ᑎᒥᒃᑯᑦ ᐱᓕᒻᒪᒃᓴᖅᑐᖃᕐᓂᐊᕌᖓᑦ, ᕆᑦᓱᑦ ᐱᓕᓯᐊ−ᓚᓱ ᐃᑲᔪᑐᐃᓐᓇᕆᐊᓕᒃ. ᐲᓕᓯᐊ−ᓚᔅ ᓕᓇᒃᔅ ᕿᑭᖅᑕᖓᓂᙶᖅᑐᖅ ᐱᕈᖅᓴᓚᐅᖅᓯᒪᓪᓗᓂᓗ ᐃᓅᓯᓕᒫᐸᓗᐊᓄᑦ ᓵᓚᑦᑕᐅᓐᒥ, PE−ᒥ, ᑭᓯᐊᓂ ᐃᓅᓚᐅᖅᓯᒪᔪᖅ ᐅᐃᓂᐹᒡᒥ, ᒫᓂᑑᐸᒥ. ᐱᓕᕆᓯᒪᔪᖅ ᐊᒥᓱᓂᒃ ᐱᔾᔪᑎᖃᖅᑐᓂᒃ ᐋᓐᓂᐊᖃᖅᑕᐃᓕᒪᓂᕐᒥᒃ ᐊᒻᒪᓗ ᐃᖃᐃᓕᓴᕐᓂᕐᒥᒃ ᑕᐃᒪᙵᓂᒃ ᐱᙳᐊᖃᑦᑕᓚᐅᕐᒪᑦ ᐊᖅᓴᕐᒥᒃ ᐃᓕᓐᓂᐊᕐᕕᐊᓗᒻᒥ.

ᓯᓚᑦᑐᖅᓴᕐᕕᖕᒦᓚᐅᖅᑎᓪᓗᒍ, ᖃᔅᓯᑲᓪᓚᖕᓂᒃ ᐃᖅᑲᓇᐃᔮᖃᓕᓚᐅᖅᑐᖅ, ᓲᕐᓗ ᓇᖕᒥᓂᖅ ᐃᓕᓴᐃᔨᙳᖅᖢᓂ, ᐃᖅᑲᓇᐃᔭᖅᖢᓂ ᔪᐊᑕᓐ ᑐᙵᕕᖓᓄᑦ ᐱᓕᕆᐊᒧᑦ, ᐱᓕᕆᖃᑎᖃᖅᖢᓂ ᓄᓇᖃᖅᑳᖅᓯᒪᔪᑦ ᐱᙳᐊᕈᓯᖏᓐᓂᒃ, ᐊᒻᒪ PEI ᓄᓇᖃᖅᑳᖅᓯᒪᔪᑦ ᐱᙳᐊᕈᓯᖏᓐᓂᒃ.

ᑭᓯᐊᓂ ᑕᐃᒪᐃᖏᓐᓇᐅᔭᓚᐅᙱᑦᑐᖅ. ᐲᓕᓯᐊ-ᓛᔅ ᐅᖃᖅᐳᖅ ᓱᕈᓯᐅᒐᒥ ᖀᒥᒍᓱᑦᑎᐊᓚᐅᕐᒪᑦ ᐊᒻᒪ ᖀᒥᒋᑦᑎᐊᖅᑐᓂᒋᑦ ᐱᙳᐊᕐᓃᑦ, ᐅᖃᖅᑐᓂ ᐱᙳᐊᕐᓂᓕᒫᑦ ᓄᖅᑲᕋᓱᐊᖃᑦᑕᕐᓂᕋᖅᑐᓂᒋᑦ.

ᒍᓚᐃᑦ 10-ᒦᑎᓪᓗᒍ ᐊᒻᒪᓗ ᓴᖑᒍᓐᓇᓚᐅᖅᓯᒪᒻᒥᔪᖅ ᐃᓅᓯᖏᓐᓂᒃ ᕿᑎᒃᑎᑦ ᐅᕝᕙᓘᓐᓃᑦ ᐃᓅᓯᖏᓐᓂᒃ ᐱᕋᔭᑉᐸᑦᑐᑦ ᐊᒻᒪᓗ ᓂᒐᓇᖅᑐᑦ, ᐃᓚᖏᑦ ᐱᖃᓐᓇᕆᔭᖏᑦ ᑕᐃᑦᓱᒪᓂ.

ᑭᓯᐊᓂ ᑕᐃᒪᐃᒍᓐᓇᖅᓯᓚᐅᖅᑎᓐᓇᒍ, ᐊᓇᐅᓕᒑᕐᓂᖅ ᐱᒋᐊᓯᓚᐅᖅᑐᖅ.

"ᐱᖃᓐᓇᕆᔭᖃᓚᐅᖅᑐᖓ ᐊᓇᐅᓕᒑᖅᑎᓂᑦ. ᑎᓕᐅᕆᓚᐅᖅᑐᑦ ᐅᕙᓐᓂᒃ ᐃᓚᐅᖁᔭᐅᓪᓗᖓ. ᑕᐃᒪ ᑖᖅᑐᒦᒍᓐᓃᖅᑯᖓ. ᖁᑭᕆᐊᓚᐅᖅᑕᕋ ᓇᒡᓕᒋᑦᑎᐊᖅᖢᒍᓗ," ᐅᖃᖅᑐᕕᓂᖅ ᐱᓕᓯᐊ−ᓛᔅ.

"ᑕᒪᓐᓇ ᐅᕙᓐᓄᑦ ᖁᕕᐊᒋᑦᑎᐊᓚᐅᖅᑕᕋ ᐊᒻᒪ ᐱᔪᒃᓯᓂᕆᓚᐅᖅᑕᕋ ᐃᒡᓗᖔᖓᓄᑦ ᑐᖓᓱᒍᑎᒋᔪᒪᓚᐅᖅᑕᕋ. ᑕᒪᓐᓇ ᐃᓱᒪᒋᔪᓐᓃᒻᒪᕆᓕᓚᐅᖅᑕᕋ ᐋᓐᓂᖅᑎᕆᓂᖅ, ᐱᕋᔭᖃᑦᑕᕐᓂᖅ."

ᐱᙳᐊᕇᕋᒥ ᒫᓂᑑᕙᒥ, ᐅᑎᓚᐅᖅᑐᖅ ᐳᕆᓐᔅ ᐃᐊᑦᕗᑦ ᐊᐃᓚᓐᒧᑦ ᐃᓚᖏᓪᓗ ᐃᓚᐅᖃᑕᐅᓪᓗᑎᒃ ᐊᓇᐅᓕᒑᖅᑎᓂᑦ ᐃᓕᓐᓂᐊᕐᕕᖏᓐᓂᑦ ᐊᕐᕌᒍᓄᑦ ᖃᔅᓯᐊᕐᔪᖕᓄᑦ ᐅᓪᓗᕆᐊᖃᑦᑕᕈᒫᖅᑐᖅ ᐊᕐᕌᒍᑕᒫᑦ ᐳᕆᓐᔅ ᐃᐊᑦᕗᑦ ᐊᖅᓴᖅᑎᖏᓐᓄᑦ.

ᑭᖑᓂᑦᑎᐊᖓᒍᑦ, ᐃᓱᒪᓕᓚᐅᖅᑐᖅ ᐱᙳᐊᕐᓂᕐᒧᑦ ᐸᕐᓇᒍᑎᒥᒃ ᐱᙳᐊᕐᓂᐊᕐᓗᓂ ᒫᓂᑑᕙᒥ ᐱᓴᓐᒧᑦ ᐱᔾᔪᑎᒋᓪᓗᒍ ᖃᐅᔨᒪᓂᕆᓚᐅᖅᑕᖓ ᐃᓕᒌᓄᑦ ᐊᒻᒪᓗ ᖃᐅᔨᒪᓚᐅᖅᑐᓂ ᑲᒪᔨᒥᒃ.

"ᕿᓂᕈᔪᒃᑲᒪ ᑖᖅᑐᒥᑦ. ᐃᕐᖐᓐᓇᒃᑰᕈᑎᒃᑯᑦ ᐊᐅᓪᓚᖅᑎᓚᐅᖅᐸᕋ ᐅᖃᖅᑐᖓᓗ, 'ᑰᑦ ᑑᐱ, ᐱᙳᐊᕈᒪᑦᑎᐊᕋᒪ ᒫᓂᑑᕙᒥ ᐱᓴᓐᔅᒧᑦ, ᖃᓄᖅ ᐃᓱᒪᕕᑦ ᐱᕕᔅᓴᖃᕆᐊᖓ?' ᖁᑭᖅᓯᑲᐅᑎᒋᓪᓗᓂᓗ, ᐅᑎᑲᐅᑎᒋᓪᓗᓂ," ᐅᖃᖅᑐᕕᓂᖅ ᐱᓕᓯ−ᓛᔅ.

ᑲᒪᔨᒋᔭᖓᑦ ᐅᖃᐅᑎᓚᐅᖅᐹᖓ ᐆᒃᑐᕈᒪᓂᕋᖅᑐᓂ ᐊᒻᒪᓗ ᐃᓱᒪᓪᓗᓂ ᓈᒻᒪᒐᔭᕆᐊᖓᓂᒃ ᐃᓕᒌᓄᑦ, ᑕᐃᒪᓕ ᐲᓕᓯ-ᓛᔅ ᐅᐊᓂᐸᐃᒡᒨᓚᐅᖅᑐᖅ, ᐆᑦᑐᖅᑐᓂ, ᐊᒻᒪᓗ ᑭᐱᔭᐅᓪᓗᓂ.

ᑭᓯᐊᓂ ᓅᑉᐸᓪᓕᐊᓂᖓ ᐱᔭᕆᐊᑭᑦᑐᑯᓘᓚᐅᙱᑦᑐᖅ. ᐅᖃᖅᑐᓂ ᐃᓚᐅᖃᑕᐅᕕᓕᐊᕋᒥ ᐊᒻᒪᓗ ᐃᓕᓐᓂᐊᐸᓪᓕᐊᓂᕐᒧᑦ ᓅᑉᐸᓪᓕᐊᓂᖅ ᐱᒡᒐᓇᖅᑑᓚᐅᕐᒪᑦᑕᐅᖅ.

"ᐃᓕᓐᓂᐊᕐᓂᓕᕆᓂᖅ ᐅᕙᓐᓄᑦ ᓯᕗᓪᓕᐅᓚᐅᖅᑐᖅ. ᐊᒻᒪᓗ ᑕᐃᒪᐃᓚᐅᙱᓐᓇᒪ ᓂᕆᐅᒋᓚᐅᖅᑕᓐᓂᒃ. ᓯᕗᓪᓕᖅᐹᒥ ᐊᕐᕌᒍᒥ, ᐊᓂᒍᓚᐅᖅᑕᕋ, ᑭᓯᐊᓂ ᐱᔪᓐᓇᕐᓂᓕᒫᓐᓂᒃ ᐱᓕᕆᓚᐅᙱᓐᓇᒪ," ᐅᖃᖅᑐᖅ ᐱᓕᓯ−ᓛᔅ.

ᐅᖃᓚᐅᖅᓯᒪᔪᖅ ᑕᐃᔅᓱᒪᓂ ᐅᓚᕕᓴᖅᑕᐅᔪᖃᕐᔪᐊᖃᑦᑕᓚᐅᕐᓂᖓᓂᒃ, ᐃᓚᒋᔭᐅᓪᓗᑎᒃ ᐱᖃᓐᓇᕆᔭᐅᔪᑦ ᐊᔾᔨᒌᙱᑦᑐᓂᒃ ᐃᓅᓯᖏᓐᓂᒃ ᐊᖅᑯᑎᓖᑦ ᐊᒻᒪ ᓯᕗᓪᓕᐅᑎᔭᕆᐊᓖᑦ ᑖᒃᑯᓇᙵᑦ ᖃᐅᔨᒪᙱᖦᖢᓂᓗ ᑭᓱᓂᒃ ᓯᕗᓪᓕᐅᑎᔪᒪᔭᒥᓂᒃ ᐃᒻᒥᓄᑦ − ᖃᐅᔨᒪᑐᐃᓐᓇᓚᐅᖅᑐᖅ ᐊᓇᐅᓕᒑᕈᒪᓂᕐᒥᓂᒃ.

ᓯᓚᑦᑐᖅᓴᕐᕕᒡᔪᐊᖓᓂ ᒫᓂᑑᕙᐅᑉ, ᐲᓕᓯ−ᓛᔅ ᐃᓱᒪᓕᐅᓕᓚᐅᖅᑐᖅ ᓈᒻᒪᖕᓂᖅᓴᐅᓂᖓᓂᒃ ᓯᓚᑦᑐᖅᓴᕐᕕᓕᐊᕆᐊᒃᓴᖅ. ᑕᐃᒪᓕ ᕼᐋᓚᓐ ᓯᓚᑦᑐᓴᕐᕕᖓᓅᓚᐅᖅᑐᖅ ᐱ.ᐃ.1-ᒥ ᑕᐃᑲᓂ ᓴᖅᑮᓚᐅᖅᑐᖅ ᓄᑖᒥᒃ ᐊᓇᐅᓕᒑᕐᓂᕐᒥᒃ.

ᑕᒪᓐᓇ ᐱᔭᕆᐊᑭᑦᑑᓚᐅᕋᓗᐊᖅᑎᓪᓗᒍ, ᐱᓕᓯ-ᓛᔅ ᐅᖃᖅᑐᓂ ᓇᒻᒥᓂᖅ ᐅᖃᐅᔾᔨᓂᐊᕈᓂ ᐅᓪᓗᒥ ᐊᑐᕐᓂᐊᕐᓂᕋᖅᑐᓂ ᐊᑐᖅᑕᐃᓐᓇᕆᓗᒋᑦ ᐊᑐᕋᔅᓴᓕᒫᑦ ᓯᓚᑦᑐᓴᕐᕕᕐᔪᐊᕐᒥᑦ ᒫᓂᑑᕙᐅᑉ ᑐᓂᒋᐊᖃᓚᐅᖅᑕᖓ.

"ᐅᕙᓐᓄᑦ ᐅᐱᒍᓱᓗᐊᓚᐅᕋᒪ. ᐅᐱᒍᓱᓗᐊᓚᐅᕋᒪ ᐊᒻᒪᓗ ᐃᓕᓴᐃᔨᖃᕆᐊᖃᖅᑐᒋᓚᐅᙱᓐᓇᒪ. ᐱᔭᕆᐊᖃᕋᓱᒋᓚᐅᙱᑦᑐᖓ ᑲᔪᖏᖅᓴᐃᔨᒥᑦ, ᑭᓯᐊᓂ ᑖᒃᑯᐊ ᐱᑕᖃᖅᑐᑦ ᑕᐃᑲᓃᓚᐅᖅᑐᑦ," ᐅᖃᖅᑐᖅ ᐱᓕᓯᐊ−ᓚᔅ.

"ᐃᑲᔪᖅᑕᐅᔭᕆᐊᖃᕈᕕᑦ ᑭᓱᑐᐃᓐᓇᕐᒧᑦ, ᐊᐱᕆᓗᑎᑦ. ᐃᓄᐃᑦ ᑕᐃᑲᓃᖏᓐᓇᕈᒪᐃᓐᓇᐅᔭᖅᑐᑦ ᐃᑲᔪᖅᓱᐃᓗᑎᒡᓗ ᐊᔪᙱᑐᐊᕌᖓᕕᑦ."

ᖁᔭᓐᓇᒦᑦᑎᐊᕐᒥᔭᕋ ᔮᔅᒥᓐ ᑲᐸᑕᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.