ᐃᙱᓲᖅ ᐃᒪᕐᒧᑦ, ᐅᖃᓪᓚᒃᐸᒃᖢᓂ ᐃᒪᕐᒧᑦ ᐱᖃᓐᓇᕆᓪᓗᓂᐅᒃ. ᓚᐃᓚ ᓯᑖᑦᔅ ᒨᕼᐋᒃᒥᐅᑕᖅ, ᐃᓚᒋᔭᐅᔪᖅ Turtle Clan-ᑯᓐᓄᑦ, ᐱᖓᓲᔪᖅᑐᑦ ᓄᓇᓕᕐᔪᐊᑦ Grand River-ᒥ. ᐅᖃᐅᓯᕐᒥᓂᒃ ᐃᓕᑦᑎᓚᐅᙱᑦᑐᖅ ᐱᕈᖅᓴᓪᓗᓂ ᑭᖑᕚᕇᓄᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᓪᓗᓂ. ᓯᕗᓪᓕᕐᒥ ᑐᑭᓯᓚᐅᖅᓯᒪᕗᖅ ᖃᓄᖅ ᐊᖏᑎᒋᔪᒥᒃ ᑭᖑᕚᕇᓄᑦ ᐊᑲᐅᙱᓕᐅᕈᑕᐅᕙᒃᑐᓂᒃ ᐃᖅᑲᓇᐃᔭᖅᑎᓪᓗᒍ Woodland Cultural Centre-ᒥ, ᐃᓂᒋᔭᖓᓂ ᒨᕼᐋᒃ ᐃᓕᓐᓂᐊᕐᕕᖓᓂ, ᐊᑯᓂᐅᓛᖑᓪᓗᓂ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᑲᓇᑕᒥ. ᐊᑕᐅᓯᖅ ᐃᓐᓇᖅ ᐊᐱᖅᓱᖅᑕᖓ ᐅᖃᐅᓯᖃᓚᐅᖅᐳᖅ ᐅᖃᐅᔾᔭᐅᓚᐅᖅᓯᒪᙱᓐᓂᕐᒥᓂᒃ ᓇᒡᓕᒋᔭᐅᓂᕐᒥᓂᒃ ᐅᔾᔨᕈᓱᓕᓚᐅᖅᖢᓂᓗ ᐃᓕᓐᓂᐊᕆᐊᖅᑎᑕᐅᕙᓚᐅᕐᓂᕐᒥᓂᒃ ᑭᒡᓕᖃᖅᑎᑦᑎᓚᐅᕐᓂᖏᓐᓂᒃ ᓇᖕᒥᓂᖅ ᖃᑕᙳᑎᖏᑕ ᐊᔪᙱᓐᓂᕆᔭᖏᓐᓂᒃ ᑐᓴᖅᑎᑦᑎᔪᓐᓇᕐᓂᕐᒥᒃ ᓇᒡᓕᖕᓂᕐᒥᒃ ᖃᐅᔨᓕᓚᐅᖅᖢᓂᓗ ᐃᒻᒥᓄᑦ ᐊᓈᓇᖓᓄᓪᓘᓐᓃᑦ ᐱᑎᑕᒃᓴᐅᙱᓐᓂᖓᓂᒃ ᐊᒻᒪ ᐱᒻᒪᕆᐅᓂᕆᔭᖓᓂᒃ ᐱᔾᔪᑎᖃᙱᖦᖢᓂ.

"ᐊᒃᑐᐊᔾᔪᑎᒋᓂᖅᐹᕆᓚᐅᖅᑕᕋ ᐃᒪᖅ," ᐃᖅᑲᐅᒪᔪᖅ, ᐃᓱᒪᒋᓪᓗᓂᐅᒃ ᐊᑖᑕᑦᑎᐊᖓ ᐳᐊᕐᕆᔭᖃᑦᑕᓚᐅᖅᓯᒪᓂᖓᓂᒃ ᑎᓴᒪᓂᒃ ᐊᖏᔪᐊᓗᖕᓂᒃ ᑕᓯᕐᓂᒃ ᓄᓇᒥᓂ ᐱᓱᒡᕕᒋᕙᓚᐅᖅᑕᒥᓂᒃ ᖃᐅᑕᒫᑦ. ᑎᓕᐅᖅᐸᒃᖢᓂᐅᒃ ᐃᒪᖅᑐᕆᐊᖁᓪᓗᓂᐅᒃ ᖃᐅᔨᓇᓱᒡᓗᓂ ᐊᒻᒪ ᖃᓄᖅ ᐅᖃᐅᑎᓇᔭᕐᒪᖔᒍ "ᖃᖓᑐᐃᓐᓇᖅ ᐃᒪᖅ ᐊᑭᖃᓛᕐᒪᑦ ᒎᓗᒧᑦ. ᖃᐅᔨᓴᕆᐊᖃᖅᐳᑎᑦ ᐃᒪᕐᒥᒃ." ᐊᕐᕌᒍᒐᓴᐃᑦ ᐊᓂᒍᖅᑎᓪᓗᒋᑦ, ᔅᑖᑦᔅ ᓴᖅᑭᑎᑦᑎᓚᐅᖅᐳᖅ ᑕᕐᕆᔭᒐᒃᓴᒥᒃ ᖃᓛᖅᑎᑦᑎᑲᑕᖕᓂᕐᒥᒃ, ᓄᓇᖃᖅᑳᖅᑐᑦ ᓄᓇᓕᖏᓐᓄᐊᖅᖢᓂ ᑎᑎᕋᕆᐊᖅᑐᖅᖢᓂ ᐃᒪᖃᑦᑎᐊᙱᓐᓂᖏᓐᓂᒃ ᐊᒻᒪ ᖃᓛᖅᑎᑦᑎᑲᑕᖕᓂᖏᓐᓂᒃ ᐃᒪᕐᒥᒃ ᖃᓛᖅᑎᑦᑎᖁᔨᔾᔪᑎᓂᒃ.

"ᐃᒐᕝᕕᖏᓐᓂ ᐃᒃᓯᕚᓚᐅᖅᐳᖓ, ᓄᓇᓕᖏᓐᓂ ᓄᓇᖃᓚᐅᖅᐳᖓ, ᐅᓂᒃᑳᕐᕕᒋᕙᓚᐅᖅᐸᒃᑲ. ᐃᓅᓯᕐᒧᑦ ᐊᓯᔾᔨᕈᑎᐅᓚᐅᕐᑐᖅ ᐅᕙᓐᓄᑦ."

'ᖃᐅᔨᒪᕗᖓ ᑭᒃᑯᓕᒫᑦ ᑕᐅᑐᒃᑐᑦ ᑕᕐᕆᔮᒃᓴᒥᒃ, ᑕᒪᒃᑯᓂᖓ ᑕᑯᔪᓐᓇᙱᒻᒪᑕ. ᖁᕕᐊᓱᒻᒪᕆᓚᐅᖅᐳᖓ ᑕᒪᓐᓇ ᓇᒃᓴᕆᐊᒃᓴᖅ," ᓯᑖᑦᔅ ᐅᖃᓚᐅᖅᐳᖅ. "ᐃᒪᖅ ᑕᓯᐅᖅᓯᔾᔪᑕᐅᖏᓐᓇᐅᔭᖅᐳᖅ, ᐃᒻᒥᓂᒃ ᐊᐱᕆᒐᓗᐊᕈᒪ ᐅᕝᕙᓘᓐᓃᑦ ᐃᒻᒥᓂᒃ ᓇᓗᓕᕋᓗᐊᕈᒪ, ᓄᓇᖃᖅᑳᖅᓯᒪᙱᓗᐊᕋᒪ, ᐅᕝᕙᓘᓐᓃᑦ ᖃᐅᔨᒪᙱᓗᐊᕋᒪ, ᐃᒪᕐᒧᑦ ᐃᒪᕐᒨᓲᖑᕗᖓ ᓈᒻᒪᒃᖢᖓᓗ. ᐃᒃᓯᕚᖅᑐᖓ ᐃᒪᐅᑉ ᓴᓂᐊᓂ, ᐃᙱᖅᖢᖓ ᐃᒪᕐᒧᑦ, ᑕᒫᓃᑉᐳᖓᓗ. ᐅᓇ ᑭᓇᐅᕗᖓ. ᑲᒪᓇᒻᒪᕆᒃᑐᖅ ᐃᒃᐱᖕᓂᐊᓂᖅ," ᐅᖃᕆᓪᓗᓂ. ᐱᓕᕆᖃᑎᖃᖅᓯᒪᕗᖅ ᐃᓕᓐᓂᐊᕐᕕᖕᓂ ᑲᑎᙵᓂᖅᑖᖅᑎᑦᑐᒪᓪᓗᓂᒋᑦ.

ᓯᕗᓪᓕᖅᐹᖑᓪᓗᓂ ᑕᕐᕆᔭᒐᒃᓴᓕᐊᕆᓚᐅᖅᓯᒪᔭᖓ Staats ᑮᓇᐅᔭᖅᑖᓚᐅᖅᐳᖅ $5000-ᓂᒃ ᓴᓇᙳᐊᕈᓐᓇᖅᖢᓂ ᐃᒪᐅᑉ ᒥᒃᓵᓄᑦ $5000-ᒧᑦ. ᐊᔾᔨᓕᐅᕈᑎᒥᒃ ᓂᐅᕕᓚᐅᖅᐳᖅ ᑮᓇᐅᔭᒧᑦ ᐊᒻᒪ ᓂᔾᔭᐅᓯᔭᖅᑎᓕᒫᓂᒃ, ᐊᔾᔨᓕᐅᕆᕙᒃᖢᓂ ᐊᒻᒪ ᓇᑲᑎᕆᕙᒃᖢᓂ ᓇᖕᒥᓂᖅ. ᑕᕐᕆᔮᒃᓴᒥᒃ ᓴᖅᑭᑎᖦᖢᓂᐅᒃ ᑕᐃᓪᓗᓂᐅᒃ ᐊᐅᒃ ᐊᒻᒪ ᐃᒪᖅ. 20 ᒥᓂᑦᓯᓂᒃ ᑕᑭᓂᖃᓚᐅᖅᐳᖅ ᐊᒻᒪ ᓂᕆᐅᓚᐅᙱᓚᖅ ᑭᓇᑐᐃᓐᓇᕐᒧᑦ ᑕᐅᑐᒃᑕᐅᓂᐊᕆᐊᒃᓴᖓᓂᒃ. "ᓱᖁᑕᐅᓂᐊᕋᓱᒋᓚᐅᙱᓐᓇᒃᑯ. ᐅᕙᓐᓄᓪᓕ ᑐᕌᖓᑐᐃᓐᓇᓚᐅᖅᐳᖅ, ᐅᓂᒃᑳᕋ ᐃᓕᔪᒪᓚᐅᕋᒃᑯ, ᖃᓄᑭᐊᖅ, ᕿᑐᕐᖓᓐᓄᑦ ᑐᕌᖓᓪᓗᓂ ᖃᓄᑐᐃᓐᓇᕐᓘᓐᓃᑦ," ᐅᓂᒃᑳᕆᓪᓗᓂ, ᐅᖃᐅᓯᖃᕆᓪᓗᓂ ᑕᐅᓴᖏᓐᓃᑦᑐᑦ ᐃᓕᓐᓂᐊᕐᕖᑦ ᐊᒻᒪ ᑕᐅᓴᖏᓐᓃᑦᑐᑦ ᐃᓄᐃᑦ ᑕᑯᓚᐅᕐᓂᖏᓐᓂ. ᑕᒪᓐᓇ ᓴᙱᒃᑎᒋᐊᖅᑎᑦᑎᒃᑲᓐᓂᓚᐅᖅᐳᖅ ᐱᓕᕆᔨᒻᒪᕆᐅᔭᕆᐊᖃᙱᓐᓂᕐᓂᒃ ᐊᔾᔨᓕᐅᕆᔨᖃᕐᓗᑎᒃ ᐊᒻᒪ ᐱᓕᕆᔨᓪᓚᕆᐅᓗᑎᒃ ᐱᖁᑎᖃᕐᓗᑎᒃ ᐊᖏᔪᐊᓗᖕᓂᒃ ᑮᓇᐅᔭᓂᒃ ᐊᑐᖅᑐᒃᓴᓂᒃ ᐅᕝᕙᓘᓐᓃᑦ ᐱᓕᒻᒪᒃᓴᖅᓯᒪᕐᔪᐊᕐᓗᑎᒃ, ᐅᓂᒃᑳᖅᑐᐊᖃᕆᐊᖃᑐᐃᓐᓇᖅᐳᑎᑦ ᐊᒻᒪ ᐅᖄᓚᐅᑎᕋᓛᖃᕐᓗᑎᑦ ᐊᓯᔾᔩᔪᓐᓇᖅᐳᑎᑦ.

ᑭᖑᓪᓕᕐᒥ ᑕᕐᕆᔭᓕᐊᕆᒃᑲᓐᓂᖅᑕᖓᓂ, Boil Alert, ᔅᑖᑦᔅ ᐃᓱᒪᓚᐅᖅᐳᖅ ᖃᓂᙳᕐᓇᐅᑎᑑᕐᓂᐊᕋᓱᒋᓪᓗᓂᐅᒃ, ᓂᐱᓕᐅᕆᑲᑕᒃᖢᓂ ᐅᓂᒃᑳᖅᑐᐊᓂᒃ ᓴᓂᕐᕙᒃᑕᐅᓯᒪᔪᓂᒃ. "ᑭᓯᐊᓂ ᑕᒪᕐᒥᑦᑎᐊᖅ ᐅᓇᑕᖅᑐᒃᓴᓕᐊᕆᓚᐅᖅᑕᒃᑲ ᐅᕙᓐᓂᒃ ᐃᓚᐃᓐᓇᕆᓚᐅᖅᐸᖏᑦ, ᓲᕐᓗ ᐅᕙᓐᓂᙶᖅᑐᑎᑐᑦ, ᓲᕐᓗ ᒪᒥᓴᕐᓂᖅ ᐊᒻᒪ ᐱᕈᖅᐸᓪᓕᐊᓂᖅ ᐊᒻᒪ ᐋᓐᓂᕐᓇᖅᑐᖅ. ᐅᕙᓐᓄᑦ ᓴᙱᔪᒻᒪᕆᐅᓚᐅᖅᐳᖅ ᑕᐃᒪᐃᓕᐅᕆᐊᒃᓴᖅ, ᐃᓕᑦᑎᔪᓐᓇᖅᖢᖓ ᐊᑐᐃᓐᓇᐅᔪᒥᒃ, ᑕᕝᕙᑲᐅᑎᒋ," ᐅᓂᒃᑳᕆᓪᓗᓂ.

"ᐅᓂᒃᑳᖅᑐᐊᕈᓐᓇᑦᑎᐊᖅᐳᒍᑦ. ᑕᒪᓐᓇ ᐅᓂᒃᑳᖅᑐᐊᖃᖅᐳᒍᑦ ᐃᓗᑦᑎᓐᓂ, ᐊᒻᒪ ᐃᓕᖅᑯᓯᕆᓪᓗᑎᒍᑦ."

ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐊᖏᕐᕋᒥᓂ ᐊᐅᓪᓚᕆᐊᖃᖅᐸᒃᑐᓄᑦ ᖃᐅᔨᕚᓪᓕᕈᒪᓪᓗᑎᒃ ᐃᒪᓐᓇᐅᕗᖅ, "ᐃᒪᕐᒧᑦ ᐅᐸᒡᓗᒍ, ᓇᓂᓗᒍ ᐃᒪᖅ ᓇᓃᓐᓂᕆᔭᐃᑦ ᐃᒃᓯᕚᖃᑎᒋᓗᒍᓗ. ᑭᓇᐅᖕᒪᖔᖅᐱᑦ ᓇᓗᓇᐃᕐᓗᑎᑦ." ᔅᑖᑦᔅ ᐊᔪᕈᓐᓃᖅᓴᖅᐸᒃᐳᖅ ᓇᒧᙵᐅᒑᖓᒥ ᓄᑖᒧᑦ ᓇᒧᙵᐅᒑᖓᒥ, ᐃᒻᒥᓂᒃ ᖃᐅᔨᑎᑦᑎᕙᒃᐳᖅ ᐃᒪᕐᒥᒃ ᓇᒧᙵᐅᓕᕌᖓᒥ. "ᐅᖃᓪᓚᖃᑎᒋᓂᐊᖅᐸᕗᑦ. ᕼᐊᓘᖅᐸᒃᐳᒍᑦ, ᐃᙱᖅᐸᒃᖢᑕ ᐃᒪᕐᒧᑦ ᐃᙱᐅᓯᑦᑎᓐᓂᒃ, ᐅᐱᒋᕙᒃᖢᑎᒍᓪᓗ ᖁᔭᓕᕙᒃᖢᑕᓗ. ᑖᓐᓇ ᐱᖃᓐᓇᕇᓐᓇᐅᔭᖅᑕᐃᑦ. ᐃᓕᖕᓂ ᐱᖃᑎᖃᐃᓐᓇᐅᔭᖅᐳᑦ, ᐊᒻᒪ ᓇᐹᖅᑐᐃᑦ, ᐃᓚᒋᒐᕕᒋᑦ.," ᐅᖃᖅᑐᖅ, ᐅᖃᐅᓯᖃᖅᖢᓂ ᖃᑕᙳᑎᒌᑦ ᐱᐅᓯᕆᕙᒃᑕᖏᓐᓂᒃ.

ᓯᑖᑦᔅ ᑐᓴᖅᑎᑦᑎᔪᓐᓇᖅᐸᑦ ᒪᒃᑯᖕᓂᖅᓴᒧᑦ ᐃᒪᓐᓇᐅᓇᔭᖅᐳᖅ, "ᒫᓐᓇ ᓈᒻᒪᒃᓯᕗᑎᑦ, ᑭᓱᓕᒫᑦ ᑕᐃᒪᐃᑦᑕᕆᐊᖃᖅᐳᑦ. ᐱᔾᔪᑎᖃᖅᐳᑎᑦ ᒫᓐᓇ ᓇᓃᓕᕐᒪᖔᖅᐱᑦ. ᖃᐅᔨᒪᔪᖓ ᑭᓱᓕᒫᓂᒃ ᐊᓯᔾᔩᔪᒪᒐᑦᑕ ᐊᒻᒪᓗ ᑭᓱᓕᒫᓂᒃ ᐋᖅᑭᒃᓯᔪᒪᓪᓗᑕ, ᐊᒻᒪᓗ ᒪᒥᑎᑦᑎᔪᒪᓪᓗᑕ ᑭᓱᓕᒫᓂᒃ, ᑭᓯᐊᓂ ᐃᒃᓯᕚᑐᐃᓐᓇᕐᓗᑎᑦ ᒫᓐᓇ ᐊᒻᒪᓗ ᑐᑭᓯᐅᒪᓗᑎᑦ ᑕᐃᒪᐃᑦᑕᕆᐊᖃᕐᓂᖓᓂᒃ. ᐱᔾᔪᑎᑕᖃᖅᐳᖅ, ᐃᓕᑦᑎᔾᔪᑎᑕᖃᖅᖢᓂᓗ, ᐱᕕᒃᓴᖅᑕᖃᖅᖢᓂᓗ ᐱᕈᖅᐸᓪᓕᐊᓂᕐᒧᑦ. ᖃᓄᐃᒋᙱᑐᐃᓐᓇᕐᓗᒍ ᑭᓇᐅᖕᒪᖔᖅᐱᑦ ᒫᓐᓇ, ᐅᐱᒋᓗᒍᓗ ᓇᓗᓇᐃᕐᓗᒍᓗ, 'ᐄ, ᓈᒻᒪᒃᐳᖓ.'"

ᖃᓄᐃᙱᑦᑎᐊᕋᓱᒃᑎᓪᓗᒍ, ᔅᑖᑦᔅ ᑕᐅᑐᒃᐸᒃᐳᖅ ᑐᒃᓯᐊᕐᓂᖓᑕ ᒪᑐᐃᕐᓂᖓᓂ. ᑐᓴᓚᐅᖅᑕᖓ ᑲᑎᒪᕕᒡᔪᐊᖅᑎᓪᓗᒋᑦ ᖃᐅᔨᒪᓪᓗᓂᓗ ᐱᒻᒪᕆᐅᓂᖓᓂᒃ ᐃᓕᓴᖅᓯᓂᕐᒥᒃ ᐊᒃᑐᐊᓂᕆᔭᖏᓐᓂᒃ ᐆᒪᔪᓄᑦ ᐊᒻᒪ ᖁᔭᓕᓂᖃᑦᑎᐊᕐᓗᓂ. ᐱᓕᕆᖃᑎᖃᓚᐅᖅᑐᖅ ᐃᓐᓇᑐᖃᕐᒥᒃ ᓴᓇᓪᓗᓂ 3 ᒥᓂᔅᓯᒥᒃ ᑕᕐᕆᔮᒃᓴᒥᒃ ᐊᒻᒪᓗ ᑐᓂᐅᖅᑲᖅᑕᐅᓪᓗᓂ ᑭᓇᑐᐃᓐᓇᕐᒧᑦ ᐊᐱᕆᔪᒧᑦ. ᖃᐅᑕᒫᑦ ᐱᒋᐊᖅᐸᒃᐳᖅ ᐅᓪᓗᖓᓂ ᑐᒃᓯᐊᕐᓂᒃᑯᑦ ᐃᒃᐱᒋᕙᒃᖢᓂᐅᒡᓗ ᐊᒃᑐᐊᓂᕆᔭᖓ ᓯᓚᒧᑦ ᑭᓱᓕᒫᓄᓪᓗ ᐊᕙᑎᒥᓄᑦ ᐱᕈᖅᐸᓪᓕᐊᓂᖓᓂᒃ.

ᑕᒪᓐᓇ ᐃᓱᒪᒋᓪᓗᒍ, ᔅᑖᑦᔅ ᐅᖃᐅᓯᖃᖅᐳᖅ ᑲᒪᒋᔭᖃᑦᑎᐊᕐᓂᕐᒥᒃ ᖃᓄᐃᙱᑦᑎᐊᕈᓐᓇᕐᓂᕐᒥᓂᒃ ᐃᒪᓐᓇ, "ᑕᒪᒃᑯᓂᖓ ᐱᕕᒃᓴᓂᒃ ᐱᖃᑦᑕᕐᓂᕐᒥᒃ ᐃᓕᓴᖅᓯᑐᐃᓐᓇᕐᓂᕐᒥᒃ ᐃᓕᐅᖅᑲᐃᓂᕐᒥᒡᓗ ᐱᑐᐃᓐᓇᐅᙱᑦᑐᓂᒃ ᐊᑐᖅᐸᒃᑕᕐᓂᒃ ᐃᓅᓯᕐᓂ ᐱᕕᒃᓴᖃᖅᑎᑦᑎᔪᓂᒃ ᐃᓂᒥᒃ ᐊᑕᖃᑎᒌᖕᓂᕐᒧᑦ, ᐃᓅᖃᑎᒌᖕᓂᕐᒧᑦ, ᖃᐅᔨᒪᓂᕐᒧᓪᓗ ᓇᐹᖅᑐᐃᑦ, ᐃᓕᖕᓂᒃ ᑐᓵᕙᖕᒪᑕ, ᐃᒪᖅ ᐃᓕᖕᓂᒃ ᑐᓵᕙᒃᖢᓂ, ᑕᒪᓐᓇ ᓇᓗᓇᐃᖅᑕᐅᓯᒪᕗᖅ ᖃᐅᔨᓴᖅᑐᓕᕆᓂᒃᑯᑦ."

ᐃᙱᓲᖅ ᐃᒪᕐᒧᑦ, ᐅᖃᓪᓚᒃᐸᒃᖢᓂ ᐃᒪᕐᒧᑦ ᐊᒻᒪ ᓚᐃᓚ ᓯᑖᑦᔅᒧᑦ, ᐱᖃᓐᓇᕆᔭᖓᑕ ᐅᖓᑖᓃᑉᐳᖅ, ᐊᖏᓛᖑᓪᓗᓂ ᐊᒃᑐᐊᓂᕆᔭᖓ ᐊᒻᒪ ᐅᖃᐅᓯᐅᓪᓗᓂ ᒪᕐᕉᖕᓄᑦ ᐅᓂᒃᑳᓕᐊᖑᓯᒪᔪᓄᑦ. ᐊᑖᑕᑦᑎᐊᖓᑕ ᐊᔭᐅᖅᑐᖅᐸᓚᐅᖅᑕᖓ ᐃᒪᕐᒧᑦ ᖃᐅᔨᓇᓱᒡᓗᓂ, ᖃᐅᔨᓴᕈᒪᓪᓗᓂᐅᒃ ᑕᐃᒪᐃᓕᐅᖅᓯᒪᓪᓗᓂᓗ ᐊᓯᒃᑲᓐᓂᖏᓐᓂᒡᓗ. ᐱᓕᒻᒪᒃᓴᖅᓯᒪᓗᐊᙱᑦᑑᒐᓗᐊᖅ ᐅᕝᕙᓘᓐᓃᑦ ᐱᖁᑎᖃᑦᑎᐊᙱᖦᖢᓂ ᑭᓯᐊᓂ ᐅᓂᒃᑳᖃᖅᐳᖅ ᐃᓗᒥᒍᑦ ᖁᕕᐊᒋᔭᖃᖅᖢᓂᓗ ᐃᒪᕐᒥᒃ ᖄᖅᓯᕙᓪᓕᐊᔪᒥᒃ ᐊᒥᖅᑳᕈᑎᒋᔪᓐᓇᖅᖢᓂᐅᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.