"ᐋᒃᑳᓚᐅᖅᓯᒪᙱᑦᑐᖓ ᐱᕕᒃᓴᐅᔪᓐᓇᖅᑐᓂᒃ, ᐊᒻᒪ ᐱᕕᒃᓴᖃᖅᑎᑦᑎᓇᓱᒃᐸᒃᖢᖓ ᐊᓯᓐᓄᑦ ᐱᓕᕆᕙᓪᓕᐊᑎᓪᓗᑕ," ᐅᖃᓚᐅᖅᐳᖅ ᓴᐃᑎ-ᕖᓂᒃᔅ ᓚᕗᐃ. ᓴᒡᑮᖕ ᓄᓇᖃᖅᑳᖅᑐᕕᓂᕐᓂᒃ ᐃᓚᒋᔭᐅᓪᓗᑎᒡᓗ Turtle Clan-ᑯᓐᓄᑦ. ᐅᐃᓂᐸᐃᒡ, ᒫᓂᑑᐸᒥ ᓄᓇᖃᖅᑑᒃ ᐊᒻᒪ ᐃᖅᑲᓇᐃᔭᖅᖢᑎᒃ ᓄᓇᓕᖕᓂ ᐊᐅᓚᑦᑎᔨᒋᔭᐅᓪᓗᑎᒃ ᐅᕙᓂ, Wa Ni Ska Tan Alliance of Hydro-Impacted Communities. ᐱᒋᐊᖅᑎᑦᑎᖃᑕᐅᓯᒪᖕᒥᔪᑦ Red Rising-ᑯᓐᓄᑦ ᐅᖃᓕᒫᒐᕐᓂᒃ. ᑎᑎᖅᑐᒐᖅᑎᐅᖃᑦᑕᖅᓯᒪᔫᒃ ᐊᔾᔨᓕᐅᕆᖃᑦᑕᖅᓯᒪᓪᓗᑎᒡᓗ.

ᓯᕗᓂᐊᓂ, ᓚᕗᐃ ᐊᖓᔪᖅᑳᒧᑦ ᑐᒡᓕᕆᔭᐅᓚᐅᕆᕗᖅ ᓯᓚᑎᑦᑎᓐᓂ ᐱᓕᕆᓂᐅᔪᓄᑦ ᓯᓚᑦᑐᖅᓴᕐᕕᒡᔪᐊᒥ ᕗᐃᓂᒡ ᐃᓕᓐᓂᐊᖅᑏᑦ ᑲᑐᔾᔨᖃᑎᒌᖏᓐᓂ ᐊᒻᒪ ᑲᓇᑕᓕᒫᒥ ᓯᕗᓕᖅᑎᓄᑦ ᑭᒡᒐᖅᑐᐃᔨᐅᓪᓗᓂ ᑲᑎᙵᓂᐅᔪᓄᑦ ᓄᓇᖃᖅᑳᖅᓯᒪᔪᓄᑦ, ᐊᓪᓚᖓᔪᓄᑦ ᐊᒻᒪ ᐃᓅᑎᓄᑦ ᐃᓕᓐᓂᐊᖅᑎᓄᑦ. ᓱᓕᒃᑲᓐᓂᖅ, ᒪᒃᑯᒃᑐᓄᑦ ᓴᓗᒪᔪᒥᒃ ᐱᓕᕆᐊᖃᕐᓂᕐᒧᑦ ᑲᔪᖏᖅᓴᐃᔨᐅᓚᐅᖅᓯᒪᔫᒃ ᒪᒃᑯᒃᑐᓄᑦ ᑐᑦᑕᕐᕕᒋᔭᐅᔪᓄᑦ ᑲᑐᔾᔨᖃᑎᒌᓄᑦ.

ᐃᓚᒋᔭᐅᓪᓗᓂ ᑭᒡᒐᖅᑐᐃᓂᕐᒥᓄᑦ, ᓚᕗᐃ ᐃᓚᐅᓚᐅᖅᐳᖅ ᓄᓇᖃᖅᑳᖅᓯᒪᔪᓄᑦ ᖁᕝᕙᕆᐊᕈᑎᓄᑦ ᐱᔭᐅᔭᕆᐊᓕᖕᓄᑦ ᓯᓚᑦᑐᖅᓴᕐᕕᒡᔪᐊᒥ ᐅᐃᓂᐸᐃᒡᒥ ᐃᓚᒋᔭᐅᓚᐅᖅᖢᓂᓗ ᓄᓇᖃᖅᑳᖅᑐᓄᑦ ᐃᓕᓐᓂᐊᖅᑎᓄᑦ ᑲᑎᒪᔨᓄᑦ. ᐃᓚᒋᔭᐅᓚᐅᕆᕗᑦ ᐱᓕᕆᐊᖑᕙᓪᓕᐊᔪᒪᔪᓄᑦ ᑐᕌᖓᑎᑕᐅᔪᓄᑦ ᓄᓇᖃᖅᑳᖅᑐᕕᓂᕐᓄᑦ ᓯᓚᑦᑐᖅᓴᕐᕕᒡᔪᐊᒥᙶᓕᖅᑎᑦᑎᓂᕐᒧᑦ, ᐅᖅᓱᐊᓗᒃᓴᙳᖅᑎᑦᑎᓇᓱᖕᓂᕐᒧᑦ ᐱᓕᕆᓂᐅᔪᒥ ᐊᒻᒪ ᓈᒻᒪᒃᓴᙱᖦᖢᑎᒃ ᕿᒪᕉᑎᓪᓗᑎᒃ ᓯᓚᑦᑐᖅᓴᕐᕕᒡᔪᐊᒥ ᓱᓕ ᐱᓕᕆᐊᒃᓴᖅᑕᖃᖅᑎᓪᓗᒍ. ᕿᒪᐃᓯᒪᓕᖅᖢᑎᒃ ᓯᕗᓕᖅᑎᐅᓂᕐᒧᑦ ᐃᓂᒋᔭᒥᓂᒃ, ᑲᔪᓰᓐᓇᖅᐳᑦ ᐊᔪᕈᓐᓃᖅᓴᖅᑎᑦᑎᕙᒃᖢᑎᒃ ᐃᑲᔪᖅᑐᐃᕙᒃᖢᑎᒡᓗ ᓯᕗᓕᖅᑎᙳᖅᐸᓪᓕᐊᔪᓄᑦ, ᑕᖃᓯᒪᒐᓗᐊᖅᖢᑎᒃ ᐊᒃᓱᕈᕐᓂᕆᔭᐅᕙᒃᑐᒥᒃ ᐅᐊᓕᓂᕐᒥᐅᑦ ᓄᓇᖃᖅᑳᖅᑐᓪᓗ ᐃᓱᒪᒋᔭᖏᓐᓂᒃ.

ᐃᓕᓐᓂᐊᕐᓂᓕᕆᓂᒃᑯᓪᓕ, ᓚᕗᐃ ᐊᓂᒍᐃᓚᐅᖅᐳᖅ ᒪᕐᕉᖕᓂᒃ ᐊᓂᒍᐃᔾᔪᑎᑖᖅᖢᓂ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ, ᐃᓕᓐᓂᐊᓚᐅᖅᓯᒪᓪᓗᓂ ᐱᐅᔪᒻᒪᕆᖕᒥᒃ ᐊᔾᔨᓕᐅᕆᓂᕐᒧᑦ ᐱᓕᕆᐊᖑᕙᒃᑐᒥᒃ. ᑭᖑᓂᐊᒍᑦ, ᐱᔭᕇᖅᓯᓚᐅᖅᑑᒃ Bachelor of Arts ᓄᓇᖃᖅᑳᖅᑐᓂᒃ ᖃᐅᔨᓴᕐᓂᕐᒥᒃ ᐊᒻᒪ ᒐᕙᒪᓕᕆᓂᕐᒧᑦ ᖃᐅᔨᓴᖅᑐᓕᕆᓂᕐᒥᒃ ᐊᒻᒪ ᐃᓯᖅᑎᑕᐅᓵᓕᓪᓗᑎᒃ ᐃᓕᓐᓂᐊᖅᓵᓕᓪᓗᑎᒃ A-ᒥ ᐃᓕᓐᓂᐊᖅᑎᐅᓪᓗᑎᒃ ᖁᑦᑎᖕᓂᓕᖕᒥ 11-ᒥ. ᖁᕕᐊᒋᔭᖃᓚᐅᖅᑐᑦ ᐊᔾᔨᒌᖏᑦᑐᓂᒃ ᐱᓕᕆᐊᖃᕐᓂᕐᒥᒃ ᓄᓇᖃᖅᑳᖅᑐᓂᒃ ᖃᐅᔨᓴᕐᓂᕐᒥᒃ ᐊᒻᒪᓗ ᒐᕙᒪᓕᕆᓂᕐᒥᒃ ᖃᐅᔨᓴᖅᑐᓕᕆᓂᕐᒥᒃ, ᐅᖃᓚᐅᖅᐳᑦ, "ᐃᓕᓐᓂᐊᓪᓚᕆᓚᐅᖅᐳᖓ ᒐᕙᒪᓕᕆᓂᕐᒥᒃ ᑐᑭᓯᔪᒪᒐᒪ ᐱᓕᕆᔾᔪᓯᐅᔪᒥᒃ ᐊᐅᓚᑦᑎᔪᒥᒃ ᑭᒃᑯᓕᒫᓂᒃ ᐊᒻᒪ ᑭᓱᓕᒫᓂᒃ, ᐅᕙᖓᓗ ᐃᓚᐅᓪᓗᓂ."

"ᐊᑕᐅᓯᖅ ᐃᓕᑦᑎᓯᒪᔭᕋ ᖃᐅᔨᒪᓇᓱᐃᓐᓇᐅᔭᕐᓂᖅ ᐃᓕᑦᑎᕙᓪᓕᐊᒐᓗᐊᕐᒪᖔᖅᐱᑦ ᑭᓇᑐᐃᓐᓇᕐᒥᒃ ᐊᒻᒪᓗ ᐃᓕᓴᐃᓗᑎᑦ ᑭᓇᑐᐃᓐᓇᕐᒥᒃ ᐊᑕᐅᑦᑎᒃᑯᑦ."

ᐱᓕᕆᐊᖏᓐᓄᑦ ᒐᕙᒪᓕᕆᔨᐅᓂᕐᒧᑦ, ᓚᕗᐃ ᑲᔪᖏᖅᓴᐃᓚᐅᖅᑐᖅ ᐅᒃᐱᕈᓱᖕᓂᕐᒥᓂᒃ ᐃᒪᓐᓇ, "ᓄᓇᓕᖕᓂ ᐱᓕᕆᓂᖅ, ᓄᓇᓕᖕᓂ ᑭᒡᒐᖅᑐᐃᓂᖅ, ᐃᓕᓐᓂᐊᖅᑎᑦᑎᓂᖅ, ᖃᐅᔨᒪᐃᓐᓇᕐᓂᖅ ᖃᓄᐃᓕᐅᖅᐸᓪᓕᐊᔪᓂᒃ, ᐊᒻᒪ ᑎᓕᐅᕆᓂᖅ ᐊᒻᒪ ᐃᑲᔪᕐᓂᖅ ᐃᓄᖕᓂᒃ, ᓂᐱᓂᒃ ᖁᕝᕙᖅᓴᐃᓂᖅ, ᐅᓂᒃᑳᖅᑐᐊᓂᒃ, ᑕᒪᒃᑯᐊᓕᒫᑦ, ᐃᓱᒪᔪᖓ, ᒪᒥᓴᐃᔪᓐᓇᕐᒪᑕ ᓄᓇᓕᖕᓂ ᐅᕙᓐᓂᒃ ᒪᒥᑎᑦᑎᓲᖑᖕᒪᑕ." ᐃᖅᑲᓇᐃᔮᕆᓂᕋᓗᐊᖅᐸᙱᒻᒪᕆᒃᑕᖓ ᓇᒧᙵᐅᑲᑕᒃᐸᒃᖢᑎᒃ ᐅᖃᓪᓚᒃᐸᒃᖢᑎᒡᓗ ᐊᒥᖅᑳᖃᑎᖃᖅᐸᒃᖢᑎᒡᓗ.

ᐱᕈᖅᓴᓪᓗᓂ ᐃᒃᓯᕋᕐᔪᐊᕌᐱᒃ ᐃᓕᖅᑯᓯᕐᒥᓂᒃ ᐱᕈᖅᓴᔭᐅᓗᐊᙱᖦᖢᓂ, ᑭᓯᐊᓂ ᓯᓚᑦᑐᖅᓴᕐᕕᒡᔪᐊᕐᒥ ᓚᕗᐃ ᐃᓕᑦᑎᕙᓪᓕᐊᓕᖅᑎᓪᓗᒍ ᐃᓕᓐᓂᐊᖅᑕᒥᓂᒃ ᑭᓱᑐᐃᓐᓇᐃᑦ ᐋᖅᑭᑦᑎᐊᓕᓚᐅᖅᐳᑦ ᑐᑭᓯᐅᒪᓕᖅᖢᑎᒃ ᖃᓄᐃᓕᐅᖅᑐᖃᓕᕐᒪᖔᑦ ᓄᓇᖃᖅᑳᖅᓯᒪᔪᑦ ᑕᐅᑐᒃᑕᖓᒍᑦ. ᐃᓅᖃᑎᖃᖅᐸᓪᓕᐊᓕᓚᐅᖅᐳᑦ ᑭᓇᐅᓂᕐᒥᓂᒡᓗ ᐃᓚᐅᓪᓗᑎᒃ ᖃᓄᐃᓕᐅᖅᑎᑦᑎᓂᕐᒥᒃ, ᐋᖅᑭᒃᓱᐃᓂᕐᒥᒃ, ᐊᒻᒪ ᑮᓇᐅᔭᓂᒃ ᐱᕈᖅᓴᐃᓂᕐᒥᒃ. ᑐᑭᓯᓕᓚᐅᖅᐳᑦ ᑭᓇᐅᓂᕐᒥᓂᒃ ᒪᕐᕉᖕᓂᒃ ᐃᓱᒪᖃᕐᓂᖏᓐᓂᒃ. ᖁᕕᐊᒋᔭᖃᖅᐸᓚᐅᕋᓗᐊᖅᑎᓪᓗᒋᑦ ᐃᓕᓐᓂᐊᕈᑎᖏᑦ ᖁᕝᕙᓯᖕᓂᖏᓐᓂᒃ, ᓂᕆᐅᖕᓂᖃᕐᓂᖅᓴᐅᓕᓚᐅᖅᐳᑦ ᑲᑎᖃᑎᖃᕐᓂᖅᓴᐅᔪᒪᓪᓗᑎᒃ ᐃᓄᖕᓂ ᓂᐱᖃᕐᓂᖅᓴᐅᓕᕈᑎᒃ ᓄᓇᓕᖕᓂ.

Red Rising ᐅᖃᓕᒫᒐᖅ ᓴᖅᑭᓚᐅᖅᐳᖅ ᓈᒻᒪᒃᓴᙱᓐᓂᐅᔪᒥ ᖃᓄᖅ ᑐᓴᒐᒃᓴᓕᕆᔨᐅᔪᑦ ᐅᖃᐅᓯᖃᓚᐅᕐᓂᖏᓐᓂ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂ ᐊᒻᒪ ᑕᑯᒃᓴᐅᑎᑦᑎᖔᖅᖢᑎᒃ ᐃᓱᒪᒋᔭᖏᓐᓂ ᓚᕗᐃ ᐊᒻᒪ ᐱᖃᓐᓇᕆᔭᖏᓐᓂ, ᐃᓱᒪᖅᓱᖅᑎᑕᐅᙱᖦᖢᑎᒃ ᐊᒻᒪ ᑕᑯᒃᓴᐅᑎᑕᐅᙱᖦᖢᑎᒃ Idle No More-ᒥ. ᓄᓇᓕᖕᓂ ᐊᐅᓚᑕᐅᓪᓗᓂ, ᓇᖕᒥᓂᕆᔭᐅᓪᓗᓂ ᐊᒻᒪ ᑮᓇᐅᔭᖃᖅᑎᑕᐅᓪᓗᓂ, ᐱᒋᐊᖅᑎᑦᑎᖃᑕᐅᓯᒪᒐᓗᐊᖅᑎᓪᓗᒋᑦ, ᑕᐅᑐᙳᐊᖅᐳᑦ ᑲᒪᒋᔭᒃᓴᕆᓂᖅᓴᕆᓪᓗᓂᐅᒃ ᐃᖏᕐᕋᐃᓐᓇᖁᓪᓗᒍ ᓄᓇᓕᖕᓄᑦ ᐊᒻᒪ ᓯᐊᒻᒪᒃᑎᕆᓂᖅ ᐊᔪᕐᓇᙱᓐᓂᓕᒫᖓᓂ. ᑎᑎᖅᑐᒐᓕᐅᓚᐅᖅᑐᑦ ᐅᖃᓕᒫᒐᒃᓴᓕᐅᕐᓂᕐᒧᑦ ᒫᓐᓇᓗ ᒥᑭᓪᓕᑎᖅᓯᒪᑦᑎᐊᓕᖅᐳᑦ ᑭᖑᕚᕆᔭᐅᓂᑯᓂᒃ ᑭᒡᒐᖅᑐᐃᓂᖏᓐᓂᒃ.

ᓄᓇᖃᖅᑳᖅᑐᑦ ᐃᓕᓐᓂᐊᖅᑎᑦ ᐊᐅᓪᓚᕐᓂᐊᓕᖅᐸᑕ ᓄᓇᒥᖕᓂ ᐃᓕᓐᓂᐊᒃᑲᓐᓂᕆᐊᖅᑐᕐᓗᑎᒃ, ᓚᕗᐃ ᐅᖃᐅᔾᔪᐃᓇᔭᖅᐳᖅ ᓇᓂᓯᓗᑎᒃ ᐃᓅᖃᑎᒥᓂᒃ ᐃᑲᔪᖅᑎᒃᓴᒥᒡᓗ. ᐃᒪᓐᓇᐅᖁᔨᒋᕗᑦᑕᐅᖅ, ᐱᕕᒃᓴᖃᖅᑎᑦᑎᓂᕐᒥᒃ ᑲᑎᙵᖃᑎᖃᕐᓂᕐᒥᒃ ᓄᓇᒧᑦ ᐃᓚᐅᓂᕐᒧᓪᓗ ᖁᕕᐊᓱᖃᑎᒌᖕᓂᕆᔭᐅᔪᒥ.

"ᐃᒪᐃᓕᖏᓐᓇᐅᔭᖅᐳᖓ, 'ᐄ, ᓄᓇᓕᓕᐅᕆᐊᖃᖅᐳᒍᑦ. ᑎᒍᒥᐊᖃᑦᑕᐅᑎᑦᑎᐊᕆᐊᖃᖅᐳᒍᑦ ᐊᒻᒪ ᐱᓕᕆᑦᑎᐊᑲᑕᒡᓗᑕ.'"

ᑐᓗᖅᑕᕈᑕᐅᕙᒃᑐᓄᓪᓕ, ᓚᕗᐃ ᐊᒃᓱᕈᕈᑎᖃᖅᓯᒪᕗᖅ ᐱᓕᕆᐊᖃᕋᓱᒃᖢᓂ ᒐᕙᒪᓕᕆᓂᕐᒥᒃ ᑭᓯᐊᓂ ᐃᓕᑦᑎᓵᓕᓚᐅᖅᐳᖅ ᖃᓄᖅ ᓇᓗᓇᐃᒃᑯᑦᑎᖅᓱᐃᔪᓐᓇᕐᓂᕐᒥᒃ ᐊᒻᒪ ᐊᐅᓚᑦᑎᔪᓐᓇᕐᓂᕐᒥᒃ ᑕᒪᒃᑯᓇᓂ ᐃᓂᓂ. ᓈᒻᒪᒃᓴᙱᖦᖢᑎᒃ ᐊᓯᒥᓄᑦ ᑕᑯᔪᒪᙱᓐᓂᖏᓐᓄᑦ ᐱᒻᒪᕆᐅᓂᖏᓐᓂᒃ ᐃᓂᒃᓴᐃᑦ ᐊᒻᒪ ᖃᓄᐃᓕᐅᒐᒃᓴᑦ ᓄᓇᖃᖅᑳᖅᑐᓄᑦ ᐊᒻᒪ ᐃᓕᖅᑯᓯᖃᖃᑎᒌᙱᑦᑐᓄᑦ ᐃᓕᓐᓂᐊᖅᑎᓄᑦ. ᐊᒻᒪᓗᒃᑲᓐᓂᖅ, ᐊᒃᓱᕉᑎᖃᓚᐅᖅᐳᑦ ᐱᓕᕆᕝᕕᖕᓂ ᑐᓗᖅᑕᕈᑕᐅᕙᒃᑐᓂᒃ ᓄᖅᑲᖓᑎᑦᑎᓇᓱᒃᖢᑎᒃ ᐱᓕᕆᐊᖑᕙᓪᓕᐊᔪᓂᒃ ᓲᕐᓗ ᐅᖅᓱᐊᓗᒃᓴᓂᒃ ᐲᔭᐃᕙᓪᓕᐊᓂᕐᒧᑦ ᐱᓕᕆᐊᖑᔪᓂᒃ ᐊᒻᒪ ᓇᖕᒥᓂᖅᓱᕈᓐᓃᖅᑎᑦᑎᓂᕐᒥᒃ. ᐃᓕᕋᓵᕆᓂᖅ ᐊᒻᒪ ᐱᙳᐊᖅᑎᑦᑎᓇᓱᖕᓂᖅ ᑐᓗᖅᑕᕈᑕᐅᕙᓚᐅᕆᕗᑦ. ᐊᓯᒥᓂᒃ ᑕᑎᖃᕈᓐᓇᕐᓂᖅ ᐅᓇᑕᖃᑎᒋᓪᓗᒋᑦ ᐱᕚᓪᓕᕈᑎᐅᓚᐅᖅᐳᖅ ᑲᙳᓇᖅᑑᑎᑕᐅᒐᔪᖕᓂᖏᓐᓄᑦ ᓂᓪᓕᕆᐊᖃᙱᖦᖢᑎᒃ.

"ᐃᒪᐃᓕᐅᖅᐸᒃᐳᒍᑦ ᑲᔪᓯᑎᑐᐃᓐᓇᖅᖢᒍ ᑖᓐᓇ ᐃᑯᒪᔪᖅ ᐊᒻᒪ ᖃᓄᑐᐃᓐᓇᑦᑎᐊᖅ ᐊᓯᔾᔨᖅᓯᓇᓱᒃᐸᒃᖢᑕ ᑕᐃᑲᓃᓐᓂᑦᑎᓐᓂ ᐊᒻᒪ ᑐᓂᔾᔪᑎᒋᓕᕐᓗᒍ."

ᐃᓱᒪᒥᒍᑦ ᖃᓄᐃᙱᓐᓂᖏᑦ ᑲᒪᒋᔭᐅᑦᑎᐊᖏᓐᓇᖁᓪᓗᒋᑦ ᐋᓐᓂᐊᕕᒡᔪᐊᕐᓇᖅᑕᖃᖅᑎᓪᓗᒍ, ᓚᕗᐃ ᖃᕆᓴᐅᔭᒃᑯᑦ ᑐᓴᐅᒪᔪᓕᕆᔾᔪᑎᓂᒃ ᓄᖅᑲᖓᓚᐅᑲᓚᐅᖅᐳᖅ. ᐃᓗᐊᒍᑦ ᐱᓕᕆᕐᔪᐊᓚᐅᖅᐳᑦ ᐃᒻᒥᓂᒃ ᐃᓕᓐᓂᐊᕈᒪᓪᓗᑎᒃ. ᐱᓕᕆᖃᑦᑕᖅᓯᒪᕗᑦ ᑭᐱᙳᐃᔭᐅᑎᓂᒃ ᓲᕐᓗ ᐊᒃᓴᓗᐊᓕᖕᓂ ᐊᒃᓴᓗᐊᓕᖕᓂ ᐊᒻᒪ ᓴᐸᖓᓕᖅᓱᐃᓂᕐᒥᒃ. ᐊᓂᑦᑕᐃᓕᑎᑕᐅᔪᓂᒃ ᐱᖃᓐᓇᕆᔭᖃᓚᐅᖅᑑᒃ ᐃᑲᔪᖅᐸᒃᖢᓂᒋᑦ ᓵᑕᒃᓴᐅᔪᓐᓇᕐᓂᕐᒥᒃ ᐊᒻᒪ ᐱᖃᑎᒋᕙᒃᖢᓂᒋᑦ ᐊᓯᔾᔨᖅᓯᔪᒪᓪᓗᑎᒃ. ᑲᑎᙵᖃᑎᖃᐃᓐᓇᓚᐅᖅᐳᑦ ᐃᓄᖕᓂ ᖃᕋᓴᐅᔭᒃᑯᑦ ᑭᓯᐊᓂ ᐃᓄᑑᕙᒃᖢᑎᒃ ᐱᔭᕆᐊᖃᕌᖓᒥᒃ.

ᐱᔪᒃᓯᑎᑦᑎᓇᓱᓕᕌᖓᒥ, ᓚᕗᐃ ᐱᔪᒃᓯᑎᑕᐅᕙᒃᐳᖅ ᓴᓇᙳᐊᖅᑎᓂᒃ ᑕᑯᕙᒃᑕᖏᓐᓂᒃ Instagram−ᑯᑦ. ᑲᔪᖏᖅᓴᖅᑕᐅᕙᒃᑭᕗᑦ ᑲᔪᓯᓂᖃᑦᑎᐊᖅᑐᓄᑦ ᖁᕕᐊᓱᒃᑐᓄᓪᓗ ᐃᓄᖕᓄᑦ. ᐃᖅᑲᐃᓯᔭᐅᕙᒃᐳᑦ ᐊᓯᒥᓂᒃ ᖁᕕᐊᓱᒃᑎᑦᑎᖃᑦᑕᖁᔭᐅᓪᓗᑎᒃ ᖃᐅᑕᒫᑦ ᐃᒃᐱᒋᔭᖏᓪᓗ ᐊᓯᒥᖕᓂᒃ ᐊᒃᑐᐃᕙᒃᑭᓪᓗᑎᒃ.

ᐃᓱᓕᓕᖅᑎᓪᓗᒍ, ᓚᕗᐃ ᐅᖃᐅᔾᔨᕗᖅ ᐃᒪᓐᓇ, "ᓇᖏᖅᓯᑐᐃᓐᓇᕆᑦ! ᐊᒃᓱᕈᕐᓇᖅᑐᒃᑰᕈᓐᓇᖅᐳᖅ, ᐆᓐᓂᖅ, ᑲᑕᖕᓂᖅ, ᑭᓱᑐᐃᓐᓇᐃᑦ ᐊᑖᓃᖅᑰᔨᔪᓐᓇᖅᐳᑦ, ᑭᓯᐊᓂ ᑭᓱᑐᐃᓐᓇᐃᑦ ᑕᖅᓴᖃᕐᔪᐊᕈᓐᓇᖅᐳᑦ ᒪᑭᑉᐸᓪᓕᐊᓕᕈᕕᓪᓗ, ᐃᕿᐊᓱᑐᐃᓐᓇᕐᓗᓂ ᐊᓯᔾᔨᕐᓂᐅᔪᒥᒃ. ᐊᓯᔾᔨᕐᓂᖅ ᐱᐅᕗᖅ. ᐊᓯᔾᔨᕐᓂᐅᔪᖅ ᐱᐅᔫᕗᖅ ᖃᓄᐃᙱᑦᑎᐊᖅᖢᓂᓗ ᖁᕕᐊᓇᖅᖢᓂᓗ."

ᐋᒃᑳᓚᐅᖅᓯᒪᙱᖦᖢᓂ ᐱᕕᒃᓴᐅᔪᓐᓇᖅᑐᓂᒃ ᐊᒻᒪ ᓴᖅᑭᑎᑦᑎᒃᑲᓐᓂᕋᓱᒃᐸᒃᖢᓂ ᐱᕕᒃᓴᒃᑲᓐᓂᕐᓂᒃ ᐊᓯᒥᓄᑦ ᐱᓕᕆᕙᓪᓕᐊᑎᓪᓗᒋᑦ, ᓴᐃᑎ−ᕖᓂᒃᔅ ᓚᕗᐃ ᓄᓇᓕᖕᓂ−ᐱᕙᓪᓕᐊᑎᑦᑎᔨᐅᕗᖅ, ᐃᓕᓐᓂᐊᖅᑎᑦᑎᔨᐅᓪᓗᓂ ᐊᒻᒪ ᐊᓯᔾᔨᖅᓯᔪᓐᓇᖅᖢᓂ. ᐃᓕᓐᓂᐊᖅᑎᓂᒃ ᒐᕙᒪᓕᕆᓂᕐᒥᒃ ᐊᐅᐸᖅᑐᒥ ᒪᑭᑉᐸᓪᓕᐊᓂᕐᒧᑦ ᓄᓇᓕᖕᓂ ᐊᐅᓚᔾᔭᐃᒋᐊᕐᓂᕐᒧᑦ ᐃᓕᓐᓂᐊᕌᓂᒃᓯᒪᓕᖅᑎᓪᓗᒋᑦ, ᐃᖏᕐᕋᐃᓐᓇᖅᐳᑦ ᐱᓕᕆᓪᓗᑎᒡᓗ ᐊᕙᑎᒧᑦ, ᑭᖑᕚᒃᓴᑦᑎᓐᓄᑦ ᐊᒻᒪ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓄᑦ. ᑭᖑᕚᕇᑦ ᓯᓚᑦᑐᖅᓴᕐᕕᒡᔪᐊᕐᒥ ᐊᓂᒍᐃᓯᒪᓕᖅᑐᑦ, ᑲᔪᓯᑎᑦᑎᕗᑦ ᐃᓕᓐᓂᐊᑦᑎᐊᕐᓂᕐᒥᒃ ᐊᒻᒪ ᑕᐅᑐᙳᐊᖅᑕᒥᓂᒃ ᒪᓕᒃᖢᑎᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.