"8−ᖑᑎᓪᓗᖓ ᖃᕋᓴᓐᓂ ᖃᐅᔨᓴᖅᑎᒻᒪᕆᐅᔪᒪᓚᐅᖅᓯᒪᕗᖓ," ᐃᖅᑲᐅᒪᔪᖅ ᓇᑖᓴ ᑖᓇᕼᐃᐅ, ᐊᓪᓚᖓᔪᓕᕆᓂᕐᒧᑦ ᐃᓕᓴᐃᔨ ᖃᐅᔨᓴᖅᑐᓕᕆᓂᕐᒥᒃ. ᐅᑭᐅᑦ ᖁᓕᑦ ᐊᓂᒍᖅᑐᓂᒃ, ᑲᒪᒋᔭᖃᓪᓗᐊᑕᖅᐳᖅ ᐃᓕᓐᓂᐊᖅᑎᑦᑎᓂᕐᒥᒃ ᓄᓇᖃᖅᑳᖅᓯᒪᔪᓂᒃ ᓄᓇᖃᖅᑳᖅᓯᒪᔪᓂᒃ ᑕᐅᑐᒃᑕᐅᔪᒃᑯᑦ ᓄᓇᕐᔪᐊᕐᒥᐅᓄᑦ ᑕᐅᑐᒃᑕᐅᓪᓗᓂ ᐊᒻᒪ ᐃᓕᖅᑯᓯᖓᑎᒍᑦ.

ᐃᖅᑲᓇᐃᔭᖅᑐᖅ ᑕᓚᔅ ᓄᓇᕐᔪᐊᒥ ᖃᐅᔨᓴᖅᑐᓕᕆᓂᕐᒧᑦ ᐃᑦᒪᓐᑕᓐᒥ, ᐱᔭᕇᓚᐅᖅᑎᓪᓗᒍ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᖃᐅᔨᓴᕐᓂᕐᒧᑦ. "[ᐃᒪᐃᓐᓂᐊᓗᒃ ᐱᑎᖦᖢᓂᖓ ᒫᓐᓇᓗ ᐱᓯᒪᓕᖅᖢᒍ, ᐱᕕᒃᓴᖃᖅᐳᖓ, ᐱᔪᒃᓯᑦᑎᐊᖅᖢᖓ ᐱᓕᕆᐊᕆᓪᓗᒋᓪᓗ," ᐅᖃᐅᓯᖃᖅᖢᓂ ᖃᐅᔨᓴᖅᑕᒥᓂᒃ ᐱᓕᕆᐊᒃᓴᓂᒃ Athabasca ᐊᒻᒪ Harvard ᓯᓚᑦᑐᖅᓴᕐᕕᒡᔪᐊᓂᒃ ᕿᓂᖅᑐᓂᒃ astronomy, ᐃᓂᒃᓴᒥᒃ ᐊᒻᒪ ᓄᓇᓕᕆᓂᕐᒥᒃ.

ᓄᖅᑲᓚᐅᖅᑎᓪᓗᒍ ᐃᓕᓐᓂᐊᕐᕕᐊᓗᒻᒥ, ᐋᑕᐹᔅᑲ ᓯᓚᑦᑐᓴᕐᕕᕐᔪᐊᖓᓅᓚᐅᖅᑐᖅ ᐅᓪᓘᑉ ᐃᓚᐃᓐᓇᖓᓄᑦ. ᐃᓄᑑᓪᓗᓂ ᐊᖓᔪᖅᑳᓕᒃ 12-ᓂᒃ ᐅᑭᐅᖃᖅᑐᖅ, ᐊᕐᕌᒍᓄᑦ 8-ᓄᑦ ᐃᖅᑲᓇᐃᔭᓚᐅᖅᑐᖅ, ᓄᖅᑲᖓᑲᐃᓐᓇᖅᑐᓂ ᓯᓚᑦᑐᓴᕐᕕᔾᔪᐊᖓᓂ ᐋᓪᕘᑕᐅᑉ. "ᐊᖅᑯᑎᑯᑖᖑᓚᐅᖅᐳᖅ. ᓴᒡᓗᔾᔮᖏᑦᑐᖓ, ᐃᓛᓐᓂᒃᑯᑦ ᐊᒃᓱᕈᕐᓇᖃᑦᑕᓚᐅᕐᒪᑦ. ᐃᓱᒪᖅᑲᐅᒐᓗᐊᕋᒪ ᑕᒪᓐᓇ ᐊᓂᒍᕈᓐᓇᔾᔮᕋᓱᒋᓇᒍ. ᑭᓯᐊᓂ ᓴᐱᓕᑐᐃᓐᓇᓚᐅᖅᑐᖓ ᐊᒻᒪᓗ ᖁᕕᐊᒋᓪᓗᒍ ᑕᐃᒪᐃᓚᐅᕋᒪ. ᑭᖑᓪᓕᖅᐹᒥ ᐃᓕᓐᓂᐊᖃᑎᒃᑲ ᐱᔭᕇᕋᒃᑭᑦ ᐃᓅᓯᓕᒫᓐᓂ ᐊᑲᐅᓛᖑᖃᑕᐅᓚᐅᖅᑐᖅ ᐊᒻᒪ ᒫᓐᓇ," ᐃᖅᑲᐅᒪᔪᖅ.

ᐱᔪᒃᓯᑎᑕᐅᓕᓚᐅᖅᑐᖅ ᐃᓕᓐᓂᐊᕐᕕᖕᒧᑦ ᐅᑎᕆᐊᒃᓴᖅ ᐃᕐᓂᖃᓚᐅᖅᑎᓪᓗᒍ. ᐃᖅᑲᓇᐃᔮᒃᓴᒥᒃ ᐱᔪᒪᓚᐅᖅᑐᖅ ᐃᖅᑲᓇᐃᔭᕆᐊᒃᓴᖅ, ᐊᕐᕌᒍᑦ 8 ᐊᓂᒍᖅᑎᓪᓗᒋᑦ ᐱᔨᑦᑎᕋᕐᕕᖕᒥ ᓇᒡᓕᒍᓱᙱᖦᖢᓂ ᐱᓕᕆᐊᕆᔭᒥᓂᒃ. ᑖᓇᕼᐃᐅ ᐱᓇᓱᐊᕈᒪᓕᓚᐅᖅᑐᖅ ᑎᒥᓕᕆᓂᕐᒥᑦ.

"ᖁᕕᐊᒋᑦᑎᐊᖅᑕᕋ ᖃᐅᔨᓴᖅᑐᓕᕆᓂᖅ. ᓇᒡᓕᒋᔭᕋ. ᐊᓕᐊᓇᐃᒋᑦᑎᐊᖅᑕᕋ ᐊᒃᑐᐊᓂᖃᕆᐊᒃᓴᖅ ᓯᓚᕐᔪᐊᒧᑦ. ᐊᓕᐊᓇᐃᒋᑦᑎᐊᖅᑕᕋ ᑐᑭᓯᐅᒪᓂᖅ ᐊᔾᔨᒌᙱᑦᑐᓂᒃ ᖃᓕᕇᓂᒃ ᓄᓇᕐᔪᐊᕐᒥ, ᖃᓄᕐᓗ ᐱᓕᕆᖃᑎᒌᒃᐸᖕᒪᖔᑕ ᐊᒻᒪ ᐱᓕᕆᔾᔪᓯᖏᓐᓂᒃ. ᑭᓯᐊᓂ ᐱᐅᒋᓚᐅᙱᓇᒃᑯ ᖃᓪᓗᓈᑦ ᐱᐅᓯᖏᑦ ᑭᓱᓕᒫᑦ ᓱᕋᖅᑎᖅᓯᒪᓪᓚᑦᑖᕐᒪᑕ, ᐊᒻᒪ ᐊᒡᒍᖅᑕᐅᓪᓗᑎᒃ... ᐃᓕᑦᑎᑐᐃᓐᓇᕐᓂᖅ ᖃᓄᐃᓕᐅᖅᑕᐅᕙᓚᐅᖅᑐᓂᒃ ᖃᓪᓗᓈᖑᖃᑎᒌᙱᑦᑐᓂᒃ ᐊᒻᒪ ᖃᓄᖅ ᑕᒪᓐᓇ ᐊᒃᑐᐃᕙᖕᒪᖔᑦ ᖃᓄᖅ ᖃᐅᔨᓴᖅᑐᓕᕆᓂᖅ ᐅᕙᓐᓄᑦ ᐅᒃᑯᐃᖅᑕᐅᕙᖕᒪᖔᑦ, ᖃᐅᔨᓕᓚᐅᖅᑐᖓᓗ ᐅᕙᓐᓂᒃ ᑕᑯᓚᐅᙱᓐᓇᒪ," ᓇᓗᓇᐃᖅᓯᓪᓗᓂ.

"ᑕᐃᒪᓕ ᑐᓴᕈᒪᓂᖅᓴᐅᕗᖓ ᖃᓄᖅ ᑐᑭᓕᐅᕆᔪᓐᓇᖅᐱᑕ ᖃᐅᔨᓴᖅᑐᓕᕆᓂᕐᒥᒃ? ᖃᓄᕐᓕ ᐱᓕᕆᖃᑎᖃᕈᓐᓇᖅᐱᑕ ᖃᐅᔨᓴᖅᑐᓕᕆᓂᕐᒥᒃ ᖃᓪᓗᓈᓂᒃ ᓄᓇᖃᖅᑳᖅᓯᒪᔪᑦ ᓄᓇᕐᔪᐊᕐᒥᐅᓄᑦ? ᖃᓄᕐᓕ ᒪᑐᐃᖅᓯᔪᓐᓇᖅᐱᑕ ᐅᖃᖃᑎᒌᖕᓂᕐᒥᒃ ᑕᒪᒃᑯᐊ ᓄᓇᖃᖅᑳᖅᑐᑦ ᐃᓄᐃᑦ ᑕᒫᓕᒫᖅ, ᐊᒥᐊᓕᒃᑲᓂ, ᑭᓯᐊᓂᑦᑕᐅᖅ ᓄᓇᕐᔪᐊᓕᒫᒥ, ᐃᓗᐊᖅᓴᕐᓂᖅᓴᐅᓗᑎᒃ ᓵᒧᐊᕆᐊᒃᓴᖅ ᐅᖃᐅᓯᖃᕐᓗᑎᒡᓗ ᖃᓄᖅ ᐃᓱᒪᒋᔭᖃᕐᒪᖔᑕ ᓯᓚᐅᑉ ᖃᓄᐃᓕᖓᓂᖓᓄᑦ, ᐃᓱᒪᒋᔭᖏᓐᓂᒃ ᑕᒪᑐᒧᖓ ᓯᓚᕐᔪᐊᒧᑦ ᓂᕐᔪᑎᓄᓪᓗ..?"?" ᑖᓇᕼᐃᐅ ᑲᔪᓯᕗᖅ.

"ᐃᓱᒪᒋᔭᕋ ᐃᓚᐅᑎᓪᓗᒋᑦ ᓂᐱᖏᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ ᐅᖃᖃᑎᒌᒃᑎᓪᓗᒋᑦ ᐱᒻᒪᕆᐅᔪᖅ, ᓲᖃᐃᒻᒪ ᓄᓇᖃᖅᑳᖅᓯᒪᔪᑦ ᐃᓄᐃᑦ ᖃᐅᔨᒪᖕᒪᑕ ᑕᐃᒪᙵᑦ ᐃᖅᑲᐅᒪᓐᓇᕐᓂᖓᓂᒃ ᓄᓇᕐᔪᐊᒥ ᑲᑎᙵᖃᑦᑕᐅᑎᓂᖓᓂᒃ, ᑭᓱᓕᒫᓪᓗ ᐊᒃᑐᐃᓪᓗᑎᒃ ᑭᓱᓕᒫᓂᒃ. ᐃᓱᒪᔪᖓᓕ ᖃᓪᓗᓈᑦ ᓄᓇᖓᓐᓂ ᖃᐅᔨᓴᕐᓂᖅ ᑐᐹᖅᓯᓇᒐᓚᒻᒪᑦ ᑕᒪᑐᒧᖓ, ᑭᓯᐊᓂ ᓱᒃᑲᐃᑦᑐᒥᒃ ᐱᕙᓪᓕᐊᓂᐅᔪᖅ. ᐊᐃᑦᑖᖑᒐᓗᐊᖅ, ᐊᒥᓱᓂᒃ ᐊᒃᓱᕈᕐᓇᖅᑐᓂᒃ ᖃᓄᐃᓕᖓᓂᖃᕋᑦᑕ ᓄᓇᕐᔪᐊᑦᑎᓐᓂ ᒫᓐᓇ ᐋᖅᑭᒋᐊᖅᑕᐅᔭᕆᐊᖃᖅᑐᓂᒃ," ᐃᓱᓕᑉᐳᖅ.

ᑖᓇᕼᐅ ᐊᒃᓱᕈᓚᐅᖅᑐᖅ ᐃᓕᓐᓂᐊᑦᑎᐊᖏᓐᓂᕐᒥᑦ ᐃᓕᑦᑎᓂᕐᒧᑦ ᐊᔪᕈᑎᖃᕐᓂᕐᒧᑦ ᐊᒻᒪᓗ ᐊᔪᕐᓇᖅᑐᖅᓯᐅᕐᓂᕐᒧᑦ ᑐᑭᓯᐅᒪᔾᔪᑎᓄᑦ ᐋᖅᑭᒃᓱᖅᑕᐅᓚᐅᖅᑐᖅ ᐊᒻᒪᓗ ᐊᕕᒃᓯᒪᑉᓗᓂ. ᐊᑯᓂᐊᓗᒃ ᐊᑕᖐᓂᖅᓴᐅᓪᓗᓂ ᐃᓕᑦᑎᕙᓪᓕᐊᓪᓗᓂ ᖃᐅᔨᓪᓗᓂᓗ ᖃᓄᖅ ᑎᒥᒃᑯᑦ ᐃᖃᐃᓕᓴᕐᓂᖅ ᐃᓕᓐᓂᐊᖅᑎᑕᐅᕙᖕᒪᖔᑦ ᐊᔪᖅᑎᑕᐅᓂᕐᒥᒃ. ᐃᑲᔪᖅᑕᐅᓪᓗᓂ ᑎᒥᒥᒍᑦ ᐊᔪᕈᑎᖃᖅᑐᓄᑦ ᐊᓪᓚᕝᕕᖓᓄᑦ, ᐱᔭᕇᕈᓐᓇᖅᓯᓚᐅᖅᑐᖅ.

ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᓯᓚᑦᑐᖅᓴᕐᕕᓕᐊᖅᑐᓄᑦ ᐱᕙᒌᔭᕋᓱᒃᐳᖅ ᓅᑉᐸᓪᓕᐊᓂᕐᒧᑦ ᖃᐅᔨᓗᓂᓗ ᑭᓱᑦ ᐊᑐᒐᒃᓴᑦ ᐊᑐᐃᓐᓇᐅᖕᒪᖔᑕ ᐃᓕᓐᓂᐊᕐᕕᖕᒥ. ᓅᑉᐸᓪᓕᐊᓂᖅ ᖃᓪᓗᓈᑦ ᐃᓕᓐᓂᐊᕐᕕᖓᓐᓄᑦ ᐅᖃᐅᓯᕆᕙᖓ "ᐊᒃᓱᕈᕐᓇᖅᑑᓂᖓᓂᒃ" ᐊᒥᓱᓄᑦ ᐃᓄᖕᓄᑦ ᐊᒻᒪᓗ ᐅᖃᖅᖢᓂ ᐱᕙᒌᔭᖁᔨᓪᓗᓂ ᐃᒃᐱᖕᓂᐊᓂᒃᑯᑦ ᐊᑐᕐᓂᑯᒧᑦ.

ᑎᑭᐅᑎᓂᕐᒧᑦ ᓱᓇᑐᐃᓐᓇᓕᕆᓂᕐᒧᑦ ᐃᓕᓐᓂᐊᕐᓂᕐᒧᑦ, ᑖᓇᕼᐃᐅ ᐅᖃᐅᓯᖃᖅᑐᖅ "ᒪᕐᕉᖕᓂᒃ ᑕᐅᑐᖕᓂᖅ", ᐃᓱᒪᒋᔭᐅᔪᖅ ᑎᓕᐅᕆᔪᖅ ᐊᑐᕐᓂᐊᕐᓗᓂ ᓴᙱᓂᐅᔪᓂᒃ ᒪᕐᕉᖕᓂᒃ ᐅᖓᑖᓄᓪᓘᓐᓃᑦ ᓄᓇᕐᔪᐊᕐᒥ ᑕᐅᑐᒃᑕᐅᔪᓂᒃ, ᓲᕐᓗ ᐅᐊᓕᓂᕐᒥᑦ ᓄᓇᕐᔪᐊᖅ ᑕᐅᑐᒃᑕᐅᓂᖓ ᐊᒻᒪᓗ ᓄᓇᖃᖅᑳᖅᑐᑦ ᓄᓇᕐᔪᐊᕐᒧᑦ ᑕᐅᑐᒃᑕᐅᓂᖓ, ᓴᖅᑭᑦᑎᓂᕐᒧᑦ ᐱᕙᓪᓕᐊᓂᕐᒥᒃ ᖃᐅᔨᓴᐃᓂᕐᒥᑦ.  "ᓴᙱᔪᒻᒪᕆᐊᓗᒃ ᐋᖅᑭᒋᐊᕈᑎᓄᑦ ᐊᒻᒪ ᑐᑭᓯᐅᒪᓂᖅ ᖃᓄᖅ ᐱᓕᕆᖃᑎᒌᒍᓐᓇᕐᒪᖔᑦᑕ ᓯᕗᓂᒃᓴᖃᑦᑎᐊᒃᑲᓐᓂᖁᓪᓗᑕ ᑭᒃᑯᓕᒫᓄᑦ," ᐅᖃᖅᐳᖅ.

ᐃᒻᒥᓂᒃ ᑲᒪᒋᔪᓐᓇᖅᓯᔭᕆᐊᖃᓚᐅᖅᑐᖅ ᐃᕐᓂᕐᒥᓂᒃ ᐱᕈᖅᓴᐃᔪᓐᓇᖅᓯᓪᓗᓂ ᐊᒻᒪ ᐃᓕᓐᓂᐊᑦᑎᐊᕈᓐᓇᖅᓯᓪᓗᓂ. ᑖᓇᕼᐃᐅ ᑎᓕᐅᕆᔪᖅ ᓂᕆᑦᑎᐊᖃᑦᑕᖁᔨᓪᓗᓂ, ᐃᖃᐃᓕᓴᕐᓗᓂ ᓯᓂᑦᑎᐊᕐᓗᓂᓗ. ᐃᑲᔪᖅᑕᐅᔪᒪᓂᖅ ᐃᓱᒪᓕᕆᓂᕐᒧᑦ ᐱᔨᑦᑎᕋᐅᑎᓂᒃ ᐱᔭᕆᐊᖃᕌᖓᑦ ᐊᓯᒋᕚ ᐱᖁᔨᔪᖅ ᐱᔪᒪᙱᖦᖢᓂᓗ ᐃᒃᐱᖕᓂᐊᓂᕐᓂ. ᑎᒥᒥᓄᑦ ᑲᑎᙵᖃᑎᖃᕋᓱᓲᖅ ᒫᓐᓇᓗ, ᑰᒃᐸᓪᓕᐊᓪᓗᓂ ᐊᔪᙱᓐᓂᓕᒫᒥᓂᒃ ᐊᑐᖅᖢᓂ ᐃᓄᑦᑎᐊᕙᐅᓂᕐᒥᒃ ᐊᒻᒪ ᓇᖕᒥᓂᖅ−ᐃᒃᐱᒋᑦᑎᐊᕐᓂᕐᒥᒃ.

ᒪᑐᕙᓪᓕᐊᓕᖅᑎᓪᓗᒍ ᐅᖃᐅᓯᖏᑦ ᓂᕆᐅᖕᓂᖃᑦᑎᐊᖅᑐᑦ. "ᖃᓄᑐᐃᓐᓇᖅ ᐊᔪᕐᓇᕋᓱᒋᒐᓗᐊᕈᕕᐅᒃ ᐊᓂᒍᖅᑎᓐᓇᓱᒋᐊᒃᓴᖅ ᐱᔪᒪᔭᕐᓄᑦ ᐃᓅᓯᕐᓂ, ᐃᓕᖕᓂᒃ ᐃᒋᑕᒃᓴᖃᑦᑎᐊᕐᓗᑎᑦ. ᐃᓛᓐᓂᒃᑯᑦ, ᐃᓚᖓ ᓴᐱᖅᑕᐃᓕᓂᐅᑉ ᐃᑲᔪᖅᑕᐅᔪᒪᖃᑦᑕᕐᒥᔪᖅ. ᑲᑉᐱᐊᓱᙱᓪᓗᑎᑦ ᐃᑲᔪᖅᑕᐅᔪᒪᔭᕆᐊᒃᓴᖅ. ᐃᓄᐃᑦ ᐊᕙᑎᑦᓃᑦᑐᑦ ᑕᑯᔪᒪᔭᑎᑦ ᑲᔪᓯᑦᑎᐊᕐᓂᕐᒥᒃ... ᐊᒃᓱᕈᕐᓇᕐᓂᐊᖅᑐᒃᓴᐅᔪᖅ ᐊᔾᔨᒌᙱᑦᑐᒃᑯᑦ. ᑭᓯᐊᓂ ᑕᒪᓐᓇ ᐃᓅᓯᐅᑉ ᐃᓚᒋᓂᐊᕐᒪᒍ ᖃᓄᑐᐃᓐᓇᖅ. ᖃᓄᖅ ᐊᖅᑯᑎᖃᕈᒪᕕᓯ ᑕᒪᒃᑯᓂᖓ ᐊᒃᓱᕈᕐᓇᖅᑐᓂᒃ ᐊᑐᖅᑎᓪᓗᓯ? ᑖᓐᓇ ᐊᐱᖅᑯᑎᓪᓚᕆᐅᔪᖅ.... ᓄᒃᑭᒃᓱᕐᓂᖅ ᐃᓚᒋᔭᐅᔪᖅ... ᐱᒻᒪᕆᐅᓂᖅᐹᑦ ᐊᓂᒍᖅᑎᑦᑐᒪᓪᓗᒋᑦ ᑐᕌᕆᔭᑎᑦ, ᐊᔪᕐᓇᖅᑐᒃᑰᖅᑰᔨᒐᓗᐊᖅᐸᑕ."

8-ᖑᑎᓪᓗᒍ, ᓇᑖᓴ ᑖᓇᕼᐃᐅ ᖃᐅᔨᒪᓚᐅᖅᑐᖅ ᖃᐅᔨᓴᖅᑎᒻᒪᕆᐅᔪᒪᓚᐅᕐᒪᑦ. ᓄᖅᑲᓚᐅᕋᓗᐊᖅᑎᓪᓗᒍ ᓱᒃᑲᐃᑦᑐᒥᓪᓗ ᑭᓯᐊᓂ ᓯᓚᑦᑐᓴᕐᕕᕐᔪᐊᒃᑰᖅᑐᓂ, ᐱᔭᕇᖅᓯᓚᐅᖅᐳᖅ ᑐᕌᒐᖏᓐᓂᑦ. ᐊᒃᑐᐊᓂᖃᙱᑎᓪᓗᒍ ᖃᓄᖅ ᐃᓕᓐᓂᐊᖅᑎᑕᐅᖃᑦᑕᕐᒪᖔᑦ, ᓇᖕᒥᓂᖅ ᐊᖅᑯᑎᒋᓂᐊᖅᑕᒥᓂᒃ ᑐᓴᖅᑎᑦᑎᓚᐅᖅᐳᖅ ᖃᐅᔨᓴᖅᑐᓕᕆᓂᕐᒥᒃ ᓄᓇᖃᖅᑳᖅᓯᒪᔪᑦ ᑕᐅᑐᖅᑰᖅᑕᖏᓐᓂᒃ ᐃᓱᒪᒋᔭᖃᖅᑐᓂᒃ. ᒫᓐᓇ ᐃᓕᓐᓂᐊᖅᑎᑦᑎᖃᑦᑕᓕᖅᑐᖅ ᖃᐅᔨᓴᖅᑐᓕᕆᓂᕐᒥᒃ ᑐᑭᓯᓇᖅᑐᒥᒃ ᑖᔅᓱᒧᖓ, ᐱᔪᒃᓯᓕᖅᑎᖦᖢᒍ ᓄᑖᖅ ᓄᓇᖃᖅᑳᖅᓯᒪᔪᑦ ᖃᐅᔨᓴᖅᑎᒻᒪᕇᑦ ᑕᓚᔅ ᓄᓇᕐᔪᐊᕐᒥ ᖃᐅᔨᓴᖅᑐᓕᕆᓂᕐᒥᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.