"ᐊᕐᕌᒍᓂ 1 ᒥᓕᐊᓐ−ᓂ ᐃᓕᓴᐃᔨᐅᓇᔭᖅᑰᓚᐅᖅᑐᖓ," ᐃᖅᑲᐅᒪᔪᖅ ᑖᓐᔭ ᒪᑳᓚᒻ. ᕗᑦᓚᓐ ᑯᕇᖑᕗᖅ ᐱᕈᖅᓴᓚᐅᖅᓯᒪᓪᓗᓂᓗ ᐊᓈᓇᑦᑎᐊᒃᑯᒥᓄᑦ ᐊᑎᖃᖅᑎᑕᐅᓪᓗᓂ ᐲᓕᑲᓐ ᓇᕈᔅ, ᓄᓇᒥ ᓄᓇᖃᖅᑐᖅ, ᐊᖑᓇᓱᒃᑐᖅ, ᐃᖃᓪᓕᐊᖅᓯᒪᔪᖅ ᐊᒻᒪ ᑲᑎᓐᓂᐅᔪᖅ. ᐅᑭᐅᒐᓴᐃᑦ ᐱᒋᐊᕋᑖᖅᑎᓪᓗᒋᑦ ᒥᑭᒋᐊᕐᓂᐊᖅᑕᐅᕙᓚᐅᖅᑐᑦ. 

"ᐃᖅᑲᐅᒪᓕᕌᖓᒪ, ᑖᒃᑯᐊ ᐃᓅᓯᓐᓂ ᐱᐅᓛᖑᖅᑰᓚᐅᖅᑐᑦ," ᐃᖅᑲᐅᒪᔪᖅ. ᓄᑲᖅᖡᑦ ᐃᓕᓐᓂᐊᕐᕕᖓᓄᐊᓚᐅᙱᑎᓪᓗᒍ, ᐃᓕᑦᑎᓚᐅᖅᑐᖅ ᐱᖅᑯᓯᑐᖃᒃᑯᑦ ᐃᓅᓯᕐᒥ ᐊᔪᙱᓐᓂᕐᓂ ᖃᑕᙳᑎᖏᓐᓂ. ᑕᒪᓐᓇ ᐃᓕᓐᓂᐊᕐᓂᖅ ᑕᐃᔭᐅᕙᓕᖅᐳᖅ ᐃᒪᓐᓇ, "ᓄᓇᒥᒃ−ᑐᙵᕕᓕᖕᒥᒃ ᐃᓕᑦᑎᕙᓪᓕᐊᓂᖅ". ᑭᓯᐊᓂ ᒥᖅᑯᓖᑦ ᑕᐅᖅᓰᖃᑦᑕᐅᑎᓂᖏᑦ ᑲᑕᓚᐅᕐᒪᑕ ᑎᓴᒪᖓᓐᓃᓕᖅᑎᓪᓗᒍ ᖁᑦᑎᓐᓂᓕᒃ, ᒪᑳᓚᒻ ᐊᓈᓇᑦᑎᐊᖓ ᐃᓕᓐᓂᐊᖅᑎᑕᐅᕙᓚᐅᖅᐳᖅ ᐃᓕᓴᐃᔨᖓᓂᑦ ᐊᑐᖃᑦᑕᕐᓂᐊᖅᑐᓂᒃ ᒥᑭᒋᐊᓂᒃ ᐊᖏᕐᕋᖏᓐᓂ ᐃᓕᓐᓂᐊᖅᑎᑕᐅᓪᓗᓂ. ᖃᑕᙳᑎᖏᑦ ᓄᓇᑖᕌᖓᒥᒃ ᓄᓇᑖᖅᐸᒃᖢᑎᒃ. ᐊᓂᒍᐃᓚᐅᖅᑐᖅ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᑭᓯᐊᓂ ᐋᖓᔮᕐᓇᖅᑐᖅᑐᖃᑦᑕᓚᐅᖅᐳᖅ ᐊᒻᒪ ᐃᒥᐊᓗᒃᑐᖅᖢᓂ. ᒪᑳᓚᒻ ᒪᓕᒃᑎᐅᓚᐅᖅᑐᖅ ᑕᐃᔅᓱᒪᓂ ᐊᒻᒪᓗ ᐃᓱᒪᓪᓗᓂ ᐱᓕᕆᔨᒻᒪᕆᐅᓂᕐᒥᒃ ᐅᕝᕙᓘᓐᓃᑦ ᐃᓕᓐᓂᐊᕐᓂᕐᒧᑦ ᐱᕕᒃᓴᖃᙱᓐᓂᖓᓄᑦ ᐊᖏᕐᕋᖓᓂ. ᐊᐅᓪᓚᓕᓚᐅᖅᑐᖅ.  

"ᐃᓕᓴᐃᔨᐅᓪᓗᖓ ᐃᓱᒪᒋᓚᐅᖅᓯᒪᙱᑕᒃᑲᓘᓐᓃᑦ. ᐃᓅᓯᖅ ᐃᖏᕐᕋᓂᑐᐃᓐᓇᐅᕗᖅ," ᑲᔪᓯᓪᓗᓂ. ᓯᕗᓪᓕᖅᐹᒥ ᐱᓇᔪᓚᐅᖅᑕᖓ ᓯᓚᑦᑐᖅᓴᕐᕕᖕᒥ, ᐱᓇᔪᒃᖢᓂ ᐊᔪᖅᓴᕈᓐᓃᖅᐹᓪᓕᕋᓱᒃᖢᓂ ᐊᒻᒪ ᐅᐃᕆᓯᒪᔪᓂᒃ ᓄᓇᒥᓂ ᕿᒪᐃᓇᓱᒃᖢᓂ, ᑲᔪᓯᑦᑎᐊᓚᐅᙱᑦᑐᖅ ᐃᓕᖅᑯᓯᖓ ᖁᐊᖅᓵᕐᓇᖅᑐᒃᑰᕐᓂᖓᓄᑦ. ᐅᑭᐅᒃ ᒪᕐᕉᒃ ᐊᓂᒍᖅᑎᓪᓗᒋᑦ, ᐆᒃᑐᒃᑲᓐᓂᕈᒪᓕᓚᐅᖅᑐᖅ, ᐱᓇᔪᒃᑲᓐᓂᓕᕐᖢᓂ ᑎᓴᒪᓄᑦ ᐊᔾᔨᒌᖏᑦᑐᓄᑦ ᐱᓕᕆᐊᒃᓴᓄᑦ ᐊᒻᒪᓗ ᑕᒪᒃᑭᕐᓗᒋᑦ. ᐃᓚᓕᐅᑎᓯᒪᔪᖅ ᐃᑲᔫᑕᐅᔪᓐᓇᖅᑐᓄᑦ ᐊᐅᓚᑦᑎᓂᕐᒧᑦ ᐱᓕᕆᐊᖅ ᑕᐅᑐᓕᓚᐅᖅᑐᖅ ᐃᓅᓯᖓ ᐱᕈᓚᐅᖅᑎᓪᓗᒍ ᓄᓇᒥᑦ. ᐱᓕᕆᐊᖅ ᐃᖅᑲᓇᐃᔮᖃᓕᓚᐅᖅᑐᖅ ᐊᕙᑎᒥᒃ ᒥᐊᓂᖅᓯᓂᕐᒧᑦ ᐊᒻᒪᓗ ᐊᓯᐅᔨᑦᑕᐃᓕᓂᕐᒧᑦ, ᑭᓯᐊᓂ ᐱᑕᖃᑦᑎᐊᙱᓐᓂᖓᓄᑦ ᓄᓇᖃᖅᑳᖅᑐᑦ ᖃᐅᔨᒪᓂᖏᓐᓂᒃ ᐊᒻᒪᓗ ᓯᓚᑐᓂᖏᓐᓂᒃ. ᐃᓱᒪᓕᐅᓕᓚᐅᖅᑐᖅ ᐃᖅᑲᓇᐃᔮᖓᑕ ᐊᓯᔾᔨᕐᓂᖓᓂᒃ. 

ᐃᓕᓴᐃᓇᓱᒃᖢᓂ ᑭᖑᓪᓕᕐᒥ, ᐱᓇᓱᓚᐅᖅᑐᖅ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐃᓕᓐᓂᐊᕐᓂᓕᕆᓂᕐᒧᑦ, ᐱᕐᔪᐊᓂᒃ ᓄᓇᖃᖅᑳᖅᓯᒪᔪᓂ ᐃᓕᓐᓂᐊᕐᓂᕐᓂ. ᐃᓕᓐᓂᐊᖅᑎᓪᓗᒍ, ᐃᓕᖅᑯᓯᕐᒥᓂᒃ ᑐᐹᖅᓯᖃᑦᑕᓚᐅᖅᐳᖅ ᐃᓕᓐᓂᐊᖅᖢᓂ ᓄᓇᒥᓂ ᐃᓕᓐᓂᐊᓚᐅᖅᓯᒪᙱᖦᖢᓂ ᐃᓕᖅᑯᓯᕐᒥᓂᒃ ᐊᒻᒪ ᑭᓇᐅᓂᕐᒥᓂᒃ. ᐃᒪᓐᓇᖔᕐᓕ, ᐃᓕᑦᑎᓚᐅᖅᐳᑦ ᒥᐊᓕᒐᕐᒥᐅᑦ ᐊᒻᒪ ᑕᕆᐅᑉ ᐊᑭᐊᓂᙶᖅᑐᓂᒃ ᐱᐅᓯᕆᔭᐅᕙᓚᐅᖅᑐᓂᒃ. ᑲᔪᓯᑎᓪᓗᒍ ᖁᑦᑎᖕᓂᖅᐹᒥ ᐃᓕᓐᓂᐊᖅᑕᖓᓄᑦ, ᑕᕐᓂᓕᕆᓂᕐᒧᑦ ᑐᐹᖅᓯᓚᐅᖅᑐᖅ. 

"ᐅᖃᐅᓯᖃᕌᖓᑦᑕ ᐅᒃᐱᕐᓂᓕᕆᓂᕐᒥᒃ, ᖃᔅᓰᑲᓪᓚᒃᖢᑕ, ᑕᒪᓐᓇ ᐅᖃᐅᓯᐅᒐᔪᙱᓚᖅ. ᑭᓇᑐᐃᓐᓇᖅ ᐃᓯᕈᒪᖏᒻᒪᑦ, ᐅᐱᓐᓇᕋᓂ ᐃᓱᒪᒻᒪᑕ ᐅᑉᐱᕐᓂᖅ ᐅᑉᐱᕐᓂᕐᒨᖓᒋᐊᖓ... ᑭᓯᐊᓂ ᑕᐃᒪᐃᓪᓚᕆᖏᑦᑐᖅ. ᑕᕐᓂᓕᕆᓂᖅ ᐃᓗᒃᑯᑦ, ᐊᒃᑐᐊᓂᖃᕐᓂᕆᔭᐃᑦ ᓄᓇᕐᔪᐊᕐᒧᑦ," ᐅᖃᖅᑐᖅ. ᒫᓐᓇ ᐱᓕᕆᐊᖃᓕᖅᑐᖅ ᓘᑦᑖᖑᓂᕐᒧᑦ ᐸᐃᑉᐹᒥᒃ ᑐᖑᔪᖅᑕᒥᒃ, ᓯᑕᒪᖓᓐᓂ ᖁᑦᑎᓂᖅᓴᒥᒃ ᐃᓕᓐᓂᐊᖅᓯᒪᓪᓗᓂ. 

ᐅᐸᖃᑦᑕᖕᓂᕆᔭᖓ ᐱᒻᒪᕆᐅᒋᕙᐅᒃ ᐃᓕᓐᓂᐊᖕᓂᐅᑉ ᐃᓱᒪᒋᔭᖏᓐᓂᑦ, ᑭᓯᐊᓂᓕ ᐃᓱᒪᙱᑦᑐᖅ ᒥᑭᒋᐊᕐᓂᐊᕈᑎᖏᑦ ᐃᓕᓐᓂᐊᕐᕕᖕᒥᑦ ᐱᐅᙱᑦᑐᒥᑦ ᐊᒃᑐᐃᓯᒪᖕᒪᖔᑦ. "ᐊᐅᓪᓚᖅᓯᒪᓚᐅᖅᑐᖓ ᐃᓕᓐᓂᐊᖃᑎᒋᓪᓗᒋᑦ, ᐃᑦᑐᒃᑯᓐᓃᙶᖅᑐᑦ, ᐊᒻᒪ ᐅᕝᕙᓘᓐᓃᑦ ᐃᓐᓇᐃᑦ ᖃᓂᒋᔭᓐᓂ. ᑕᒪᓐᓇ ᐱᐅᔪᒥᒃ ᐊᑦᑐᐃᓂᖃᖅᑐᒃᓴᐅᕗᖅ ᐅᓪᓗᒥ ᓇᒦᓕᕐᒪᖔᕐᒪ, ᑕᐃᒪᐃᒻᒪᑦ ᓴᖅᑭᔮᖅᑎᑦᑎᕗᖓ ᓄᓇᒥᒃ ᑐᙵᕕᖃᖅᑐᒥᒃ ᐃᓕᓐᓂᐊᖅᑐᓕᕆᓂᕐᒧᑦ. ᐅᖃᐅᓯᖃᓕᕌᖓᑦᑕ ᓄᓇᒥᒃ ᑐᙵᕕᖃᖅᑐᒥᒃ ᐃᓕᓐᓂᐊᖅᑎᑦᑎᓂᕐᒥᒃ ᐃᖅᑭᓖᑦ ᐃᓕᓐᓂᐊᕐᕕᖏᓐᓄᑦ, ᑕᒪᒃᑯᐊ ᐃᓕᓐᓂᐊᕈᑎᒃᓴᐅᔪᑦ ᐲᕋᓱᐊᙱᑕᕗᑦ. ᑕᒪᕐᒥᒃ ᐱᓕᕆᐊᕆᔭᕆᐊᖃᖅᑕᕗᑦ," ᓇᓗᓇᐃᖅᓯᒃᑲᓐᓂᖅᐳᖅ. 

ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐃᓱᒪᒋᔭᖃᖅᑐᓄᑦ ᕿᒪᐃᔪᒪᓪᓗᑎᒃ ᓄᓇᒥᓂᒃ ᓄᑖᓄᑦ ᐱᕕᒃᓴᓄᑦ ᑕᐃᒪᐃᓕᐅᕈᒪᓂᐅᕗᖅ ᐊᖏᒡᓕᕙᓪᓕᐊᓂᕐᒧᑦ ᐱᕕᒃᓴᖅᑕᖃᙱᑉᐸᑦ ᐃᓕᓐᓂᐊᕐᓂᓕᕆᓂᕐᒧᑦ ᕿᓂᕈᒪᓂᕐᒧᓪᓗ ᐃᓕᓐᓂᐊᕐᓂᓕᕆᓂᕐᒧᑦ ᐃᓂᒋᔭᐅᔪᓂᒃ ᐃᓚᓕᐅᔾᔨᔪᓂᒃ ᓄᓇᖃᖅᑳᖅᑐᑦ ᐊᑐᖃᑦᑕᖅᑕᖏᓐᓂᒃ ᖃᐅᔨᒪᓂᕐᒥᒃ ᐱᓕᕆᐊᖃᕐᓂᕐᒥᒡᓗ. ᒪᑳᓚᒻ ᐅᖃᐅᓯᖃᖅᑐᖅ ᐃᑲᔪᖅᑐᖅᑕᐅᓂᖅᓴᐅᖃᑦᑕᓕᕐᓂᖏᓐᓂᒃ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᖏᑦ ᒫᓐᓇ ᐊᖏᕐᕋᐅᓕᕐᓗᓂᓗ ᑎᓕᐅᕆᓇᔭᖅᑐᖅ ᒪᒃᑯᖕᓂᖅᓴᓂᒃ ᐱᓕᕆᖁᓗᒍ. 

ᓅᑉᐸᓪᓕᐊᓂᖅ ᐱᕕᖃᖅᑎᑦᑎᕗᖅ ᑲᑎᖃᑎᖃᕐᓂᕐᒥᒃ ᓄᑖᓂᒃ ᐃᓄᖕᓂᒃ, ᑭᓯᐊᓂᑦᑕᐅᖅ ᓴᖅᑭᑎᑦᑎᔪᓐᓇᕆᕗᖅ ᐃᓄᑑᓗᐊᕐᓂᕐᒥᒃ ᐃᓕᖅᑯᓯᑐᖃᕐᓄᓪᓗ ᖁᐊᖅᓵᕐᓇᖅᑐᒥᒃ. ᒪᑳᓚᒻ ᑎᓕᐅᕆᔪᖅ ᐃᓕᓐᓂᐊᖅᑎᓂᒃ ᐃᖅᑲᐅᒪᖁᓪᓗᒋᑦ ᖃᓄᐃᒻᒪᑦ, ᑕᐃᒪᐃᓕᐅᕐᒪᖔᑕ ᐃᖕᒥᖕᓄᑦ, ᖃᑕᙳᑎᖏᓐᓄᑦ, ᓄᓇᓕᖏᓐᓄᓪᓗ. ᑎᓕᐅᕆᔪᖅ ᒪᒃᑯᒃᑐᓂᑦ ᓴᙱᔫᖏᓐᓇᖁᓪᓗᒋᑦ ᐊᒃᓱᕈᕐᓇᖅᑐᒃᑯᑦ ᐅᖃᖃᑎᒌᒃᓗᑎᒃᓗ ᐊᒃᓱᕈᕐᓇᖅᑐᒃᑰᕈᑎᖏᓐᓂ ᓄᖅᑲᙱᖔᕐᓗᑎᒃ, ᐅᒡᒍᐊᕈᑎᒋᔭᖓ ᓇᖕᒥᓂᖅ ᐱᓕᕆᐊᕆᔭᕆᐊᒃᓴᖅ ᑕᑯᒐᔪᒃᑕᖓᓂᒃ ᓯᕗᓪᓕᖏᓐᓂ 6-8 ᑕᖅᑭᑦ.

ᐋᖅᑭᒃᓯᒪᐃᓐᓇᖅᑎᓪᓗᒍ ᐃᓱᒪᖓ, ᒪᑳᓚᒻ ᑕᐅᑐᒃᓗᓂ ᐋᖅᑭᒃᓯᓗᓂ ᓇᓕᒧᒌᒃᑎᑦᑎᓂᕐᒥᒃ ᐃᖅᑲᓇᐃᔭᕐᕕᖕᒥ, ᐃᓕᓐᓂᐊᕐᕕᖕᒥ ᖃᑕᙳᑎᖏᓐᓂᒃᓗ. ᐃᓚᖓ ᖃᓄᐃᓕᐅᕈᓯᖓ ᐊᐅᓪᓚᖅᓯᒪᓪᓗᓂ ᓄᓇᒥ, ᐅᓚᕕᓴᖅᑕᐅᙱᖦᖢᓂ ᐅᑎᕈᓐᓇᖅᓯᓪᓗᓂ. ᓄᓇᓕᕋᓛᕐᒥᐅᑕᐅᓪᓗᓂ ᑕᓯᕐᒧᐊᕈᓐᓇᖅᖢᓂ ᐃᖃᓪᓕᐊᕆᐊᖅᑐᖅᖢᓂ, ᐱᓱᔪᒡᓗᓂ ᐊᒻᒪ ᐊᖑᓇᓱᒋᐊᖅᖢᓂ. ᐃᓚᑎᑦ ᐃᕐᙳᓯᕐᒥᓃᑉᐸᒃᑭᓪᓗᑎᒃ. 

ᐱᔪᒃᓯᑎᑦᑎᓂᐊᕐᓗᓂ, ᒪᑳᓚᒻ ᖃᐅᔨᕙᒃᐳᖅ ᓴᙱᓂᕐᒥᒃ ᐃᓱᒪᓂᕐᒥᒃ ᐊᓈᓇᑦᑎᐊᒃᑯᒥᓂᒃ/ᐊᑖᑕᑦᑎᐊᒃᑯᒥᓂᒃ. ᐅᖃᐅᓯᖃᖅᑐᖅ ᓄᖅᑲᖃᑦᑕᖅᑐᓂᒃ, ᐃᒻᒥᓃᖅᑐᓂᒃ ᐊᒻᒪ ᑎᒍᔭᐅᓯᒪᔪᓂᒃ ᓄᓇᖃᖅᑳᖅᓯᒪᔪᓂᒃ ᐃᓄᖕᓂᒃ ᐊᒻᒪ ᐃᒃᐱᒍᓱᒃᖢᓂ ᐊᓯᐅᔨᔭᐅᓂᖓᓂᒃ ᐊᒻᒪ ᓇᑲᑕᐅᓂᖓᓂᒃ ᑭᓇᐅᓂᕐᒧᑦ. ᑕᒪᓐᓇ ᑲᔪᓯᑎᑦᑎᕙᒃᐳᖅ ᐱᓕᕆᐊᕆᔭᒥᓂᒃ, ᖃᐅᔨᒪᓪᓗᓂ ᐊᑕᓂᕆᔭᐅᔪᒥᒃ ᑭᓇᐅᓂᕐᒧᑦ ᐋᖅᑭᒃᓯᔪᓐᓇᖅᐳᖅ ᐊᒥᓱᓂᒃ ᐃᓅᖃᑎᒌᒃᐸᖕᓂᕐᒧᑦ ᐊᑲᐅᙱᓕᐅᕈᑎᒋᔭᐅᔪᓂᒃ. 

"ᐃᓄᐃᑦ ᖃᐅᔨᒪᔭᑐᖃᖏᑦ ᓇᒃᓴᕆᐊᖃᖅᑕᕗᑦ, ᖃᐅᔨᓴᕈᑎᕗᑦ, ᐃᓕᓐᓂᐊᖅᑐᓕᕆᔾᔪᑎᑦᑎᓐᓄᑦ, ᓲᖃᐃᒻᒪ ᖃᔅᓰᖅᓱᑲᓪᓚᒃᖢᑕ, ᑭᓯᐊᓂ ᐃᓚᖏᑦ ᐃᓄᐃᑦ ᖃᐅᔨᓕᑕᐃᓐᓇᖃᑦᑕᕐᒪᑕ ᑭᓇᐅᓂᕐᒥᓂᒃ ᓄᓇᖃᖅᑳᖅᓯᒪᔫᓂᖏᓐᓂᒃ ᐊᒻᒪ ᑭᓇᐅᓂᖏᓐᓂᒃ ᐱᒻᒪᕆᐅᓪᓗᑎᒃ. ᖃᐅᔨᒪᒋᐊᖃᕋᕕᑦ ᑭᓇᒥᒃ ᖃᐅᔨᒪᒋᐊᖃᕐᒪᖔᖅᐱᑦ ᓇᒧᙵᐅᓂᐊᕐᒪᖔᖅᐱᑦ ᓯᕗᓂᑦᑎᓐᓂ. ᖃᐅᔨᒪᒋᐊᖃᖅᐳᒍᑦ ᓇᒻᒥᓂᖅ ᖃᓄᐃᓐᓂᕆᓯᒪᔭᑦᑎᓐᓂᑦ, ᖃᓄᖅ ᖃᑦᑏᓐᓇᕈᕆᐊᖅᓯᒪᒻᒪᖔᑕ ᖃᓪᓗᓈᖑᖃᑎᒌᙱᑦᑐᑦ ᑐᑭᓯᖁᓪᓗᒋᑦ ᓇᒧᙵᐸᓪᓕᐊᒻᒪᖔᑦᑕ ᓯᕗᓂᔅᓴᖅᑎᓐᓂᑦ. ᑕᐃᒪᐃᙱᑉᐸᑦ, ᑕᐃᒪᐃᙱᒃᑯᑦᑕ, ᐱᐅᓯᕆᔭᐅᕙᓚᐅᖅᑐᑦ ᐅᖃᒃᑲᓐᓂᕋᔭᖅᑐᑦ," ᓇᓗᓇᐃᕐᓯᔪᖅ. 

ᐱᔪᒃᓯᓕᖅᑎᑦᑐᒪᓪᓗᒋᑦ ᓄᓇᖃᖅᑳᖅᑐᑦ ᒪᒃᑯᒃᑐᑦ, ᒪᑳᓚᒻ ᓱᓕ ᒪᓂᒪᑎᑦᑎᕙᒃᐳᖅ ᐅᖃᐅᓯᕐᓂᒃ ᓯᓚᑐᓂᕐᒥᒃ. "ᐊᒃᓱᕉᑎᖃᕐᓂᐊᖅᑐᑎᑦ ᐅᕕᓂᖃᑎᒋᙱᑕᕐᓂᒃ. ᖀᖅᓱᕐᓂᐊᖅᑐᑎᑦ. ᑕᒪᒃᑯᐊ ᐊᕝᕕᐊᕈᑕᐅᑦᑕᐃᓕᓕᑦ ᓇᒧᙵᕋᓱᐊᕐᓂᕐᓄᑦ... ᐃᓕᖕᓂᒃ ᐅᒃᐱᕆᓗᑎᑦ ᓲᖃᐃᒻᒪ ᓯᓐᓇᑦᑑᒪᒋᒍᕕᐅᒃ, ᐃᓕᖕᓂᒃ ᐱᓯᒪᕗᑎᑦ ᑲᔪᓯᑦᑎᐊᖁᓪᓗᑎᑦ." 

1 ᒥᓕᐊᓐ-ᓂᒃ ᐊᕐᕌᒍᓂᒃ ᑖᓂᐊ ᒪᑳᓚᒻ ᐃᓕᓴᐃᔨᕈᕋᔭᖅᑐᒋᓚᐅᖅᓯᒪᕙᐅᒃ, ᑕᐃᒪᐃᓚᐅᖅᑐᖅ. ᐃᓕᓴᐃᓂᖅ ᐊᓈᓇᑦᑎᐊᒃᑯᖏᓐᓂᒃ ᐃᓕᓐᓂᐊᕐᕕᖕᒧᑦ, ᐃᓄᐃᑦ ᖃᐅᔨᒪᓂᑐᖃᖏᓐᓂᒃ ᓯᓚᑐᓂᖏᓐᓂᒡᓗ ᐊᑐᖅᖢᓂ, ᐃᑲᔪᖅᑐᖅ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᖏᓐᓂᒃ ᓄᓇᕐᔪᐊᖅ ᑕᑯᔪᓐᓇᕐᓗᒍ, ᐃᓕᓐᓂᐊᕐᓂᖅ ᐊᒻᒪ ᓇᖕᒥᓂᖅ ᐊᔾᔨᒋᙱᑕᖓᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.