᓄᓇᖃᖅᑳᖅᓯᒪᔪᑦ ᓴᓇᙳᐊᒐᖏᓐᓂᒃ ᐊᒻᒪ ᐃᓕᖅᑯᓯᖏᓐᓂᒃ ᑲᑎᙵᓂᖅᑕᖃᓗᐊᙱᓐᓂᖓᓂᒃ ᐃᓱᒪᓕᓚᐅᖅᐳᕐᓗ ᑖᒃᑯᓂᖓ ᓴᖅᑭᑦᑎᔪᒪᓪᓗᓂ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂᒃ ᓴᙱᓂᖅᑖᖅᑎᑦᑎᔪᒪᓪᓗᓂ. ᑲᓇᑕᒥ ᐅᑭᐅᒃᑯᑦ ᐱᙳᐊᕕᒡᔪᐊᖅᑐᖃᖅᑎᓪᓗᒍ ᐅᐊᐃᑦᕼᐅᐊᔅᒥ ᓄᓇᖃᖅᑳᖅᑐᓄᓪᓗ ᑐᕌᖓᔪᓂᒃ ᐱᕙᒌᔭᖅᓯᒪᔪᖃᙱᖦᖢᓂ, ᓴᖅᑭᑎᑦᑎᓚᐅᖅᐳᖅ ᐅᓪᓗᓄᑦ ᐱᖓᓱᓄᑦ ᐃᓕᖅᑯᓯᑐᖃᕐᓄᑦ ᑲᑎᙵᓂᐅᔪᒥᒃ ᑕᑯᒃᓴᐅᑎᑦᑎᓪᓗᓂ ᓄᓇᖃᖅᑳᖅᑐᓂᒃ ᐃᙱᖅᑎᓂᒃ, ᖁᙱᐊᖅᑕᐅᕙᒃᑐᓂᒃ, ᐃᙱᖅᑎᓂᒃ ᐃᙱᐅᓯᐅᖅᑎᓂᒡᓗ. ᑕᐃᒪᐃᓚᐅᕐᒥᔪᖅ ᕚᓐᑰᕙᒥ 2010-ᒥ ᐱᙳᐊᕕᒡᔪᐊᕐᓇᐅᑎᓪᓗᒍ, 80-ᓂᒃ ᐃᓄᖕᓂ ᔫᑳᓐᒥᙶᖅᑐᓂᒃ ᐃᓚᐅᑎᑦᑎᓪᓗᓂ ᐱᙳᐊᕕᒡᔪᐊᕐᓂᕐᓂ. 2011-ᒥᓗ, ᓵᓖᓐ ᐊᓕᒃᓵᓐᑐᓗ ᐱᒋᐊᖅᑎᑦᑎᓚᐅᖅᓯᒪᔫᒃ ᓯᕗᓪᓕᖅᐹᑦᑎᐊᒥᒃ ᓄᓇᖃᖅᑳᖅᓯᒪᔪᑦ ᓴᓇᐅᒐᖏᓐᓂᒃ ᖁᕕᐊᓲᑎᖃᕐᓂᕐᒥᒃ ᔫᑳᓐᒥ, ᐋᑕᑲ ᐃᓕᖅᑯᓯᕐᒧᑦ ᖁᕕᐊᓲᑎᖃᕐᓂᖅ.

ᑲᔪᖏᖅᓴᐃᔾᔪᑎᒋᕙᐅᒃ ᐱᓕᕆᐊᕆᕙᒃᑕᒥᓂᒃ ᖁᕕᐊᒋᔭᖃᕐᓂᖓᓄᑦ ᓄᓇᓕᖕᓂᒃ, ᐃᓕᖅᑯᓯᕆᔭᐅᔪᒥᒃ, ᐅᖃᐅᓯᕐᒥᒃ ᐊᒻᒪ ᐱᖅᑯᓯᕆᔭᐅᔪᓂᒃ. "ᖁᕕᐊᓱᑦᑎᐊᓚᐅᖅᐳᖓ ᐱᕈᖅᓴᔭᐅᓚᐅᕋᒪ ᐃᓐᓇᕐᓂᒃ ᓄᓇᑦᑎᓐᓂ ᐊᒻᒪ ᐊᒃᑐᐊᓂᖃᑦᑎᐊᖅᖢᖓ ᓄᓇᒧᑦ ᐊᒻᒪ ᐅᓂᒃᑳᖅᑐᐊᑦᑎᓐᓄᑦ," ᔮᓐᓴᓐ ᐅᖃᖅᑐᖅ, ᐃᓱᒪᓪᓗᓂ ᑕᒪᒃᑯᓂᖓ ᐅᓂᒃᑳᖅᑐᐊᓂᒃ ᖁᕝᕙᖅᐹᓪᓕᖅᑎᑦᑎᔪᒪᐃᓐᓇᐅᔭᓚᐅᕐᓂᕐᒥᓂᒃ, ᓂᐱᓂᒃ ᐊᒻᒪ ᐱᐅᓂᖏᓐᓂᒃ ᓄᓇᖃᖅᑳᖅᓯᒪᔪᑦ ᐃᓄᐃᑦ. ᖃᐅᔨᒪᓵᓕᓚᐅᖅᐳᖅ ᖃᓄᐃᒻᒪᑦ ᑕᒪᑐᒥᖓ ᐱᓕᕆᐊᖃᕐᒪᖔᕐᒥ ᐱᕈᖅᓯᐊᒃᓴᑦ ᐱᕈᖅᓯᐊᒃᓴᖏᑦ ᐱᕈᖅᓯᐊᕆᔭᐅᓚᐅᕐᓂᖏᓐᓄᑦ ᐊᒻᒪ ᐱᓕᕆᓂᐅᔪᖅ ᐊᓯᔾᔨᖅᐸᓪᓕᐊᖏᓐᓇᖅᖢᓂ ᓴᖅᑭᑎᑦᑎᕙᓪᓕᐊᓪᓗᓂ ᐊᑦᑕᕐᓇᙱᑦᑐᒥᒃ ᐃᓂᒋᔭᐅᔪᓐᓇᖅᑐᓂᒃ ᐅᓂᒃᑳᖅᑐᐊᓄᑦ ᐅᓂᒃᑳᕐᕕᐅᔪᓐᓇᖅᑐᓂᒃ, ᐊᐅᓚᑕᐅᓪᓗᑎᒃ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ.

ᐅᖃᐅᔾᔨᒋᐊᕈᑎᒋᔭᖓ ᑭᓇᑐᐃᓐᓇᕐᒧᑦ ᐊᐅᓪᓚᖅᑐᒧᑦ ᐊᖏᕐᕋᒥᓂ ᐃᓕᓐᓂᐊᕆᐊᕐᓗᓂ ᐃᒪᓐᓇᐅᓇᔭᖅᐳᖅ, "ᐳᐃᒍᖅᑕᐃᓕᒋᑦ ᓇᑭᙶᖅᓯᒪᖕᒪᖔᖅᐱᑦ; ᓴᙱᔪᒻᒪᕆᐊᓗᖕᓂ ᓄᓇᓕᖕᓂᙶᖅᓯᒪᕗᒍᑦ, ᖃᑕᙳᑎᒌᓂᑦ, ᐃᓚᒌᓂᑦ, ᑕᒪᒃᑯᐊ ᐃᓗᐊᓃᑉᐳᑦ ᑭᓇᐅᓂᑦᑎᓐᓂ ᐊᒻᒪ ᓯᓚᑎᑦᑎᓐᓂ ᐊᒃᓱᕈᕐᓇᖅᑐᒻᒪᕆᐅᕗᖅ. ᑭᓇᐅᓂᕐᓄᑦ ᐊᒃᑐᐊᓂᖃᐃᓐᓇᕐᓗᑎᑦ ᑐᙵᑦᑎᐊᖏᓐᓇᕐᓗᑎᓪᓗ ᑭᓇᐅᖕᒪᖔᖅᐱᑦ... ᓇᒧᙵᐅᕝᕕᒃᓴᖃᐃᓐᓇᐅᔭᖅᐳᑎᑦ."

ᑭᓇᑐᐃᓐᓇᕐᒧᑦ ᐊᒃᓱᕉᓴᒃᑐᒧᑦ ᑭᓇᐅᓂᕐᒥᓄᑦ ᔮᓐᓴᓐ ᐅᖃᕋᔭᖅᐳᖅ, "ᑲᑎᙵᖃᑎᖃᐃᓐᓇᕈᓐᓇᕈᕕᑦ ᓄᓇᓕᒋᔭᕐᓄᑦ, ᐅᕝᕙᓘᓐᓃᑦ ᐊᓯᖕᓄᑦ ᐃᑲᔪᕋᓱᒃᐸᒡᓗᑎᑦ ᐊᔾᔨᑲᓴᖓᓂᒃ ᐊᑐᖅᓯᒪᑐᐃᓐᓇᕆᐊᓕᖕᓂᒃ... ᑲᑉᐱᐊᓱᙱᓪᓗᑎᑦ ᐊᐱᕆᔭᕆᐊᒃᓴᖅ. ᑲᑉᐱᐊᓱᙱᓪᓗᑎᑦ ᐅᖃᖃᑎᖃᕆᐊᒃᓴᖅ ᐃᓐᓇᕐᒥᒃ ᓄᓇᔅᓯᓐᓂᙶᖅᑐᒥᒃ, ᑲᑉᐱᐊᓱᙱᓪᓗᑎᓪᓘᓐᓃᑦ ᐅᐸᒋᐊᒃᓴᖅ ᖁᕕᐊᓲᑎᖃᖅᑐᓄᑦ ᐊᖏᕐᕋᕐᓂᐅᙱᑦᑐᒧᑦ. ᓄᓇᓕᕗᑦ ᑐᙵᓇᖅᑐᒻᒪᕆᐅᕗᑦ, ᑕᐃᒪᐃᓐᓂᖓᓄᓪᓗ ᐃᓱᒪᕗᖓ ᐃᓂᒃᓴᖅᑕᖃᐃᓐᓇᐅᔭᖅᐳᖅ ᓇᒃᓴᕈᓐᓇᖅᑕᕐᓂᒃ ᐃᓕᖅᑯᓯᕆᔭᕐᓂᒃ ᑭᓇᐅᓂᕐᓄᑦ, ᓇᒧᙵᕋᓗᐊᕈᕕᑦ. ᐃᓂᒃᓴᖃᐃᓐᓇᐅᔭᖅᐳᑎᑦ."

ᐊᕝᕕᐊᕈᑕᐅᔪᓂᒃ ᐊᓂᒍᖅᑎᑦᑎᓕᕌᖓᒥᓗ, ᔮᓐᓴᓐ ᒪᓕᑐᐃᓐᓇᓚᐅᖅᐳᖅ ᖁᕕᐊᒋᔭᒥᓂᒃ ᐊᒻᒪ ᐱᔾᔪᑎᒋᔭᖓᓂᒃ. ᐸᓂᖓ ᐃᓅᓚᐅᖅᑎᓪᓗᒍ, ᐱᒋᐊᓚᐅᖅᓯᒪᕗᖅ ᐱᐊᓚ ᐃᓕᑦ ᐅᖃᐅᔾᔪᐃᔨᓂᒃ, ᐱᓕᕆᐊᖃᖅᖢᓂ ᐊᑐᖅᑕᐅᕙᓚᐅᖅᑐᓂᒃ ᐱᓕᕆᐊᒃᓴᓂᒃ, ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᓐᓂᒃ, ᑲᑎᒪᓂᕐᓂᒃ, ᖃᓄᐃᓕᐅᖅᑎᑦᑎᔪᓂᒃ ᐊᒻᒪ ᑲᑎᙵᓂᐅᔪᓂᒃ. ᐱᓇᔪᒃᑕᐅᔪᒪᓚᐅᕆᕗᖅ ᑕᐃᒪᐃᓐᓂᖓᓄᓪᓗ ᐱᓕᕆᖃᑎᖃᕈᒪᓕᓚᐅᖅᐳᖅ ᓇᖕᒥᓂᖃᖅᑎᓂᒃ ᐅᑭᐅᖅᑕᖅᑐᓕᒫᒥ ᑐᑭᒧᐊᖅᑎᑦᑎᔨᒋᔭᐅᓪᓗᓂ ᐱᓕᕆᐊᒃᓴᕆᔭᐅᔪᓄᑦ ᓄᑖᙳᖅᐸᓪᓕᐊᔪᓄᓪᓗ ᐅᑯᓄᖓ, Entreprenorth−ᑯᓐᓄᑦ, ᑖᓐᓇ ᐱᓕᕆᐊᖑᔪᖅ ᓴᙱᓂᖅᑖᖅᑎᑦᑎᕙᒃᖢᓂ ᓄᓇᖃᖅᑳᖅᑐᓂᒃ ᓇᖕᒥᓂᖃᖅᑎᐅᔪᓂᒃ ᑲᔪᓯᓂᖃᑦᑎᐊᖁᓪᓗᒋᑦ ᐱᓕᕆᔾᔪᑎᖃᕐᓗᑎᒃ ᑲᔪᓯᓂᖃᑦᑎᐊᖅᑐᓂᒃ ᓇᖕᒥᓂᕆᔭᐅᔪᓂᒃ. ᐱᓕᕆᐊᖓ ᑲᑎᑎᑦᑎᓯᒪᕗᖅ ᓇᖕᒥᓂᕆᔭᐅᔪᓂᒃ ᐊᒻᒪ ᐃᓕᖅᑯᓯᕆᔭᐅᔪᓂᒃ ᑐᑭᖃᑦᑎᐊᖅᑐᒃᑯᑦ.

ᖃᓄᖅ ᑲᔪᓯᑦᑎᐊᕐᓂᖅ ᑐᑭᖃᕐᒪᖔᑦ ᐅᓪᓗᒥᐅᓕᖅᑐᖅ, ᔮᓐᓴᓐᒧᑦ ᑐᑭᖃᖅᐳᖅ ᓴᖅᑭᑎᑦᑎᓂᕐᒥᒃ ᐊᑐᖅᑕᐅᕙᓚᐅᖅᑐᓂᒃ ᐱᓕᕆᐊᒃᓴᓂᒃ. ᖃᐅᔨᒪᑦᑎᐊᕈᒪᕗᖅ ᕿᒪᒃᑕᖓ ᐸᓂᖕᒥᓄᑦ ᑭᖑᕚᒃᓴᖏᓐᓄᓪᓗ ᐱᐅᔫᒐᓗᐊᕐᒪᖔᑦ. ᑲᔪᓰᓐᓇᕈᒪᖕᒥᔪᖅ ᑲᑎᙵᑎᑦᑎᓂᕐᒥᒃ, ᐃᓄᖕᓂᒃ ᑲᑎᑎᑦᑎᕙᒃᖢᓂ ᐱᐅᔪᒃᑯᑦ. "ᐃᓱᒪᕗᖓ ᓱᓕ ᐱᔭᕇᙱᓐᓇᒪ, ᐃᓱᒪᕗᖓ ᓱᓕ ᐱᔭᒃᓴᖃᕐᔪᐊᕐᓂᑦᑎᓐᓂ, ᐊᒻᒪ ᐱᒃᑯᒥᒍᓱᑦᑎᐊᖅᐳᖓ ᒪᒃᑯᒃᑐᓂ ᐅᓪᓗᒥ," ᐅᖃᓚᐅᖅᐳᖅ.

ᐅᖃᐅᔾᔨᒋᐊᕈᑎᒋᔭᖓ ᒪᒃᑯᒃᑐᒧᑦ ᓱᓕ ᓇᓂᓯᓚᐅᙱᑦᑐᒧᑦ ᑐᓂᕐᕈᓯᐊᖏᓐᓂᒃ ᐃᒪᓐᓇᐅᓇᔭᖅᐳᖅ, "ᐅᒃᐱᕆᓗᒍ ᐱᕙᓪᓕᐊᓂᖓ. ᐃᓕᖕᓂᒃ ᐅᒃᐱᕆᓗᑎᑦ ᑐᐊᕕᙱᓪᓗᓯᓗ." ᔮᓐᓴᓐ ᐅᖃᐅᔾᔪᖅᑕᐅᖃᑦᑕᕈᒪᒐᓗᐊᖅᐳᖅ ᒪᒃᑯᖕᓂᖅᓴᐅᑎᓪᓗᒍ ᓱᒃᑲᐃᒡᓕᒋᐊᖁᔭᐅᓪᓗᓂ ᐊᒻᒪ ᐃᒻᒥᓂᒃ ᑲᒪᒋᑦᑎᐊᖁᔭᐅᓪᓗᓂ ᐃᒻᒥᓂᒃ ᐊᒃᓱᕈᓗᐊᖃᑦᑕᔾᔮᙱᓐᓂᕋᖅᖢᓂ. "ᓇᓕᒧᒌᒃᑎᑦᑎᓂᖅ ᐱᒻᒪᕆᐊᓘᕗᖅ ᐊᒻᒪᓗ ᓱᓕ ᑎᑭᐅᑎᔪᓐᓇᖅᐳᑎᑦ ᑐᕌᒐᕆᔭᕐᓄᑦ ᑭᓯᐊᓂᓗ ᐃᓕᖕᓂᒃ ᑲᒪᒋᑦᑎᐊᕐᓗᑎᑦ," ᐅᖃᒃᑲᓐᓂᖅᐳᖅ.

ᐃᒻᒥᓂᒃ ᑲᒪᒋᑦᑎᐊᕐᓂᖅ ᔮᓐᓴᓐᒧᑦ, ᓄᓇᒦᑦᑑᔮᕐᒪᑦ. ᖃᑕᙳᑎᒥᓃᒋᐊᒃᓴᖅ ᖁᕕᐊᒋᔭᖃᕐᒥᔪᖅ ᐊᒻᒪ ᐃᔾᔪᐊᒐᒃᓴᑦᑎᐊᕙᐅᓪᓗᓂ ᐸᓂᖕᒥᓄᑦ. ᓇᓪᓕᐅᓐᓂᖅᓯᐅᖃᑕᐅᕙᒃᖢᓂ ᐊᒻᒪ ᐃᓐᓇᕐᓂᒃ ᐱᖃᑎᖃᖅᐸᒃᖢᓂ ᐱᒻᒪᕆᐅᒋᕗᖅ ᑖᔅᓱᒧᖓ. ᓄᓇᒥᓄᑦ ᐅᑎᖅᖢᓂ ᖃᓄᐃᓕᐅᕈᓘᔭᕆᐊᖅᑐᖅᖢᓂ ᐱᒻᒪᕆᐅᓚᐅᕆᕗᖅᑕᐅᖅ. ᐊᔾᔨᒌᙱᑦᑐᓂᒃ ᐆᒃᑐᖃᑦᑕᖅᓯᒪᕗᖅ ᓲᕐᓗ ᔫᒐᒥᒃ ᐋᖅᑭᒃᓱᐃᔪᒪᓪᓗᓂ ᖃᓄᐃᙱᑦᑎᐊᕐᓂᕐᒧᑦ ᐱᕙᒌᔭᖅᑕᐅᓯᒪᔪᒥᒃ ᐊᑐᕈᓐᓇᕐᓂᐊᖅᑐᒥᒃ ᖃᐅᑕᒫᑦ ᐱᓱᖕᓂᕆᕙᒃᑕᖓᑕ ᐅᖓᑖᓄᑦ ᓯᓚᒦᓐᓂᕐᒥᓂᓗ.

ᒪᒃᑯᒃᑐᓄᑦ ᐊᒃᓱᕉᓴᒃᑐᓄᑦ ᐊᖅᑯᑎᒋᔭᒥᓄᑦ, ᐅᖃᐅᔾᔨᒋᐊᕈᑎᒋᔭᖓ ᐃᒪᓐᓇᐅᓇᔭᖅᐳᖅ, "ᐃᖅᑲᐅᒪᒋᑦ ᑭᓇᐅᖕᒪᖔᖅᐱᑦ ᐃᖅᑲᐅᒪᓗᓯᓗ ᐱᔾᔪᑎᒃᓴᖅᑕᖃᕐᒪᑦ, ᐊᒻᒪ ᐱᕕᒃᓴᖅᑕᖃᐃᓐᓇᐅᔭᖅᖢᓂ, ᐊᒻᒪ ᐱᑕᖃᐃᓐᓇᐅᔭᕐᓂᐊᖅᖢᓂ ᐃᓕᖕᓂᒃ ᐃᑲᔪᖅᑐᐃᔪᒥᒃ ᐊᒻᒪ ᑲᑎᙵᖃᑎᖃᕐᓗᓂ ᓯᕗᓕᕕᓂᕐᓂᒃ ᑕᐃᒪᐃᓕᐅᕈᓐᓇᕐᒥᖕᒪᑕᑦᑕᐅᖅ."

ᓴᖅᑭᑎᑦᑎᕙᒃᖢᓂ ᖃᓄᐃᓕᐅᒐᒃᓴᓂᒃ ᓄᓇᖃᖅᑳᖅᓯᒪᔪᑦ ᓴᓇᐅᒐᖏᓐᓂᒃ ᐃᓕᖅᑯᓯᖏᓐᓂᒡᓗ ᓯᕗᒻᒧᐊᒃᑎᑦᑎᓪᓗᓂ, ᑲᐃᑎ ᔮᓐᓴᓐ ᖁᕕᐊᒋᔭᒥᓂᒃ ᒪᓕᒃᐸᒃᐳᖅ ᐃᑲᔫᑎᖃᖅᐸᒃᖢᓂᓗ ᓄᓇᖅᑲᑎᒥᓄᑦ. ᐃᑲᔪᖅᖢᓂ ᓇᖕᒥᓂᖃᖅᑎᓂᒃ ᑲᔪᓯᔪᓐᓇᑦᑎᐊᖅᑐᓂᒃ, ᖁᕕᐊᒋᔭᖃᖅᐳᖅ ᑲᑎᑎᑦᑎᓂᕐᒥᒃ ᐃᓕᖅᑯᓯᕆᔭᐅᔪᓂᒃ ᓇᖕᒥᓂᕆᔭᐅᔪᓂᒡᓗ ᑲᑎᙵᑎᑦᑎᓂᕐᒥᒃ. ᐱᒋᐊᖅᑎᑦᑎᓚᐅᖅᓯᒪᓪᓗᓂ ᓯᕗᓪᓕᖅᐹᑦᑎᐊᒥ ᓄᓇᖃᖅᑳᖅᓯᒪᔪᑦ ᓴᓇᐅᒐᖏᓐᓂᒃ ᖁᕕᐊᓲᑎᖃᕐᓂᕐᒥᒃ ᔫᑳᓐᒥ, ᓴᖅᑭᑎᑦᑎᓯᒪᕗᖅ ᐱᕕᒃᓴᒥᒃ ᓴᓇᙳᐊᖅᑎᓄᑦ ᓴᖅᑭᔮᖅᑎᖦᖢᒍ ᐊᒻᒪ ᑭᒃᑯᓕᒫᑦ ᐃᓕᑦᑎᕚᓪᓕᖁᓪᓗᒋᑦ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᓐᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.