ᓂᒐᔮᓐ ᓯᖕᑭᓕᐅᕐ ᖁᕕᐊᒋᔭᖃᖅᑐᖅ ᐃᓕᓴᐃᓂᕐᒥᒃ ᑭᓇᑐᐃᓐᓇᑦᑎᐊᒥᒃ ᐊᔪᙱᑦᑐᒥ ᑭᓇᑐᐃᓐᓇᕐᒥᒡᓗ ᓈᓚᖕᓂᐊᖅᑐᒥᒃ ᐅᖃᐅᓯᒃᓴᒥᓂᒃ. ᐱᒍᐃᔅ ᓄᓇᖃᖅᑳᖅᓯᒪᔪᓂᑦ, ᑭᓯᐊᓂ ᐱᕈᖅᓴᓚᐅᖅᑐᖅ ᓯᐅᓪᑰᒃ, ᒫᓂᑑᐸᒥᑦ, ᓯᖕᑭᓕᐅᕐ ᒫᓐᓇᐅᔪᖅ ᐃᓕᓴᐃᔨᒻᒪᕆᐅᕗᖅ ᓯᓚᑦᑐᖅᓴᕐᕕᒡᔪᐊᖓᓂ ᒫᓂᑑᐸᒥᑦ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᕈᑎᓕᕆᓂᕐᒥᑦ ᑭᓯᐊᓂ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓴᐃᔨᐅᓚᐅᖅᓯᒪᓪᓗᓂ.

ᓯᖕᑭᓕᐅᕐ ᐅᖃᖅᐳᖅ ᐸᕐᓇᓚᐅᖅᓯᒪᙱᓐᓂᕋᖅᑐᓂ ᐃᓕᓴᐃᔨᐅᓂᕐᒧᑦ ᑭᓯᐊᓂ ᐃᓕᓴᐃᔨᙳᑐᐃᓐᓇᓚᐅᖅᓯᒪᙱᖦᖢᓂ, ᓯᕗᓪᓕᖅᐹᒥ ᐱᓕᕆᖃᑎᖃᖅᑳᖅᖢᓂ ᒪᒃᑯᒃᑐᓂᒃ ᓄᓇᖃᖅᑳᖅᓯᒪᔪᓂᒃ ᐃᓕᓐᓂᐊᖅᑎᓂᒃ Selkirk-ᒥ ᐃᖅᑲᓇᐃᔮᒃᓴᒥᒃ ᒪᓂᒪᑎᑦᑎᓕᓚᐅᖅᓯᒪᕗᖅ ᐃᓕᓐᓂᐊᖅᑎᑦᑎᔪᒪᓪᓗᓂ drama-ᒥᒃ ᐊᒻᒪ ᖃᓪᓗᓈᑐᑦ ᑭᐊᕕᓐ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐅᐃᓂᐹᒡᒥ, ᑕᐃᑲᓂᓗ ᓄᓇᖃᖅᑳᖅᓯᒪᔪᓂᒃ ᐃᓕᓐᓂᐊᖅᑎᑦᑎᓯᒋᐊᓚᐅᖅᓯᒪᓪᓗᓂ ᑕᐃᑲᓂ.

"ᐅᖃᓪᓚᒋᐊᓪᓚᕆᓚᐅᖅᑐᖓ ᓲᖃᐃᒻᒪ ᐅᖃᐅᓯᖃᕋᔭᕋᒪ ᖃᓄᖅ ᑕᐅᑦᑐᖃᕐᒪᖔᑦ ᐱᕈᖅᐸᓪᓕᐊᓂᖅ ᐊᒻᒪ ᐊᓗᒐᓕᐊᕐᓂᖅ ᐊᒻᒪ ᒐᕙᒪᓕᕆᓂᖅ ᐊᒻᒪ ᐱᔾᔪᑕᐅᔪᑦ ᐊᖏᕈᑎᓄᑦ ᐊᓯᖏᓐᓄᓪᓗ," ᐅᖃᖅᑐᖅ ᓯᖕᑭᓕᐅ.

ᐃᓕᓴᐃᖃᑦᑕᓕᓚᐅᖅᑎᓪᓗᒍ ᖃᐅᔨᒪᔭᒥᓂᒃ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᓐᓂᒃ, ᑎᑎᕋᖃᑦᑕᓕᓚᐅᖅᑐᖅ ᐊᒻᒪ ᐃᓕᓐᓂᐊᖅᑕᒥᓂᒃ ᐊᓂᒍᐃᔪᒪᓕᖅᖢᓂ ᐃᓕᓐᓂᐊᖅᑎᐅᖏᓐᓇᕈᒪᓕᓚᐅᖅᖢᓂᓗ, ᐃᓕᓴᐃᔨᙳᖅᖢᓂ.

ᐊᒻᒪᓗ ᐃᓕᓴᐃᔨᐅᒍᓂ ᓯᓚᑦᑐᓴᕐᕕᔾᔪᐊᖓᓂ ᒫᓂᑑᕙᐅᑉ ᓈᒻᒪᓚᐅᖏᑉᐸᑦ, ᓯᖕᑭᓕᐅ ᖃᐅᔨᓯᒪᔪᖅ ᖁᕕᐊᒋᔭᖃᕐᓂᕐᒥᓂᒃ ᐃᓕᓴᐃᓂᕐᒥᒃ ᐃᓄᓐᓂᒃ, ᑎᑎᕋᕐᓗᓂ ᒪᕐᕉᓐᓂᒃ ᑎᑎᕋᖅᓯᒪᔪᓂᒃ ᐱᓇᓱᐊᕈᓯᕐᒥᒃ ᐅᐊᓂᐸᐃᒡᒥ ᐱᕙᓪᓕᐊᔪᓂ, ᐊᒻᒪ ᑎᑎᕋᕐᑎᓂᒃ ᐊᒻᒪᓗ ᐊᐱᖅᓱᕐᓂᐅᔪᓂᒃ.

"ᑭᓇᑐᐃᓐᓇᖅ ᓄᓇᖃᖅᑳᖅᓯᒪᔪᒥᒃ ᑎᑎᕋᖅᓯᒪᔪᖃᕌᖓᑦ, ᐅᕙᓐᓄᑦ ᐅᖄᓚᒐᔪᒃᑐᑦ ᐊᒻᒪ ᓄᓇᖅᑲᑎᒃᑲ ᑲᑎᙵᖃᑎᒋᕙᒃᐸᒃᑲ ᑕᐃᒪᐃᓕᐅᖅᐸᒃᑭᕗᖓ," ᓯᖕᑭᓕᐅᕐ ᐅᖃᖅᑐᖅ.

ᑭᓱᒥ ᐱᔪᒃᓯᑎᑦᑎᕙ ᐱᓕᕆᐊᒥᓂᒃ ᐱᓕᕆᑎᓪᓗᒍ ᐱᒻᒪᕆᐅᒋᕙᐅᒃ ᓄᓇᖃᖅᑳᖅᓯᒪᔪᑦ ᐱᐅᓯᕆᕙᓚᐅᖅᑕᖏᑦ ᐊᑐᖅᑕᐅᓲᖑᓂᖏᓐᓂᒃ ᑕᒪᐃᓐᓄᑦ ᑲᓇᑕᒥ ᓴᓇᔭᐅᓯᒪᔪᓄᑦ, ᐃᓕᓐᓂᐊᖅᑎᑦᑎᒐᓗᐊᖅᐸᑕ ᓄᓇᖃᖅᑳᖅᓯᒪᙱᑦᑐᓂᒃ ᐃᓄᖕᓂᒃ ᐊᒃᑐᖅᑕᐅᓯᒪᔪᓂᒃ ᓄᓇᖃᖅᑳᖅᓯᒪᔪᓂᒃ ᐅᕝᕙᓘᓐᓃᑦ ᐃᓕᓐᓂᐊᖅᑎᑦᑎᓗᑎᒃ ᓄᓇᖃᖅᑳᖅᓯᒪᔪᓂᒃ ᐱᐅᓯᕆᔭᐅᕙᓚᐅᖅᑐᓂᒃ ᐊᒻᒪ ᐃᓕᖅᑯᓯᖓᓐᓂᒃ "ᐱᒻᒪᕆᐅᖕᒪᑦ ᑐᙵᕕᒋᔭᐅᓪᓗᓂᓗ ᑲᓇᑕᒧᑦ."

"ᐃᓕᖅᑯᓯᖃᖃᑎᒌᙱᑦᑐᓄᑦ ᐊᑐᐊᒐᖅ, ᒪᓕᒐᖏᓐᓄᑦ ᑲᓇᑕᒥ, ᖃᓄᕈᓘᔮᓗᒃ ᐃᓅᓯᓕᕆᔾᔪᓯᖃᕐᓂᑦᑎᓐᓄᑦ, ᓲᕐᓗ ᐃᓅᓯᓕᕆᓂᖅ ᐊᐅᓚᑕᐅᑎᓪᓗᒍ ᐃᓅᓯᑦᑎᓐᓂ ᓄᓇᖃᖅᑳᖅᓯᒪᔪᓄᑦ ᑐᙵᕕᓪᓚᕆᐅᕗᖅ. ᓄᓇᕐᔪᐊᓕᒫᒥ ᓇᓂᑐᐃᓐᓇᑦᑎᐊᖅ ᑕᑯᙱᑕᑦ," ᓯᖕᑭᓕᐅᕐ ᐅᖃᖅᑐᖅ.

ᐃᓕᓴᐃᔨᑦᑎᐊᕙᐅᓪᓗᓂ ᐊᒻᒪᓗ ᐃᓄᑦᑎᐊᕙᐅᓪᓗᓂ ᐊᕐᕌᒍᓂ ᐊᓂᒍᖅᑐᓂ, ᐊᔾᔨᒋᙱᑕᖓᓂᒃ ᐃᓕᓐᓂᐊᖅᓯᒪᓚᐅᖅᑐᖅ ᐊᒥᓱᓂᒃ ᐅᐸᒐᓱᒃᑕᒥᓂᒃ.

ᓯᖕᑭᓕᐅᕐ ᐊᑖᑕᒥᓂᒃ ᐱᕈᖅᓴᖃᑎᖃᓚᐅᖅᐳᖅ ᐃᓕᖅᑯᓯᑐᖃᕆᔭᐅᑦᑎᐊᖅᖢᓂᓗ ᐊᒻᒪ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᓪᓗᓂ "ᓇᓂᓯᒃᑲᓐᓂᕆᐊᖃᓚᐅᖅᑐᖅ ᑐᔪᕐᒥᕕᖕᒧᑦ." ᐊᒻᒪᓗ ᓯᖕᑭᓕᐅ ᓴᖅᑭᔮᕐᕕᐅᑎᓪᓗᒍ ᐱᖅᑯᓯᑐᖃᕐᒧᑦ, ᐱᕈᕐᓂᑰᒻᒥᔪᖅ ᑐᒃᓯᐊᕐᕕᒻᒥ ᐊᒻᒪᓗ ᐊᓈᓇᖓ ᐅᐃᕖᑎᑐᑦ ᐊᒻᒪᓗ ᓴᓐᖏᔫᓪᓗᓂ ᐃᒃᓯᕋᕐᔪᐊᖃᑦᑐᓂ ᐃᓚᒥᓂᒃ.

"ᐅᖃᐅᓯᕆᖅᑲᐅᔭᕋ ᔪᓚᐃᒥ ᖁᕕᐊᓲᑎᖃᕆᐊᖅᑐᕋᔭᖅᑐᖓ ᐊᒻᒪ ᐊᓇᐅᓯᕝᕕᒃᑯᑦ ᐊᒻᒪ ᐋᒐᓯᒥ ᐸᐃᑉᐹᖁᑎᖁᑎᖃᕋᔭᖅᑐᖓ."

ᓯᖕᑭᓕᐅᕐ ᐱᕈᖅᐸᓪᓕᐊᓪᓗᓂ ᐊᑲᐅᙱᓕᐅᕈᑎᖃᓚᐅᖅᑐᖅ, ᐊᒻᒪᓗ ᓂᙵᒃᓯᒪᓪᓗᓂ ᐊᑯᓂᐊᓗᒃ ᑭᓯᐊᓂ ᐃᓅᓯᓕᕆᔭᖅᑐᖅᖢᓂ ᐃᑲᔪᕆᐊᖅᑐᖅᖢᓂ. ᐊᓪᓛᑦ ᐅᖃᖅᑐᓂ ᐃᓕᓐᓂᐊᕈᒪᖏᓐᓂᕋᖅᑐᓂ ᐊᒻᒪᓗ ᐱᐅᒐᓂ, ᐊᒻᒪᓗ ᑕᐃᒪᐃᑐᐃᓐᓇᖅᑐᓂ ᖁᕕᐊᒋᒐᒥᐅᒃ ᐱᙳᐊᕐᓂᖅ.

ᖁᕕᐊᒋᔭᖃᕐᓂᖓ ᐱᙳᐊᕐᓂᕐᒧᑦ ᐊᕿᓂᕐᒧᑦ ᐃᓕᓐᓂᐊᕈᓯᐊᖅᑖᓚᐅᖅᑐᖅ ᑐᕆᓐᑦ ᓯᓚᑦᑐᓴᕐᕕᒡᔪᐊᖓᓂ, ᐊᒻᒪᓗ ᐱᔭᕇᕋᒥ MVP-ᖑᓚᐅᖅᐳᖅ ᕼᐋᑭᖅᑎᖏᓐᓄᑦ ᐊᒻᒪᓗ ᐊᕿᔨᖏᓐᓄᑦ.

ᓄᖅᑲᓚᐅᖅᑐᖅ ᐃᓕᓐᓂᐊᕐᕕᔾᔪᐊᒥᒃ ᓂᐅᖓ ᓱᕋᓚᐅᖅᑎᓪᓗᒍ ᐊᒻᒪᓗ ᐊᐅᓪᓚᖅᑐᓂ ᓄᓇᕐᔪᐊᕐᒧᑦ ᐊᒻᒪᓗ ᓇᓂᓯᓪᓗᓂ ᐃᓕᓐᓂᐊᕐᕕᔾᔪᐊᒥ Srilanka-ᒥ.

ᐊᐱᕆᔭᐅᓚᐅᖅᑐᖅ ᐅᖃᐅᓯᖃᖁᔭᐅᓪᓗᓂ ᐊᑐᖅᓯᒪᔭᒥᓂᒃ ᓄᓇᖃᖅᑳᖅᓯᒪᓪᓗᓂ ᖃᐅᔨᓪᓗᓂᓗ 300-ᓂᒃ ᐃᓄᖕᓂᒃ ᐅᑕᖅᑭᔪᖃᕐᓂᖓᓂᒃ ᐅᒃᐱᕈᓱᒍᓐᓃᕐᓂᖏᓐᓄᑦ ᓄᓇᖃᖅᑳᖅᑐᑦ ᐃᓄᐃᑦ ᐱᑕᖃᓕᕐᓂᖏᓐᓂᒃ.

ᑕᐃᒪᓕ ᐅᑎᕐᒪᑦ ᓄᑖᒥᒃ ᐃᓱᒪᖃᓕᓚᐅᖅᑐᖅ ᐊᒻᒪᓗ ᖃᓄᐃᓕᐅᕈᒪᓂᕐᒥᓂᒃ ᐃᓅᓯᕐᒥᓂ. ᐃᓕᓐᓂᐊᖅᓯᒪᓂᕐᒧᑦ ᐸᐃᑉᐹᑖᓚᐅᖅᑐᖅ, ᐱᔭᕇᖅᑐᓂ ᐃᖅᑲᓇᐃᔭᖅᑐᓂ, ᐊᒻᒪᓗ ᐱᔭᕇᖅᑐᓂ ᐃᓕᓐᓂᐊᕈᓯᐊᖅᑐᓂ ᐃᓕᓐᓂᐊᕐᕕᔾᔪᐊᖓᓂ ᕗᕆᑎᔅ ᑲᓚᒻᐱᐊᒥ, ᑕᐃᒪᓕ ᑕᕝᕗᖓ ᑎᑭᔾᔪᑎᒋᓕᖅᑐᓂᐅᒃ.

ᓯᖕᑭᓕᐅᕐ ᐅᖃᖅᐳᖅ ᐊᖏᓂᖅᐹᖑᖃᑕᐅᔪᖅ ᑐᓗᖅᑕᕈᑕᐅᔪᖅ ᐊᖅᑯᓵᖅᓯᒪᓂᓕᒫᖓᓂ ᑲᙳᓵᕆᓂᖅ ᐃᓱᒪᓂᕐᓗ ᓈᒻᒪᙱᓐᓂᖓᓂᒃ, ᐊᒻᒪ ᐱᔾᔪᑕᐅᓪᓗᓂ ᐊᒥᓱᓄᑦ ᐱᐅᙱᑦᑐᓄᑦ ᓄᓇᖃᖅᑳᖅᓯᒪᔪᑦ ᐃᓄᖁᑎᖏᓐᓄᑦ ᐃᓕᓐᓂᐊᖅᑕᐅᕙᖕᓂᖏᓐᓂᒃ ᐱᕈᖅᐸᓪᓕᐊᓂᕐᒥᒃ ᐱᕙᓪᓕᐊᔪᓕᕆᔨᑎᒍᑦ ᐃᓅᖃᑎᒌᑎᒍᓪᓗ. ᐅᖃᕐᖓᑦ ᓱᓕ ᑕᒪᓐᓇ ᐅᓪᓗᒥ ᑲᒪᒋᒻᒪᒍ.

"ᑲᙳᑦᑎᓐᓇᖅᑰᕐᒪᑦ ᐊᖏᓂᖓ ᑲᑕᒃᑎᑉᐸᒡᓗᒍ ᐊᐅᓚᑦᑐᓐᓇᕈᕕᐅᒃ ᐊᖏᓂᖓ, ᐃᑲᔫᑎᒋᔪᓐᓇᖅᑕᐃᓪᓗ. ᐅᖃᖃᑎᖃᖃᑦᑕᖅᓯᒪᕗᖓ ᑕᒪᑐᒧᖓ. ᐃᑲᔪᖅᑐᖅᑕᐅᓯᒪᖕᒥᔪᖓ," ᐅᖃᖅᑐᕕᓂᖅ ᓯᖕᑭᓕᐅᕐ.

ᑐᓴᖅᑎᑦᑎᔾᔪᑎᐅᓪᓗᓂ ᒪᒃᑯᒃᑐᓄᑦ, ᓯᖕᑭᓕᐅᕐ ᐅᖃᕐᖢᓂ ᐱᔭᕆᐊᖃᕐᓂᕐᒥᓂᒃ "ᐱᑦᑎᐊᙱᖦᖢᓂ," ᐅᖃᕐᖢᓂᓗ, ᐅᓄᖅᑐᓄᑦ ᐃᓄᖕᓄᑦ ᐅᐃᓂᐹᒡᒥ, "ᓄᓇᖃᖅᑳᖅᓯᒪᔪᑐᐊᓄᑦ ᐱᓕᕆᔨᒻᒪᕆᖕᓄᑦ ᑕᑯᓚᐅᖅᓯᒪᔭᑐᐊᖓ."

ᖁᕕᐊᓱᒃᑐᖅ ᑕᑯᒐᒥ ᐊᓯᔾᔨᖅᐸᓪᓕᐊᔪᒥᒃ ᒫᓐᓇ ᐊᒻᒪᓗ ᐊᒥᓱᒃᑲᓐᓂᐅᓕᖅᖢᑎᒃ "ᓴᖅᑭᑉᐸᓪᓕᐊᔪᑦ," ᐊᒻᒪᓗ ᓇᓗᓇᐃᖅᓯᓪᓗᓂ ᐃᓚᖏᑦ ᓯᕗᓪᓕᖅᐹᖑᓂᐊᖅᑐᑦ ᐃᓚᒥᓐᓂ ᖃᓄᐃᓕᐅᕐᓂᐊᕐᓗᑎᒃ.

"ᑕᐃᒪᓕ ᐊᑐᐊᕐᔪᒍᓐᓇᕈᕕᐅᒃ ᐆᒻᒪᕆᖕᓇᖅᑐᖅ ᓄᓇᕐᔪᐊᖅ ᐱᐅᓂᖅᓴᐅᑎᓐᓇᓱᒡᓗᒍ ᐊᒻᒪᓗ ᐃᑲᔪᕐᓗᑎᑦ ᐊᖅᑯᑎᒥᒃ ᐊᔪᕐᓇᙱᓐᓂᖅᓴᐅᖁᓪᓗᒍ ᑕᐃᒃᑯᓄᖓ ᖃᐃᔪᓄᑦ, ᕿᒪᐃᓇᔭᖅᑐᑎᑦ ᐃᖅᑲᐅᒪᙱᑕᕐᓂᒃ."

ᖁᔭᓐᓇᒦᑦᑎᐊᕐᒥᔭᕋ ᔮᔅᒥᓐ ᑲᐸᑕᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.