"ᐊᖓᔪᒋᔭᐅᓪᓗᑎᑦ ᐱᖓᓱᓂᑦ ᓇᔭᖏᓐᓂᑦ ᖃᑕᙳᑎᖏᓐᓂᑦ, ᐃᓕᓴᐃᔨᐅᕙᒌᓕᖅᐳᑎᑦ," ᓲᓂᐊ ᒥᓅᓴ ᓇᓗᓇᐃᔭᐃᕗᖅ. ᐊᓪᓚᐃᑦ ᕗᐊᑦ ᕗᐊᑦᔅᒥᑦ, ᐊᓈᓇᒋᔭᐅᔪᖅ ᒪᕐᕉᓐᓂᒃ ᕿᑐᕐᖓᓕᒃ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐃᓕᓐᓂᐊᕐᓂᓕᕆᓂᕐᒧᑦ. ᐅᖃᕋᔪᒃᖢᓂ ᐱᕈᖅᓴᔭᐅᓚᐅᕐᓂᕋᖅᖢᓂ ᐊᖓᔪᒃᖠᖅᐹᖑᓂᕋᖅᖢᓂ ᐃᓚᒥᓄᑦ. "ᓇᓗᔪᖓ ᑭᓯᐊᓂ ᐊᔪᖅᓯᐅᖅᑲᓚᐅᖅᑐᖓ ᐊᓕᐊᓇᐃᒋᑦᑎᐊᖅᖢᒍᓗ," ᖁᖓᖦᖢᓂ. ᐊᖏᕐᕋᒧᑦ ᐅᑎᕐᒪᑦ ᐃᓕᓐᓂᐊᕐᕕᖕᒧᑦ, ᑭᓯᐊᓂ ᓇᒧᙵᐅᕈᓘᔭᕆᐊᖃᓚᐅᖅᑐᖅ ᑕᐃᑯᙵᕋᓱᒃᓗᓂ. 

ᐃᓕᓴᐃᔨᒥᓄᑦ ᐊᒻᒪ ᑲᔪᖏᖅᓴᐃᔨᖏᓐᓄᑦ ᑲᔪᖏᖅᓴᖅᑕᐅᖃᑦᑕᓚᐅᕐᒥᔪᖅ ᐊᒻᒪ ᐃᓱᒪᓕᕋᒥᒋᑦ, ᐅᖃᖅᑐᓂ, "ᖁᕕᐊᒋᑦᑎᐊᖅᑕᒃᑲ ᖃᓄᖅ ᐅᑉᐱᕈᓱᑦᑎᐊᕐᓂᖏᓐᓂᑦ ᐊᔭᐅᖅᑐᐃᓂᕐᒥᑦ ᐃᓕᓐᓂᐊᖅᑎᒋᓚᐅᖅᑕᖏᓐᓂᑦ. ᐅᕙᓐᓂᒃ ᑲᔪᖏᖅᓴᐃᖏᓐᓇᕐᒪᑕ ᓲᖃᐃᒻᒪ ᐃᑲᔪᐃᓐᓇᖃᑦᑕᕐᒪᑕ ᓄᓇᓕᖕᓂ ᐊᒻᒪ ᓯᕗᒻᒧᐊᒃᐸᓪᓕᐊᓪᓗᑎᒃ ᐊᒻᒪ ᐃᓄᐃᑦ ᐊᓂᕙᓪᓕᐊᑎᓐᓇᓱᒃᖢᒋᑦ ᐊᒻᒪ ᐊᓯᔾᔨᖅᐸᓪᓕᐊᖏᓐᓇᖅᖢᑎᒃ ᐊᒻᒪ ᐃᒻᒥᓂᒃ ᐃᓕᓐᓂᐊᖅᑎᒃᑲᓐᓂᖅᐸᒃᖢᑎᒃ." ᑎᓕᐅᕆᓂᖏᑦ ᐃᑲᔪᓚᐅᖅᑐᑦ ᓇᒦᒍᒪᓂᕐᒥᓂᒃ. 

ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᕌᓂᒃᓯᒪᓕᖅᑎᓪᓗᒍ, ᐃᓕᓴᐃᔨᙳᕆᐅᖅᓴᔪᒪᓚᐅᖅᐳᖅ ᕗᐊᑦ ᓯᒥᑦ−ᒥ. ᑕᐃᑲᙵᑦ, ᐃᓕᓐᓂᐊᕆᐊᓚᐅᖅᑐᖅ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᓂᖏᓐᓄᑦ Camosun ᓯᓚᑦᑐᖅᓴᕐᕕᖕᒥ ᐊᕐᕌᒎᖕᓄᑦ ᒪᕐᕉᖕᓄᑦ. ᑭᖑᓪᓕᕐᒥ ᐃᖏᕐᕋᓂᕆᓚᐅᖅᑕᖓ ᐅᑎᒃᑲᓐᓂᓚᐅᖅᐳᖅ ᐅᑭᐅᖅᑕᖅᑐᒧᑦ ᐃᓕᓐᓂᐊᒃᑲᓐᓂᖅᖢᓂᓗ ᑕᐃᑲᓂ. ᓅᑎᖦᖢᓂᒋᑦ ᖁᕝᕙᕆᐊᕈᑎᖏᑦ ᓯᕗᓪᓕᕐᒥ ᐊᕐᕌᒎᒃ ᒪᕐᕉᒃ ᐃᓕᓐᓂᐊᕐᓂᖓᓄᑦ ᖁᕕᐊᓱᒃᖢᓂᓗ ᐱᔭᕇᕆᐊᒃᓴᖅ ᐃᓕᓐᓂᐊᕌᓂᒍᓯᐊᖓᓂᒃ ᕗᐊᑦ ᓯᒥᑦᒥ ᒪᕐᕈᐃᒃᑲᓐᓂᕐᖢᓂ ᐊᕐᕌᒎᒃ. ᑎᐊᓇᑦ ᐃᓱᒪᓚᐅᖅᑐᖅ ᐱᒋᐊᕈᒪᓕᕐᖢᓂ ᐊᕐᕌᒍᓄᑦ ᑎᓴᒪᓄᑦ, ᖁᔭᓕᓚᐅᖅᑐᖅ ᖁᕝᕙᕆᐊᕈᑎᖏᑦ ᓅᑦᑐᓐᓇᕐᒪᑕ ᓄᑖᒧᑦ ᐃᓕᓐᓂᐊᕐᕕᖕᒧᑦ ᑲᔪᓯᔪᓐᓇᕐᖢᓂᓗ ᑐᕌᕆᔭᖓᓄᑦ. ᒫᓐᓇ ᐊᕐᕌᒍᓄᑦ ᑕᓪᓕᒪᓄᑦ ᐃᖅᑲᓇᐃᔭᓕᖅᑐᖅ, ᒥᓅᓴ ᑭᒡᒐᖅᑐᐃᕗᖅ ᐃᓕᓴᐃᔨᓂᒃ ᐃᓕᓐᓂᐊᕐᕕᖕᒥ ᓯᕗᓕᖅᑎᒋᔭᐅᓪᓗᓂ, ᑭᒡᒐᖅᑐᐃᔨᐅᓪᓗᓂ. 

ᐅᖃᐅᔾᔪᐃᓂᖓ ᐃᓕᓐᓂᐊᖅᑎᓄᑦ ᐃᓱᒪᒋᔭᖃᖅᑐᓄᑦ ᖃᓄᐃᓕᐅᓚᐅᕐᓂᕐᒥᓂᒃ, ᕿᒪᐃᓪᓗᓂ ᓄᓇᓕᖕᒥᓂᒃ ᐃᓕᓐᓂᐊᕐᓂᕐᒧᑦ, "ᐋᖅᑭᒃᓱᐃᕙᓪᓕᐊᕗᖅ ᐱᐅᔪᓂᒃ ᐊᑕᓂᕆᔭᐅᔪᓂᒃ ᓄᓇᖃᖅᑳᖅᑐᓄᑦ ᐃᓂᒋᔭᐅᔪᓄᑦ, ᑕᐃᒪᐃᒃᑯᑎᒃ ᖃᐅᔨᒪᓂᐊᕋᔅᓯ ᐃᓚᒋᔭᐅᓂᕐᒥᒃ ᐊᖏᕐᕋᕆᔭᒥᓂᒡᓗ ᕿᒪᒃᓯᓯᒪᓂᕐᒥᒃ ᐃᕝᕕᑦ ᓄᓇᒋᔮᓂᒃ, ᐋᖅᑭᒃᓱᐃᔪᓐᓇᕐᓗᑎᓪᓗ ᓄᓇᓕᖕᓂᒃ ᑕᐅᕙᓂ." ᓄᓇᖃᖅᑳᖅᑐᓄᑦ ᐃᓕᓐᓂᐊᖅᑎᓪᓗᒍ ᕕᒃᑑᕆᐊᒥ, ᐱᓕᕆᖃᑎᖃᑦᑎᐊᓕᓚᐅᖅᑐᖅ ᓄᓇᖃᖅᑳᖅᓯᒪᔪᓂᒃ ᐃᓕᓐᓂᐊᖅᑎᓂᒃ ᓇᓂᑐᐃᓐᓇᑦᑎᐊᖅ ᑲᑎᖃᑎᒋᓚᐅᖅᖢᓂᐅᒃ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᑦ ᐃᓕᓐᓂᐊᕐᕕᖕᒥ. "ᐃᒃᐱᒋᑲᐅᑎᒋᓗᒍ ᑲᓲᑎᓂᖅ. ᑐᙵᓇᖅᑐᑦ ᐊᒻᒪᓗ ᑲᑎᑎᑦᓯᖃᑦᑕᖅᑐᑦ ᐃᓕᓐᓂᑦ ᐃᓕᖅᑯᓯᖏᓐᓄᑦ ᑕᐃᒪᐃᒻᒪᑦ ᐊᖏᕐᕋᖃᕈᓐᓇᖅᑐᑎᑦ ᐱᖃᑎᖃᕐᓂᕐᒥᑦ ᓄᓇᖃᖅᑳᖅᓯᒪᔪᓂᑦ ᐃᓕᓐᓂᐊᖅᑎᓂᑦ," ᐃᖅᑲᐅᒪᔪᖅ. 

ᑖᓐᓇ ᑲᓲᑎᓂᖅ ᐃᑲᔪᖅᑕᐅᒋᐊᖃᓚᐅᖅᑐᖅ ᐊᒻᒪᓗ ᐃᑲᔪᖅᑐᖅᑕᐅᓪᓗᓂ ᐊᐳᖅᑕᕈᑎᖃᓚᐅᕐᒪᑦ ᐊᓂᒍᐃᒐᓱᐊᖅᑐᓂ. ᑮᓇᐅᔭᓂᒃ ᓇᓂᓯᓇᓱᖕᓂᖅ, ᐃᓕᓐᓂᐊᕈᑎᒃᓴᖅᑖᕈᑎᒃᓴᓂᒃ ᐊᒻᒪ ᐃᓕᓐᓂᐊᕈᑎᒃᓴᖅᑖᕈᑎᒃᓴᓂᒃ ᐊᒃᓱᕈᕐᓇᓚᐅᖅᐳᖅ. ᐊᓈᓇᙳᓚᐅᖕᒥᔪᖅ ᐃᓕᓐᓂᐊᖅᑎᓪᓗᒍ, ᐊᔪᕐᓇᕈᑎᒋᒃᑲᓐᓂᕐᖢᓂᔾᔪᒃ. ᒪᒃᑯᖕᓂᖅᓴᒥᒃ ᐅᖃᐅᔾᔪᐃᔪᓐᓇᕈᓂ ᐃᒪᓐᓇᐃᑦᑑᓇᔭᖅᐳᖅ, "ᐃᓕᖕᓂᒃ ᐊᓂᓗᑎᑦ ᐃᓗᐊᕆᔭᕐᓂᒃ ᐃᑲᔪᖅᑕᐅᔪᒪᓗᑎᓪᓗ ᑕᐃᒪᐃᑦᑕᕆᐊᖃᕌᖓᒥ, ᑲᑉᐱᐊᓱᓚᐅᖅᓯᒪᙱᓪᓗᑎᑦ ᐊᐱᕆᔭᕆᐊᒃᓴᖅ." 

ᑭᓇᑐᐃᓐᓇᖅ ᓂᐱᖃᙱᖦᖢᓂ ᐅᖃᓪᓚᒐᔪᙱᖦᖢᓂᓗ, ᐃᑲᔪᖅᑕᐅᔪᒪᓪᓗᓂ ᐃᓕᑦᑎᔭᕆᐊᖃᓚᐅᖅᑕᖓ, ᖃᓄᕐᓗ ᓇᓕᒧᒌᒃᑎᓐᓇᓱᒃᓗᒍ ᐃᓱᒪᖓ. ᖃᐅᔨᖃᑦᑕᖅᑐᖅ ᓇᓕᒧᒌᖕᓂᕐᒥᒃ ᑎᒥᒃᑯᑦ ᐆᒻᒪᕆᖕᓂᒃᑯᑦ ᐃᖃᐃᓕᓴᕐᓂᒃᑯᓪᓗ, ᑎᒥᖓ ᐊᐅᓚᔾᔭᒃᓗᓂ ᐱᓱᒃᓗᓂ, ᓯᓚᒦᓪᓗᓂᓗ ᑲᓲᑎᓗᓂ ᐃᖕᒥᓄᑦ. ᓯᕿᓐᓂᖅᑎᓪᓗᒍ ᐊᓄᕌᖅᑎᓪᓗᒍᓗ ᐅᕕᓂᖓᒍᑦ ᐊᒻᒪ ᐃᒃᐱᒋᔭᖏᑦ ᐃᒃᐱᒋᓪᓗᒋᑦ, ᒥᓅᓴ ᒪᒥᓴᖅᐳᖅ. 

ᐱᕈᖅᓴᓪᓗᓂ ᐊᖓᔪᒋᓛᕆᓪᓗᓂᐅᒃ, ᐃᓕᑦᑎᓵᓕᓚᐅᖅᑐᖅ ᖃᓄᖅ ᐃᓕᓴᐃᓂᕐᒥᒃ ᓯᕗᓕᖅᑎᐅᓂᕐᒥᒡᓗ, ᐆᒃᑑᑎᑦᑎᐊᕙᐅᓪᓗᓂ ᓄᑲᕇᒃ ᖃᑕᙳᑎᖏᓐᓄᑦ. ᖃᐅᔨᒪᓚᐅᙱᑦᑐᖅ ᖃᓄᐃᓕᐅᕈᒪᖕᒪᖔᕐᒥᓂᒃ ᐱᓕᕆᔨᒻᒪᕆᐅᓗᓂ ᑭᓯᐊᓂ ᐊᔪᓕᖅᑎᖦᖢᓂᐅᒃ ᖁᕕᐊᓱᓕᕐᖢᓂᓗ. ᓲᓂᐊ ᒥᓅᓴ ᐊᓪᓚᕆᔭᐅᔪᖅ ᕗᐊᑦ ᕗᐊᑦᔅᒥᑦ, ᐊᓈᓇᒋᔭᐅᔪᖅ ᒪᕐᕉᖕᓄᑦ ᕿᑐᕐᖓᖏᓐᓄᑦ ᐃᓕᓴᐃᔨᐅᓪᓗᓂᓗ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐃᓕᓐᓂᐊᕐᓂᓕᕆᓂᕐᒧᑦ. ᐃᓕᓴᐃᔨᒋᓚᐅᖅᑕᒥᓄᑦ, ᐊᖏᕐᕋᒧᑦ ᐅᑎᓕᓚᐅᖅᑐᖅ ᐃᓕᓐᓂᐊᕐᕕᐊᕈᓯᕐᒧᑦ, ᑭᓯᐊᓂ ᓇᒧᙵᐅᕈᓘᔭᕆᐊᖃᓚᐅᖅᑐᖅ ᑕᐃᑯᙵᕋᓱᒃᓗᓂ. ᐃᓕᓐᓂᐊᖃᑎᒌᑦ ᓵᑦᑎᐊᖓᓂ ᓇᖏᖅᖢᓂ, ᐱᔪᒃᓯᑎᑦᑎᕗᖅ ᓄᑖᓂᒃ ᐃᓕᓴᐃᔨᙳᓵᖅᑐᓂᒃ ᐊᒻᒪ ᑲᑎᙵᖃᑎᖃᐃᓐᓇᖅᖢᓂ ᑭᓇᐅᖕᒪᖔᑦ ᐃᑲᔪᖅᑎᓪᓗᒍ ᐃᓕᓐᓂᐊᖅᑎᓂᒃ ᓇᓂᓯᓇᓱᒃᑎᓪᓗᒍ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.