"ᐃᓕᓐᓂᐊᕐᓂᕋ ᐅᕙᓐᓄᑦ ᐱᒻᒪᕆᐅᖏᓐᓇᐅᔭᖅᑐᖅ. ᐊᓕᐊᓇᐃᒋᑦᑎᐊᖅᑕᕋ ᐃᓕᓐᓂᐊᕆᐊᕆᐊᒃᓴᖅ. ᖁᕕᐊᒋᑦᑎᐊᖅᑕᒃᑲ ᓈᓴᐅᓯᕆᓂᖅ ᐊᒻᒪ ᖃᐅᔨᓴᖅᑐᓕᕆᓂᕐᒥᒃ ᐃᓕᓐᓂᐊᕆᐊᒃᓴᖅ ᐊᓕᐊᓇᐃᒋᑦᑎᐊᖅᑕᒃᑲ. ᖃᐅᔨᒪᓚᐅᖅᑐᖓ ᐱᔭᕇᕋᒪ ᐃᓕᓐᓂᐊᕐᕕᐊᓗᒻᒥ ᐅᑎᕈᒪᓕᓚᐅᕋᒪ ᐊᒻᒪᓗ ᐃᓕᓴᐃᔨᕈᕐᓗᖓ ᐃᓕᓴᐃᔭᖅᑐᕐᓗᖓ ᐊᒻᒪᓗ ᑕᑯᑎᓪᓗᒋᑦ ᑖᒃᑯᐊ ᓱᕈᓰᑦ ᖁᕕᐊᒋᔭᖃᕐᓂᖏᓐᓂᒃ ᐃᓕᓐᓂᐊᕐᕕᒻᒥᒃ. ᑕᐃᒪᓐᓇ ᐃᓕᓐᓂᐊᕆᐊᒃᑲᓐᓂᕈᑎᒋᓚᐅᖅᑕᕋ," ᒪᑲᓐᔨ ᑎᒧᕋ ᐃᖅᑲᐅᒪᔪᖅ.

ᐱᕈᖅᓴᓚᐅᖅᑐᖅ ᖁᕐᓗᖅᑐᕐᒥ, ᓄᓇᕗᒻᒥ, ᐱᔭᕇᖅᓯᓵᕐᖢᓂᓗ ᓯᕗᓪᓕᖅᐹᒥ ᐊᕐᕌᒍᒥ ᓯᓚᑦᑐᖅᓴᕐᕕᒃᔪᐊᖓᓂ ᑳᓪᒍᕆᐅᑉ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᑦ ᐱᔪᓐᓇᕐᓂᕐᒧᑦ ᐱᓕᕆᐊᒃᓴᒥ. ᐱᕙᒌᔭᐃᔪᖅ ᐃᓕᓐᓂᐊᖅᑎᐊᖅᓯᒪᑦᑎᐊᕐᓂᕐᒧᑦ ᐱᓕᕆᐊᖃᕐᓂᐊᕐᓗᓂ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐃᓕᓐᓂᐊᕐᓂᓕᕆᓂᕐᒧᑦ ᐃᓚᐅᖃᑕᐅᓯᒻᒫᑦ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᓐᓂ ᖃᓄᐃᓕᐅᕈᑎᓂᑦ ᐃᓕᑦᑎᒃᑲᓐᓂᕐᓗᓂᓗ ᐊᓯᖏᓐᓂᒃ ᓄᓇᖃᖅᑳᖅᓯᒪᔪᓂᒃ ᐃᓄᖕᓂᒃ ᐃᓚᒋᓗᓂᐅᒃ ᑖᓐᓇ ᐊᔾᔨᐅᙱᑦᑐᖅ ᐱᓕᕆᐊᒃᓴᖅ. ᑎᒧᕋ ᑕᐃᑲᓃᑦᑐᖅ ᒪᓕᒃᖢᓂ ᐃᓕᓴᐃᔨᓂᑦ ᐱᔪᒃᓯᑎᑦᑎᔪᓂᒃ ᐃᓕᓐᓂᐊᖅᑎᐅᑎᓪᓗᒍ.

"ᖁᕕᐊᓱᐃᓐᓇᖃᑦᑕᓚᐅᖅᑐᖓ ᐃᓕᓴᐃᔨᐅᖏᓐᓇᖅᖢᖓ ᐃᓕᓐᓂᐊᕐᕕᖕᒥ. ᐊᒃᓱᐊᓗᒃ ᐊᒃᑐᐃᓂᖃᓚᐅᖅᑐᑦ ᐅᕙᓐᓂᒃ ᐃᓕᓴᐃᔪᒪᓂᓐᓂᒃ ᐃᓕᓐᓂᐊᕐᕕᐊᕈᓯᕐᓂᒃ ᓄᓇᕗᒻᒥ ᐊᒻᒪᓗ ᑕᒪᓐᓇ ᐊᒃᑐᐃᓂᖃᖅᖢᓂ ᒪᒃᑯᒃᑐᓄᑦ ᑕᒫᓂ," ᑲᔪᓯᓪᓗᓂ, ᐅᖃᐅᓯᖃᖅᖢᓂ ᖃᓄᖅ ᐱᔪᓐᓇᐅᑎᖃᕐᒪᖔᑦ ᐊᑦᑎᖕᓂᖅᓴᑦ ᐃᓕᓐᓂᐊᕐᕕᖕᒥ ᐃᓕᓴᐃᓂᕐᒥᒃ ᖃᓄᐃᓕᐅᕈᒪᖕᒪᖔᑦ. ᐃᓕᓐᓂᐊᕐᕕᖕᒥ ᐊᓕᐊᓇᐃᒋᔭᖃᐃᓐᓇᐅᔭᖅᑐᖅ ᐊᒻᒪ ᐃᓕᓐᓂᐊᕈᒪᐃᓐᓇᐅᔭᖅᖢᓂ ᐊᒻᒪ ᐃᓕᓴᐃᔪᒪᑦᑎᐊᖃᑦᑕᖅᓯᒪᓪᓗᓂ. ᑎᒧᕋ ᐊᖅᓴᕐᓂᕐᒥᒃ ᐃᓕᓐᓂᐊᖅᑎᑦᑎᖃᑦᑕᓚᐅᕐᒥᔪᖅ ᐊᒻᒪ ᓱᓕ ᐅᑭᐅᑭᓗᐊᖅᖢᓂ ᐃᓕᓐᓂᐊᖅᑎᓄᑦ ᑭᓯᐊᓂ ᐱᔪᒃᓯᑦᑎᐊᖅᑐᖅ ᐃᓕᓐᓂᐊᒃᑲᓐᓂᕆᐊᒃᓴᖅ ᑲᔪᓯᑎᓪᓗᒍ ᐊᖅᑯᑎᒋᓂᐊᖅᑕᖓᓂᒃ ᐱᑐᐃᓐᓇᕆᐊᖃᓕᕋᒥ ᐃᖅᑲᓇᐃᔮᕆᔪᒪᔭᒥᓂᒃ.

"ᐊᒃᓱᕈᕐᓇᕐᓂᖅᐹᖑᖅᑰᔨᔪᖓ ᐊᖏᕐᕋᓐᓂ ᕿᒪᒃᖢᒋᑦ. ᑭᓯᐊᓂ ᑭᙴᒪᔭᕌᖓᒪ, ᐃᓕᓴᐃᔨᒧᑦ ᐱᖃᓐᓇᕆᔭᓐᓄᓪᓘᓐᓃᑦ ᐅᖄᓚᑐᐃᓐᓇᓲᖑᔪᖓ, ᓄᓇᑦᑎᓐᓂᕐᒥᐅᑕᕐᒥᒃ ᐅᖃᖃᑎᒋᑐᐃᓐᓇᖅᐸᒃᖢᒋᑦ. ᐊᖏᓛᖑᖅᑰᔨᒋᕙᒋᑦ ᐃᖅᑲᐃᓯᓗᑎᑦ ᑖᓐᓇ ᐊᑐᖅᑕᐅᓚᐅᑲᑐᐃᓐᓇᕐᓂᖓᓂᒃ, ᐊᖏᕐᕋᐃᓪᓗ ᐊᖏᕐᕋᖅᓯᒪᐃᓐᓇᐅᔭᕐᓂᐊᖅᖢᓂ, ᐃᓄᖕᓂᒃ ᐃᑲᔪᕐᓂᐊᖅᑐᓂᒃ ᐊᒻᒪ ᐃᓄᖕᓂᒃ ᑕᐃᑲᓃᑦᑐᒪᔪᓂᒃ ᐃᓕᖕᓄᑦ," ᑎᒧᕋ ᐊᒥᖅᑳᖃᑎᖃᖅᐳᖅ, ᑎᓕᐅᕆᓪᓗᓂ ᒪᒃᑯᒃᑐᓂᒃ ᐊᖏᕐᕋᐅᔾᔨᔪᒪᔪᓂᒃ ᐃᓕᓐᓂᐊᖅᑕᒥᓂᒃ ᐱᓇᔪᖁᓪᓗᒋᑦ ᑭᓱᑐᐃᓐᓇᓂᒃ ᐃᓱᒪᒋᔭᖃᕐᓗᑎᒃ.

ᖃᐅᔨᒪᖁᒻᒥᔭᖏᑦᑕᐅᖅ ᐃᓄᑑᓗᑎᒃ ᐱᓕᕆᔭᕆᐊᖃᙱᒻᒪᑕ ᐊᒻᒪᓗ ᐃᑲᔪᖅᑕᐅᔪᒪᓗᑎᒃ ᐊᒃᓱᕈᖅᑎᓪᓗᒋᑦ ᑭᓱᑐᐃᓐᓇᕐᒧᑦ. "ᐅᓄᖅᑐᐊᓘᖕᒪᑕ ᐃᓄᐃᑦ ᐃᓕᖕᓂᒃ ᐃᑲᔪᕈᓐᓇᖅᑐᑦ. ᐃᑲᔪᖅᑕᐅᔪᒪᓗᑎᑦ, ᐊᑐᐃᓐᓇᕐᓗᒍ. ᑲᙳᓱᙱᓪᓗᑎᑦ ᐃᑲᔪᖅᑕᐅᔪᒪᓗᑎᑦ," ᐅᖃᐅᔾᔨᓪᓗᓂ.

ᐊᐅᓚᓐᓂᐊᕐᓗᒋᑦ ᐊᒃᓱᕈᕐᓇᖅᑐᑦ ᐊᖏᕐᕋᒥ ᐃᓕᓐᓂᐊᕈᑎᑦ ᐃᓚᖏᓪᓗ ᐱᖃᓐᓇᕆᔭᖏᓪᓗ ᐊᖏᕐᕋᒧᑦ ᕿᒪᒃᖢᒋᑦ, ᑎᒧᕋ ᐃᒻᒥᓂᒃ ᐱᕕᒃᓴᖃᖅᑎᖦᖢᒍ, ᑕᕐᕆᔭᖅᖢᓂ ᐅᓚᕕᓴᐅᑕᐅᓂᖓᓂᒃ ᐊᑐᕋᓱᒃᐸᒃᖢᓂᓗ ᓇᖕᒥᓂᖅ ᑲᒪᒋᑦᑎᐊᕐᓂᕐᒥᒃ. ᐱᖃᑎᖃᖃᑦᑕᖅᑐᖅ ᐊᓯᖏᓐᓂᒃ ᓄᓇᖃᖅᑳᖅᓯᒪᔪᓂᒃ ᐃᓄᖕᓂᒃ ᐃᓕᓐᓂᐊᖅᑕᖓᓂ, ᑲᑎᖦᖢᑎᒃ ᒥᑎᖦᖢᓂᒋᑦ ᕿᓚᐅᔾᔭᕆᐊᕐᖢᑎᒃᓗ. ᐊᓯᐊᑦᑕᐅᖅ ᐊᒃᓱᕈᕐᓇᖅᑐᖅᓯᐅᕈᑎᒋᓚᐅᕐᒥᔭᖓ ᑮᓇᐅᔭᓂᒃ ᓇᓂᓯᓇᓱᒃᖢᓂ ᐃᓕᓐᓂᐊᕐᓂᖓᓄᑦ, ᑭᓯᐊᓂ ᐃᓕᓴᐃᔨᑦᑎᐊᕙᒻᒪᕆᐊᓗᒃ ᐃᑲᔪᓚᐅᖅᐳᖅ ᐱᓇᔪᒃᑎᓪᓗᒍ ᖃᐅᔨᓇᓱᒃᖢᓂ ᑭᓱᓂᒃ ᐱᔭᕆᐊᖃᕐᒪᖔᑦ ᐃᑲᔪᖅᑐᐃᓂᐊᕐᓗᓂ ᐊᑭᖏᓐᓂᒃ ᐃᓕᓐᓂᐊᕆᐊᕐᓂᐊᕐᓗᓂ ᐅᖓᓯᒃᑐᒧᑦ ᐊᖏᕐᕋᕆᔭᒥᓂ.

"ᓄᓇᓕᖓᓃᑉᐳᖓ 1600-ᓂᒃ ᐊᒻᒪᓗ ᒫᓐᓇ ᓄᓇᖃᓕᖅᑐᖓ ᓄᓇᓕᓐᓂ 1.2 ᒥᓕᐊᓐᓂᒃ ᐃᓄᖃᖅᑐᖓ."

ᑭᖑᒧᑦ ᑕᑯᓗᒍ, ᖃᐅᔨᑎᑦᑎᒃᑲᓐᓂᕈᒪᔪᖅ ᖃᓄᐃᑦᑑᖕᒪᖔᑦ ᐃᓕᓐᓂᐊᒃᑲᓐᓂᕐᓂᖅ ᐃᓕᓐᓂᐊᕐᕕᒃ, ᖃᔅᓯᓂᒡᓗ ᐊᔾᔨᒌᖏᑦᑐᓂᒃ ᐱᕕᒃᓴᓂᑦ ᐊᑐᐃᓐᓇᖅᑕᖃᕐᒪᖔᑦ. ᑕᑯᒃᑲᓐᓂᕈᒪᔪᖅ ᑕᐃᒪᐃᑦᑐᓂᒃ ᑐᑭᓯᒋᐊᕈᑎᒃᓴᐅᔪᓂᒃ ᐊᑐᐃᓐᓇᐅᓂᐊᖅᑐᓂᒃ ᓄᓇᕗᒻᒥ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᖅᑎᐅᔪᓄᑦ ᐃᓕᓐᓂᐊᕆᐊᕋᓱᐊᓚᐅᕐᒪᑦ ᓯᓚᑦᑐᓴᕐᕕᔾᔪᐊᖓᓄᑦ ᑳᓪᒍᕆᒥ ᐅᑭᐅᖅᑕᖅᑐᒥ ᑲᑎᒪᓚᐅᖅᑎᓪᓗᒋᑦ ᐃᓕᓐᓂᐊᓚᐅᖅᑐᓂ ᒍᕋᐃᑦ 12-ᒥ. "ᑕᑯᑎᑦᑎᓚᐅᖅᑐᖅ ᐅᕙᓐᓄᑦ ᓯᓚᑦᑐᖅᓴᕐᕕᒃ ᐊᒃᓱᕈᕐᓇᓗᐊᙱᓐᓂᖓᓂᒃ, ᑖᒃᑯᐊ ᐃᓄᐃᑦ ᐃᓕᖕᓂᒃ ᑕᑯᒃᓴᐅᑎᑦᑎᑐᐊᖅᐸᑕ ᖃᓄᐃᑦᑑᖕᒪᖔᑦ, ᖃᓄᕐᓗ ᐱᓕᕆᐊᕆᔪᓐᓇᕐᒪᖔᑦ," ᐃᖅᑲᐅᒪᔪᖅ.

ᐊᓯᖏᓐᓂᒃ ᐃᓕᓐᓂᐊᖅᑎᓂᒃ ᐊᔾᔨᐸᓗᖏᓐᓂᒃ ᖃᐅᔨᖃᑦᑕᖁᔨᓚᐅᖅᐳᖅ ᐱᔪᓐᓇᕐᓂᖃᕐᓂᕐᒥᒃ ᐊᒻᒪ ᑐᓴᖅᑎᑕᐅᓪᓗᓂ ᐊᑲᐅᓛᒥᒃ ᓯᕗᒻᒧᐊᒍᑎᒃᓴᓂᒃ ᓯᓚᑦᑐᖅᓴᕐᕕᒡᔪᐊᕐᒥ. ᑕᐃᒪᐃᒻᒪᑦ ᑎᒧᕋ ᐅᓂᒃᑳᓚᐅᖅᐳᖅ ᐅᑭᐅᖅᑕᖅᑐᒥ ᐊᖓᔪᒃᖡᑦ ᐃᓕᓐᓂᐊᕐᕕᖓᓄᑦ ᓯᓚᑦᑐᖅᓴᕐᕕᖕᒥ ᖃᐅᔨᖃᑦᑕᖅᓯᒪᔭᖏᓐᓂᒃ ᐃᑲᔫᑎᒃᓴᓂᒃ ᑕᐃᒃᑯᓄᖓ ᐃᓱᒪᔪᓄᑦ ᐃᓕᓐᓂᐊᒃᑲᓐᓂᕈᒪᔪᓂᒃ. ᑕᒪᓐᓇ ᑲᑎᒪᓂᖅ ᐃᑲᔪᓚᐅᖅᐳᖅ ᒪᑐᐃᖅᓯᓪᓗᓂ ᐃᔨᒥᓂᒃ ᐊᔪᕐᓇᙱᑐᐃᓐᓇᕆᐊᓕᖕᓄᑦ, ᑕᒪᓐᓇᓗ ᓂᕆᐅᒋᓚᐅᖅᖢᓂᐅᒃ.

ᐱᕈᖅᐸᓪᓕᐊᓪᓗᓂ ᐃᓕᓐᓂᐊᕈᑎᑦᑎᐊᕙᖕᓂᑦ, ᐅᑎᖅᑐᖅ ᐃᓕᓐᓂᐊᕐᕕᖕᒧᑦ ᓇᖕᒥᓂᖅ ᐃᓕᑦᑎᔪᒪᓪᓗᓂ.  "ᐃᑉᐱᒍᓱᒃᑐᖓ ᐱᔪᒃᓯᔾᔪᑎᒋᓂᖅᐹᕋ ᐃᓕᓐᓂᐊᕐᓂᓕᕆᓂᓐᓄᑦ ᖁᕕᐊᒋᑦᑎᐊᖅᖢᒍᓗ ᐅᑎᕆᐊᒃᓴᖅ ᓄᓇᕗᒻᒧᑦ ᐃᓕᓴᐃᓗᖓᓗ ᑖᒃᑯᓂᖓ ᒪᒃᑯᒃᑐᓂᑦ, ᐃᓕᓐᓂᐊᕐᕕᐊᕈᓯᖃᕐᓗᖓ, ᐃᓕᓴᐃᔨᐅᓪᓗᖓᓗ ᐃᓕᓐᓂᐊᕐᕕᐊᕈᓯᕐᒥᑦ ᓲᕐᓗ ᐃᓕᓐᓂᐊᕐᕕᖕᒥᑦ... ᑕᒪᓐᓇ ᐃᓱᒪᒋᑐᐃᓐᓇᖅᑕᕋ ᐊᒻᒪᓗ ᑭᓱᓕᒫᑦ ᐅᕙᓐᓂᒃ ᓄᖅᑲᐅᔾᔨᑐᐃᓐᓇᖃᑦᑕᕐᒪᑕ ᐃᓕᓴᐃᔨᕈᕋᓱᐊᖅᑐᓂ," ᒪᑲᓐᔨ ᑎᒧᕋ ᓇᓗᓇᐃᕐᓯᔪᖅ. ᐅᖓᓯᒃᑑᑐᐃᓐᓇᕆᐊᓕᒃ ᐊᖏᕐᕋᒥᓂᒃ, ᑭᓯᐊᓂ ᐆᒻᒪᑎᖓᓂ ᖃᓂᑦᑑᕗᖅ, ᓯᕗᒻᒧᑦ ᐃᖏᕐᕋᓪᓗᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.