"ᖃᐅᔨᒪᑦᑎᐊᕈᒪᕗᖓ ᓄᓇᓕᕗᑦ ᐱᑐᐃᓐᓇᕆᐊᖃᓕᕐᓂᖏᓐᓂᒃ ᐋᖅᑭᒃᓱᐃᓂᕐᒥᒃ ᐊᑲᕐᕉᑎᖃᕐᓂᕐᒥᒡᓗ ᑕᒪᒃᑯᓂᖓ ᐱᓕᕆᔾᔪᑎᓂᒃ, ᐱᓗᐊᙳᐊᖅᖢᓂ ᖃᕆᑕᐅᔭᒃᑰᖅᐸᓪᓕᐊᓕᖅᑎᓪᓗᒋᑦ," ᓴᒃ ᒑᐳᑦ ᓂᐱᖅᑯᖅᑐᓪᓗᓂ ᑕᐅᑐᙳᐊᖅᐳᖅ. ᐃᓚᒋᔭᐅᔪᖅ Frog Lake ᓄᓇᖃᖅᑳᖅᓯᒪᔪᓄᑦ ᐊᒻᒪᓗ ᐊᓪᓚᓄᑦ ᐊᑎᖓ ᐸᕙᓘ ᓯᕙᓂᖅᑐᖅ ᓯᕙᓂᖅᑎ. ᑐᕌᓐᑐᒥᐅᑕᖅ ᐃᓅᓚᐅᖅᓯᒪᓪᓗᓂᓗ ᐱᕈᖅᓴᓪᓗᓂᓗ ᓗᐃᑦᒥᓐᔅᑐᒥ. ᑐᕌᓐᑐᒧᑦ ᓅᓚᐅᖅᓯᒪᔪᖅ ᐃᓕᓐᓂᐊᕐᕕᐊᓗᖕᒧᑦ ᐊᒻᒪ ᓯᓚᑦᑐᖅᓴᕐᕕᒡᔪᐊᒧᑦ ᐊᓈᓇᖓ ᐃᖅᑲᓇᐃᔮᖅᑖᓚᐅᕐᒪᑦ ᓈᓚᐅᑎᒃᑯᑦ ᐊᒻᒪ ᑕᓚᕖᓴᒃᑯᑦ. ᐱᓕᕆᖃᑦᑕᖅᓯᒪᕗᖅ ᓄᑖᙳᖅᐸᓪᓕᐊᔪᓂᒃ ᐊᒻᒪ ᖃᕋᓴᐅᔭᓕᕆᔾᔪᑎᓂᒃ, ᐱᓕᕆᕙᒃᖢᓂ ᐱᓪᓚᑦᑖᖑᓂᖅᓴᓂᒃ, 3D-ᓂᒃ ᐋᖅᑭᒃᓱᐃᓂᕐᒥᒃ ᐊᒻᒪ ᐅᓂᒃᑳᖅᑐᐊᕐᓂᕐᒥᒃ.

ᐅᓂᒃᑳᕆᖃᑦᑕᖅᑕᖓ ᐱᓕᕆᐊᖓ ᑲᑎᑎᑦᑎᔪᖅ ᐃᓕᖅᑯᓯᕐᒥᒃ ᐅᖃᐅᓯᕐᒥᓪᓗ ᐊᔾᔨᐅᖏᑦᑐᓂᒃ ᐅᓂᒃᑳᖅᑐᐊᓂᒃ ᐊᒻᒪᓗ ᐱᔪᒥᓇᖅᓯᑎᑦᑎᓪᓗᓂ ᐃᓄᓐᓂᒃ. ᓴᓇᕙᒃᐳᖅ ᖃᓄᐃᓕᐅᕈᓘᔭᕈᑎᒃᓴᓂᒃ ᑕᑯᒃᓴᐅᔪᓂᒃ ᐊᓐᓄᕌᓂᒃ, ᓴᓇᙳᐊᒐᕐᓂᒃ ᐊᓯᖏᓐᓂᒡᓗ ᐃᓂᓂᒃ ᐆᒻᒪᕆᒃᑐᓂᒃ ᐃᓄᐃᑦ ᖃᕆᑕᐅᔭᒃᑰᕈᑎᖏᑎᒍᑦ. ᐃᓱᒪᒋᔭᒥᓂᒃ ᓇᓗᓇᐃᖅᓯᓚᐅᖅᐳᖅ ᕚᓐᑰᕙᒥ ᑕᕐᕆᔭᐅᓯᐅᕐᓂᕐᒧᑦ ᖁᕕᐊᓱᒍᑕᐅᔪᒥ ᑲᑎᙵᓂᐅᔪᒥ ᓄᓇᖃᖅᑳᖅᓯᒪᔪᓂ ᐃᓄᖕᓂ ᖁᕕᐊᒋᔭᖃᖅᑐᓂ ᐃᓱᒪᒋᔭᐅᔪᒥ ᖃᕋᓴᐅᔭᑎᒍᑦ ᐅᓂᒃᑳᖅᑐᐊᕐᓂᐅᔪᒥᑦ.  ᐊᓯᐊᑦᑕᐅᖅ ᐱᓕᕆᔪᒪᖕᒥᔭᖓ ᓄᓇᒥ ᑐᙵᕕᓕᖕᓂᒃ ᖃᕆᑕᐅᔭᒃᑯᑦ ᐃᓕᓐᓂᐊᖅᑎᑦᑎᓂᕐᒥᒃ, ᑐᙵᕕᖃᕐᓗᑎᒃ ᖃᕆᑕᐅᔭᒃᑯᑦ ᐱᖁᑎᓂᒃ ᐃᓂᓄᑦ. ᑖᔅᓱᒪ ᓯᕗᓂᐊᒍᑦ, ᐃᖅᑲᓇᐃᔭᖃᑦᑕᓚᐅᖅᓯᒪᕗᖅ SAAS (Software as a Service).

ᐱᕈᖅᓴᓪᓗᓂ ᓄᓇᓕᒡᔪᐊᒥ ᐊᒻᒪ ᐳᓛᕆᐊᒃᑲᓐᓂᖅᐸᒃᖢᓂ, ᒎᐳᑦ ᖃᐅᔨᓯᒪᕗᖅ ᐱᐅᓂᖓᓂ ᐃᓚᒌᖕᓂᕐᒥ ᐊᒻᒪ ᑲᑎᙵᓂᐅᔪᒥ ᐊᒥᓱᓂ ᐃᓄᖕᓂ. ᐱᔪᒪᓂᖃᑦᑎᐊᖅᑐᖅ ᐊᑐᕈᒪᓪᓗᓂ ᐊᔪᙱᓐᓂᕐᒥᓂᒃ ᐃᑲᔪᕈᒪᓪᓗᓂ ᓄᓇᓕᖓᓂ ᓄᓇᖃᖅᑳᖅᓯᒪᔪᓂᒡᓗ ᐃᓄᖕᓂᒃ, ᓄᓇᖃᕐᕕᖕᒥ ᓯᓚᑖᓂᓗ. "ᐱᐅᔪᒻᒪᕆᐊᓗᖕᒥᒃ ᓄᓇᖃᖅᑳᖅᑐᓂᒃ ᐱᓕᕆᔾᔪᑎᓂᒃ ᑲᒻᐸᓂᖃᕈᒪᒐᒪ ᓴᓇᔪᓐᓇᕐᓗᑕ ᐊᒻᒪ ᐋᖅᑭᒃᓱᐃᓗᑕ ᐊᑕᐅᑦᑎᒃᑯᑦ ᐊᒻᒪ ᐱᕕᒃᓴᖃᖅᑎᑦᑎᓪᓚᕆᒡᓗᑕ ᓄᓇᖃᖅᑳᖅᑐᓂᒃ ᐃᓄᖕᓂᒃ," ᐅᖃᕆᓪᓗᓂ ᓂᐱᖅᑯᖅᑐᓪᓗᓂ. ᐱᑎᑦᑎᔪᒪᖕᒥᔪᖅ ᐅᖓᓯᒃᑐᒥ ᐃᖅᑲᓇᐃᔭᕐᓂᕐᒧᑦ ᐱᕕᒃᓴᓂᒃ ᐃᓄᐃᑦ ᐊᐅᓪᓚᕆᐊᖃᖃᑦᑕᖁᓇᒋᑦ ᓄᓇᓕᖏᓐᓂ ᐱᓕᕆᖃᑎᖃᕆᐊᖅᑐᕐᓗᑎᒃ. ᐅᕕᓂᖓ ᖃᑯᖅᓯᓪᓗᓂ ᓄᓇᖃᖅᑳᖅᓯᒪᓪᓗᓂ, ᐃᓄᐃᑦ ᐃᓱᒪᑲᐅᑎᒋᓚᐅᙱᓚᑦ ᓄᓇᖃᖅᑳᖅᓯᒪᓂᖓᓂᒃ ᐊᒻᒪ ᐊᕐᕌᒍᓂ ᖃᔅᓯᐊᕐᔪᖕᓂ ᐊᓂᒍᖅᑐᓂ ᐱᓇᔪᒃᓯᒪᕗᖅ ᑲᑎᙵᓕᒃᑲᓐᓂᕋᓱᒃᖢᓂ ᐊᑐᕋᓱᒃᖢᓂᓗ ᐃᓕᑕᒥᓂᒃ ᐱᕚᓪᓕᕈᑎᒃᓴᓂᒃ ᐃᓄᖁᑎᒥᓄᑦ.

ᐃᓕᓐᓂᐊᕐᓂᕐᒥᓄᑦ ᐱᓕᕆᔨᒻᒪᕆᐅᓂᕐᒧᓪᓗ ᐱᓕᕆᖃᑦᑕᖅᓯᒪᓂᑰᓂᖓᓄᑦ, ᓇᓗᓇᐃᒃᑯᑕᖅᑖᓚᐅᖅᐳᖅ ᓄᓇᖃᖅᑳᖅᑐᓂᒃ ᖃᐅᔨᓴᕐᓂᕐᒥᒃ ᐊᕙᑎᓕᕆᓂᕐᒧᓪᓗ ᖃᐅᔨᓴᕐᓂᕐᒥᒃ ᓯᓚᑦᑐᖅᓴᕐᕕᒡᔪᐊᒥ ᑐᕌᓐᑐᒥ ᐊᓂᒍᐃᑐᐊᕋᒥ. "ᓱᓕ ᐊᖏᔪᐊᓗᖕᒥᒃ, ᐊᖏᔪᐊᓗᖕᒥ ᐊᑐᕐᓂᖃᖅᐳᖅ ᐊᒥᓱᓂ ᑕᐃᒪᐃᑦᑐᓂ ᓇᓗᓇᐃᒃᑯᑕᕐᓂ, ᐱᓗᐊᙳᐊᖅᑐᒥ ᒪᓕᒃᖢᓂ ᖃᓄᐃᓕᐅᕐᓂᕆᔭᕐᓂᒃ... ᑭᓯᐊᓂ ᖃᐅᔨᕗᖓ, ᐱᓗᐊᖅᑐᒥ ᖃᕋᓴᐅᔭᓕᕆᓂᕐᒥ ᐊᒻᒪ ᐊᓯᖏᓐᓂ ᐱᓕᕆᕝᕕᖕᓂ, ᑭᓱᑐᐃᓐᓇᐃᑦ ᓱᒃᑲᓕᓗᐊᒧᑦ ᐃᖏᕐᕋᓲᖑᖕᒪᑕ ᐃᓕᑦᑎᑐᐃᓐᓇᕈᕕᐅᒃ ᐊᒻᒪ ᖃᐅᔨᓗᒍ, ᐱᓕᕆᓕᒪᓗᓂ, ᖃᓄᐃᔾᔮᖅᑰᙱᑦᑐᑎᑦ," ᐅᖃᖅᑐᖅ.

ᐃᓕᓐᓂᐊᕇᕋᒥ, ᓄᖅᑲᖓᓚᐅᑲᓚᐅᖅᐳᖅ, ᐊᐅᓪᓚᑲᑕᒃᖢᓂ ᐊᒻᒪ ᐃᓕᓴᐃᔨᐅᓪᓗᓂ ᖃᓪᓗᓈᑐᑦ ᑲᓇᑕᐅᑉ ᓯᓚᑖᓄᑦ ᐊᒻᒪ ᐅᑎᖅᖢᓂ ᐃᖅᑲᓇᐃᔭᕆᐊᖅᖢᓂ ᐱᖃᓐᓇᕇᖕᓂᕐᒧᑦ ᑐᑦᑕᕐᕕᖕᒧᑦ ᐋᓐᑎᐅᕆᐅᒥ. ᖃᕋᓴᐅᔭᓕᕆᖃᑦᑕᓕᓚᐅᖅᐳᖅ ᑐᕌᓐᑐ ᓯᓚᑦᑐᖅᓴᕐᕕᒡᔪᐊᖓᓂ ᑮᓇᐅᔭᓕᐅᕋᓱᒃᑎᐅᙱᑦᑐᒧᑦ. ᑕᐃᑲᙵᑦ, ᐃᓕᓐᓂᐊᕐᕕᖕᒧᑦ ᐅᑎᓚᐅᖅᐳᖅ ᐃᓕᓐᓂᐊᖅᖢᓂ ᖃᕋᓴᐅᔭᓕᕆᓂᕐᒥᒃ ᐊᒻᒪ ᐊᑕᐅᓯᕐᒥ ᐃᓕᓐᓂᐊᕐᓇᒥ, ᐃᖅᑲᓇᐃᔭᓕᖅᑎᑕᐅᓪᓗᓂ ᐱᒋᐊᓕᓵᖅᑐᒧᑦ ᑕᐃᔭᐅᔪᒥ Cloud Permit. ᐃᖅᑲᓇᐃᔭᓕᓚᐅᖅᓯᒪᕗᖅ ᒐᕙᒪᒃᑯᑦ ᖃᕋᓴᐅᔭᓕᕆᕝᕕᖓᓂ ᐊᕐᕌᒍᓄᑦ ᑕᓪᓕᒪᓄᑦ ᓅᖦᖢᓂᓗ ᕚᓐᑰᕙᒧᑦ ᑲᒻᐸᓂᐅᔪᖅ ᓂᐅᕐᕈᑕᐅᓚᐅᙱᓐᓂᖓᓂ ᐊᒻᒪ ᑐᕌᓐᑐᒧᑦ ᐅᑎᖅᖢᓂ.

ᑳᓐᑐᓛᒃᑕᐅᓯᒪᓪᓗᓂ ᐱᓕᕆᖃᑦᑕᖅᓯᒪᕗᖅ ᓴᓇᕙᓪᓕᐊᓂᖓᓂ ᐱᓪᓚᕆᙳᐊᖅᑐᒥ ᐱᓕᕆᐊᖑᔪᒥ. ᒫᓐᓇ ᒪᕐᕉᖕᓂᒃ ᐆᒃᑐᕋᐅᑎᓂᒃ ᐱᓯᒪᓕᖅᐳᖅ ᐱᓕᕆᐊᖓᓗ ᓴᖅᑭᑉᐸᓪᓕᐊᓕᖅᖢᓂ. ᖁᕕᐊᒋᔭᖃᒻᒪᕆᒃᖢᓂ 3D-ᒥᒃ ᐃᓂᒥᒃ ᐱᐅᒋᑦᑎᐊᖅᖢᒍᓗ ᐃᓕᑦᑎᔪᒪᓪᓗᓂ, ᓱᓕ ᖃᐅᔨᓇᓱᒃᐳᖅ ᑭᓱᒥᒃ ᐊᔪᙱᑦᑎᐊᕐᒪᖔᕐᒥᓂᒃ ᑭᓯᐊᓂ ᐱᓇᔪᒃᐳᖅ ᖁᕕᐊᒋᔭᒥᓂᒃ ᒫᓐᓇᐅᓂᖓᓂ. "ᐃᓱᒪᔪᖓᓕ ᐃᓕᖅᑯᓯᓕᕆᓂᐅᔪᖅ, ᖃᐅᔨᒪᓪᓗᓂ ᐱᓕᕆᐊᒃᓴᕆᑎᑕᐅᔪᖅ ᓴᙱᓂᖅᑖᖅᑎᑦᑎᓂᕐᒥ ᐊᒻᒪ ᐱᓕᕆᖃᑎᖃᕐᓂᕐᒥ ᐃᓄᖁᑎᑦᑎᓐᓂ, ᐊᖏᓛᖑᒋᕗᖅ ᐊᔭᐅᕆᓂᐅᔪᒥ," ᐅᖃᓚᐅᖅᐳᖅ. ᐃᓕᓴᖅᓯᕗᖅ ᐱᔪᓐᓇᕐᓂᖃᕐᓂᕐᒥᓂᒃ ᐱᕈᖅᓴᓯᒪᓂᕐᒥᓂᒃ ᓄᓇᓕᒡᔪᐊᕐᒥ, ᓯᓚᑦᑐᖅᓴᕐᕕᒡᔪᐊᕐᒧᐊᖅᓯᒪᓪᓗᓂ, ᐊᒻᒪ ᓇᖕᒥᓂᖃᖅᑎᐅᔪᓐᓇᕐᓂᕐᒥᓂᒃ ᒪᑭᑕᑦᑎᐊᕋᓱᙱᖔᕐᓗᓂ.

ᖃᐅᔨᒪᒐᓗᐊᖅᖢᓂ ᓄᓇᖃᖅᑳᖅᓯᒪᔪᑦ ᐃᓄᐃᑦ ᑕᑯᓂᐊᕐᓂᖏᓐᓂᒃ ᐊᑑᑎᖃᕐᓂᖓᓂᒃ ᐱᓕᕆᐊᖓᑕ, ᓂᕆᐅᒃᐳᖅ ᓴᓇᔪᒪᓪᓗᓂ ᐱᔪᒥᓇᑦᑎᐊᖅᑐᒥᒃ ᓄᓇᖃᖅᑳᖅᓯᒪᙱᑦᑐᑦ ᐃᓄᐃᑦ ᐱᔪᒃᓯᑎᑕᐅᓂᐊᕐᒥᖕᒪᑕᑦᑕᐅᖅ. ᐃᓱᒪᒋᓪᓗᒋᑦ ᑐᕌᒐᕆᔪᒪᔭᖏᑦ ᑲᑐᔾᔨᖃᑎᒌᖏᓐᓄᑦ ᐅᖃᖅᑐᖅ, "ᓴᓇᔪᒪᕗᖓ ᐱᐅᔪᒻᒪᕆᐊᓗᖕᒥᒃ ᐱᔾᔪᑎᒃᓴᖃᑦᑎᐊᖅᑐᒥᒡᓗ. ᐊᒻᒪᓗ ᐃᓱᒪᔪᖓ, ᑕᐃᒪᐃᒃᑯᒪ, ᑮᓇᐅᔭᖅ ᒪᓕᑐᐃᓐᓇᕋᔭᖅᑐᖅ, ᐊᒻᒪᓗ ᐊᑐᕈᓐᓇᖅᑕᕗᑦ ᐱᓕᕆᑦᑎᐊᕐᓂᖅᓴᐅᓗᑕ. ᓲᖃᐃᒻᒪ ᐃᓱᒪᒃᑯᓪᓕ, ᐱᕈᖅᑎᑦᑎᔪᓐᓇᕐᓂᖅ ᑲᔪᓯᓂᖃᑦᑎᐊᖅᑐᒥᒃ ᑲᑐᔾᔨᖃᑎᒌᒥᒃ ᑲᒻᐸᓂᒥᒡᓘᓐᓃᑦ ᐱᓕᕆᔾᔪᑎᖃᑐᐃᓐᓇᕐᓂᖅ ᐱᓕᕆᑦᑎᐊᒃᑲᓐᓂᕐᓂᕐᒧᑦ. ᑖᓐᓇ ᑮᓇᐅᔭᖅ, ᓴᓇᕐᕈᑎᐅᕗᖅ. ᐄᑦᑎᐊᖅ, ᐱᔭᐅᔭᕆᐊᖃᖅᐳᖅ, ᑭᓯᐊᓂ ᑕᒪᓐᓇ ᐃᓱᓕᙱᓚᖅ, ᐄᓛᒃ?" ᑮᓇᐅᔭᓕᐅᕋᓱᖕᓂᕐᒧᑦ ᑕᐅᑐᒐᖃᓪᓗᐊᑕᕐᓂᖅ ᓄᓇᕐᔪᐊᕐᒥ ᐱᒋᐊᓕᓵᖅᑐᓄᑦ ᐃᒃᐱᒋᔭᖃᓚᐅᙱᓚᖅ ᑭᖑᓂᑦᑎᓐᓂ.

ᒪᒃᑯᖕᓂᖅᓴᒥ ᐃᒻᒥᓄᑦ ᐅᖃᐅᔾᔨᔪᓐᓇᕈᓂ ᐃᒻᒥᓂᒃ ᐅᖃᐅᔾᔨᓇᔭᖅᐳᖅ ᑲᑉᐱᐊᓱᖁᔨᙱᖦᖢᓂ ᐆᒃᑐᒃᑲᓐᓂᕆᐊᒃᓴᖅ. "ᒪᓕᒃᐸᒡᓗᒋᑦ ᖁᕕᐊᒋᔭᑎᑦ, ᐱᙳᐊᕈᓘᔭᖅᐸᒡᓗᑎᑦ, ᐃᓅᓯᕆᔭᐃᑦ ᒪᓕᙱᓪᓗᒍ ᐊᓯᕕᑦ ᐅᖃᐅᔾᔪᖅᑕᐅᓂᖓᓂᒃ. ᓄᓇᕐᔪᐊᖅ ᐊᖏᔪᐊᓘᓱᒋᕙᕋ. ᐱᕕᒃᓴᐃᑦ ᐊᖏᔪᐊᓘᕗᑦ. ᐊᒻᒪᓗᑦᑕᐅᖅ, ᐃᓱᒪᕗᖓ ᐃᓚᖏᑦ ᐱᔪᒥᓇᕐᓂᖅᐹᖑᔪᑦ ᐃᓄᐃᑦ ᐊᒻᒪ ᑲᒻᐸᓂᐅᔪᑦ ᐊᒻᒪ ᐊᑐᕐᓂᑯᖏᑦ ᐊᒻᒪ ᐱᓕᕆᐊᖑᔪᑦ ᐃᓛᓐᓂᒃᑯᑦ ᑐᓴᖅᐸᒃᑕᕗᑦ ᐊᒻᒪ ᐅᖃᓕᒫᖅᐸᒃᑕᕗᑦ ᐃᓄᖕᓃᙶᖅᐳᑦ ᓱᕋᐃᔪᒪᔪᓂᒃ ᐊᒻᒪ ᐅᖃᕐᓗᑎᒃ, 'ᐄ, ᖃᐅᔨᒪᕖᑦ? ᐃᓱᒪᔪᖓᓕ ᐊᔾᔨᒋᙱᑕᖓᓂᒃ ᐊᐅᓚᓂᖃᕈᓐᓇᕋᑦᑕ ᑕᒫᓂ.' ᐊᑏ ᑕᐃᒪᐃᓕᐅᑐᐃᓐᓇᕆᑦ," ᐅᖃᕆᓪᓗᓂ.

ᒫᓐᓇᓵᖑᓚᐅᖅᑐᖅ, ᐅᖃᐅᔾᔪᖅᑕᐅᓚᐅᖅᐳᖅ ᐃᓚᒥᓄᑦ ᑭᓱᒥᒃ ᐱᓕᕆᐊᖃᕆᐊᖃᕐᒪᖔᕐᒥ ᐊᒻᒪ ᖁᐊᖅᓵᓚᐅᖅᐳᖅ ᖃᓄᖅ ᑕᑯᔭᕆᐊᖃᕐᓂᕐᒥᓂᒃ ᐱᐅᔪᓂᒃ ᐃᒻᒥᓂᒃ ᐊᒻᒪᓗ ᓇᐅᒃᑯᑦ ᓱᓕ ᐱᐅᓯᕚᓪᓕᕆᐊᖃᕐᒪᖔᑕ. "ᐃᓄᑦᑎᐊᕙᐅᙱᑦᑐᒍᑦ. ᐱᔪᓐᓇᕐᓂᓕᒫᑦᑎᓐᓂ ᐱᓕᕆᓲᖑᕗᒍᑦ ᐱᔪᓐᓇᕐᓂᓕᒫᑦᑎᓐᓂ, ᐊᒻᒪ ᐱᐅᓯᕚᓪᓕᕋᓱᒃᐸᒃᖢᑕ ᖃᐅᑕᒫᑦ," ᐅᖃᓚᐅᖅᐳᖅ.

ᐃᓱᓕᑉᐸᓪᓕᐊᓕᕐᓗᓂ, ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᐃᒪᓐᓇᐅᕗᖅ, "ᐱᐅᔫᕗᖅ ᐃᒃᐱᒋᔭᖃᑐᐃᓐᓇᕐᓗᓂ ᖃᓄᑐᐃᓐᓇᑦᑎᐊᖅ ᐃᒃᐱᒋᔭᕐᓂᒃ, ᐊᒻᒪ ᑲᔪᓰᓐᓇᕐᓗᓂ.... ᐃᓱᒪᑦᑎᐊᕆᙱᓐᓂᒃᑯᑦ ᐊᒃᓱᕈᕐᓇᕐᓂᒃᑯᓪᓗ ᐅᐃᒪᔮᕐᓇᖅᑐᒃᑯᓪᓗ, ᓲᖃᐃᒻᒪ ᐊᑑᑎᖃᕐᓂᐊᕐᒪᑦ, ᐊᑑᑎᖃᕐᓂᐊᖅᖢᓂᓗ, ᐊᒻᒪ ᑐᙵᓇᖅᑐᐃᓐᓇᐅᕗᓯ, ᐃᓄᑦᑎᐊᕙᐅᓪᓗᓯᓗ, ᑕᐃᒪᐃᒍᓐᓇᖅᐳᓯᓗ. ᐊᓂᒍᐃᔪᓐᓇᖅᐳᑎᑦ, ᓲᖃᐃᒻᒪ ᓯᕗᓂᒃᓴᖃᑦᑎᐊᕐᓂᖅᓴᐅᒐᑦᑕ ᑕᐃᑲᓂ. ᐊᒻᒪ ᐊᔪᕐᓇᙱᖦᖢᓂ ᐅᖃᕆᐊᒃᓴᖅ, ᐊᔪᕐᓇᕐᓂᖅᓴᐅᕗᖅ, ᑭᓯᐊᓂ ᒪᒃᑯᒃᑐᓂᒃ ᐱᒃᑲᓐᓂᕆᐊᖃᖅᐳᒍᑦ ᓯᕗᓕᖅᑎᙳᕈᓐᓇᖅᑐᓂᒃ... ᑕᐃᑯᙵᕈᓐᓇᑐᐃᓐᓇᕆᐊᖃᖅᑐᒍᑦ. ᑕᐃᒪᐃᓐᓂᐊᖅᐳᒍᑦ. ᐊᑕᐅᑦᑎᒃᑯᑦ ᐱᓕᕆᐊᕆᓂᐊᖅᑕᕗᑦ." ᐅᖃᓚᐅᖅᐳᖅ ᐊᒃᓱᕈᕐᓇᕐᓂᐅᔪᓂ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᓵᙵᔭᐅᔪᓂ ᐊᒻᒪ ᖃᓄᑎᒋ ᓱᓕ ᐱᓕᕆᔭᕆᐊᖃᕐᓂᖏᓐᓂ ᑭᓯᐊᓂ ᐅᑎᓚᐅᖅᐳᖅ ᓂᕆᐅᖕᓂᖃᑦᑎᐊᕐᓂᐅᔪᒥ.

ᐅᓂᒃᑳᖅᑐᐊᖅᖢᓂ ᐱᓪᓚᕆᙳᐊᖅᑐᒃᑯᑦ ᐊᒻᒪ ᑐᓴᐅᒪᖃᑎᒌᒍᑎᓂᒃ ᓴᖅᑭᑎᑦᑎᓪᓗᓂ, ᓵᒃ ᒑᐳᑦ ᓅᓯᒪᓕᖅᐳᖅ ᖃᕋᓴᐅᔭᓕᕆᔾᔪᑎᓂᒃ ᐱᔨᑦᑎᕋᕐᕕᐅᓪᓗᓂ ᐊᒻᒪ ᓄᑖᕐᒥᒃ ᓴᖅᑭᑦᑎᕙᓪᓕᐊᓕᖅᖢᓂ. ᓂᕆᐅᖕᓂᖃᖅᖢᓂ ᓴᖅᑭᑎᑦᑎᔪᒪᓪᓗᓂ ᓄᑖᓂᒃ ᐱᕕᒃᓴᓂᒃ ᓄᓇᖃᖅᑳᖅᑐᓄᑦ ᐃᓄᖕᓄᑦ ᓄᓇᖃᖅᑳᕐᓯᒪᔪᓄᑦ ᖃᕆᑕᐅᔭᓕᕆᕙᖕᓂᕐᒧᑦ ᑲᒻᐸᓂᒋᔭᐅᔪᑎᒍᑦ, ᐋᖅᑭᒃᓱᐃᕙᓪᓕᐊᕗᖅ ᑕᐅᑐᙳᐊᖅᑕᒥᓂᒃ ᓴᓂᕌᒍᑦ ᑳᓐᑐᓛᖃᖅᑎᑦᑎᓂᕐᒥᓂ. ᐱᔪᒃᓯᑎᑕᐅᓪᓗᓂ ᓄᓇᒥᒃ−ᑐᙵᕕᓕᖕᒥᒃ ᖃᕆᑕᐅᔭᒃᑯᑦ ᐃᓕᓴᐃᓂᕐᒥᒃ ᐃᓂᒥᒡᓗ ᑐᙵᕕᓕᖕᒥᒃ ᐃᓕᑦᑎᕙᓪᓕᐊᓂᕐᒥᒃ, ᐊᖏᔪᒻᒪᕆᖕᒥᒃ ᑕᐅᑐᙳᐊᖅᐸᒃᐳᖅ ᑭᓱᙳᕋᔭᕐᒪᖔᑦ ᐱᔪᒪᓂᖃᑦᑎᐊᖅᖢᓂᓗ ᑕᒪᓐᓇ ᑲᔪᓯᑎᑦᑐᒪᓪᓗᒍ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.