ᐊᓂᒍᐃᓯᒪᓪᓗᓂ ᐋᓐᓂᖅᓯᒪᓂᕐᒥᓂᒃ ᓇᖕᒥᓂᕐᓗ ᐃᓱᒪᒥᒍᑦ, ᓇᔭ ᐱᐅᔅ ᑭᒡᒐᖅᑐᐃᕗᖅ ᓄᓇᕗᒻᒥ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓂᕐᓂ. ᐅᑭᐅᖅᑕᖅᑐᒥ ᐱᙳᐊᕈᓯᕐᓂᒃ ᐱᙳᐊᖃᑕᐅᕙᒃᖢᓂ, ᖃᐅᔨᒪᔭᐅᖕᒥᔪᖅ ᐃᓄᐃᑦ ᐱᙳᐊᕈᓯᖏᓐᓂᒃ, ᑎᓴᒪᒋᓕᖅᑕᖓ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓂᐅᔪᖅ. ᐅᑭᐅᖅᑕᖅᑐᒥ ᐱᙳᐊᕈᓯᑦ ᖃᓄᕈᓘᔭᖅ ᐱᙳᐊᕐᓂᖅᑕᖃᖅᐸᒃᐳᖅ ᐅᑯᓂᖓᓗ ᐃᒡᓗᐃᓐᓇᕐᒧᑦ ᐃᓯᒐᖕᒧᑦ ᐊᕿᓯᓂᖅ, ᒪᕐᕉᒃ ᐃᓯᒐᖕᓄᑦ ᖁᑦᑎᒃᑐᒧᑦ ᐊᕿᓯᓂᖅ, ᐊᓛᔅᑲᒥᐅᑦ ᖁᑦᑎᒃᑐᒥᒃ ᐊᕿᓯᓂᖅ, ᐱᖓᓱᐃᖅᓱᖅᖢᑎᒃ ᕿᒡᒋᖅᑕᕐᓂᖅ, ᖃᒧᑎᒃᑯᑦ ᕿᒡᒋᖅᑕᕐᓂᖅ, ᐃᒡᓗᐃᓐᓇᕐᒧᑦ ᐊᒡᒐᖕᒧᑦ ᐊᒃᑐᖅᓯᓂᖅ, ᑕᓕᒃᑯᑦ ᓄᓱᒃᓯᓂᖅ, ᓰᖅᑯᖓᓗᓂᓗ ᕿᒡᒋᖅᑕᕐᓂᖅ. ᐃᓚᐅᓕᓚᐅᖅᐳᖅ ᐊᓈᓇᓪᓚᑦᑖᖓᑕ ᐱᒋᐊᖅᑎᓚᐅᖅᓯᒪᔭᖓ ᒪᒃᑯᒃᑑᑎᓪᓗᒍ. ᐱᙳᐊᕈᓯᕐᒥᒃ ᖁᕕᐊᒋᔭᖃᒻᒪᕆᓕᓚᐅᖅᐳᖅ ᒫᓐᓇᓗ ᖁᕕᐊᒋᓪᓗᓂᐅᒃ ᐱᙳᐊᕈᑎᒋᕙᒃᖢᓂᐅᒃ. 

ᐃᓄᐃᑦ ᐱᙳᐊᕈᓯᖏᓐᓄᑦ ᑲᑐᑦᔨᖃᑎᒌᑦᑕᖃᕐᒪᑦ ᐱᒋᐊᖅᑎᓚᐅᖅᓯᒪᔭᒥᓂᒃ ᐊᕐᕌᓂ ᐃᒻᒥᓂᑐᐊᖅ, ᐊᓈᓇᖓ ᓇᔭᖓᓗ, ᐊᓯᖏᑦ ᐱᙳᐊᖅᑏᑦ ᐃᓚᐅᓕᓚᐅᙱᓐᓂᖏᓐᓂ. ᐊᔪᕈᓐᓃᖅᓴᕐᓃᑦ ᓵᓚᖃᕋᓱᐊᕐᓂᐅᕗᑦ ᐃᑲᔪᕈᒪᓪᓗᑎᒃ ᑭᒃᑯᓕᒫᓂᒃ ᖃᐅᔨᕚᓪᓕᖁᓪᓗᒋᑦ ᓵᓚᖃᕋᓱᐊᕐᓂᐅᔪᑦ ᖃᓄᐃᓕᖓᓂᐊᕐᒪᖔᑕ. ᑕᐃᒪᐃᓕᐅᖅᐸᒃᐳᑦ ᒪᕐᕈᐃᖅᓱᖅᖢᑎᒃ ᐱᓇᓱᐊᕈᓯᕐᒥ. ᐊᑕᐅᓯᐊᖅᑐᓂ ᒪᕐᕈᐊᖅᑎᖅᑐᓂᓘᓐᓃᑦ ᑕᖅᑭᒥ ᐃᖃᐃᓕᓴᖅᑎᑦᑎᕙᑦᑐᖅ ᐃᓕᓐᓂᐊᕐᕕᒻᒥ, ᐃᓕᓐᓂᐊᖅᑎᑉᐸᑦᑐᒋᑦ ᐃᓄᐃᑦ ᐱᙳᐊᕈᓯᖏᓐᓂᒃ ᐊᒻᒪᓗ ᑎᓕᐅᖅᐸᑦᑐᒋᑦ ᐃᓄᐃᑦ ᐱᙳᐊᕈᓯᖏᓐᓄᑦ ᐅᐸᖃᑦᑕᖁᓪᓗᓂᒋᑦ. ᑕᑯᒃᓴᐅᑎᑦᑎᕙᒃᑭᕗᖅ ᑲᑎᒪᕕᒡᔪᐊᕐᓂᕐᓄᑦ. 

"ᐃᓱᒪᒋᔭᕋ ᐊᖏᓛᖑᖃᑕᐅᔪᖅ ᐅᔾᔨᕐᓇᕐᓂᖅᐹᖅ ᐃᓄᐃᑦ ᐱᙳᐊᕈᓯᖏᓐᓄᑦ, ᐊᑐᖅᓯᒪᔭᒃᑯᑦ, ᐱᖃᓐᓇᕇᖕᓂᕋ ᐱᕈᖅᑎᓚᐅᕋᒃᑯ, ᓇᓂᑐᐃᓐᓇᖅ ᐊᔾᔨᒌᙱᑦᑐᓂ ᓄᓇᓕᕐᔪᐊᓂ, ᐱᙳᐊᖅᑎᓕᒫᓂ ᐱᙳᐊᖃᑕᐅᕙᒃᑐᓂ ᐃᓄᐃᑦ ᐱᙳᐊᕈᓯᖏᓐᓂ, ᐊᒻᒪ ᑐᙵᓇᕐᓂᖓᓂ," ᐱᐅᔅ ᐅᖃᓚᐅᖅᐳᖅ. ᐱᒡᒍᓴᐅᔾᔪᐊᖃᑕᐅᓪᓗᓂ ᖁᑦᑎᒃᑐᒥ ᐃᓄᖕᓂ ᖃᐅᔨᒪᓕᖅᑕᒥᓂᒃ, ᐃᓅᓯᓕᒫᒧᑦ ᐱᖃᓐᓇᕇᓕᖅᐸᒃᐳᑦ. ᖃᐅᔨᒪᓪᓗᓂ ᐱᖃᓐᓇᕆᔭᒥᓂᒃ ᑕᑯᓂᐊᕐᓂᕐᒥᓂᒃ ᐱᙳᐊᕆᐊᖅᑐᖃᑕᐅᓂᖅ ᖁᕕᐊᓇᕐᓂᖅᓴᐅᕗᖅ. 

ᐊᕐᕌᓂ, ᐱᕕᒃᓴᖃᓚᐅᖅᐳᖅ ᑲᒪᔨᐅᓂᕐᒥᒃ, ᑕᒪᓐᓇᓗ ᖃᐅᔨᕚᓪᓕᕈᑎᒋᓪᓗᓂᐅᒃ ᓄᑖᓄᑦ ᐊᑐᕐᓂᑯᓄᑦ. "ᑲᒪᔨᐅᓪᓗᓂ ᐊᔾᔨᒋᙱᑦᑎᐊᕐᒪᒍ ᐱᙳᐊᖅᑎᐅᓪᓗᓂ.... ᐊᓕᐊᓇᐃᒋᑦᑎᐊᖅᑕᕋ ᑲᒪᔨᐅᒋᐊᒃᓴᖅ. ᐊᓕᐊᓇᐃᑦᑎᐊᖅᐳᖅ ᑕᐅᑐᒃᖢᓂ ᐃᑲᔪᖅᖢᓂᓗ ᑖᒃᑯᓂᖓ ᐱᙳᐊᖅᑎᓂᒃ ᐊᒻᒪ ᐊᒃᓱᕈᖅᑎᖦᖢᒋ ᐱᔪᓐᓇᕐᓂᓕᒫᖏᓐᓄᑦ," ᐅᖃᓚᐅᖅᐳᖅ. ᑖᓐᓇ ᑐᕌᒐᕆᒻᒪᒍ ᐱᓐᖑᐊᖅᑎᓪᓗᐊᑕᐅᖃᑕᐅᔪᒪᓪᓗᓂ ᓂᕕᐊᖅᓯᐊᓄᑦ ᐃᓄᐃᑦ ᐱᓐᖑᐊᕈᓯᖏᓐᓄᑦ. ᑖᓐᓇ ᖁᕕᐊᒋᑦᑎᐊᓚᐅᕐᒪᒍ ᐱᓐᖑᐊᖅᑎᐅᒋᐊᔅᓴᖅ. ᓂᕆᐅᒃᐳᖅ ᐱᐅᓯᒋᐊᖅᑎᑦᑎᔪᒪᓪᓗᓂ ᐊᔪᕈᓐᓃᖅᓴᖅᑎᑦᑎᕙᖕᓂᕐᒧᑦ ᐊᔪᕈᓐᓃᖅᑕᐅᕙᒃᑐᓂᒃ ᓯᕗᓂᒃᓴᑦᑎᓐᓂ. 

ᑲᔪᖏᖅᓴᐃᓂᕐᒧᑦ, ᐊᓈᓇᖓᑕ ᐊᓯᐊᒍᑦ, ᓲᓯ, ᑖᓂᑲ ᑕᐃᓗ ᑲᔪᖏᖅᓴᐃᓲᖑᕗᖅ. ᑕᐅᑐᒃᖢᒍ ᑭᒡᒐᖅᑐᐃᑎᓪᓗᒍ ᓄᓇᕗᒻᒥᒃ, ᖃᐅᔨᒪᓪᓗᓂ ᐊᒃᓱᕉᑎᖃᑦᑎᐊᕐᓂᖓ ᐃᖅᑲᓇᐃᔮᒥᓄᑦ ᑖᔅᓱᒥᖓᑎᑐᑦ ᐱᔪᒪᓕᕈᑎᒋᕙᐅᒃ. ᐱᐅᔅ ᑕᑯᓐᓇᕈᒪᔭᖓ. "ᐃᒃᐱᒍᓱᒃᐳᖓ ᑕᐃᒪᙵᑦ ᐊᔪᕈᓐᓃᖅᓴᓕᕌᖓᒪ ᐅᕝᕙᓘᓐᓃᑦ ᐱᙳᐊᖃᑕᐅᔭᕌᖓᒪ ᐃᓄᐃᑦ ᐱᙳᐊᕈᓯᖏᓐᓂᒃ, ᐊᒃᑐᐊᓂᖃᕋᒪ ᐃᓕᖅᑯᓯᓐᓄᑦ, ᓲᖃᐃᒻᒪ ᐱᙳᐊᕈᓯᖅ ᐃᓕᖅᑯᓯᑦᑎᓐᓃᒻᒪᑦ, ᐊᒻᒪ ᐊᔪᕈᓐᓃᖅᓴᐃᓐᓇᐅᔭᖅᖢᑕ," ᐅᖃᖅᑐᖅ.  

ᐊᒃᓱᕈᕐᓇᕐᓂᒃᑯᓪᓕ, ᐱᐅᔅ ᓰᖅᑯᖓᒍᑦ ᐋᓐᓂᓚᐅᖅᐳᖅ, ᑕᒪᓐᓇᓗ ᑭᖑᕙᕆᐊᖅᑎᑦᑎᕐᔪᐊᓚᐅᖅᐳᖅ. ᐊᒃᓱᕈᕋᓱᒃᖢᓂᐅᒃ, ᒪᒥᑎᙱᖦᖢᓂᐅᒃ ᐋᓐᓂᖅᑎᒃᑲᓐᓂᖅᐸᒃᖢᓂᐅᒃ. ᓂᙵᐅᒪᐃᓐᓇᓚᐅᖅᐳᖅ ᐃᓕᑦᑎᔭᕆᐊᖃᓕᖅᖢᓂᓗ ᖃᓄᖅ ᐋᓐᓂᖅᓯᒪᓂᕆᔭᖓ ᒪᒥᓐᓂᐊᕐᒪᑦ ᐊᒻᒪ ᐱᒡᒍᓴᐅᔾᔪᐊᕈᓐᓇᖅᓯᓪᓗᓂ ᐊᒻᒪ ᐱᓕᒻᒪᒃᓴᒃᑲᓐᓂᓕᕐᓗᓂ. ᓱᓕ ᐃᓕᑦᑎᕙᓪᓕᐊᕗᖅ ᖃᓄᖅ ᑎᒥᒥᓂᒃ ᓈᓚᒍᓐᓇᕐᓂᕐᒥᒃ ᓱᒃᑲᐃᒡᓕᕙᓪᓕᐊᓂᕐᒥᒡᓗ. ᐱᓕᕆᐊᖃᖅᐳᖅ ᐃᓱᒪᒃᑯᑦ ᐱᙳᐊᕐᓂᐅᔪᒥ. "ᐃᓕᖕᓂᒃ ᐱᕙᒌᔭᖅᓯᒪᔭᕆᐊᖃᖅᐳᑎᑦ ᐊᒻᒪ ᐃᓕᖕᓂᒃ ᐱᓇᔪᒋᐊᖃᖅᐳᑎᑦ ᐊᓯᓕᒫᖏᓐᓄᑦ ᐱᙳᐊᕈᓯᕐᓄᑦ," ᐅᖃᓚᐅᖅᐳᖅ. ᐃᓱᒪᒥᒍᑦ ᖃᓄᐃᖏᑦᑎᐊᕋᓱᒃᖢᓂ, ᐱᓕᒻᒪᒃᓴᖅᐸᒃᐳᖅ ᐱᔪᓐᓇᕐᓂᓕᒫᒥᓂᒃ ᑭᓯᐊᓂ ᑎᒥᒥᓂᒃ ᓈᓚᒐᓱᒃᐸᒃᖢᓂ ᐱᓕᒻᒪᒃᓴᓗᐊᖁᓇᒍ. ᒪᒥᓴᕆᐊᓲᖑᖕᒥᔪᖅ ᐅᖃᐅᓯᖃᕆᐊᖅᑐᖅᖢᓂ. 

ᐅᖃᐅᔾᔨᒋᐊᕈᑎᒋᔭᖓ ᒪᒃᑯᖕᓂᖅᓴᓄᑦ ᐃᓄᖕᓄᑦ ᐊᒻᒪ ᓄᓇᖃᖅᑳᖅᓯᒪᔪᓄᑦ ᐱᙳᐊᖅᑎᓄᑦ ᐱᒋᐊᓕᓵᖅᑐᓄᑦ ᐱᙳᐊᖅᑐᓕᕆᓂᕐᒥᒃ ᐃᒪᓐᓇᐅᓇᔭᖅᐳᖅ, "ᑲᑉᐱᐊᓱᙱᓪᓗᓯ. ᖁᕕᐊᒋᔭᖃᓪᓚᕆᒃᑯᕕᑦ, ᑲᔪᓯᑎᑐᐃᓐᓇᕐᓗᒍ. ᐃᓱᐊᓂ ᐊᑑᑎᖃᒻᒪᕆᖕᓂᐊᖅᑐᖅ, ᐊᒻᒪᓗ ᖁᕕᐊᓇᒻᒪᕆᖕᓂᐊᖅᑐᖅ ᐃᓕᖕᓂᒃ ᐋᖅᑭᒃᓯᓗᓂ ᓇᖕᒥᓂᖅ ᑐᕌᒐᕆᔭᕐᓂᒃ ᐱᙳᐊᕐᓂᕐᓂ ᖁᕕᐊᒋᑦᑎᐊᖅᑕᕐᓂᒃ."

ᑭᖑᓪᓕᖅᐹᖅ ᐅᖃᐅᓯᒃᓴᖓ ᐅᖃᐅᓯᕆᔪᒪᔭᖓ ᐃᓄᖕᓄᑦ ᑲᑉᐱᐊᓱᒃᑐᓄᑦ ᐳᖅᑐᔪᒥᒃ ᐊᕿᒡᒋᕐᓂᕐᒧᑦ ᐱᙳᐊᕐᓂᐅᔪᒥ ᐃᒪᓐᓇᐅᕗᖅ, "ᐃᓄᑑᓪᓗᓂ ᐱᙳᐊᕐᓂᐅᕗᖅ, ᑭᓯᐊᓂᓗᑦᑕᐅᖅ, ᑐᙵᓇᕐᓂᖅᐹᖑᕗᖅ ᐱᙳᐊᕐᓂᐅᔪᒥ ᐱᙳᐊᕐᓂᐅᔪᒥ. ᐃᓕᑐᐊᕈᕕᑦ ᐃᓪᓗᐃᓐᓇᕐᒧᑦ ᐃᓯᒐᓐᓄᑦ ᐳᖅᑐᔪᒥᒃ ᐊᕿᒋᐊᕐᓂᕐᒥᒃ, ᒪᕐᕉᓐᓂᒃ ᐃᓯᒐᓐᓂᒃ ᐳᖅᑐᔪᒥᒃ ᐊᕿᓯᓂᕐᒥᒃ, ᐊᒻᒪᓗ ᐃᓱᒪᒃᑯᑦ ᑕᖃᐃᖅᓯᓂᕐᒥᒃ, ᐅᖓᑖᓅᕈᓐᓇᕋᕕᑦ ᐊᒻᒪᓗ ᐊᒥᓱᐊᓗᓐᓂᒃ ᐱᙳᐊᖅᑎᖃᕋᑦᑕ ᓄᓇᕘᒥ, ᑕᐃᒪᐃᒐᔪᓐᓂᖅᓴᐅᑎᒐᓱᐊᑐᐃᓐᓇᖅᑐᒋᑦ. ᐊᖏᔪᐊᓘᔪᓐᓇᖅᐳᒍᑦ ᑕᐱᕇᖑᓗᑕ, ᐊᒻᒪ ᐊᔪᙱᓛᖑᔪᓐᓇᖅᖢᑕ."

ᐋᓐᓂᖅᓯᒪᓂᕐᒥᓂᒃ ᐊᓂᒍᐃᕙᓪᓕᐊᓪᓗᓂ ᐊᒻᒪ ᓇᖕᒥᓂᖅ ᐃᓱᒪᒥᒍᑦ, ᓇᔭ ᐱᐅᔅ ᐊᒃᓱᕈᑦᑎᐊᖅᐳᖅ ᐱᔪᓐᓇᕐᓂᓕᒫᒥᓂᒃ ᐱᓕᕆᔪᒪᓪᓗᓂ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒥ. ᐱᔪᒪᓂᖃᑦᑎᐊᖅᖢᓂ ᑲᒪᔨᐅᓂᕐᒥᒃ, ᓵᓚᖃᕋᓱᐊᕐᓂᕐᒥᒃ ᐊᒻᒪ ᐱᙳᐊᕈᓯᕐᒥᓂᒃ ᐱᕈᖅᑎᑦᑎᕙᓪᓕᐊᓂᕐᒥᒃ, ᒪᓕᒃᐳᖅ ᑐᒥᖏᓐᓂᒃ ᐱᙳᐊᖅᑎᓂᒃ ᑖᓂᑲ ᑕᐃᓗᒥᒃ. ᐋᖅᑭᒃᓱᐃᕙᓪᓕᐊᓪᓗᓂ ᐃᓄᐃᑦ ᐱᙳᐊᕈᓯᖏᓐᓂᒃ ᑲᑎᙵᖃᑎᒌᓂᒃ, ᐋᖅᑭᒃᓱᐃᕙᓪᓕᐊᕗᖅ ᓄᓇᓕᖕᓂ ᐱᙳᐊᖅᑎᓂᒃ ᑲᔪᖏᖅᓴᐃᔪᒪᓪᓗᑎᒃ ᐃᑲᔪᖅᑐᐃᖃᑦᑕᐅᑎᔪᒪᓪᓗᑎᒡᓗ ᐱᙳᐊᕈᓯᕐᒥᒃ ᖁᕕᐊᒋᑦᑎᐊᖅᑕᒥᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.