"ᒫᓐᓇᐅᔪᖅ, ᓄᖅᑲᑎᑦᓯᓚᖓᖏᑦᑐᖅ ᐅᕙᓐᓂᑦ ᐱᔭᕇᕐᓂᕐᒧᑦ. 100%-ᖑᕗᖓ, ᐊᒻᒪᓗ ᐱᑕᖃᖅᐸᑦ, ᑕᒪᒃᑯᐊᓕᒫᑦ ᐅᑎᕆᐊᕈᑏᑦ, ᑕᒪᒃᑯᐊᓕᒫᑦ ᐊᔅᓱᕉᑕᐅᔪᑦ, ᐊᒻᒪᓗ ᑕᒪᒃᑯᐊ ᕿᐊᓇᖅᑐᑦ, ᐆᒻᒪᓯᕆᓃᑦ, ᑭᓱᓕᒫᑦ, ᑕᒪᓐᓇ ᓴᙱᑎᒃᑲᓐᓂᓚᐅᖅᐸᕋ. ᑕᐃᒪᓐᓇ ᑕᕝᕙ ᐱᔪᒃᓯᑎᑦᑎᔾᔪᑎᒋᕙᕋ ᐱᔭᕇᑐᐃᓐᓇᕐᓗᖓ, ᖃᐅᔨᒪᓗᖓ ᑕᒪᓐᓇ ᐊᑐᕈᒃᑯ, ᑭᓱᑐᐃᓐᓇᒃᑰᕈᓐᓇᖅᐳᖓ," ᐅᖃᖅᑐᖅ ᓴᐃᓚ ᓯᓅᓯ, ᕗᐊᑦ ᒪᒃᕘᓴᓐᒥᐅᑕᖅ ᓄᓇᑦᑎᐊᒥᐅᖅ. ᐊᓈᓇᒋᔭᐅᔪᖅ ᒪᕐᕉᖕᓄᑦ ᐸᓃᖕᓄᑦ ᐊᒻᒪ ᐊᔾᔨᓕᐅᕆᔨᓄᑦ ᓇᖕᒥᓂᖃᖅᑎᐅᔪᖅ, ᐊᐳᑎᒥᒃ ᐃᓚᐅᓲᖑᕗᖅ ᐋᓪᐴᑕᒥ ᓯᓚᑦᑐᖅᓴᕐᕕᒡᔪᐊᕐᒧᑦ. ᓇᒻᒥᓂᖁᑎᖓ ᑕᐃᔭᐅᕗᖅ ᐊᐳᑕᐃᔭᐃᕕᒃ ᐊᒻᒪ ᒪᑐᐃᖅᓯᕙᓪᓕᐊᓪᓗᓂ ᐱᒋᐊᓚᐅᖅᓯᒪᔪᖅ ᒪᒃᑯᑦᑑᑎᓪᓗᒍ.  

16−ᓂᒃ ᐅᑭᐅᖃᖅᑎᓪᓗᒍ, ᐊᐳᑕᐃᔭᐃᓂᖅ ᓅᓚᐅᖅᓯᒪᕗᖅ ᕚᓐᑰᕗᒧᑦ, ᐳᕆᑎᔅ ᑲᓚᒻᐱᐊᒧᑦ ᐊᓈᓇᖓᓗ ᐃᓚᐅᓚᐅᖅᓯᒪᓪᓗᓂ UBC−ᑯᓐᓄᑦ. ᐊᔾᔨᓕᐅᕆᓚᐅᖅᑐᖅ ᐃᓕᓐᓂᐊᕐᕕᐊᓗᒻᒥ ᑕᐃᑲᓂ, ᐊᑦᔨᓕᐅᕆᔨᖏᑦ ᐃᓗᐊᓂ ᖃᒥᑦᑐᓂᐅᒃ ᓲᕐᓗ ᖃᐅᒻᒪᓪᓚᑲᓪᓚᑦᑐᑎᑐᑦ. ᐃᓕᓐᓂᐊᕌᓂᓚᐅᖅᑎᓪᓗᒍ, ᖃᕆᑕᐅᔭᒃᑯᑦ ᐊᔾᔨᓕᐅᕆᓂᕐᒧᑦ ᐃᓕᑕᕆᔭᐅᔾᔪᑎᑖᓚᐅᖅᑐᖅ ᓴᓇᙳᐊᕐᓂᕐᒧᑦ ᐱᓕᕆᔾᔪᑎᓄᓪᓗ ᑭᓘᓇᒥ ᐊᒻᒪ ᓇᖕᒥᓂᕐᒥᓂᒃ ᒪᒃᐱᖅᓯᓪᓗᓂ 20−ᓂᒃ ᐅᑭᐅᖃᓕᖅᑎᓪᓗᒍ. 

ᕗᐊᑦ ᒪᒃᕘᓴᓐᒦᑎᓪᓗᒍ, ᐱᓕᕆᓯᒪᔪᖅ ᓇᒥᓕᒫᖅ ᔫᑳᓐᒥ, ᓄᓇᑦᓯᐊᕐᒥ ᐊᒻᒪ ᐊᓪᐳᑕᒥ, ᐊᔾᔨᓕᐅᕆᓪᓗᓂ ᑲᑎᑎᑕᐅᔪᓂᒃ, ᐃᓕᖅᑯᓯᑐᖃᕐᓂᒃ ᓱᕈᓘᔭᖅᑐᓂᒃ ᐊᒻᒪ ᐃᓕᖅᑯᓯᑐᖃᕐᓂᒃ ᓄᓇᓕᕋᓛᓂᒃ.  ᐅᓪᓗᓄᑦ ᖁᓕᓄᑦ ᓄᓇᒦᓚᐅᖅᑐᖅ ᐃᓕᓐᓂᐊᖅᖢᓂ ᖃᓄᖅ ᖁᖓᓯᕈᖅᓯᔭᕆᐊᒃᓴᖅ ᐊᒥᕐᓂᒃ ᐊᔾᔨᓕᐅᕆᑎᓪᓗᒍ.  "ᐱᐅᒋᔭᒻᒪᕆᒋᔭᕋ ᖃᓄᖅ ᐱᕚᓪᓕᖅᓯᒪᓂᓐᓂ ᐊᔾᔨᓕᐅᕆᖃᑦᑕᖅᑐᖓ ᐃᓕᖅᑯᓯᑦᑎᓐᓂᒃ ᐊᒻᒪᓗ ᐊᓯᐅᔨᑦᑕᐃᓕᓂᕐᒥᒃ ᑕᒪᒃᑯᓂᖓ ᐃᖅᑲᐅᒪᔭᑦᑎᓐᓂᒃ, ᐱᓗᐊᖅᑐᒥᒃ ᐃᓐᓇᑐᖃᕐᓂᒃ, ᐊᒻᒪᓗ ᒪᒃᑯᒃᑐᓂᒃ ᑕᐃᒪᐃᑦᑐᓂᒃ ᖃᓄᐃᓕᐅᕐᓂᐅᔪᓂᒃ," ᖁᖓᖃᑦᑕᖅᑐᖅ. 

ᐃᓕᓐᓂᐊᖅᑎᐊᖅᓯᒪᑦᑎᐊᕐᓂᖓᓄᑦ, ᑕᓪᓕᒪᒋᓕᖅᑕᖓᓂᒃ ᐊᕐᕌᒍᒦᓕᖅᑐᖅ ᑲᑐᔾᔭᐅᓪᓗᓂ ᐃᓕᓐᓂᐊᖅᑐᓂ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᓄᓇᖃᖅᑳᖅᓯᒪᔪᓂ ᐃᓕᓐᓂᐊᖅᑐᓂ ᐊᒻᒪᓗ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐃᓕᓐᓂᐊᕐᓂᓕᕆᓂᕐᒧᑦ. ᓄᓇᒥᓄᑦ ᐅᑎᕈᒪᔪᖅ ᐃᓕᓴᐃᔨᐅᓗᓂ, ᑕᒪᓐᓇ ᖃᐅᔨᒪᓂᐅᔪᖅ ᐊᒻᒪ ᐱᓕᕆᖃᑦᑕᖅᓯᒪᓂᑯᖏᑦ ᐅᑎᖅᑎᓪᓗᒋᑦ ᒪᒃᑯᒃᑐᓄᑦ, ᓄᓇᒥᓄᑦ ᐅᑎᖅᑎᓪᓗᒋᑦ, ᐊᓯᒥᓂᒡᓗ ᐱᔪᒃᓯᑎᑦᑎᔪᒪᓪᓗᓂ. ᐊᐳᑕᐃᔭᐃᓂᖅ ᐱᐅᔪᒥᒃ ᐊᔾᔪᒥᒋᔭᐅᔪᒪᖕᒪᑦ ᐊᒻᒪᓗ ᑕᑯᒃᓴᐅᑎᑦᑎᓗᓂ ᑭᓱᑦ ᐊᔪᕐᓇᙱᒻᒪᖔᑕ ᒥᑭᑦᑐᓄᑦ ᓄᑕᖅᑲᓄᑦ ᓯᓚᑦᑐᖅᓴᕐᕕᒡᔪᐊᓕᐊᕈᒪᔪᓄᑦ ᐊᒻᒪᓗ ᐱᐊᓂᒃᓯᓗᑎᒃ ᐊᖏᔪᓂᒃ. 

ᐅᖃᐅᔾᔪᐃᓂᖓ ᐃᓕᓐᓂᐊᖅᑎᓄᑦ ᐃᓱᒪᔪᓄᑦ ᕿᒪᐃᔪᒪᓂᕐᒥᒃ ᓄᓇᒥᓂᒃ ᐱᔪᒃᓯᑎᑦᑎᕗᖅ. "ᑕᐃᒪᓕ ᑕᐃᒪᐃᓕᐅᕐᓗᑎᑦ. ᒥᓕᐊᖏᓐᓃᑦᑐᓂᒃ ᐱᔾᔪᑎᖃᖅᐳᒍᑦ ᓱᒻᒪᑦ ᑕᐃᒪᐃᒋᐊᖃᙱᒻᒪᖔᑦᑕ ᐊᒻᒪ ᑕᐃᒪᐃᒃᑲᔭᙱᓚᒍᑦ. ᑲᑉᐱᐊᓱᒃᑲᑦᑕ, ᐃᓄᑑᓪᓗᑕ, ᑲᑉᐱᐊᓱᒃᑲᑦᑕ ᐃᓚᕗᑦ ᕿᒪᒋᐊᒃᓴᖅ, ᐃᓕᖅᑯᓯᕗᑦ, ᐊᑲᐅᒋᔭᖓ ᓄᓇᑦᑎᓐᓂ ᐱᕈᕐᕕᒋᓚᐅᖅᑕᑦᑎᓐᓂ, ᑭᓯᐊᓂ ᓱᓕᓪᓗᓂ, ᑎᑕᒃᑎᑐᐃᓐᓇᓕᕋᕕᐅᒃ ᐊᒻᒪ ᑕᐃᒪᐃᓕᐅᑐᐃᓐᓇᖅᖢᓂ," ᑎᓕᐅᕆᕗᖅ. 

ᐊᑑᑎᖃᕋᓱᒋᓪᓗᓂᐅᒃ, ᑭᓯᐊᓂ ᐊᔪᕐᓇᙱᑦᑐᑯᓘᔾᔮᕋᓱᒋᙱᖦᖢᓂᐅᒃ, ᐊᒥᖅᑳᖃᑎᖃᕐᓗᓂ, "ᐃᓛᓐᓂᒃᑯᑦ ᐊᒃᓱᕈᕐᓇᕐᒪᑦ, ᐊᔪᕐᓇᖅᑐᒻᒪᕆᐊᓗᒃ. ᖃᐅᑕᒫᑦ ᐊᒃᓱᕈᕐᓇᖃᑦᑕᖅᑐᖅ ᓄᓇᑦᑎᓐᓂᑦ ᐊᐅᓪᓚᖅᓯᒪᓇᓱᒃᖢᓂ, ᐃᓚᒃᑲ, ᐃᓄᑑᔭᕆᐊᖃᓪᓚᕆᒃᖢᑎᒃ ᓄᓇᓕᐸᐅᔭᒥᑦ ᒪᕐᕉᖕᓂᒃ ᐸᓂᖃᖅᖢᖓ ᐊᕐᕌᒍᓄᑦ ᑕᓪᓕᒪᓄᑦ." ᓯᑭᑑᑉ ᐊᓂᖓ ᓄᓇᓕᖕᒧᐊᖅᑐᖅ ᐊᓯᔾᔩᓯᒪᔪᖅ ᑭᓯᐊᓂ ᖃᐅᑕᒫᑦ ᐱᔪᒪᓕᖅᑎᑦᑎᔭᕆᐊᖃᓲᖅ ᐊᓂᒍᐃᓇᓱᒃᓗᓂ ᐅᑎᕆᐊᕈᑎᓂᒃ ᐱᔭᕇᕐᓗᓂᓗ ᐱᔭᕇᕈᓯᐊᖓᓂᒃ. ᐅᒃᐱᕈᓱᒃᑐᖅ ᐱᔪᓐᓇᕐᓂᕐᒥᓂᒃ ᐱᓪᓗᒍ ᓇᑭᙶᕐᓂᖓ. 

"ᑕᒪᓐᓇ ᐱᓕᕆᐊᕆᓂᐊᕐᓗᒍ, ᐃᓱᒪᑦᑎᐊᕆᐊᓕᒻᒪᕆᐊᓘᔭᕆᐊᖃᖅᑐᑎᑦ. ᓯᕗᓕᕕᓂᕗᑦ ᐃᓅᕙᓚᐅᕐᒪᑕ ᓄᓇᑐᐃᓐᓇᕐᒥ, ᓂᓪᓚᓱᑦᑐᒻᒪᕆᐅᓪᓗᓂ 6-ᓂᒃ ᓯᓚᖓ, ᐃᒃᑮᓇᕐᓂᖅᐹᖑᓪᓗᓂ. ᐃᓅᔪᓐᓇᓚᐅᕐᒪᑕ ᐅᖃᓕᒫᒐᕐᓂᑦ ᐊᒻᒪ ᓴᓐᖏᔪᓂᑦ ᐃᓄᓐᓂᑦ, ᐃᓘᓐᓇᑕ. ᓄᓇᖃᖅᑳᖅᓯᒪᔪᓕᒫᑦ, ᐱᔪᓐᓇᕐᓂᖃᖅᐳᒍᑦ, ᐱᓕᕆᐊᕆᔪᓐᓇᖅᖢᑎᒍᓪᓗ. ᐃᓱᒪᒋᒍᕕᐅᒃ, ᐱᓕᕆᐊᕆᑐᐃᓐᓇᕐᓗᒍ. ᐊᔪᙱᑦᑐᑎᑦ. ᐱᔪᓐᓇᕐᓂᖃᖅᑐᑎᑦ ᐃᕝᕕᑦ ᐃᓗᐊᓂ," ᐱᔭᕇᖅᑐᖅ. 

ᐊᐳᑎᒃᑯᑦ ᖃᐅᔨᒪᔪᖅ ᐊᔪᕐᓇᕐᓂᖓᓂᒃ, ᐊᐅᖓ, ᐊᐅᒪᔮᖅᖢᓂ ᐊᒻᒪ ᕿᐊᓪᓗᓂ ᓇᓗᓇᐃᒃᑯᑕᖅᑖᖓᓄᑦ, ᐅᖃᐅᓯᕆᖕᒪᒍ, ᐃᓕᓐᓂᐊᖅᖢᓂ ᓯᖓᐃᓂᖓᓂᒃ ᐊᒻᒪ ᐃᕕᐊᖏᕐᒥ ᐊᒫᒪᒃᑎᑦᑎᓂᕐᒥᒃ ᐊᐃᑉᐸᖃᙱᖦᖢᓂ ᐊᓈᓇᐅᓪᓗᓂ ᖃᓂᒪᓐᓇᐅᑎᓪᓗᒍ, ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᖅᖢᓂ ᓯᖓᐃᑎᓪᓗᒍ, ᐊᒻᒪ ᐃᕐᓂᑎᓪᓗᒍ ᖁᕕᐊᓱᒡᕕᐅᑉ ᐅᓪᓗᖓᓂ. ᐃᓕᓐᓂᐊᕈᓐᓃᕋᓱᓚᐅᖅᑐᖅ ᑭᓯᐊᓂ ᓯᕗᒻᒧᑦ ᓇᕿᖦᖢᓂ.

ᑭᖑᒧᑦ ᑕᐅᑐᒃᖢᓂ ᒪᒃᑯᖕᓂᖅᓴᖅ, ᑕᑯᓪᓗᓂ ᖃᓄᖅ ᖁᓱᔪᓐᓃᖅᐸᓚᐅᕐᒪᖔᑦ. "ᖃᐅᔨᒪᓚᐅᙱᑦᑐᖓ ᓴᙱᓂᖃᕐᓂᓐᓂᒃ ᐃᓗᐊᓂ ᐊᔪᙱᓐᓂᕐᒪᓗ, ᖃᐅᔨᒪᖁᓇᔭᖅᑕᕋᓗ ᒪᒃᑯᒃᑎᓪᓗᖓ, ᓲᖃᐃᒻᒪ ᖃᐅᔨᒪᓇᔭᓚᐅᕋᒪ ᐊᑑᑎᖃᕐᓂᓐᓂᒃ, ᐊᑐᖅᑕᐃᓕᒪᓇᔭᓚᐅᖅᑐᖓᓗ ᐅᓄᖅᑐᓂᒃ ᐊᑐᖅᑐᓂᑦ ᐋᓐᓂᕐᕕᒋᔭᓐᓂᒃ. ᑭᓯᐊᓂ ᐊᑕᐅᑦᑎᒃᑯᑦ, ᑖᒃᑯᐊ ᑕᐃᒪᐃᓚᐅᙱᑉᐸᑕ, ᒫᓐᓇ ᑭᓇᐅᓇᔭᙱᑦᑐᖓ," ᓴᖅᑭᔮᖅᑎᑦᑎᔪᖅ. 

ᓇᓕᒧᒌᒃᑎᓐᓇᓱᒃᓗᒍ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᖓᓗ, ᓯᑭᑑᑦ ᑕᐅᑐᓪᓗᐊᑕᖅᑐᖅ ᓇᖕᒥᓂᖅ ᑲᒪᒋᑦᑎᐊᕐᓂᕐᒥᒃ ᓇᖕᒥᓂᕐᓗ ᓇᒡᓕᒍᓱᖕᓂᕐᒥᒃ, ᐱᓗᐊᖅᑐᒥᒃ ᐊᒃᓱᕈᕐᓇᖅᑐᒃᑰᖅᑎᓪᓗᒍ, ᓯᓂᑦᑎᐊᙱᖦᖢᓂ ᐅᑎᕆᐊᖃᕐᖢᓂᓗ ᖃᓄᐃᓕᐅᕐᓗᓂᓗ ᓇᖕᒥᓂᖅ ᐊᑲᐅᓯᕚᓪᓕᖁᓪᓗᒍ. ᓲᕐᓗ ᓴᓗᒻᒪᖅᓴᐃᓗᓂ ᐃᓂᒋᔭᒥᓂᒃ ᐃᖕᒥᓂᒃᓘᓐᓃᑦ, ᐆᒻᒪᕆᒃᓯᑎᓪᓗᒍ, ᖃᐅᔨᒪᓪᓗᓂᓗ ᐃᒥᖅᓯᒪᐃᓐᓇᕆᐊᖃᕐᓂᕐᒥᓂᒃ ᖃᐅᑕᒫᖅᓯᐅᑎᓂᒡᓗ ᐱᓗᓂ. ᐱᓱᒍᒪᑦᑎᐊᓲᖅ ᖃᐅᔨᒪᓪᓗᓂᓗ ᒥᑭᑦᑐᓂᒡᓘᓐᓃᑦ ᐃᑲᔪᕈᓐᓇᕐᓂᖓᓂᒃ ᐅᑎᖅᑎᑦᑎᓗᓂ ᓇᓕᒧᒌᒃᑎᓐᓇᓱᒃᑕᖓᓂᒃ ᑐᕌᕆᔭᖏᓐᓄᑦ ᑎᑭᐅᑎᓇᓱᒃᓗᓂ. 

ᑲᔪᖏᖅᓴᐃᔭᕆᐊᖃᖅᑎᓪᓗᒍ, ᐃᓚᒥᓂᒃ ᐊᓈᓇᒥᓂᒡᓗ ᑕᐅᑐᓕᓲᖅ ᐃᓕᓐᓂᐊᕐᕕᖕᒥ ᐊᖓᔪᖅᑳᖑᓪᓗᓂ ᐊᖏᕐᕋᖓᓂ. ᐊᓈᓇᖓ ᐃᓅᓯᓕᒫᖓᓂ ᐃᓕᓴᐃᔨᙳᕋᓱᓚᐅᖅᑐᖅ ᐊᒻᒪᓗ ᓯᕗᓪᓕᖅᐹᖑᓪᓗᓂ ᖃᑕᙳᑎᖏᓐᓂ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕌᓂᒍᓯᐊᖅᑖᖅᖢᓂ. ᐊᓪᓛᑦ ᐃᓕᑕᕆᔭᐅᔾᔪᑎᑖᓚᐅᖅᑐᖅ ᐊᒻᒪᓗ ᐊᐳᑎᒥᒃ ᐃᖅᑲᐅᒪᔪᖅ ᑕᑯᓐᓇᖅᑐᓂ ᐊᓈᓇᒥᓂᒃ ᓂᑲᒍᓱᑦᑐᓂ ᐊᒻᒪᓗ ᓅᑦᑐᓂᒋᑦ ᑎᓴᒪᑦ ᕿᑐᕐᖓᖏᑦ ᕚᓐᑰᕗᒧᑦ, ᐊᖓᔪᖅᑳᖏᑕ ᑲᒪᒋᔭᕆᐊᓕᖏᓐᓂᒃ ᐊᒻᒪᓗ ᐃᓕᓐᓂᐊᖅᓯᒪᓂᖏᓐᓂᒃ ᐃᖅᑲᓇᐃᔮᖅᑖᕈᒪᓪᓗᑎᒃ ᐱᔪᒪᔭᒥᓂᒃ. 

ᐊᓈᓇᐅᓪᓗᓂ ᒫᓐᓇ, ᐸᓂᒥᓄᑦ ᐱᔪᒃᓯᑎᑕᐅᕗᖅ ᖃᐅᔨᒪᔭᒥᓄᑦ ᑕᐅᑐᖕᓂᖓᓂᒃ ᖃᐅᔨᒪᓪᓗᓂᓗ ᐆᒃᑑᑎᑦᑎᐊᕙᐅᔭᕆᐊᖃᕐᓂᖓᓂᒃ. ᓯᑭᑑᑦ ᑕᑯᖃᑦᑕᖅᑐᑦ ᐊᔾᔨᑦᑎᐊᖓᓂᒃ ᓴᙱᓂᖏᓐᓂᒃ ᐱᓯᒪᔭᖏᓐᓂᒃ, ᐅᒃᐱᕈᓱᒃᖢᑎᒃᓗ ᖃᓄᐃᓕᐅᕈᓐᓇᕐᓂᕐᒥᓂᒃ ᐃᓱᒪᒥᓂᒃ ᐋᖅᑭᒃᑕᒥᓂᒃ. 

ᐱᕈᖅᐸᓪᓕᐊᑎᓪᓗᒍ, ᐃᓕᑦᑎᓪᓗᓂ ᐅᖃᐅᓯᓕᕆᓂᕐᒥ ᐃᓕᓴᐃᔨᒥᒃ ᐊᖏᕐᕋᖓᓂ ᓄᓇᓕᖕᒥ, ᑭᓇᑭᐊᖅ ᐱᔪᒪᓕᖅᑎᑦᑎᖕᒥᔪᖅ. ᐊᓈᓇᒋᔭᐅᓚᐅᖅᑐᖅ 8-ᓄᑦ ᐃᓕᓐᓂᐊᕆᐊᒃᑲᓐᓂᓚᐅᖅᑐᖅ ᓇᓗᓇᐃᒃᑯᑕᖅᑖᖅᑐᓂ ᐅᖃᐅᓯᓕᕆᓂᕐᒧᑦ ᐃᓕᓴᐃᔨᐅᓪᓗᓂ ᐊᒻᒪᓗ ᑕᒪᓐᓇ ᖃᓐᓂᕈᑎᐅᔪᖅ ᐊᒃᓱᐊᓗᒃ ᐱᐅᓪᓗᓂ. 

"ᐅᓄᖅᑐᒻᒪᕆᐊᓗᖕᓂᒃ ᐊᕐᓇᖃᖅᑐᖓ ᓵᓐᓂ ᐊᒥᓱᓪᓗ ᓴᙱᔪᑦ ᒥᑭᑦᑐᑦ ᑐᓄᓐᓃᑦᑐᑦ, ᑕᑯᑎᑦᑕᕆᐊᖃᖅᑕᒃᑲᑦᑕᐅᖅ."

ᓂᕆᐅᒋᔭᖃᖅᐳᖅ ᐊᒥᖅᑳᖃᑎᖃᕐᓂᕐᒥᒃ ᐅᓂᒃᑲᐅᓯᕐᒥᓂᒃ ᐱᔪᒃᓯᑎᑦᑎᔪᓐᓇᕐᓂᐊᕐᓂᖓᓂᒃ ᒪᒃᑯᒃᑐᓂᒃ. ᐅᒃᐱᕈᓱᑦᑎᐊᖅᑐᖅ ᓄᖅᑲᔾᔮᖏᓐᓂᖓᓂᒃ ᐱᔭᕇᕐᓂᕐᒧᑦ ᐱᔭᕇᕈᓯᐊᖓᓂᒃ, ᓲᖃᐃᒻᒪ 100%-ᒥᒃ ᖃᐅᔨᔭᐅᖕᒪᑦ. ᑭᖑᑉᐱᐊᕈᑏᑦ, ᐊᒃᓱᕈᕈᑕᐅᖃᑦᑕᖅᑐᑦ, ᕿᐊᖃᑦᑕᖅᑐᑦ, ᐆᒻᒪᓯᕆᔾᔪᑏᑦ, ᐊᒻᒪ ᑭᓱᓕᒫᑦ ᓴᙲᓪᓕᑎᑦᑎᓯᒪᔪᑦ, ᐱᔪᒪᓕᕈᑎᒋᓪᓗᓂᒋᑦ ᐱᔭᕇᕐᓂᕐᒧᑦ ᓴᓐᖏᓂᕐᒥᑦ, ᖃᐅᔨᒪᓪᓗᓂ ᑕᒪᓐᓇ ᑲᔪᓯᑉᐸᑦ, ᑭᓱᑐᐃᓐᓇᕐᒥᑦ ᐊᓂᒍᐃᔪᓐᓇᖅᑐᖅ. ᓂᕆᐅᒃᑐᖅ ᐊᓯᒥᓂᒃ ᑕᑯᓂᐊᕐᓂᖏᓐᓂᒃ ᐊᔪᙱᑕᖏᓐᓂᒃ. 

ᑐᓄᐊᓂᑦ ᑕᐅᑐᖕᓂᐅᑉ ᓯᕗᓂᐊᓄᑦ ᐃᓕᓐᓂᐊᕐᑏᑦ, ᐊᔾᔨᓕᐅᕆᔨ ᓴᐃᓚ ᓯᑭᑑᖅ ᐃᓕᓴᐃᔨᙳᖅᐸᓪᓕᐊᔪᖅ. ᐱᔪᒃᓯᑎᑦᑎᕗᖅ ᐃᖏᕐᕋᑲᑕᐃᓐᓇᕆᐊᒃᓴᖅ ᐅᖓᓯᒋᒐᓗᐊᖅᖢᓂᐅᒃ ᐊᔾᔨᙳᐊᒥᑦ−ᐊᔾᔨᙳᐊᒥᑦ, ᖃᐅᔨᒪᓪᓗᓂ ᓴᓇᐅᒐᑦᑎᐊᕙᐅᓂᐊᕐᓂᖓᓂᒃ ᐃᓱᐊᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.