ᒪᓕᒐᓕᐅᖅᑎ ᐳᕋᐃᐊᓐ ᕗᕌᓐᓯᔅ ᓯᕗᓪᓕᖅᐸᐅᓪᓗᓂ ᐃᓅᕗᖅ ᒥ'ᑭᓛᒥᓐᑦ ᐳᕆᓐᔅ ᐃᐊᑦᕗᑦ ᐊᐃᓚᓐᒥ ᑲᓇᑕᒥ ᐃᑦᑐᒃᑯᕕᖕᒥ ᐱᔨᑦᑎᕋᖅᖢᓂ. ᐃᓅᓂᑯ ᓕᓇᒃᔅ ᕿᑭᖅᑕᖓᓂ ᓄᓇᖃᖅᑳᖅᓯᒪᔪᓂ ᐳᕆᓐᔅ ᐃᐊᑦᕗᑦ ᐊᐃᓚᓐᒥ, ᐃᑦᑐᖅ ᕗᕌᓐᓯᔅ ᐱᔨᑦᑎᕋᓚᐅᕐᒥᔪᖅ ᐊᕐᕌᒍᓄᑦ 12-ᓄᑦ ᐊᖓᔪᖅᑳᖑᓪᓗᓂ ᐋᐱᒍᐃᑦ ᓄᓇᖃᖅᑳᖅᓯᒪᔪᓄᑦ.

ᐃᑦᑐᖅ ᕗᕌᓐᓯᔅ ᖃᐃᓚᐅᖅᑐᖅ ᑎᔅᓯᓈᕿᔪᒻᒪᕆᐅᓪᓗᓂ ᓇᖏᖅᓯᓪᓗᓂ ᐳᖅᑐᔪᒻᒪᕆᐊᓗᒻᒧᑦ, ᑭᓯᐊᓂ ᓄᓇᓕᖓᓐᓃᖏᓐᓇᐅᔭᖅᑐᖅ ᐱᓇᓱᐊᖅᑎᓪᓗᒍ. "ᓄᓇᖃᖅᑳᖅᓯᒪᔪᑦ ᐃᓄᐃᑦ, ᖃᓂᑦᑐᒻᒪᕆᐅᕗᒍᑦ ᓄᓇᑦᑎᓐᓄᑦ. ᐊᒃᑐᐊᓂᖃᖅᑐᒍᑦ... ᖃᐅᔨᒪᐃᓐᓇᐅᔭᓚᐅᖅᑐᖓᓗ ᐅᑎᖅᑎᑦᑎᔭᕆᐊᖃᕐᓂᓐᓂᒃ ᓄᓇᓕᓐᓄᑦ."

ᐃᓕᓐᓂᐊᖅᑎᑕᐅᓯᒪᔪᖅ ᐃᖅᑭᓖᑦ ᐅᓪᓗᖓᓂ ᐃᓕᓐᓂᐊᕐᕕᖕᒥ ᓕᓇᒃᔅ ᕿᑭᖅᑕᖓᓂ, ᐃᑦᑐᖅ ᕗᕌᓐᓯᔅ ᒥᑎᖕᔅ ᐱᓚᐅᖅᑐᖅ ᐃᓕᓐᓂᐊᕐᓂᑭᓐᓂᖅᓴᒥᒃ. "ᓄᓇᓕᖕᒥᐅᑦ ᐊᒃᓱᕈᓚᐅᖅᐳᑦ ᖃᓪᓗᓈᖑᖃᑎᒌᙱᑦᑐᑦ ᐊᒻᒪ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ...[ᐃᓕᓐᓂᐊᕐᕕᒃ] ᐊᐅᓚᑕᐅᓚᐅᖅᐳᖅ ᐃᒃᓯᕋᕐᔪᐊᓄᑦ ᐊᒻᒪ nuns−ᓄᑦ ᐊᒻᒪ ᓄᓇᖃᖅᑳᖅᓯᒪᙱᑦᑐᓄᑦ ᐃᓕᓴᐃᔨᓄᑦ. ᑕᑯᓚᐅᕐᓯᒪᔪᖓ ᑕᐃᒃᓱᒪᓂ ᑕᐃᑲᓃᓚᐅᕐᒪᑕ ᑮᓇᐅᔾᔭᒃᓵᖏᓐᓄᑦ, ᐊᒻᒪᓗ ᐃᓕᓐᓂᐊᖅᑎᑦᑎᑦᑎᐊᓚᐅᖏᓇᑦᑕ ᐃᓅᓯᑦᑎᓐᓂᒃ. ᑕᒪᓐᓇ ᐊᒃᓱᕈᕐᓇᓚᐅᖅᑐᖅ."

ᑭᓯᐊᓂ ᑕᐃᒪᐃᑎᑦᑎᓚᐅᓐᖏᒻᒪᑦ ᓄᖅᑲᖓᑎᑦᑎᒐᓱᐊᖅᑐᓂ. "ᖃᐅᔨᒪᓚᐅᖅᑐᖓ ᐱᔪᒪᒃᑲᓐᓂᕐᓂᓐᓂᒃ," ᓯᓇᑐ ᕗᕌᓐᓯᔅ ᐃᖅᑲᐅᒪᔪᖅ. "ᐅᔾᔨᕈᓱᓚᐅᖅᑐᖓ ᑕᐃᔅᓱᒪᓂ ᑲᑭᐊᖕᒧᑦ ᐃᖏᕐᕋᓂᑐᐃᓐᓇᐅᓂᖓᓂᒃ, ᑕᐅᓄᙵᕈᓐᓇᖅᖢᖓᓗ − ᓲᕐᓗ ᐃᓚᖏᑦ ᐱᖃᓐᓇᕆᔭᒃᑲ− ᑕᐃᒪᐃᓕᐅᖅᐸᙱᖦᖢᖓ, ᐅᕝᕙᓘᓐᓃᑦ ᐱᐅᔪᒥᒃ ᐊᓪᓗᕆᐊᕈᓐᓇᖅᑐᖓ ᐊᓯᐊᓄᐊᕐᓗᖓᓗ, ᐱᓕᕆᑦᑎᐊᕋᓱᒡᓗᖓᓗ ᐃᓕᓐᓂᐊᕈᓐᓇᕐᓂᓐᓂ."

ᒪᒃᑯᒃᑐᖅ ᐳᕋᐃᔭᓐ ᕗᕌᓐᓯᔅ ᖃᑕᙳᑎᒥᓂᒃ ᕿᒪᐃᓚᐅᖅᐳᖅ ᐊᒻᒪ ᓄᓇᓕᕋᓛᖑᓪᓗᓂ 180-ᓂᒃ ᐃᓚᒋᔭᐅᔪᓂᒃ, ᐊᒻᒪ ᕼᐋᓚᓐ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖃᑕᐅᓪᓗᓂ ᕿᔪᓕᕆᔨᙳᖅᖢᓂᓗ. "ᑕᐃᒪᓕ, ᐃᓄᑑᓚᐅᖅᑐᖓ. ᖃᐅᔨᒪᓚᐅᙱᑦᑐᖓ ᖃᓄᐃᓕᐅᕐᒪᖔᕐᒪ, ᖃᐅᔨᒪᔭᖃᖅᖢᖓᓘᓐᓃᑦ, ᑭᓯᐊᓂ ᐃᔾᔪᐊᒐᒃᓴᑦᑎᐊᕙᐅᔪᓂᒃ ᓇᓂᓯᓚᐅᖅᑐᖓ ᐃᑲᔫᑎᔪᓂᒃ ᐅᕙᓐᓄᑦ ᑕᓯᐅᖅᓯᔾᔪᑕᐅᓪᓗᑎᒃ."

ᐊᑕᖐᓪᓗᓂ ᐊᓂᒍᖅᑎᓐᓇᓱᒋᐊᖃᖅᐸᒃᑐᓂᒃ ᐊᔭᖅᑭᑦᑕᕈᑎᓂᒡᓗ, ᖃᐅᔨᒪᓚᐅᖅᐳᖅ ᐊᒃᓱᕈᖅᖢᓂ ᐱᓕᕆᕙᖕᓂᖓᓂᒃ ᐱᓪᓗᐊᑕᐅᓂᖓᓂᒃ ᐱᐅᓯᒋᐊᖅᑎᑦᑎᓂᐊᕐᓗᓂ ᖃᓄᐃᓕᖓᓂᕆᔭᒥᓂᒃ." ᓂᐊᖁᐃᑦ ᓯᐅᕋᕐᒧᐊᕈᓐᓇᙱᑕᐃᑦ [ᐊᑲᐅᙱᓕᐅᕈᑎᑦ] ᐱᑕᖃᕈᓐᓃᖅᑎᓪᓗᒍ, ᐃᓅᓯᒃᑰᕈᒪᒍᕕᑦ ᑭᓱᓂᒡᓗ ᐱᓯᒪᔪᒪᓇᔭᖅᑕᕐᓂᒃ." ᑭᖑᓂᐊᒍᑦ, ᑖᓐᓇᓴᐃᓐᓇᖅ ᐃᓱᒪᒋᔭᐅᓂᖓ ᑎᑭᐅᑎᔾᔪᑕᐅᓚᐅᖅᐳᖅ ᐅᖓᓯᒃᑐᒥᑦ ᐱᔭᕇᕈᓯᐊᕐᒥᑦ ᐃᓄᓕᕆᔨᐅᓂᕐᒧᑦ ᑖᓪᕼᐊᐅᓯ ᓯᓚᑦᑐᖅᓴᕐᕕᒡᔪᐊᖓᓂ.

ᒪᒃᑯᒃᑐᒥᒃ ᐃᓚᖃᖅᖢᓂ ᐃᑲᔪᖅᑐᐃᔭᖅᑐᖅᖢᓂ, ᓯᓚᑦᑐᖅᓴᕐᕕᒡᔪᐊᒥ ᐊᐅᓪᓚᓚᐅᖅᓯᒪᕗᖅ ᐊᕐᕌᒍᑦ ᐱᖓᓱᑦ ᐊᓂᒍᖅᑎᓪᓗᒋᑦ ᐃᖅᑲᓇᐃᔮᖅᑖᕆᐊᖅᑐᖅᖢᓂ ᒐᕙᒪᑐᖃᒃᑯᓐᓂ. ᕋᑦ ᕼᐊᐅᔅᒥ ᐃᒃᓯᕙᖃᑕᐅᓕᕋᓗᐊᖅᑎᓪᓗᒍ ᐃᑦᑐᒃᑯᕕᒻᒥ, ᑕᐃᒃᓱᒪᓂ ᐳᕋᐃᐊᓐ ᒐᕙᒪᒃᑯᑦ ᐃᖅᑲᓇᐃᔮᖓ ᑎᑎᖅᑲᓂᐊᕐᕕᒻᒦᓚᐅᖅᑐᖅ ᐸᐃᑉᐹᒃᑯᕕᒻᒥ ᐊᓪᓚᑦᑎᐅᓪᓗᓂ. "ᐃᓚᖏᑦ ᐃᓄᐃᑦ ᐅᖃᕋᔭᖅᑐᑦ ᐊᑦᑎᒃᑐᑯᓘᓂᕋᕐᓗᒍ ᐃᖅᑲᓇᐃᔮᖅ, ᑭᓯᐊᓂ ᐅᕙᓐᓄᑦ ᑭᓱᓕᒫᑦᑎᐊᖑᓚᐅᖅᑐᖅ ᓲᖃᐃᒻᒪ ᐱᑎᑦᑎᓚᐅᕐᒪᑦ ᖃᑕᙳᑎᓐᓄᑦ."

ᕿᓃᓐᓇᐅᔭᖅᑐᖅ ᖃᓄᖅ ᐱᐅᓯᒋᐊᕈᓐᓇᕐᒪᖔᑦ, ᐳᕋᐃᔭᓐ ᓇᖏᖅᓯᓪᓗᓂ ᒐᕙᒪᒃᑯᓐᓄᑦ ᐃᖅᑲᓇᐃᔭᕐᖢᓂ ᐊᕐᕌᒍᒐᓴᐅᓕᖅᑐᓄᑦ ᖁᕝᕙᕆᐊᖅᑎᑕᐅᓇᓱᖕᓂᖓᓂ ᖁᑦᑎᖕᓂᖅᓴᒥ ᐊᐅᓚᑦᑎᔨᓄᑦ. ᑭᓯᐊᓂ, ᐊᓯᐊ ᖁᕕᐊᓇᖅᑐᖅ ᐊᒃᓱᕈᕐᓇᖅᑐᕐᓗ ᐱᕕᒃᓴᖅ ᓇᖕᒥᓂᖅ ᓴᖅᑭᖦᖢᓂ. ᐃᓚᖓᑦ ᓄᓇᓕᖕᓂ ᐃᓐᓇᐅᑉ ᐅᖃᓚᐅᖅᐳᖅ ᐳᕋᐃᔭᓐ ᓂᕈᐊᒐᒃᓴᐅᓂᖓᓂᒃ ᐊᖓᔪᖅᑳᕐᒧᑦ ᐋᐱᒍᐃᑦ ᓄᓇᖃᖅᑳᖅᓯᒪᔪᓄᑦ, ᑖᓐᓇ ᐃᓂᒥᒃ ᓄᖅᑲᖓᕝᕕᒋᓚᐅᖅᖢᓂᐅᒃ ᐱᖓᓱᓄᑦ ᐃᓂᓄᑦ (12−ᓄᑦ ᐊᕐᕌᒍᓄᑦ), ᐱᓇᔪᓚᐅᙱᓐᓂᕐᒥᓂ ᐃᑦᑐᒃᑯᕕᖕᒥᐅᓄᑦ.

"ᐃᓱᒪᖃᓚᐅᖅᑐᖓ] ᐊᑐᕈᓐᓇᖅᑰᖅᑐᖓ ᐃᓕᓯᒪᔭᓐᓂᒃ ᐊᕐᕌᒍᒐᓴᖕᓂᑦ ᒐᕙᒪᒃᑯᓐᓂ ᐊᒻᒪ ᓄᓇᖃᖅᑳᖅᓯᒪᔪᓂ ᓄᓇᓕᖕᓂ ᕿᒥᕐᕈᖁᓪᓗᒋᑦ ᑭᓱᑐᐃᓐᓇᓂᒃ ᐊᖏᓂᖅᓴᒃᑯᑦ ᑕᐅᑐᖅᑰᖅᑕᒃᑯᑦ ᐃᑲᔪᕐᓗᒋᓪᓗ ᓄᓇᖃᖅᑳᖅᓯᒪᔪᑐᐊᖑᙱᑦᑐᑦ, ᑭᓯᐊᓂ ᓄᓇᖃᖅᑳᖅᓯᒪᔪᑦ ᓄᓇᓕᖏᑦ ᐊᕕᒃᑐᖅᓯᒪᔪᓂ ᐊᒻᒪ ᑲᓇᑕᒥ, ᐊᒻᒪᓗ ᑲᓇᑕᒥᐅᓕᒫᑦ."

ᐃᑦᑐᖅ ᕗᕌᓐᓯᔅ ᐅᖃᐅᔾᔨᒋᐊᕐᓂᖓ ᒪᒃᑯᑦᑐᓄᑦ ᓄᓇᖃᖅᑳᖅᓯᒪᔪᓄᑦ ᐱᒋᐊᖅᑐᓄᑦ ᓇᒻᒥᓂᖅ ᐊᖅᑯᑎᖏᓐᓂᑦ ᐊᔾᔨᑐᐃᓐᓇᖓ ᓇᒻᒥᓂᖅ ᑐᓂᓚᐅᖅᓯᒪᔭᖏᓐᓂᑦ ᐊᕐᕌᒍᕋᓴᐃᑦ ᓈᓕᖅᑐᑦ. "ᐅᖃᐃᓐᓇᐅᔭᖅᑐᖓ, ᐃᓅᓯᖅ ᑐᓂᓂᐊᖅᑖᖓ ᐃᓕᔭᓐᓂᒃ. ᐱᐅᔪᒥᒃ ᐅᖃᐅᓯᖃᕈᒪ ᐊᒻᒪᓗ ᓯᕗᒧᐊᓪᓗᖓ, ᑕᐃᒪᓐᓇ ᑕᕝᕙ ᐲᕐᓂᐊᖅᑕᕋ. ᑕᐃᒫᒃ ᐃᓱᒪᒍᓐᓇᓚᐅᕋᒪ, ᐊᒻᒪᓗ ᑕᐃᒪᐃᒻᒪᑦ ᕿᓃᓐᓇᐅᔭᖅᐳᖓ ᖃᓄᖅ ᐱᐅᓯᕚᓕᑎᑦᑎᒍᓐᓇᕐᒪᖔᕐᒪ, ᐱᒡᒐᓇᖅᑐᒃᑰᑦᑐᖓ ᐃᓅᓯᖅᑎᑐᑦ. ᐃᓛᒃ, ᐃᓚᖏᓐᓃᙶᖅᓯᒪᕗᖓ ᐊᐅᓚᑦᑎᐊᙱᑦᑐᓂᒃ, ᐊᐅᓚᑦᑎᐊᙱᑦᑐᓂᒃ ᓄᓇᓕᖕᓂ, ᐊᔪᕐᓇᙱᖦᖢᓂᓗ. ᑭᓯᐊᓂ ᐅᕙᓐᓄᑦ ᐅᖃᖅᑲᐅᔪᖓ, ᕿᑐᕐᖓᒃᑲ ᐊᓯᔾᔨᙱᒃᑯᒃᑭᑦ, ᓇᒧᓐᖓᐸᓪᓕᐊᙱᑦᑐᖓ ᕿᑐᕐᖓᒃᑲᓗ. ᑕᒪᓐᓇ ᐊᓯᔾᔨᕆᐊᖃᓚᐅᕋᒃᑯ ᐊᒻᒪᓗ ᑭᓯᐊᓂ ᐱᔪᓐᓇᖅᑐᖓ, ᑕᒻᒪᖏᓪᓗᖓ?"

ᓯᓇᑐ ᕗᕌᓐᓯᔅ ᑎᓕᐅᕆᑦᑎᐊᖃᑦᑕᖅᑐᖅ ᐃᓅᓱᒃᑐᓂᒃ ᐃᓱᒪᒋᐊᖁᓪᓗᒋᑦ ᓇᒻᒥᓂᖅ ᐱᐅᔪᒥᒃ ᐱᓕᕆᖁᓪᓗᒋᑦ: "ᐊᓯᔾᔨᕈᓐᓇᕈᒪ ᐊᒻᒪᓗ ᐊᓯᔾᔩᒍᓐᓇᖏᒃᑯᒪ, ᑕᐃᒪᓕ ᐅᖃᕐᓂᕐᓗᒍᓐᓇᖏᑦᑐᖓ ᑭᓇᑐᐃᓐᓇᕐᒥᒃ ᖃᐃᔪᒥᒃ ᐊᒻᒪᓗ ᐱᓕᕆᓗᓂ ᐱᐅᓗᐊᖏᒋᐊᖓᓂᒃ. ᐊᓱᐃᓛᒃ ᐃᓕᖕᓂᒃ ᐊᓪᓗᕆᐊᖃᓕᖅᐳᑎᑦ! ᓯᕗᒧᐊᒃᑯᕕᑦ ᐱᐅᔪᒃᑯᑦ, ᐃᓅᓯᖅ ᐃᓕᖕᓄᑦ ᐱᐅᓇᔭᖅᑐᖅ."

ᖁᔭᓐᓇᒦᑦᑎᐊᕐᒥᔭᕋ ᔭᓯᑲ ᑎ ᕼᐊᒻᕗᕆᔅ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.