ᓕᓯ ᐅᐃᓕᐊᐃ ᐱᔭᕇᕈᓯᐊᖅᓯᒪᔪᖅ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑲᒪᒋᔭᖃᕐᓂᕐᒧᑦ ᐃᓕᓐᓂᐊᖅᑎᑦᑎᕙᒃᖢᓂᓗ ᓇᖕᒥᓂᖅ ᐅᐱᒋᓂᕐᒥᒃ ᖁᓱᔪᓐᓃᖅᑎᑦᑎᕙᓪᓕᐊᓂᕐᒥᒡᓗ ᐊᔾᔨᒌᙱᑦᑐᓂ ᓄᓇᓕᖕᓂ ᑕᕝᕘᓇ ᑑᑐᓪ ᕿᑭᖅᑕᒥ. Sucker Creek First Nation-ᒦᙶᖅᑐᖅ ᐋᓪᐴᑕᐅᑉ ᐅᐊᖕᓇᖓᓂ. ᓕᓯ ᓇᓂᓯᓚᐅᖅᑐᖅ ᐱᕕᒃᓴᐅᔪᓂᑦ ᓵᓚᒃᓴᕋᓱᒃᑎᐅᓪᓗᓂ ᑕᓚᕖᓴᒃᑯᑦ ᓴᖅᑭᔮᖅᑎᑦᑎᓪᓗᓂ ᑲᓇᑕᐅᑉ ᑭᖑᓪᓕᕐᒥ ᖁᑦᑎᓛᖓᓂ ᐆᒃᑑᑎᒥᑦ.

"ᐅᖃᐅᓯᕆᔪᒪᐃᓐᓇᐅᔭᖅᑕᕋ. ᐱᕈᖅᐸᓪᓕᐊᓪᓗᖓ, ᐃᔨᕋᖅᑐᓚᐅᖅᑐᖓ ᐆᒻᒪᑎᓐᓂᒃ." ᒥᑭᑦᑐᒥᙶᖅᖢᓂ, ᑭᓯᐊᓂ, ᓕᓯ ᐊᒃᓱᕈᓚᐅᖅᑐᖅ ᖁᓱᙱᖦᖢᓂ. "ᑲᙳᓱᑦᑎᐊᓚᐅᖅᑐᖓ, ᐊᒻᒪ ᐃᒻᒥᓂᒃ ᐅᐱᒋᑦᑎᐊᙱᖦᖢᖓ."

ᓕᓯ ᐃᖅᑲᐅᒪᔪᖅ ᓯᕗᓪᓕᖅᐹᒥ ᒥᕝᕕᖓᓂ ᑕᑯᒃᓴᐅᑎᑦᑎᑎᓪᓗᒍ: "ᐊᑐᓚᐅᖅᓯᒪᙱᑦᑐᖓ stilettos [ᖁᑦᑎᒃᑐᒦᓐᓂᖅᓴᖅ ᐃᓯᒐᐅᔭᑦ] ᓯᕗᓂᐊᒍᑦ ᓲᖃᐃᒻᒪ 5 ᐃᓯᒐᑦ 10-ᖑᒐᒪ ᐱᕈᓚᐅᖅᑐᖓᓗ ᐊᖅᑯᑎᓂᒃ; ᐃᓂᒃᓴᖅᑕᖃᓚᐅᙱᑦᑐᖅ ᐊᑐᕆᐊᒃᓴᖅ stilettos−ᓂᒃ!"

ᑭᓯᐊᓂ ᓕᓯ ᖃᐅᔨᓚᐅᖅᑐᖅ ᓄᑕᕋᐅᓂᕐᒥᓂᒃ ᖁᓱᙱᖦᖢᓂ ᖃᐅᔨᒪᙱᖦᖢᓂᓘᓐᓃᑦ. "ᐊᕐᕌᒍᓕᒫᒃᑲ ᕼᐋᑭᖃᑕᐅᖃᑦᑕᖅᑐᖓ, ᓯᑯᒥ ᕼᐋᑭᖃᑕᐅᓪᓗᖓ, ᐱᕈᖅᓴᓪᓗᖓ ᐃᑲᔪᕐᔪᐊᓚᐅᖅᑐᖅ ᐅᕙᓐᓂᒃ ᖁᓱᔪᓐᓃᖅᐹᓪᓕᖅᖢᖓ ᐃᑲᔪᕐᔪᐊᖅᖢᓂᓗ ᑖᖅᑐᐊᓘᑎᓪᓗᒍ ᐊᒻᒪ ᐃᔾᔪᐊᒐᒃᓴᑦᑎᐊᕙᐅᓂᖅᓴᐅᓕᖅᖢᖓ. ᑕᐸᐃᓚᐅᖅᑐᖓ ᐅᕙᖓ, 'ᐊᑏ, ᖃᐅᔨᒪᔪᓯ, ᐃᒻᒪᖄ ᐅᕙᓐᓂᒃ ᐅᑉᐱᕈᓱᓐᓂᖅᓴᐅᔪᖓ.'"

ᑕᒪᓐᓇ ᐊᒃᑐᐊᓂᐅᔪᖅ ᕼᐋᑭᕐᓂᕐᒧᑦ ᐊᒻᒪᓗ ᐃᔾᔪᐊᒐᒃᓴᑦᑎᐊᕙᐅᓂᕐᒧᑦ ᐆᑦᑑᑎᑦᑎᐊᕙᐅᔪᖅ ᓕᓯᐅᑉ ᐅᒃᐱᕈᓱᓐᓂᖓᓄᑦ ᑕᒪᒃᑯᐊ ᐅᕕᒃᑲᐅᔪᑦ ᒪᓕᒋᐊᖃᕐᒪᑕ ᖁᕕᐊᒋᔭᖏᓐᓂᒃ. "ᖃᐅᔨᒪᓚᐅᖅᓯᒪᙱᑦᑐᑎᑦ ᓇᒧᑦ ᑐᕌᖅᑎᑦᑎᓂᐊᕐᒪᖔᑦ! ᖃᐅᔨᑎᑦᑎᔪᓐᓇᖅᑐᖅ ᐃᓕᖕᓂᒃ ᐱᖃᓐᓇᕆᓛᕐᓄᑦ, ᐅᕝᕙᓘᓐᓃᑦ ᐊᓯᐊᓄᑦ ᐃᖅᑲᓇᐃᔮᒧᑦ ᖃᐅᔨᒪᓚᐅᙱᑕᕐᓄᑦ ᓇᒡᓕᒋᕐᔪᐊᕋᔭᕐᓂᕐᓂᒃ. ᐊᒻᒪᓗ ᒪᓕᒃᑯᕕᑦ ᖁᕕᐊᒋᔭᓐᓂᒃ, ᐃᖏᕐᕋᑎᐊᖅᑐᑎᑦ. ᓯᓚᕐᔪᐊᖅ ᐃᓕᖕᓂᒃ ᑐᓂᓯᓂᐊᖅᑐᖅ ᒪᓕᖕᓂᕐᓄᑦ ᐆᒻᒪᑎᖕᓂᒃ."

ᓱᕈᓯᐅᓪᓗᓂ, ᓕᓯ ᐊᖓᔪᖅᑳᒥᓂᒃ ᑕᑯᓐᓇᓚᐅᖅᑐᖅ ᐃᔾᔪᐊᒐᒃᓴᑦᑎᐊᕙᐅᓪᓗᓂ, ᓲᖃᐃᒻᒪ ᐅᖃᖃᑦᑕᓚᐅᕐᒪᑦ, "ᓄᓇᖃᖅᑳᖅᓯᒪᔪᑦ ᐊᕐᓇᖏᑦ ᐅᓄᓗᐊᓚᐅᙱᑦᑐᑦ, ᐱᓗᐊᖅᑐᒥᒃ ᐊᖅᑯᑎᓪᓗᐊᑕᕐᒥ." ᓕᓯᐅᑉ ᐊᖓᔪᖅᑳᖏᒃ ᓇᒡᓕᒍᓱᑦᑎᐊᓚᐅᖅᑐᑦ ᖃᑕᙳᑎᖏᓐᓂᒃᓗ, ᒪᑭᑕᑦᑎᐊᕐᖢᑎᒃ, ᓇᖕᒥᓂᖅ ᐊᒃᓱᕈᕐᓇᖅᑐᒃᑰᕋᓗᐊᖅᑎᓪᓗᒋᑦ. "ᐊᑖᑕᒐ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᖅ, ᐊᓈᓇᒐᓗ ᐃᓅᓪᓗᓂ ᐊᑕᐅᓯᕐᒥᒃ ᑕᓕᖃᕐᖢᓂ....

ᓕᓯ ᐃᓕᓴᖅᓯᔪᖅ ᐊᒥᓱᑦ ᒪᒃᑯᒃᑐᑦ, ᐱᓗᐊᖅᑐᒥᒃ ᑕᐃᒃᑯᐊ ᐊᖓᔪᖅᑳᖏᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ, ᑐᙵᕕᖃᑦᑎᐊᙱᑐᐃᓐᓇᕆᐊᖃᕐᒪᑕ. "ᐱᒻᒪᕆᐅᓛᖑᕗᖅ ᒪᒃᑯᒃᑐᓕᒫᓄᑦ. ᑕᐃᒪᐃᒻᒪᑦ ᐅᖃᐅᑎᓇᓱᐊᖅᐸᒃᑲ ᓇᒻᒥᓂᖅ ᑐᓐᖓᕕᓕᐅᕈᓐᓇᖅᓯᒻᒪᑕ. ᐊᖏᕐᕋᖓᑕ ᐃᓅᓯᖓ ᐅᔭᕋᐅᒃᐸᑦ, ᓲᕐᓗ, ᐆᑮ, ᐱᒋᐊᕈᑎᖃᓚᐅᖅᑕ ᐃᓗᐊᓂ ᑐᙵᕕᖓᓂᒃ, ᐃᓗᐊᓂ ᐱᓕᕆᓂᐅᔪᖅ ᐃᓕᖕᓂᒃ ᐱᐅᒋᓕᖅᑎᑦᑎᓂᐊᖅᑐᖅ."

ᓕᓯ ᑕᑯᓚᐅᖅᐳᖅ ᑕᒪᑐᒥᖓ ᐱᓕᕆᐊᖃᓪᓚᕆᒍᒪᓂᕐᒥᒃ ᓇᖕᒥᓂᖅ−ᐱᐅᓯᒋᐊᖅᑎᑦᑎᔪᒪᓪᓗᓂ ᓇᖕᒥᓂᖅ ᐊᑖᑕᒥᓂᒃ. "ᐊᑖᑕᒐ ᓱᓐᓂᐅᒪᓕᖅᑐᖅ ᐊᕐᕌᒍᓄᑦ 33-ᓄᑦ. ᐃᓅᑎᓪᓗᖓ ᐃᓱᒪᓕᓚᐅᖅᑐᖅ ᐃᓅᔪᓐᓇᙱᖦᖢᓂ [ᖃᓄᑐᐃᓐᓇᖅ]. ᐃᒥᐊᓗᒃᑐᓚᐅᖅᑐᖅ. ᑕᐃᒪᓕ ᐃᒻᒥᓂᒃ ᐃᓱᒪᓕᐅᕆᐊᖃᓕᓚᐅᖅᑐᖅ ᓱᓐᓂᐅᒪᔭᕆᐊᖃᕐᓂᕐᒥᓂᒃ. ᖁᔭᒋᑦᑎᐊᖅᐸᕋᓗ ᑕᐃᒪᓐᓇ ᓂᕈᐊᕈᓐᓇᓚᐅᕐᒪᑦ, ᓲᖃᐃᒻᒪ ᐊᓯᔾᔩᓪᓚᕆᖕᒪᑦ ᐱᕈᖅᐸᓪᓕᐊᓂᕆᔭᑦᑎᓐᓂᒃ ᐊᒻᒪ ᐱᐅᔪᐊᓘᓪᓗᓂ."

ᓕᓯᐅᑉ ᐅᐱᒍᓱᖕᓂᖓ ᐱᒋᐊᕐᕕᒋᓚᐅᖅᑕᖏᓐᓂᑦ ᐊᒃᓱᕈᖕᓇᖅᑎᓪᓗᒍ, ᓲᕐᓗ ᑲᓇᑕᒥᑦ ᑕᓚᕖᓴᒃᑰᖅᖢᓂ: "ᑕᒻᒪᖅᓯᒪᔪᖅᓯᐅᕈᒪᓕᓚᐅᖅᑐᖓ ᑲᓇᑕᐅᑉ ᑭᖑᓪᓕᖕᒥᑦ ᖁᑦᑎᓛᒥᑦ ᐊᑐᒐᒃᓴᒥᑦ. ᓂᕈᐊᖅᑕᐅᓕᓚᐅᕋᒪ ᓈᓚᐅᑎᒃᑰᖃᑕᐅᖁᔭᐅᓪᓗᖓ. ᑕᐃᑲᓃᓐᓂᓐᓂ ᐊᐱᕆᕙᓚᐅᖅᑐᑦ ᐅᕙᓐᓂᒃ, 'ᓇᒦᙶᖅᐱᑦ?'"

ᓕᓯ ᑭᐅᑎᓪᓗᒍ ᓴᑯ ᑯᕇᒃᒥᙶᕐᓂᕋᖅᖢᓂ, ᑭᐅᓚᐅᖅᑐᖅ ᑕᑯᒃᓴᐅᑎᑕᐅᔪᒥ, "ᑭᓱ? ᖃᓄᖅ ᑐᑭᓕᖕᒥᒃ ᐅᖃᖅᐱᑦ? ᖃᐅᔨᒪᕗᑎᑦ ᐃᐊᑦᒪᓐᑕᓐᒥᙶᕐᓂᕐᓂᒃ; ᑕᐃᑲᓂ ᓄᓇᖃᖅᑐᑎᑦ." ᑭᓯᐊᓂ ᓕᓯ ᐱᓯᒪᒐᔭᙱᑕᖓ. "ᐃᒪᓐᓇᐅᓚᐅᖅᑐᖓ, 'ᐋᒃᑲ, ᐊᐱᖅᑯᑎᑦ ᓇᑭᙶᖅᐳᖓ, ᓇᒥᐅᑕᐅᙱᑦᑐᖓ.' ᓇᒻᒪᒋᓪᓚᕆᕋᑖᖅᑕᒃᑲ ᓇᑭᙶᕐᓂᕆᔭᒃᑲ ᐊᒻᒪᓗ ᐃᓕᖅᑯᓯᕋ ᑕᑯᒃᓴᐅᑎᑦᑎᑎᓪᓗᒋᑦ, ᑕᒪᓐᓇ ᐅᕙᓐᓄᑦ ᖃᓄᐃᓗᐊᖅᑑᔮᙱᒻᒪᑦ ᐅᐱᒍᓱᒃᑲᒪ ᓇᑭᙶᕐᓂᓐᓂᒃ. ᐅᐱᒍᓱᒃᐳᖓ ᓇᑭᙶᕐᓂᓐᓂᒃ."

ᖁᓱᔪᓐᓃᖅᐸᓪᓕᐊᓂᖅ ᐃᒻᒥᓂᒃ ᓇᖏᖅᓯᔪᓐᓇᕐᓂᕐᒥᑦ ᓄᓇᖃᖅᑳᖅᓯᒪᓪᓗᓂ ᐊᕐᓇᐅᓪᓗᓂ ᐱᕕᖃᓚᐅᖅᑐᖅ ᓕᓐᓯᒧᑦ. "ᓴᓗᕋᖅᑕᐅᓚᐅᖅᑐᖅ" ᓅᖦᖢᓂ ᐃᓂᒋᓚᐅᖅᑕᖓᓂ ᐱᓇᓱᒃᓗᓂ ᐃᓕᓐᓂᐊᒃᑲᓐᓂᕐᓂᕐᒧᑦ. ᐊᒻᒪᓗ ᐱᔪᓐᓇᖅᑐᒋᓚᐅᙱᑕᖓ. "ᐱᕈᖅᐸᓪᓕᐊᓪᓗᖓ, ᓯᓚᑐᓗᐊᕋᓱᒋᓚᐅᙱᑦᑐᖓ ᓯᓚᑦᑐᖅᓴᕐᕕᒡᔪᐊᓕᐊᕆᐊᒃᓴᖅ. ᑕᒪᓐᓇ ᐅᑉᐱᕆᑦᑎᐊᓚᐅᙱᑕᕋ, ᓱᓕᙱᑎᐊᒻᒪᕆᓚᐅᖅᑐᖅ ᐊᒻᒪᓗ ᑕᒪᓐᓇ ᐱᐅᙱᑦᑑᓪᓗᓂ ᓱᕈᓯᐅᑎᓪᓗᖓ ᐊᒻᒪᓗ ᐊᒥᓱᑦ ᐃᓅᓱᑦᑐᐃᑦ ᐱᓯᒪᒻᒪᑕ.

"ᖃᐅᔨᒪᔪᖓ ᖁᕕᐊᓇᙱᖦᖢᓂ ᐅᕙᓐᓄᑦ ᐃᓱᒪᔭᕆᐊᒃᓴᖅ." ᓕᓯ ᐃᒻᒥᓂᒃ ᒪᑭᑉᐸᓪᓕᐊᓕᓚᐅᖅᑐᖅ ᐱᐅᔪᒃᑯᑦ ᓇᖕᒥᓂᖅ−ᐱᕈᖅᓴᕐᓂᒃᑯᑦ. "ᐃᓕᑕᖅᓯᓚᐅᖅᑐᖓ ᒪᒃᑯᒃᑎᓪᓗᖓ ᖃᓄᖅ ᐊᔪᕐᓇᙱᑦᑐᑯᓘᖕᒪᖔᑦ ᐊᖑᒻᒪᑎᔭᕆᐊᒃᓴᖅ ᐃᒥᕐᓗᓂᓗ ᐱᐅᙱᑦᑐᒥᒃ ᓇᖕᒥᓂᖅ−ᑲᒪᒋᓂᕐᒥᒃ." ᐅᖃᐅᔾᔨᔪᒪᕗᖅ ᒪᒃᑯᖕᓂᖅᓴᒥᓂᒃ ᓇᖕᒥᓂᖅ "ᐅᕙᓐᓂᒃ ᐅᒃᐱᕆᔪᒪᓪᓗᓂ ᐱᒋᐊᕐᓂᖓᓂ. ᐅᒃᐱᕈᓱᒃᓗᖓ ᓯᓚᑐᓂᓐᓂ, ᐅᒃᐱᕈᓱᒃᖢᖓ ᐊᑑᑎᖃᕐᓂᓐᓂᒃ, ᐅᒃᐱᕈᓱᒃᖢᖓ ᑲᔪᓯᑦᑎᐊᕆᐊᖃᕐᓂᓐᓂᒃ....

ᐃᒻᒥᓂᒃ ᐃᑲᔪᖅᖢᓂ, ᓕᓯ ᐱᔪᒃᓯᓕᓚᐅᖅᐳᖅ ᐃᑲᔪᕈᒪᓪᓗᓂ ᐊᓯᖏᓐᓂᒃ ᒪᒃᑯᒃᑐᓂᒃ ᐃᓕᓴᖅᓯᖁᓪᓗᒋᑦ ᓇᖕᒥᓂᖅ ᐊᔪᙱᓐᓂᕆᔭᒥᓂᒃ. ᐱᓪᓗᓂ ᐊᔾᔨᐅᙱᑦᑐᒃᑯᑦ ᐃᑲᔪᖅᑕᐅᔭᕆᐊᓕᖕᓄᑦ ᐃᓕᓐᓂᐊᕐᓂᕐᒧᑦ ᐃᑲᔪᖅᑎᐅᓂᕐᒧᑦ ᓇᓗᓇᐃᒃᑯᑕᕐᒥ, ᐊᓱᐃᓛᒃ ᐃᓕᓐᓂᐊᕌᓂᒍᓯᐊᖅ, ᐊᓱᐃᓛᒃ ᑕᒪᒃᑭᕐᖢᓂ ᐊᕐᕌᒍᓄᑦ ᑎᓴᒪᓄᑦ ᐃᓕᓐᓂᐊᕌᓂᒍᓯᐊᖅ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑲᒪᓂᕐᒥ. ᒫᓐᓇ ᓴᖅᑭᑎᑦᑎᖃᑦᑕᓕᖅᐳᖅ ᐱᓕᕆᖃᑎᒌᖕᓂᕐᓂᒃ ᐃᑲᔪᖅᑐᐃᔪᒪᓪᓗᓂ ᒪᒃᑯᒃᑐᓂᒃ ᓇᖕᒥᓂᖅ−ᐃᒃᐱᒋᑦᑎᐊᕈᓐᓇᕐᓂᕐᒥᒃ.

ᑎᓕᐅᕆᔪᖅ ᒪᒃᑯᒃᑐᓂᑦ ᓄᓇᖃᖅᑳᖅᓯᒪᔪᓂᑦ ᕿᒥᕐᕈᖁᓪᓗᒋᑦ ᐊᔪᙱᓐᓂᖏᓐᓂᑦ, ᕿᒥᕐᕈᓗᑎᒡᓗ ᓄᓇᕐᔪᐊᒥᑦ, ᐃᓕᓐᓂᐊᕐᓂᒃᑯᑦ, ᐊᐅᓪᓚᖕᓂᒃᑯᑦ, ᓇᖕᒥᓂᕐᓘᓐᓃᑦ ᓄᓇᓕᖏᓐᓂᑦ. "ᐃᓱᒪᒋᔭᕋ ᐊᐅᓪᓚᖃᑦᑕᕐᓂᖅ ᐊᓕᐊᓇᐃᓛᖑᖃᑕᐅᓇᓱᒋᓪᓗᒍ ᐱᓕᕆᐊᕆᔪᓐᓇᖅᑕᕐᓂᑦ ᐊᒻᒪ ᖁᕕᐊᓇᓛᖑᖃᑕᐅᓪᓗᓂ ᑐᓐᓂᖅᑯᓯᐊᓂᒃ ᐃᓕᖕᓂᒃ ᑐᓂᔪᓐᓇᖅᑕᕐᓂᑦ, ᓲᖃᐃᒻᒪ ᐃᓕᑦᑎᕚᓪᓕᕐᓇᕐᒪᑦ ᓄᓇᕐᔪᐊᖅ ᒥᒃᓵᓄᑦ ᐊᒻᒪ ᐃᒃᐱᒍᓱᑦᑎᐊᓕᕐᓇᖅᖢᓂ ᐊᓯᖕᓄᑦ ᐃᓄᖕᓄᑦ ᐊᒻᒪ ᖃᓄᖅ ᐃᓅᖕᒪᖔᑕ. ᐊᒻᒪᓗ ᐃᓕᑉᐹᓪᓕᕋᔅᓯ ᐊᒥᓱᓂᒃ ᐃᓅᓯᕐᒧᑦ ᖃᐅᔾᔨᑎᐅᔪᓂᒃ ᑲᒪᓇᖅᑐᒻᒪᕆᐅᒻᒪᑦ ᑕᑯᒋᐊᖓ ᓯᓚᕐᔪᐊᕐᒥᐅᓕᒫᓂᑦ. ᑭᓯᐊᓂ, ᖃᖓᑐᐃᓐᓇᖅ ᑐᙵᑦᑎᐊᕆᐊᖃᖅᑰᔨᒍᕕᑦ ᑲᑎᒃᑲᓐᓂᕐᓗᑎᓪᓗ, ᓄᓇᔅᓯᓐᓄᑦ ᐅᑎᕈᓐᓇᖅᑐᑎᑦ ᑕᐃᒪᐃᓕᐅᕐᓗᑎᓪᓗ. ᐅᕝᕙᓘᓐᓃᑦ ᑕᐃᑲᓃᖏᓐᓇᕈᓐᓇᖅᑐᑎᑦ. ᑲᙳᓇᖅᑐᖃᙱᓚᖅ ᓄᓇᔅᓯᓐᓂᑦᑕᐅᖅ."

ᑭᓯᐊᓂ ᖃᓄᑐᐃᓐᓇᖅ ᐊᖅᑯᑎᓂᒃ ᐊᑐᕋᓗᐊᕈᕕᑦ, ᓕᓯ ᐃᖅᑲᐅᒪᐃᓐᓇᖁᕙᐃᑦ ᓇᑭᙶᕐᒪᖔᖅᐱᑦ, ᓲᖃᐃᒻᒪ ᐃᑲᔪᕐᓂᐊᕐᒪᑦ ᓇᖏᕐᓗᑎᑦ ᓇᖏᕐᓗᑎᑦ ᑲᑉᐱᐊᓱᙱᓪᓗᑎᓪᓗ. "ᐃᓱᒪᒍᕕᑦ ᓄᖅᑲᕐᓂᐊᕐᓂᕐᒥᒃ, ᑕᐅᕗᖓᓕᒫᙱᑦᑐᖅ. ᓄᓇᓕᓯ ᑕᐃᑲᓃᖏᓐᓇᕐᓂᐊᖅᑐᖅ. ᐅᑎᕈᓐᓇᖅᑐᑎᑦ."

ᖁᔭᓐᓇᒦᑦᑎᐊᕐᒥᔭᕋ ᔭᓯᑲ ᑎ ᕼᐊᒻᕗᕆᔅ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.