ᐃᓛᓐᓂᒃᑯᑦ ᐊᒥᓱᓂᒃ ᓇᓴᕐᓂᒃ ᑎᑭᐅᑎᓇᓱᓲᖅ ᐆᒻᒪᑎᒃᑯᑦ. ᑕᒪᓐᓇ ᓇᓗᓇᖏᑎᐊᖅᑐᖅ ᕿᒥᕐᕈᓪᓗᓂ ᖃᓄᖅ ᕋᐃᓱᓪ ᔪᕼᐊᐃᑲᑦ ᐃᖅᑲᓇᐃᔮᕆᖃᑦᑕᖅᓯᒪᔭᖓ ᑕᑯᓯᒪᒻᒪᒍ ᐊᑦᔨᒌᖏᑦᑐᓂᒃ ᐱᓕᕆᐊᖃᑦᑐᓂ ᐊᒻᒪᓗ ᑲᑎᖃᑎᖃᖅᑐᓂ ᐃᓄᓐᓂᒃ ᐊᑦᔨᒌᖏᑦᑐᑎᒍᑦ.  ᐱᐅᑎᐅᑉ ᐊᒻᒪ ᐆᒃᒪᓯᐅᑉ ᑯᕇᔅ ᓴᔅᑳᑦᓱᐊᓐᒥ, ᐱᕈᖅᓴᓚᐅᖅᓯᒪᔪᖅ ᓵᔅᑲᑑᓐ ᓄᓇᓕᐸᐅᔭᖓᓂ. ᐊᓈᓇᒋᔭᐅᔪᖅ ᒪᕐᕉᖕᓄᑦ ᐸᓃᖕᓄᑦ, ᔮHᐋᑭᑦ ᐃᓕᓴᐃᔨᐅᔪᖅ, ᐃᓅᓯᕐᒧᑦ ᑲᒪᔨ, ᐊᒻᒪ EFT (emotional Freedom techniques) ᓘᒃᑖᖅ.

ᐸᕐᓇᑦᑐᓂ ᐃᖅᑲᓇᐃᔮᖓᓄᑦ, ᐃᖅᑭᓖᑦ ᐃᓕᓴᐃᔨᕈᖅᓴᓂᕐᒧᑦ ᐃᓕᓐᓂᐊᓚᐅᖅᑐᖅ ᐃᓕᓐᓂᐊᕐᕕᔾᔪᐊᒥ ᓵᔅᑲᑑᓐᒥ. ᖁᕕᐊᒋᑦᑎᐊᓚᐅᖅᑕᖓ ᐊᑐᕐᓂᑯᖓ ᖃᓄᕐᓗ ᐃᑲᔪᖅᓱᖅᑕᐅᓂᕐᒥᓂᒃ ᐃᓕᓐᓂᐊᕐᕕᖕᒥ, ᑕᐃᔅᓱᒪᓂ ᓇᖕᒥᓂᖅ ᐃᑲᔪᖅᓱᐃᑦᑎᐊᙱᖦᖢᓂ ᒪᒃᑯᒃᑑᓪᓗᓂ ᐊᓈᓇᐅᓪᓗᓂ. 17-ᓂᒃ ᐅᑭᐅᖃᓕᓚᐅᖅᑎᓪᓗᒍ, ᓇᖕᒥᓂᖅ ᐃᓅᓯᒪᓕᖅᑐᖅ ᐊᒃᓱᕈᖃᑦᑕᖅᓯᒪᓪᓗᓂᓗ ᐊᔪᖅᓴᕐᓂᕐᒥᒃ ᐊᒻᒪ ᐅᐃᕆᓯᒪᓂᕐᒥᒃ ᐃᓚᒥᓂᒃ. ᑕᖃᖓᓚᐅᖅᑐᖅ ᐊᓐᓇᐅᒪᓇᓱᑐᐃᓐᓇᖅᑐᓂ. 

"ᐱᕐᔪᐊᖑᓚᐅᖅᑐᖅ ᐅᕙᓐᓄᑦ ᖃᐅᔨᒪᓚᐅᖅᑐᖓ ᖃᓄᐃᓕᐅᕆᐊᖃᕐᓂᓐᓂᒃ ᐃᓕᓐᓂᐊᕐᓂᓐᓄᑦ ᐱᕕᖃᕐᓂᐊᕐᓗᖓᓘᓐᓃᑦ," ᔮᕼᐊᐃᑭᒃᑰᑦ ᐃᖅᑲᐅᒪᔪᖅ. ᐊᑖᑕᖓ ᐃᓕᓴᐃᔨᐅᓚᐅᖅᓯᒪᖕᒥᔪᖅ, ᐊᒻᒪᓗ ᓇᓗᓇᐃᖅᓯᒃᑲᓐᓂᖅᖢᓂ ᖃᓄᖅ ᐱᒻᒪᕆᐅᑎᒋᓂᖓᓂᒃ ᐃᓕᓐᓂᐊᕐᓂᖅ ᓄᓇᖃᖅᑳᖅᓯᒪᔪᓄᑦ. ᐃᑲᔪᖅᑎᐅᓪᓗᓂ ᓄᑕᖅᑲᓂᒃ ᐱᐅᒃᓴᖅᑐᖅ, ᐃᓕᓴᐃᓂᖅ ᐱᓕᕆᐊᒃᓴᑦᑎᐊᕙᐅᖅᑰᔨᓚᐅᖅᑐᖅ. ᐃᓕᓐᓂᐊᓚᐅᖅᑐᖅ ᐊᕐᕌᒍᓄᑦ ᑕᓪᓕᒪᓄᑦ ᐊᒻᒪᓗ ᐃᓕᓴᐃᓪᓗᓂ ᐃᑲᔪᖅᑐᐃᓪᓗᓂ, ᐊᓯᐊᓂᒃ ᓇᓪᓕᒋᔭᒥᓂᒃ. 

ᑕᐃᑲᙵᑦ, ᔪᕼᐊᐃᑭᒃᑰᑦ ᕿᒥᕐᕈᐃᓐᓇᓚᐅᖅᑐᑦ ᐃᓕᓐᓂᐊᕐᓂᒃᑯᑦ, ᐱᓕᒻᒪᒃᓴᕐᓂᕐᒥᑦ ᐱᕙᓪᓕᐊᔪᓕᕆᔨᐅᓂᕐᒧᑦ ᔭᐃᓇᒥ ᐱᓕᕆᐊᒃᓴᑎᒍᑦ ᑕᐃᔭᐅᔪᖅ ᐊᓪᓚᓄᑦ ᑐᓴᐅᒪᖃᑦᑕᐅᑎᓕᕆᓂᕐᒧᑦ ᐱᓕᕆᐊᖅ. ᐃᓅᓯᕐᒧᑦ ᐃᑲᔪᖅᑎᐅᓂᕐᒧᑦ ᐃᓕᓐᓂᐊᓚᐅᕐᒥᔪᖅ ᐊᒻᒪᓗ ᐃᓕᓴᐃᔨᒻᒪᕆᐅᓕᖅᑐᓂ. ᐱᔪᒪᓂᕆᔭᖓᑦ ᑐᕌᖅᑎᑦᑎᓪᓗᓂ ᐊᒡᒐᒧᑦ ᒪᒥᓴᕐᓂᕐᒥᒃ ᐃᓕᓴᐃᓂᕐᒥᒃᓗ ᐃᓄᖕᓂᒃ ᖃᓄᖅ ᓇᖕᒥᓂᖅ ᒪᒥᓴᕐᓂᕐᒥᒃ ᐃᒃᐱᒋᓂᕐᒥᒃᓗ ᓴᙱᓂᖃᕐᓂᕐᒥᒃ. 

ᐃᓅᓯᖕᒧᑦ ᐃᓕᓐᓂᐊᕐᑎᑦᑎᓂᖅ ᐊᔾᔨᒌᙱᑦᑑᕗᖅ, ᐱᐅᓯᐅᕙᒃᐳᖅ ᓇᓗᓇᐃᔭᐃᓪᓗᓂ ᐃᑲᔫᑕᐅᓪᓗᓂ ᑭᓇᒧᒃᑭᐊᖅ ᐃᑲᔪᕐᓂᐊᕐᓗᓂ ᑎᑭᓐᓇᓱᐊᖅᑕᖏᓐᓂᑦ ᐃᑲᔪᖅᑐᐃᒃᑲᓐᓂᕐᓗᓂᓗ. ᐃᒻᒥᓂᒃ ᐃᓱᒪᔪᖅ ᐃᓅᓯᕐᒧᑦ ᑲᒪᔨᐅᓂᕐᒥᒃ, ᐆᒻᒪᕆᖕᓂᕐᒥᒃ, ᐃᒃᐱᒋᔭᖏᓐᓂᒃ ᐊᒻᒪ ᐃᓱᒪᒥᐅᑕᖏᓐᓂᒃ ᐃᓄᐃᑦ ᑐᑭᓯᑎᓐᓇᓱᒃᖢᒋᑦ ᑐᓗᖅᑕᕈᑕᐅᔪᓂᒃ, ᐃᒡᓘᑉ ᐃᓗᐊᓂ ᐅᕝᕙᓘᓐᓃᑦ ᓄᓇᕐᔪᐊᕐᒥᙶᖅᑐᓂᒃ.

ᒪᓂᒪᑎᑦᑎᓂᖅ ᐃᑲᔪᖅᑐᐃᓂᕐᒥᒃ ᐱᓕᕆᔨᓪᓚᕆᐅᓂᒃᑯᑦ ᖁᕕᐊᒋᕙᐅᒃ ᐃᒪᐃᓐᓂᖓᓄᑦ, ᓇᖕᒥᓂᖅ ᐊᔭᖅᑭᑦᑕᕈᑎᒋᔭᒥᓂᒃ ᐊᓂᒍᐃᑎᑦᑎᖃᑦᑕᕐᓂᖓᓄᑦ ᓇᖕᒥᓂᖅ ᐃᑲᔪᖅᑐᖅᑕᐅᔪᒪᓪᓗᓂ. ᐃᓄᑑᖅᑰᔨᓂᖅ, ᐊᒃᓱᕉᑎᖃᕐᓂᖅ ᐃᒃᓯᓐᓇᐃᓂᕐᒥᒃ ᐱᔾᔪᑎᓂᒃ ᐅᒃᐱᕆᔭᐅᔪᓐᓇᕐᓂᕐᒥᒡᓗ ᐊᓯᒥᒃ, Yahyahahkoot ᓇᓂᓯᓪᓗᓂ ᐃᖢᕐᕆᓂᕐᒥᒃ ᓴᖅᑭᔮᕐᕕᐅᓂᕐᒥᒃ ᖃᓄᐃᙱᑦᑎᐊᖅᑐᓂᒃ ᐱᖃᓐᓇᕇᒍᓯᕐᓂᒃ ᐱᖃᓐᓇᕆᔭᖃᕐᓂᕐᓂᒃᓗ. ᐃᔾᔪᐊᒐᒃᓴᑦᑎᐊᕙᐅᓪᓗᓂ ᓲᕐᓗ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓅᓯᓕᕆᔨᒥᒃ ᐊᓯᖏᓐᓂᒡᓗ ᐊᕐᓇᓂᒃ ᑲᑎᖃᑦᑕᓚᐅᖅᑕᖏᑦ ᐃᑲᔪᓚᐅᕐᒥᔪᑦ ᐊᒃᓱᕈᕐᓇᖅᑐᒃᑰᖅᑎᓪᓗᒋᑦ. ᓯᕗᒻᒧᑦ ᐃᖏᕐᕋᔪᓐᓇᖅᓯᓚᐅᖅᐳᖅ ᐃᓕᓴᖅᓯᓪᓗᓂ ᐃᓄᑑᒐᓗᐊᖅᖢᓂ ᐱᓕᕆᔭᕆᐊᖃᙱᓐᓂᖓᓂᒃ.

ᐅᖃᐅᔾᔪᐃᓂᖓ ᐃᓕᓐᓂᐊᖅᑎᓄᑦ ᐃᓱᒪᔪᓄᑦ ᓄᓇᒥᓂᒃ ᕿᒪᐃᔪᒪᓪᓗᑎᒃ ᐃᓕᓐᓂᐊᕈᒪᓗᑎᒃ ᐅᕝᕙᓘᓐᓃᑦ ᐃᖅᑲᓇᐃᔮᖃᓕᕈᒪᓗᑎᒃ ᐱᕙᓪᓕᐊᑎᑦᑎᔪᒪᓇᔭᖅᐳᑦ ᐊᔪᕈᓐᓃᖅᓴᕐᓗᑎᒡᓗ ᓴᙱᔪᒥᒃ ᐊᑕᖃᑎᖃᕐᓂᕐᒥᒃ ᓇᖕᒥᓂᖅ. "ᑕᒪᓐᓇ ᐃᓕᖕᓄᑦ ᕿᒪᓚᐅᖅᓯᒪᔾᔮᙱᑖᑎᑦ ᐊᒻᒪᓗ ᐃᓕᖕᓂᒃ ᑐᕌᕋᓱᓚᐅᖅᓯᒪᔾᔮᓇᓂ," ᔮHᐋᑭᑦ ᐅᖃᐅᔾᔨᕗᖅ, ᐃᒪᐃᒃᑲᓗᐊᖅᑎᓪᓗᒍ ᐅᖃᐅᔾᔪᐃᔭᕆᐊᖃᙱᖦᖢᓂ.

‍

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒧᑦ, ᐅᖃᕋᔭᖅᑐᖅ, "ᐊᑦᑕᕐᓇᖅᑐᒦᙱᑦᑐᑎᑦ, ᓇᒡᓕᒋᔭᐅᔪᑎᑦ ᓴᐳᔾᔭᐅᓯᒪᓪᓗᑎᓪᓗ." ᑖᒃᑯᐊ ᑐᓴᖅᑎᑦᑎᔾᔪᑎᑦ ᐃᒃᐱᒋᔭᖏᑦ ᐃᓅᓯᖅ ᐊᓯᔾᔨᕈᓐᓇᕐᓂᖓᓄᑦ. ᑕᒪᓐᓇ ᖁᐊᖅᓵᕐᓇᙱᖦᖢᓂ, ᓴᐳᔾᔨᓯᒪᓂᖅ ᓇᒡᓕᒍᓱᖕᓂᕐᓗ, Yahyahahkoot ᕿᓄᐃᓵᕈᑎᖃᓚᐅᖅᐳᖅ ᐱᐅᙱᑦᑐᓂᒃ ᐃᓅᖃᑎᖃᖅᐸᖕᓂᕐᓂᒃ ᐃᓄᖕᓂᒃ, ᐋᖓᔮᕐᓇᖅᑐᓂᒃ ᐃᒥᐊᓗᖕᓂᒡᓗ, ᐱᐅᓂᖅᓴᒻᒪᕆᐅᓇᓱᒃᐸᒃᖢᓂ ᒫᓐᓇ. ᓯᕘᕋᓗᐊᕐᓂᖅ ᐅᐃᒻᒪᒃᓴᕋᐃᓐᓂᕐᓗ ᐊᖁᖦᖢᓂ ᐃᓱᒪᖅᓱᕐᖢᓂ ᑲᑉᐱᐊᓱᒃᖢᓂᓗ ᓯᕗᓂᒃᓴᒧᑦ, ᐊᒃᓱᕈᕐᓇᖅᑐᒃᑰᕐᖢᓂ ᐊᑦᑕᕐᓇᖅᑐᒃᑰᕐᖢᓂᓗ. 

ᐊᒃᓱᕉᑎᖃᓚᐅᖅᑎᓪᓗᒍ ᓯᕘᕋᓂᕐᒥᒃ ᓂᑲᓪᓗᖓᓂᕐᒥᒃᓗ ᐊᕐᕌᒍᒐᓴᖕᓄᑦ, ᐃᓕᑦᑎᔪᖅ ᖃᓄᖅ ᐱᕙᓪᓕᐊᓂᕐᒥᒃ ᐃᖏᕐᕋᓂᕐᒥᒃᓗ ᖃᓄᑐᐃᓐᓇᖅ. ᔮHᐋᑭᑦ ᓇᓂᓯᓪᓗᓂ ᒪᒥᓴᐅᑎᒥᒃ ᐃᑲᔫᑎᖃᕐᓂᖓᓂᒃ ᓲᖃᐃᒻᒪ ᐃᒃᐱᒍᓱᙱᖦᖢᓂ ᑭᓇᒥᑭᐊᖅ ᐅᖃᖃᑎᖃᕆᐊᒃᓴᖅ. ᐅᖃᐅᓯᕆᔪᒪᓇᔭᖅᑕᖓ ᐃᓄᖕᓄᑦ ᐊᒃᓱᕉᑎᖃᖅᑐᓄᑦ ᐃᓱᒪᒥᒍᑦ ᐊᔪᕈᑎᓕᖕᓄᑦ ᐃᒪᐃᑉᐳᖅ, "ᐃᓕᖕᓂᒃ ᐱᖃᑎᒋᓗᑎᑦ. ᐃᒃᐱᒋᔭᓕᒫᑎᑦ ᐊᑐᖅᐳᑦ." ᐅᖃᕐᖢᓂ ᕿᐱᓗᙱᖦᖢᓂ ᐃᒃᐱᖕᓂᐊᓂᕐᓂ, ᑭᓯᐊᓂ ᑕᐅᑐᙱᖔᕐᓗᒋᑦ ᐃᒃᐱᒋᓗᒋᓪᓗ. 

ᖃᐅᑕᒫᑦ ᓯᓂᒋᐊᖅᑐᓚᐅᙱᓐᓂᖓᓂ, ᐃᓱᒪᑦᑎᐊᓲᖅ, ᑐᑭᓕᐊᖅᑎᖦᖢᓂᐅᒃ ᐆᒻᒪᕆᖕᓂᖓᓂᒃ ᖃᐅᑎᓪᓗᒍ ᑎᒍᒥᐊᓚᐅᙱᑎᓪᓗᒍ ᐱᔪᓐᓇᕐᓂᓕᒫᒥᓂᒡᓗ ᐃᖏᕐᕋᑎᓪᓗᒍ. ᐃᓱᒪᒃᓴᖅᓯᐅᕐᓂᖅ ᐅᒃᐱᕆᔭᖓ ᐊᔾᔨᒋᙱᑕᖓᓂᒃ ᕿᓂᕈᓐᓇᕐᓂᖓᓄᑦ ᑭᒃᑯᓕᒫᓄᑦ. ᓂᐱᖃᙱᑐᐃᓐᓇᖅᑰᔨᔭᕆᐊᖃᙱᑦᑐᖅ, ᓈᓚᒍᓐᓇᖅᑐᖅ ᓴᐃᓕᓐᓇᖅᑐᒥᒃ ᑐᓴᕐᓈᕐᓂᕐᒥᒃ, ᐊᒥᐊᕆᓂᕐᒥᒃ, ᒧᒥᕐᓂᕐᒥᒃ, ᖃᓄᑐᐃᓐᓇᖅ ᐊᑑᑎᖃᖅᑐᒥᒃ ᐃᓄᖕᒧᑦ ᓂᔾᔭᐅᓯᔪᒧᑦ. 

ᓂᖅᑐᐃᖃᑦᑕᖅᑐᖅ, ᒪᒥᓴᐃᖃᑦᑕᖅᑐᖅ ᑕᐃᔭᐅᔪᖅ EMDR−ᒥᑦ ᓱᕋᐃᔪᖅ ᐊᒻᒪ ᐅᖃᐅᓯᖃᖅᑐᖅ PTSD−ᒥᑦ ᐃᔨᐅᑉ ᐊᐅᓚᓂᖏᓐᓂᑦ. "ᓇᖕᒥᓂᖅ ᐱᓕᕆᓕᕌᖓᑦᑕ, ᐊᓯᔾᔩᕙᓪᓕᐊᔪᒍᑦ ᐊᔾᔨᒌᙱᑦᑑᑎᓂᑦ," ᓇᓗᓇᐃᕐᓯᔪᖅ. ᔫᒐᒥᑦ ᐊᔪᕈᓐᓃᖅᓴᖃᑦᑕᖅᑐᖅ, ᑎᑎᕋᖅᐸᒃᖢᓂᑦ ᑎᑎᕋᕐᕕᖓᓐᓄᑦ ᖁᔭᓕᓪᓗᓂᑦ ᐊᒻᒪ ᑐᕌᒐᓕᐅᖅᖢᓂᑦ.  ᑎᒥᓂ ᐊᐅᓚᑏᓐᓇᕋᓱᖃᑦᑕᖅᑕᖓ, ᓂᕿᑦᑎᐊᕙᖕᓂ ᓂᕿᓕᐅᖅᐸᒃᖢᓂ, ᐊᒻᒪ ᐃᒃᐱᒍᓱᒃᖢᓂ ᐃᒃᐱᒋᔭᒥᓂᒃ, ᑎᒥᒃᑯᑦ ᐊᒻᒪ ᐅᒃᐱᕐᓂᒃᑯᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.