"ᒐᕙᒪᓕᕆᓂᖅ ᐱᓕᕆᐊᕆᔪᒪᖃᑦᑕᓚᐅᖅᑕᕋ," ᐅᖃᖅᑐᖅ ᓘᕆ ᐃᓪᓚᐅᑦ, ᒪᓕᒐᓕᐅᖅᑎᕐᔪᐊᖅ ᓄᓇᕗᒻᒧᑦ. ᐱᕈᖅᓴᓚᐅᖅᑐᖅ ᐊᔾᔨᒌᖏᑦᑐᓂ ᓄᓇᓕᖕᓂ ᓄᓇᕗᒻᒥ, ᐃᓚᐅᓪᓗᑎᒃ ᖃᐅᓱᐃᑦᑐᖅ, ᒥᑦᑎᒪᑕᓕᒃ, ᐃᒡᓗᓕᒃ, ᐊᒻᒪ ᓴᔅᑐ ᓄᑕᕋᐅᑎᓪᓗᒍ, ᐅᖃᐅᑎᓪᓗᓂᐅᒃ ᐊᓈᓇᓂ ᑲᓇᑕᐅᑉ ᐊᖓᔪᖅᑳᕐᔪᐊᖓᓂ. ᐃᓕᓐᓂᐊᕐᕕᐊᓗᒻᒥ, ᐃᓕᓐᓂᐊᖅᑏᑦ ᑲᑎᒪᔨᐅᖃᑕᐅᓚᐅᖅᑐᖅ ᐊᒻᒪᓗ ᒪᒃᑯᑦᑐᓄᑦ ᑭᒡᒐᖅᑐᐃᔨᐅᓚᐅᖅᓯᒪᓪᓗᓂ ᕼᐊᒻᓚᒃᑯᓐᓄᑦ. ᓯᓚᑦᑐᖅᓴᕐᕕᔾᔪᐊᕐᒨᕋᒥ, ᐃᓕᓐᓂᐊᓚᐅᖅᓯᒪᔪᖅ ᒐᕙᒪᓕᕆᓂᕐᒥᑦ ᖃᐅᔨᓴᖅᑐᓕᕆᓂᕐᒥᑦ ᐃᓱᒪᓕᕆᓂᕐᒥᑦ ᐊᓯᔾᔩᓚᐅᕋᓂ. 

"ᖃᐅᔨᔪᒪᐃᓐᓇᐅᔭᖅᑐᖓ ᒐᕙᒪᓕᕆᓂᕐᒥᒃ ᐊᒻᒪ ᐃᓚᒋᔭᐅᑐᐃᓐᓇᖅᑰᓚᐅᖅᑐᖅ ᐃᖏᕐᕋᓂᕆᔭᓐᓄᑦ." 

ᐱᔭᕇᕋᒥ, ᐱᓇᓱᐊᓚᐅᖅᑐᖅ ᐱᓕᒻᒪᑦᓴᕐᓂᕐᒧᑦ ᐱᓕᕆᐊᒥᑦ ᑕᐃᔭᐅᔪᖅ ᓄᓇᕗᒻᒥ ᐃᖅᑲᓇᐃᔭᖅᑐᓕᕆᓂᕐᒧᑦ ᐱᕙᓪᓕᐊᑎᑦᓯᓂᕐᒧᑦ ᖃᓄᐃᓕᐅᕈᑕᐅᔪᒪᔪᓂᑦ. ᔭᓗᓇᐃᕝᒨᓚᐅᖅᑐᖅ ᐃᓕᓐᓂᐊᖅᑐᓂ ᖃᓄᖅ ᒐᕙᒪᒃᑯᑦ ᐊᐅᓚᓂᖃᓲᖑᒻᒪᖔᑕ, ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓅᖅᑐᓂ ᐊᕐᕌᒍᒧᑦ ᐊᕝᕙᖓᓄᓪᓗ ᐃᖃᓗᓐᓄᑦ ᓅᓚᐅᕋᓂ. ᐃᓚᐅᓕᓚᐅᖅᑐᖅ ᑲᒥᓯᓇᐅᑲᐃᓐᓇᖅᑑᑉ ᐊᒡᓚᒡᕕᐊᓂᑦ, ᓄᓇᕗᑦ ᒐᕙᒪᓕᐅᕋᔭᖅᖢᓂ. 

ᐊᐱᕆᔭᐅᓯᒪᑎᓪᓗᒍ ᓂᕈᐊᖅᑕᐅᓇᓱᐊᖁᔭᐅᓪᓗᓂ ᐊᒥᓱᐊᖅᑎᑲᓪᓚᒃ, ᖃᐅᔨᒪᓚᐅᖅᑐᖅ ᖃᓄᑎᒋ ᐊᒃᓱᕈᕐᓇᖅᑎᒋᒻᒪᖔᖅ ᒐᕙᒪᓕᕆᓂᖅ ᐊᒻᒪᓗ ᐅᑕᖅᑭᒋᐊᖃᖅᑐᓂ ᑭᓯᐊᓂ ᐃᓚᔮᖏᑦ ᐊᑐᐃᓐᓇᐅᓕᖅᐸᑕ. ᐃᓪᓚᐅᑦ ᒪᓕᒐᓕᕆᓂᕐᒧᑦ ᐃᓕᓐᓂᐊᕆᐊᓚᐅᖅᑐᖅ, ᒪᓕᒐᓕᕆᔨᙳᖅᖢᓂ, ᑮᓇᐅᔭᓕᐅᖅᑎᐅᙱᖦᖢᓂ, ᖃᐅᔨᒪᔭᐅᑦᑎᐊᓕᖅᖢᓂᓗ ᐃᖅᑲᓇᐃᔭᑦᑎᐊᖃᑦᑕᕐᓂᖓᓄᑦ. ᑭᖑᓪᓕᖅᐹᒥ, ᐃᒃᐱᒍᓱᓚᐅᖅᑐᖅ ᕿᓄᐃᓵᕈᓐᓇᕐᓂᕐᒥᓂᒃ, ᐃᑲᔪᖅᓱᐃᔪᓐᓇᕐᓂᕐᒥᓂᒃ, ᐊᒻᒪ ᐃᓐᓇᕈᖅᓯᒪᓂᕐᒥᒃ ᓂᕈᐊᒐᒃᓴᐅᓂᕐᒧᑦ... ᓵᓚᖃᓚᐅᖅᑐᖅ. 

ᐃᓪᓚᐅᑦ ᐱᕈᖅᓴᔭᐅᓚᐅᖅᐳᖅ ᒪᕐᕉᖕᓂᒃ ᑐᕌᒐᖃᕋᓱᒃᖢᓂ, ᐃᓕᓐᓂᐊᖅᑎᑕᐅᓪᓗᓂ ᐊᒻᒪ ᐃᓄᖕᓂᒃ ᐃᑲᔪᕈᓐᓇᖅᖢᓂ ᐊᔪᕈᓐᓃᕌᖓᑦ.  "ᖃᐅᔨᒪᐃᓐᓇᐅᔭᖅᑐᖓ ᐃᑲᔪᕈᒪᓂᓐᓂᒃ ᐃᓄᖕᓂᒃ. ᑕᐃᒪᐃᒻᒪᑦ ᐃᓱᒪᓚᐅᖅᐳᖓ ᓂᕈᐊᖅᑕᐅᔪᒪᓪᓗᖓ ᐱᐅᓂᖅᐸᐅᒐᔭᕆᐊᖓ ᐱᓪᓗᒍ ᐊᓯᔾᔩᒐᓱᐊᕈᓐᓇᖅᐳᖓ ᐅᕙᖓ ᐱᓕᕆᐊᖓᒍᑦ ᒪᓕᒐᓕᐅᖅᑎᐅᓪᓗᖓ ᑲᓇᑕᒥ ᑲᑎᒪᔨᕐᔪᐊᓄᑦ ᐃᓕᓐᓂᐊᖅᑎᑦᑎᒃᑲᓐᓂᖁᓪᓗᖓ ᒪᓕᒐᓕᐅᖅᑎᕐᔪᐊᓂᒃ ᓱᒻᒪᑦ ᓄᓇᕗᑦ ᐱᒻᒪᕆᐅᒻᒪᖔᖅ ᐊᒻᒪ ᓱᒻᒪᑦ ᐱᐅᓂᖅᓴᓂᒃ ᐱᓕᕆᐊᖃᕆᐊᖃᕐᒪᖔᖅᑕ ᓄᓇᕗᒻᒧᑦ. ᐃᖏᕐᕋᓂᓕᒫᓐᓄᑦ ᐱᓕᕆᓂᕆᔭᓐᓄᑦ ᖃᐅᔨᒪᑦᑎᐊᕈᒪᓂᐅᕗᖅ ᐃᑲᔪᖅᑐᖅᑕᐅᓂᖅᓴᐅᒐᓗᐊᕐᒪᖔᑦᑕ ᐊᒻᒪᓗ ᐃᑲᔫᑎᒃᓴᒃᑲᓐᓂᕐᓂᒃ ᓄᓇᕗᒻᒥᐅᓄᑦ," ᐅᖃᖅᑐᖅ.

ᐃᓪᓚᐅᑦᒧᑦ, ᐃᓕᓐᓂᐊᕐᓂᖅ ᐱᒻᒪᕆᐅᓚᐅᖅᐳᖅ. "ᐱᔭᕆᐊᖃᒻᒪᕆᓚᐅᖅᑐᖅ ᐅᕙᓐᓄᑦ, ᐊᓱᐃᓛᒃ ᐃᒃᐱᒍᓱᒍᓐᓇᖅᑐᖓ ᐱᓕᕆᔾᔪᑎᖃᕐᓂᓐᓂᒃ ᐃᖅᑲᓇᐃᔭᕐᓂᐊᕐᓗᓂ. ᑕᒪᓐᓇ ᐱᔾᔪᑎᒋᓪᓗᒍ, ᓲᕐᓗ ᒪᓕᒐᕐᔪᐊᕌᓗᒻᒥᒃ ᐊᑐᕐᓂᐊᕐᓗᓂ ᑲᓇᑕᐅᑉ ᒪᓕᒐᓕᐅᕐᕕᔾᔪᐊᖓᓂ, ᐃᓱᒪᔭᕆᐊᖃᐃᓐᓇᐅᔭᕋᑦᑕ ᐱᓕᕆᐊᕆᔭᑦᑎᓐᓂᒃ ᐊᐱᕆᔭᐅᓪᓗᑕ, ᓲᕐᓗ ᒪᓕᒐᕐᒥᒃ ᑲᔪᓯᑎᑦᑎᓗᑕ, ᐅᖃᐅᓯᖃᕐᓗᑕ ᑮᓇᐅᔭᓂᒃ ᐊᑐᖅᑐᒃᓴᓂᒃ... ᐃᓕᓐᓂᐊᕐᓂᕋ ᐃᑲᔪᕐᔪᐊᖅᓯᒪᔪᖅ... ᕿᒥᕐᕈᐃᓐᓇᖃᑦᑕᕋᒃᑭᑦ ᐱᖁᔭᒃᓴᑦ ᖃᐃᖃᑦᑕᖅᑐᑦ ᕿᓂᕐᓗᑕᓗ ᖃᓄᖅ ᓄᓇᕗᒻᒥᐅᑦ ᐱᕚᓪᓕᕈᑎᖃᕐᓂᐊᕐᒪᖔᑕ ᖃᓄᑐᐃᓐᓇᖅ ᒪᓕᒐᓕᐊᒃᑯᑦ ᑲᔪᓯᑎᑕᑦᑎᓐᓂ," ᐅᖃᖅᑐᖅ.

ᐃᓕᓐᓂᐊᕐᓂᓕᕆᓂᖅ ᐃᑲᔪᓚᐅᕆᕗᖅ, ᐱᓕᕆᖃᑎᖃᖅᖢᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ, ᓄᓇᕗᒻᒥ ᐃᓅᓯᓕᕆᔨᒃᑯᑦ ᑲᑎᒪᔨᖏᓐᓂᒃ ᐊᒻᒪ ᐃᓕᓐᓂᐊᖅᖢᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓂᒃ. "ᑲᒪᒋᑦᑎᐊᖏᓐᓇᐅᔭᖅᑕᒃᑲ ᓄᓇᕗᒻᒥᐅᑦ ᐃᓅᓯᖏᑦ ᓲᖃᐃᒻᒪ ᖃᓄᑎᒋ ᐱᕐᔪᐊᕌᓗᐃᑦ ᐊᒻᒪ ᐊᒃᓱᕈᕐᓇᖅᑐᑦ ᓄᓇᕗᒻᒥᐅᑦ ᑎᓕᐅᖅᑕᐅᖃᑦᑕᖅᓯᒪᖕᒪᑕ ᖃᐅᔨᖃᑦᑕᖅᓯᒪᔭᖏᓐᓂᒃ ᐊᒻᒪ ᓱᓕ ᓴᙱᓂᖃᕐᔪᐊᖅᖢᑎᒃ ᓇᒡᓕᒍᓱᒃᖢᑎᒡᓗ ᖃᑕᙳᑎᒌᓂᒃ ᐊᒻᒪ ᓄᓇᖅᑲᑎᒌᓂᒃ," ᓇᓗᓇᐃᖅᓯᑦᑎᐊᖅᐳᖅ. ᓇᓗᓇᐃᖅᓯᔪᒪᕗᖅ ᐊᓂᒍᐃᓯᒪᔪᑦ ᐊᒻᒪ ᐃᓐᓇᐃᑦ ᐃᑲᔪᖅᑕᐅᖃᑦᑕᖁᓪᓗᒋᑦ ᐃᓕᖅᑯᓯᕐᒥᓂᒃ ᐆᒻᒪᖅᑎᑦᑎᒃᑲᓐᓂᕋᓱᖕᓂᕐᒧᑦ ᐊᒻᒪ ᑭᖑᕚᕇᓄᑦ ᖁᐊᖅᓵᕐᓇᖅᑐᒃᑰᕈᓐᓃᖁᓪᓗᒋᑦ. 

ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐊᖏᕐᕋᒧᑦ ᐊᐅᓪᓚᕈᒪᔪᓄᑦ ᐃᓕᓐᓂᐊᒃᑲᓐᓂᕆᐊᖅᑐᕐᓗᓂ ᓇᒡᓕᒍᓱᖕᓂᐅᕗᖅ. "ᐊᒃᓱᕈᕐᓇᕈᓐᓇᖅᑎᓪᓗᒍ ᓯᕗᓪᓕᕐᒥ, ᐱᕚᓪᓕᕈᑕᐅᔪᓐᓇᖅᑰᖅᑐᖅ ᓲᖃᐃᒻᒪ ᐊᓯᔾᔨᖅᓯᒪᔪᑦ ᖃᐅᔨᖃᑦᑕᖅᑕᑎᑦ... ᐊᔪᕐᓇᕈᓐᓇᖅᑐᖅ. ᑭᓯᐊᓂ ᐊᖅᑯᑎᒃᑯᑦ, ᖃᐅᔨᑦᑎᐊᖅᑰᕋᕕᑦ ᑭᓇᐅᖕᒪᖔᖅᐱᑦ ᖃᓄᕐᓗ ᐱᕙᓪᓕᐊᑎᑦᑎᔪᓐᓇᕐᒪᖔᖅᐱᑦ ᕿᓄᐃᓵᕐᓂᕐᒥᒃ ᐊᔪᙱᓐᓂᕐᓂ ᓴᙱᓂᖅᓴᐅᓕᕐᓗᑎᑦ ᐃᓅᓂᕐᒥᒃ," ᐃᓅᓯᓕᕆᓗᓂ, ᖃᐅᔨᑎᑦᑎᓗᓂ ᖃᓄᖅ ᑕᐃᒃᑯᐊ ᐃᓅᓯᕐᓂ ᐊᑐᕐᓂᑯᑦ ᐊᑐᖅᑕᐅᔪᓐᓇᕐᒪᖔᑕ ᐃᑲᔪᕐᓗᒋᑦ ᐊᓯᑎᑦ. ᐃᓪᓚᐅᑦ ᑎᓕᐅᕆᕗᖅ ᐃᓕᓐᓂᐊᖅᑎᓂᒃ ᐃᖅᑲᐅᒪᖁᓪᓗᒋᑦ ᖃᓄᐃᒻᒪᑦ ᐃᓕᓐᓂᐊᒃᑲᓐᓂᕈᒪᓚᐅᕐᒪᖔᑕ ᐊᔪᙱᓛᕆᔪᓐᓇᕐᓂᐊᕐᒪᒍ ᐊᓂᒍᐃᔪᓐᓇᕐᓂᖅᓴᐅᓗᑎᒡᓗ ᐃᓕᓐᓂᐊᖅᑕᒥᓂᒃ ᐊᓂᒍᐃᔭᕌᖓᒥᒃ. 

"ᐃᓱᒪᒋᔭᕋ ᓱᓕᑦᑎᐊᕐᓂᒃᑯᑦ ᑭᓇᐅᓂᑦᑎᓐᓂᒃ, ᐃᑲᔪᕈᓐᓇᖅᑐᒍᑦ ᐊᓯᖏᓐᓂᒃ ᐃᓄᖕᓂᒃ."

ᐊᑖᑕᒥᓂᒃ ᐃᒻᒥᓃᓚᐅᖅᑎᓪᓗᒍ ᐊᒻᒪ ᑎᒍᐊᙳᐊᕆᔭᐅᑎᓪᓗᒍ, ᐃᓪᓚᐅᑦ ᖃᐅᔨᒪᕗᖅ ᐃᓅᓯᕐᒥᓂ ᐊᒃᓱᕈᕐᓇᖅᑐᖅᓯᐅᖅᑐᓂᒃ. ᑐᙵᓂᖃᑦᑎᐊᓚᐅᙱᑦᑐᖅ ᐅᕝᕙᓘᓐᓃᑦ ᕿᓄᐃᓵᕈᓐᓇᙱᖦᖢᓂ ᐱᔭᕆᐊᖃᖅᑕᒥᓂᒃ ᐃᒥᐊᓗᖕᒧᐊᖅᖢᓂᓗ. ᑕᒪᓐᓇ ᐃᓱᒪᒥᐅᑕᕆᒻᒪᒍ ᓂᕈᐊᖅᑕᐅᓯᒪᓪᓗᓂ ᐊᒻᒪᓗ ᐃᖅᑲᓇᐃᔮᖃᕈᓐᓃᕈᒪᓇᓂ ᓂᕈᐊᑲᒻᒪᓐᓂᑯᒧᑦ. ᐊᒃᓱᕈᖅᑎᓪᓗᒍ ᐃᒥᕋᓱᒃᓗᓂ, ᐃᑲᔪᖅᑕᐅᔪᒪᓲᖅ. ᐱᖃᓐᓇᕆᔭᒥᓂᒃ, ᐃᓚᒥᓂᒃ ᐊᒻᒪ ᐃᑲᔪᖅᑎᓂᒃ ᐅᖃᓗᒡᕕᒋᔪᓐᓇᖅᑕᒥᓂᒃ ᐃᒥᑲᑕᐃᓐᓇᕈᓐᓇᖅᐳᖅ ᐊᒻᒪ ᐃᒥᓗᐊᑲᑕᒍᓐᓃᖅᖢᓂ ᒐᕙᒪᓕᕆᓚᐅᙱᑎᓪᓗᒍ. ᐊᔪᕐᓇᕋᓗᐊᖅᑎᓪᓗᒍ, ᐃᓄᑑᖅᑰᔨᕙᙱᑦᑐᖅ. "ᐃᓄᓕᒫᑦ, ᐃᓱᒪᔪᖓ, ᐊᒃᓱᕉᑎᖃᖅᑐᑦ ᐃᓗᐊᓂ ᕿᓄᐃᓵᕈᑎᒋᔭᕆᐊᖃᖅᑕᑦᑎᓐᓂᒃ, ᖃᓄᑐᐃᓐᓇᖅ," ᑕᐅᑐᒃᑕᖓ. 

"ᖃᓄᐃᙱᑦᑐᖅ ᑲᑕᒃᓴᕋᐃᓪᓗᓂ. ᑕᐃᒪᓐᓇ ᐋᖅᑭᒃᓯᓚᐅᖅᐳᑎᑦ ᐃᓕᖕᓂᒃ ᐃᓕᖕᓂᒃ ᐃᑲᔪᕋᔭᖅᑐᒥᒃ ᐊᓯᔾᔨᖅᓯᓂᕐᒥᒃ ᐊᓯᖕᓄᑦ."

ᐅᑎᕈᓐᓇᕈᓂ ᐅᖃᐅᑎᓗᓂᐅᒡᓗ ᒪᒃᑯᖕᓂᖅᓴᖅ ᓇᖕᒥᓂᖅ ᐅᖃᖅᑕᖓ, "ᖃᓄᐃᙱᑦᑐᖅ ᖁᕕᐊᓱᒋᐊᒃᓴᖅ. ᖃᓄᐃᙱᑦᑐᖅ ᑎᔅᓯᓈᕿᓗᓂ ᐃᓅᓯᕐᓂ. ᐃᓕᒍᒪᒐᓗᐊᖅᑐᖓ ᐅᐊᑦᑎᐊᕈ ᖁᕕᐊᓱᒍᓐᓇᕋᒪᑦᑕᐅᖅ.. ᑕᒪᓐᓇ ᑎᓕᐅᒃᑲᓐᓂᕈᒪᕙᕋ ᓄᓇᕗᒻᒥᐅᓄᑦ ᐊᒃᓱᕈᖅᓯᒪᒐᓗᐊᖅᑎᓪᓗᓯ, ᐱᐅᕗᖅ ᐱᐅᓪᓗᓂ ᐆᒻᒪᕆᑦᑎᐊᕆᐊᒃᓴᖅ ᐊᒻᒪᓗ ᑎᑦᑎᓇᖅᑐᒥᒃ." 

ᐋᖅᑭᒃᓯᒪᐃᓐᓇᖅᑎᓪᓗᒍ ᐃᓱᒪᖓ ᐃᖅᑲᓇᐃᔮᖓᑕᓗ ᐃᓅᓯᖓ ᓇᓕᒧᒌᒃᑎᓐᓇᓱᒃᓗᒍ, ᑐᓴᐅᒪᖃᑎᖃᐃᓐᓇᓲᖅ ᐱᖃᓐᓇᕆᔭᖏᓐᓂ ᖃᑕᙳᑎᖏᓐᓂᒃᓗ ᕙᐃᔅᐳᒃᑯᑦ ᑎᑎᕋᖃᑦᑕᐅᑎᔾᔪᑎᒃᑯᓪᓗ ᑐᓴᖅᑎᑦᑎᔾᔪᑎᓂᒃ ᐋᑐᕚᒦᑎᓪᓗᒍ. "ᑕᐃᒪᓕ ᐱᕈᖅᓴᓚᐅᕋᒪ ᐊᔾᔨᒌᙱᑦᑐᓂ ᓄᓇᓕᖕᓂ, ᐱᖃᓐᓇᕆᔭᖃᓗᐊᓚᐅᙱᓐᓇᒪ ᐃᓅᓯᓕᒫᒧᑦ. ᑭᓯᐊᓂ ᐃᖃᓗᖕᒥᐅᑕᐅᓯᒪᓪᓗᖓ ᐊᕐᕌᒍᓄᑦ ᐊᕙᑎᓄᑦ, ᐱᖃᓐᓇᕆᔭᒃᑲ ᐱᓯᒪᐃᓐᓇᕈᓐᓇᖅᓯᒪᒐᒃᑭᑦ. ᑕᐃᒪᐃᓕᐅᖅᐸᒃᑭᕗᖓ ᐅᖃᖃᑎᖃᑐᐃᓐᓇᖅᖢᖓ ᐱᖃᓐᓇᕆᔭᓐᓂᒃ ᖁᕕᐊᒋᓪᓗᒍᓗ ᐃᓅᓯᖅ ᐊᔪᙱᓐᓂᓕᒫᓐᓂ," ᑖᓐᓇ ᐊᒥᖅᑳᖃᑎᒋᕙᐅᒃ. ᐊᓯᐊᒍᓪᓕ, ᐅᖃᓕᒫᖃᑦᑕᖅᑐᖅ, ᐱᙳᐊᖃᑦᑕᖅᑐᖅ ᖃᕋᓴᐅᔭᒃᑯᑦ ᐊᒻᒪ ᓯᓚᒥ ᖃᓄᐃᓕᐅᕈᓘᔭᖅᐸᒃᖢᓂ, ᐃᒡᓘᑉ ᑐᓄᐊᓂ ᐋᑐᕚᒥ ᐅᕝᕙᓘᓐᓃᑦ ᐃᒡᓗᕋᓛᒥ, ᕿᒻᒥᒥᓂᒃ ᐱᙳᐊᖃᑎᖃᖅᐸᒃᖢᓂ ᐅᑭᐅᖅᑕᖅᑐᒦᑎᓪᓗᒍ. 

ᐊᔾᔪᒥᓇᕐᓂᖏᑦ ᐃᓚᖃᖅᑐᑦ ᑲᔪᖏᖅᓴᐃᓂᕐᒥᑦ ᐃᓄᓐᓂᑦ ᓄᓇᕗᒻᒥ ᓲᕐᓗ ᒥᐊᓕ ᐅᐃᓪᒪᓐ, ᑯᕆᔅᑕ ᑯᓄᒃ, ᐊᒻᒪᓗ ᐊᓯᖏᑦ ᐅᑎᖃᑦᑕᖅᑐᑦ ᓄᓇᓕᓐᓄᑦ. "ᐃᓅᓯᖏᓐᓂᒃ ᐊᐅᓚᑦᑎᔾᔪᓯᕆᕙᒃᑕᖏᑦ ᐅᕙᓐᓂᒃ ᐃᑲᔪᓪᓚᕆᖃᑦᑕᖅᐳᑦ ᖃᐅᔨᒪᓪᓗᑎᒃ ᐱᐅᒋᔪᓐᓇᕋᒃᑭᑦ, ᐃᑲᔪᐃᓐᓇᕈᒪᓗᑎᒃ ᐃᓄᖕᓂᒃ, ᓲᖃᐃᒻᒪ ᓇᖕᒥᓂᖅ ᒪᑭᑕᔪᓐᓇᑦᑎᐊᕋᒪ. ᐊᔪᕐᓇᙱᑦᑐᑯᓘᕗᖅ ᐃᓄᑑᑎᒋᐊᒃᓴᖅ. ᑭᓯᐊᓂ ᐊᖏᕐᕋᕌᖓᒪ ᑕᑯᓪᓗᖓᓗ ᖃᓄᖅ ᐃᓚᐅᖃᑕᐅᑎᒋᖕᒪᖔᑕ ᓄᓇᓕᖕᒥ, ᐃᓚᐅᖃᑕᐅᖏᓐᓇᕈᒪᖃᑦᑕᖅᑐᖓ ᐊᓯᐅᔨᑦᑕᐃᓕᓗᖓᓗ ᑲᓲᑎᔾᔪᑎᓐᓂᒃ," ᖁᖓᖦᖢᓂ.  ᑕᐅᑐᒃᖢᓂ ᐃᖅᑲᓇᐃᔭᖃᑎᖏᓐᓂᒃ ᓕᐊ ᒐᔮᓐ ᐊᒻᒪ ᓂᑭ ᐋᔅᑕᓐ, ᐅᐱᒋᔭᖃᕐᖢᓂ ᐱᔪᓐᓇᕐᓂᕐᒥᓂᒃ, ᐱᔪᒪᑦᑎᐊᕐᓂᕐᒥᓂᒃ ᖃᓄᕐᓗ ᑐᑭᒧᐊᒃᑎᓯᒪᖕᒪᖔᒍ ᐊᒃᑐᐃᓛᖑᖁᓪᓗᒍ ᐃᖅᑲᓇᐃᔮᖓᓂ ᑐᙵᑦᑎᐊᖏᓐᓇᕐᖢᓂᓗ ᐃᖅᑲᓇᐃᔮᖓᓂ. 

ᐱᕈᖅᓴᓪᓗᓂ ᒐᕙᒪᓕᕆᓂᕐᒥᒃ, ᓗᐊᕆ ᐃᓪᓚᐅᑦ ᓯᓐᓇᑦᑑᒪᒋᔭᒥᓂᒃ ᐃᓅᕗᖅ ᐃᑲᔪᖅᖢᓂᓗ ᓯᓐᓇᑦᑑᒪᒋᔭᒥᓂᒃ ᓄᓇᕗᒻᒥᐅᓄᑦ ᐱᓕᕆᑎᓪᓗᒍ ᑲᓇᑕᐅᑉ ᐊᖓᔪᖅᑳᖃᕐᕕᖓᓂ. ᓴᓐᖏᔫᓪᓗᓂ ᑭᓇᒧᒃᑭᐊᖅ ᖃᐅᔨᓯᒪᔪᖅ ᐊᔅᓱᕈᕐᓇᖅᑐᒃᑰᖅᑐᓂ ᐊᒻᒪ ᐅᑎᖅᑐᓂ ᐊᔅᓱᕈᕈᑎᒋᕙᑦᑕᖏᓐᓄᑦ ᐃᒥᐊᓗᒻᒧᑦ, ᓇᖏᖅᑐᖅ ᑭᒡᒐᖅᑐᐃᓪᓗᓂ ᓄᓇᕗᒻᒥ ᐅᐱᒋᓪᓗᑎ ᐃᓐᓇᑐᖃᖏᑦ ᐊᒻᒪ ᓴᓂᓪᓕᖏᑦ ᒪᓕᒐᓕᒫᓂᑦ ᐊᓂᒍᖅᑎᖃᑦᑕᖅᑕᖏᓐᓂᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.