"ᑲᑉᐱᐊᓱᒃᑑᒪᒋᑦ. ᐱᕈᔾᔮᖏᑦᑐᑎᑦ ᑭᓯᐊᓂ ᐱᕕᖃᕈᕕᑦ ᑲᑉᐱᐊᓱᙱᓪᓗᑎᓪᓗ. ᐃᓛᓐᓂᒃᑯᑦ ᕿᒡᒋᑐᐃᓐᓇᕆᐊᖃᓲᖑᒐᑦᑕ ᐃᓱᒪᒋᓐᖏᒻᒪᕆᓪᓗᒍ ᐊᒻᒪᓗ ᑕᒪᓐᓇ ᐊᐅᓚᓂᖃᑦᑎᐊᖅᑐᓂ. ᑲᑉᐱᐊᓱᒃᑕᐃᓕᒋᑦ ᓄᑖᓂᒃ ᐱᕕᒃᓴᖃᕆᐊᒃᓴᖅ, ᓄᑖᓂᒃ ᖃᓄᐃᓕᐅᕈᓘᔭᕈᑎᒃᓴᓂᒃ ᐱᕕᒃᓴᓂᒡᓗ ᑕᐃᒪᙵᓕᒫᖅ," ᐅᖃᖅᑐᖅ ᕈᕼᐊᓐᑕ ᔮᓐᓴᓐ, ᐊᓐᓄᕌᓂᒃ ᑎᑎᕋᐅᔭᖅᑎ ᐊᒻᒪ ᓴᓇᙳᐊᖅᑎᐅᔪᖅ ᐃᐊᑦᒪᓐᑕᓐ ᐋᓪᐴᑕᒥ ᓄᓇᖃᖅᑐᖅ ᑭᓯᐊᓂ ᐱᕈᖅᓴᓚᐅᖅᑐᖅ ᐅᐊᐸᔅᑲ−ᑎᔅᒪᕇᔅ ᐊᒻᒪ ᑳᓕᖕ ᑕᓯᖅ, ᐋᓪᐴᑕᒥ. ᓇᒻᒥᓂᖅ ᐅᖃᐅᔾᔨᒋᐊᖅᐸᓚᐅᖅᑐᖅ ᐊᒻᒪᓗ ᒫᓐᓇ ᒥᖅᓱᖅᑎᐅᓕᖅᑐᖅ ᐊᒻᒪᓗ ᐊᓐᓄᕋᔾᔨᐅᖅᑎᐅᓪᓗᓂ ᐊᐅᓚᑦᑎᕙᑦᑐᓂ ᐊᖏᕐᕋᒥᒃ ᓇᒻᒥᓂᖁᑎᒥᓂᒃ ᑕᐃᔭᐅᔪᒥᒃ ᐊᕼᐊᑯᔅ ᑎᑎᖅᑐᒐᖅᑎ. ᐊᓐᓄᕌᓂᑦ ᑕᑯᔭᒐᖃᖅᑎᑦᑎᔪᓂᑦ, ᐃᓕᓐᓂᐊᖅᓯᓐᓈᑦ ᑲᑎᒪᓂᒃᑯᑦ, ᒥᖅᓱᕐᓂᒃᑯᑦ ᐊᒻᒪ ᑎᑭᓴᕐᓂᒃᑯᑦ, ᓴᓇᕈᓘᔭᖃᑦᑕᖅᑐᖅ. ᐊᒥᓱᑦ ᑎᑭᓴᖅᑕᖏᑦ ᑕᑕᑎᖅᑕᖏᑦ ᖃᓪᓗᓈᖅᑕᓄᑦ, ᐃᓱᒪᒋᕙᖏᑦ ᐊᑎᓕᐅᕈᓯᖏᑦ.

ᑕᒪᓐᓇ ᑲᔪᓯᑦᑎᐊᕐᓂᖃᓚᐅᙱᑦᑐᖅ ᐅᓐᓄᐊᖏᓐᓇᖅ. ᔮᓐᓴᓐ ᒥᖅᓱᖃᑦᑕᓕᓚᐅᖅᑐᖅ ᒪᒃᑯᑦᑐᓂᒃ, ᖃᐅᔨᔭᐅᑎᑕᐅᓯᒪᓪᓗᓂ ᖃᓪᓗᓈᖅᑕᓄᑦ ᐊᓈᓇᑦᑎᐊᒥᓄᑦ ᐱᕈᖃᑎᒋᓚᐅᖅᓯᒪᔭᖓᓄᑦ. ᐃᓕᓐᓂᐊᓚᐅᖅᑐᖅ ᐊᒥᓕᕆᓂᕐᒥᒃ, ᓴᐸᖓᓕᐅᕐᓂᕐᒥᒃ ᐊᒻᒪᓗ ᐊᑐᕆᐊᒃᓴᖅ ᒥᖅᓲᑎᒥᒃ 6-ᓂᒃ 7-ᓂᓪᓘᓐᓃᑦ. 2000-ᒥ, ᔮᓐᓴᓐ ᑕᑯᔭᒐᖃᖅᑎᑦᑎᕕᐅᓚᐅᖅᐳᖅ ᐃᐊᑦᒪᓐᑕᓐ-ᒥᑦ ᑲᑐᔾᔨᖃᑎᒌᒧᑦ ᐊᒻᒪ ᒥᖅᓲᑎᒥᒃ ᓂᐅᕕᖅᑐᓂ ᓂᐅᕕᕐᕕᒻᒥᑦ, ᓴᖅᑮᓚᐅᖅᐳᖅ ᓯᕗᓪᓕᖅᐹᑦᑎᐊᕐᒥᑦ ᐱᓕᕆᐊᖃᕋᔭᖅᑐᒥᑦ. 

ᐊᓐᓄᕌᓂᑦ ᑕᑯᔭᒐᖃᖅᑎᑦᑎᓂᖅ ᐊᐅᓚᓂᖃᑦᑎᐊᓚᐅᖅᐳᖅ, ᑭᖑᒧᑦ ᑕᑯᓐᓇᖅᑐᓂ, ᓇᓗᓪᓗᓂ ᖃᓄᖅ ᑲᑎᑎᓚᐅᕐᒪᖔᕐᒥᐅᒃ ᓇᒻᒥᓂᖅ ᒥᖅᓱᖅᑎᐅᓪᓗᓂ. ᓴᖅᑭᕋᑖᑦᑎᐊᓚᐅᖅᑐᖅ, ᐃᖅᑲᐅᒪᔪᖅ. ᔮᓐᓴᓐ ᑎᑎᕋᕆᐊᕐᖓᓚᐅᖅᑐᖅ ᐃᓱᒪᒥᓂᒃ, ᐅᔾᔨᕈᓱᙱᖦᖢᓂᓘᓐᓃᑦ ᓂᐅᕕᕐᕕᖕᒥᑦ−ᓂᐅᕕᖅᑕᐅᔪᓂᑦ ᐱᐅᓯᖕᓂᑦ ᐱᑕᖃᖅᑐᓂᑦ. ᑎᑎᖅᑐᒐᖏᑦ ᐊᑯᓂᒻᒪᕆᒃ ᓴᖅᑭᖅᓯᒪᓕᕐᒪᑕ. ᑭᖑᓂᐊᒍᑦ ᓯᕗᓪᓕᖅᐹᒥ, ᐃᓂᔅᓴᓕᐅᓕᓚᐅᖅᑐᖅ ᐊᓯᖏᓐᓄᑦ ᑕᑯᔅᓴᐅᑎᑕᐅᔪᓄᑦ ᐊᒻᒪᓗ ᑭᓱᑐᐃᓐᓇᐃᑦ ᐲᖅᐸᓪᓕᐊᓕᖅᑐᑎᒃ. 

ᕿᑐᕐᖓᒥᓂᒃ ᐱᕈᖅᓴᐃᓇᓱᒃᖢᓂ ᐊᒻᒪ ᓴᓇᐅᒐᖏᑦ ᐋᖅᑭᒋᐊᕐᓗᒋᑦ, ᔮᓐᓴᓐ ᓄᖅᑲᖓᓚᐅᑲᓚᐅᖅᐳᖅ ᐅᑎᖅᖢᓂᓗ ᐱᓕᕆᐊᒥᓄᑦ ᓄᑖᒥᒃ ᐱᔪᒃᓯᑎᑦᑎᓪᓗᓂ. ᐊᓈᓇᙳᕆᐅᓚᐅᖅᑐᖅ ᓯᕗᓪᓕᖅᐹᒥ 16-ᖑᑐᐃᓐᓇᖅᑎᓪᓗᒍ ᐊᒻᒪᓗ ᐱᔭᕇᕈᓐᓇᕋᓂ ᐃᓕᓐᓂᐊᖅᑕᒥᓂᒃ ᑭᓯᐊᓂ ᐃᓱᒪᓚᐅᖅᑐᖅ ᐊᓐᓄᕌᓕᐅᖅᑎᑕᐅᓪᓗᓂ ᐊᒻᒪᓗ ᑎᑎᕋᐅᔭᖅᑕᐅᓪᓗᓂ ᕿᑐᕐᖓᒥᓂᒃ ᐱᕈᖅᓴᐃᖔᓕᕐᓂᐊᕐᒪᑦ ᐊᑕᐅᑦᑎᒃᑯᑦ. ᐱᒋᐊᕐᓂᖓᓂ, ᐊᔪᕐᓇᓚᐅᖅᑐᖅ ᐊᖑᒻᒪᑎᓇᓱᒃᖢᓂ ᓂᐅᕐᕈᑎᖃᖅᑎᓪᓗᒍ ᓯᐅᒻᒥᒑᓂᒃ $10-ᓄᑦ $20-ᓄᓪᓘᓐᓃᑦ ᐊᒻᒪ ᖃᑦᑖᓗᖕᓄᑦ $40-ᓄᑦ $50-ᓄᓪᓘᓐᓃᑦ ᑭᓯᐊᓂ ᒫᓐᓇ ᐃᑲᔪᖅᑐᐃᔪᓐᓇᖅᓯᔪᖅ ᐃᓚᒥᓂᒃ ᓴᓇᙳᐊᖅᑕᒥᓂᒃ. 

ᐱᕈᕈᒪᓕᓚᐅᖅᑐᖅ ᓇᖕᒥᓂᖅ−ᐃᓕᓐᓂᐊᖅᓯᒪᔭᒥᓂᒃ ᐱᒋᐊᖅᖢᓂ, ᖃᐅᔨᓚᐅᖅᑐᖅ ᐱᓕᒻᒪᒃᓴᕆᐊᖃᕐᓂᕐᒥᓂᒃ. ᐃᓕᓐᓂᐊᕆᐊᓚᐅᖅᓯᒪᔪᖅ ᐊᓐᓄᕌᓂᑦ ᑎᑎᖅᑐᒐᕐᓂᕐᒧᑦ ᐊᒻᒪ ᑎᑎᖅᑐᒐᕐᓂᕐᒧᑦ ᐃᑦᒪᓐᑕᓐᒥ ᐃᓚᒋᔭᐅᓪᓗᓂ ᐊᕐᕌᒍᒧᑦ ᐊᑕᐅᓯᕐᒧᑦ ᓱᒃᑲᒃᑎᒋᐊᖅᑎᑕᐅᓪᓗᓂ. ᐃᓕᑦᑎᕙᓪᓕᐊᓂᕐᒧᑦ ᐊᔪᕈᓐᓃᖅᓴᒐᒃᓴᐃᑦ ᑕᐅᑦᑐᒃᓴᓕᐅᕐᓂᕐᒧᑦ, ᐋᖅᑭᒃᓱᐃᕙᓪᓕᐊᓂᕐᒧᑦ ᑎᑎᕋᖅᓯᕙᓪᓕᐊᓂᕐᒥᒃ, ᑎᑎᕋᐅᔭᖅᓯᒪᔪᓂᒃ, ᑭᓱᑐᐃᓐᓇᓂᒃ ᐊᓐᓄᕌᓂᒃ−ᐊᒃᑐᐊᓂᓕᖕᓂᒃ, ᔮᓐᓴᓐ ᐊᓂᒍᐃᓚᐅᖅᐳᖅ ᓴᖅᑭᑎᑦᑎᕌᓪᓚᓚᐅᖅᖢᓂ ᖁᓕᓂᒃ ᐊᒡᒍᖅᓯᒪᔪᓂᒃ. 

"ᐊᑐᓕᖁᔭᖃᖅᐳᖓ ᑭᓇᑐᐃᓐᓇᑦᑎᐊᒧᑦ ᒪᒃᑯᒃᑐᒧᑦ ᑭᓇᑐᐃᓐᓇᒧᓪᓘᓐᓃᑦ ᕿᓂᖅᑐᒧᑦ ᐊᓐᓄᕌᓂᒃ ᐋᖅᑭᒃᓱᐃᔪᒪᓂᕐᒥᒃ. ᐱᒻᒪᕆᐅᓱᒋᕙᕋ ᐃᓕᑐᐃᓐᓇᕐᓗᒋᑦ ᐱᓕᕆᔾᔪᑎᓄᑦ ᐃᓕᓐᓂᐊᖅᑎᑦᑎᔾᔪᑎᑦ ᖃᓄᖅ ᑎᑎᕋᕆᐊᕐᖓᕈᓐᓇᕐᒪᖔᖅᐱᑦ ᐅᕝᕙᓘᓐᓃᑦ ᖃᓄᑐᐃᓐᓇᖅ, ᑭᓱᑐᐃᓐᓇᖅ ᓂᐊᖁᕐᓂ, ᑎᑎᕋᕐᕕᒃᓴᕐᒧᐊᕈᓐᓇᖅᑕᑦ ᐃᓅᓯᕐᒧᐊᕐᓗᒍᓗ," ᐅᖃᖅᐳᖅ. 

ᐊᒻᒪ ᓱᓕ ᐊᓐᓄᕌᓕᐅᖅᑐᓂ, ᔮᓐᓴᓐ ᓴᐸᖓᓕᓚᐅᖅᑐᖅ, ᐊᔾᔨᒌᙱᑦᑐᓂᒃ ᐊᑯᓐᓈᕿᔪᓂᒃ ᐱᓇᓱᐊᓚᐅᖅᑐᑎᒃ ᐱᖃᓯᐅᑎᓪᓗᒋᑦ ᓄᑦᑕᕐᓂᖅ, ᐃᖃᓗᒥᓂᖅ ᐊᒻᒪᓗ ᐊᓐᓄᕋᔾᔨᐅᕐᓂᖅ. ᖃᐅᔨᓇᓱᖕᓂᖅ ᐊᔾᔨᒌᙱᑦᑐᓂᒃ ᐱᓕᕆᔾᔪᓯᕐᓂᒃ ᐃᓱᒪᒋᕙᐅᒃ ᐃᓚᒋᔭᐅᓂᖓᓂᒃ ᐃᓱᒪᑐᔫᓂᕐᒧᑦ, ᓇᓂᓯᓂᕐᒥᒃ ᓂᑲᓇᖅᑐᓂᒃ ᐊᒻᒪ ᑕᑯᒥᓇᖅᑐᓂᒃ. "ᑭᓱᓕᒫᓂᒃ ᐆᒃᑐᖃᑦᑕᖅᓯᒪᔪᖓ. ᐃᓱᐊᓂᑦ, ᑎᑎᕋᐅᔭᖏᓐᓇᖅᐸᓚᐅᖅᑐᖓ ᐱᐅᓯᑐᖃᒃᑯᑦ ᐃᓕᖅᑯᓯᖕᓄᑦ ᓴᓇᓯᒪᔪᓂᑦ," ᓴᖅᑭᔮᖅᑎᑦᑎᔪᖅ. 

ᐱᒋᐊᕋᑖᖅᑎᓪᓗᒍ, ᐱᖅᑯᓯᖅ ᐃᓅᓯᖓᑕ ᐃᓚᒋᒻᒪᕆᓚᐅᖅᑕᖓ. ᐅᖃᐅᓯᙵᓚᐅᖅᑐᖅ ᑯᕇ, ᐃᓕᓐᓂᐊᖅᑎᑕᐅᓪᓗᓂ ᐊᓈᓇᑦᑎᐊᒥᓄᑦ ᐊᒻᒪᓗ ᐱᖅᑯᓯᑐᖃᖅᑎᒍᑦ ᐃᓕᓴᐃᓂᕐᒥᒃ ᐊᒻᒪᓗ ᐱᒻᒪᕆᐅᒋᔭᐅᔪᓂᒃ. ᐃᓕᓐᓂᐊᖅᑎᓪᓗᒍ, ᖃᑕᙳᑎᖏᑦ ᓅᓚᐅᖅᓯᒪᔪᑦ ᐃᐊᑦᒪᓐᑕᓐᒧᑦ ᐊᑐᕐᖢᓂᓗ ᐃᓕᖅᑯᓯᒃᑯᑦ ᖁᒃᓴᓪᓚᖕᓂᕐᓂ ᓄᓇᓕᕐᔪᐊᖑᓂᖅᓴᓂ ᐃᓕᓐᓂᐊᓕᓵᖅᑐᑯᓗᖕᓂ, ᐅᖃᕈᓐᓇᙱᖦᖢᓂ ᖃᓪᓗᓈᑎᑐᑦ. ᑖᓐᓇ ᔮᓐᓴᓐ ᓅᑕᐅᓚᐅᖅᓯᒪᔪᖅ ᐊᔾᔨᐅᖏᑦᑐᒧᑦ ᐃᓕᓐᓂᐊᕐᓂᖓᓄᑦ ᐊᒃᓱᕈᖅᖢᓂ ᐊᕙᑎᒋᓂᐊᓕᖅᑕᒥᓂᒃ. "ᐊᓈᓇᑦᑎᐊᒪ ᐃᓕᓐᓂᐊᖅᑎᖃᑦᑕᓚᐅᖅᑕᖏᑦ, ᐱᖅᑯᓯᒃᑯᑦ ᐊᒻᒪ ᑐᒃᓯᐊᕐᓂᒃᑯᑦ. ᑕᐃᒪᓐᓇ ᐊᓂᒍᐃᓚᐅᖅᑐᖓ," ᐃᖅᑲᐅᒪᔪᖅ. 

ᐃᓚᖓᑦ ᐊᖏᓛᖑᔪᖅ ᑐᓗᖅᑕᕈᑕᐅᔪᖅ ᔮᓐᓴᓐ ᐊᖅᑯᓵᖅᑕᓂ ᐊᐅᓚᑦᑎᓪᓗᓂ ᐱᓯᓂᓯᒥᒃ ᐱᕈᖅᓴᐃᓪᓗᓂ ᐅᓄᖅᑐᓂᒃ ᖃᑕᙳᑎᒌᓂᒃ. ᐃᓕᓐᓂᐊᕆᐊᖃᓚᐅᖅᑐᖅ ᖃᓄᖅ ᐊᓈᓇᐅᓂᕐᒥᑦ ᒪᒃᑯᒃᑑᓗᓂ. ᒫᓐᓇᓕ ᐊᓈᓇᒋᔭᐅᔪᖅ 6-ᓄᑦ ᑎᒍᐊᕆᔭᐅᔪᓄᑦ ᐊᒻᒪᓗ ᒪᕐᕉᒃ ᑎᒍᐊᕆᔭᐅᓯᒪᔫᒃ, ᐊᒃᓱᐊᓗᒃ ᓂᑲᒍᓱᖕᓇᕐᒪᑦ ᑕᒪᒃᑯᐊ ᐱᓕᕆᓂᐅᔪᑦ ᐊᑯᓂᐅᔪᓐᓇᖅᑎᓪᓗᒋᑦ. ᐊᖓᔪᑦᓯᐅᓂᖅᓴᐃᑦ ᕿᑐᕐᖓᖏᑦ ᐃᑲᔪᖅᓯᒪᔪᑦ ᓄᑲᖅᑎᐅᓂᕐᓴᓂᒃ ᐊᒻᒪ ᐅᐃᖓ ᐃᑲᔪᕐᓯᒪᒻᒥᔪᖅᑕᐅᖅ, ᓴᖅᑮᑦᓱᓂ ᐃᑲᔪᖅᓯᒍᑎᓂᒃ ᐱᓇᓱᐊᕐᑕᒥᓂᒃ ᖁᕕᐊᒋᔭᒥᓂᒃ. ᐱᖃᓐᓇᕆᔭᐅᔪᑦ ᐊᒻᒪ ᖃᑕᙳᑎᒋᔭᐅᔪᑦ ᐱᔭᕆᐊᖃᕌᖓᑕ, ᑎᓕᐅᕐᓗᒋᑦ ᐃᑲᔪᐃᓐᓇᖁᓗᒋᑦ. 

ᖃᑕᙳᑎᖏᑦ ᐃᑲᔪᑐᐃᓐᓇᖅᐸᙱᒻᒪᑕ ᓇᖕᒥᓂᖅ ᐱᓕᕆᔪᓐᓇᖅᓯᖁᓪᓗᒍ, ᐱᓕᕆᖃᑎᖃᖅᐸᒃᑭᓪᓗᑎᒃ ᓇᖕᒥᓂᖁᑎᒥᓂᒃ. ᐅᐃᖓ ᑎᑎᕋᓕᐅᓲᖅ, ᐊᑕᐅᓯᖅ ᐸᓂᖓ ᓴᐸᖓᓕᐅᓲᖅ ᒥᖅᓱᖅᑎᓪᓗᒍ. ᐊᒻᒪᓗᑦᑕᐅᖅ ᐱᓕᕆᖃᑎᖏᑦ, ᖃᑕᙳᑎᖏᑦ ᐱᔪᒪᓕᕈᑎᒋᓪᓗᐊᑕᕐᒥᔭᖓᑦᑕᐅᖅ ᐱᓕᕆᑦᑎᐊᕈᓐᓇᕐᓂᖓᓄᑦ. ᓄᓇᓕᖓᑦ ᐱᔪᒃᓯᑎᑦᑎᕙᒃᑭᕗᖅᑕᐅᖅ ᐊᒻᒪᓗ ᖁᕕᐊᒋᓪᓗᓂᐅᒃ ᑐᓂᓯᔭᕆᐊᒃᓴᖅ ᐅᖃᐅᔾᔪᖅᑕᐅᓂᕐᒥᒃ ᐃᑲᔪᖅᑐᐃᓂᕐᒥᒡᓗ.

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒧᑦ ᓇᖕᒥᓂᖅ ᑲᒪᒋᑦᑎᐊᕐᓂᖅᓴᐅᓇᔭᖅᑕᖓ ᐃᓱᒪᖓ. ᕿᑐᕐᖓᒥᓂᒃ ᑮᓇᐅᔭᓂᒡᓗ ᑲᒪᑦᑎᐊᖅᖢᓂ, ᖃᐅᔨᒪᙱᖦᖢᓂ ᖃᓄᐃᓕᐅᕆᐊᒃᓴᖅ. ᐅᓪᓗᒥ, ᔮᓐᓴᓐ ᐅᐸᓗᖓᐃᔭᐅᑎᖃᓕᖅᑐᖅ ᖃᓄᐃᙱᑦᑎᐊᖏᓐᓇᖁᓪᓗᒍ ᒪᒥᓴᕋᓱᒃᐸᒃᖢᓂᓗ ᕿᒪᒃᓯᓚᐅᑲᒃᖢᓂ ᐊᓯᒥᓄᑦ ᐅᖃᖃᑎᖃᕆᐊᒃᓴᖅ ᑭᓇᒥᑭᐊᖅ. ᐅᖃᐅᓯᖃᕈᓐᓇᕐᓂᖅ ᐊᑐᖅᓯᒪᔭᒥᓂᒃ ᐃᑲᔪᕐᓂᖃᖅᐳᖅ, ᐅᑎᕐᓂᖓ ᐅᑎᖅᑎᓪᓗᒍ ᓄᑖᙳᕆᐊᖅᑎᖦᖢᒍᓗ ᓄᑖᓂᒃ ᐊᓂᒍᖅᑎᓐᓇᓱᒋᐊᖃᖅᐸᒃᑐᓂᒃ. "ᐃᓱᒪᒋᔭᕋ ᒪᒃᑯᒃᑐᑦ ᖃᓄᐃᓕᐅᕆᐊᖃᓪᓚᕆᖕᓂᖏᓐᓂᒃ ᑲᒪᒋᔭᖃᕐᓗᑎᒃ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᖏᓐᓂᒃ. ᐱᒻᒪᕆᐊᓘᔪᖅ," ᐅᖃᐅᔾᔨᔪᖅ. 

ᐊᑕᐅᓯᐊᕐᖢᓂ, ᕌᓐᑕ ᔮᓐᓴᓐ ᑲᑉᐱᐊᓱᙱᖦᖢᓂ ᐱᕕᖃᕐᖢᓂᓗ ᐱᔪᒪᔭᖏᓐᓂ, ᓄᑦᑐᕐᖢᓂ ᓯᕗᓪᓕᕐᒥ ᐊᓐᓄᕌᓂᑦ ᑕᑯᒃᓴᐅᑎᑦᑎᓂᕐᒥ ᐱᓕᒻᒪᒃᓴᕐᓂᖃᙱᖦᖢᓂ. ᑕᐃᒪᙵᓂᑦ ᖃᑕᙳᑎᒥᓂᒃ ᐱᕈᖅᓴᐃᓚᐅᖅᐳᖅ ᐊᔪᙱᓐᓂᕐᒥᓂᒃ ᖁᕝᕙᖅᓯᑎᖦᖢᓂᒋᑦ, ᑲᑎᙵᓪᓗᑎᒃ ᖁᕕᐊᒋᔭᖃᖅᖢᑎᒃ ᐊᒻᒪ ᐱᔾᔪᑎᖃᖅᖢᑎᒃ ᐱᓇᔪᓪᓚᕆᒃᖢᑎᒃ. ᑭᓱᓕᒫᑦ ᑲᑎᓚᐅᖅᑐᑦ ᐃᓱᐊᓂ ᖃᑕᙳᑎᖏᓪᓗ ᓴᓂᑦᑎᐊᖓᓂ, ᑲᔪᓯᑦᑎᐊᕐᒥᔪᑦᑕᐅᖅ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.