ᐊᕐᕌᒎᑉ ᐃᓗᐊᓂ ᐃᓕᑦᑎᓪᓗᓂ ᐊᖏᕐᕋᖓᑕ ᒥᒃᓵᓄᑦ ᖃᓄᐃᓕᐅᖃᑦᑕᖅᓯᒪᓂᖓᓗ ᐊᖏᕐᕋᒥᓂᒃ, ᐊᐅᔭᒃᑯᓪᓗ ᐅᑎᕐᖢᓂ ᐃᑲᔪᕆᐊᖅᑐᕐᖢᓂ ᐃᒫᓄᑦ. ᑲᐃᐅᓪ ᑲᐅᑕᖅ ᑲᖏᖅᖠᓂᕐᒥᐅᑕᐅᔪᖅ ᐊᒻᒪᓗ ᐃᖅᑲᓇᐃᔭᕐᓯᒪᓪᓗᓂ ᑲᓇᑕᐅᑉ ᓯᑯᓯᐅᖅᑎᖏᓐᓂᒃ ᐃᓚᒋᔭᐅᓪᓗᓂ ᐅᑭᐅᖅᑕᖅᑐᒥ ᐃᒪᓕᕆᓂᕐᒧᑦ ᑭᐅᔨᐅᔪᓄᑦ ᐅᑭᐅᓂᒃ ᐱᖓᓱᓂᒃ. ᐱᔪᒪᓂᖃᑦᑎᐊᖅᑐᖅ ᐃᓅᓯᓕᒫᒧᑦ ᐃᓕᓐᓂᐊᖅᑎ ᐅᐱᒍᓱᒃᑐᖅ ᐃᓄᐃᑦ ᐃᓕᖅᑯᓯᑐᖃᖏᓐᓂᑦ, ᑲᐅᑕᒃ ᓄᓇᖃᖅᑐᖅ ᐋᑐᕚᒥᑦ ᐊᒻᒪᓗ ᐊᐃᑉᐸᕆᓕᖅᑕᖓᓂ ᐊᕐᕌᒍᖓᓂ ᓄᓇᕗᑦ ᓯᕗᓂᒃᓴᕗᒻᒥ.   

ᓯᑯᓯᐅᖅᑎᒃᑯᑦ ᐃᖅᑲᓇᐃᔮᖓᑦ ᓴᖅᑭᓚᐅᖅᐳᖅ ᑲᐅᑕᒃᑯᑦ ᐃᓅᔪᖅᓯᐅᑎᑖᕋᓱᐊᖅᑎᓪᓗᒍ ᑲᓇᑕᐅᑉ ᓯᓚᑖᓅᕈᓐᓇᐅᑎᑖᕐᓂᐊᕐᒪᑦ. ᐱᖃᓐᓇᕆᔭᕋ ᐃᑲᔪᓚᐅᖅᑐᖅ ᐊᒻᒪᓗ ᖃᕋᓴᐅᔭᒃᑯᑦ ᑕᑯᓚᐅᖅᑐᑦ ᐃᖅᑲᓇᐃᔮᒃᓴᒥᒃ ᓯᑯᓯᐅᖅᑎᓄᑦ. ᐱᖃᓐᓇᕆᔭᖓ ᑎᓕᐅᕆᓪᓗᓂ ᐱᓇᔪᖁᔨᓪᓗᓂ ᐱᕕᖃᕈᒪᓕᕐᖢᓂᓗ ᐃᖕᒥᓂᒃᓗ ᐱᔪᒪᓕᕐᖢᓂ ᐱᓇᔪᒃᓗᓂ. 

ᐱᔭᕇᖅᑎᓪᓗᒍ, ᒥᖦᖢᓂ ᐃᖅᑲᓇᐃᔮᖓᓄᑦ ᐊᐱᖅᓱᖅᑕᐅᓚᐅᖅᑎᓪᓗᒍ Zoom-ᒧᑦ. ᓯᑯᓯᐅᖅᑎᓄᑦ ᐃᖅᑲᓇᐃᔭᖃᑦᑕᖅᑐᖅ ᐊᐅᔭᒃᑯᑦ, ᐱᓇᓱᐊᕈᓰᓐᓂᒃ ᒪᕐᕉᓐᓂᒃ, ᐱᓇᓱᐊᕈᓰᓐᓂᒃ ᒪᕐᕉᓐᓂᒃ ᓄᖅᑲᖓᓪᓗᓂ, ᐊᒻᒪᓗ ᑲᖏᖅᖠᓂᕐᒨᖅᑕᐅᓪᓗᓂ ᐋᑐᕚᒥᑦ ᐃᖅᑲᓇᐃᔭᕆᐊᖅᑐᓂ. ᑖᓐᓇ ᑎᓴᒪᒋᓂᐊᓕᕐᒪᒍ ᐊᐅᔭᖅ ᐃᖅᑲᓇᐃᔭᖅᑐᓂ ᐃᒫᓂ ᐊᒻᒪᓗ ᖁᕕᐊᒋᓪᓗᓂᐅᒃ ᖃᓄᑎᒋ ᐅᒥᐊᖅᑐᖃᑦᑕᕐᒪᖔᖅ.

ᐱᔭᕇᕈᓂ ᐃᓕᓐᓂᐊᖅᑎᐅᓪᓗᓂ ᓄᓇᕗᑦ ᓯᕗᓂᒃᓴᕗᒻᒥ, ᑲᐅᑕᒃ ᐋᑐᕚᒦᖏᓐᓇᕈᒪᔪᖅ ᐊᒻᒪᓗ ᐃᓕᓐᓂᐊᖏᓐᓇᕐᓗᓂ, ᐃᓕᓐᓂᐊᑲᓐᓂᕐᓗᓂ ᖃᓄᑐᐃᓐᓇᖅ. ᓯᕗᓪᓕᖅᐹᒥ ᐊᕐᕌᒍᒥ ᐃᓕᓐᓂᐊᓕᓵᖅᑎᓪᓗᒍ ᒫᓐᓇ, ᐃᓕᓐᓂᐊᕈᓐᓇᖅᓯᓚᐅᖅᐳᖅ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒥᒃ ᐊᒻᒪ ᐅᖃᐅᓯᖓᑕ ᒥᒃᓵᓄᑦ. ᐃᓕᓐᓂᐊᕐᓇᐅᑉ ᐊᐃᑉᐸᖓᓂ ᐊᕐᕌᒍᒥ, ᐃᓕᑦᑎᒃᑲᓐᓂᓚᐅᖅᑐᖅ ᐊᑐᓕᖅᑎᑕᐅᓂᖓᓂᒃ ᐊᖏᕈᑎᐅᑉ, ᒐᕙᒪᓕᕆᓂᕐᒧᑦ ᖃᐅᔨᓴᕐᓂᖅ ᐊᒻᒪ ᖃᐅᔨᓴᕐᓂᖅ.

ᖃᐅᔨᓴᕐᓂᖅ ᐃᓚᒋᔭᐅᕗᖅ ᐱᓕᕆᐊᖑᔪᒧᑦ ᐊᓕᐊᓇᐃᒋᓛᕆᔭᒥᓄᑦ ᑭᓯᐊᓂᓗᑦᑕᐅᖅ ᖁᕕᐊᒋᑦᑎᐊᖅᖢᓂᐅᒃ ᐊᑐᖃᑦᑕᖅᓯᒪᓂᑰᓂᖅ ᑲᑎᖃᑎᖃᕐᓂᕐᒥᒃ ᓄᑖᓂᒃ ᐃᓄᖕᓂᒃ ᐱᓕᕆᓕᕌᖓᒥᒃ. ᐃᓕᓐᓂᐊᖅᑏᑦ ᑮᓇᐅᔭᓂᒃ ᐱᕈᖅᓴᐃᓇᓱᖃᑦᑕᖅᐳᑦ ᐊᕐᕌᒎᑉ ᓄᙳᐊᓂ ᐃᓕᖅᑯᓯᕐᒥᓂᒃ ᑕᐅᖅᓰᖃᑎᖃᕐᓂᕐᒧᑦ ᐊᐅᓪᓚᕐᓂᕆᓚᐅᖅᑕᖏᓐᓄᑦ ᐃᓚᒋᔭᐅᓪᓗᓂᓗ ᖃᖓᑦᑎᐊᖅ ᐱᓕᕆᓂᕆᓚᐅᖅᑕᖓᓄᑦ, ᐱᓕᕆᔪᓐᓇᖅᓯᓚᐅᖅᐳᑦ ᓲᓴᓐ ᐊᒡᓘᒃᑲᖅ ᐱᖃᑎᒋᓪᓗᒍ. ᐱᓕᕆᖃᑎᒌᑦ ᐊᐅᓪᓚᖃᑦᑕᖅᑐᑦ ᑲᓇᑕᐅᑉ ᓯᓚᑖᓄᑦ ᐊᓯᖏᓐᓄᑦ ᐃᓂᐅᔪᓄᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ ᓲᕐᓗ ᕼᐊᕙᐃ ᐅᕝᕙᓘᓐᓃᑦ ᓄᐊᕙᐃ ᐊᒻᒪ ᐃᓱᒪᓕᐅᖅᐸᒃᖢᑎᒃ ᐅᐸᒍᒪᔭᒥᖕᓂᒃ ᓇᖕᒥᓂᖅ ᓂᕈᐊᕐᓂᒃᑯᑦ. ᑲᐅᑕᒃ ᐊᐅᓪᓚᕐᓂᐊᖅᑐᖅ ᑲᓇᑕᐅᑉ ᓯᓚᑖᓄᑦ ᓯᕗᓪᓕᖅᐹᑦᑎᐊᕐᒥᑦ ᐊᑭᓴ ᕇᑲᒧᑦ ᐃᓕᓐᓂᐊᖃᑎᖏᑦ ᕼᐊᕙᐃᓕᐊᖅᑎᓪᓗᒋᑦ ᐊᒻᒪ ᐴᒧᑦ.    

ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᐊᖏᕐᕋᒧᑦ ᐊᐅᓪᓚᕈᒪᔪᓄᑦ ᐃᓕᓐᓂᐊᕆᐊᒃᑲᓐᓂᕈᒪᔪᓄᑦ ᑭᓯᐊᓂ ᑲᑉᐱᐊᓱᒃᑐᑦ ᐊᓂᔭᕆᐊᒃᓴᖅ ᓇᓗᓗᑎᒡᓘᓐᓃᑦ, "ᑲᑉᐱᐊᓱᒃᑕᐃᓕᒋᑦ ᖃᓄᐃᓕᐅᕆᐊᒃᓴᖅ. ᖃᓄᐃᓕᐅᕈᒪᒍᕕᑦ, ᐱᓕᕆᐊᕆᓪᓗᐊᖅᑕᑦ. ᓱᓕᑐᐃᓐᓇᕐᓗᑎᑦ ᐃᓕᖕᓄᓪᓗ ᐃᓕᑦᑎᔪᒪᐃᓐᓇᐅᔭᕐᓗᑎᑦ. ᒪᒃᑯᒃᑎᓪᓗᑎᑦ, ᐱᕕᒃᓴᑦᑎᐊᕙᒻᒪᕆᐊᓘᕗᖅ ᐃᓕᓐᓂᐊᒃᑲᓐᓂᕆᐊᒃᓴᖅ ᐊᒻᒪ ᓄᓇᕐᔪᐊᕐᒧᑦ ᐊᐅᓪᓚᑲᑕᒡᓗᑎᑦ."

"ᐃᓕᖕᓂᒃ ᓱᓕᑦᑎᐊᖅᐳᑎᑦ ᐃᓕᑦᑎᔪᒪᐃᓐᓇᐅᔭᕐᓗᑎᓪᓗ."

ᑲᐅᑕᒃᑯᑦ ᓱᖏᐅᑎᓴᕋᐃᖦᖢᑎᒃ ᓄᑖᓄᑦ ᐊᕙᑎᓄᑦ ᐊᒃᓱᕈᕐᓇᖅᑐᓄᓪᓗ, ᐃᑲᔪᖅᑕᐅᔭᕆᐊᖃᓚᐅᖅᑐᖅ ᐅᖃᓕᒫᕐᓂᕐᒧᑦ ᑎᑎᕋᕐᓂᕐᒧᓪᓗ ᐊᑕᐅᓯᐊᕐᖢᓂ. ᐱᖃᓐᓇᕆᔭᒥᓄᑦ ᐃᑲᔪᖅᑕᐅᓪᓗᓂ, ᐊᓂᒍᐃᔪᓐᓇᓚᐅᖅᑐᖅ ᐅᖃᓕᒫᕈᓐᓇᕐᓂᕐᒧᑦ/ᑎᑎᕋᕈᓐᓇᕐᓂᕐᒧᑦ ᐊᒃᓱᕈᕐᓇᖅᑐᓂᒃ ᐃᑲᔪᖅᑕᐅᔪᒪᓪᓗᓂ. ᖁᕕᐊᓲᑎᖃᖅᑐᖅ ᐊᕐᕌᒍᒥᒃ ᓱᓐᓂᐅᒪᓂᕐᒥᒃ ᐊᒻᒪ ᑕᖅᑭᒐᓴᖕᓂᒃ ᓱᐴᖅᑐᖅᐸᙱᖦᖢᓂ ᓯᒡᒐᓕᐊᓂᒃ. ᐊᒃᓱᕈᕐᓇᖅᓯᒪᔪᖅ, ᑭᓯᐊᓂ ᑲᐅᑕᒃ ᖃᐅᔨᓯᒪᔪᖅ ᐊᔪᕐᓇᙱᓐᓂᖅᓴᐅᓕᕐᓂᖓᓂᒃ ᖃᖓᙳᖅᐸᓪᓕᐊᑎᓪᓗᒍ.  

ᒪᒃᑯᓐᓂᖅᓴᐃᑦ ᓇᒻᒥᓂᖅ ᐅᖃᐅᔾᔨᒋᐊᕈᓐᓇᖅᐸᑕ ᐃᓄᑦᑎᐊᕙᐅᓂᖅᓴᐅᒐᔭᖅᐳᖅ ᐊᒻᒪ ᓇᒻᒥᓂᖅ ᐱᒡᒐᓇᓗᐊᙱᓪᓗᓂ. "ᖃᓄᐃᓗᐊᙱᑦᑐᖅ ᐊᓯᑎᑦ ᐃᓄᐃᑦ ᐃᓱᒪᒋᔭᖏᑦ ᐃᓕᖕᓄᑦ. ᐱᔪᒪᔭᕐᓄᑦ ᐃᓅᓯᕐᓅᑐᐃᓐᓇᕐᓗᑎᑦ," ᐃᒻᒥᓂᒃ ᐅᖃᐅᔾᔨᓇᔭᖅᑐᖅ ᑎᓕᐅᕆᖁᔨᓗᓂ ᓯᓚᑐᓗᓂᓗ ᖃᐅᔨᒪᓗᓂ ᒫᓐᓇ ᖃᐅᔨᒪᔭᒥᓂᒃ. 

ᑲᔪᓯᑎᓪᓗᒍ ᐃᓱᒪᖓ ᐋᖅᑭᒃᓯᓗᓂᓗ ᓇᓕᒧᒌᒃᑐᒥᒃ ᖃᓄᐃᙱᑦᑎᐊᕐᓂᕐᒥ, ᑲᐅᑕᖅ ᐅᒃᐱᕈᓱᒃᑐᖅ ᐱᐅᔪᒥ ᐊᑐᖃᑦᑕᕐᓂᕐᒥ ᐃᓚᐅᑎᑦᑎᔪᒥᒃ ᐃᖃᐃᓕᓴᕐᓂᕐᒥᒃ ᖃᓄᐃᙱᑦᑎᐊᖅᑐᓂᒃᓗ ᓂᕆᓂᕐᓂ. ᐃᒻᒥᓂᒃ ᐱᔪᒪᓕᖃᑦᑕᖅᑐᖅ ᐊᒻᒪᓗ ᐱᒋᐊᕋᒥ, ᐱᔭᕇᕋᓱᖅᑰᔨᓕᓲᖅ. ᓯᑯᓯᐅᖅᑎᒃᑯᓐᓂ ᐱᓕᕆᖃᑎᖃᖅᖢᓂ ᐊᓕᐊᓇᐃᒋᑦᑎᐊᖅᑕᖓ ᐊᒻᒪ ᓇᒡᓕᒍᓱᒃᖢᓂ ᐃᖅᑲᓇᐃᔮᒥᓂᒃ ᐃᑲᔪᐃᓐᓇᕈᓐᓇᖅᐳᖅ. 

ᐃᓕᓐᓂᐊᓚᐅᖅᑎᓪᓗᒍ ᐊᖏᕐᕋᖓᑕ ᒥᒃᓵᓄᑦ ᐊᒻᒪᓗ ᖃᓄᐃᓕᐅᖅᐸᓚᐅᕈᓯᖏᑦ ᐊᖏᕐᕋᒥᓂᒃ, ᑲᐃᐅᓪ ᑲᐅᑕᒃ ᐊᖏᕐᕋᐅᔾᔨᓪᓗᓂ ᐊᐅᔭᒃᑯᑦ ᐱᔨᑦᑎᕋᕆᐊᖅᑐᖅᖢᓂ ᓄᓇᕗᒻᒥ ᐃᒪᕕᖕᒥ. ᓯᑯᓯᐅᖅᑎᒃᑯᓐᓄᑦ ᐃᖅᑲᓇᐃᔭᖅᖢᓂ ᐊᒻᒪᓗ ᐃᓕᓐᓂᐊᖅᖢᓂ ᓄᓇᕗᑦ ᓯᕗᓂᒃᓴᕗᒻᒥ, ᖁᔭᓕᓂᖅᓴᐅᓕᕐᒪᑦ ᓇᑭᙶᖅᓯᒪᓂᕐᒥᓂᒃ ᐊᒻᒪᓗ ᐅᑎᖅᑎᓪᓗᒍ ᐃᓕᓐᓂᐊᕐᓇᖅ ᓄᖅᑲᖔᖅᑎᑕᐅᑎᓪᓗᒍ. ᐃᓕᑉᐸᓪᓕᐊᖏᓐᓇᕈᒪᓕᓚᐅᖅᑐᖅ, ᐱᔪᒪᔭᒥᓂᒃ ᐊᑐᖅᐳᖅ ᑕᑯᓪᓗᓂᓗ ᐃᓅᓯᖓᓂ ᐅᐱᒋᔭᐅᓪᓗᓂ ᐃᓅᓪᓗᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.