ᐃᓱᒪᑐᓂᖓ ᐃᑲᔪᓚᐅᖅᑐᖅ ᓴᖅᑭᑦᑎᓪᓗᓂ ᓄᓇᕐᔪᐊᓂᑦ ᕿᒪᒃᓯᔪᓐᓇᕐᖢᓂ ᓄᑕᕋᐅᓗᓂ ᒫᓐᓇᓗ ᐃᑲᔪᓕᕐᖢᓂ ᑎᑎᕋᕈᓐᓇᑦᑎᐊᕐᓂᕐᒥᑦ ᑭᒃᑯᓕᒫᓄᑦ ᖁᕕᐊᒋᔪᓐᓇᕐᖢᓂᐅᒃ ᓂᖅᑐᐃᔪᓐᓇᕐᖢᓂᓗ. ᓴᐃᕋ ᑎ ᐅᐊᕐᑦ ᐊᓪᓚᓄᑦ ᐊᐃᑉᐸᖃᙱᑦᑐᖅ ᐊᓈᓇᐅᔪᖅ, ᑎᑎᕋᖅᑎᐅᔪᖅ, ᐃᓕᓴᐃᔨᐅᔪᖅ ᐊᒻᒪᓗ ᐅᖃᓕᒫᒐᓕᐅᖅᑎᐅᔪᖅ ᓄᓇᖃᖅᑐᖅ ᕕᐅᓪᑦ, ᐋᓐᑎᐅᕆᐅᒥ. ᑎᑎᕋᓚᐅᖅᑐᖅ ᒪᒃᑯᒃᑐᒥᒃ ᐅᖃᓕᒫᒐᕐᒥᒃ ᑕᐃᔭᐅᔪᒥᒃ White Lies-ᒥᒃ ᐊᒻᒪᓗ ᐊᓯᐊᓂᒃ ᓴᖅᑭᑦᑐᖃᕆᓪᓗᓂ ᑕᐃᔭᐅᔪᒥᒃ Defy.

ᐱᕈᖅᓴᓪᓗᓂ ᐳᐊᑦ ᑰᓪᐳᐊᓐᒥ, ᐋᓐᑎᐅᕆᐅᒥ, ᐃᓕᓗᐊᓚᐅᙱᑦᑐᖅ ᐱᐅᓯᑐᖃᕐᒥᓂᒃ ᑕᐃᒪᓕ ᒫᓐᓇ ᐊᓯᐅᔨᑐᐃᓐᓇᓕᖅᑐᖅ ᐃᓕᓐᓂᐊᓕᕋᒥᓗ. ᑕᓗᕈᒃᑯᔾᔨᓂᖅ ᐊᒻᒪ ᖀᖅᓱᕐᓂᖅ ᐃᓕᑦᑏᓐᓇᓚᐅᖅᑐᖅ ᓯᕗᓕᕕᓂᕐᒥᓂᑦ ᒪᒃᑯᒃᑎᓪᓗᒍ ᐊᕕᒃᑎᓯᒪᑎᓪᓗᒍᓗ, ᐃᒥᐊᓗᓗᐊᖃᑦᑕᕐᓂᖅ ᐊᒻᒪ ᐊᑐᕐᓂᕐᓗᖕᓂᖅ ᐃᓚᒥᓂᒃ ᐊᐅᓚᑦᑎᐊᕈᓐᓃᕈᑕᐅᓚᐅᖅᐳᖅ. ᐱᕈᖅᓴᓪᓗᓂ ᖃᑕᙳᑎᖏᓐᓂ ᑮᓇᐅᔭᖃᑦᑎᐊᙱᖦᖢᓂ ᐊᐅᓚᑲᑕᖕᓇᕐᖢᓂᓗ, ᐃᓱᒪᓪᓗᓂ ᑭᓱᒥᑭᐊᖅ ᐱᑕᖃᖅᑰᔨᙱᖦᖢᓂ ᑲᑎᙵᔪᓐᓃᖅᑎᑕᐅᓂᖓᓄᑦ ᐃᓕᖅᑯᓯᖓᓂ. ᓯᓚᑦᑐᓴᕐᕕᕐᔪᐊᕐᒨᓕᓚᐅᖅᑐᖅ ᑐᕌᓐᑐᒧᑦ ᐊᒻᒪᓗ ᑕᑕᑎᕆᑎᓪᓗᒍ ᐱᓇᓱᐊᕈᑎᒥᓂᒃ ᐊᓈᓇᖓᑕ ᐅᖃᐅᑎᓪᓗᓂᐅᒃ ᐱᖅᑯᓯᑐᖃᖓᑕ ᒥᒃᓵᓄᑦ. ᑭᖑᓂᐊᒍᑦ, ᑐᓴᓚᐅᖅᑎᓪᓗᒍ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᒥᒃ, ᐃᓕᒃᑲᓐᓂᕈᒪᓕᓚᐅᖅᑐᖅ, ᑭᓯᐊᓂ ᑕᐃᔅᓱᒪᓂ ᐊᖓᔪᖅᑳᖏᑦ ᐊᒻᒪᓗ ᐃᑦᑐᒃᑯᖏᑦ ᐊᑖᑕᑦᑎᐊᒃᑯᖏᑦ ᐃᓅᔪᓐᓃᓚᐅᖅᑐᑦ. ᐃᓕᖅᑯᓯᑐᖃᕐᒥᓂ ᐊᑐᖅᓯᒪᔭᖓ ᒫᓐᓇᒧᑦ ᑎᑭᖦᖢᒍ ᐊᑐᖅᑕᐅᒃᑲᓐᓂᖅᓯᒪᕗᖅ ᓄᓱᒃᑕᐅᓪᓗᓂᓗ ᑐᑭᓯᔪᒪᒧᑦ ᓇᑭᙶᕐᒪᖔᑦ ᓴᙱᔪᒻᒪᕆᐅᓯᒪᕗᖅ. ᐃᓕᓴᐃᔨᐅᔪᖅ ᓴᓇᔪᓕᕆᓂᕐᒥᒃ ᐊᒻᒪᓗ ᐃᓕᓐᓂᐊᖅᑎᐅᓪᓗᓂ ᐆᒻᒪᑎᖓᓂ.

ᐃᓕᓐᓂᐊᖅᑎᑦᑎᔪᒪᓂᖓ ᐱᒋᐊᓲᖅ ᒪᒃᑯᖕᓂᖅᓴᐅᑎᓪᓗᒍ ᐊᒻᒪᓗ ᐃᓕᓐᓂᐊᖃᑎᖃᖅᐸᓚᐅᖅᑐᖅ ᓄᑲᒥᓂᒃ, ᑎᑎᕋᕐᕕᒃᓴᓕᐅᖅᖢᓂ ᐊᒻᒪᓗ ᑎᓕᐅᕆᓪᓗᓂ ᐱᙳᐊᖃᑎᒋᔪᒪᓪᓗᓂᐅᒃ. ᓯᓐᓇᑦᑑᒪᓚᐅᖅᑐᖅ ᐅᓪᓗᕐᒥᒃ ᐊᑕᐅᓯᕐᒥᒃ ᐃᓕᓴᐃᔨᐅᔪᒪᓪᓗᓂ ᐃᓕᓐᓂᐊᕐᕕᐊᕈᓯᖓᓂ. ᐊᑕᐅᓯᐊᖅᑐᓂ ᒪᓕᒐᓕᕆᔨᕈᕈᒪᓚᐅᖅᑐᖅ ᑭᓯᐊᓂ ᑐᓵᔪᓂᑦ ᐃᓕᓐᓂᐊᓚᐅᖅᑐᖅ ᖁᕕᐊᒋᓚᐅᖅᐹ ᐃᓕᓐᓂᐊᖅᑐᓂ ᓈᓚᐅᑎᓂᑦ ᑕᓚᕖᓴᓂᓪᓗ ᑐᕌᓐᑐ ᒥᑐᐴᓕᑕᓐ ᓯᓚᑦᑐᓴᕐᕕᕐᔪᐊᖓᓂ. ᑕᐃᑲᓂ ᑎᑎᕋᒃᑲᓐᓂᕆᐊᒃᓴᖅ ᐊᓕᐊᓇᐃᒋᑦᑎᐊᓚᐅᖅᑕᖓ, ᐃᖅᑲᐅᒪᓪᓗᓂ ᖃᓄᖅ ᐅᓂᒃᑳᖅᑐᐊᓂᒃ ᑎᑎᕋᕆᐊᒃᓴᖅ ᐊᓕᐊᓇᐃᒋᔭᖃᓚᐅᕐᒪᖔᑦ ᐊᒻᒪ ᐊᓐᓄᕋᔾᔨᐅᖅᖢᓂ ᓄᑕᕋᐅᓪᓗᓂ. ᐅᖃᐅᔾᔪᐃᓂᖓ ᒫᓐᓇ ᐃᓕᓐᓂᐊᖅᑎᒥᓂᒃ ᐱᕕᒃᓴᖃᖅᑎᑦᑎᕗᖅ ᓂᕈᐊᕆᔭᖃᕐᓂᕐᒥᒃ ᐃᖅᑲᓇᐃᔮᕆᔪᒪᔭᒥᓂᒃ ᐃᓚᖃᖅᐸᒃᐳᖅ ᐱᓇᔪᒡᕕᖃᕐᓂᕐᒥᒃ ᓇᒡᓕᒋᔭᒥᓂᒃ ᓄᑕᕋᐅᑎᓪᓗᒋᑦ ᐊᑕᖃᑎᖃᐃᓐᓇᕐᓗᑎᒡᓗ ᐃᓱᒪᒋᕙᒃᑕᒥᓂᒃ.

ᐃᓕᓴᐃᓂᕐᒥᒃ ᖁᕕᐊᒋᔭᖃᖅᑎᓪᓗᒍ, ᓂᑲᒍᓱᓚᐅᖅᑐᖅ ᑎᑎᕋᕆᐊᒃᓴᖅ ᖁᕕᐊᒋᓪᓗᒍ, ᐊᔪᖅᓯᐅᖅᑲᖅᑰᔨᓪᓗᓂ ᐃᓕᓐᓂᐊᖅᑎᓂᒃ ᐱᓕᕆᖃᑎᖃᕆᐊᒃᓴᖅ ᖁᕕᐊᒋᒐᓗᐊᖅᖢᓂᐅᒃ. ᐅᓪᓘᑉ ᐃᓚᐃᓐᓇᖓᓄᑦ ᐃᓕᓴᐃᔨᐅᓪᓗᓂ ᑎᑎᕋᕈᓐᓇᕐᓂᐊᕐᒪᑦ ᓴᓇᑐᔪᓐᓇᕐᓂᕐᒥᓂᒃ. ᓇᖕᒥᓂᖃᖃᑕᐅᖕᒥᔪᖅ ᐊᐅᓚᑦᑎᓪᓗᓂ ᐃᓄᖕᓄᑦ ᑐᓴᐅᒪᔪᓕᕆᔾᔪᑎᓂᒃ. "ᓂᕆᐅᒃᐳᖓ ᐃᓕᓐᓂᐊᖅᑏᑦ ᑕᐅᑐᒃᑐᑦ ᑕᒪᑐᒥᖓ ᕿᓂᕈᓐᓇᕐᓂᐊᕐᓂᖏᓐᓂᒃ ᐅᓪᓗᕐᒥᒃ ᐊᑕᐅᓯᕐᒥᒃ ᓇᓂᓯᓗᑎᒃ ᑮᓇᐅᔭᑎᒍᑦ ᐊᑕᐅᓰᓐᓇᓕᔪᒥᒃ, ᑭᓯᐊᓂᑦᑕᐅᖅ ᐱᓕᕆᐊᖃᓪᓚᕆᒍᒪᓂᖏᓐᓂᒃ, ᐃᒪᐃᓐᓂᖓᓄᑦ, ᐱᒻᒪᕆᐊᓘᓂᖓᓄᑦ ᑕᒪᐃᖕᓄᑦ ᐱᔭᕆᐊᒃᓴᖅ, ᐃᓱᒪᕗᖓ," ᐅᖃᙳᐊᖅᖢᓂ.

ᐱᕈᖅᓴᓪᓗᓂ ᐱᐅᙱᑦᑐᒥᒃ ᐃᓅᓪᓗᓂᓗ ᐊᒃᓱᕈᕐᓇᖅᑐᒃᑯᑦ ᐊᑐᖅᑐᓄᑦ, ᐅᐋᑦ ᑕᑎᖃᕐᖢᓂ ᐃᓱᒪᑦᑎᐊᕐᓂᕐᒥᓂᒃ, ᐱᓇᔪᐃᓐᓇᕐᓂᕐᒥᒃ ᓂᕆᐅᖕᓂᕐᒥᒃᓗ ᐊᓂᒍᐃᓂᕐᒥᒃ ᓲᖃᐃᒻᒪ ᐊᐅᓚᑦᑎᔪᓐᓇᓚᐅᙱᒻᒪᑦ ᖃᓄᐃᓕᐅᖅᑐᓂᒃ ᐃᓅᓯᖓᓂ ᓄᑕᕋᐅᑎᓪᓗᒍ.

ᑕᐅᑐᒐᖃᐃᓐᓇᖅᖢᓂ, ᐃᓱᒪᑐᔫᓪᓗᓂ, ᓇᓂᓯᓪᓗᓂᓗ ᐃᑲᔪᖅᑐᐃᓂᕐᒧᑦ ᐱᓕᕆᖃᑎᒌᒃᐸᒃᑐᓂᒃ ᐃᓕᓴᐃᔨᑎᒍᑦ ᓯᓚᖅᑲᑎᒃᑯᓪᓗ, ᐊᓂᒍᐃᔪᓐᓇᓚᐅᖅᐳᖅ ᐊᒃᓱᕈᕐᓇᖅᑐᒃᑯᑦ. ᐃᑲᔪᖅᑕᐅᓪᓗᓂ ᐃᓕᓐᓂᐊᖅᑎᓄᑦ ᐊᑐᖅᑐᐊᖅᑐᓄᑦ ᐊᒻᒪᓗ ᐃᓕᓐᓂᐊᖅᑎᓄᑦ ᐃᖅᑲᓇᐃᔭᖅᑎᑦᑎᓂᕐᒧᑦ, ᐊᑭᓖᒍᓐᓇᓚᐅᖅᑐᖅ ᐃᓕᓐᓂᐊᕐᕕᔾᔪᐊᒧᑦ ᓲᕐᓗ ᐊᑭᓖᓚᐅᕐᒪᑦ ᐊᒥᓱᓄᑦ ᒪᒃᑯᑦᑑᓪᓗᓂ, ᐊᒃᓱᕈᖅᑐᓂ ᐃᖅᑲᓇᐃᔭᖅᑐᓂ. ᐸᐃᕆᑦᓯᓂᖅ, ᒥᐊᓂᖅᓯᓂᖅ, ᐃᖅᑲᓇᐃᔭᖅᓱᓂ ᖃᕆᑕᐅᔭᕐᓄᑦ ᓂᐅᕕᖅᕕᒻᒥ, ᐃᓕᑦᓴᐅᑎᒋᓚᐅᖅᑐᖅ ᓇᒻᒥᓂᖅ ᐊᑭᓖᒍᓐᓇᓂᕐᒥᑦ.

ᑭᖑᒧᑦ ᑕᑯᓪᓗᓂ ᖃᓄᑎᒋ ᑎᑭᑉᐸᓪᓕᐊᖕᒪᖔᑦ, ᐊᓕᐊᓇᐃᒍᓱᒃᑐᖅ ᑕᑯᔭᕆᐊᒃᓴᖅ ᐃᖏᕐᕋᓂᕆᕙᒃᑕᖏᓐᓂᑦ ᖃᑕᙳᑎᖏᓪᓗ ᓱᕋᒃᐸᓪᓕᐊᓂᖏᓐᓂᑦ, ᐃᖏᕐᕋᕙᓪᓕᐊᓪᓗᑎᒃ ᐃᖅᑲᓇᐃᔮᖏᓐᓂᑦ, ᐊᖓᔪᖅᑳᑦᑎᐊᕙᐅᓂᖏᓐᓂᑦ ᐃᓚᖏᓐᓂᒡᓗ. "ᕿᑐᕐᖓᕗᑦ, ᐅᕝᕙᓘᓐᓃᑦ ᑭᖑᕚᕗᑦ ᓄᓇᖃᖅᑳᖅᓯᒪᔪᑦ ᓄᑕᖅᑲᑦ, ᐱᐅᓂᖅᓴᒻᒪᕆᐅᓂᐊᖅᑐᑦ," ᓯᓐᓇᑦᑑᒪᔪᖅ ᓂᐱᖃᕐᓗᓂ. ᐃᖅᑲᐅᒪᓇᓱᖃᑦᑕᕐᒥᔪᖅ ᖁᕕᐊᓇᖅᑐᓂᒃ ᐃᖅᑲᐅᒪᓇᖅᑐᓂᒃ ᐃᓅᓯᖓᓂ ᐱᐅᓗᐊᓚᐅᙱᒻᒪᑦ. ᑕᑯᓪᓗᓂ ᐱᐅᔪᓂᑦ ᑭᖑᓂᑦᑎᓐᓂᑦ ᐊᒻᒪᓗ ᑐᓂᓯᓪᓗᓂ ᐊᑲᐅᓯᕚᓪᓕᕈᑎᒋᓪᓗᓂᐅᒃ.

ᐃᓅᓯᖓᓂ, ᐅᐋᑦ ᐊᒃᓱᕉᑎᖃᖅᓯᒪᔪᖅ ᐃᓱᒪᒥᒍᑦ ᐋᓐᓂᐊᕈᑎᓕᖕᓂᒃ ᑭᓯᐊᓂ ᓇᓂᓯᓪᓗᓂ ᐊᑐᒐᒃᓴᓂᒃ ᐃᑲᔪᕐᓗᓂ ᕿᓄᐃᓵᕐᓂᕐᒥᒃ. ᐃᓛᓐᓂᒃᑯᑦ, ᐊᒃᓱᕈᖅᓯᒪᔪᖅ ᐃᒡᓕᕐᒥ ᐊᓂᔪᒪᙱᖦᖢᓂ ᐃᖅᑲᓇᐃᔭᕈᒪᙱᖦᖢᓂᓘᓐᓃᑦ ᑭᓯᐊᓂ ᓱᓕ ᕿᑐᕐᖓᒥᓄᑦ ᐅᐸᒍᑎᔪᓐᓇᓚᐅᖅᑐᖅ. ᐃᑲᔪᖅᑕᐅᓪᓗᓂ ᒪᒥᓴᐃᓂᕐᒧᑦ, ᓘᒃᑖᖓᓄᑦ, ᓂᕿᑦᑎᐊᕙᓕᕆᔨᒧᑦ, ᐃᓅᓕᓴᐅᑎᓄᓪᓗ, ᐊᑲᐅᓯᕚᓪᓕᖅᓯᒪᔪᖅ. ᓴᙱᔪᓂᒃ ᐃᓅᖃᑎᖃᖅᐸᖕᓂᖅ ᐱᖃᓐᓇᕆᔭᒥᓂᒃ, ᐃᖅᑲᓇᐃᔭᖃᑎᒥᓂᒃ, ᐃᓚᒥᓂᒃ ᓄᑕᖅᑲᖏᓐᓂᒡᓗ ᐱᒻᒪᕆᐊᓘᓯᒪᕗᖅ. ᓂᕈᐊᑦᑎᐊᖃᑦᑕᕐᓂᖅ ᑭᓇᒥᒃ ᖃᓂᒋᔭᖃᕐᒪᖔᑦ ᐃᓱᒪᒋᓯᒪᖕᒥᔭᖓᑦᑕᐅᖅ. ᑎᒥᒃᑯᑦ ᐆᒻᒪᕆᖕᓂᖅ ᐱᓱᖕᓂᒃᑯᑦ, ᐃᓱᒪᒃᓴᖅᓯᐅᕈᓐᓇᑦᑎᐊᕐᓂᒃᑯᑦ, ᐊᔪᕈᓐᓃᖅᓴᕐᓂᒃᑯᑦ ᐊᓂᖅᓵᖅᑐᕐᔪᐊᕐᓂᕐᒥᒃ ᐊᑐᕐᓂᕐᒥᒡᓗ ᓇᖕᒥᓂᖅ−ᐱᖃᓐᓇᕆᔭᖃᕐᓂᕐᒥᒃ ᐃᑲᔪᖅᓯᒪᒋᕗᖅᑕᐅᖅ.

ᐱᔪᒃᓯᑎᑦᑎᓂᐊᕐᓗᓂ, ᐅᐋᑦ ᐱᔪᒃᓯᑎᑕᐅᕙᒃᐳᖅ ᑭᖑᕚᒃᓴᑦᑎᓐᓄᑦ ᓇᖕᒥᓂᕐᓗ ᕿᑐᕐᖓᖏᓐᓄᑦ ᐃᓱᒪᑐᔫᓪᓗᑎᒃ. ᐱᔪᒃᓯᑎᑕᐅᕗᖅ ᓇᒡᓕᒍᓱᖕᓂᕐᒥᓄᑦ ᐃᓚᒥᓂᒃ, ᓴᐱᓕᖅᓴᕋᐃᙱᓐᓂᖏᓐᓄᑦ ᓄᑕᖅᑲᑦ ᐃᓕᓴᐃᔾᔪᑎᒋᔭᖏᑦ ᖃᓄᕐᓗ ᐊᒃᓱᕈᕐᓇᖅᑎᒋᖕᒪᖔᑦ ᒪᒃᑯᒃᑑᔭᕆᐊᖃᕐᓂᕐᒥᓂᒃ ᐅᓪᓗᒥᐅᓕᖅᑐᖅ. ᐊᓯᐊᒍᑦᑕᐅᖅ, ᐱᔪᒃᓯᑎᑦᑎᕙᒃᐳᖅ ᐊᕙᑎᑦᑎᓐᓂ, ᓄᓇᒥ ᐱᔪᓐᓇᕐᓂᖏᓐᓂᒡᓗ ᐊᒻᒪᓗᑦᑕᐅᖅ ᓴᓇᐅᒐᕐᓂᒃ, ᑐᓴᕐᓈᕐᓂᕐᒥᒃ ᐊᒻᒪ ᑕᕐᕆᔮᒃᓴᓂᒃ.

ᐃᓚᖓᑦ ᐊᒃᓱᕈᕐᓇᖅᑐᖅ ᑕᑯᕙᒃᑕᖓ ᒪᒃᑯᒃᑐᑦ ᕿᓂᖅᑎᓪᓗᒋᑦ ᐃᓄᖃᐃᓐᓇᕐᓂᖓᓂᒃ ᖃᕆᑕᐅᔭᒃᑯᑦ ᓄᓇᕐᔪᐊᖅ ᖃᓄᕐᓗ ᐊᒃᑐᐃᕙᖕᒪᖔᑦ ᐃᓗᐊᖅᓯᕚᓪᓕᕐᓂᕐᒥᒃ ᐊᔪᙱᓐᓂᖃᕐᓂᕐᒥᒃ ᑕᒻᒪᕐᓂᕐᒥᒃ. ᐊᖓᔪᖅᑳᖑᓪᓗᓂ ᐊᒃᓱᕈᖃᑦᑕᖅᑐᖅ ᓇᓕᒧᒌᒃᑎᓐᓇᓱᒃᖢᒋᑦ ᕿᑐᕐᖓᖏᑦ ᐱᕙᒌᔭᕈᒪᓪᓗᓂᒋᑦ ᓄᓇᕐᔪᐊᕐᒧᑦ ᐃᖅᑲᖅᑐᐃᔨᓄᑦ ᑎᓕᐅᕆᔪᒪᓪᓗᓂᓗ ᐊᑦᑕᕐᓇᖅᑐᒃᑰᖁᓪᓗᒋᑦ. "ᑕᐃᒪᑐᖅ ᐃᓕᓐᓂᐊᖅᑏᑦ ᑕᒪᑐᒥᖓ ᑕᐅᑐᖃᑦᑕᖅᑐᑦ... ᑐᑭᓯᐅᒪᓗᓂ ᑕᒻᒪᕐᓂᖅ ᐱᒻᒪᕆᐊᓘᓂᖓᓂᒃ ᐊᑕᖐᔪᒥᒃ ᐱᕙᓪᓕᐊᓂᐊᕐᓗᓂ ᐃᓅᓂᕐᒥᒃ," ᒪᓂᒪᑎᑉᐸᒃᑕᖓ.

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒧᑦ ᓇᖕᒥᓂᖅ, "ᖃᓄᐃᙱᑦᑐᖅ ᓴᙱᓂᖅᓴᐅᓪᓗᓂᓗ ᐃᓱᒪᒋᔭᕐᓂᑦ." ᐃᒻᒥᓂᒃ ᓇᓗᓈᕿᓪᓗᓂ ᐊᒻᒪᓗ ᐃᒻᒥᓂᒃ ᑕᑯᓐᓇᓐᖑᐊᖅᑐᓂ ᐊᑲᐅᖏᓕᐅᕈᑎᓂᒃ ᒪᒃᑯᒃᑑᓪᓗᓂ, ᐅᖃᐅᔾᔨᒍᒪᔪᖅ ᒪᒃᑯᓐᓂᖅᓴᓂᒃ ᖃᑦᑎᓂᒃ ᐱᒻᒪᕆᐅᓂᖅᓴᐅᔪᓂᒃ ᐱᑕᖃᕐᒪᖔᖅ ᐊᒻᒪᓗ ᐱᒻᒪᕆᐅᓂᖓ ᐊᖏᓂᖅᓴᐅᓚᐅᕐᒪᑦ. ᓇᒻᒥᓂᖅ-ᑕᐅᑐᒐᖓ ᐊᒻᒪᓗ ᐊᓯᖏᑦ ᐃᓄᐃᑦ ᐃᓱᒪᒋᔭᖏᑦ ᐱᒻᒪᕆᐅᓕᓚᐅᖅᑐᑦ ᐱᔾᔪᑎᒋᓪᓗᒍ ᐃᓚᒌᑦ ᖃᓄᐃᓐᓂᖏᓐᓄᑦ ᐊᒻᒪᓗ ᐊᑦᑐᐃᓂᖃᓚᐅᖅᑐᖅ ᐃᓐᓇᐅᓕᕐᓂᖓᓄᑦ. ᖃᐅᔨᒪᖁᔨᔪᖅ, "ᖃᓄᐃᙱᑦᑎᐊᖅᑐᑎᑦ ᐊᒻᒪᓗ ᓴᙱᔫᓗᑎᑦ ᐊᒻᒪᓗ ᓯᓚᑐᔫᓪᓗᑎᑦ."

ᐃᓱᒪᑐᔫᓪᓗᓂ ᐃᑲᔪᓚᐅᖅᑐᖅ ᓴᖅᑭᑦᑎᓪᓗᓂ ᓄᓇᕐᔪᐊᖕᒥᑦ ᕿᒪᒃᓯᔪᓐᓇᕐᖢᓂ ᓄᑕᕋᐅᓗᓂ, ᒫᓐᓇ ᓴᐃᕋ ᑎᐹᑦ ᑎᑎᕋᖃᑦᑕᓕᖅᐳᖅ ᓂᐱᒥᑦ ᒪᒃᐱᖅᑐᒐᖕᒥᑦ ᓴᖅᑭᔮᖅᖢᓂᓗ ᑭᒃᑯᓕᒫᑦ ᖁᕕᐊᒋᔪᓐᓇᖅᑕᖏᑦ. ᐃᓕᓴᐃᔨᐅᔪᖅ ᐃᓕᓐᓂᐊᕐᕕᐊᕈᓯᕐᒥ ᐊᒻᒪᓗ ᐃᓕᓐᓂᐊᖅᑎᐅᓪᓗᓂ ᓇᖕᒥᓂᖅ ᐱᐅᓯᑐᖃᕐᒥᓂ, ᑖᓐᓇ ᐊᓪᓚᖓᔪᖅ ᐃᓄᑑᔪᖅ ᐊᓈᓇᐅᔪᖅ ᐃᓕᓐᓂᐊᑦᑎᐊᖅᓯᒪᖕᒪᑦ, ᑭᖑᓂᖔᑦᑎᓐᓂ ᐱᓕᕆᓪᓗᓂ ᓯᕗᓕᖅᖢᓂᓗ ᑭᖑᕚᒃᓴᑦᑎᓐᓄᑦ. ᐊᕕᒃᑐᐃᓪᓗᓂ ᐃᖏᕐᕋᓂᐅᔪᓂᒃ ᐊᒻᒪᓗ ᐱᕈᖅᓴᐃᓂᖅ ᐱᐅᓂᖅᓴᒥᒃ ᓯᕗᓂᒃᓴᖃᕐᓂᕐᒥᒃ ᕿᑐᕐᖓᖏᓐᓄᑦ, ᑎᑎᕋᖅᑐᖅ ᑭᖑᓪᓕᕐᒥ ᐊᔪᙱᓐᓂᖃᖅᖢᓂ ᑎᑎᕋᖅᑎᐅᓪᓗᓂ ᐊᒻᒪᓗ ᐱᔪᒪᓕᖅᑎᑦᑎᓪᓗᓂ ᓯᓐᓇᑦᑑᒪᒥᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.