ᓈᓐᓯ ᖃᕆᑕᖅ-ᓕᓐᑎᐅᓪ ᐊᖓᔪᖅᑳᕆᔭᐅᔪᖅ ᐃᓄᐃᑦ ᓯᓚᕐᔪᐊᕐᒥ ᑲᑎᒪᔨᖏᓐᓄᑦ ᑲᓇᑕᒥ ᐊᒻᒪᓗ ᓯᕗᓪᓕᖅᐸᐅᓪᓗᓂ ᒪᓕᒐᓕᐅᖅᑎᕐᔪᐊᖑᓚᐅᖅᓯᒪᔪᖅ ᓄᑖᒧᑦ ᓂᕈᐊᖅᑕᐅᕕᒻᒧᑦ ᓄᓇᕗᒻᒥ 1997-ᒥ. ᓂᕈᐊᖅᑕᐅᒃᑲᓐᓂᓚᐅᖅᑐᖅ ᒪᕐᕈᐃᖅᖢᓂ, ᒥᓂᔅᑕᐅᓪᓗᓂ ᓄᓇᒥᙶᖅᓯᒪᔪᓕᕆᔨᒃᑯᓐᓄᑦ, ᐃᒃᓯᕙᐅᑕᐅᓪᓗᓂ ᑲᑎᒪᔨᕋᓛᓄᑦ ᓄᓇᖃᖅᑳᖅᓯᒪᔪᓕᕆᓂᕐᒧᑦ ᐅᑭᐅᖅᑕᖅᑐᒥᓪᓗ ᐱᕙᓪᓕᐊᑎᑦᑎᓂᕐᒧᑦ, ᐃᓚᒋᔭᐅᓪᓗᓂᓗ ᐃᒪᕐᒥᐅᑕᓕᕆᔨᒃᑯᓐᓄᑦ ᐊᕐᕌᒍᓄᑦ 11-ᓄᑦ ᒪᓕᒐᓕᐅᖅᑎᐅᓕᖅᖢᓂ. ᐱᓕᕆᒃᑲᒻᒪᕆᐅᓂᖓ ᐊᒃᓱᕈᕐᓇᖅᑑᕗᖅ ᓯᕗᓪᓕᕐᓂᑦ ᐊᕐᕌᒍᓂᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓂᑦ.

ᒥᔅ ᖃᕆᑕᖅ−ᓕᓐᑎᐅᓪ ᐃᓅᓚᐅᖅᓯᒪᔪᖅ ᐱᕈᖅᓴᓪᓗᓂᓗ ᒥᑭᑦᑐᒥ, ᖃᓂᑦᑐᒥ ᓄᓇᓕᖕᓂ ᐊᕐᕕᐊᓂ (ᐊᑦᑎᖅᑕᐅᒃᑲᓐᓂᖅᖢᓂ ᖃᓪᓗᓈᖑᖃᑎᒌᙱᑦᑐᓄᑦ) 1950−ᖏᓐᓂ ᐊᒻᒪ 60−ᖏᓐᓂ. ᓄᓇᓕᓐᓂ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᒍᕋᐃᑦ 8-ᒧᑦ, 14-ᓂᒃ ᐅᑭᐅᖃᓕᖅᑎᓪᓗᒍ ᐃᓕᓐᓂᐊᕐᕕᐊᓗᒻᒨᕆᐊᖃᓚᐅᖅᑐᖅ ᔨᐊᓗᓇᐃᒥ, 1,000 ᑭᓛᒥᑕᓂᒃ ᐅᖓᓯᓐᓂᖃᑦᑐᒥᒃ ᐊᖏᕐᕋᒥᓂᒃ. "ᐃᓅᓯᕋ ᓄᓇᓕᕋᓛᒥ ᐊᑐᖅᑕᐅᓚᐅᖅᐳᖅ ᐊᒃᑐᐊᓂᖃᙱᖦᖢᓂ ᓯᓚᑖᓂ ᓄᓇᕐᔪᐊᕐᒧᑦ, ᐊᐅᓪᓚᖅᓯᒪᓪᓗᖓᓗ ᐊᓯᐊᓄᑦ ᐃᓄᖕᓄᑦ."

ᐊᒃᓱᓪᓕ, ᒪᒃᑯᒃᑐᖅ ᓈᓐᓯ ᖁᕕᐊᒋᔭᖃᓚᐅᖅᑐᖅ ᐃᓕᓐᓂᐊᖅᖢᓂ, ᐊᒻᒪ ᐅᓄᙱᓗᐊᕐᓂᖏᓐᓄᑦ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐊᓂᒍᐃᔪᑦ ᓄᓇᒥᓂ, ᑎᑭᐅᑎᔪᒪᓪᓚᕆᓚᐅᖅᐳᖅ ᑐᕌᒐᕆᔭᐅᔪᒧᑦ. ᑭᓯᐊᓂ ᓯᕗᓪᓕᖅᐹᒥ ᐊᕐᕌᒍᒥ ᔨᐊᓗᓇᐃᒥ ᐃᓄᑑᓗᐊᓚᐅᕐᒪᑦ, ᒐᕙᒪᒃᑯᑦ ᑕᐃᒃᓱᒪᓂ ᐃᓕᓐᓂᐊᖅᑏᑦ ᐊᖏᕐᕋᕈᓐᓇᑎᑦᑎᓚᐅᖏᒻᒪᑕ ᕿᑲᕆᐊᕐᓗᑎᒃ ᐅᕝᕙᓘᓐᓃᑦ ᐅᑭᐅᒃᑯᑦ ᓄᖅᑲᖓᑲᐃᓐᓇᕐᓗᑎᒃ. "ᐊᒃᓱᕈᕐᓇᖅᑐᒻᒪᕆᐅᓚᐅᖅᑐᖅ. ᐃᓕᓐᓂᐊᕆᐊᓚᐅᖅᓯᒪᒐᕕᑦ ᓯᑎᐱᕆᒥ ᐊᖏᕐᕋᓚᐅᖅᖢᑎᓪᓗ ᔫᓂᒥ." ᑕᒪᓐᓇ ᐃᓚᒋᔭᐅᑐᐃᓐᓇᓚᐅᖅᑐᖅ ᐊᒥᓱᓄᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓄᑦ ᓱᕈᓯᕐᓄᑦ ᐊᒻᒪᓗ ᐃᓚᖏᓐᓄᑦ.

ᐊᕐᕌᒎᒃ ᒪᕐᕉᒃ ᐊᓂᒍᖅᑎᓪᓗᒋᑦ ᔭᓗᓇᐃᒥ, ᓈᓐᓯᐅᑉ ᐊᒃᑲᖓ ᑎᓕᐅᕆᓚᐅᖅᐳᖅ ᐃᓚᐅᖁᓪᓗᒍ ᐋᑐᕚᒥ ᐱᔭᕇᖅᓯᖁᓪᓗᒍ ᖁᑦᑎᖕᓂᖅᓴᒥᒃ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑕᒥᓂᒃ. "ᐃᓱᒪᒋᔭᕋ ᐊᑐᖁᓪᓗᓂᖓ ᐊᖏᓂᖅᓴᒥᒃ, ᐱᕕᒃᓴᒃᑲᓐᓂᕐᓂᒃ."

ᐱᕕᒃᓴᑦᑎᐊᕙᐅᑎᓪᓗᒍ ᐊᕐᓇᒧᑦ ᐅᑭᐅᖅᑕᖅᑐᒥ ᓄᓇᓕᖕᓂ ᓄᓇᖃᖃᑕᐅᓗᓂ ᓇᓂᑭᐊᖅ ᐊᖏᔪᒻᒪᕆᐊᓘᓪᓗᓂ ᐱᓕᕆᐊᒃᓴᖃᕐᔪᐊᖅᖢᓂᓗ ᐋᑐᕚᒥ, 1,200 ᑭᓚᒦᑕᓂᒃ ᐅᖓᓯᒃᑎᒋᓚᐅᖅᐳᖅ ᐊᖏᕐᕋᒥᓂᒃ. "ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐊᓂᒍᐃᑎᓪᓗᖓ, ᐅᑭᐅᓄᑦ 7-ᓄᑦ ᐊᐅᓪᓚᖅᓯᒪᓕᕋᒪ." ᓈᓐᓯ ᑲᓱᒃᑲᓐᓂᕆᐊᖃᓕᓚᐅᖅᑐᖅ, ᐊᕐᕌᒍᒧᓪᓗ ᐅᑎᖅᖢᓂ ᐊᕐᕕᐊᓂᑦ ᐃᖅᑲᓇᐃᔭᖅᖢᓂ ᐃᓄᐃᑦ ᐃᓕᖅᑯᓯᓕᕆᕝᕕᐊᓂᑦ. ᑭᓯᐊᓂ ᐃᓕᓐᓂᐊᕕᔾᔪᐊᒦᖏᓐᓇᓚᐅᖅᑐᖅ, ᓈᓐᓯ ᐅᑎᓚᐅᖅᑐᖅ ᐋᑐᕚᒧᑦ ᐊᕐᕌᒍᒃᑲᓐᓂᕐᒧᑦ ᐃᓕᓐᓂᐊᕐᓂᖓᓄᑦ (ᐋᓐᑎᐅᕆᔫᒥ ᐱᔭᕇᖅᓯᓚᐅᖅᑐᖅ ᐱᔭᕇᖅᓯᓂᕐᒥᑦ ᖁᕝᕙᓯᓐᓂᓕᒻᒥᑦ 13 ᑕᐃᒃᑯᓄᖓ ᓯᓚᑦᑐᓴᕐᕕᕐᔪᐊᕐᒨᕈᒪᔪᓄᑦ). ᐊᒻᒪᓗ ᐃᓕᓐᓂᐊᕆᐊᓯᑦᑕᖅᑯᖅ ᑐᕆᓐᑦ ᐃᓕᓐᓂᐊᕐᕕᔾᔪᐊᖓᓂ. "ᐱᐊᓂᒋᐊᖃᕋᓱᒋᓚᐅᙱᑕᕋ ᐱᔭᕇᕆᐊᖃᖅᑕᓐᓂᒃ, ᐅᑎᓕᓚᐅᖅᐳᖓ ... ᑕᐃᒪᐃᒻᒪᑦ ᐱᔭᕇᖅᓯᔪᓐᓇᖅᐳᖓ ᐊᒥᓱᓂᒃ ᐃᓄᓐᓂᒃ ᐱᔭᒃᓴᖃᓚᐅᙱᑦᑐᓂᒃ. ᑕᐃᒪᓐᓇᓗ ᐅᒃᐱᕈᓱᓕᓚᐅᖅᑐᖓ ᖃᓄᐃᓕᐅᕈᒪᔭᓐᓂᒃ, ᐅᖃᐅᔾᔪᖅᓱᖅᑕᐅᔭᕆᐊᖃᓚᐅᖅᑐᖓ."

ᐱᔭᕇᓚᐅᖅᑎᓪᓗᒍ, ᓈᓐᓯ ᐅᑎᓚᐅᖅᑐᖅ ᐊᕐᕕᐊᓄᑦ ᐱᐅᕆᒧᑦ ᐃᓚᒥᓄᓪᓗ ᐱᒋᐊᖅᑐᓂ. ᓂᐸᐃᑦᑐᒥᒃ ᐃᓂᓪᓚᓐᓂᐊᓚᐅᖅᑐᖅ, ᑭᓯᐊᓂ ᐊᑐᖅᓯᒪᔭᒻᒪᕆᖏᑦ ᓄᓇᓕᓐᓂ ᓯᕗᓕᖅᑎᓅᕈᒪᓂᖃᓚᐅᖅᑐᖅ. "ᐅᕙᑦᑎᓐᓂᒃ ᒥᑭᓪᓕᑎᑦᑎᒐᔪᒃᐳᒍᑦ," ᐅᖃᖅᖢᓂ ᐅᖃᖅᖢᓂ. "ᐅᖃᐅᔾᔨᖃᑦᑕᓚᐅᖅᑐᖓ ᐃᓄᖕᓂᒃ, 'ᖃᐅᔨᒪᙱᑦᑐᖓ ᖃᓄᖅ ᑕᐃᒪᐃᓕᐅᕆᐊᒃᓴᖅ, ᑲᑎᒪᔨᕋᓛᖑᖃᑕᐅᓚᐅᖅᓯᒪᙱᑦᑐᖓ. ᑲᑎᒪᔨᐅᓚᐅᖅᓯᒪᙱᑦᑐᖓ.'" ᑭᓯᐊᓂ ᐃᓚᖓᑦ ᓄᓇᓕᓐᓂ ᐃᓐᓇᑐᖃᖅ ᐊᔭᐅᖅᓯᓚᐅᖅᐳᖅ ᐃᓕᑕᖅᓯᖁᔨᓪᓗᓂ ᑭᓱᓕᒫᓂᒃ ᐊᑐᐃᓐᓇᐅᑎᑕᖏᓐᓂᑦ. "ᐅᕙᓐᓄᑦ ᐅᖃᖅᖢᓂ, 'ᐊᓯᐊᓂᒃ ᐃᓱᒪᒋᔭᖃᕋᕕᑦ, ᓄᓇᑦᑕ ᓯᓚᑖᓃᓕᕋᕕᑦ, ᐊᓂᒍᐃᓚᐅᖅᐳᑎᑦ, ᐃᓕᓐᓂᐊᕐᕕᒃᑰᕆᐊᖃᓚᐅᖅᐳᑎᑦ.'" ᑎᓕᐅᕆᓚᐅᖅᑐᖅ ᐃᒃᓯᕚᖃᑕᐅᖁᓪᓗᒍ ᐃᓕᓐᓂᐊᖅᑐᓕᕆᓂᕐᒧᑦ ᑲᑎᒪᔨᕋᓛᓄᑦ, ᖁᕕᐊᒋᒻᒪᕆᓚᐅᖅᑕᖓ, ᓂᕈᐊᖅᑕᐅᓇᓱᐊᒃᑲᓐᓂᓕᓚᐅᕐᒥᔪᖅ ᑭᖑᓪᓕᕐᒥ ᓂᕈᐊᖅᑐᖃᓕᕐᒥᑉᐸᑦ. ᐊᒻᒪᓗ ᓵᓚᖃᖅᑐᓂ. ᐊᒻᒪᓗ ᓂᕈᐊᖅᑕᐅᓇᓱᐊᒃᑲᓐᓂᓕᓚᐅᕐᒥᔪᖅ ᐊᒻᒪᓗ ᐊᒥᓱᒃᑲᓂᕐᓂᒃ ᐃᖅᑲᓇᐃᔭᖃᖅᑐᓂ ᓄᓇᓕᖅᐸᐅᔭᖓᓂ, ᓯᕗᓕᖅᑎᐅᓪᓗᓂ ᑲᓇᑕᐅᑉ ᒐᕙᒪᒃᑯᖏᓐᓄᑦ ᑭᒡᒐᖅᑐᖅᑎᐅᓂᕐᒧᑦ ᓄᓇᕗᓕᒫᒧᑦ, ᒪᓕᒐᓕᐅᖅᑎᕐᔪᐊᖑᓂᕐᒧᑦ ᓄᓇᕗᒻᒧᑦ.

"ᐅᔾᔨᕈᓱᓚᐅᖅᑐᖓ, ᐊᑖᑕᒐ ᐸᓖᓯᒃᑯᓐᓄᑦ ᐊᓈᓇᒐᓗ ᑐᒃᓯᐊᕐᕕᖕᒦᖦᖢᓂ, ᐊᖓᔪᖅᑳᕗᑦ ᐃᑲᔪᐃᓐᓇᖃᑦᑕᓚᐅᕐᓂᖏᓐᓂᒃ ᐃᓄᖕᓂᒃ. ᐊᒻᒪ ᓇᓗᓇᙱᑦᑐᖅ ᐃᓕᓐᓂᐊᖅᑎᑦᑎᓚᐅᖅᐳᑦ ᑖᒃᑯᓂᖓᑦᑕᐃᓐᓇᖅ ᐱᒻᒪᕆᐅᒋᔭᐅᔪᓂᒃ ᐃᑲᔪᕆᐊᖃᖅᑕᑦᑎᓐᓂᒃ ᐊᔪᖅᓴᖅᑐᓂᒃ ᐅᕙᑦᑎᓐᓂ."

ᒥᔅ ᖃᕆᑕᖅ-ᓕᓐᑎᐅᓪ ᐃᓕᓴᖅᓯᕗᖅ ᐊᖓᔪᖅᑳᖏᑦ ᐱᔪᒃᓯᑎᑦᑎᓚᐅᕐᓂᖏᓐᓂᒃ ᓄᓇᓕᖕᒥᓂ ᐃᓚᐅᓂᕆᕙᒃᑕᒥᓂᒃ, ᑭᓯᐊᓂᓗᑦᑕᐅᖅ ᐊᒃᓱᕈᖅᑐᒻᒪᕆᐅᓪᓗᑎᒃ ᐊᑐᖃᑦᑕᖅᓯᒪᔭᒥᑎᒍᑦ ᐊᒃᓱᕈᖅᑎᑕᐅᓪᓗᑎᒃ ᐊᑐᖅᑕᐅᕙᒃᑐᑎᒍᑦ ᑐᕌᕆᔭᖃᖅᖢᑎᒃ ᐱᔪᒃᓯᑎᑦᑎᔪᒪᓪᓗᑎᒃ ᓄᓇᖃᖅᑳᖅᑐᑦ ᐃᓕᖅᑯᓯᑐᖃᖏᓐᓂᒃ. "ᐅᖃᐅᔾᔭᐅᓚᐅᖅᑐᑦ ᓇᒧᑦ ᕿᑐᕐᖓᒥᓂᒃ ᐃᓕᓐᓂᐊᕆᐊᖅᑎᑦᑎᔭᕆᐊᖃᕐᒪᖔᑕ. ᐅᖃᐅᔾᔭᐅᓚᐅᖅᐳᑦ ᖃᓄᖅ ᐅᖃᐅᓯᖃᕐᒪᖔᑕ ᕿᑐᕐᖓᖏᑦ. ᐅᖃᐅᓯᒃᓴᖃᓪᓚᕆᓚᐅᙱᑦᑐᑦ... ᐊᓈᓇᒐ ᐃᑲᔪᐃᓐᓇᖅᐸᓚᐅᕐᒪᑦ ᐊᕐᓇᓂᒃ ᐊᒻᒪᓗ ᓂᐱᒋᔭᐅᓪᓗᓂ ᑕᐃᒃᑯᓄᖓ... ᐅᔾᔨᕈᓱᓚᐅᖅᑐᖓᓗ [ᓂᐱᖃᖅᑐᖓ] ᓂᐱᖃᕈᓐᓃᖅᑐᖓ ᑕᐃᒃᑯᓄᖓ ᐃᓄᖕᓄᑦ ᓂᐱᖃᓚᐅᙱᑦᑐᓄᑦ."

ᒪᓕᒐᓕᐅᖅᑎᐅᓪᓗᓂ ᓄᓇᕗᒻᒧᑦ, ᒥᔅ ᖃᕆᑕᖅ-ᓕᓐᑎᐅᓪ ᐱᖓᓱᓂᒃ ᑲᑎᒪᔨᐅᕝᕕᖃᓚᐅᖅᐳᖅ, ᐳᓛᕆᐊᖅᖢᓂᓗ ᓄᓇᓕᓕᒫᓄᑦ ᓄᓇᕗᒻᒥ ᖃᐅᔨᒪᑦᑎᐊᕈᒪᓂᕐᒥᓄᑦ ᑕᒻᒪᖅᑕᙱᓪᓗᓂ ᑭᒡᒐᖅᑐᐃᒐᓗᐊᕐᒪᖔᑦ 1.9 ᒥᓕᐊᓐ−ᓂᒃ ᑭᑉᐹᕆᒃᑐᓂᒃ ᑭᓗᒦᑕᓂᒃ.

ᒥᔅ ᖃᕆᑕᖅ-ᓕᓐᑎᐅᓪ ᐅᐃᒥᓂᒃ ᐊᓯᐅᔨᓚᐅᕐᒪᑦ ᐆᒻᒪᓯᕆᓪᓗᓂ ᐊᕐᕌᒎᒃ ᒪᕐᕉᒃ ᑐᖔᓂ ᓯᕗᓪᓕᖅᐹᒥ ᑲᑎᒪᔨᐅᓂᕐᒧᑦ. ᐅᐃᖃᕈᓐᓃᖅᑐᖅ ᐊᒻᒪ ᐊᐃᑉᐸᖃᙱᑦᑐᖅ ᐊᓈᓇᐅᔪᖅ ᑎᓴᒪᓄᑦ ᕿᑐᕐᖓᓕᖕᓄᑦ, ᐃᖅᑲᐅᒪᔪᖅ, "ᐊᒃᓱᕈᕐᓇᓛᖑᖅᑰᓚᐅᖅᑐᖓ ᐃᓅᓯᓐᓂ ᐃᓱᒪᓕᐅᕆᐊᖃᓚᐅᖅᓯᒪᕗᖓ: ᐃᖅᑲᓇᐃᔮᓐᓃᖏᓐᓇᕐᓂᐊᕋᓗᐊᕈᒪ ᓄᖅᑲᕐᓗᖓᓘᓐᓃᑦ ᐊᖏᕐᕋᕐᓗᖓᓗ."

ᕼᐆᑦᐳᐊᓐ ᑭᓯᐊᓂ ᖃᐅᔨᓚᐅᖅᑐᖅ − ᐃᑲᔪᖅᑕᐅᓪᓗᓂ ᖃᑕᙳᑎᖏᓐᓄᑦ, ᐃᖅᑲᓇᐃᔭᖃᑎᖏᓐᓄᑦ, ᓄᓇᓕᖏᓐᓄᓪᓗ − ᖃᕆᑕᖅ−ᓕᓐᑎᐅᓪ ᑲᑉᐱᐊᓱᙱᖦᖢᓂ ᑲᔪᓯᓪᓗᓂ ᐱᒻᒪᕆᐅᔪᒥᒃ ᐃᖅᑲᓇᐃᔮᖓᓂᒃ. "ᕿᑐᕐᖓᒃᑲ ᖃᐅᔨᒪᖁᓚᐅᖅᐸᒃᑲ ᖃᓄᑐᐃᓐᓇᖅ ᐃᓅᓯᖅ ᐃᒋᑕᐅᒐᓗᐊᖅᐸᑦ ᐅᕙᑦᑎᓐᓄᑦ, ᐊᐃᒃᖠᕆᐊᖃᕋᑦᑕ ᑲᔪᓯᓗᑕᓗ."

ᒥᔅ ᖃᕆᑕᖅ-ᓕᑎᐅᓪ ᑐᑭᓯᐅᒪᔪᖅ ᓯᕗᓪᓕᖅᐹᒥᒃ ᐊᓂᒍᐃᔪᓐᓇᕐᓂᐊᕈᕕᑦ ᑲᔪᓯᑦᑎᐊᕐᓂᐊᕈᕕᓪᓗ, ᖃᐅᔨᒪᐃᓐᓇᕆᐊᖃᕋᕕᑦ. ᑕᑯᔪᖅ ᑐᓴᕈᒥᓇᖅᑐᒥᒃ ᕿᑐᕐᖓᖏᓐᓄᑦ, ᐃᕐᖑᑕᖏᓐᓄᑦ, ᐊᒻᒪᓗ ᐃᓅᓱᒃᑐᓄᑦ ᐅᓪᓗᒥ, ᓇᓗᓇᐃᒃᑯᑕᐅᓪᓗᓂ ᓄᓇᕗᑦ ᓇᓗᓇᐃᒃᑯᑕᖓᓂᒃ: "ᓇᓗᓇᐃᒃᑯᑕᖅ ᓄᓇᕗᑦ ᒐᕙᒪᒃᑯᖏᓐᓄᑦ ᓇᓄᕐᒧᑦ ᓯᕗᒧᑦ ᐃᖏᕐᕋᔪᖅ, ᑭᓯᐊᓂ ᑭᖑᒧᑦ ᑕᐅᑐᑦᑐᓂ, ᐊᒻᒪᓗ ᐅᑭᐅᖅᑕᖅᑐᒥ ᓯᑖᕐ ᓯᕗᓕᖅᑎᐅᓪᓗᓂ. ᓇᓂᓯᒋᐊᖃᑦᑐᒍᑦ ᖃᓄᖅ ᐅᕙᑦᑎᓐᓂᒃ ᓯᕗᓕᐅᕆᒍᓐᓇᕐᒪᖔᑦᑕ ᓇᒥᑭᐊᖅ. ᑭᓯᐊᓂ ᓱᓕ, ᑕᒪᓐᓇ ᐃᓱᒪᖅᓲᑎᒋᕙᕗᑦ. ᑕᐃᒪᐃᒍᒪᒐᑦᑕ. ᖃᓄᑐᐃᓐᓇᖅ ᐃᓄᐃᑦ ᐅᕙᑦᑎᓐᓂᒃ ᐃᑲᔪᖅᑐᐃᒐᓗᐊᖅᐸᑕ, ᐅᕙᑦᑎᓐᓂᒃ ᐅᒃᐱᕆᔭᕆᐊᖃᖅᐳᒍᑦ ᐅᖃᕐᓗᑕᓗ, 'ᐱᐊᓂᒍᒪᕗᖓ ᑭᓱᒥᑭᐊᖅ!'

ᖁᔭᓐᓇᒦᑦᑎᐊᕐᒥᔭᕋ ᔭᓯᑲ ᑎ ᕼᐊᒻᕗᕆᔅ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.