ᐊᒃᓱᐊᓗᒃ ᐃᖏᕐᕋᒻᒪᑦ ᐊᒻᒪᓗ ᓱᓕ ᐱᔭᕇᕋᓂ. ᒥᐊᓕ-ᔭᐃᓐ ᕿᙳᐊᔪᐊᖅ 21-ᓂᒃ ᐅᑭᐅᓕᒃ ᐊᒻᒪᓗ ᐃᓄᔾᔪᐊᕐᒥᐅᑕᐅᓪᓗᓂ, ᓄᓇᕕᒻᒥ, ᐃᓅᓚᐅᕋᓗᐊᖅᑎᓪᓗᒍ ᒪᓐᑐᕆᐊᒥ. ᐅᑭᐅᖅᑕᖅᑐᒥ ᐱᙳᐊᖅᑎᐅᓯᒪᓕᖅᑐᖅ ᑕᐃᒪᙵᑦ 2018−ᖑᓚᐅᖅᑎᓪᓗᒍ ᐱᕈᖅᓴᓚᐅᖅᓯᒪᓪᓗᓂᓗ ᐱᙳᐊᕐᓂᕐᒥᒃ. ᕼᐋᑭᖃᑕᐅᕙᒃᑭᓪᓗᓂ ᐊᒻᒪ ᕚᓕᐹᖅᑎᐅᓪᓗᓂ. ᐱᕈᖅᓴᓪᓗᓂ, ᐊᕙᓗᔭᐅᓯᒪᓚᐅᖅᑐᖅ ᒪᒃᑯᒃᑐᓄᑦ ᐱᙳᐊᖃᑕᐅᓪᓚᕆᓚᐅᖅᑐᓄᑦ ᐊᒻᒪᓗ ᐃᓚᐅᖃᑕᐅᕙᓚᐅᖅᑐᖅ ᐊᒻᒪᓗ ᖃᐅᔨᓪᓗᓂ ᖁᕕᐊᒋᑦᑎᐊᓚᐅᖅᑕᖓ ᐱᙳᐊᕐᓂᕐᒥᒃ.

ᐊᓯᒐᓚᖏᑦ ᐱᔭᒃᓴᖏᑦ ᕿᑎᒃᑎᑦᑎᑲᑕᐃᓐᓇᖃᑦᑕᖅᓯᒪᔪᑦ ᑭᓯᐊᓂ ᑭᓱᖃᙱᖦᖢᓂ ᑭᓯᐊᓂ ᖁᔭᓕᔾᔪᑎᖃᖅᑐᖅ ᐱᙳᐊᖅᑎᐅᖃᑎᒥᓄᑦ. "ᖃᐅᔨᒪᙱᑦᑐᖓ ᖃᓄᖅ ᐅᖃᐅᓯᕆᔭᕆᐊᒃᓴᖅ, ᑭᓯᐊᓂ ᐱᙳᐊᖅᑎᐅᑎᓪᓗᖓ ᑕᒪᐅᙵᐅᔾᔨᓚᐅᖅᑐᖅ, ᖁᔭᒋᑦᑎᐊᖅᑕᕋᓗ. ᐃᖏᕐᕋᓂᑦᑎᐊᕙᐅᓵᖅᐳᖅ." ᕿᓄᐊᔪᐊᖅ ᓇᒥᑐᐃᓐᓈᖅᓯᒪᔪᖅ ᓄᓇᕕᒻᒥ, ᓄᓇᑦᓯᐊᕐᒧᑦ ᐊᓛᔅᑲᒧᓪᓗ.

ᕿᓄᐊᔪᐊᖅ ᐱᔪᒃᓯᑎᑕᐅᓚᐅᖅᐳᖅ ᐱᓇᔪᒍᒪᓪᓗᓂ ᐅᑭᐅᖅᑕᖅᑐᒥ ᐱᙳᐊᕐᓂᕆᔭᐅᕙᒃᑐᓂᒃ ᐆᒧᖓ, ᑎᓱᕇ ᑲᒻᐳᕐᑉᔅ, ᑖᓐᓇᓗ ᐅᖃᐅᑎᓚᐅᖅᖢᓂᐅᒃ ᐱᕕᒃᓴᓕᒫᓂᒃ ᓄᒃᑕᕐᓂᐊᕐᓗᓂ ᐊᓯᐊᒍᓪᓗ. ᖃᐅᔨᓚᐅᖅᑐᖅ ᖁᕕᐊᒋᔭᖃᕐᓂᕐᒥᓂᒃ ᐅᑭᐅᖅᑕᖅᑐᒥ ᐱᙳᐊᕐᓂᐅᔪᓂᒃ ᕼᐋᑭᖃᑦᑕᕋᒥ ᐊᒻᒪᓗ ᓴᐱᓕᕈᓐᓇᖅᑐᓂ. ᖁᔭᓕᔪᖅ ᐱᙳᐊᕐᓂᕐᒧᑦ ᐊᒻᒪᓗ ᑲᒻᐳᑉᔅᒧᑦ.

ᐱᙳᐊᖅᑎᐅᓪᓗᓂ, ᐊᒃᓱᕈᕐᓇᖅᑐᒃᑰᖃᑦᑕᖅᐳᖅ. ᕿᓄᐊᔪᐊᖅ ᓂᑲᒍᓱᒃᓗᓂ, ᐃᓱᒪᖓ ᐊᓯᔾᔨᕐᓗᒍ ᑎᒥᖓᓗ. "ᓄᖅᑲᕈᒪᒐᕕᑦ, ᑭᓯᐊᓂ ᖁᕕᐊᒋᔭᐃᑦ, ᐊᔪᕐᓂᐊᕋᕕᑦ," ᐅᖃᐅᓯᖃᖅᑐᖅ, ᓇᓗᓇᐃᖅᓯᓪᓗᓂ ᐊᑲᐅᒃᓴᖏᓐᓂᕐᒥᑦ ᓱᑲᒃᑲᖓᓂᕐᒥᓪᓗ ᐊᑐᖅᓯᒪᔭᖏᓐᓂᑦ ᓱᓇᓪᓗ ᐃᑲᔪᖃᑦᑕᕐᒪᖔᑦ ᐊᓂᒍᐃᓂᕐᒧᑦ.

ᐅᖃᐅᔾᔪᐃᓂᖓ ᒪᒃᑯᖕᓂᖅᓴᓄᑦ ᐃᓄᖕᓄᑦ ᓄᓇᖃᖅᑳᖅᓯᒪᔪᓄᓪᓗ ᐱᙳᐊᖅᑎᓄᑦ ᐃᖏᕐᕋᓯᒋᐊᓵᖅᑐᓄᑦ ᐃᒪᓐᓇᐅᓇᔭᖅᐳᖅ, "ᑲᔪᓯᑐᐃᓐᓇᕐᓂᖅ. ᓇᑦᓴᕐᓂᐊᖅᑐᖅ ᐅᐸᓚᐅᖅᓯᒪᙱᑕᕐᓄᑦ. ᓯᕗᓂᒃᓴᑦᑎᓐᓂ ᐃᓱᒪᒋᒋᐊᕐᓗᒍ, ᓲᖃᐃᒻᒪ ᐱᒋᐊᓵᕈᕕᑦ ᒫᓐᓇ, ᐃᓱᒪᒋᓗᒋᑦ ᐊᕐᕌᒍ ᑕᒪᑐᒪᓂ ᐅᓪᓗᕐᒥ, ᑕᑯᓇᓱᒡᓗᑎᓪᓗ ᖃᓄᑎᒋ ᑎᑭᓯᒪᓕᕐᒪᖔᖅᐱᑦ, ᖃᐅᔨᓇᓱᒡᓗᑎᓪᓗ ᖃᓄᖅ ᐱᐅᓂᖅᓴᐅᖕᒪᖔᑦ, ᑕᑯᓇᒡᓗᒍ ᐱᐅᓯᒋᐊᕈᑎᑎᑦ, ᐊᒻᒪ ᐃᓕᖕᓂᒃ ᐅᐱᒋᕐᔪᐊᕐᓂᐊᖅᖢᑎᑦ. ᒎᓇ ᓇᓪᓕᒋᒐᕕᐅᒃ. ᑲᔪᓯᓗᑎᑦ."

ᐃᒻᒥᓂᒃ ᑲᒪᒋᑦᑎᐊᕈᒪᓗᒍ ᐃᓱᒪᒃᑯᑦ, ᕿᓄᐊᔪᐊᖅ ᑕᐅᑐᒃᐳᖅ ᐊᖏᓂᖅᓴᒥᒃ ᑕᐅᑐᒃᖢᓂ ᑕᐃᑲᓃᓐᓇᓱᒃᖢᓂᓗ, ᐱᕕᒃᓴᖃᖅᑎᖦᖢᒍ ᒪᒥᓐᓇᓱᒃᖢᓂ ᐅᖃᓕᒫᖅᖢᓂᓗ ᐃᓱᒪᒃᑯᑦ, ᑎᒥᒃᑯᑦ ᐃᒃᐱᒋᔭᒃᑯᓪᓗ. ᑎᒥᓂ ᐊᐅᓚᔾᔭᒃᑎᑦᑎᓲᖅ, ᓂᕆᕙᒃᖢᓂ ᓯᓂᑦᑎᐊᖅᐸᒃᖢᓂᓗ ᓄᑭᖏᑦ ᐱᕈᖅᐸᓪᓕᐊᑎᓐᓇᓱᒃᖢᒋᑦ. ᐃᓄᑑᓪᓗᓂ ᐃᓄᑑᓪᓗᓂ ᑭᒡᒐᖅᑐᖃᑦᑕᕐᒥᔭᖓᑦᑕᐅᖅ.

ᑐᕌᒐᒃᓴᖏᑦ ᓯᕗᓂᒃᓴᑦᑎᓐᓄᑦ ᐱᖃᓯᐅᔾᔨᓯᒪᕗᑦ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕕᔾᔪᐊᕐᓂᖅ ᖃᐅᔨᒪᔭᐅᓕᖁᓪᓗᒍ ᑭᒃᑯᓕᒫᓄᑦ ᓯᓚᕐᔪᐊᕐᒥ, ᓂᕆᐅᒍᒪᓪᓗᓂ ᐃᓄᐃᑦ ᖃᐅᔨᒪᓂᐊᕐᒪᑕ ᐊᔾᔨᒌᖏᓐᓂᖏᓐᓂᑦ ᓄᓇᓕᕐᔪᐊᑦ ᐊᒻᒪ ᑲᑎᓯᔪᓐᓇᕐᓂᕐᒥᑦ ᐃᓄᓐᓂᑦ. ᐅᖃᐅᓯᕆᔭᖓ ᓄᓇᒥᓄᑦ ᐊᒻᒪᓗ ᐃᑲᔪᖅᑎᖏᓐᓄᑦ, "ᖁᕕᐊᓱᒻᒪᕆᓐᓂᐊᕋᕕᑦ. ᐊᒥᓱᓂᒃ ᐃᓄᖕᓂᒃ ᑲᑎᖃᑎᖃᕐᓂᐊᕋᔅᓯ..... ᐱᖃᓐᓇᕆᔭᓕᐅᕐᓂᐊᕐᒥᔪᓯᑦᑕᐅᖅ... ᐊᑏ ᑲᔪᓯᓚᐅᕆᑦᑎ..."

ᐃᖏᕐᕋᑦᑎᐊᖅᑐᒻᒪᕆᐊᓗᒃ, ᒥᐊᓕ−ᔭᐃᓐ ᕿᙳᐊᔪᐊᖅ ᐱᙳᐊᖅᑎᐅᔪᒪᔭᒥᓂᒃ ᐱᓇᔪᒃᐳᖅ ᐅᑭᐅᖅᑕᖅᑐᒥ ᐱᙳᐊᕕᒡᔪᐊᖅᑎᓪᓗᒋᑦ. ᐊᓐᓄᕋᐃᑦ ᓄᖅᑲᑎᓚᐅᙱᑕᖓ, ᐃᓛᓐᓂᒃᑯᑦ ᓄᖅᑲᕈᒪᖃᑦᑕᕋᓗᐊᖅᑎᓪᓗᒍ. ᑲᔪᓯᔪᒪᑦᑎᐊᓚᐅᖅᑐᖅ ᐱᙳᐊᕐᓂᕐᒧᑦ ᖁᕕᐊᒋᔭᒥᓂᒃ, ᓇᒧᓕᒫᖅ ᐊᐅᓪᓚᓚᐅᖅᑐᖅ ᖃᐅᔨᓪᓗᓂ ᐊᔪᙱᓐᓂᖓᓂᒃ ᐊᒻᒪᓗ ᐱᐅᓯᕙᓪᓕᐊᖏᓐᓇᖅᖢᓂ ᐱᒡᒎᖕᓂᑕᒫᑦ ᐊᓛᔅᑲᒥᑦ ᓄᓇᑦᑎᐊᒧᑦ ᐊᒻᒪᓗ ᐃᓅᕕᖕᒥᑦ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.