"ᒥᖅᓱᕐᓂᖅ ᐃᓚᒋᔭᐅᕐᔪᐊᖅᐳᖅ ᒪᒥᓴᕐᓂᕐᒧᑦ ᐊᒻᒪ ᑐᙵᑦᑎᐊᕐᓂᕐᒧᑦ ᐱᒻᒪᕆᐅᓪᓗᓂᓗ ᐅᕙᑦᑎᓐᓄᑦ," ᕌᐱᓐ ᒪᒃᓚᐅᑦ−ᒥᙶᖅᑐᖅ. ᐱᕈᖅᓴᓚᐅᖅᑐᖅ ᕗᐊᑦ ᐱᑦᔅᒥᑦ ᐊᒻᒪᓗ ᒥᖅᓱᕆᐅᖅᓴᓪᓗᓂ ᒪᒃᑯᒃᖢᓂ, purses, mukluks ᐊᒻᒪᓗ moccasins-ᓂᒃ. ᓴᐸᖓᓕᓚᐅᖅᐳᖅ ᐊᒻᒪ ᐃᓕᖅᑯᓯᑐᖃᖓᑕ ᒥᒃᓵᓄᑦ ᐊᒻᒪ ᓄᓇᓕᖓᑕ ᐅᓂᒃᑳᖅᑐᐊᖏᓐᓂᒃ ᑲᒪᓇᖅᑐᓂᒃ ᐊᕐᓇᓂᒃ ᐱᕈᖅᓴᔭᐅᖃᑦᑕᓚᐅᖅᑐᓂᒃ. ᐃᓐᓇᐃᑦ ᐃᓕᓐᓂᐊᕐᕕᓕᐊᓚᐅᖅᑐᑦ ᐊᐅᓪᓛᕈᓐᓇᖅᖢᓂᓗ ᐃᓕᖅᑯᓯᑐᖃᒥᓂᒃ ᐊᔪᕈᓐᓃᖅᓴᕆᐊᖅᑐᖅᖢᓂ.

"ᐊᓕᐊᓇᐃᒍᓱᑦᑎᐊᓚᐅᖅᐳᖓ ᑕᒪᒃᑯᓂᖓᓕᒫᖅ ᓂᒡᓚᖅᓯᔪᓐᓇᓚᐅᕋᒪ ᐊᒥᓱᑦ ᐃᓄᐃᑦ ᐊᑐᕈᓐᓇᖅᑰᙱᒻᒪᑕ ᐃᓅᓯᖏᓐᓂᒃ ᐱᕈᖅᐸᓪᓕᐊᑎᓪᓗᒋᑦ, ᖃᐅᑕᒫᑦ ᐃᓕᖅᑯᓯᖃᕈᓐᓇᖅᖢᑎᒃ," ᐃᓱᒪᑦᑎᐊᙱᖦᖢᓂ. ᒥᖅᓱᕐᓂᖅ ᐊᑐᖅᑕᐅᕙᒃᐳᖅ ᑕᒪᐃᓐᓄᑦ ᐃᓚᖏᓐᓄᑦ ᐊᓈᓇᖓᑕᓗ ᐃᓚᖏᓐᓄᑦ ᐱᓗᐊᙳᐊᖅᖢᓂ ᓴᓇᙳᐊᕐᓂᒻᒪᕆᐅᕙᒃᐳᖅ ᓴᓇᑐᓐᓇᑦᑎᐊᖅᖢᓂᓗ.

ᒫᓐᓇᕋᑖᖅ, ᒪᒃᓚᐅᑦ ᐃᓅᓯᓕᒫᕐᒧᑦ ᑎᑭᐅᑎᓚᐅᖅᑐᖅ ᐃᓚᒋᔭᐅᓂᕐᒧᑦ ᐊᓐᓄᕌᓂᑦ ᓴᖅᑭᔮᖅᑎᑦᓯᓂᕐᒧᑦ ᑐᕌᓐᑐᒥᑦ. ᐊᓈᓇᖓ ᐸᓂᖓᓗ ᐃᓚᐅᖃᑕᐅᓪᓗᑎᒃ. ᐊᑯᓂᒻᒪᕆᒃ ᑕᐃᑲᓃᓕᕐᓂᖅ. ᓯᓐᓇᑦᑑᒪᒋᓚᐅᖅᓯᒪᓪᓗᓂᐅᒃ ᐊᑯᓂᒻᒪᕆᒃ ᐊᒻᒪᓗ 5-ᓂᒃ ᐊᕐᕌᒍᓂᒃ ᓯᕗᓂᐊᒍᑦ, ᑕᑯᓐᓇᒐᖃᕐᓂᖅᓴᐅᓚᐅᖅᑐᖅ ᐊᓐᓄᕌᓂᒃ, ᓴᐸᖓᓕᖅᓯᓪᓗᓂ ᐊᒻᒪᓗ ᒥᑕᐅᑎᖃᑦᑐᓂ. ᐱᔭᕇᕇᓚᐅᖅᑐᖅ ᒪᕐᕉᓐᓂᒃ ᐊᕐᕌᒎᓐᓂᒃ ᐊᓐᓄᕌᓕᐅᕐᓂᕐᒧᑦ ᐃᓕᓐᓂᐊᖅᑐᓂ ᐊᒻᒪᓗ ᑲᔪᓯᓪᓗᓂ ᐊᕐᕌᒍᒥᒃ ᑕᑯᓐᓇᒐᓕᐅᕐᓂᕐᒧᑦ ᐃᓕᓐᓂᐊᖅᑐᓂ. ᑕᐃᑲᙵᑦ, ᓴᓇᓚᐅᖅᑐᖅ ᓄᐊᑕᐅᓯᒪᔪᓂᒃ ᐊᒻᒪᓗ ᑐᓂᔭᐅᓪᓗᓂ ᑐᓂᕐᕈᑎᓂᒃ ᑲᓇᑕᒥ ᑲᑎᒪᔨᖏᓐᓂᒃ ᓴᓇᐅᒐᓕᕆᓂᕐᒧᑦ. ᐊᒃᓱᕈᖅᖢᓂ ᐱᓕᕆᓚᐅᖅᑐᖅ ᑭᓱᓕᒫᓂᒡᓗ ᐱᔭᕇᖅᓯᓪᓗᓂ ᐊᒻᒪ ᖃᓂᒪᓐᓇᖅ ᑎᑭᖦᖢᓂ. ᓄᓇᖃᖅᑳᖅᓯᒪᔪᑦ ᐊᓐᓄᕋᔾᔨᐅᖅᑏᑦ ᐊᑐᐃᓐᓇᐅᓕᖅᑎᓪᓗᒋᑦ ᐃᓅᓇᓱᒃᑲᓐᓂᓕᕐᖢᓂ ᐱᓇᔪᒃᑲᓐᓂᕐᖢᓂ ᐊᖏᖅᑕᐅᓪᓗᓂᓗ.

"ᖁᕕᐊᓇᒐᓚᓚᐅᖅᑐᖅ ᑐᕌᒐᕋ ᐱᔭᕇᖅᑎᓪᓗᒍ. ᐊᓂᒍᕐᒪᑦ, ᐅᐱᒋᔭᒻᒪᕆᒋᕙᒃᑲ ᐱᓕᕆᐊᕆᔭᖏᑦ. ᑭᓯᐊᓂ ᐃᒪᐃᓕᖓᒻᒪᑦ, ᖃᓄᐃᓕᐅᕐᓂᐊᓕᖅᐳᖓᓕ ᒫᓐᓇ? ᖃᐅᓯᕈᔪᑦᑐᖅ ᐱᔭᕇᔭᕋᐃᒐᕕᑦ ᑐᕌᒐᓕᒫᓐᓂᑦ ᐃᓅᓯᕐᓂᑦ," ᒪᒃᓚᐅᑦ ᒥᑕᔅ.

ᐅᐸᓗᖓᐃᔭᖅᐸᓪᓕᐊᓪᓗᓂ ᐃᓅᓯᒃᓴᒧᑦ ᐊᓐᓄᕋᔾᔨᐅᖅᑎᐅᓂᕐᒧᑦ ᐃᓕᓐᓂᐊᖅᑎᓪᓗᒍ ᐊᓐᓄᕌᓂᒃ, ᒪᒃᓚᐅᑦ ᐃᓕᓐᓂᐊᑦᑎᐊᓚᐅᖅᑐᖅ ᐊᒻᒪᓗ ᑕᐸᐃᓚᐅᖅᑐᖅ ᖃᔅᓯᓂᑦ ᐸᐃᑉᐹᓂᑦ ᑎᑎᕋᕆᐊᖃᕐᒪᖔᖅ. ᑎᑎᕋᓚᐅᖅᑐᖅ ᓴᐸᖓᓕᕆᓪᓗᓂ ᐊᒻᒪᓗ ᐊᓪᓚᓂᒃ, ᖃᐅᔨᓴᖅᑐᓂ ᖃᓄᖅ ᐊᓪᓚᐃᑦ ᐊᒻᒪᓗ ᐊᓪᓚᖓᔪᑦ ᐊᑐᖃᑦᑕᓚᐅᕐᒪᖔᑕ ᕼᐊᓐᓇᓚᖏᓐᓃᑦᑐᓂᒃ ᐊᕐᕌᒍᓂᒃ. ᑕᒪᒃᑯᐊᓕᒫᑦ ᐃᓱᒪᖏᑦ ᓄᑖᖑᓚᐅᖅᑐᑦ ᐱᔭᕇᖅᑎᓪᓗᒍ ᐊᒻᒪᓗ ᑎᑎᕋᐅᔭᖅᐸᓪᓕᐊᓕᖅᑎᓪᓗᒍ. ᐃᓄᖁᑎᖏᑦᑕ ᐊᓐᓄᕌᖏᑦ ᐊᒻᒪ ᓄᓇᑖᖅᓯᒪᓕᖅᑐᑦ ᐅᑭᐅᖅᑕᖅᑐᒥ, ᓴᖅᑭᑦᑎᓚᐅᖅᓯᒪᔪᖅ ᑐᙵᕕᖃᖅᖢᓂ ᑕᐃᔅᓱᒪᓂᓕᑕᕐᓂᒃ ᐊᔾᔨᙳᐊᓂᒃ ᐊᒻᒪ ᐅᖃᓕᒫᖃᑦᑕᓚᐅᖅᑕᖏᓐᓂᒃ ᐃᓄᐃᑦ ᓇᒡᓕᒋᖃᑦᑕᓚᐅᖅᑕᖏᓐᓂᒃ.

ᓴᓇᔨᐅᓪᓗᓂ, ᒪᒃᓚᐅᑦ ᓱᒃᑲᐃᑦᑐᒥᒃ ᓴᓇᖃᑦᑕᖅᑐᖅ. ᓯᖓᐃᓪᓗᓂ ᐊᓈᓇᐅᓪᓗᓂ ᓄᑕᕋᐅᓪᓗᓂ, ᐊᔪᕐᓇᖅᑐᖅᓯᐅᖃᑦᑕᖅᑐᖅ ᐱᔭᕇᖅᓯᓇᓱᒃᖢᓂ ᑭᓯᐊᓂ ᐊᔪᙱᓐᓂᓕᒫᒥᓂᒃ ᐱᓕᕆᓲᖅ. "ᐅᖃᐅᔾᔨᖏᓐᓇᓲᖑᔪᖓ ᐃᓄᖕᓂᒃ, ᓲᕐᓗ, ᓴᓇᙳᐊᖃᑦᑕᑐᐊᕈᕕᑦ 15 ᒥᓂᑦᒥᒃ ᐅᓪᓗᖅ ᐊᑕᐅᓯᖅ, 10 ᒥᓂᑦᔅ ᐅᓪᓗᖅ ᐊᑕᐅᓯᖅ, 5 ᒥᓂᑦᒥᒃ ᐅᓪᓗᖅ ᐊᑕᐅᓯᖅ, ᓱᖁᑕᐅᙱᑦᑐᖅ, ᖃᐅᑕᒫᑦ ᑕᐃᒪᐃᓕᐅᖏᓐᓇᑐᐊᕈᕕᑦ. ᑕᒪᓐᓇ ᐱᒻᒪᕆᐅᕗᖅ. ᑕᕝᕘᓇ ᑕᑯᕗᑎᑦ ᑲᔪᓯᕙᓪᓕᐊᓂᕆᔭᐅᔪᒥᒃ ᐱᓕᕆᐊᕆᔭᕐᓂ," ᐊᒃᑐᐊᓂᖃᖅᐳᖅ. ᓇᒻᒥᓂᖅ ᐅᖃᐅᔾᔨᒋᐊᖅᐸᑦᑐᖅ ᐊᒻᒪᓗ ᖃᐅᑕᒫᑦ ᐱᓂᖅᓴᐅᒐᓱᐊᖅᑐᓂ ᐊᒻᒪᓗ ᐃᒻᒥᓂᒃ ᓂᑲᒍᓱᒐᓱᐊᖅᑐᓂ.

"ᖁᕕᐊᒋᑦᑎᐊᖅᑕᒃᑲ ᑭᓱᑐᐃᓐᓇᓂᒃ ᓴᓇᕈᓘᔭᕆᐊᒃᓴᖅ ᐊᓕᐊᓇᐃᒋᑦᑎᐊᖅᖢᒍᓗ ᐃᓕᓐᓂᐊᖅᑕᕋ. ᖁᕕᐊᒋᑦᑎᐊᖅᑕᕋ ᐱᓕᕆᖃᑎᖃᕆᐊᒃᓴᖅ ᐃᓐᓇᕐᓂᒃ ᐊᒻᒪᓗ ᑲᔪᖏᖅᓴᐃᔨᓂᒃ ᐊᒻᒪᓗ ᐅᖃᖃᑎᖃᕐᓂᕐᒥᒃ ᐃᓄᖕᓂᒃ ᒥᖅᓱᕐᓂᐅᑉ ᒥᒃᓵᓄᑦ. ᐱᐅᒋᔭᕋ ᑕᑯᓪᓗᓂ ᐊᓯᖏᓐᓂᒃ ᐃᓄᖕᓂᒃ ᖁᕕᐊᓱᒃᑎᑦᑎᔪᓂᒃ ᓴᖅᑭᑎᑦᑎᓂᕐᒥᒃ ᐃᓗᐊᖅᓴᓕᕐᓂᕐᒥᒡᓗ, ᓄᑖᓂᒃ ᓴᓇᓂᖅ ᓄᑖᓂᒃ ᐊᑐᒐᒃᓴᓂᒃ ᐊᑐᕐᓗᓂᓗ ᓄᑖᓂᒃ ᐱᖁᑎᓂᒃ ᐆᒃᑐᕋᐅᑎᓂᒃᓗ. ᓂᒡᓕᓇᑦᑎᐊᖅᑐᖅ," ᐊᓕᐊᓇᖅᐳᖅ.

ᐅᖃᐅᔾᔪᐃᓂᖓ ᐃᓕᓐᓂᐊᖅᑎᓄᑦ ᐊᐅᓪᓚᖅᑐᓄᑦ ᓄᓇᒥᓂᒃ ᐃᒃᐱᒋᔭᖃᑦᑎᐊᖅᐳᖅ. "ᐊᒃᓱᕈᕐᓇᑦᑎᐊᖅᑐᖅ ᓄᓇᓕᔅᓯᓐᓂ ᕿᒪᐃᔭᕆᐊᒃᓴᖅ, ᕿᒪᐃᓗᓂᓗ ᑕᒪᐃᓐᓂᒃ ᐃᓅᖃᑎᒌᖕᓂᕐᓂᒃ ᑭᓱᓕᒫᓂᒡᓗ ᖃᐅᔨᒪᓕᖅᑕᕐᓂᒃ ᐊᑯᓂᐅᔪᒃᑯᑦ, ᑭᓯᐊᓂ ᐱᐅᖕᒥᔪᖅ ᒪᑐᐃᙶᕐᓗᓂ ᓄᑖᓄᑦ ᐊᑐᕐᓂᑯᓄᑦ ᐃᓕᑦᑎᕙᓪᓕᐊᓗᓂᓗ ᓄᑖᓂᒃ ᐊᔪᙱᓐᓂᕐᓂ," ᓇᓗᓇᐃᖅᓯᓪᓗᓂ. ᓄᓇᓕᐸᐅᔭᕐᒧᑦ ᓅᖦᖢᓂ ᐊᒻᒪ ᓄᑖᓂᒃ ᐃᓄᖕᓂᒃ ᐊᓯᔾᔨᖅᐸᓪᓕᐊᓪᓗᓂ ᐋᖅᑭᒋᐊᖅᑕᐅᓚᐅᖅᐳᖅ, ᑕᐃᒪᓐᓇᓗ ᓇᖕᒥᓂᖅ ᐃᓕᑦᑎᔪᒪᓪᓚᕆᒃᖢᓂ ᐅᓚᕕᓴᖅᑕᐅᔪᖃᓗᐊᖅᑎᓪᓗᒍ. ᑕᑯᓚᐅᖅᑐᖅ ᖃᓄᖅ ᑲᔪᓯᑦᑎᐊᖅᓯᒪᔪᑦ ᐃᓕᓐᓂᐊᖃᑎᖏᑦ ᐊᖏᕐᕋᖅᓯᒪᖃᑦᑕᓚᐅᕐᒪᖔᑕ ᐊᒻᒪᓗ ᐃᖅᑲᓇᐃᔭᑐᐃᓐᓇᖅᑐᑎᒃ ᐊᒻᒪᓗ ᑕᑯᓐᓇᒐᓕᐅᖅᑎᓪᓗᒍ ᑕᐃᒪᐃᓚᐅᖅᑐᖅ.

ᐃᓱᐊᓂᑦ, ᐊᓂᒍᐃᓚᐅᖅᑐᖅ ᐅᐱᒋᔭᐅᓪᓗᓂ ᓂᕈᐊᖅᑕᐅᓪᓗᓂᓗ ᓴᖅᑭᔮᖅᑎᑦᑎᓂᖕᒥᑦ ᑐᕌᓐᑐᒥᑦ ᑕᑯᔭᒐᖃᕐᕕᐊᓂᑦ ᑲᓐᑕᒻᐳᕆ ᓴᓇᐅᒐᓂᑦ. ᑕᒪᓐᓇ ᐊᑐᓚᐅᖅᑕᖓ ᐊᔭᐅᕈᑕᐅᓚᐅᖅᐳᖅ ᓴᖅᑭᔮᖅᑎᑦᑎᖃᑦᑕᖁᓪᓗᒍ ᐊᒻᒪ ᓴᖅᑮᓪᓗᓂ ᓴᓈᓂᒃ. "ᖃᐅᔨᑎᑕᐅᑐᐃᓐᓇᓚᐅᖅᑐᖓ ᑕᒻᒪᙱᖦᖢᖓ ᐱᓕᕆᓂᓐᓂᒃ... ᐃᓱᒪᑐᐃᓐᓇᕋᒪᓕ ᐱᓪᓚᕆᒃᑯᕕᑦ ᖃᓄᐃᓕᐅᕈᒪᔭᕐᓂᒃ, ᐊᒻᒪᓗ ᐊᒃᓱᕉᑎᖃᕐᓗᑎᑦ ᐊᓕᐊᓇᐃᒋᔭᕐᓂᒃ, ᑕᐃᒪᓕ ᐱᒻᒪᕆᐅᕗᖅ ᐱᕕᖃᖅᑎᓪᓗᑎᑦ ᐊᒻᒪᓗ ᑐᓂᓯᓗᑎᑦ ᐃᓕᓐᓂᐊᖅᓯᒪᓂᕐᓄᑦ ᐊᒻᒪᓗ ᓯᕗᓂᒃᓴᕐᓄᑦ," ᐅᖃᖅᑐᖅ.

ᐱᕈᖅᓴᓪᓗᓂ ᐅᐃᕆᓯᒪᓂᕐᒥᑦ, ᒪᒃᓚᐅᑦ ᓇᖕᒥᓂᖅ ᐊᒃᓱᕉᑎᖃᓚᐅᖅᑐᖅ ᑭᓯᐊᓂ ᐃᑲᔪᖅᑕᐅᔪᓐᓇᖅᓯᓚᐅᖅᑐᖅ ᖃᑕᙳᑎᖏᓐᓄᑦ ᐊᐃᑉᐸᖓᓄᓪᓗ ᑎᓕᐅᕆᓪᓗᓂ ᑕᒪᒃᑮᓄᑦ ᒪᒥᑉᐸᓪᓕᐊᓂᖓᓄᑦ ᒥᖅᓱᕐᓂᖓᓄᓪᓗ. ᐱᓕᕆᓪᓗᓂ ᐊᖏᖅᓯᒪᓗᐊᓚᐅᙱᑦᑐᖅ ᓴᓇᔪᒪᓪᓚᕆᓕᕋᒥ ᑎᑎᕋᐅᔭᕈᒪᑦᑎᐊᖅᖢᓂᓗ ᐊᒃᓱᕈᕐᓇᖅᑑᓪᓗᓂᑦᑕᐅᖅ. ᐱᕕᖃᖅᑎᓪᓗᒍ ᐱᔭᕇᕋᓱᒃᓗᒍ ᑐᕌᕆᔭᖓ, ᖁᔭᓕᔪᖅ ᓱᓐᓂᐅᒪᙱᖦᖢᓂ, ᐱᓕᕆᓪᓗᓂ ᖁᕕᐊᒋᔭᖏᓐᓂ ᐃᓕᓴᕆᔭᐅᓂᕐᒥᒃᓗ ᐊᔪᙱᓐᓂᖏᓐᓄᑦ.

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒧᑦ ᓇᖕᒥᓂᖅ ᑲᒪᒋᓂᖅᓴᐅᓇᔭᖅᑐᖅ ᐃᖕᒥᓂᒃ ᐊᓯᒥᓂᒡᓗ. ᐃᓅᓱᒃᑑᓪᓗᓂ, ᐊᒃᓱᕉᑎᖃᓚᐅᖅᑐᖅ ᓯᕘᕋᓂᕐᒥᒃ, ᓂᑲᓪᓗᖓᓂᕐᒥᒃ ᐊᒻᒪ ᑲᖐᒋᔭᐅᔪᓂᒃ ᖃᐅᔨᔭᐅᓯᒪᙱᖦᖢᓂ ADHD−ᒥᒃ ᐊᒻᒪ ᐃᒻᒥᓂᒃ ᐅᖃᐅᑎᓪᓗᓂ ᓱᖁᑎᒃᓴᙱᓐᓂᕋᖅᖢᓂ ᑭᓱᓂᒃ ᑭᓯᐊᓂ ᖃᐅᔨᓕᓚᐅᖅᑐᖅ ᑕᐃᒪᐃᓚᐅᕐᓂᖓᓂᒃ. ᐅᑎᕐᕕᒃᓴᖓ ᒪᓕᒡᓗᒍ, ᐱᒋᐊᓪᓚᒃᑲᓐᓂᕋᔭᖅᑐᖅ ᐱᒻᒪᕆᐅᓂᖓ ᓇᖕᒥᓂᖅ ᓄᓇᓕᖕᒥᓗ ᑲᒪᑦᑎᐊᕐᓂᖅ ᑎᓕᐅᕆᓪᓗᓂᓗ ᐃᖕᒥᓂᒃ ᑲᑕᒃᓯᒪᓗᐊᖁᙱᖦᖢᒍ.

ᐊᐅᓚᓐᓂᐊᕐᓗᒍ ᐃᓱᒪᖓ ᖃᓄᐃᙱᑦᑎᐊᕐᓂᖓᓗ, ᒪᒃᓚᐅᑦ ᐅᖃᖃᑎᖃᖅᑐᖅ ᐃᓅᓯᓕᕆᔨᒥᒃ ᐅᖃᐅᔾᔨᒋᐊᕐᓂᕐᒧᑦ ᐃᑲᔪᖅᓱᐃᓂᕐᒧᓪᓗ ᐊᒃᓱᕈᕐᓇᖅᑐᓄᑦ ᐃᓅᓯᕐᒥ. ᐃᑲᔪᖅᑎᖃᕐᓂᖅ ᑕᒪᓐᓇ ᐱᒻᒪᕆᐅᓱᒋᒻᒪᒍ ᐊᒻᒪᓗ ᐃᓚᖏᑦ ᑲᑎᓐᖓᓪᓗᑎᒃ. ᐱᖁᔨᖕᒥᔪᖅᑕᐅᖅ ᓄᓇᓕᖕᒥ ᖃᓄᐃᙱᑦᑎᐊᕐᑐᓕᕆᓂᕐᒧᑦ ᐱᓕᕆᐊᒃᓴᓕᕆᓂᕐᓂ ᐃᑲᔪᖅᑕᐅᓗᓂ ᐋᖅᑭᒃᓯᒪᐃᓐᓇᖅᑎᓪᓗᒍ ᓱᓐᓂᐅᒪᓂᖅ.

ᑕᐃᒪᓕ ᑐᓱᓐᓇᕐᓂᖓ ᒪᓕᒃᖢᒍ, ᒪᒃᓚᐅᑦ ᐃᓚᒥᓄᑦ ᑕᐅᑐᖕᒪᑦ ᐊᒻᒪᓗ ᐊᓈᓇᑦᑎᐊᒃᑯᖏᑦ ᑕᒪᕐᒥᒃ ᐊᔪᓐᖏᑎᐊᖅᑐᑦ ᓴᓇᙳᐊᖅᑎᐅᔪᑦ. ᐊᓈᓇᑦᑎᐊᖓ ᓱᓕ ᒥᖅᓱᖅᑐᖅ ᓴᐸᖓᐅᓪᓗᓂᓗ 95-ᓂᒃ ᐊᒫᖅᖢᓂ. "ᑕᑯᓗᒋᑦ ᓈᒻᒪᑦᑎᐊᕐᓂᖏᑦ ᑕᒪᕐᒥᒃ ᐊᓈᓇᑦᑎᐊᒪ ᐱᓕᕆᐊᖏᑦ ᐊᒻᒪ ᑎᑎᕋᐅᔭᖅᑕᖏᑦ ᐊᒻᒪ ᑎᑎᕋᖅᑕᖏᑦ... ᐅᐱᒍᓱᒃᑎᑦᑎᕐᔪᐊᖅᐳᖓ ᑭᓇᐅᓂᓐᓂᒃ ᐊᒻᒪ ᓇᓂ ᓄᓇᖃᕐᒪᖔᕐᒪ," ᐊᓕᐊᓇᖅᑐᖅ. ᐱᓕᕆᔪᖅ ᐃᓕᓐᓂᐊᕐᓂᕐᒥᒃ ᓱᒃᑲᓕᓂᖅᓴᐅᓗᓂ ᐊᒻᒪᓗ ᓱᓕᓂᖅᓴᐅᓗᓂ ᓇᒻᒥᓂᖅ ᓴᓇᒍᓐᓇᓂᕐᒥᒃ ᐊᒻᒪᓗ ᐃᓕᓪᓗᓂ ᐊᒃᓱᕈᓐᓇᖅᑐᓂᒃ ᐊᒻᒪᓗ ᐊᒃᓱᕈᕈᑎᒋᕙᑦᑕᖏᓐᓂᒃ ᐊᓈᓇᑦᑎᐊᒃᑯᖏᑕ ᐊᓂᒍᐃᒍᓐᓇᖅᓯᒪᒻᒪᑕ.

ᒥᖅᓱᕐᓂᖅ ᐊᖏᔪᒻᒪᕆᐊᓘᕗᖅ ᒪᒥᓴᕐᓂᕐᒧᑦ ᐊᒻᒪ ᓄᓇᒧᐊᕐᓂᕐᒧᑦ ᐊᒻᒪ ᕌᐱᓐ ᒪᒃᓚᐅᑦ ᓄᑖᓂᒃ ᓄᓇᒥᓂᒃ ᓱᕋᐃᕙᓪᓕᐊᓪᓗᓂ ᐊᓐᓄᕌᒥᓂᒃ ᐊᒻᒪ ᐃᓕᖅᑯᓯᒃᑯᑦ ᓴᓇᙳᐊᖅᑕᐅᔪᓂᒃ. ᐃᓚᒥᓄᑦ ᓴᓇᕈᓘᔭᖃᑦᑕᖅᑎᓪᓗᒍ ᐊᒻᒪ ᐊᓐᓄᕋᔾᔨᐅᖅᑎᓪᓗᒍ, ᐊᔪᕈᓐᓃᖅᓴᖅᐸᓪᓕᐊᕗᖅ ᐃᓕᑕᒥᓂᒃ ᐱᓕᕆᑲᑕᐃᓐᓇᖅᑎᓪᓗᒍ ᑭᖑᕚᒃᓴᑦᑎᓐᓂ. ᒥᖅᓱᖃᑦᑕᓕᓚᐅᖅᑐᖅ ᓱᕈᓯᐅᓪᓗᓂ ᐊᒻᒪᓗ ᒫᓐᓇ ᐱᕈᖅᓴᐃᓕᖅᑐᖅ ᕿᑐᕐᖓᒥᓂᒃ ᓇᒻᒥᓂᖅ, ᐱᕈᖅᓴᐃᓪᓗᓂ ᓯᕗᓂᒃᓴᑎᓐᓄᑦ ᐃᓚᒥᓄᑦ ᑐᙵᕕᖃᑦᑐᓂ ᐃᓕᖅᑯᓯᑎᒍᑦ ᐅᐱᒍᓱᓐᓂᕐᒥᒃ ᐊᒻᒪᓗ ᐱᖅᑯᓯᕐᒥᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.