"ᑭᖑᓂᑦᑎᓐᓂ ᐊᑐᖅᓯᒪᔭᕗᑦ ᓇᒧᙵᐅᕙᓪᓕᐊᔾᔪᑎᒋᕙᒃᐸᕗᑦ," ᐅᖃᓚᐅᖅᐳᖅ ᒥᓯᐅᓪ ᒍᕉᐱᓐ. ᐊᒃᖤᕕᒃ, ᓄᓇᑦᓯᐊᕐᒥ ᓄᓇᖃᖅᓯᒪᓕᖅᑐᖅ ᐅᑭᐅᓄᑦ 30-ᓄᑦ ᑭᓯᐊᓂ ᐱᕈᖅᓴᓂᑰᓪᓗᓂ ᑐᒃᑑᔮᖅᑐᕐᒥ. ᓯᕗᓪᓕᖅᐹᒥ ᐃᖅᑲᓇᐃᔮᕆᓚᐅᖅᓯᒪᔭᖓ ᐊᒃᖤᕕᖕᒥ ᒪᒃᑯᒃᑐᒃᑯᕕᖕᒥ ᐃᑲᔪᖅᑎᐅᓪᓗᓂ ᐱᙳᐊᖅᑐᓕᕆᔨᒃᑯᓐᓂ, ᖁᕕᐊᒋᓚᐅᖅᑕᖓ ᑭᓯᐊᓂ ᐊᓯᐊᓂᒃ ᐆᒃᑐᕈᒪᓕᓚᐅᖅᐳᖅ. ᐱᓇᓱᓚᐅᖅᓯᒪᕗᖅ ᐃᑲᔪᖅᑎᐅᔪᒪᓪᓗᓂ ᑎᑎᕋᕐᕕᖕᒥᓗ ᐊᖓᔪᖅᑳᙳᕈᒪᓪᓗᓂ ᐊᒃᖤᕕᖕᒥ ᐊᖑᓇᓱᒃᑐᓕᕆᔨᒃᑯᑦ ᑲᑎᒪᔨᕋᓛᖏᓐᓄᑦ ᑕᐃᑲᓂᓗ ᐃᖅᑲᓇᐃᔭᖅᓯᒪᓕᖅᖢᓂ ᐊᕐᕌᒍᓄᑦ 13-ᓄᑦ.

ᖄᒃᑲᓐᓂᐊᒍᑦ ᐱᓕᕆᖃᑎᖃᖅᐸᒃᖢᓂ ᐊᖑᓇᓱᒃᑐᓕᕆᔨᒃᑯᑦ ᑲᑎᒪᔨᖏᓐᓂᒃ, ᒍᕉᐱᓐ ᐃᒃᓯᕚᖃᑕᐅᕙᒃᐳᖅ ᐃᓄᕕᐊᓗᐃᑦ ᐆᒪᔪᓕᕆᓂᕐᒧᑦ ᑲᑎᒪᔨᖏᓐᓂᒃ, ᐃᓚᒋᔭᐅᓪᓗᓂ ᐃᓄᕕᐊᓪ ᐊᕕᒃᓯᒪᓂᕐᒥ ᑯᐊᐳᕇᓴᒋᔭᐅᔪᒧᑦ. ᐃᒃᓯᕚᖃᑕᐅᔪᖅ ᐆᒪᔪᓕᕆᓂᕐᒧᑦ ᐊᐅᓚᑦᑎᓂᕐᒧᑦ ᐅᖃᐅᔾᔨᒋᐊᖅᑎᑦ ᑲᑎᒪᔨᖏᓐᓄᑦ, North Slope ᑭᖑᕝᕕᖅᑎᐅᓪᓗᓂ ᐃᓄᕕᐊᓗᖕᓄᑦ ᑭᒡᒐᖅᑐᐃᔨᐅᒋᓪᓗᓂ. ᐃᑲᔪᖃᑦᑕᓚᐅᖅᓯᒪᕗᖅ Shingle Point ᐊᐅᔭᒃᑯᑦ ᐱᙳᐊᕕᒡᔪᐊᕐᓂᕐᓂ, ᐱᙳᐊᖅᑐᓕᕆᓂᕐᒧᑦ ᑲᑎᒪᔨᕋᓛᓂ ᐊᒻᒪ ᓄᓇᓕᖕᓂ ᑲᑐᔾᔨᖃᑎᒌᖑᔪᓂ ᐃᒃᓯᕚᖃᑕᐅᕙᒃᖢᓂ ᐊᒃᖤᕕᖕᒥ ᑭᓯᐊᓂ ᑕᐃᒪᙵᓂ ᐱᓕᕆᐊᒃᓴᒥᓂᒃ ᒥᒃᖠᒋᐊᖅᑎᑦᑎᓯᒪᕗᖅ. ᐃᒐᓂᕐᒥᒃ ᖁᕕᐊᒋᔭᖃᕐᒥᔪᖅ. ᐃᓱᒪᖅᓱᓕᕌᖓᒥ, ᒍᕉᐱᓐ ᖃᑕᙳᑎᒥᓂᒃ ᐱᖃᑎᖃᕈᒪᓲᖑᕗᖅ ᐊᐅᓪᓚᖅᐸᒃᖢᓂᓗ ᕼᐅᔅᑭ ᕆᕗᒧᑦ ᐅᕝᕙᓘᓐᓃᑦ Shingle Point-ᒧᑦ.

ᐃᓕᓐᓂᐊᕐᓂᓕᕆᓂᒃᑯᓪᓕ, ᒍᕉᐱᓐ ᐃᓕᓐᓂᐊᓚᐅᖅᓯᒪᔪᖅ ᒍᕈᓪ ᕼᐋᓪᒥ ᐃᓅᕕᒻᒥ ᐃᓕᓐᓂᐊᕆᐊᖅᓯᒪᓪᓗᓂ ᒍᕋᐃᑦ 12-ᒧᑦ ᑎᑭᑦᑐᒍ. ᐱᓕᕆᖃᑎᖃᖅᖢᓂ ᐱᙳᐊᖅᑐᓕᕆᔨᒃᑯᓐᓂ, ᐊᕐᕌᒍᑕᒫᑦ ᐱᓕᒻᒪᒃᓴᖃᑦᑕᓚᐅᖅᐳᖅ ᒫᓐᓇᓗ ᒫᓐᓇ ᐃᖅᑲᓇᐃᔮᒥᓄᑦ ᑲᑎᖃᑎᖃᖅᐸᒃᖢᓂ ᐊᓯᖏᓐᓂᒃ ᐃᑲᔫᑎᒃᓴᓂᒃ ᐃᓄᖕᓂᒃ ᐊᕐᕌᒍᑕᒫᑦ ᖃᐅᔨᓇᓱᒃᐸᒃᖢᓂ ᑭᓱᑦ ᐃᖏᕐᕋᑦᑎᐊᕐᒪᖔᑕ ᓄᓇᒋᔭᖏᓐᓂ ᐃᓕᑦᑎᖃᑦᑕᐅᑎᕙᒃᖢᓂᓗ. ᑲᑎᒪᕕᒡᔪᐊᖅᑐᖃᓲᖑᕗᖅ ᐊᕐᕌᒍᑦ ᑎᓴᒪᑦ ᐊᓂᒍᕌᖓᑕ ᐃᓄᕕᐊᓗᐃᑦ ᑭᖑᓪᓕᖅᐹᒥᑦ ᐊᖏᕈᑎᖓᑎᒍᑦ ᖃᖓᑦᑎᐊᓵᕐᓗ, ᓵᓚᖃᓚᐅᖅᐳᖅ ᑐᓐᓂᖅᑯᓯᐊᒥᑦ ᐊᒃᓱᕈᖅᖢᓂ ᐱᓕᕆᖃᑦᑕᕐᓂᖓᓄᑦ ᑭᐅᑦᑎᐊᕈᓐᓇᕐᓂᖓᓄᓪᓗ ᐃᓕᑦᑎᒃᑲᓐᓂᓚᐅᖅᖢᓂᓗ ᓄᓇᖃᖅᑳᖅᓯᒪᔪᑦ ᒪᑭᒪᐅᑎᒃᓴᖏᓐᓂᑦ.

ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐊᐅᓪᓚᕆᐊᖃᖅᑐᓄᑦ ᓄᓇᓕᖏᓐᓂ ᖁᑦᑎᖕᓂᖅᓴᒥ ᐃᓕᓐᓂᐊᕆᐊᕐᓗᑎᒃ, ᐃᓕᓐᓂᐊᒃᑲᓐᓂᕐᓂᕐᒧᑦ ᐊᒻᒪ ᐱᓕᒻᒪᒃᓴᕐᓂᕐᒧᑦ ᐃᒪᓐᓇᐅᓇᔭᖅᐳᖅ, "ᐊᑏ." ᐊᒃᖤᕕᖕᒥᐅᑕᐅᓕᖅᖢᓂ ᐊᕐᕌᒍᓂᒃ 30-ᓂᒃ, ᒍᕉᐱᓐ ᑕᑯᓯᒪᕗᖅ ᐃᓚᖏᓐᓂᒃ ᐃᓄᖕᓂᒃ ᕿᒪᐃᓚᐅᖅᓯᒪᙱᑦᑐᓂᒃ ᓄᓇᓕᖕᓂ. ᐅᖃᓚᐅᖅᐳᖅ ᐱᕕᒃᓴᖅᑕᖃᓗᐊᙱᓐᓂᖓᓂ ᓄᓇᓕᕋᓛᖑᓂᖅᓴᓂ ᐊᒻᒪ ᑎᓕᐅᕆᓪᓗᓂ "ᐃᓕᓐᓂᐊᕐᓂᖅ ᐱᐅᓛᖑᕗᖅ... ᐃᓕᓐᓂᐊᕆᐊᓚᐅᕆᑦ, ᓄᓇᕐᔪᐊᖅ ᐃᓕᓐᓂᐊᖅᓯᒪᓂᖅᓴᓂᒃ ᐃᓄᖕᓂ ᐱᔭᕆᐊᖃᖅᐳᖅ." ᑎᓕᐅᕆᕙᒃᐳᖅ ᐃᓄᖕᓂ ᓇᒧᙵᐅᖃᑦᑕᖁᔨᓪᓗᓂ ᐊᒻᒪ ᕿᒥᕐᕈᖁᔨᓪᓗᓂ ᓄᓇᕐᔪᐊᒥ, ᐅᑎᓕᕐᒥᓗᑎᒃ ᐊᒻᒪ ᓄᓇᓕᖓᑦ ᓄᓇᑦᑎᐊᕙᐅᓂᖅᓴᐅᓕᖅᑎᓪᓗᒍ.

ᐃᓱᒪᒋᓪᓗᒍ ᐃᓅᓯᖓ, ᐃᓛᓐᓂᒃᑯᑦ ᒍᕉᐱᓐ ᐅᒡᒍᐊᖅᐸᒃᐳᖅ ᐱᕕᒃᓴᖃᕐᓂᕐᒥᓂᒃ ᖃᓪᓗᓈᓄᑦ ᐃᖅᑲᓇᐃᔭᕆᐊᖅᖢᓂ ᐅᖅᓱᐊᓗᒃᓯᐅᕐᕕᖕᒥ. ᐊᑕᐅᑦᑎᒃᑯᓪᓗ, ᖁᕕᐊᒋᑦᑎᐊᖅᑕᖓ ᐱᓕᕆᐊᒥᓂᒃ ᐅᒃᐱᕈᓱᒃᖢᓂᓗ ᑭᓱᓕᒫᑦ ᑕᐃᒪᐃᓲᖑᓂᖏᓐᓂᒃ ᐱᔾᔪᑎᖃᖅᖢᑎᒃ. ᐃᐊᑦᒪᓐᑕᓐ ᐅᖓᑖᓄᑦ ᐊᐅᓪᓚᖃᑦᑕᕈᒪᓚᐅᖅᑑᒐᓗᐊᖅ ᐃᒻᒪᖄᓘᓐᓃᑦ ᑲᓇᑕᐅᑉ ᓯᓚᑖᓄᑦ.

ᖃᖓᑐᐃᓐᓇᒃᑯᑦ, ᒍᕉᐱᓐ ᐃᖅᑲᓇᐃᔭᙱᖦᖢᓂ ᐊᒻᒪ ᐊᑭᓕᒃᓴᓂᒃ ᐊᑭᓖᔪᓐᓇᐃᓪᓕᓪᓗᓂ. ᐱᓱᒃᖢᓂ ᓂᐅᕕᕐᕕᖕᒧᑦ ᑕᑯᓪᓗᓂᓗ ᐃᖅᑲᓇᐃᔮᒃᓴᒥᒃ ᓴᖅᑭᔮᖅᑎᑕᐅᔪᒥᒃ ᓄᓇᓕᖕᓂ ᑐᓴᒐᒃᓴᑎᒍᑦ, ᒫᓐᓇ ᐃᖅᑲᓇᐃᔮᕆᓕᖅᑕᖓ. ᐃᑲᕐᕌᒃ ᒪᕐᕉᒃ ᐊᒥᐊᒃᑯᖃᑐᐃᓐᓇᓕᕐᒪᑎᒃ ᓴᖅᑭᔮᖅᑎᑕᐅᔪᖅ ᒪᑐᓚᐅᙱᓐᓂᖓᓂ ᐊᖏᕐᕋᒧᑦ ᐅᓪᓚᒃᖢᓂ ᓇᒃᓯᐅᔾᔨᓪᓗᓂᓗ ᐃᖅᑲᓇᐃᔮᕆᖃᑦᑕᖅᓯᒪᔭᖏᓐᓂᒃ ᑎᑎᕋᖅᓯᒪᔪᓂᒃ. ᒪᓕᓚᐅᖅᐳᖅ ᐅᖃᐅᔾᔪᖅᑕᐅᓂᕆᓚᐅᖅᑕᒥᓂᒃ ᐊᐱᖅᓱᖅᑕᐅᓂᕐᒧᑦ, ᐅᐃᒪᔮᙱᓪᓗᓂ, ᐃᒻᒥᓂᙶᕐᓗᓂ ᐊᒻᒪ ᐃᒻᒥᓄᑦ ᓱᓕᑦᑎᐊᕐᓗᓂ. ᖁᕕᐊᓇᖅᐳᖅ, ᖃᐅᔨᒪᓚᐅᖅᐳᖅ ᐃᓄᖕᓂ ᐊᐱᖅᓱᖅᑕᐅᔪᓂᒃ ᖁᖓᑐᐃᓐᓇᖅᐸᒃᖢᓂᓗ ᐃᒡᓚᕈᓘᔭᖅᐸᒃᖢᓂᓗ. ᐅᖃᓚᐅᖅᐳᖅ ᐃᓱᒪᒋᓪᓗᓂᐅᒃ ᐊᑐᖅᓯᒪᔭᖏᑦ ᓄᓇᒥ ᖃᐅᔨᒪᓪᓗᓂᓗ ᐃᖃᓗᒐᓱᖕᓂᕐᒥᒃ ᐊᒻᒪ ᑐᒃᑐᓕᕆᓂᕐᒥᒃ ᑐᑭᖃᖅᐳᖅ ᒎᑎᐅᑉ ᐊᖅᑯᑎᖓᓄᑦ ᑕᒻᒪᙱᑦᑐᒧᐊᖅᑎᖦᖢᓂᐅᒃ ᒫᓐᓇ ᐃᖅᑲᓇᐃᔮᒥᓄᑦ. "ᑭᓱᑐᐃᓐᓇᓂᒃ ᐊᓯᔾᔩᓇᔭᙱᑦᑐᖓ ᑭᓱᑐᐃᓐᓇᒧᑦ," ᖁᕕᐊᓱᒃᑐᖅ.

ᑲᑎᒪᔨᐅᓂᕐᒥᒍᑦ, ᒍᕉᐱᓐ ᐱᐅᔪᓂᒃ ᓴᖅᑭᑎᑦᑎᓇᓱᒃᐸᒃᐳᖅ ᓄᓇᓕᖓᓂ. ᖁᕕᐊᒋᑦᑎᐊᖅᑕᖓ ᓄᓇᖃᖅᑳᖅᑐᑦ ᓴᐳᔾᔭᐅᓯᒪᓂᖏᑦ ᐊᒻᒪ ᐱᐅᖅᓱᐊᖅᑕᐅᓂᖏᑦ, ᐊᔾᔨᒋᔭᐅᙱᖦᖢᓂ ᓄᓇᓕᒋᔭᐅᔪᓄᑦ ᐊᒻᒪ ᓄᓇᒥᒃ ᓴᐳᔾᔨᓂᕐᒧᑦ ᐱᓕᕆᐊᒧᑦ. ᐊᐃᑉᐸᖓ ᓄᓇᒦᖃᑕᐅᕙᒃᐳᖅ ᐃᖅᑲᓇᐃᔮᒥᓄᑦ ᐃᓚᒋᔭᐅᓪᓗᓂ, ᖃᐅᔨᓴᖅᐸᒃᖢᓂ ᐊᕕᒃᓯᒪᓂᕆᔭᐅᔪᒥ ᐊᓕᐊᓇᐃᒋᑦᑎᐊᖅᖢᓂᐅᒡᓗ ᐃᓚᒋᔭᐅᔭᕆᐊᒃᓴᖅ ᐱᓕᕆᖃᑎᒌᒃᑐᓄᑦ.

ᐱᔪᒪᓂᖃᓕᕌᖓᒥ, ᒍᕉᐱᓐ ᐊᖓᔪᖅᑳᒥᓄᑦ ᓵᙵᕙᒃᐳᖅ. ᐊᑖᑕᖓ ᐃᒃᓯᕙᐅᑕᐅᖃᑦᑕᓚᐅᖅᓯᒪᔪᖅ, ᐊᒃᓱᕈᖅᑐᓂ ᐃᖅᑲᓇᐃᔭᖅᑐᓂ ᐃᓄᕕᐊᓗᓐᓄᑦ ᐃᓕᓐᓂᐊᕆᐊᖅᓯᒪᑎᓪᓗᒍ. ᑲᖑᖅᓯᐅᖃᑎᒋᕙᓚᐅᖅᓯᒪᔭᖓ ᐊᑖᑕᓂ ᐅᖃᖅᖢᓂᓗ, "ᐃᓱᒪᔪᖓ ᐃᓅᓯᓐᓂ ᐅᓪᓗᒥ ᐊᑐᓚᐅᖅᓯᒪᔭᓐᓂᒃ ᐊᑖᑕᒐ ᐱᖃᑎᒋᓪᓗᒍ." ᐊᓈᓇᖓ ᐃᓄᓕᕆᔨᐅᓚᐅᖅᑐᖅ ᕗᐊᑦ ᒪᒃᕘᓴᓐᒥᑦ. ᓴᑭᖓ 90-ᓂᒃ ᐅᑭᐅᓕᒃ ᐅᓂᒃᑳᖅᐸᒃᐳᖅ ᓯᓚᑐᔪᓂᒡᓗ ᐅᖃᐅᓯᖃᖅᐸᒃᖢᓂ, ᓲᕐᓗ ᖃᐅᑕᒫᑦ ᓄᑖᓂᒃ ᐃᓕᑦᑎᕙᓪᓕᐊᕙᒃᖢᓂ ᐅᑭᐅᖃᕋᓗᐊᖅᖢᓂ.

ᐅᑎᖅᑎᑦᑎᕙᒃᖢᓂ ᓄᓇᓕᒋᔭᒥᓄᑦ ᐱᓕᕆᓂᕆᕙᒃᑕᒥᒍᑦ ᐊᖑᓇᓱᒃᑐᓕᕆᔨᒃᑯᓐᓂ ᑲᑎᒪᔨᐅᖃᑕᐅᕙᒃᖢᓂᓗ, ᒥᓯᐅᓪ ᒍᕉᐱᓐ ᖃᓄᑐᐃᓐᓇᑦᑎᐊᖅ ᐱᓕᕆᕙᒃᐳᖅ ᐃᓂᒋᔭᒥᓂᒃ ᐱᐅᓂᖅᓴᐅᓕᖅᑎᑦᑎᔪᒪᓪᓗᓂ. ᐊᒃᖤᕕᖕᒥ ᑐᙵᕕᖃᑦᑎᐊᖅᑐᖅ ᐊᕐᕌᒍᑦ 30 ᐅᖓᑖᓄᑦ, ᓄᓇᒥᒃ ᖁᕕᐊᒋᔭᖃᕐᓂᖓ ᑕᑯᒃᓴᐅᕗᖅ ᖃᐅᑕᒫᑦ ᐱᓕᕆᐊᕆᕙᒃᑕᒥᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.