"ᐱᕈᖅᐸᓪᓕᐊᓇᓱᒋᓚᐅᖅᓯᒪᙱᑦᑐᖓ ᐃᓅᕕᐅᑉ ᐱᖓᖕᓇᖔᖓᓂ, ᐃᒥᕋᓚᒡᕕᖕᒥ ᐃᙱᖅᖢᖓ ᓄᑕᕋᐅᑎᓪᓗᖓ ᐃᓕᓐᓂᐊᕈᑎᓕᖕᓄᑦ 8−ᒥ, ᐅᓪᓚᒡᕕᖕᒥ, ᐊᔪᖅᓴᕐᓂᕐᒥᒃ ᐱᕈᖅᐸᓪᓕᐊᓪᓗᖓ... ᑭᓯᐊᓂ ᐅᓪᓗᖅ ᐊᑕᐅᓯᖅ ᑕᖃᓕᓚᐅᕋᒪ. ᖃᓂᒪᔪᖓ. ᑕᐃᒪᓐᓇ ᐃᓅᒐᒪ, ᐊᒻᒪᓗ ᓂᕈᐊᕐᕕᖃᕈᒪᔪᖓ. ᐱᕕᒃᓴᖃᕈᒪᔪᖓ," ᓕᐊᓐ ᒎᔅ ᐃᖅᑲᐅᒪᔪᖅ. ᑕᐃᒪᓕ ᐃᓱᒪᓕᐅᓕᓚᐅᖅᑐᖅ ᐃᓄᓐᓂᒃ ᕿᒥᕐᕈᓪᓗᓂ ᐊᒻᒪᓗ ᐃᒻᒥᓂᒃ ᕿᓂᖅᑐᓂ. ᐊᓯᔾᔩᒋᐊᖃᓕᔪᔫᒐᓗᐊᖅ.

"ᐃᓕᑦᑎᔭᕆᐊᖃᓚᐅᖅᑐᖓ ᖃᓄᖅ ᑕᐃᒪᐃᓕᐅᕆᐊᒃᓴᖅ ᐊᓂᒍᕈᓐᓇᕐᓂᐊᕋᒪ, ᐊᖏᕐᕋᕈᓐᓇᕐᓂᐊᕋᒪ ᐊᒥᖅᑳᕈᑎᒋᔪᓐᓇᕐᓗᒋᓪᓗ ᑖᒃᑯᐊ ᐊᔪᙱᓐᓂᒃᑲ. ᓲᖃᐃᒻᒪ ᑕᒪᑦᑕᑦᑎᐊᖅ ᐃᒃᐱᒋᔭᖃᕆᐊᖃᕋᑦᑕ. ᐃᓕᓴᖅᓯᔭᕆᐊᖃᖅᑐᐃᓐᓇᐅᔪᒍᑦ ᐃᓂᖃᕐᓂᑦᑎᓐᓂᒃ ᐊᒻᒪ ᐱᕕᒃᓴᑦᑎᓐᓂᒃ, ᓇᖕᒥᓂᕆᓗᒋᓪᓗ ᑭᓱᑐᐃᓐᓇᑦᑎᐊᓄᑦ ᐅᕙᑦᑎᓐᓄᑦ," ᑲᔪᓯᔪᖅ. 

ᐱᕈᖅᓴᔭᐅᓪᓗᓂ ᐊᒃᓚᕕᒃᒥ ᐊᒻᒪ ᑐᓚᐃᑕᒥ, ᐊᖓᔪᖅᑳᖏᑦ ᑲᑎᓚᐅᖅᐳᑦ Grollier Hall-ᒥ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓄᑦ ᐊᒻᒪ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᓪᓗᓂ. ᒎᔅ ᒫᓐᓇ ᐃᖅᑲᓇᐃᔭᓕᖅᑐᖅ ᓄᓇᓕᖕᓂ ᓴᓇᙳᐊᕐᓂᕐᒧᑦ, ᐃᓕᖅᑯᓯᓕᕆᓂᕐᒧᑦ, ᑐᓴᐅᒪᖃᑦᑕᐅᑎᓂᕐᒧᑦ ᐊᒻᒪ ᐃᓚᐅᑎᑦᑎᓂᕐᒧᑦ ᐊᒻᒪ ᐃᙱᖅᑎᐅᓂᕐᒧᑦ, ᐃᙱᐅᓯᐅᕐᓂᕐᒧᑦ ᑎᑎᕋᖅᑎᐅᓂᕐᒧᑦ, ᐊᒻᒪ ᐅᓂᒃᑳᖅᑐᐊᖅᑎᐅᓂᕐᒧᑦ. 

ᒎᔅ ᓂᔾᔭᐅᑎᓕᐅᖃᑦᑕᓕᓚᐅᖅᑐᖅ ᐊᑖᑕᒥᓂᒃ ᐅᑭᐅᖃᓕᖅᑎᓪᓗᒍ 12-ᓂᒃ. ᓂᖏᐅᖓ ᑯᒃᑭᑕᐹᓚᐅᕐᒥᔪᖅ ᐊᒻᒪᓗ ᐃᕐᓂᖓ ᐊᒻᒪᓗ ᐊᓂᖓ ᓂᔾᔭᐅᓯᔭᖅᑐᑎᒃ. ᓂᔾᔭᐅᓯᔭᕐᓂᖅ ᐱᔭᐅᓯᒪᕗᖅ ᒎᔅ-ᒥᒃ ᑲᓇᑕᓕᒫᒥ ᐊᒻᒪᓗ ᐊᒥᐊᓕᒃᑲᓂ, ᑐᓐᓂᖅᑯᓯᐊᕐᓂᕐᒧᑦ ᓂᕈᐊᒐᒃᓴᙳᖅᑎᑦᑎᓂᕐᒥᒃ ᐊᒻᒪᓗ ᓵᓚᖃᖅᖢᓂ ᐃᙱᐅᓯᐅᕐᓂᕐᒧᑦ ᐊᒻᒪᓗ ᐃᙱᐅᓯᐅᕐᓂᕐᒧᑦ. ᐃᙱᕈᓐᓇᖅᓯᓚᐅᖅᐳᖅ ᕌᔪᔅ ᑐᑦᑕᕐᕕᖓᓂ ᑲᓇᑕᒥ ᓄᓇᖃᖅᑳᖅᓯᒪᔪᑦ ᓂᔾᔭᐅᓯᔭᖅᑎᖏᓐᓄᑦ ᑐᓐᓂᖅᑯᓯᐊᖅᑐᓂᒃ ᓴᖅᑭᑦᑎᓪᓗᓂᓗ ᑎᓴᒪᓂᒃ ᑐᓴᕐᓈᒐᒃᓴᓂᒃ: ᐅᔭᖅᑲᓂᒃ ᑐᓴᕐᓈᒐᒃᓴᒥᒃ, ᑲᓇᑕᒥ ᓂᔾᔭᐅᑎᒥᒃ, ᓂᔾᔭᐅᑎᒥᒃ ᐅᓂᒃᑳᖃᖅᖢᓂ ᐊᖏᕐᕋᒥᓂᒃ ᐊᒻᒪ ᐊᑕᐅᓯᕐᒥᒃ ᖃᓄᐃᑦᑐᓐᓃᖅᐸᓪᓕᐊᓂᐅᑉ ᒥᒃᓵᓄᑦ. 

"ᐅᑭᐅᖅᑕᖅᑐᒥᐅᑕᐅᓪᓗᑕ, ᐊᒃᓱᕈᖅᑐᒍᑦ, ᐊᔪᕐᓇᖅᑐᒃᑰᖅᑐᒍᑦ, ᑭᐱᔭᐅᒐᑦᑕ ᐊᔾᔨᒋᙱᑕᖓᓂ ᖃᓪᓗᓈᖅᑕᒥᑦ."

ᓂᔾᔭᐅᑎᖓ ᑐᓴᖅᑕᐅᖁᓪᓗᓂᐅᒃ ᐱᖃᓐᓇᕆᔭᖏᑦ ᖃᑕᙳᑎᖏᓪᓗ ᐊᓯᐅᓯᒪᔪᑦ ᐊᒻᒪ ᓱᓕ ᐊᒃᓱᕈᖃᑦᑕᖅᑐᑦ ᐊᒃᓱᕈᕐᓇᖅᑑᖃᑦᑕᖅᑎᓪᓗᒍ ᓄᑕᐅᔪᓐᓃᖅᐸᓪᓕᐊᔪᓄᑦ ᐊᐅᓚᔪᓐᓇᐅᑎᖏᓐᓄᑦ ᐅᑭᐅᖅᑕᖅᑐᒥ. ᐃᓱᒪᔪᖅ ᖃᓄᖅ ᐱᔪᓐᓇᖅᑎᒋᖕᒪᖔᑦ ᐱᕈᖅᓴᓪᓗᓂ ᓴᐳᔾᔭᐅᓯᒪᓪᓗᓂ ᐃᓐᓇᕐᓄᑦ ᐃᓕᓴᐃᖃᑦᑕᓚᐅᕐᖢᓂᓗ ᐃᑲᔪᕐᖢᓂ ᐊᒃᓱᕈᕐᓇᖅᑐᒃᑰᕐᓂᒃᑯᑦ ᑕᐅᑐᒃᑕᖓᒍᑦ ᖃᑕᙳᑎᖏᓐᓂ, ᓲᕐᓗ ᐃᖅᑲᖅᑐᐃᕕᓕᕆᓂᖅ ᐅᐃᕆᓯᒪᓂᕐᓗ. ᒎᔅ ᐅᖓᑎᓗᐊᖓᓄᑦ ᑎᒎᑎᓪᓗᓂ ᐊᔪᖅᓴᕐᓂᕐᒥᒃ ᐊᖏᕐᕋᖃᙱᓐᓂᕐᒥᒡᓗ.

"ᓴᓇᙳᐊᖅᑎᐅᑎᓪᓗᑕ, ᐃᖅᑲᓇᐃᔮᕗᑦ ᐊᒃᓱᕉᑎᖃᕈᓐᓇᖅᐳᒍᑦ ᐃᒃᐱᒋᔭᑦᑎᓐᓂᒃ, ᐃᓄᐃᑦ ᐃᒃᐱᒋᔭᖏᓐᓂᒃ, ᖁᕕᐊᓱᖃᑎᒌᒡᓗᑕ ᐃᓅᖃᑎᑦᑎᓐᓂᒃ ᖃᐅᔨᖃᑦᑕᖅᑕᖏᓐᓂᒃ, ᑐᓴᖅᑎᑦᑎᔪᓐᓇᕐᓗᑕᓗ ᐅᓄᕐᓂᖅᓴᓂᒃ ᓈᓚᒃᑎᓂᒃ ᐊᒻᒪ ᑭᒡᒐᖅᑐᐃᔪᓐᓇᕐᓗᑕ ᑕᒪᒃᑯᓂᖓ ᐱᕈᖅᐸᓪᓕᐊᖏᓐᓇᕆᐊᖃᖅᑕᑦᑎᓐᓂᒃ ᖃᓄᐃᙱᑦᑎᐊᕐᓂᐊᕋᑦᑕ ᖁᕕᐊᓱᒡᓗᑕᓗ ᑐᓐᓂᖅᑯᓯᐊᓂᒃ ᐱᑎᓪᓗᑕ ᐅᕙᑦᑎᓐᓄᑦ, "ᓂᕐᓕᓇᖅᑐᑦ. 

ᐅᖃᐅᔾᔪᐃᓂᖓ ᐅᑭᐅᖅᑕᖅᑐᒥ ᐃᓕᓐᓂᐊᖅᑏᑦ ᐊᐅᓪᓚᖁᓪᓗᒋᑦ ᓄᓇᒥᓂᒃ ᐋᖅᑭᒃᓯᒪᓕᖅᑎᑦᑎᔪᒪᓂᐅᕗᖅ ᓇᒧᙵᐅᓂᐊᕐᓂᕐᒥᓂᒃ ᑭᓱᓂᒡᓗ ᐱᖕᒪᖔᑕ, ᖃᐅᔨᓗᒋᑦ ᐊᔾᔨᒌᙱᓐᓂᕆᔭᖏᑦ ᐅᑯᐊ, APA−ᑯᑦ Chicago−ᒧᓪᓗ ᐊᑐᖅᑕᐅᕙᒃᑐᑦ ᐊᓕᓚᔪᐃᑦ, ᐃᓕᑦᑎᓗᑎᒃ ᖃᓄᖅ ᑎᑎᕋᑦᑎᐊᖃᑦᑕᕈᓐᓇᕐᓂᕐᒥᒃ ᐃᓕᓴᐃᓂᕆᕙᒃᑕᒥᓂᒡᓗ ᓇᒃᓴᕐᓗᒋᑦ ᓄᑖᓄᑦ ᐊᕙᑎᒋᓂᐊᓕᖅᑕᖏᓐᓄᑦ. ᓂᖀᑦ ᐊᑐᖁᒃᑲᓐᓂᖅᑕᑎᑦ, "ᐱᓇᔪᒡᓗᒋᑦ ᑭᓱᓕᒫᑦ ᐊᖏᖃᑎᒋᙱᑕᑎᑦ ᐊᐱᕆᓗᒋᓪᓗ ᖃᓄᐃᒻᒪᑦ. ᑐᓂᓯᓗᑎᑦ ᐱᐅᓛᒃᑯᑦ ᐃᒻᒪᖄ ᐃᓱᒪᒋᔭᕐᓂᒃ." 

ᐃᓚᖓᑦ ᐊᑐᖅᑕᐅᕙᒃᑑᑉ ᒎᔅ ᐅᓚᕕᓴᕈᒪᕙᐅᒃ ᖃᓪᓗᓈᓂᕐᒥᐅᑦ ᐅᖃᐅᓯᖃᖅᐸᖕᓂᖏᓐᓄᑦ ᐅᑭᐅᖅᑕᖅᑐᒥᒃ, ᐱᓇᔪᒍᒪᓪᓗᓂᓗ ᐃᓱᒪᒋᔭᒥᓂᒃ ᓄᓇᖃᖅᑳᖅᑐᓄᑦ ᐃᓄᖕᓄᑦ. ᑕᖃᖓᓕᕐᒪᑦ ᖃᓪᓗᓈᑦ ᓄᓇᖓᓐᓂᙶᖅᑐᓂᒃ ᐅᓂᒃᑳᖃᑦᑕᖅᑕᖏᓐᓂᒃ ᐊᒻᒪᓗ ᖃᐅᔨᒪᖁᔨᓪᓗᓂ ᐃᓄᖕᓂᒃ ᐅᑭᐅᖅᑕᖅᑐᒥᐅᓂᒃ ᐃᒻᒥᓂᒃ ᐱᐅᓕᑦᑎᔪᓐᓇᕐᓂᕐᒥᓂᒃ.  "ᐅᕙᓐᓂᒃ ᐱᐅᓕᑦᑎᓯᒪᕗᖓ, ᑕᒫᓃᑉᐳᖓᓗ ᐃᑲᔪᕆᐊᖅᑐᖅᓯᒪᓪᓗᖓ... ᐅᓄᙱᓐᓂᖅᓴᐅᙱᑦᑐᖓ, ᐊᖏᓂᖅᓴᐅᔪᖓ," ᐅᖃᖅᐳᖅ. ᓇᓗᓇᐃᒃᑯᑕᖃᕐᖢᓂ ᓴᓇᐅᒐᓕᕆᓂᖕᒧᑦ ᐃᓕᖅᑯᓯᓕᕆᓂᖕᒧᓪᓗ ᐊᐅᓚᑦᑎᓂᖕᒥᑦ, ᐃᓱᓕᑦᑎᓯᒪᓗᓂ ᓴᓇᐅᒐᓕᕆᓂᖕᒥᑦ ᐃᓕᖅᑯᓯᓕᕆᓂᖕᒥᑦ, ᐃᓱᓕᑦᑎᓯᒪᓂᓕᒃ ᑐᓴᐅᒪᔪᓕᕆᓂᖕᓂᑦ, ᐱᓕᕆᐊᖃᖅᖢᓂᓗ ᖁᑦᑎᖕᓂᖅᐹᒥᑦ ᑭᒃᑯᓕᒫᓄᑦ ᐋᓐᓂᐊᖃᖕᓇᙱᑦᑐᓕᕆᓂᖕᓂᑦ, ᐊᒥᓱᒻᒪᕆᖕᓂᑦ ᐱᓕᕆᐊᖃᖅᓯᒪᒻᒪᕆᒃᑐᖅ ᐱᐊᓂᒃᓯᕙᓪᓕᐊᓪᓗᓂ. ᐊᑕᐅᑦᑎᒃᑯᓪᓗ, ᐊᔭᐅᖅᑕᐅᒃᑲᓐᓂᖅᐳᖅ ᐃᓕᓐᓂᐊᖅᑎᖦᖢᓂᒋᑦ ᐃᓕᓐᓂᐊᖃᑎᖏᑦ ᐃᓕᓴᐃᔨᖏᓪᓗ, ᓇᖕᒥᓂᖅ ᐃᓕᓐᓂᐊᕈᓐᓇᖅᓯᑎᖦᖢᒋᑦ.

"ᑲᒪᔨᖃᕆᐊᖃᙱᑦᑐᖓ. ᓴᐱᕐᓇᖅᑐᒥᒃ ᐱᔭᕆᐊᖃᙱᑦᑐᖓ. ᐊᓂᔭᕆᐊᖃᓕᕋᕕᑦ."

ᐱᕕᒃᓴᒥ ᐊᐅᓚᑦᑎᓂᖅ ᐃᓕᑦᑎᔾᔪᑎᒋᔭᖓ ᑲᔪᓯᑦᑎᐊᕐᓂᕐᒧᑦ, ᑎᑎᕋᕐᓂᖅ ᐱᓕᕆᐊᒃᓴᐅᔪᓕᒫᓂᒃ ᐃᓱᓕᕝᕕᒃᓴᖏᓐᓂᒃᓗ. ᑖᒃᑯᐊ ᓯᕗᓪᓕᐅᔾᔨᓂᖅ ᐃᓕᓐᓂᐊᕐᕕᒻᒥ ᑕᖃᐃᖅᓯᑲᐃᓐᓇᕐᓂᖅ. ᑕᐃᑲᓂ ᑕᖃᐃᖅᓯᓚᐅᑲᒋᐊᖃᕐᓂᖅ ᐱᕕᒃᓴᑦᑎᐊᕙᐅᕗᖅ ᐃᓚᓕᐅᔾᔨᓂᕐᒥᒃ ᐃᓕᑦᑎᕙᓪᓕᐊᓂᕐᒥᒃ. ᐅᖃᐅᓯᖃᖁᔨᖕᒥᔪᖅ ᐃᓕᑕᕐᓂᒃ ᐊᓯᖕᓄᑦ ᓴᙱᒃᑎᒋᐊᒃᑲᓐᓂᕐᓗᒋᑦ ᑖᒃᑯᐊ ᐃᓕᓐᓂᐊᒐᒃᓴᑦ.  

ᑐᙵᓇᕐᓂᖅ ᐊᒻᒪ ᐱᑦᑕᐃᓕᑎᑦᑎᓂᖅ ᐋᓐᓂᖅᓯᕆᓂᕐᒥᒃ ᐊᒻᒪ ᐃᖅᑲᖅᑐᐃᓂᖅ ᐊᑐᖅᑕᐅᓲᖑᕗᑦ ᒎᓯᒧᑦ ᐊᑑᑎᖃᕋᓱᒋᔭᐅᕗᑦ. "ᐱᓇᓱᐊᑦᑎᐊᓚᐅᖅᑕ ᖁᕝᕙᖅᑎᖃᑦᑕᐅᑎᓗᑕ ᐃᓄᖕᓂᒃ ᑕᑯᖃᑦᑕᐅᑎᓗᑕ ᓇᓃᓕᕐᒪᖔᑕ ᐊᒻᒪ ᑐᙵᓇᖃᑎᒌᑦᑎᐊᕐᓗᑕ ᐅᑭᐅᖅᑕᖅᑐᒥᐅᑕᐅᑎᓪᓗᑕ. ᑕᐃᒪᓐᓇ ᐅᖃᐅᔾᔭᐅᓚᐅᖅᑐᒍᑦ, ᑐᙵᓱᒃᑎᖦᖢᑎᒍᑦ ᑕᒪᕐᒥᑦᑎᐊᖅ ᐊᒥᖅᑳᕈᑎᒋᓗᒋᓪᓗ ᐱᓯᒪᔭᕗᑦ," ᑎᓕᐅᕆᔪᖅ. ᐅᖃᐱᓗᙱᖔᖅᖢᓂ, ᑭᒡᒐᖅᑐᐃᕙᒃᐳᖅ ᐃᒃᐱᒋᔭᖃᑦᑎᐊᕐᓂᕐᒥᒃ, ᑲᒪᒋᔭᖃᑦᑎᐊᕐᓂᕐᒥᒃ ᑐᑭᓯᐅᒪᓂᕐᒥᒡᓗ ᐊᕐᕌᒍᖃᑎᒌᙱᑦᑐᓄᑦ ᐊᒃᑐᖅᓯᓂᐅᕙᒃᑐᓂᒃ ᐊᒃᓱᕈᕐᓇᖅᑐᓄᑦ ᓄᓇᑐᖃᕆᙱᑕᒥᓄᑦ ᓄᓇᑖᖅᑎᑕᐅᓯᒪᓂᕐᒧᓪᓗ. 

ᓇᓕᒧᒌᒃᑎᓐᓇᓱᒃᓗᒍ ᐃᓱᒪᖓ, ᒎᔅ ᐱᓱᔪᑯᑖᒃᓗᓂ ᐃᓱᒪᖓ ᐋᖅᑭᒃᑲᓐᓂᕋᓱᒃᓗᒍ, ᑎᒥᖓ ᓇᓕᒧᒌᒃᑎᓪᓗᒍ ᐋᖅᑭᒃᓯᒪᓗᓂᓗ. ᐃᓕᑦᑎᓯᒪᔪᖅ ᖃᓄᖅ ᐱᐅᓂᖅᓴᒥᒃ ᑎᒥᓂ ᐱᐅᓕᑦᑎᔪᓐᓇᕐᒪᖔᑦ ᑎᒍᓯᓚᐅᖅᑎᓪᓗᒍ ᐱᐅᙱᑦᑐᓂᒃ ᓂᕆᓂᕐᓂ ᐊᔪᖅᓴᕐᓂᕐᒥᒃ, ᓂᑲᓪᓗᖓᓂᕐᒥᒃ ᐊᒻᒪ PTSD−ᒥᒃ. ᐅᔾᔨᕈᓱᓐᓂᕐᒥᑦ ᓂᕈᐊᕐᓂᕐᒥᑦ ᑎᒥᖓ ᐊᐅᓚᔾᔭᑦᓯᐊᓂᖅᓴᐅᖁᓪᓗᒍ, ᓇᒻᒥᓂᖅ ᐸᖅᑭᑦᓯᐊᓂᖅᓴᐅᔪᖅ. ᐱᕕᖃᖅᓯᒪᔪᖅ ᓇᓗᓇᐃᖅᓯᑲᓐᓂᕐᓂᕐᒥᑦ ᐊᐃᑉᐸᕇᓐᓂᕐᒥᑦ ᑐᑦᓯᐊᕐᓂᒃᑯᑦ ᐅᑉᐱᕐᓂᒃᑯᓪᓗ ᐅᖃᐅᓯᖃᕐᓂᕐᒥᓪᓗ ᐃᑉᐱᓐᓂᐊᓂᖏᓐᓂᑦ ᒪᒥᓴᕐᓂᕐᒥᑦ. ᓵᑕᐅᔪᓐᓇᕐᓂᖅ ᓇᖕᒥᓂᖅ ᓴᙱᔪᒃᑯᑦ ᐱᖃᓐᓇᕇᒍᓯᒃᑯᑦ ᐃᑲᔪᖅᑐᖅ ᒪᓕᑦᑎᐊᖏᓐᓇᕐᓂᕐᒥᒃ ᑐᕌᕆᔭᖏᓐᓄᑦ, ᐊᒻᒪᑦᑕᐅᖅ.  

ᑕᐃᒪᓕ ᑲᔪᖏᕐᓴᐃᓂᕐᒧᑦ, ᒎᓯᒃᑯᑦ, "ᑕᐃᒪᓕ ᑐᒃᓯᐊᑐᐃᓐᓇᖏᑦᑐᒍᑦ 10,000-ᓂᒃ ᓯᕗᓕᕕᓂᑦᑎᓐᓂᒃ, ᑕᐃᒃᑯᐊᖑᕗᒍᓪᓕ, ᒫᓐᓇᐅᔪᖅ, ᐱᓱᓪᓗᑕ ᓯᓚᕐᔪᐊᒥ. Creator ᑕᒻᒪᖃᑦᑕᙱᑦᑐᖅ; ᒥᑕᖅᑐᐃᓐᓇᐅᔪᒍᑦ." ᐱᔪᒃᓯᓂᖃᑦᑎᐊᖅᑐᖅ ᓄᓇᕐᔪᐊᖅ ᓄᓇᑦᑎᐊᕙᐅᓂᖅᓴᐅᖁᓪᓗᒍ. "ᐊᓯᔾᔨᕈᒪᒍᑦᑕ, ᒪᑭᑦᑕᕆᐊᖃᖅᑐᒍᑦ ᐱᓕᕆᐊᕆᓗᑎᒍᓪᓗ. ᐅᐱᓐᓇᕋᓂ ᑖᒃᑯᐊᖑᒐᑦᑕ. ᑕᐃᒪᓐᓇ ᓴᓇᓯᒪᔪᒍᑦ. ᑕᐃᒫᒃ ᑕᕝᕙᓃᑉᐳᒍᑦ. ᑕᐃᒃᑯᓄᖓ ᐊᒃᓱᕈᖅᑐᓄᑦ, ᑕᐃᒃᑯᓄᖓ ᐊᒃᓱᕈᕐᓇᖅᑐᒃᑰᖅᑐᓄᑦ, ᑕᒪᓐᓇ ᐱᓕᕆᐊᕆᔪᒪᕙᕗᑦ. ᑕᐃᒪᐃᒋᐊᖃᕋᑦᑕ. ᐊᓯᑦᑕ ᐱᒃᑲᖅᑎᙱᒻᒪᒍ. ᐅᕙᒍᑦ ᒪᑭᙱᑯᑦᑕ. ᒪᑭᓚᐅᖅᑕ. ᐊᑏ ᑲᔪᓯᓚᐅᖅᑕ. ᐊᓂᔭᕆᐊᖃᓕᖅᑐᒍᑦ."

ᐃᖏᕐᕋᓪᓗᓂ ᖁᑦᑎᖕᓂᓕᒃ 8−ᒥᑦ ᐃᓕᓐᓂᐊᖅᖢᓂ ᐱᕈᖅᓴᓚᐅᖅᑐᖅ ᐊᔪᖅᓴᕐᓂᕐᒥᑦ ᐱᖓᖕᓇᖔᖓᓂ ᐃᓅᕕᐅᑉ, ᐃᓅᓯᕆᔪᓐᓃᓚᐅᖅᑕᖓᓂ ᐱᔪᒪᓕᕐᖢᓂᓗ. ᐃᓕᓐᓂᐊᒃᑲᓐᓂᕋᓱᓚᐅᖅᑐᖅ ᖁᑦᑎᖕᓂᖅᐹᒥᓪᓗ ᐃᓕᓴᕆᔭᐅᔾᔪᑎᑖᖅᖢᓂ, ᓂᐱᓕᐅᕆᓪᓗᓂ ᑎᓴᒪᓂᒃ ᑐᓴᕐᓈᒐᒃᓴᓂᒃ, ᐃᙱᑲᑕᐃᓐᓇᖅᖢᓂᓗ ᐃᙱᖅᖢᓂ. ᓕᐊᓐ ᒎᔅ ᐊᓯᔾᔩᓚᐅᖅᐳᖅ ᖃᐅᔾᔨᑎᖏᓐᓂᑦ ᐊᒻᒪ ᓂᐱᖏᓐᓂᑦ ᓇᒻᒥᓂᕆᓪᓗᓂᒋᑦ ᑭᓱᓕᒫᓄᑦ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.