ᑐᕇᓴ ᐅᐊᑉᔅ ᐱᓕᕆᔪᒻᒪᕆᐅᕗᖅ, ᑕᐃᑯᖓ ᑎᑭᑉᐸᓪᓕᐊᔪᒻᒪᕆᐅᓪᓗᓂᓗ. ᐅᐊᑉᔅ ᔅᑑᒥᙶᖅᑐᖅ:ᓄᓇᕐᔪᐊᒥᙶᖅᑐᖅ ᓯᓕᕗᐊᒃᒥ, B.C., ᒫᓐᓇᓗ ᓄᓇᖃᖅᑐᖅ ᓄᓇᓕᖓᓂ ᓯᑲᐅᑲᐃᐅᓪᒥ.

ᐊᒥᓱᓂᒃ ᐱᓕᕆᖃᑦᑕᖅᑐᖅ, ᐱᖃᓯᐅᑎᓪᓗᒍ ᐊᐅᓚᑦᑎᔪᖅ ᐱᕙᓪᓕᐊᔪᓕᕆᔨᓂᒃ ᑕᐃᔭᐅᔪᖅ ᓴᓕᔅ ᐅᓂᒃᑳᖅᑐᐊᑦ ᐅᐃᖓ, ᐱᓕᕆᖃᑎᖃᖅᑐᓂ ᓄᓇᓕᒻᒥᓂᒃ ᐱᕙᓪᓕᐊᔪᓕᕆᔨᓄᑦ ᐊᐅᓚᑦᑎᔨᐅᓪᓗᓂ Sto:lo Hopewell Association, ᐊᒻᒪᓗ ᓂᔾᔭᐅᓯᔭᖅᑎᐅᔪᖅ ᐊᑎᓕᒃ ᑭᐊᓕᔭ, ᑖᓐᓇ ᐱᓕᕆᓚᐅᖅᑐᖅ ᓯᕗᓪᓕᖅᐹᒥ ᓂᔾᔭᐅᑎᑖᖅᑐᓂ ᑕᒫᓂ ᐊᕐᕌᒍᒥ.

ᐅᐊᐸᔅ ᑎᑕᒃᑎᐅᓯᒪᔪᖅ ᐊᕐᕌᒍᓄᑦ 15-ᑲᓴᖕᓄᑦ, ᐊᒻᒪᓗ ᑕᒪᐃᑎᒍᓕᒫᖅ ᑲᑎᕐᒪᑉᓗᑎᒃ ᐊᒻᒪᓗ ᓴᒃᑯᑕᐅᓪᓗᑎᒃ ᑲᑎᖓᐅᖅᑐᑦ, ᐱᓕᕆᖃᑎᖃᕐᒥᔪᑦ ᕚᓐᑰᕙᒥᑦ ᑐᙵᕕᓕᖕᓂᑦ ᓴᓇᙳᐊᖅᑎᓂᒃ ᐊᒻᒪᓗ ᑕᑯᒃᓴᐅᑎᑦᑎᔪᓂᒃ.

ᓴᓕᔅ ᐅᓂᒃᑳᖅᑐᐊᓄᑦ ᐱᕙᓪᓕᐊᔪᓕᕆᔨᓄᑦ, ᐅᐊᐸᔅ ᐃᓱᒪᓕᐅᓚᐅᖅᑐᖅ ᐃᖅᑲᓇᐃᔮᕆᓪᓗᐊᑕᕐᓂᐊᖅᑕᒥᓂᒃ ᓴᓇᙳᐊᕐᓂᕐᒧᑦ ᐱᔾᔪᑎᒋᓪᓗᓂᐅᒃ. ᑕᐃᒪᓕ ᐃᓕᓐᓂᐊᕆᐊᓕᓚᐅᖅᑐᖅ ᐊᑎᖃᖅᑐᖅ ᓕᓐᔅ ᓴᓐᖏᓂᖅᑖᑎᑦᑎᓂᕐᒧᑦ ᓯᓚᑦᑐᓴᕐᕕᔾᔪᐊᖓᓂ ᕗᕋᐃᓱ ᕚᓕᒥ.

"ᐃᒃᐱᒋᑦᑎᐊᓚᐅᖅᑕᕋ ᐊᔾᔨᓕᐅᕈᑎᒥᒃ ᑎᒍᓯᑐᐊᕋᒪ ᐅᓂᒃᑳᑲᑕᓕᖅᖢᖓᓗ ᐃᓄᖁᑎᑦᑕ ᒥᒃᓵᓄᑦ, ᓴᙱᓂᖃᓗᐊᒧᑦ," ᐅᖃᖅᐳᖅ ᐅᐊᐸᔅ.

"ᑕᐃᒪᓕ ᐃᓱᒪᓕᐅᓕᖅᑎᓪᓗᖓ ᐃᖅᑲᓇᐃᔮᖃᓪᓗᐊᑕᕈᒪᓕᓚᐅᕋᒪ ᐊᒃᑐᐊᓂᖃᕐᓂᖅᓴᐅᔪᒥᒃ ᓴᓇᙳᐊᕐᓂᕐᒧᑦ, ᓲᖃᐃᒻᒪ ᐱᔨᑦᑎᕋᐃᓐᓇᓲᖑᒐᒪ ᒪᒃᑯᒃᑐᓂᒃ."

ᑕᐃᑲᙵᓪᓕ, ᑐᕌᒐᖃᓚᐅᖅᑐᖅ ᓴᓇᓂᕐᒥᒃ ᓄᓇᒥ ᐊᒻᒪᓗ ᖃᐅᔨᒪᓪᓗᓂ ᐊᔪᕐᓇᕋᔭᙱᒋᐊᖓᓂᒃ ᓴᖅᑮᓗᑎᒃ ᓇᒻᒥᓂᖅ ᐅᓂᒃᑳᒥᓂᒃ ᐊᒻᒪᓗ ᓇᒻᒥᓂᖅ ᑕᕐᕆᔭᓕᐅᕐᓗᑎᒃ ᐃᓕᓐᓂᐊᖅᑎᑕᐅᑉᐸᑕ.

ᑕᐃᒪᐃᓚᐅᖅᑐᖅ. ᕚᓐᑰᕗᒧᐊᕈᑎᓪᓗᓂ ᓯᓚᑦᑐᖅᓴᕐᕕᒡᔪᐊᒧᑦ ᐳᕆᑎᔅ ᑲᓚᒻᐱᐊᒧᑦ ᓇᓂᓯᓪᓗᓂ ᑎᑎᕋᕈᒪᑦᑎᐊᕐᓂᕐᒥᓂᒃ ᑐᑭᒧᐊᒃᑎᖦᖢᒍᓗ ᐅᐃᖓ ᓇᓂᓯᑎᓪᓗᒍ ᐊᔾᔨᓕᐅᕆᓂᕐᒥᒃ ᐱᓕᕆᓪᓗᓂᓗ ᐊᔾᔨᓕᐅᕈᑎᒥᒃ.

ᐅᐊᐸᔅ ᐅᖃᖅᑐᖅ ᐱᕙᓪᓕᐊᔪᓕᕆᔨᑦ ᑲᒻᐸᓂᖓ ᐊᑐᒐᒃᓴᐅᔪᖅ ᐱᔨᑦᑎᕋᐅᑎᖏᓐᓂ ᐱᓕᕆᖃᑎᒌᒃᖢᑎᒃ ᐱᑎᑦᑎᔪᓐᓇᕐᖢᑎᒃᓗ ᑕᒪᒃᑭᖅᑐᓂᒃ ᐱᔨᑦᑎᕋᐅᑎᓂᒃ ᓄᓇᓕᖕᓄᑦ ᑭᓇᑐᐃᓐᓇᒧᓪᓗ ᐱᔭᕆᐊᖃᖅᑐᓄᑦ.

"ᓴᖅᑭᔮᖅᑎᑦᓯᔩᑦ, ᑎᑎᕋᖅᑏᑦ, ᐃᓄᐃᑦ ᑕᐅᑐᒐᖃᖅᑐᑦ, ᐃᓄᐃᑦ, ᓴᓇᙳᐊᖅᑏᑦ ᓂᔾᔭᐅᓯᔭᕈᒪᔪᑦ. ᐃᖅᑲᓇᐃᔭᖅᑎᑖᕈᓐᓇᖅᑐᑦ ᑲᒻᐸᓂᑦᑎᓐᓂᒃ, ᓴᓕᔅ ᐅᓂᒃᑳᖅᑐᐊᓂᒃ ᐱᕙᓪᓕᐊᔪᓕᕆᔨᓂᒃ. ᒥᓪᓗᐊᖅᑎᑦᑎᕙᒃᐳᒍᑦ ᐱᐅᓴᖅᑕᒥᓂᒃ, ᐊᑭᓕᒐᒃᓴᙳᖅᑎᑦᑎᓕᖅᖢᑕᓗ ᑕᐃᒪᓐᓇ," ᑕᐃᒪᓐᓇ ᐅᐊᐸᔅ ᐅᖃᖅᖢᓂ.

ᐃᓕᓐᓂᐊᕐᓂᖓᓄᑦ ᑎᑭᒻᒪᑦ, ᐅᖃᓚᐅᖅᑐᖅ "ᐃ" ᐊᒻᒪᓗ ᐅᖃᖅᑐᓂ ᖃᑦᑎᓂᒃ ᐊᕐᕌᒍᓂᒃ ᐃᓕᓐᓂᐊᕐᕕᔾᔪᐊᒦᓐᓂᐊᖅᓯᒪᒻᒪᖔᖅ ᐊᕐᕌᒍᓄᑦ ᖁᓕᓄᑦ ᐃᓕᓐᓂᐊᖅᓯᒪᓪᓗᓂ ᐊᑦᔨᒌᖏᑦᑐᓂᒃ."

ᐅᖃᕐᖢᓂ ᐃᓚᖓ ᐊᓯᔾᔨᕐᖢᓂ ᐃᓱᒪᖓ ᐊᒻᒪ ᑎᑭᐅᑎᖏᓐᓇᐅᔭᕐᖢᓂ ᓴᓇᕐᕈᑎᓂᒃ ᐃᓗᓪᓕᕈᒪᓗᒍ ᐴᖓ ᐊᔪᕐᓇᙱᓐᓂᓕᒫᖓᓂ.

ᐅᐊᐸᔅ ᐅᖃᖅᐳᖅ ᐃᓕᓐᓂᐊᕆᐊᓚᐅᖅᓯᒪᓂᕋᖅᖢᓂ ᑭᓱᑐᐃᓐᓇᓂᒃ ᖃᐅᔨᓴᕆᐊᖅᑐᖅᖢᓂ ᖃᓪᓗᓈᑑᕈᓐᓇᕐᓂᖅᓴᐅᓕᓚᐅᖅᖢᓂᓗ ᒪᓕᒐᙳᕈᒪᓕᖅᖢᓂ. ᑕᐃᒪᓕ ᑕᕐᕆᔭᕐᕕᓕᐊᓕᓚᐅᖅᑐᖅ, ᓂᐱᓕᐅᕆᔨᓃᓚᐅᖅᑐᖅ, UBC-ᒨᖅᑐᓂ ᑕᕐᕆᔭᓕᐅᕆᐊᖅᑐᖅᑐᓂ ᐊᒻᒪᓗ ᑕᐃᒪᙵᓂᒃ ᑕᐃᒪᐃᓕᐅᖏᓐᓇᖅᑐᓂ.

"ᐊᕐᕌᒍᑦ ᐊᕐᕕᓂᓕᑦ ᐊᓂᒍᖅᑎᓪᓗᒋᑦ, ᑕᕝᕙᐅᕗᒍᑦ. ᐃᓕᓴᐃᔨᖁᑎᒃᑲ ᐊᒻᒪᓗ ᐃᓕᓐᓂᐊᕕᔾᔪᐊᖃᑎᒃᑲ ᑎᑎᖅᑐᒐᕐᓂᕐᒧᑦ. ᐊᒻᒪᓗ ᐱᓇᓱᐊᖅᑐᖓ ᑕᕐᕆᔭᓕᐅᕐᓂᕐᒥᒃ ᒫᓐᓇᐅᔪᖅ. ᑕᐃᒪᓕ ᓂᕆᐅᒃᐳᖓ ᑕᒪᓐᓇ ᐱᔭᕇᓛᕆᐊᒃᓴᖅ ᐊᕐᕌᒍ," ᐅᖃᖅᑐᕕᓂᖅ ᐅᐊᐸᔅ.

ᐱᒋᐊᕐᖢᓂ ᑲᒻᐸᓂᖓᓂᒃ ᐊᒻᒪᓗ ᑕᒪᓐᓇ ᐱᓕᕆᐊᕆᓪᓗᒍ ᐊᔪᕐᓇᙱᑦᑐᑯᓘᓚᐅᙱᑦᑐᖅ, ᐊᔾᔨᒌᖏᑦᑐᓂᒃ ᕿᓕᖅᓯᓇᐅᔭᕐᓗᒃᖢᓂ.

ᐅᖃᕐᖢᓂ ᐃᓕᓐᓂᐊᕐᓂᖓ ᐃᓂᐅᓂᖓᓂᒃ ᐊᒃᓱᕈᕐᓇᕐᔪᐊᕐᖢᓂ. ᐃᓅᓱᒃᑑᓚᐅᖅᑐᖅ ᓅᒻᒪᑦ ᐊᒻᒪᓗ ᓄᓇᖃᕈᒪᓕᕋᒥ ᐋᓪᕘᑕᒥ ᐊᒻᒪᓗ ᐃᓕᓐᓂᐊᕆᐊᕈᒪᓕᓚᐅᖅᑐᖅ ᑭᓯᐊᓂᓕ ᐊᒥᓱᓂᒃ ᐱᓕᕆᐊᖃᖃᑦᑕᓚᐅᕐᒥᔪᖅ ᓇᒻᒥᓂᖅ, ᐱᖃᓯᐅᑎᓪᓗᒍ ᑭᓇᐅᓂᖓ, ᐱᕈᑉᐸᓪᓕᐊᓂᖓ ᐊᒻᒪᓗ ᐅᑉᐱᕈᓱᓐᓂᖓ.

"ᓅᑎᓪᓗᖓ, ᐅᔾᔨᕈᓱᓚᐅᙱᑦᑐᖓ ᕿᒫᔪᖅ ᐋᖅᑭᔾᔮᖏᓐᓂᖓᓂᒃ ᖃᓄᑐᐃᓐᓇᖅ ᐊᑲᐅᙱᓕᐅᕈᑎᓂᒃ ᐊᑐᓚᐅᖅᑕᓐᓂᒃ ᑕᕝᕙᓂ," ᐅᖃᖅᑐᖅ ᐅᐊᐸᔅ.

ᐋᖓᔮᕐᓇᖅᑐᓂᑦ ᐊᑐᕐᓂᓗᖃᑦᑕᓕᓚᐅᕐᒪᑦ ᐃᒥᐊᓗᒻᒥᑦ ᐊᒻᒪ ᓱᕋᔅᓯᒪᓪᓗᓂ ᐊᒻᒪ ᐅᑎᕆᐊᖃᓕᓚᐅᖅᑐᖅ ᐊᖏᔪᖅᑳᒥᓂᒃ ᑐᔪᕐᒥᓪᓗᓂ.

ᐅᐊᑉᔅ ᖁᕕᐊᓱᙱᑦᑐᒻᒪᕆᐅᓚᐅᖅᐳᖅ ᐊᒻᒪ ᐃᓱᒪᓪᓗᓂ ᐃᓕᓐᓂᐊᕈᓐᓇᑦᑎᐊᕋᓱᒋᙱᖦᖢᓂ, ᑭᓯᐊᓂ ᑕᐃᔅᓱᒪᓂ ᐃᓕᖅᑯᓯᕐᒥᓂᒃ ᐃᓚᐅᓕᓚᐅᖅᓯᒪᕗᖅ ᐊᒻᒪ ᐃᒻᒥᓂᒃ ᑕᑯᔭᕆᐊᖃᓕᓚᐅᖅᖢᓂ ᐊᒻᒪ ᖃᓄᖅ ᐃᑲᔪᕐᓂᕆᓚᐅᖅᑕᖓ ᓄᓇᓕᖕᓄᑦ.

ᐅᖃᓚᐅᖅᓯᒪᔪᖅ ᓂᑲᒍᓱᑦᑎᐊᕐᓂᕋᖅᖢᓂ ᑕᐃᔅᓱᒪᓂ, ᑭᓯᐊᓂ ᑐᙵᑦᑎᐊᓚᐅᖅᑐᖅ. ᕚᓐᑰᕗᒧᑦ ᓅᑦᑐᒪᓕᓚᐅᖅᑐᖅ ᐊᒻᒪᓗ ᐱᓕᕆᐊᖃᖅᖢᓂ ᒪᒃᑯᒃᑐᓄᑦ ᐊᒻᒪᓗ ᑕᕐᕆᔭᕐᕕᖕᒧᑦ, ᐊᒻᒪᓗ ᑕᐃᔅᓱᒪᓂ ᓂᔾᔭᐅᑎᑖᕋᒥ.

"ᐊᒃᓱᕈᕐᓇᓗᐊᓚᐅᙱᑦᑐᖅ, ᑭᓯᐊᓂ ᑕᐃᒪᐃᖏᓐᓇᐅᔭᓚᐅᖅᑐᖅ, ᐃᓕᖅᑯᓯᕋ, ᐅᑎᕆᐊᖃᓚᐅᖅᑐᖓ. ᓄᓇᓕᐸᐅᔭᕐᒦᑦᑐᓐᓇᖅᑐᖓ, ᑭᓯᐊᓂ ᐊᖏᕐᕋᓐᓄᑦ ᐅᑎᕆᐊᖃᓚᐅᖅᑐᖓ ᖁᕕᐊᓲᑎᖃᖅᑎᓪᓗᑕ," ᐅᖃᖅᑐᕕᓂᖅ ᐅᐊᐸᔅ.

ᐅᖃᕆᓪᓗᓂᓗ ᑲᒪᒋᔭᖃᕆᐊᖃᓚᐅᕐᓂᕐᒥᓂᒃ ᑐᖁᓐᓇᖅᑐᒥᒃ ᐃᓅᖃᑎᖃᕐᓂᕐᒥᒃ ᐃᒪᓐᓇ, "ᐊᖏᔪᒻᒪᕆᖕᒥᒃ" 20−ᖏᓐᓃᑎᓪᓗᒍ ᑖᓐᓇ ᓱᕋᑲᓴᒃᖢᓂᐅᒃ ᑭᓱᒥᒃ ᑕᐅᑐᒐᖃᙱᓐᓂᕐᒥᓄᑦ ᑭᓯᐊᓂ ᐃᓅᖃᑎᒌᖕᓂᕐᒥᒃ.

"ᑕᐃᒫᓂᖔᖅ ᐊᑐᖅᖢᖓ ᐊᓂᒍᖅᑎᑦᑕᕆᐊᖃᓚᐅᕐᒥᔭᕋ ᖃᐅᔨᑦᑎᐊᓚᐅᙱᓐᓂᓐᓂ ᑭᓇᐅᖕᒪᖔᕐᒪ. 12-ᖑᓚᐅᖅᓯᒪᔪᕕᓃᑦ," ᐅᐊᐸᔅ ᐅᖃᖅᑐᖅ.

ᑕᐃᒪᓕ, ᐅᐊᐸᔅ ᖃᐅᔨᓯᒪᓕᖅᑐᖅ ᑭᓇᐅᓂᕐᒥᓂᒃ ᐊᒻᒪᓗ ᐅᖃᐅᔾᔭᐅᒋᐊᕐᓂᖅᐸᑦ ᑭᓇᑐᐃᓐᓇᕐᒥᒃ, ᖃᐅᔨᓇᓱᐊᕋᔭᖅᐳᑎᑦ ᖃᓄᐃᓕᐅᕆᐊᒃᓴᖅ ᐊᒻᒪᓗ ᑭᓱᒥᒃ ᐃᒃᐱᒍᓱᒃᑎᒋᖕᒪᖔᖅᐱᑦ, ᑕᐃᒪᓕ ᐃᑲᔪᖅᑐᕐᓗᒍ.

ᐅᖃᕆᓪᓗᓂᓗ ᑭᓇᑐᐃᓐᓇᕐᒥᑦ ᐅᖃᐅᔾᔨᖁᔨᙱᖦᖢᓂ ᐊᔪᕐᓂᕐᓂᒃ ᐊᒻᒪ ᑕᐅᑐᓪᓗᐊᑕᑐᐃᓐᓇᕐᓗᑎᑦ ᐱᔪᒃᓯᓂᕆᔭᕐᓂᒃ.

"ᓱᓕᓂᐊᕐᓂᕋᖅᐳᖓ, ᖃᐅᔨᑐᐊᕈᕕᐅᒃ ᑕᒪᓐᓇ ᐃᓅᓯᖅᐱᑦ ᐃᓚᒋᖕᒪᒍ, ᖃᓄᑭᐊᖅ, ᐱᕕᒃᓴᐃᑦ ᐊᒻᒪ ᓇᖕᒥᓂᖅ−ᓇᒡᓕᒋᓂᖅ ᐊᒻᒪ ᖁᓱᔪᓐᓃᕐᓂᖅ ᓇᖕᒥᓂᖅ ᐱᕈᖅᐸᓪᓕᐊᓂᐊᖅᑐᖅ."

ᖁᔭᓐᓇᒦᑦᑎᐊᕐᒥᔭᕋ ᔮᔅᒥᓐ ᑲᐸᑕᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.