"ᐅᔾᔨᕈᓱᓚᐅᖅᑐᖓ ᖁᑦᑎᖕᓂᓕ 12−ᒥᑦ ᖁᕕᐊᒋᑦᑎᐊᕋᒃᑯ ᐃᓕᑦᑎᕙᓪᓕᐊᓂᓐᓂᑦ, ᐃᓅᓯᓕᒫᒧᑦ ᐃᓕᓐᓂᐊᕐᑎᐅᓂᐊᕈᒪ, ᐃᓕᓴᐃᔨᐅᓗᖓ ᓯᓚᑦᑐᖅᓴᕐᕕᒡᔪᐊᒥᑦ ᐊᑲᐅᓛᖑᓇᔭᖅᑐᖅ. ᐊᑦᑐᐃᓂᖃᕈᒪᓚᐅᕋᒪ ᐃᓕᓐᓂᐊᖅᑎᐅᑉ ᐃᓅᓯᖓᓂᒃ ᓲᕐᓗ ᐃᓕᓴᐃᔨᑎᑐᑦ ᑕᐃᒪᐃᓚᐅᕐᒪᑦ ᐊᒻᒪᓗ ᑕᐃᒫᒃ ᐊᑭᓖᓪᓗᓂ. ᐃᓕᓴᐃᓂᖅ ᐃᓄᖕᓂᒃ ᖁᕕᐊᒋᑦᑎᐊᓚᐅᖅᑕᕋ," ᐅᖃᖅᑐᖅ ᑲᐃᕋᓐ ᐊᓕᑲᒥᒃ. ᐊᖏᕐᕋᖓᑕ ᐅᖓᓯᒋᒐᓗᐊᖅᖢᓂᐅᒃ, ᑭᓯᐊᓂ ᓂᕆᐅᒃᑐᖅ ᐅᑎᖅᑎᓐᓂᐊᕐᓗᒍ ᓯᕗᓕᖅᓯᓂᖅ ᑎᑎᖅᑲᓂᒡᓗ.

ᐅᓗᒃᕼᐊᒃᑑᒥᐅᑕᖅ, ᓄᓇᑦᓯᐊᕐᒥᐅᑕᖅ ᐊᒻᒪᓗ ᐱᖓᔪᒋᓕᖅᑕᖓᓂᒃ ᐊᕐᕌᒍᒥ ᐃᓕᓐᓂᐊᓕᖅᑐᖅ ᖃᓪᓗᓈᑎᑐᑦ ᑎᑎᕋᕐᓂᕐᒥᒃ ᐃᓕᓐᓂᐊᕐᕕᔾᔪᐊᖓᓂ ᐳᕆᑎᔅ ᑲᓚᒻᐱᐊᒥ ᓗᐊᕋᓐ ᓯᑳᓚ. ᐃᖅᑲᓇᐃᔮᕆᓛᕈᒪᔭᖃᕐᓂᕐᒧᑦ ᐊᖅᑯᑎᐅᔪᖅ ᐊᓕᑲᒥᒃ ᐃᓱᒪᑐᐃᓐᓇᖅᑰᔨᔪᖅ 1-ᒥᓂᑦᓯᒥᒃ, ᐊᑕᐅᓯᑐᐃᓐᓇᕐᒧᑦ ᐱᓇᓱᐊᖅᓯᒪᑐᐃᓐᓇᖅᖢᓂ. ᖃᐅᔨᒪᓚᐅᙱᑦᑐᖅ ᓯᕗᓪᓕᕐᒥ ᖃᓄᐃᓕᐅᕈᒪᖕᒪᖔᑦ ᑭᓯᐊᓂ ᖁᓱᙱᖦᖢᓂ ᓂᕈᐊᖅᑕᒥᓂᒃ.

ᓯᕗᓪᓕᖅᐹᖓᓂᑦ ᐊᕐᕌᒍᒥ ᓯᓚᑦᑐᓴᕐᕕᕐᔪᐊᕐᒥᑦ, ᐊᓕᑲᒥᒃ ᑕᑯᓚᐅᖅᐳᖅ ᐱᖓᔪᐊᓂᑦ ᐊᒻᒪ ᑎᓴᒪᒋᓕᖅᑕᖓᓂᑦ ᐊᕐᕌᒍᓂᑦ ᐃᓕᓐᓂᐊᖅᑎᓂᒃ ᓯᓚᑐᔫᓪᓗᑎᒃ ᐊᒻᒪ ᑕᖅᑭᐅᓚᐅᖅᑐᓂᑦ ᓯᓚᑦᑐᓴᕐᕕᕐᔪᐊᕐᒥᑦ ᐱᒋᐊᖅᑎᑦᑎᓚᐅᕐᒪᑦ. ᐃᓄᐃᑦ ᐅᖃᖃᑦᑕᓚᐅᖅᑐᑦ ᖃᖓᑕᖃᑦᑕᕐᓂᕋᖅᖢᓂ ᐃᓕᓐᓂᐊᕐᕕᖕᒥ ᑭᓯᐊᓂ ᐃᓱᒪᓚᐅᖅᓯᒪᙱᖦᖢᓂ ᓱᒃᑲᓕᓂᐊᕋᓱᒋᙱᖦᖢᒍ. ᖁᕕᐊᒋᔭᖃᖅᑐᖅ ᐃᓕᓐᓂᐊᓂᕐᒥᑦ ᐊᒻᒪᓗ ᓄᓇᖃᖅᓯᒪᓪᓗᓂ ᐃᓕᓐᓂᐊᕐᓂᓕᒫᖓᓂᑦ.

ᑕᒪᑐᒪᓂ ᐊᕐᕌᒍᒥ ᐱᐅᓂᖅᓴᐅᓯᒪᕗᖅ ᐊᕐᕌᒎᓵᖅᑐᓂ ᓲᖃᐃᒻᒪ ᐱᒋᐊᓵᖅᑎᓪᓗᒋᑦ ᖀᒥᒍᓱᓕᓚᐅᕐᒪᑦ ᖀᖅᓱᖅᖢᓂ ᐊᒻᒪ ᖃᐅᔨᓇᓱᒃᖢᓂ ᐃᓕᓐᓂᐊᕐᕕᖕᒥ ᐱᓕᕆᐊᒥᓂᒃ. ᓄᓇᓕᒻᒦᙶᕐᓂᖅ 400-ᓂᒃ ᓯᓚᑦᑐᓴᕐᕕᕐᔪᐊᕐᒧᑦ 70,000-ᓄᑦ ᐋᖅᑭᒋᐊᖅᑕᐅᓯᒪᔪᒻᒪᕆᐅᕗᖅ. ᓯᓚᑐᔫᓪᓗᓂ, ᐃᓄᖕᓂᑦ ᐱᕈᖅᓴᓪᓗᓂ ᓇᓗᓈᕿᓪᓗᓂ ᐊᖅᑯᑎᖓᓂ ᐊᒃᓱᕈᕐᓇᓚᐅᖅᑐᖅ. ᐊᓂᒍᖅᑎᓐᓇᓱᒃᖢᒋᑦ ᖀᒥᒍᓱᒃᓴᕋᐃᖦᖢᓂ, ᒪᒥᓴᕆᐊᖅᑐᕐᖢᓂ (ᐱᖁᔨᕐᔪᐊᕐᖢᓂ) ᐱᕕᖃᕐᖢᓂᓗ ᖁᕕᐊᒋᓛᖓᓂᒃ ᖁᕕᐊᒋᔭᖓᓂ: ᐅᓪᓚᒃᖢᓂ.

ᐊᓕᑲᒥᒃ ᖁᕕᐊᒋᔭᖃᖅᑐᖅ ᐃᖃᐃᓕᓴᕐᓂᕐᒥᒃ ᐊᒻᒪᓗ ᐃᓱᒪᒋᑉᓗᒍ ᐅᒡᒍᕐᓇᖅᑑᓂᖓᓂᒃ. ᐅᓪᓚᖕᓂᖅ ᓯᓚᑦᑐᖅᓴᕐᕕᒡᔪᐊᒥᑦ ᑐᙵᑦᑎᐊᕈᑕᐅᓯᒪᕗᖅ ᐊᒃᑐᐊᓂᖃᙱᖦᖢᓂᓗ ᐃᓕᓐᓂᐊᕐᕕᖕᒧᑦ ᐱᐅᓯᒋᐊᖏᓐᓇᖁᓪᓗᒍᑦ ᐃᓕᑦᑎᕙᓪᓕᐊᓂᕐᓗ ᐃᑲᔫᑎᖃᖅᓯᒪᔪᖅ. ᖁᔭᓕᖕᒥᔪᖅᑕᐅᖅ ᐆᒻᒪᕆᒃᖢᓂ ᑎᒥᖓᓄᑦ ᐃᓚᓕᐅᑎᖕᒪᑦ. "ᑲᒪᒋᑦᑎᐊᕈᕕᐅᒃ ᑎᒦᑦ ᐃᒃᐱᒋᑦᑎᐊᕐᓗᒍ, ᑭᐅᓂᐊᖅᑐᖅ ᖃᐅᔨᒪᓗᑎᑦ ᐃᒃᐱᒋᔭᐅᑦᑎᐊᕐᓂᖓᓂᒃ ᐊᓱᐃᓛᒃ ᐃᒃᐱᒋᓗᒍ ᐋᓐᓂᐊᖃᖅᑕᐃᓕᒪᓂᖅ ᓯᕗᒻᒧᑦ ᐃᖏᕐᕋᓗᓂ ᐃᓅᓯᕐᒧᑦ, ᐃᑲᔪᕐᔪᐊᕐᖢᓂᓗ ᐊᑲᐅᙱᓕᐅᕈᑎᓂᒃ ᖃᐅᔨᓗᓂ," ᐅᖃᖅᑐᖅ.

ᓅᓚᐅᖅᑎᓪᓗᒍ ᐅᑭᐅᖅᑕᖅᑐᒥᒃ ᖃᓪᓗᓈᑦ ᓄᓇᖓᓐᓄᑦ ᓯᓚᑦᑐᓴᕐᕕᕐᔪᐊᒧᑦ, ᐅᖃᐅᔾᔨᒋᐊᕈᑎᖃᖅᐳᖅ ᒪᒃᑯᑦᑐᓂᒃ ᐃᓱᒪᔅᓴᖅᓯᐅᖅᑐᓂᒃ ᑕᐃᒫᔅᓴᐃᓐᓇᖅ. "ᓱᓕᕗᖅ, ᐊᖏᕐᕋᖅᓯᓇᖅᑐᒥᒃ ᓵᖓᓂᐊᖅᑐᑎᑦ, ᐊᒻᒪ ᒪᓂᕋᐅᓂᐊᕆᓪᓗᓂ. ᑕᒪᓐᓇ ᓴᒡᓗᑎᔾᔮᙱᑕᕋ. ᑭᓯᐊᓂ ᑕᒪᓐᓇ ᐃᓕᓐᓂᒃ ᑐᕌᖅᑎᑦᑎᔾᔪᑎᒋᓂᐊᖅᑖᑎᑦ ᑐᕌᕐᕕᒋᓇᓱᐊᕐᓗᒍ ᐊᒻᒪᓗ ᐱᔭᕆᐊᑐᔪᒃᑰᕈᓐᓇᕐᓗᑎᑦ ᖃᐅᔨᒪᓇᓱᐊᕐᓗᑎᑦ ᐱᔾᔪᑎᒋᔭᕐᓂᒃ. ᖃᓄᐃᒻᒪᑦ ᑕᐅᓇᓃᑉᐱᑦ? ᐱᔾᔪᑎᖃᖅᐹ ᐃᓕᓐᓂᐊᖅᑐᓕᕆᔾᔪᑎᓯ ᒫᓐᓇᒧᑦ ᑎᑭᖦᖢᒍ ᐅᖃᐅᑎᓯᒪᒐᔅᓯᐅᒃ ᐃᓅᓯᕐᓄᑦ ᐊᖅᑯᑎᒋᔭᐅᓂᖓᓂᒃ? ᐅᕝᕙᓘᓐᓃᑦ ᓇᒻᒥᓂᖅ ᐱᔪᒪᓪᓚᕆᒃᑲᕕᐅᒃ? ᑕᒪᓐᓇ ᐱᒻᒪᕆᐅᕗᖅ ᐃᓱᒪᒥᐅᑕᕆᓂᐊᕐᓗᒍ," ᐊᓕᑲᒥᒃ ᒪᓂᒪᑎᑦᑎᕗᖅ.

ᓯᕗᓪᓕᕐᓂ ᒪᕐᕉᖕᓂ ᐊᕐᕌᒎᖕᓂ ᐃᓕᓐᓂᐊᖅᑎᓪᓗᒍ, ᐊᔪᕐᓇᕈᓱᓚᐅᖅᑐᖅ ᐊᖏᕐᕋᕆᐊᒃᓴᖅ. ᐊᑭᑐᔪᐊᓘᓚᐅᕐᒪᑦ ᐊᒻᒪᓗ ᐅᖓᓯᑦᑐᐊᓘᔮᖅᑐᓂ. ᑕᒫᓂ ᐊᕐᕌᒍᒥ ᓯᕗᓪᓕᐅᑦᔭᐅᖁᔭᒻᒪᕆᒋᒻᒪᒍ ᐊᒻᒪᓗ ᐊᖏᕐᕋᖅᑐᓂ ᑮᓇᐅᔭᖅᑖᕋᐃᒻᒪᑦ. ᐊᖏᕐᕋᓛᕆᐊᒃᓴᖅ ᖁᕕᐊᓱᒡᕕᖕᒥ ᐊᐅᔭᒃᑯᓪᓗ, ᐊᓕᑲᒥᒃ ᓂᕆᐅᖕᓂᖃᑦᑎᐊᖅᑐᖅ. ᐱᔭᕇᕈᓂ, ᐃᓅᕕᓕᐊᕈᒪᓲᖑᒻᒪᑦ ᐃᖅᑲᓇᐃᔭᕆᐊᖅᑐᕐᓗᓂ ᐊᖏᕐᕋᒧᑦ ᖃᓂᓐᓂᖅᓴᐅᓂᐊᕐᒪᑦ.

ᑕᐃᒪᓕ ᐊᓕᑲᒥᒃ ᖃᐅᑕᒫᑦ ᖃᐅᔨᖃᑦᑕᖅᑕᖓ ᓯᕗᓕᖅᑎᐅᓪᓗᓂ ᐊᒻᒪᓗ ᑕᑯᓪᓗᓂ ᐅᕕᒃᑲᐅᔪᓂᒃ ᐃᒻᒥᓂᒃ ᐱᔪᓐᓇᕐᓂᕐᒥᓂᒃ ᐊᑐᖅᑐᑎᒃ ᑐᑭᓯᓐᖏᒻᒪᕆᑦᑕᒥᓂᒃ. ᑕᑯᔪᖅ ᖃᓄᖅ ᑖᒃᑯᐊ ᓄᑕᖅᑲᑦ ᐊᔪᙱᓐᓂᖃᕐᒪᖔᑕ ᓱᓕ ᐅᒃᐱᕆᙱᑕᖏᓐᓂᒃ ᑭᓯᐊᓂ ᑕᑯᓪᓗᓂᔾᔪᒃ ᐊᑐᕐᖢᑎᒃ ᐊᔪᙱᓐᓂᖏᓐᓂ ᐱᑎᑦᑎᓲᖅ ᖁᕕᐊᒋᔭᖏᓐᓂ ᐱᔪᒪᓕᖅᑎᑦᑎᔪᓂᒃᓗ.

ᐱᕈᖅᓴᓪᓗᓂ, ᐊᓕᑲᒥᒃ ᐊᖏᔪᒥᒃ ᐊᖓᔪᖃᖁᔨᓚᐅᖅᑐᖅ ᐊᒻᒪᓗ ᐃᓚᖓᒍᑦ ᓱᓕ ᑕᐃᒪᐃᖃᑦᑕᕋᒥ. ᐃᒪᐃᖁᔨᔪᖅ ᐅᖃᐅᑎᓗᓂᐅᒃ ᒪᒃᑯᖕᓂᖅᓴᖅ ᐃᖕᒥᓂᒃ, "ᖃᓄᐃᙱᑦᑐᖅ ᐊᔾᔨᒋᔾᔮᙱᑕᖓ." ᐱᕈᖅᓴᔭᐅᓪᓗᓂ ᓄᓇᓕᕋᓛᒥ, ᐊᔾᔨᒌᒃᑎᑦᑎᓂᖅ ᐊᒻᒪ ᐃᓄᒋᐊᒃᑐᓄᐊᕐᓂᖅ ᐊᑦᑕᕐᓇᙱᓛᖑᖅᑰᔨᓚᐅᖅᐳᖅ. ᑭᖑᒧᑦ ᑕᑯᓗᒍ, ᐅᖃᕈᓐᓇᖁᔨᕗᖅ, "ᓈᒻᒪᒃᑐᒦᑦᑎᐊᖅᐳᑎᑦ. ᐃᕝᕕᑦ ᐃᓄᑑᔭᕆᐊᖃᕋᕕᑦ." 

ᒪᒃᑯᒃᑐᓂᒃ ᐅᖃᐅᔾᔨᔪᓐᓇᕈᓂ, ᓇᖕᒥᓂᖅ ᐊᑐᖅᓯᒪᔭᒥᓂᒃ ᑐᓴᖅᑎᑦᑎᓇᔭᖅᐳᖅ. "ᐃᓄᖃᓚᐅᖅᑐᖓ ᐃᓅᓯᓐᓂ ᑕᑯᓚᐅᖅᓯᒪᙱᑕᓐᓂᒃ, ᐱᓗᐊᖅᑐᒥᒃ ᐱᔪᒃᓯᑦᑎᐊᖅᖢᖓ ᓯᕗᓕᖅᑎᐅᓂᕐᒥᒃ ᐃᑲᔪᕐᓂᕐᒥᒡᓗ ᐊᓯᓐᓂᒃ ᓇᓗᓇᐃᖅᓯᒪᑦᑎᐊᖅᑐᒃᑯᑦ. ᐅᖃᕋᔭᖅᑐᖓ, 'ᑲᑉᐱᐊᓱᙱᓪᓗᑎᑦ ᑕᒪᑐᒧᖓ;, ᓲᖃᐃᒻᒪ ᖃᐅᔨᒪᔪᖓ ᐃᓛᓐᓂᒃᑯᑦ ᑲᑉᐱᐊᓇᓲᖅ ᓯᕗᒻᒧᐊᒋᐊᒃᓴᖅ ᖁᑦᑎᖕᓂᖅᓴᒧᑦ ᐱᑐᐃᓐᓇᕆᐊᖃᖅᑕᕐᓄᑦ ᐃᓕᖕᓄᑦ, ᐱᐅᒐᓗᐊᖅᑎᓪᓗᒍ. ᐃᖢᐊᙱᑦᑐᖅ ᑲᑉᐱᐊᓇᕈᓐᓇᖅᖢᓂᓗ. ᐃᓛᓐᓂᒃᑯᑦ ᐃᒪᓐᓇᐅᖅᑰᔨᓐᓇᖅᑐᖅ, 'ᐊᔪᕐᓇᙱᓐᓂᖅᓴᖅ ᐅᕙᖓᐅᖏᓐᓇᕆᐊᒃᓴᖅ' ᑐᐹᖅᓯᙱᓪᓗᖓᓗ ᑖᒃᑯᓂᖓ ᓱᓕ ᖃᐅᔨᓚᐅᙱᑕᓐᓂᒃ. ᐃᒪᓐᓇᐅᒐᔪᒃᐸᒃᐳᖅ, ᐊᔪᕐᓇᙱᓐᓂᖅᓴᐅᕗᖅ, ᑭᓯᐊᓂ ᑕᒪᓐᓇ ᐊᑐᕈᓐᓃᖅᑎᑕᐅᓂᖅ ᐊᑐᕐᓂᖃᕈᓐᓇᖅᐳᖅ."

ᖃᐅᔨᐊᓪᓚᓚᐅᖅᖢᓂ ᖁᑦᑎᖕᓂᓕ 12-ᒥᑦ ᐃᓕᓐᓂᐊᕈᒪᑦᑎᐊᖕᓂᖓ ᐃᓕᓐᓂᐊᕐᑎᑦᑎᓂᖓᓗ ᑐᕌᕋᓱᒃᑕᖓᑎᑐᑦ, ᑲᐃᕋᓐ ᐊᓕᑲᒥᒃ ᓯᓚᑦᑐᖅᓴᕐᕕᒡᔪᐊᒧᐊᓚᐅᖅᑐᖅ ᖃᓪᓗᓈᓄᑦ. ᓂᕆᐅᒋᔭᖃᖅᐳᖅ ᓯᕗᒻᒧᐊᖅᐸᓪᓕᐊᔪᒪᓪᓗᓂ ᐊᒃᑐᖅᓯᓂᕆᔭᖓᓂᒃ ᐃᒃᐱᒋᔭᒥᓂᒃ ᐃᓕᓴᐃᔨᒥᑦ ᐱᔪᒃᓯᑎᑦᑎᓚᐅᖅᑐᒥᒃ ᑖᔅᓱᒥᖓ, ᐱᓇᔪᒃᖢᓂ ᐱᔪᒃᓯᑦᑎᐊᕐᓂᕐᒥᓂᒃ ᐃᓕᓐᓂᐊᖅᓯᒪᓂᕐᒥᒃ. ᐅᖓᓯᑦᑑᒐᓗᐊᖅ ᐊᖏᕐᕋᒥᓂᒃ, ᑭᓯᐊᓂ ᓂᕆᐅᒃᑐᖅ ᐅᑎᖅᑎᓪᓗᒍ ᓯᕗᓕᖅᓯᓂᖅ ᑎᑎᖅᑲᓂᒡᓗ ᐊᒻᒪᓗ ᒪᑉᐱᕐᓗᒍ ᑲᑎᑎᓐᓇᓱᒃᓗᒍ ᐃᓄᒋᐊᓄᑦ. ᓴᓐᖏᔫᓪᓗᓂ ᑭᓇᐅᓂᕐᒥᓂᒃ, ᑕᑯᓐᓇᒐᖃᑦᑐᖅ ᓯᕗᓂᑦᓴᑎᓐᓄᑦ, ᑲᔪᖏᖅᓴᖅᑕᐅᓪᓗᓂ ᒪᒃᑯᑦᑐᓄᑦ ᐊᒻᒪᓗ ᐃᓄᓐᓄᑦ ᐊᕙᑎᖏᓐᓃᑦᑐᓄᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.