ᓴᓇᙳᐊᖅᑎᐅᑉ ᐃᓱᒪᒋᔭᖓ ᑎᒍᐊᙳᐊᖃᖅᑎᐅᑉ ᐊᒃᑐᐊᓂᖓ: ᓕᓂᐊ ᑎᒃ

ᕕᒃᑑᕆᐊ, ᐳᕆᑎᔅ ᑲᓚᒻᐱᐊᒥ ᓄᓇᖃᖅᑐᖅ ᓕᓂᐊ ᑎᒃ ᑯᕙᑲ'ᐅᐊᒃ, ᓂᔅᒐ'ᐊ ᐊᒻᒪ Tsimshian ᐅᐊᖕᓇᖅᐸᓯᖕᒥ ᓯᒡᔭᖓᓂ ᐳᕆᑎᔅ ᑲᓚᒻᐱᐊ. ᓄᓇᓕᖓ ᐊᓘᑦ ᐸᐃ ᐊᒻᒪ ᐃᑲᔪᖅᓯᒪᔪᖅ ᒪᒃᑯᑦᑐᓂᑦ ᐊᖏᕐᕋᖅᓯᒪᓂᖅᓴᐅᖁᓪᓗᒋᑦ ᐃᓱᒪᒃᑯᑦ ᖃᓄᐃᖏᑦᑎᐊᕐᓂᕐᒥᑦ ᐃᖅᑲᓇᐃᔮᖓᒍᑦ ᐅᕙᒍᑦ. ᑮᓇᐅᔭᓕᐅᕈᑕᐅᓇᓱᙱᑦᑐᖅ ᐃᑲᔪᖅᑐᐃᓂᐊᕐᓗᓂ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᖏᓐᓂᒃ, ᐃᖅᑲᐃᓯᓗᒋᑦ ᐃᓄᑑᓚᐅᖅᓯᒪᙱᓐᓂᖏᓐᓂᒃ ᖃᐅᔨᕙᓪᓕᐊᔭᒥᓂᒃ, ᓯᕗᒻᒧᐊᒃᐸᓪᓕᐊᖏᓐᓇᐅᔭᖅᖢᑎᒡᓗ. ᑎᒃ ᐃᒻᒥᓂᒃ ᖃᐅᔨᒪᔪᖅ ᖃᓄᖅ ᐊᔪᕐᓇᖅᑎᒋᓂᖓᓂᒃ ᑕᐃᒪᓐᓇ ᒪᒃᑯᒃᑐᓄᑦ. 

"ᐃᓅᓱᒃᑑᓪᓗᖓ ᐊᒃᓱᕈᒻᒪᕆᓚᐅᖅᑐᖓ, ᐱᓗᐊᖅᑐᒥᒃ ᖁᓄᔪᕐᓂᐊᖅᑕᐅᓚᐅᕋᒪ ᓄᑕᕋᐅᑎᓪᓗᖓ, ᐊᒻᒪᓗ ᑕᒪᓐᓇ ᐃᔨᕋᖅᑐᕈᑎᒋᓯᒪᓪᓗᒍ ᐊᕐᕌᒍᒐᓴᖕᓄᑦ, ᐊᒻᒪᓗ ᐃᓐᓇᐅᓂᖅᓴᐅᓚᐅᖅᑐᖓ ᓱᓕᑦᑎᐊᕈᓐᓇᖅᑎᓪᓗᖓ."

ᐊᒃᓱᕈᕐᖢᓂ ᓂᕆᑦᑎᐊᕈᓐᓇᐃᓪᓕᓪᓗᓂ, ᓂᑲᓪᓗᖓᓪᓗᓂ ᐃᖕᒥᓂᒃᓗ ᐅᐱᒋᑦᑎᐊᙱᖦᖢᓂ. ᐊᒃᓱᕈᕈᑎᒋᖃᑦᑕᓚᐅᖅᑕᖏᑦ ᐃᓕᖅᑯᓯᕐᒥᓂᒃ ᐊᒻᒪᓗ ᐊᑖᑕᖓ, ᐱᐅᕆ ᑎᒃ, ᖁᕕᐊᓲᑎᒋᔭᐅᓪᓗᓂ ᑎᑎᖅᑐᒐᖅᑎ. ᖃᑕᙳᑎᖏᑦ ᓴᓇᙳᐊᖅᑎᑦ ᐱᒻᒪᕆᐅᑎᑦᑎᓪᓗᑎᒃ ᒪᒥᓴᕐᓂᕐᒥᒃ ᓴᓇᙳᐊᕐᓂᒃᑯᑦ, ᑐᕌᖅᑎᑦᑎᓪᓗᓂ ᐃᓚᐅᖃᑕᐅᓂᕐᒥᒃ ᓴᓇᐅᒐᓕᕆᓂᕐᓂ ᓴᓇᑐᓂᕐᒥᒃᓗ ᑲᓲᒪᓂᖅ ᐃᑲᔪᕐᖢᓂ ᒪᒥᓴᕐᓂᕐᒥᒃ. ᐊᕐᕌᒍᑦ ᖃᔅᓯᐊᕐᔪᐃᑦ ᐊᓂᒍᖅᑎᓪᓗᒋᑦ ᐊᔭᐅᖅᑐᐃᔨᙳᓚᐅᖅᓯᒪᔪᖅ, ᐃᓅᓯᖓᓄᑦ ᐱᔾᔪᑎᖃᓕᓚᐅᖅᑐᖅ. 

"ᒪᒥᓴᖅᐸᓪᓕᐊᓕᖅᑎᓪᓗᖓ, ᖃᐅᔨᓚᐅᖅᐳᖓ ᐱᓂᖅᓴᐅᖃᑦᑕᓕᖅᑐᖓ ᓴᙱᓂᕐᒥᒃ, ᐊᒥᓱᒃᑲᓐᓂᕐᓂᒡᓗ ᑐᓐᓂᖅᑯᓯᐊᓂᒃ Creator−ᒥᑦ ᐊᒻᒪ ᓄᓇᕐᔪᐊᓕᒫᒥᑦ."

ᕚᓐᑰᕗᒧᑦ ᓅᓚᐅᖅᑎᓪᓗᒍ ᐊᑖᑕᒥᓄᑦ ᖃᓂᓐᓂᖅᓴᐅᓕᖅᖢᓂ, ᓴᓇᙳᐊᖅᑎᐅᓚᐅᖅᓯᒪᓪᓗᓂ UBC-ᒥ, ᐅᖃᖅᑎᙳᓚᐅᖅᑐᖅ, ᑕᑯᒃᓴᐅᑎᑦᑎᔨ ᐊᒻᒪ ᑲᑎᖃᑎᖃᓚᐅᖅᖢᓂ ᐊᔾᔨᒌᙱᑦᑐᓂᒃ ᓴᓇᙳᐊᖅᑎᓂᒃ ᓄᓇᓕᖓᑕ ᓯᓚᑖᓂᙶᕈᓘᔭᖅᑐᓂᒃ. ᐊᑖᑕᖓ ᐃᓅᔪᓐᓃᕐᒪᑦ, ᐊᑖᑕᒥᓂᑐᐊᖑᙱᑦᑐᖅ ᐊᓯᐅᔨᖅᑰᔨᓚᐅᖅᑐᖅ ᑭᓯᐊᓂᑦᑕᐅᖅ ᐱᔾᔪᑎᖃᑦᑎᐊᖅᑰᔨᓪᓗᓂ ᐊᒻᒪ ᐱᔪᓐᓇᕐᓂᖃᑦᑎᐊᖅᑰᔨᓪᓗᓂ ᓄᓇᕐᔪᐊᕐᒧᑦ ᐊᒃᑐᐊᓂᖃᓕᕐᓂᕐᒥᒃ. ᐃᖅᑲᓇᐃᔭᓚᐅᖅᑐᖅ ᓂᐅᕕᐊᒃᓴᖃᖅᑎᐅᓪᓗᓂ ᑭᓯᐊᓂ ᑕᑯᒐᒥ ᐃᖅᑲᓇᐃᔮᒃᓴᒥᒃ ᐅᕙᑦᑎᓐᓄᑦ. 

"ᐅᔾᔨᕈᓱᓚᐅᙱᑦᑐᖓ ᒪᒃᑯᒃᑐᓂᒃ ᐱᓕᕆᖃᑎᖃᓯᒋᐊᓚᐅᙱᓐᓂᓐᓂ ᒪᒥᓴᕈᓐᓇᖅᓯᓂᐊᓕᕋᒪ ᒪᒥᓴᒃᑲᓐᓂᕈᓐᓇᖅᓯᓗᖓ ᑭᖑᕚᒃᓴᑦᑎᓐᓄᑦ. ᑭᓯᐊᓂᑦᑕᐅᖅ ᒪᒥᓴᕈᓐᓇᕐᒥᔭᕋ ᐃᓗᒃᑯᑦ ᓄᑕᕋᖅ, ᐃᓄᒃ ᓱᓕ ᐊᒃᓱᕈᖅᑐᖅ ᓱᓕᓗ ᐋᓐᓂᐊᖅᑐᖅ, ᓲᖃᐃᒻᒪ ᐃᑲᔪᖅᑕᐅᖏᓐᓇᓚᐅᙱᓐᓇᒪ."

ᑎᒃ ᐃᓕᓐᓂᐊᕐᓂᓕᕆᓂᕐᒧᑦ ᓇᒧᙵᐅᕙᓪᓕᐊᓂᕆᔭᖓ ᐃᓚᒋᔭᐅᓚᐅᖅᐳᖅ ᐃᖅᑲᓇᐃᔭᖅᑎᕈᖅᓴᓂᕐᒧᑦ ᐊᔪᕈᓐᓃᖅᓴᖅᑎᑕᐅᓂᕐᒧᓪᓗ. ᐱᓕᕆᓯᒪᔪᖅ ᐃᒥᕋᓚᕝᕕᐅᓪᓗᓂ ᐊᒻᒪᓗ ᐱᒃᑯᒥᓇᖅᑐᓂ, ᐊᑦᔨᒌᖏᑦᑐᓂ, ᓴᓇᖑᐊᖅᑎᐅᓪᓗᓂ ᐅᕝᕙᓘᓐᓃᑦ ᖁᑦᑎᑐᒥᒃ ᐅᖃᖅᑎᐅᓪᓗᓂ. ᐱᒻᒪᕆᐅᒍᓱᒃᑎᓪᓗᒍ ᐃᓕᑕᒥᓂᒃ, ᑐᓱᒋᑦᑎᐊᖅᓯᒪᔪᖅ ᐃᓄᖕᓄᑦ ᐱᐊᓂᒃᓯᓯᒪᔪᓄᑦ ᓯᓚᑦᑐᖅᓴᕐᕕᖕᒥ. ᑕᐃᒪᓕ ᐅᔾᔨᕈᓱᓕᓚᐅᖅᑐᖅ ᑕᒪᕐᒥᒃ ᐃᓕᓐᓂᐊᓪᓚᑦᑖᕐᓂᖅ ᐱᒻᒪᕆᐅᓂᖏᓐᓂᒃ ᐊᑑᑎᖃᕐᓂᖏᓐᓂᒡᓗ ᓄᓇᓕᖕᓄᑦ. ᑎᒃ ᐊᒥᓱᓂᒃ ᐊᒃᓱᕈᕐᓇᖅᑐᒃᑰᖃᑦᑕᖅᑎᓪᓗᒍ, ᐃᑲᔪᖅᓱᐃᑦᑎᐊᓚᐅᖅᑐᖅ ᐊᖓᔪᖅᑳᒥᓂᒃ ᐃᑲᔪᖅᑐᐃᓪᓗᓂ. ᐊᑭᓖᓇᓱᖃᑦᑕᖅᑐᖅ ᒪᒃᑯᒃᑐᓄᑦ ᐃᖅᑲᓇᐃᔮᖏᓐᓂ. 

"ᐱᓕᕆᐊᑦ ᓲᕐᓗ ᐅᕙᒍᑦ ᐱᒻᒪᕆᐅᖕᒪᑕ, ᒪᒃᑯᒃᑐᑦ ᑲᑎᙵᖃᑎᖃᓕᓲᖑᕗᑦ ᑭᓇᒧᒃᑭᐊᖅ ᐃᑲᔪᖅᑐᐃᔪᒧᑦ, ᐸᑦᑕᖅᑐᕐᓗᒋᓪᓗ ᓱᓕ ᖃᐅᔨᓚᐅᙱᒃᑲᓗᐊᖅᖢᑎᒃ."

ᐃᓚᖓᑦ ᑎᒃ ᐅᖃᐅᓯᕆᓚᐅᖅᑕᖓ ᐊᑖᑕᒥᓄᑦ ᐊᒃᑐᐊᓂᖃᖅᖢᓂ ᓄᓇᓕᖕᓄᑦ ᖃᓄᕐᓗ ᐊᒃᑐᐊᓂᖃᕈᓐᓃᓚᐅᕐᒪᖔᑦ ᐱᕈᖅᐸᓪᓕᐊᖅᑰᔨᓪᓗᓂ urban−ᒥ. ᐊᑖᑕᖓ ᐅᖃᐅᓯᖃᓚᐅᖅᐳᖅ ᖃᓄᖅ ᑭᖑᕚᖏᑦ ᐃᓕᑦᑎᔭᕆᐊᖃᓚᐅᕐᒪᖔᑕ ᐊᓯᐊᓄᑦ ᓄᓇᕐᔪᐊᕐᒧᑦ, ᖃᐅᔨᔭᕆᐊᖃᖅᖢᓂ ᖃᓄᖅ ᐱᑕᖃᕐᒪᖔᑦ ᒪᕐᕉᒃ ᓄᓇᕐᔪᐊᒃ ᐃᓗᐊᓂ. 

"ᒪᒃᑯᒃᑐᓄᑦ ᓄᓇᖃᖅᑐᓄᑦ ᓄᓇᓕᕐᔪᐊᖑᓂᖅᓴᓂ ᐅᕝᕙᓘᓐᓃᑦ ᐊᐅᓪᓛᖅᑐᓄᑦ ᓄᓇᓕᖏᓐᓂ, ᐊᑐᒐᒃᓴᖅ ᓇᒃᓴᕈᓐᓇᖅᑕᑦ ᖁᕕᐊᓲᑎᖃᕐᓂᖅ ᖃᐅᑕᒫᑦ ᐃᓅᓯᕐᓄᑦ. ᖃᐅᑕᒫᑦ ᐃᓅᓯᕐᓄᑦ ᓇᒃᓴᕈᓐᓇᖅᑕᓯ." 

ᑎᒃ ᐃᓱᒪᔪᖅ ᓄᓇ ᐅᖓᓯᖕᓂᖓ ᓄᓇᓕᔅᓯᓐᓂᑦ ᓄᖅᑲᖓᔾᔪᑕᐅᔭᕆᐊᖃᙱᑦᑐᖅ ᐊᒃᑐᐊᓂᖃᕐᓂᕐᒧᑦ ᐅᒃᐱᕐᓂᓕᕆᓂᕐᒧᑦ. "ᐃᓱᒪᒋᔭᕋᓕ ᐅᐊᓕᓂᕐᒥᐅᑦ ᐃᓱᒪᒋᔭᖓ ᐃᓕᖅᑯᓯᕗᑦ ᐊᑐᓲᖑᓂᖓᓂᒃ ᐃᓂᒋᕙᒃᑕᑦᑎᓐᓂ, ᑭᓯᐊᓂ ᖁᕕᐊᓲᑎᖃᕐᓂᖅ, ᐃᓕᓐᓂᐊᖅᑎᑕᐅᓚᐅᕋᒪ, ᐅᓪᓗᓕᒫᖅ. ᑕᐃᒪ ᑐᒃᓯᐊᖃᑎᒌᑉᐸᑦᑐᒍᑦ ᖁᔭᓕᓪᓗᑕ ᖃᐅᑕᒫᑦ, ᒥᑦᑕᕈᓐᓇᖃᑦᑕᕋᑦᑕ ᖃᓄᑐᐃᓐᓇᖅ, ᓄᓇ ᐊᖏᕐᕋᖅᑎᒃᑲᓗᐊᕈᑦᑎᒍ, ᐅᕝᕙᓘᓐᓃᑦ ᓄᓇᒨᕐᓂᐊᕋᓗᐊᕈᑦᑕ, ᐊᒥᓱᓂᒃ ᐊᑦᔨᒌᖏᑦᑐᓂᒃ ᐱᓕᕆᒍᓐᓇᖅᑐᒍᑦ. ᑭᓯᐊᓂᑦᑕᐅᖅ ᐊᒃᑐᐊᓂᖃᕐᒥᔪᖅ ᐃᓱᒪᑐᔪᓄᑦ, ᓲᖃᐃᒻᒪ ᓯᕗᓕᕕᓂᕗᑦ ᐃᓱᒪᑐᔫᓚᐅᕐᒪᑕ," ᓇᓗᓇᐃᖅᓯᓪᓗᓂ. 

"ᐱᖅᑯᓯᑐᖃᒃᑯᑦ ᓴᓇᙳᐊᖃᑦᑕᕈᕕᑦ, ᐅᕝᕙᓘᓐᓃᑦ ᐃᙱᖅᑎᐅᒍᕕᑦ, ᐅᕝᕙᓘᓐᓃᑦ ᐃᙱᖅᑎᐅᒍᕕᑦ, ᐅᓂᒃᑳᖅᑐᐊᖅᑎᐅᓗᑎᑦ, ᒧᒥᖅᑎ, ᓴᓇᙳᐊᖅᑎ, ᑖᒃᑯᐊ ᐱᐅᔪᐊᓘᕗᑦ ᐃᓕᖕᓄᑦ ᐃᑲᔫᑕᐅᓪᓗᑎᒃ ᓄᓇᔅᓯᓐᓂ ᕿᒪᐃᓯᒪᑎᓪᓗᑎᑦ, ᑭᓯᐊᓂ ᓱᓕ ᐊᒃᑐᐊᓂᖃᖅᐳᑦ ᐃᓱᒪᑐᔫᓪᓗᑎᒃ ᓯᕗᕚᑦᑕ ᖃᓄᐃᓕᐅᓚᐅᖅᑕᖓᓂᒃ."

ᐃᓕᑦᑎᓂᖅ ᕿᓄᐃᓵᕐᓂᕐᒥᒃ ᑐᓗᕈᑎᓂᒃ ᑎᒃ ᐃᓕᑦᑎᓯᒪᔪᖅ ᐃᓅᓯᖓᓂ. ᖁᓄᔪᖕᓂᐊᖅᑕᐅᓂᒃᑯᑦ, ᐊᒃᓱᕉᑎᖃᓚᐅᖅᑐᖅ ᐃᒥᐊᓗᓗᐊᖃᑦᑕᕐᓂᕐᒧᑦ, ᓴᒡᓗᓂᕐᒧᑦ, ᐅᓗᕆᐊᓇᕐᓂᕐᒧᑦ ᐊᒻᒪ ᓱᖁᑎᒃᓴᙱᓐᓂᕐᒧᑦ. ᐊᕐᕌᒍᑦ ᐱᖓᓱᑦ ᐊᓂᒍᖅᑎᓪᓗᒋᑦ, ᓄᓇᕐᔪᐊᕐᒥ ᖃᓂᒻᒪᒍᑕᐅᕙᓪᓕᐊᔪᖅ ᐊᒃᓱᕈᕐᓇᖅᓯᕚᓪᓕᖅᓯᒪᕗᖅ. 

"ᐃᓛᓐᓂᒃᑯᑦ ᐃᓱᒪᓕᕌᖓᑦᑕ ᐊᒃᓱᕈᕐᓇᖅᑐᓂᒃ, ᐃᓱᒪᓲᖑᕗᒍᑦ ᑲᔪᓯᙱᑦᑐᓂᒃ, ᑭᓯᐊᓂ ᐊᓂᒍᖅᑎᓐᓇᓱᒋᐊᓕᑦ ᐃᓛᓐᓂᒃᑯᑦ ᐃᓕᑕᖅᓯᑐᐃᓐᓇᓲᖑᕗᑦ ᐊᒃᓱᕈᕐᓇᖅᑐᓂᒃ, ᖃᓄᕐᓗ ᑲᒪᒋᔪᓐᓇᕐᒪᖔᑦᑎᒍᑦ ᑖᒃᑯᐊ ᐊᒃᓱᕈᕐᓇᖅᑐᑦ. ᐊᒻᒪᓗ ᐊᖏᓂᖅᐹᒥᒃ ᐊᕝᕕᐊᕈᑎᖃᖅᓯᒪᕗᖓ ᐊᒻᒪᓗ ᐊᒃᓱᕈᖅᓯᒪᓪᓗᖓ ᐃᓅᓯᓐᓂ."

ᑲᒪᒋᔭᖃᕐᓂᖅ ᐃᒃᐱᖕᓂᐊᓂᕐᓂ ᐊᔪᕐᓇᕈᓐᓇᖅᑐᖅ ᐊᒻᒪ ᑎᒃ ᑕᐅᑐᒃᓯᒪᔪᖅ ᖃᓄᖅ ᐊᑐᓂ ᑭᖑᕚᕇᑦ ᓈᒻᒪᒃᔫᒥᖕᒪᖔᑕ ᖃᓄᐃᖅᑰᔨᙱᖦᖢᓂᓗ ᐃᒃᐱᒋᓗᒍ. ᐅᖃᐅᓯᕆᔭᖓ ᒪᒃᑯᒃᑐᓄᑦ ᓂᕆᐅᖕᓂᐅᖃᑕᐅᕗᖅ, "ᒪᒃᑯᒃᑐᑦ ᖃᐅᔨᒪᖁᑐᐃᓐᓇᖅᑕᒃᑲ ᖃᓄᐃᙱᒻᒪᑦ ᐊᒃᓱᕈᕐᓇᖅᑐᖃᕋᕕᑦ, ᐊᒻᒪ ᑭᓇᒥᑭᐊᖅ ᑕᐃᒪᐃᑦᑐᒃᑰᖅᑐᖃᖅᓯᒪᓪᓗᓂ, ᖃᐅᔨᒋᐊᕆᑦ ᑕᐃᒪᐃᑦᑐᓐᓇᕈᕕᑦ. ᑭᓯᐊᓂ ᐊᓯᐊᒍᑦ, ᓴᓐᖏᔪᐊᓘᔪᑎᑦ, ᐅᐱᓐᓇᕋᓂ ᓴᓐᖏᓂᓕᐹᓗᓐᓂᒃ ᑎᒍᒥᐊᖅᑐᐃᓐᓇᐅᒐᑦᑕ ᖃᐅᔨᒪᙱᑐᐃᓐᓇᑕᑦᑎᓐᓂᒃ, ᐅᐱᓐᓇᕋᓂ ᖃᓄᖅ ᐃᓄᐃᑦ ᓴᓇᔭᐅᓯᒪᒻᒪᖔᑕ ᐊᕙᑎᑦᑎᓐᓃᑦᑐᑦ, ᐱᔾᔪᑎᒋᓪᓗᒍ ᓂᑲᒍᓱᓐᓂᐅᔪᖅ. ᑭᓯᐊᓂ ᑭᓱᑐᐃᓐᓇᖅ ᐊᓂᒍᕈᓐᓇᑦᑎᐊᖅᑐᖅ."

ᖃᐅᑕᒫᑦ ᐃᓱᒪᒃᓴᖅᓯᐅᑦᑎᐊᖅᓯᒪᓗᓂ ᐊᔪᕈᓐᓃᖅᓴᕐᓂᖅ ᑎᑎᕋᕐᓂᒃᑯᑦ ᓴᓇᓂᒃᑯᓪᓘᓐᓃᑦ ᐃᓗᐊᖅᓴᐅᑎᐅᕙᒃᐳᑦ ᑎᒃ−ᒧᑦ. ᑭᓱᑐᐃᓐᓇᑦ ᐊᒃᓱᕈᕐᓇᖃᑦᑕᖅᓯᒪᒐᓗᐊᖅᑎᓪᓗᒋᑦ, ᐃᑲᔪᖅᑎᖃᖃᑦᑕᖅᓯᒪᕗᖅ ᑎᓕᐅᕈᒪᓪᓗᒍ. ᐃᓱᒪᑐᓂᖅ ᐊᑑᑎᖃᖅᑐᖅ ᑖᔅᓱᒧᖓ, ᑭᓯᐊᓂ ᑭᒃᑯᓕᒫᑦ ᐊᔾᔨᒌᖏᒻᒪᑕ ᐅᖃᖃᑦᑕᖅᑐᖅ, "ᐃᓛᓐᓂᒃᑯᑦ ᕿᓂᕆᐊᖃᓪᓚᕆᖃᑦᑕᖅᑐᖅ, ᐊᒻᒪ ᐃᓱᒪᒋᔭᖃᑦᑎᐊᓂᕐᒥᑦ, ᐊᒻᒪ ᐃᒻᒥᓂᒃ ᖃᐅᔨᔪᓐᓇᖅᓯᑦᑎᐊᕐᓇᖅᑐᓂ." ᐊᔭᐅᖅᑐᐃᑎᓪᓗᒍ ᑭᒡᒐᖅᑐᐃᓂᕐᒥᑦ, ᓇᓗᓇᐃᖅᓯᔪᖅ ᑭᒃᑯᑐᐃᓐᓇᕐᓅᖏᑦᑐᖅ, ᐅᖃᖅᓱᓂ, "ᖃᓄᐃᖏᑦᑐᖅ ᐊᖏᕐᕋᓐᓂᑦ ᐃᒃᓯᕚᑐᐃᓐᓇᕐᓗᓂ ᕿᐊᓗᑎᓪᓗ, ᑕᐃᒪᐃᓕᐅᕆᐊᖃᕈᕕᑦ ᐊᓂᒍᐃᓂᕐᒥᑦ ᐊᑲᐅᙱᓪᓕᐅᕐᓂᕐᒥᑦ ᐅᕝᕙᓘᓐᓃᑦ ᐋᓐᓂᐊᓂᕐᒥᑦ."

ᐊᑖᑕᖓ ᐃᓅᔪᓐᓃᓚᐅᖅᑎᓪᓗᒍ, ᑎᒃ ᖃᐅᔨᓚᐅᖅᑐᖅ ᓄᑖᒥᒃ ᐱᔪᒃᓯᓕᕐᓂᕐᒥᒃ ᒪᒃᑯᒃᑐᓄᑦ. "ᓱᓕᑦᑎᐊᕐᓂᖃᖅᐳᑦ ᓱᓕᑦᑎᐊᖅᖢᑎᒡᓗ ᑖᒃᑯᐊ ᐊᒥᓱᑦ ᐃᓄᐃᑦ ᑭᖑᓂᐊᒍᑦ ᐃᓅᓯᖃᖅᐸᙱᒻᒪᑕ, ᓲᖃᐃᒻᒪ ᓂᙵᒃᓯᒪᒐᑦᑕ, ᓲᖃᐃᒻᒪ ᖃᐅᔨᓯᒪᒐᑦᑕ ᐃᓄᐃᑦ ᐅᕙᑦᑎᓐᓂᒃ ᐃᖅᑲᖅᑐᐃᔪᑦ. ᐊᒻᒪᓗ ᐃᓱᒪᓪᓗᖓ ᐃᓅᓱᒃᑐᐃᑦ, ᐃᓱᒪᐃᓐᓇᕿᓪᓗᑎᒃ ᐅᖃᕈᓐᓇᖅᓯᓪᓗᑎᒃ, ᐃᒻᒥᓂᒃ ᒪᑭᑕᑐᐃᓐᓇᖃᑦᑕᕐᒪᑕ ᐊᒻᒪᓗ ᐆᒻᒪᑎᓕᒫᒥᓂᒃ. ᑕᒪᓐᓇᓗ ᖁᕕᐊᒋᑦᑎᐊᖅᑕᕋ, ᐃᓕᑦᑎᕙᓪᓕᐊᖏᓐᓇᐅᔭᖅᑐᖓᓗ ᓄᑖᓂᒃ ᐊᑐᒐᒃᓴᓂᒃ ᐅᖃᐅᓯᕆᓂᐊᕐᓗᒋᑦ ᐃᓕᓐᓂᐊᖅᑎᑦᑎᓂᒃᑯᑦ," ᐊᔾᔨᖃᖅᑐᖅ. 

ᐅᓪᓗᒥ, ᑎᒃ ᐱᓕᕆᔪᖅ ᑲᓲᑎᑎᑦᓯᓂᕐᒥᑦ ᐃᑉᐱᓐᓂᐊᔭᖏᓐᓂᑦ ᑲᓲᒪᖃᑎᖃᖅᑎᓪᓗᒍ ᓄᓇᓕᓐᓂᑦ ᒪᒃᑯᑦᑐᓂᑦ ᐱᔨᑦᓯᕋᖅᑕᖏᓐᓂᑦ.  ᓴᓇᑐᓂᖓ ᐃᓚᒥᑎᒍᑦ ᑕᑯᒃᓴᐅᔪᖅ ᓴᓇᙳᐊᕐᓂᒃᑯᑦ ᑕᑯᒃᓴᐅᓂᑐᐃᓐᓇᐅᙱᑦᑐᖅ ᐅᕝᕙᓘᓐᓃᑦ ᐅᖃᐅᓯᑐᐃᓐᓇᒃᑯᑦ ᑭᓯᐊᓂ ᐃᓄᐃᑦ ᐃᑲᔪᖅᑐᖅᑕᐅᖅᑰᔨᓕᖅᑎᓪᓗᒋᑦ, ᑕᑯᔭᐅᓪᓗᑎᒃ ᐊᒻᒪᓗ ᑐᓵᔭᐅᓪᓗᑎᒃ. ᑕᑯᑎᑦᑎᓯᒪᔪᖅ ᐅᖓᓯᒋᔪᓐᓇᖅᑕᕐᓂᒃ ᐊᖏᕐᕋᒥᓂᒃ, ᑭᓯᐊᓂ ᓱᓕ ᓇᓂᓯᓪᓗᓂ ᐊᖏᕐᕋᒥᒃ ᖃᐅᔨᒪᓪᓗᓂᓗ ᐃᖏᕐᕋᓂᕐᒥ ᐱᐅᔪᒻᒪᕆᖕᒥᒃ ᐱᓕᕆᓂᕐᒥᒍᑦ ᐃᑲᔪᕐᓗᑎᒍᑦ ᒪᒃᑯᒃᑐᑦ ᐃᒃᐱᒋᓗᑎᒃ ᖃᓄᐃᔾᔪᑎᖃᕐᓂᕐᒥᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᑦᓵᑦ ᑎᑎᕋᓚᐅᕐᒪᑦ ᑕᒪᑐᒥᖓ.