ᐱᔨᑦᑎᕐᓗᓂ, ᓴᐳᒻᒥᓗᒍ ᐃᓕᓐᓂᐊᖅᑎᑦᑎᓗᓂᓗ: ᑭᐊᕕᓐ ᔅᑖᑉᓛᖕᑭᑦ ᐅᑎᖅᑎᑦᑎᔪᖅ ᐃᓕᓐᓂᐊᕐᕕᐊᕈᓯᕐᒧᑦ ᓄᓇᓕᖕᒧᓪᓗ
"ᐊᒃᓱᕈᕐᓇᖅᑐᒻᒪᕆᐅᕗᖅ, ᑲᑉᐱᐊᓵᖅᑕᐅᓇᓱᒋᐊᒃᓴᖅ ᐊᓯᓕᒫᑎᑦ ᕿᒫᑎᓪᓗᒋᑦ, ᐃᓅᓯᐃᑦ ᑐᑭᓕᐊᖅᑎᖦᖢᒍ, ᐊᒻᒪ ᐃᓄᖕᓂᒃ ᓴᐳᔾᔨᓇᓱᒃᖢᓂ. ᑭᓯᐊᓂ ᐊᐃᑦᑖᕈᓱᙱᑦᑐᖓ ᑕᐃᑲᓂ," ᐅᖃᖅᑐᖅ ᑭᐊᕕᓐ ᔅᑖᑉᓛᖕᑭᑦ. ᐊᕼᐊᑕᑲᑉ ᑯᕇᓴᒥᐅᑕᖅ ᓴᔅᑳᑦᓱᐊᓐᒥ ᐊᒻᒪᓗ ᐊᑎᑐᖃᖓ ᑐᑭᖃᖅᑐᓂ ᖃᑯᖅᑕᖅ ᓇᓄᖅ ᐊᖑᑦ.
ᔅᑖᑉᓛᖕᑭᑦ ᐊᓂᒍᐃᓚᐅᖅᐳᖅ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᑲᔪᓯᓪᓗᓂᓗ ᓯᓚᑦᑐᖅᓴᕐᕕᒡᔪᐊᕐᒧᑦ ᐋᖓᔮᕈᒪᙱᖦᖢᓂ, ᐃᓚᒥᓄᑦ ᐊᒃᑐᐃᔾᔪᑎᒋᓲᖏᓐᓂᒃ ᑕᑯᓪᓗᓂ. ᕿᒪᐃᓯᒪᒋᐊᖃᓚᐅᖅᑐᖅ ᑕᐃᒃᑯᓂᖓ ᐃᓚᒥᓂᒃ ᐊᒻᒪᓗ ᐱᓕᕆᐊᖃᖅᑐᓂ ᐊᑲᕆᔭᐅᖏᑦᑐᓂᒃ ᑭᓯᐊᓂᓕ ᐊᓯᖏᓐᓂᒃ ᐃᓄᓐᓂᒃ ᐃᑲᔪᖅᑐᐃᓚᐅᖅᑐᓂᒃ ᓇᓂᓯᓚᐅᖅᑐᖅ.
ᔅᑖᑉᓛᖕᑭᑦᒧᑦ, ᐱᙳᐊᕐᓂᖅ ᐃᑲᔪᓚᐅᖅᑐᖅ ᐃᒻᒥᓂᒃ ᐱᐅᒋᓪᓗᓂ. ᓇᓗᓇᐃᖅᓯᓚᐅᖅᑐᖅ ᐅᓇᑕᖅᑎᖏᓐᓄᑦ ᓯᕗᓕᕆᓚᐅᖅᑕᖏᓐᓄᑦ. "ᖃᔅᓯᑲᓪᓚᒃᑯᑦ, ᐃᓅᔪᒍᑦ, ᓂᐅᒃᑯᑦ ᐊᓂᖅᑎᕆᓪᓗᑕ, ᑕᒪᒃᑯᐊᓗ ᓯᕗᓕᕕᓂᕗᑦ ᐅᕙᑦᑎᓐᓄᑦ ᑐᓐᓂᖁᓇᔭᖅᑕᖏᑦ. ᐃᒪᓐᓇ, ᑭᖑᕚᕗᑦ ᐱᓱᑲᑕᐃᓐᓇᖃᑦᑕᖅᐳᑦ; ᑕᐃᒪᓕ, ᐅᕙᓃᒋᐊᖃᖏᑦᑐᒍᑦ. ᑭᓱᓕᒫᑦ ᐊᑐᖁᔭᐅᓚᐅᖅᑐᑦ ᐊᓐᓇᐅᒪᔪᓐᓇᕐᖦᖢᑕᓗ ᓴᙱᔫᒐᑦᑕ," ᓴᖅᑭᔮᖅᑎᑦᑎᔪᖅ.
ᐃᓕᓴᐃᓕᓚᐅᖅᑐᖅ ᐊᒻᒪᓗ ᑲᒪᔨᐅᓪᓗᓂ, ᓇᓂᓯᓪᓗᓂ ᑐᓂᕐᕈᑎᒥᒃ ᓱᕋᑦᑎᕆᓂᕐᒧᑦ ᐊᒻᒪᓗ ᓇᓗᓇᐃᖅᓯᓪᓗᓂ. ᔅᑖᑉᓛᖕᑭᑦ ᓯᓚᑦᑐᖅᓴᕐᕕᒡᔪᐊᖓᓄᐊᓚᐅᖅᑐᖅ ᑳᓪᒍᕆᒧᑦ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐃᓕᓐᓂᐊᕐᓂᓕᕆᓂᕐᒧᑦ ᐱᖃᑖᓂ ᐃᓄᓕᕆᓂᕐᒧᑦ ᐃᓕᓐᓂᐊᕐᓂᕐᒥᒃ ᒥᑭᑦᑐᒥᒃ ᒐᕙᒪᓕᕆᓂᕐᒥ ᖃᐅᔨᓴᕐᓂᕐᒥᒃ. ᒪᓕᒐᓕᕆᔨᙳᕈᒪᓚᐅᖅᑐᖅ, ᖁᑦᑎᖕᓂᕐᓴᒥᑦ LSATS−ᒥᑦ ᐊᖏᖅᑕᐅᓪᓗᓂᓗ ᐊᒥᓱᓄᑦ ᓯᓚᑦᑐᖅᓴᕐᕕᒡᔪᐊᓄᑦ ᑲᓇᑕᒥᑦ ᐊᒥᐊᓕᒐᒃᑯᓪᓗ ᐃᓕᓐᓂᐊᕐᑎᓄᑦ ᐃᑲᔫᓯᐊᓂᑦ ᐹᓂᖕᒧᑦ ᐃᓕᓐᓂᐊᕐᕕᖕᓄᑦ ᓲᕐᓗ ᓯᓚᑦᑐᖅᓴᕐᕕᒡᔪᐊᒥᑦ ᒥᒃᕼᐃᒐᓐ, ᐅᒡᓚᒪ, ᔅᑦ ᕗᕌᓐᓯᔅ Xavier. ᓵᓚᐅᓕᕐᒪᒋᑦ ᑮᓇᐅᔭᖃᙱᓐᓂᖓᓄᑦ ᐅᕝᕙᓘᓐᓃᑦ ᐃᓚᖃᙱᓐᓂᖓᓄᑦ ᐃᑲᔪᖅᓱᕈᑎᔅᓴᓂᒃ ᖃᓄᑐᐃᓐᓇᖅ ᐱᓂᕐᓗᑦᑐᖃᕐᓂᖅᐸᑦ ᐊᒻᒪ ᐃᓕᓐᓂᐊᖅᑎᑦᑎᖔᖅᑐᓂ ᒪᓕᒐᑎᒎᙱᖔᖅᑐᓂᒃ ᑮᓇᐅᔭᑎᒍᑦ ᐱᔾᔪᑎᖃᖅᑐᑎᒃ.
ᐃᓕᓴᐃᓚᐅᖅᑐᖅ ᓯᒃᓯᑲ Nation−ᒥ ᑭᓯᐊᓂ ᐃᓚᐅᔪᓐᓇᖅᓯᒐᒥ ᑳᓪᒍᕆᒥ ᐸᓖᓯᐅᓂᕐᒧᑦ. ᐃᓚᖏᑦ ᖃᑕᙳᑎᖏᑦ ᖁᕕᐊᓱᙱᖦᖢᑎᒃ ᓂᕈᐊᕆᓯᒪᔭᒥᓂᒃ, ᐅᒃᐱᕈᓱᒃᖢᑎᒃ ᐃᑲᔪᖅᓱᐃᓂᕐᒥᓂᒃ ᒐᕙᒪᒃᑯᓐᓂ ᑭᓯᐊᓂ ᐊᔾᔨᒋᙱᑕᖓᓂᒃ ᑕᑯᓪᓗᓂᐅᒃ. "ᑕᑯᔭᕋ ᑕᐅᑐᒃᑕᒃᑯᑦ ᓴᐳᒻᒥᔪᓐᓇᓚᐅᖅᑕᕋ ᐃᓄᐃᑦ ᐃᑲᔪᕐᓗᒋᓪᓗ ᐃᓄᐃᑦ ᐊᔾᔪᒥᓇᑦᑎᐊᕐᓗᖓᓗ ᐃᓅᖃᑎᒌᒃᓗᑎᒃᓗ," ᔅᑖᑉᓛᓐᑦ ᐃᖅᑲᐅᒪᔪᖅ ᑕᐃᒪᐃᖦᖢᓂᓗ ᐊᕐᕌᒍᓄᑦ 25−ᓄᑦ, ᐃᓕᑦᑎᓪᓗᓂ ᐃᓅᖃᑎᖃᕐᓂᕐᒥᒃ, ᑲᑐᔾᔨᖃᑎᒌᒃᓗᑎᒃ ᐊᑲᐅᙱᓕᐅᕈᑎᓂᒃᓗ ᐋᖅᑭᒃᓯᓂᕐᓂ ᐊᔪᙱᓐᓂᕐᓂ, ᐊᒻᒪᓗᑦᑕᐅᖅ ᐋᖅᑭᒃᓯᒪᑎᑦᑎᓂᕐᓂ.
ᐸᓖᓯᓕᕆᔾᔪᓯᕐᒥᑦ, ᔅᑖᑉᓛᖕᑭᑦ ᐱᓕᕆᐊᖃᓕᓚᐅᖅᑐᖅ ᓄᑕᖅᑲᓂᑦ ᓴᐳᔾᔨᓂᖕᓂᑦ, ᖃᐅᔨᓴᖅᖢᑎᒃ ᐃᑲᔪᖅᖢᑎᒡᓗ ᐃᓚᒌᓂᑦ, ᑕᑯᔭᐅᕝᕕᒃᓴᓕᐅᖅᖢᑎᒃ ᐸᓖᓯᒃᑯᓐᓂᑦ, ᐃᓕᓐᓂᐊᕐᕕᐅᑉ ᑲᑎᒪᔨᖏᓐᓂᑦ ᐃᓚᒋᔭᖏᓐᓂᒡᓗ, ᑕᑯᓪᓗᑎᒃ ᓴᐳᔾᔨᓂᖕᓂᑦ ᐃᑲᔪᖕᓂᖕᓂᓪᓗ ᐃᓄᖕᓂᑦ. ᐃᖅᑲᐅᒪᔪᖅ ᖃᓄᖅ ᒪᒃᑯᒃᑎᓪᓗᒍ ᓄᑕᕋᕐᒥᑦ ᓴᐳᒻᒥᔭᐅᓂᖅ ᐃᓚᖃᓚᐅᖅᓯᒪᖕᒪᖔᑦ ᑎᒍᐊᙳᐊᖃᕐᓂᕐᒥᑦ ᖃᑕᙳᑎᒌᓂᑦ ᖃᓄᕐᓗ ᒫᓐᓇ ᐱᓇᔪᖕᓂᖅᓴᐅᓕᖕᒪᖔᑦ ᐃᓂᑖᖅᑎᑦᑎᓂᕐᒥᑦ ᖃᑕᙳᑎᖏᓐᓂ ᓄᓇᓕᖕᓂᓘᓐᓃᑦ ᐱᓯᒪᐃᓐᓇᕋᓱᒃᓗᒋᑦ ᐱᔪᓐᓇᕐᓂᕐᒥᑦ ᐅᖃᐅᓯᕐᒥᑦ ᐃᓕᖅᑯᓯᕐᓂᒡᓗ.
ᓇᒻᒥᓂᖅ ᓴᐳᑎᓇᓱᐊᕐᓂᖅ, ᓱᒋᐅᑏᑦ ᐊᒻᒪᓗ ᓴᓇᐅᒐᐃᑦ ᔅᑖᑉᓛᓐᑭᑦ ᐃᓕᓚᐅᖅᑐᑦ ᓅᒍᓐᓇᖅᑐᒻᒪᕆᐅᓪᓗᑎᒃ ᑕᕐᕆᔭᓕᐅᖅᑎᓄᑦ ᐊᒻᒪᓗ ᐃᓚᒋᔭᐅᓕᓚᐅᖅᑐᖅ ᐊᖏᔪᓄᑦ ᐱᖁᔨᕗᖔᕈᑎᓄᑦ ᐊᑦᔨᙳᐊᓄᑦ ᓲᕐᓗ ᐳᕆᑐ ᕙᓕᔅ. ᐳᕆᑎᒦᓚᐅᖅᑐᖅ, ᑕᐃᒃᑯᐊ ᐱᕐᓕᕋᖅᑐᑦ ᐊᒻᒪᓗ ᐱᕐᓕᕋᐃᑦ ᓄᓇᖃᖅᑳᕐᓯᒪᔪᑦ ᓇᑭᑐᐃᓐᓈᕐᓯᒪᔪᑦ ᐊᒻᒪᓗ ᐱᓕᕆᖃᑎᒋᖃᑦᑕᓚᐅᖅᑕᖏᑦ ᐋᖅᑭᒐᓱᐊᖅᑐᒋᑦ, ᐃᓕᓐᓂᐊᖅᑎᖃᑦᑕᓚᐅᖅᑕᖏᑦ ᐊᑐᕐᓂᐊᕐᓗᑎᒃ ᓱᒋᐅᑎᒥᓂᒃ, ᐅᓇᑕᕐᓂᕐᒧᑦ ᐊᒻᒪᓗ ᖁᓚᙱᓪᓗᑎᒃ ᐱᓕᕆᔭᕆᐊᒃᓴᖅ ᐊᒻᒪᓗ ᑭᒡᒐᖅᑐᐃᓗᑎᒃ ᑯᐊᒪᓐᓯᒃᑯᓐᓂᑦ ᐱᓗᐊᖅᑐᒥᒃ. ᐊᐃᑉᐸᖓ ᑕᕐᕆᔭᓕᐊᖓ, ᑕᕐᕆᔭᓕᐊᖑᔪᖅ ᓴᐅᑎ ᐊᕇᐱᐊᒥ, ᑕᐃᔭᐅᓚᐅᖅᑐᖅ ᑲᓐᑕᕼᐊ. ᐱᓕᕆᐊᖃᓚᐅᖅᑐᖅ ᖄᖅᑕᔫᓂᒃ ᐊᔾᔨᐅᙱᑦᑐᓄᑦ ᐊᒃᑐᖅᑕᐅᓂᕐᒧᑦ ᐱᓕᕆᔨᐅᓪᓗᓂ.
ᑕᐃᑲᙵᑦ, ᔅᑖᑉᓛᖕᑭᑦ ᐃᓱᒪᑕᙳᓚᐅᖅᑐᖅ ᐃᓕᓐᓂᐊᕐᓂᕐᒧᑦ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᕐᓂᕐᒧᑦ ᓯᓚᑦᑐᖅᓴᕐᕕᖕᒥ ᕚᓐᑰᕙᒥ. ᐱᔪᒃᓯᑦᑎᐊᓚᐅᖅᑐᖅ ᐱᓕᕆᓂᖏᓐᓄᑦ ᓯᓚᑦᑐᓴᕐᕕᐅᑉ ᓄᒃᑎᖅᑎᕆᓪᓗᓂ ᐃᓚᒥᓂᒃ ᑳᓪᒍᕆᒥᑦ ᓅᖦᖢᓂᓗ ᒥᑭᓐᓂᕐᓴᒧᑦ ᐊᖏᕐᕋᒧᑦ ᕚᓐᑰᕙᒥᑦ. "ᐃᓱᒪᒋᓵᖅᑕᕋ ᖁᕕᐊᓇᕋᔭᕐᓂᖓᓂᒃ ᐅᕙᓐᓄᑦ ᐃᑲᔪᕈᓐᓇᕐᓗᖓ ᐃᓄᖕᓂᒃ, ᐊᓯᔾᔨᓵᖅᑕᒃᑲ ᑭᓱᓕᒫᑦ ᑕᒪᐅᖓ ᓅᖦᖢᖓᓗ," ᐅᖃᖅᑐᖅ.
"ᖁᕕᐊᓱᐃᓐᓇᕋᓱᖃᑦᑕᖅᑐᖓ. ᐱᒻᒪᕆᐅᓱᒋᕙᕋ ᑐᑭᓯᒋᐊᖓ ᐱᔾᔪᑎᑐᐊᕋ ᑕᕝᕙᓃᓐᓂᕋ ᐱᓪᓗᒍ ᓯᕗᓕᕆᓚᐅᖅᑕᒃᑲ ᐊᒻᒪ ᐃᓅᖃᑎᓕᒫᒃᑲ, ᐱᓕᕆᐊᖃᖅᓯᒪᒻᒪᑕ ᑕᒫᓃᓐᓂᕐᓂᒃ, ᐊᓂᖅᑎᕆᑦᑎᐊᖃᑦᑕᕋᒪ ᐊᒻᒪ, ᖃᐅᔨᒪᔪᓯ, ᐊᒻᒪ ᐅᕙᓐᓂᒃ ᐃᓱᒪᐃᓐᓇᖅᐸᑦᑐᑎᒃ, ᐊᓂᖅᑎᕆᓂᓕᒫᑦ ᐊᒻᒪ ᐆᒻᒪᑎᓕᒫᒃᑲ ᑐᓂᕐᕈᑎᐅᒐᓗᐊᕐᒪᖔᑕ, ᓲᖃᐃᒻᒪ ᖃᐅᔨᒪᓚᐅᖅᓯᒪᙱᓐᓇᕕᑦ ᖃᖓ ᑕᒪᓐᓇ ᓇᒧᙵᐅᕙᓪᓕᐊᓂᕆᔭᐅᔪᖅ ᐃᓱᓕᓐᓂᐊᕐᒪᖔᑦ," ᐅᖃᙳᐊᖅᐳᖅ.
ᐸᓖᓯᓕᕆᑦᑎᐊᕐᖢᓂ ᐃᓱᒪᒃᑯᑦ, ᔅᑖᑉᓛᓐᑭᑦ ᖃᐅᔨᒪᔪᖅ ᖃᔅᓯᑦ ᐃᖅᑲᓇᐃᔭᖃᑎᖏᑦ ᐱᔪᓐᓇᑦᑎᐊᓚᐅᙱᒻᒪᖔᑕ, ᐊᒃᓱᕈᕈᑎᖃᕐᖢᑎᒃ PTSD−ᒥᒃ. ᓇᓗᓇᐃᖅᓯᖕᒪᑦ ᖃᓄᐃᙱᑦᑎᐊᕐᓂᖓᓄᑦ ᐱᖅᑯᓯᒃᑯᑦ ᐱᒻᒪᕆᐅᒋᔭᖏᓐᓄᑦ ᐊᒻᒪ ᐃᓕᓴᐃᔾᔪᑎᖏᓐᓄᑦ, ᐃᓐᓇᕐᓂᒃ ᐱᖃᑎᖃᖅᖢᓂ ᐊᒻᒪ ᖁᕕᐊᓲᑎᖃᖅᖢᓂ ᐊᒻᒪ ᐃᖅᑲᓇᐃᔮᒥᓂᒃ ᓇᓗᓇᐃᖅᓯᙱᖦᖢᓂ ᑭᓯᐊᓂ ᐊᑖᑕᐅᓪᓗᓂ, ᐅᐃᒋᔭᐅᓪᓗᓂ ᐊᒻᒪ ᓄᓇᖅᑲᑎᒋᔭᐅᓪᓗᓂ. ᐊᒃᑐᐊᓂᖃᐃᓐᓇᕐᓂᖅ ᓄᓇᓕᖕᓄᑦ ᐊᓯᐅᔨᑦᑕᐃᓕᓗᒍ ᐃᒃᐱᒍᓱᖕᓂᖓ ᐊᖏᓂᖓᓗ ᑲᒪᓂᕐᒥ.
ᐊᒻᒪᓗ ᐃᕐᓂᖓ ᐱᕈᖅᓴᓪᓗᓂᐅᒃ ᐃᖅᑲᓇᐃᔭᖁᓪᓗᒍ ᑐᕌᕋᓱᐊᖅᑕᒥᓄᑦ ᑮᓇᐅᔭᓂᒃ ᐱᕈᖅᓴᐃᑎᓪᓗᒍ ᓛᑯᕌᔅ-ᒧᑦ ᐃᑲᔪᖃᑦᑕᕐᓂᖓᓄᑦ. ᔅᑖᑉᓛᖕᑭᑦ ᐅᐱᒍᓱᒃᐳᖅ ᓱᕋᒃᓯᔪᓐᓇᓚᐅᕐᒪᑦ ᐱᕈᕐᕕᒋᓚᐅᖅᑕᒥᓂᒃ ᐊᒻᒪ ᐊᖏᕐᕋᑦᑎᐊᕙᖕᒥ ᐊᕙᑎᖃᖅᑎᑦᑎᓪᓗᓂ ᐃᕐᓂᖓᑕ ᐃᓕᖅᑯᓯᖓᓂ ᐃᓕᑦᑎᕙᓪᓕᐊᓪᓗᓂ ᐱᒻᒪᕆᐅᒋᔭᒥᓂᒃ ᐊᒻᒪ ᐱᖅᑯᓯᕐᒥᒃ. ᐃᕐᓂᖓ ᐅᐱᒍᓲᑎᖃᖅᑐᖅ ᓄᓇᖃᖅᑳᖅᓯᒪᔪᓂᑦ ᓄᑲᑉᐱᐊᖅ ᓄᔭᓕᕆᔪᖅ ᐊᒻᒪᓗ ᐊᓈᓇᖓᑕ ᔪᕉᔅ ᐃᓕᖅᑯᓯᖓᓂᑦ.
ᐃᓕᓯᒪᔭᖓ ᓇᒻᒥᓂᖅ ᐊᕐᕌᒍᓂ ᐊᓂᒍᖅᑐᓂ ᐃᓱᒪᒥᐅᑕᖃᕋᓱᐊᕐᓂᕐᒥᒃ ᐃᓱᒪᒋᔭᖏᓐᓂᒃ ᐱᒻᒪᕆᐅᒋᐊᖏᑦ ᐊᒻᒪᓗ ᑖᒃᓱᒧᖓ, ᐃᓄᑐᖃᐃᑦ, ᐋᒡᒑᖅᑎᐅᙱᑦᑐᑦ. "ᖁᖓᒃᑳᖓᑕ ᐃᕿᖦᖢᑎᒃᑎᓪᓗ ᐃᓕᖕᓂᒃ ᐅᖃᐅᔾᔨᓪᓗᑎᒃ ᐅᐱᒍᓱᖕᓂᕋᖅᖢᑎᒃ. ᑖᒃᑯᐊ ᑕᕝᕙ ᓈᓚᒋᐊᖃᖅᑕᑎᑦ. ᐊᒻᒪᓗ ᑕᒪᓐᓇ ᐱᒻᒪᕆᐅᒻᒪᑦ," ᔅᑖᑉᓛᖕᒃ. ᐅᒃᐱᕈᓱᖕᓂᖅ ᓇᖕᒥᓂᖅ ᐱᒻᒪᕆᐅᒋᕗᖅᑕᐅᖅ. "ᑕᒪᕐᒥᑦᑎᐊᖅ ᑕᒻᒪᙱᑦᑐᓂᒃ ᓂᕈᐊᕐᕕᖃᕐᓂᖅ, ᐱᕕᒃᓴᓕᐅᕐᓂᖅ ᐱᓕᕆᐊᕆᓂᕐᓗ, ᐅᒃᐱᕈᓱᒃᖢᓂᓗ ᑕᐃᒪᐃᑦᑐᓐᓇᕐᓂᕐᓂᒃ," ᑕᐃᒪᓐᓇ ᐅᖃᖅᖢᓂ. "ᐊᐅᓚᑦᑎᔪᓐᓇᙱᑦᑐᑎᑦ ᖃᓄᐃᓕᖓᓂᐅᔪᒥᒃ ᐃᓅᓯᖅᐱᑦ ᐊᑐᖅᑕᖓᓂᒃ ᒫᓐᓇᐅᔪᖅ, ᐊᐅᓚᑦᑐᓐᓇᖅᑕᑎᑦ ᐋᖅᑭᒃᑕᑎᑦ ᐃᓕᖕᓄᑦ. ᐃᓅᓯᖅ ᐃᓱᒪᓕᐅᕆᓂᕐᒨᖓᕗᖅ. ᑕᒻᒪᙱᓪᓗᑎᑦ ᐋᖅᑭᒃᓯᒍᕕᑦ ᐊᖅᑯᑎᑦᑎᐊᕙᒃᑰᕐᓗᑎᓪᓗ, ᐃᓕᖕᓂᒃ ᐊᑲᐅᓯᕚᓪᓕᖅᑎᑦᑎᔪᓐᓇᖅᑐᑎᑦ. ᓅᑦᑐᓐᓇᖅᑐᑎᑦ ᐅᖓᑖᓄᑦ ᒫᓐᓇ ᖃᓄᐃᓕᖓᓂᕆᔭᕕᑦ," ᑲᔪᓯᓗᓂ.
ᑎᓕᐅᕈᒪᓪᓗᒋᑦ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ, ᑎᓕᐅᕆᕗᖅ ᐋᖓᔮᖕᓇᖅᑐᓂᒃ ᐊᑐᖁᙱᖦᖢᒋᑦ ᐃᒻᒥᓂᒡᓗ ᑲᒪᒋᑦᑎᐊᖁᓪᓗᒋᑦ. "ᐃᓕᖕᓂᒃ ᐅᒃᐱᕆᓗᑎᑦ ᐊᒻᒪ ᐃᓄᐃᑦ ᐃᑲᔪᕈᓐᓇᖅᑎᓪᓗᒋᑦ ᓇᒧᙵᐅᕙᓪᓕᐊᑎᓪᓗᑎᑦ," ᐅᖃᐅᔾᔨᕗᖅ, ᐃᓱᒪᓪᓗᓂ ᖃᖓᓕᒫᑦᑎᐊᖅ ᐅᐱᒍᓱᓗᐊᓚᐅᕐᒪᑦ ᐃᑲᔪᖅᑕᐅᔪᒪᓪᓗᓂ ᐊᒻᒪ ᐃᓄᓕᒫᑦ ᐃᓚᒥᓂᒃ ᓂᕈᐊᓚᐅᖅᑐᑦ.
ᐃᖅᑲᓇᐃᔮᖃᓚᐅᖅᑐᖅ ᑲᑉᐱᐊᓵᕆᓪᓗᓂ ᐊᓯᓕᒫᖏᑦ ᕿᒫᑎᓪᓗᒋᑦ, ᐃᓅᓯᖓ ᑐᑭᓕᐊᖅᑎᖦᖢᒍ ᓴᐳᒻᒥᓗᒋᑦ ᐃᓄᐃᑦ ᒫᓐᓇᓗ ᑭᐊᕕᓐ ᔅᑖᑉᓛᖕᑭᑦ ᐃᑲᔪᖅᑐᖅ ᐃᓄᖕᓂᒃ ᐃᓕᑦᑎᓗᑎᒃ ᐱᕈᖅᐸᓪᓕᐊᑎᑦᑎᓪᓗᑎᒃᓗ ᐃᓕᓐᓂᐊᕐᓂᕐᒥᒃ ᐃᓕᖅᑯᓯᒃᑯᑦ ᐊᑦᑕᕐᓇᙱᑦᑐᒥ ᐊᕙᑎᖃᕐᓂᕐᒥ. ᖃᐅᔨᓴᖅᑐᓂ ᖄᖅᑕᔫᓂᒃ ᐊᖏᕐᕋᓂᒃ ᖄᖅᑕᔫᓕᐅᕋᓱᐊᖅᑐᓂ, ᐊᔅᓱᕈᓐᓇᖅᑐᓂᒃ ᐃᖅᑲᓇᐃᔮᖃᓚᐅᖅᑐᖅ ᓯᓚᑖᓂ ᐃᓕᓴᐃᓂᐅᑉ ᐊᒻᒪᓗ ᐸᓖᓯᓕᕆᓂᐅᑉ. ᒫᓐᓇ ᐱᕈᖅᓴᖃᑦᑕᓚᐅᖅᑕᖓ ᒫᓐᓇ ᐊᑖᑕᒋᔭᐅᓪᓗᓂ ᐅᐱᒍᓱᒃᖢᓂ ᓄᓇᖃᖅᑳᖅᓯᒪᔪᓂᒃ ᓄᑲᑉᐱᐊᓂᒃ, ᐃᓄᐃᑦ ᐱᒻᒪᕆᐅᒋᔭᖏᓐᓂᒃ ᐃᓕᓴᐃᖃᑦᑕᖅᐳᖅ ᐊᒻᒪ ᐊᖓᔪᖅᑳᑦᑎᐊᕙᐅᓪᓗᓂ ᐱᕈᖅᐸᓪᓕᐊᔭᕆᐊᖃᖅᑕᒥᓂᒃ.
ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ ᑎᑎᕋᖅᓯᒪᔪᒥᒃ!
