"ᑭᓱᓕᒫᑦ ᐊᑕᐅᓯᐅᓈᖅᑎᕐᓗᒋᑦ ᑲᒪᒋᕙᒡᓗᒋᑦ. ᐅᓪᓗᒥ ᐱᒻᒪᕆᐅᔪᑐᐊᖑᕗᖅ," ᐅᖃᖅᑐᖅ ᑎᐅᕆ-ᓖ ᑯᑉᑕᓇ. ᐃᓅᓚᐅᖅᓯᒪᔪᖅ ᐱᕈᖅᓴᓪᓗᓂᓗ ᑐᒃᑑᔮᖅᑐᒥ ᑭᓯᐊᓂ ᐊᐅᓪᓚᕆᐊᖃᓕᕋᒥ ᐃᓕᓐᓂᐊᕐᕕᐊᓗᖕᒧᑦ ᐃᓅᕕᖕᒧᑦ. ᓄᑕᕋᐅᑎᓪᓗᒍ ᓯᓚᒥ ᐱᙳᐊᕈᓘᔭᖃᑦᑕᓚᐅᖅᑐᖅ. ᓯᕗᓪᓕᖅᐹᒥ ᐃᖅᑲᓇᐃᔮᕆᓚᐅᖅᓯᒪᔭᖓ 12-ᓂᒃ ᐅᑭᐅᖃᖅᖢᓂ ᖃᐅᔨᓴᖅᑎᒧᑦ ᐃᑲᔪᖅᑎᐅᓪᓗᓂ. ᐊᐅᔭᑕᒫᑦ ᐃᖅᑲᓇᐃᔭᖃᑦᑕᓚᐅᖅᑐᖅ ᖁᕕᐊᒋᔭᖃᖅᖢᓂᓗ ᐱᓕᕆᖃᑎᖃᕐᓂᕐᒥᒃ ᐃᓄᖕᓂᒃ. ᐃᖅᑲᓇᐃᔭᓕᓚᐅᖅᐳᖅ ᐃᓕᓐᓂᐊᕆᐅᖅᓴᓕᓵᖅᑐᓄᑦ ᓄᑕᖅᑲᓄᑦ, ᑭᖑᓂᐊᒍᓪᓗ ᒪᒃᑯᒃᑐᓄᑦ ᐃᑲᔪᖅᑎᐅᓪᓗᓂ ᒪᒃᑯᒃᑐᒃᑯᕕᖕᒥ, ᑭᖑᓂᐊᒍᓪᓗ ᒪᒃᑯᒃᑐᓄᑦ ᐊᐅᓚᑦᑎᔨᒋᔭᐅᓕᖅᖢᓂ.

ᑯᑉᑕᓇ ᐃᓕᓐᓂᐊᕐᕕᖕᒧᑦ ᐅᑎᓚᐅᖅᐳᖅ ᐃᓅᕕᖕᒥ ᑎᑎᕋᕐᕕᖕᒥ ᐊᐅᓚᑦᑎᔨᐅᓂᕐᒧᑦ ᐃᓕᑕᕆᔭᐅᔾᔪᑎᑖᕋᓱᒃᖢᓂ ᐃᓕᑕᕆᔭᐅᔾᔪᑎᑖᖅᖢᓂᓗ. ᐊᖏᕐᕋᕋᒥ ᐃᖅᑲᓇᐃᔭᖅᑐᓕᕆᔨᐅᓚᐅᖅᑐᖅ ᐊᒻᒪᓗ ᐃᓕᓐᓂᐊᖅᑎᑦᑎᔨᐅᓪᓗᓂ ᑐᒃᑑᔪᐊᖅ ᓄᓇᓕᓐᓂ ᑯᐊᐳᕇᓴᓐᑯᓐᓄᑦ ᑕᐃᑲᓂ ᐃᖅᑲᓇᐃᔭᓚᐅᖅᑐᖅ ᐊᕐᕌᒍᓄᑦ 9-ᓄᑦ. ᑕᐃᑲᓂ ᐃᖅᑲᓇᐃᔭᖅᖢᓂ ᑭᓇᐅᓂᕐᒥᓂᒃ ᐋᖅᑭᒃᓯᓯᒪᕗᖅ ᐅᓪᓗᒥᐅᓕᖅᑐᖅ ᖁᕕᐊᒋᔭᖃᖅᖢᓂᓗ ᐃᓅᖃᑎᖃᕆᐊᒃᓴᖅ ᑭᒃᑯᑐᐃᓐᓇᓂᒃ ᖃᓄᑐᐃᓐᓇᖅ ᐅᑭᐅᓕᖕᓂᒃ. ᐊᑕᐅᓯᐊᖅᖢᓂ, ᐃᓕᓐᓂᐊᓕᓵᖅᑐᓄᑦ ᐃᓕᓴᐃᔨᓄᑦ ᐃᓇᖏᖅᑎᐅᓚᐅᖅᓯᒪᕗᖅ ᐱᓇᓱᐊᕈᓯᕐᓄᑦ ᐱᖓᓱᓄᑦ. 9−ᒋᓕᖅᑕᖓᓂ ᐊᕐᕌᒍᖓᓂ ᐃᓚᒌᓄᑦ ᐃᖅᑲᓇᐃᔭᖅᑎᐅᓪᓗᓂ ᖃᓄᐃᙱᑦᑎᐊᖅᑐᓄᑦ ᐃᓚᒌᓄᑦ ᐱᓕᕆᐊᒃᓴᒧᑦ, ᐃᖅᑲᓇᐃᔮᖅ ᖁᕕᐊᒋᑦᑎᐊᖅᑕᖓ. ᖁᕕᐊᒋᔭᖃᖅᐳᖅ ᑕᑯᔭᕆᐊᒃᓴᖅ ᐊᓯᔾᔨᕐᓂᐅᔪᓂᒃ ᐊᖓᔪᖅᑳᕆᔭᐅᔪᑦ ᓄᑕᖅᑲᖏᑕ ᖃᓄᐃᓕᐅᖅᐸᖕᓂᖏᓐᓂᒃ, ᐊᖓᔪᖅᑳᖑᓂᕐᒧᑦ ᐃᓕᖅᑯᓯᕆᔭᐅᕙᒃᑐᓂᒃ ᐱᕚᓪᓕᕈᑕᐅᕙᒃᑐᓂᒡᓗ ᖃᓄᐃᓕᐅᖅᐸᖕᓂᕐᒥᓄᑦ.

ᐃᓱᒪᒋᓪᓗᒍ ᒫᓐᓇ ᐃᖅᑲᓇᐃᔮᖓ, ᑯᑉᑕᓇ ᑕᑯᕗᖅ ᐃᑲᔫᑎᓂᒃ ᖃᑕᙳᑎᒌᑦ ᐃᑲᔪᖅᓱᖅᑕᐅᓂᖏᓐᓂᒃ ᓄᓇᖅᑲᑎᒥᓄᑦ ᐊᒻᒪ ᐃᑲᔪᖅᑎᖃᕐᓗᑎᒃ. ᐃᓚᒌᑦ ᖃᓄᐃᓐᖏᑦᑎᐊᕐᓂᖏᓐᓄᑦ ᐱᓕᕆᐊᖅ ᐱᖃᓯᐅᔾᔨᕗᖅ ᐃᓕᖅᑯᓯᑐᖃᖅᑎᒍᑦ ᐊᒻᒪ ᐃᓕᖅᑯᓯᑐᖃᖅᑎᒍᑦ ᐱᓕᕆᐊᓂᒃ ᓲᕐᓗ ᓄᓂᕙᒋᐊᕐᓂᖅ, ᐅᑭᐅᖅᓯᐅᑎᓂᒃ ᐊᓐᓄᕌᓕᐅᕐᓂᖅ, ᒥᖅᓱᕐᓂᖅ ᓇᓴᕐᓂᒃ, ᒪᒃᓗᓕᐅᕐᓂᖅ, ᓇᓴᓕᐅᕐᓂᖅ ᐊᒻᒪ ᓂᕆᐅᓇᖅᐳᖅ ᐃᖃᓗᓕᐅᕐᓂᖅ. ᐅᒃᐱᕆᔭᐅᔪᓐᓇᕐᓂᖅ ᐱᒻᒪᕆᐅᓛᖑᕗᖅ, ᐅᒃᐱᕈᓱᒃᐳᖅ ᐊᒻᒪ ᐊᑐᓂ ᐃᓚᒌᑦ ᐊᔾᔨᒌᙱᑦᑑᑕᐅᓪᓗᑎᒃ.

ᓄᓇᓕᕋᓛᖑᓪᓗᓂ ᒥᑭᑦᑐᑯᓘᓪᓗᓂ, ᐅᖃᐅᓯᖅ, "ᓄᓇᓕᓕᒫᑦ ᐱᕈᖅᓴᐃᔭᕆᐊᖃᖅᐳᑦ ᓄᑕᖅᑲᒥᒃ" ᓱᓕᑦᑎᐊᖅᐳᖅ. ᑭᒃᑯᓕᒫᑦ ᓇᐅᑦᑎᖅᓱᖅᐸᒃᐳᑦ ᓄᑕᖅᑲᓂᒃ ᐊᒻᒪᓗ ᓄᓇᓕᖕᒥᐅᑕᒥᒃ ᐊᓯᐅᔪᖃᕌᖓᑦ, ᑕᒪᕐᒥᑦᑎᐊᖅ ᓄᓇᓕᖕᒥᐅᑦ ᐃᒃᐱᒋᔭᖃᖅᐸᒃᐳᑦ. ᑭᒃᑯᓕᒫᑦ ᖃᐅᔨᒪᖕᒪᑕ ᐃᓚᒌᑦᑎᐊᖅᖢᑎᒃ. ᐊᕕᒃᓯᒪᓂᖅ ᑕᐃᒪᐃᑦᑕᕆᐊᖃᖅᑎᑕᐅᔪᖅ ᓄᕙᒡᔪᐊᕐᓇᒧᑦ ᐃᒃᐱᒋᔭᐅᒻᒪᕆᓚᐅᖅᐳᖅ ᓲᖃᐃᒻᒪ ᑭᒃᑯᓕᒫᑦ ᐊᖏᕐᕋᖅᓯᒪᔭᕆᐊᖃᓕᖅᖢᑎᒃ ᓇᑲᑎᕆᓚᐅᖅᐳᑦ ᑲᑎᙵᓂᕆᔭᖏᓐᓂᒃ ᓄᓇᓕᖕᓂ.

ᑯᑉᑕᓇᐅᑉ ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᑐᓄᑦ ᐃᓕᓐᓂᐊᖅᑎᓄᑦ ᐊᐅᓪᓚᕆᐊᖃᖅᐸᒃᑐᓄᑦ ᓄᓇᓕᖏᓐᓂ ᐃᓕᓐᓂᐊᕆᐊᕐᓗᑎᒃ ᐅᕝᕙᓘᓐᓃᑦ ᐱᓕᒻᒪᒃᓴᕐᓂᕐᒧᑦ ᑐᙵᕕᖃᖅᐳᖅ ᓇᖕᒥᓂᖅ ᐊᑐᖅᓯᒪᔭᒥᓂᒃ, ᐃᓅᕕᓕᐊᕋᒥ, ᐃᑲᕐᕋᐅᑉ ᓇᑉᐸᖓᓂ ᖃᖓᑕᓲᒃᑯᑦ ᐃᖏᕐᕋᓂᐅᔪᒥ ᐊᑭᑐᔪᒻᒪᕆᐅᓚᐅᖅᐳᖅ. "ᖃᐅᔨᒪᓚᐅᖅᐳᖓ ᐆᒻᒪᑎᒃᑯᑦ ᐃᓱᒪᒃᑯᓪᓗ ᐃᓕᓐᓂᐊᒃᑲᓐᓂᕈᒪᓂᓐᓂᒃ. ᑕᐃᒪᓕ ᖁᔭᓈᖅᓯᔭᕆᐊᖃᓕᓚᐅᖅᐳᖓ.... ᐃᖅᑲᐅᒪᐃᓐᓇᕆᐊᖃᓚᐅᖅᐳᖓ ᖃᓄᐃᒻᒪᑦ ᑕᐃᒪᐃᓕᐅᕐᒪᖔᕐᒪ." ᐃᓛᓐᓂᒃᑯᑦ ᐅᖄᓚᕙᓚᐅᖅᐳᖅ ᐊᖏᕐᕋᒧᑦ ᐅᖃᖅᖢᓂ ᐱᐊᓂᖕᓂᕋᖅᖢᓂ ᐊᓈᓇᖓᑕ ᐊᔭᐅᖅᑐᖅᐸᒃᖢᓂᐅᒃ.  "ᑲᑉᐱᐊᓇᖅᐳᖅ, ᐊᔾᔨᒋᙱᖦᖢᓂᐅᒃ, ᐊᒃᓱᕈᕐᓇᖅᐳᖅ," ᐃᖅᑲᐅᒪᕗᖅ, ᓇᒃᓴᕈᓐᓇᓚᐅᕋᓗᐊᖅᖢᓂ ᐅᐃᒥᓂᒃ ᕿᑐᕐᖓᖏᓐᓂᒡᓗ. "ᑲᔪᓰᓐᓇᕆᐊᖃᖅᐳᑎᑦ, ᑲᔪᓰᓐᓇᕐᓗᑎᑦ ᐃᑲᔪᖅᓱᐃᔨᒋᔭᕐᓂᒃ... ᐃᓕᖕᓂᒃ ᐅᒃᐱᕆᔪᓐᓃᓚᐅᖅᓯᒪᙱᓪᓗᑎᑦ... ᐃᓱᒪᐃᓐᓇᐅᔭᖅᐸᒡᓗᓯ ᐱᐅᔪᒥᒃ ᓴᖅᑭᑦᑐᖃᕐᓂᐊᕐᓂᖓᓂᒃ ᑕᕝᕙᙵᑦ, ᐊᖏᕐᕋᕐᓗ ᑕᐃᑲᓃᖏᓐᓇᐅᔭᕐᓂᐊᖅᖢᓂ. ᐊᐅᓪᓚᕈᓐᓇᖅᑐᒃᓴᐅᕗᑎᑦ ᐅᑎᕐᓗᑎᓪᓗ ᐃᖅᑲᓇᐃᔭᕆᐊᕐᓗᑎᑦ ᐅᕙᖓᑎᑐᑦ. ᐊᒥᓱᐊᓗᖕᓂ ᐱᕚᓪᓕᕈᑎᑕᖃᖅᐳᖅ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕐᓂᕐᒧᑦ," ᐅᖃᒃᑲᓐᓂᖅᐳᖅ.

ᐊᕝᕕᐊᕈᑎᖃᓕᕋᒥ, ᑯᑉᑕᓇ ᓄᖅᑲᓚᐅᖅᑐᖅ ᒍᕇᑦ 12-ᒥ ᑕᖅᑮᒃ ᒪᕐᕉᒃ ᐊᓂᒍᓚᐅᖅᑎᓐᓇᒋᑦ ᓲᖃᐃᒻᒪ ᓯᖓᐃᒐᒥ ᐸᓂᖅᑖᓚᐅᖅᖢᓂᓗ ᐋᒐᓯᒥ. ᐸᐃᕆᕝᕕᒃᑕᖃᖅᑎᓪᓗᒍ ᑕᐃᑲᓂ, ᐊᓂᓚᐅᖅᐳᖅ ᑲᙳᓱᒃᖢᓂ ᐊᒻᒪ ᐱᑦᑎᐊᖅᑕᐅᔪᒪᙱᖦᖢᓂ ᐅᖃᐅᓯᐅᔪᒪᙱᖦᖢᓂᓗ. ᐊᑕᐅᓯᕐᒥᒃ ᐃᓕᓐᓂᐊᖅᑕᒥᓂᒃ ᐃᓱᓕᑦᑎᙱᖦᖢᓂ ᑭᖑᓂᐊᒍᓪᓗ ᐱᔭᕇᓚᐅᖅᖢᓂᐅᒃ ᐃᕐᓂᖓᓗ ᐱᖃᑎᒋᓪᓗᓂᐅᒃ. ᒪᕐᕉᖕᓂᒃ ᕿᑐᕐᖓᖃᕈᓐᓃᓚᐅᕆᕗᖅ. "ᕿᒃᓵᖕᓂᖅ ᐊᒻᒪ ᐃᓚᙵᕐᓂᖅ ᐃᓄᖕᒧᑦ ᐊᒃᓱᐊᓗᒃ ᐊᒃᑐᐃᔪᓐᓇᕐᒪᑦ," ᐅᖃᖅᑐᖅ.

ᐊᓯᖏᑦ ᐊᒃᓱᕈᕐᓇᖅᑐᑦ ᑯᑉᑕᓇ ᓵᙵᔭᖏᑦ ᐃᓚᖃᓚᐅᖅᐳᑦ ᑭᖑᕚᕇᓄᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ, ᑕᐅᑐᒃᓯᒪᓪᓗᓂ ᑮᓇᐅᔭᐃᔭᕐᓂᕐᒥᒃ, ᐃᒥᐊᓗᖕᓂᕐᒥᒃ, ᐊᒻᒪ ᐅᓇᑕᕐᓂᕐᒥᒃ. 2020−ᒥ, ᖃᐅᔨᔭᐅᓚᐅᖅᐳᖅ PTSD−ᖃᕐᓂᖓᓂᒃ ᐃᓕᑦᑎᒃᑲᓐᓂᕆᐊᖃᓕᓚᐅᖅᖢᓂᓗ ᕿᓄᐃᓵᕈᓐᓇᕐᓂᕐᒧᑦ ᐊᑐᖅᑕᐅᕙᒃᑐᓂᒃ. ᐃᓚᖓᑦ ᐊᖏᓛᖑᖃᑕᐅᔪᖅ ᐊᒃᑐᖅᓯᓂᕆᓚᐅᖅᑕᖓ ᓄᕙᒡᔪᐊᕐᓇᖅ-ᑎᑐᑦ ᐃᓗᕕᖅᑕᐅᑎᓪᓗᒍ ᐊᑖᑕᖓ. ᐊᓈᓇᖓᑕ ᐅᒃᐱᕆᓂᕆᓚᐅᖅᑕᖓ ᐊᒃᓱᕉᓴᖕᓂᒃᑯᑦ ᐊᓂᒍᐃᔾᔪᑎᒋᓚᐅᖅᐸᐅᒃ, ᖁᕕᐊᒋᔭᖃᖅᖢᓂᓗ gospel ᑐᓴᕐᓈᒐᒃᓴᓂᒃ ᐊᒻᒪ ᐃᓅᕙᓗᐃᑦ ᕿᓚᐅᔾᔭᕐᓂᕐᒥᒃ ᐊᒻᒪ ᐹᕗ ᒧᒥᕐᓂᕐᒥᒃ. ᖃᑕᙳᑎᖏᑦ ᐅᐱᒋᕙᖏᑦ ᐃᓅᓕᑦᑎᓚᐅᕐᓂᖏᓐᓂᒃ ᐊᑐᖅᓯᒪᔭᒥᓂᒡᓗ ᐊᑐᖅᐸᒃᖢᓂ ᐊᓯᒥᓂᒃ ᐃᓄᑑᓗᐊᕈᓐᓃᖅᑎᑦᑎᓇᓱᒃᖢᓂ.

ᑲᔪᖏᖅᓴᐃᓂᕐᒧᑦ, ᐃᓄᖁᑎᖏᑦ ᑲᔪᖏᖅᓴᐃᕙᓚᐅᖅᐳᑦ, ᐊᖓᔪᖅᑳᖏᓪᓗ ᑲᔪᖏᖅᓴᐃᕙᓚᐅᖅᐳᑦ, ᐱᔪᓐᓇᕐᓂᓕᒫᒥᒍᑦ ᐱᕈᖅᓴᐃᓪᓗᑎᒃ ᐊᒻᒪ ᑐᓐᓂᖅᑯᑎᖃᕐᔪᐊᖅᐸᒃᖢᑎᒃ. ᕿᑐᓐᖓᖏᑦ ᐊᒻᒪᓗ ᐊᓈᓇᖓ ᑲᔪᖏᖅᓴᖅᑕᐅᕙᒃᖢᓂ, ᐊᒻᒪᓗ ᐊᒥᓱᐊᓗᐃᑦ ᐃᓐᓇᐃᑦ ᑕᒫᓃᒍᓐᓃᖅᑐᑦ. ᑯᑉᑕᓇ ᐱᔪᒃᓯᑎᑕᐅᖕᒥᔪᖅ ᐱᖃᓐᓇᕆᔭᒥᓄᑦ ᓴᓂᑦᑎᐊᖓᓃᖏᓐᓇᐅᔭᖅᑐᒥᒃ ᐊᒃᓱᕈᕐᓇᖅᑐᒃᑰᕋᓗᐊᖅᑎᓪᓗᒍ.

ᐃᓱᓕᑉᐸᓪᓕᐊᓕᖅᑎᓪᓗᒍ, ᑯᑉᑕᓇ ᐅᖃᓚᐅᖅᐳᖅ, "ᖃᓄᐃᑦᑐᒃᑰᕋᓗᐊᕈᕕᑦ... ᐃᓕᖕᓂᒃ ᐅᖃᑐᐃᓐᓇᕆᑦ ᐱᐅᔪᒥᒃ ᓴᖅᑭᑦᑐᖃᕐᓂᐊᕐᓂᖓᓂᒃ ᐊᒻᒪ ᐃᓕᖕᓂᒃ ᐃᖅᑲᐃᓯᖃᑦᑕᐃᓐᓇᕐᓗᑎᑦ ᐱᔪᓐᓇᕐᓂᓕᒫᕐᓂᒃ ᐱᓕᕆᓂᕐᓂᒃ ᐊᒻᒪ ᓇᒡᓕᒋᔭᐅᓂᕐᓂᒃ ᐊᒻᒪ ᑲᒪᒋᔭᐅᑦᑎᐊᕐᓂᕐᓂᒃ, ᐱᐅᔪᐊᓘᒐᕕᑦ ᐊᒻᒪ ᐃᒡᕕᐅᖏᓐᓇᕈᓐᓇᙱᖦᖢᑎᑦ..."

ᐃᑲᔪᖅᑐᐃᓪᓗᓂ ᐃᓚᒌᓂᒃ ᕿᑐᕐᖓᒥᓂᒃ ᐱᕈᖅᓴᐃᑎᓪᓗᒋᑦ, ᑎᐅᕆ-ᓖ ᑯᑉᑕᓇ ᓴᖅᑭᑎᑦᑎᕙᒃᐳᖅ ᐃᓕᖅᑯᓯᑐᖃᒃᑯᑦ ᐃᓕᖅᑯᓯᑐᖃᒃᑯᓪᓗ ᐱᓕᕆᐊᒃᓴᓂᒃ ᓴᙱᓂᕆᔭᐅᔪᒥᒡᓗ ᐅᒃᐱᕆᔭᖃᕈᓐᓇᕐᓂᕐᒥᒃ. ᐃᖅᑲᓇᐃᔭᓚᐅᖅᓯᒪᕗᖅ ᑕᐃᒪᙵᓂ 12-ᓂᒃ ᐅᑭᐅᖃᓕᕋᒥ, ᓴᙱᔪᒥᒃ ᐃᖅᑲᓇᐃᔭᕈᓐᓇᑦᑎᐊᓚᐅᖅᐳᖅ ᐊᖓᔪᖅᑳᒥᓄᑦ. ᖃᐅᔨᒪᓪᓗᓂ ᓄᓇᓕᖕᓂ ᐱᕈᖅᓴᐃᔭᕆᐊᖃᕐᓇᕐᒪᑦ ᓄᑕᖅᑲᒥᒃ, ᐃᓚᒋᔭᐅᕗᖅ ᐃᑲᔪᖅᓱᐃᓂᕐᒧᑦ ᐊᑐᖅᑕᐅᕙᒃᑐᓄᑦ ᐊᖓᔪᖅᑳᓄᑦ ᑐᒃᑑᔮᖅᑐᒥ ᑕᑎᒋᔭᐅᔪᓐᓇᖅᖢᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.