ᓘᒃᑖᖅ ᓯᓐᓇᒃᑑᒪᔪᖅ: Maverick Simba-Canadien−ᑯᑦ ᕿᓂᖅᐳᑦ ᑭᐅᓯᔪᒪᓪᓗᑎᒃ ᐅᑭᐅᖅᑕᖅᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓈᒻᒪᙱᓕᐅᕈᑕᐅᕙᒃᑐᓂᒃ
ᑕᐅᑐᙳᐊᖅᐸᒃᖢᓂ ᑭᐅᓯᔪᒪᓪᓗᓂ ᐅᑭᐅᖅᑕᖅᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓇᓕᒧᒌᙱᓐᓂᕆᔭᐅᔪᓂᒃ, ᐱᒋᐊᖅᐸᓪᓕᐊᓕᖅᐳᖅ ᐊᑯᓂᐊᓗᒃ ᐊᖅᑯᑎᒋᓂᐊᖅᑕᒥᓂᒃ, ᐱᓇᔪᒃᖢᓂ ᐃᓗᐊᖅᓴᐃᕙᖕᓂᕐᒧᑦ ᐃᖅᑲᓇᐃᔮᕆᔪᒪᔭᒥᓂᒃ ᑐᕌᕆᔭᒥᓂᒃ. ᒪᕕᕆᒃ ᓯᒻᐸ−ᑲᓇᐃᑎᐊᓐ ᑲᑭᓴ, ᓄᓇᑦᓯᐊᖅᒥᐅᑕᖅ, ᐱᕈᖅᓴᓂᑰᓪᓗᓂ ᐅᑭᐅᖅᑕᖅᑐᒥ ᐅᑭᐅᓄᑦ ᐱᖓᓱᓄᑦ ᐳᕆᑎᔅ ᑲᓚᒻᐱᐊᒥᐅᑕᐅᓯᒪᓪᓗᓂ. ᒫᓐᓇᓕ, ᓯᓚᑦᑐᓴᕐᕕᔾᔪᐊᕐᒨᕐᓂᐊᓕᕐᒥᔪᖅ ᐃᐊᑦᒪᓐᑕᓐᒧᑦ. ᓄᑲᖅᖡᑦ ᐃᓕᓐᓂᐊᕐᕕᖓᓄᐊᓚᐅᖅᓯᒪᔪᖅ ᑲᑭᓴᒥ, ᐃᓕᓐᓂᐊᕐᕕᐊᓗᖕᒥ ᕗᐊᑦ ᓯᒻᑉᓴᓐᒥ, ᑭᖑᓂᐊᒍᓪᓗ ᐃᓕᓐᓂᐊᕆᐊᓕᓚᐅᖅᓯᒪᓪᓗᓂ ᓚᔅᑐ ᐱ ᐱᐅᓴᓐ ᓯᓚᑦᑐᖅᓴᕐᕕᖓᓂ ᐳᕆᑎᔅ ᑲᓚᒻᐱᐊᒥ. ᑕᐃᑲᙵᑦ ᐃᓕᓐᓂᐊᖅᑕᒥᓂᒃ ᐊᓂᒍᐃᓚᐅᖅᓯᒪᕗᖅ ᐊᒻᒪ ᒪᑭᐅᐊᓐ ᓯᓚᑦᑐᖅᓴᕐᕕᒡᔪᐊᕐᒧᐊᖅᖢᓂ ᐃᓕᑕᕆᔭᐅᔾᔪᑎᑖᖅᖢᓂ ᖃᐅᔨᓴᖅᑐᓕᕆᓂᕐᒥᒃ ᐃᓚᐅᕈᑎᒃᓴᓂᒃ ᐊᒻᒪ ᒥᑭᓐᓂᖅᓴᒥᒃ ᐆᒪᔪᓂᒃ ᖃᐅᔨᓴᖅᑐᓕᕆᓂᕐᒥᒃ.
ᑲᔪᓯᑦᑎᐊᕈᑎᒋᕙᐅᒃ ᖃᑕᙳᑎᖏᑦ, ᐃᒻᒥᓄᑦ ᖃᐅᔨᒪᔭᐅᔪᒪᓂᖓ ᐊᒻᒪ ᐱᔪᒪᓂᕆᔭᖓ ᓘᒃᑖᙳᕈᒪᓪᓗᓂ. ᐃᓱᒪᒋᔭᖓᒍᑦ, ᐋᓐᓂᐊᖅᑐᓕᕆᓂᖅ ᐅᑭᐅᖅᑕᖅᑐᒥ ᐱᐅᙱᒻᒪᑦ ᐊᒻᒪᓗ ᓯᒻᐸ-ᑲᓇᐃᑎᐊᓐ ᐃᓚᖃᓚᐅᕐᒪᑦ ᐊᒃᓱᕈᖅᑎᑕᐅᓚᐅᖅᑐᒥᒃ. "ᐃᑲᔪᕈᒪᒐᒪ ᐊᒻᒪ ᐊᔾᔨᒌᒃᑎᑦᑎᓂᕐᒥᒃ ᐊᑐᐃᓐᓇᖃᖅᑎᑦᑎᓂᕐᒥᒃ ᐃᓄᓕᒫᓄᑦ ᐅᑭᐅᕐᑕᖅᑐᕐᒥ ᐃᓄᐃᑦ ᖃᓪᓗᓈᑦ ᓄᓇᖓᓃᑦᑐᑦ ᐱᓇᔭᖅᑕᖏᓐᓂᒃ," ᐅᓂᒃᑳᖅᑐᖅ. ᐃᓱᓕᑦᑎᕙᓪᓕᐊᓕᖅᑎᓪᓗᒍ ᓯᕗᓪᓕᖅᐹᖓᓂ ᐊᕐᕌᒍᖓᓂ ᑎᓴᒪᓂ ᐊᕐᕌᒍᓂ ᐃᓕᓐᓂᐊᕐᓂᕐᒥ, ᑭᖑᓂᐊᒍᓪᓗ ᓘᒃᑖᖑᓂᕐᒧᑦ ᐃᓕᓐᓂᐊᕆᐊᖃᓕᖅᖢᓂ ᐊᒻᒪᓗ ᒪᕐᕉᖕᓂ ᑎᓴᒪᓂᒡᓘᓐᓃᑦ ᐊᕐᕌᒍᓂ ᓄᓇᖃᕐᓗᓂ, ᓱᓕ ᐱᔭᒃᓴᖃᒻᒪᕆᒃᑐᖅ.
ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐊᐅᓪᓚᖅᐸᓪᓕᐊᔪᓄᑦ ᓄᓇᓕᖏᓐᓂ ᐃᓕᓐᓂᐊᒃᑲᓐᓂᕆᐊᖅᑐᕐᓗᑎᒃ ᐃᒪᓐᓇᐅᕗᖅ, "ᐊᑏ ᐱᔪᒪᔭᑎᑦ ᐱᓇᔪᒡᓗᒋᑦ. ᐊᖏᕐᕋᖅ ᐊᖏᕐᕋᕆᔭᐅᖏᓐᓇᐅᔭᕐᓂᐊᖅᑐᖅ ᐊᒻᒪ ᖃᓄᑐᐃᓐᓇᖅ ᖃᐅᔨᒪᓕᖅᑕᕐᓂᒃ ᐊᒻᒪ ᖃᐅᔨᕙᓪᓕᐊᔭᕐᓂᒃ, ᐊᑐᕈᓐᓇᖅᑕᐃᑦ ᐅᑎᖅᑎᓪᓗᒍᓗ ᓄᓇᓕᔅᓯᓐᓄᑦ ᐃᑲᔪᕐᓗᒋᓪᓗ ᑭᖑᕚᒃᓴᕗᑦ ᐱᓕᕆᕙᓪᓕᐊᑎᓪᓗᒋᑦ."
ᐊᔪᕐᓇᖅᑐᖅᓯᐅᓕᕌᖓᒥ, ᓯᒻᐸ−ᑲᓇᐃᑎᐊᓐ ᓯᕗᓪᓕᖅᐹᖑᕗᖅ ᑭᖑᕚᕇᑦ ᐃᓕᓐᓂᐊᕆᐊᒃᑲᓐᓂᖅᖢᑎᒃ, ᐃᓱᒪᖅᓱᖅᑎᖦᖢᓂᐅᒃ ᐊᖅᑯᓯᐅᖅᑎᖦᖢᓂᐅᒃ ᓇᔭᒥᓄᑦ ᖃᑕᙳᑎᖏᓐᓄᓪᓗ. ᐊᒃᓱᕈᕐᓇᕐᓂᖓ ᐃᒃᐱᒋᕙᐅᒃ ᑭᓯᐊᓂ ᐊᓂᒍᐃᕙᒃᐳᖅ ᐃᓱᒪᓪᓗᓂ ᖃᓄᖅ ᐊᔪᕐᓇᙱᓐᓂᖅᓴᐅᓕᕐᓂᖓᓂᒃ ᓇᔭᒥᓄᑦ ᐊᒻᒪ ᖃᔅᓯᓂᒃ ᐱᕕᒃᓴᖃᕐᓂᐊᕐᓂᖓᓂᒃ. ᐊᒻᒪᓗᑦᑕᐅᖅ, ᖃᐅᔨᒪᕗᖅ ᐊᓯᒥᓂᒃ ᐱᔪᒃᓯᑎᑦᑎᔪᓐᓇᕐᓂᕐᒥᓂᒃ ᐊᑖᑕᖓᑕ ᐅᖃᐅᑎᒑᖓᒥᐅᒃ ᐃᓄᐃᑦ ᐊᐱᕆᐃᓐᓇᐅᔭᕐᒪᑕ ᖃᓄᐃᓕᐅᓚᐅᕐᒪᖔᕐᒥᓂᒃ.
ᓇᓕᒧᒌᒃᑎᑦᑎᔪᒪᓪᓗᓂ ᐃᓱᒪᒥᒍᑦ ᖃᓄᐃᙱᑦᑎᐊᕈᓐᓇᕐᓂᕐᒥᓂᒃ ᖃᓄᐃᙱᑦᑎᐊᕈᓐᓇᕐᓂᕐᒥᒡᓗ ᑕᑕᓗᐊᖅᐸᒃᖢᓂ ᖃᐅᑕᒫᑦ ᐃᓕᓐᓂᐊᖅᐸᒃᖢᓂ, ᐃᒃᓯᕚᖃᑕᐅᕙᒃᖢᓂ ᑲᓇᑕᐅᑉ ᐊᖓᔪᖅᑳᕐᔪᐊᖓᑕ ᒪᒃᑯᒃᑐᓄᑦ ᑲᑎᒪᔨᒋᔭᐅᔪᓄᑦ ᐅᑭᐅᖅᑕᖅᑐᒥᓗ ᒪᒃᑯᒃᑐᓄᑦ ᐱᓕᕆᖃᑎᒌᒃᐸᒃᑐᓄᑦ ᑲᑎᒪᔨᓄᑦ, ᓯᒻᐸ−ᑲᓇᐃᑎᐊᓐ ᐅᑎᕆᐊᕋᓱᒃᐸᒃᐳᖅ ᑲᑎᙵᓕᖅᐸᒃᖢᓂᓗ ᐊᔪᕐᓇᙱᒃᑳᖓᒥ. ᖃᐅᔨᓴᖅᐸᒃᐳᖅ ᐊᕙᑎᒥᒃ ᖃᓄᐃᓕᖓᓂᕆᔭᐅᔪᒥᒡᓗ ᑕᐃᑲᙵᓪᓗ ᐱᓕᕆᐊᖃᖅᐸᒃᖢᓂ ᖃᓄᑐᐃᓐᓇᖅ ᐃᓱᒪᒋᔭᒃᓴᓂᒃ ᓴᖅᑭᑦᑐᖃᕌᖓᑦ ᐅᓪᓗᕆᔭᒥᓂ.
ᐃᓅᓱᒃᑑᓪᓗᓂ ᐃᖅᑭᓕᓐᓄᑦ, ᑲᔪᖏᖅᓴᐃᔾᔪᑎᒋᕙᑉᐸᖓ ᐃᓄᖁᑎᒥᓄᑦ, ᐱᓗᐊᖅᑐᒥ ᐊᓈᓇᑦᑎᐊᖓ. "ᐊᓈᓇᑦᑎᐊᕋ ᐅᕙᓐᓂᒃ ᐊᔭᐅᕆᖏᓐᓇᐅᔭᖅᐳᖅ ᐱᐅᓛᖑᖁᓪᓗᓂᖓ ᐊᒻᒪ ᖃᓄᑐᐃᓐᓇᖅ ᑕᐅᑐᙳᐊᕈᒪᔭᓐᓂᒃ ᐱᓇᔪᖁᔨᓪᓗᓂ, ᐊᒻᒪ ᐃᖅᑲᐃᑎᑦᑎᖏᓐᓇᐅᔭᖅᖢᓂ ᓄᓇᕐᔪᐊᖅ ᐃᓱᓕᑦᑕᕐᕕᒋᒐᒃᑯ ᐊᒻᒪ ᑭᓱᑐᐃᓐᓇᖅ ᐊᓂᒍᖅᑎᒐᒃᓴᐅᔪᓐᓇᕐᒪᑦ ᐃᓱᒪᑦᑎᐊᕈᕕᐅᒃ," ᓯᒻᐸ-ᑲᓇᐃᑎᐊᓐ ᐅᖃᓚᐅᖅᐳᖅ.
"ᐃᖅᑭᓖᑦ ᓴᐱᓕᖅᓴᕋᐃᙱᑦᑎᐊᖅᐳᑦ, ᐊᒃᑐᐊᓂᖃᑦᑎᐊᖅᖢᑎᒃ ᐃᖕᒥᖕᓄᑦ. ᑕᒪᓐᓇ ᐱᔾᔪᑎᒋᓪᓗᒍ, ᐊᒻᒪᓗ ᐊᒃᓱᕈᕐᓇᕐᓂᕆᓚᐅᖅᑕᖏᓐᓄᑦ ᐊᒻᒪᓗ ᐊᕝᕕᐊᕈᑕᐅᕙᒃᑐᓄᑦ ᐊᒻᒪᓗ ᐱᔾᔪᑕᐅᔪᓄᑦ ᑭᖑᕚᕆᓚᐅᖅᑐᓄᑦ, ᐅᕙᓐᓄᑐᐊᖅ ᐃᓄᖁᑎᕗᓄᓪᓗ ᐱᐅᓂᖅᓴᒥᒃ ᐃᓅᓯᖃᖁᓪᓗᑕ ᖃᐅᔨᒪᓂᖏᑎᒍᑦ ᐊᒻᒪᓗ ᐊᑐᖅᓯᒪᔭᖏᓐᓄᑦ ᐅᕙᑦᑎᓐᓄᑦ, ᑕᒪᓐᓇ ᐅᕙᓐᓂᒃ ᑲᔪᖏᖅᓴᐃᒋᕗᖅ, ᑲᔪᖏᖅᓴᐃᓪᓗᓂ ᐅᕙᓐᓂᒃ ᐱᓇᓱᐊᕈᒪᓂᕐᒥᒃ ᐊᒻᒪᓗ ᐃᑲᔪᕈᒪᓪᓗᒋᑦ ᐃᓄᖁᑎᒃᑲ ᐊᑐᐃᓐᓇᖃᑦᑎᐊᕐᓂᖅᓴᐅᖁᓪᓗᒋᑦ, ᐊᔾᔨᒌᒃᑎᑦᑎᓂᕐᒥᒃ ᐊᑐᐃᓐᓇᖃᕐᓂᕐᒥᒃ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᖅᑕᐅᕙᒃᑐᓄᑦ, ᓵᙵᔭᖃᙱᖦᖢᑎᒃ ᐊᑐᖅᑕᐅᕙᒃᑐᓂᒃ ᐃᓅᖃᑎᒥᓂᒃ ᐊᑭᕋᖅᑐᕐᓂᕐᒥᒃ, ᐊᑐᖅᑕᐅᕙᒃᑐᓂᒃ ᐊᔭᖅᑭᑦᑕᕈᑎᓂᒃ, ᑕᒪᓐᓇᓗ ᐅᔾᔨᕐᓇᒻᒪᕆᒃᖢᓂ ᒫᓐᓇ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᖅᑕᐅᕙᒃᑐᓂ ᐅᑭᐅᖅᑕᖅᑐᒥ," ᓯᒻᐸ-ᑲᓇᐃᑎᐊᓐ ᐅᖃᒃᑲᓐᓂᖅᐳᖅ, ᐃᓱᒪᒋᓪᓗᒍ ᓄᓇᓕᒃ 50-ᓂᒃ ᐃᓄᖕᓂ ᓇᑭᙶᖅᓯᒪᓂᖓᓂᒃ.
ᑐᙵᓱᒃᑎᑦᑎᕙᒃᑭᕗᖅ ᐊᖓᔪᖅᑳᖏᑦ, ᐊᓈᓇᖓ ᐃᖅᑲᐃᑎᑦᑎᕙᒃᖢᓂ ᖃᓄᑐᐃᓐᓇᑦᑎᐊᖅ ᐱᓕᕆᔪᓐᓇᕐᓂᕐᒥᓂᒃ ᐊᑖᑕᖓᓗ ᐊᓂᒍᐃᓯᒪᓪᓗᓂ ᐊᔪᕐᓇᖅᑐᖅᓯᐅᕈᑎᒋᔭᒥᓂᒃ, ᑕᑯᑎᖦᖢᓂᐅᒃ ᖃᓄᖅ ᐊᖏᑎᒋᔪᒥᒃ ᐊᓂᒍᖅᑎᑦᑎᔪᓐᓇᕐᒪᖔᑦ ᐃᓱᒪᒥᐅᑕᕆᒍᕕᐅᒃ. ᐊᑖᑕᑦᑎᐊᖓ, ᐊᖓᔪᖅᑳᖑᓪᓗᓂ ᐊᒻᒪ ᓯᕗᓕᖅᑎᐅᓪᓗᓂ ᐅᑭᐅᖅᑕᖅᑐᒥ, ᑲᔪᖏᖅᓴᐃᓚᐅᖅᐳᖅ ᓯᕗᓕᖅᑎᐅᓂᕐᒧᑦ ᓲᕐᓗ ᑲᓇᑕᐅᑉ ᐊᖓᔪᖅᑳᕐᔪᐊᖓᑕ ᒪᒃᑯᒃᑐᓄᑦ ᑲᑎᒪᔨᖏᓐᓂ ᐊᒻᒪ ᐅᑭᐅᖅᑕᖅᑐᒥ ᒪᒃᑯᒃᑐᓄᑦ ᐱᓕᕆᖃᑎᒌᑦ ᑲᑎᒪᔨᖏᓐᓂ ᐊᒻᒪ ᐃᓱᒪᓕᕈᑎᒋᓪᓗᓂᐅᒃ ᒐᕙᒪᓕᕆᔨᙳᕈᒪᓂᕐᒧᑦ ᐃᓕᓐᓂᐊᕐᓂᖓ ᐃᓱᓕᓯᒪᓕᖅᐸᑦ.
ᐃᓱᓕᔾᔪᑎᒋᓗᒍ, ᓯᒻᐸ-ᑲᓇᐃᑎᐊᓐ ᐅᖃᓚᐅᖅᐳᖅ, "ᐅᑭᐅᖅᑕᖅᑐᒥᐅᑕᐅᒐᓗᐊᖅᑎᓪᓗᑕ ᐊᒻᒪ ᐅᖓᓯᖕᓂᖓ ᐊᒃᓱᕈᕐᓇᖅᑑᖅᑰᔨᒐᓗᐊᖅᑎᓪᓗᒍ, ᐊᖏᕐᕋᖅ ᐊᖏᕐᕋᐅᖏᓐᓇᐅᔭᕐᓂᐊᖅᐳᖅ, ᐊᒻᒪ ᐅᑎᕈᓐᓇᐃᓐᓇᐅᔭᖅᖢᑎᑦ ᐱᔭᕆᐊᖃᕈᕕᑦ, ᑭᓯᐊᓂ ᓄᓇᕐᔪᐊᖅ ᐃᓱᓕᑦᑕᕐᕕᖃᖅᐳᖅ, ᐊᒻᒪ ᑭᓱᑐᐃᓐᓇᖅ ᐊᓂᒍᖅᑎᒐᒃᓴᐅᕗᖅ, ᐃᓱᒪᒋᑦᑎᐊᕈᕕᐅᒃ."
ᐃᓅᓯᖅ ᐱᐅᓯᕚᓪᓕᖅᑎᑦᑐᒪᓪᓗᓂᐅᒃ ᐃᓄᖁᑎᒥᓄᑦ, ᒪᕕᕆᒃ ᓯᒻᐸ-ᑲᓇᐃᑎᐊᓐ ᐊᒃᓱᕈᖅᖢᓂ ᐱᓕᕆᕗᖅ ᓯᓚᑦᑐᖅᓴᕐᕕᒡᔪᐊᕐᒥ ᓘᒃᑖᙳᕈᒪᓪᓗᓂ ᖃᖓᑭᐊᖅ ᐱᑕᖃᕈᓐᓃᖅᑎᑦᑎᔪᒪᓪᓗᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓈᒻᒪᙱᓕᐅᕈᑕᐅᕙᒃᑐᓂᒃ. ᐱᔪᒃᓯᑎᑕᐅᓪᓗᓂ ᖃᑕᙳᑎᖏᓐᓄᑦ ᐃᓄᖕᓄᓪᓗ ᐊᒃᓱᕉᑎᖃᖅᓯᒪᔪᓄᑦ, ᐅᑎᖅᑎᑦᑎᔪᒪᕗᖅ ᐊᔪᙱᓐᓂᕐᒥᓄᑦ ᐊᒃᓱᕈᕐᓂᖏᓐᓄᓪᓗ. ᓯᕗᓕᖅᑎᐅᓂᕐᒧᑦ ᐃᖅᑲᓇᐃᔮᖃᖅᐸᒌᖅᑐᖅ ᒪᒃᑯᒃᑑᓪᓗᓂ, ᐱᔪᒪᓂᖃᖅᑐᖅ ᐱᕕᒃᓴᖃᒃᑲᓐᓂᕐᓂᕐᒥᒃ ᓯᕗᓕᖅᑎᐅᓂᕐᒧᑦ ᐊᒻᒪᓗ ᓂᕆᐅᒃᑐᖅ ᐱᕕᒃᓴᖃᓛᕈᒪᓪᓗᓂ ᑕᐃᒪᐃᓕᐅᕈᓐᓇᕐᓂᕐᒥᒃ ᓯᕗᓂᒃᓴᑦᑎᓐᓂ.
ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.
